Èɖɔ Agbebolo La Kpɔa?

DƆ NƆ modzakatsaɖilawo wum. Woƒe tsatsa le Betlexem blemadu la ƒe teƒeteƒewo na dɔ nɔ wo wum vevie, eye wodi be yewoaɖɔ dua me nuɖuɖu aɖe kpɔ. Wo dometɔ ɖeka kpɔ nuɖuɖudzraƒe aɖe si me wodzraa nuɖuɖu vivi aɖe si nye falafel le; enye abolo si woyɔna be pita bread si me wotsɔa azi ƒomevi aɖe si wotu hekpe ɖe timati, sabala, kple amagbe bubuwo ŋu denɛ. Nuɖuɖu vivi sia na ŋusẽ gaɖo wo ŋu woyi woƒe tsaɖiɖia dzi.

Nu si tsaɖila mawo menya o ye nye be abolo ma ɖuɖue anya nye nuteƒekpɔkpɔ nyuitɔ si su wo si gbe ma gbe. Ŋkɔnya Betlexem gɔmee nye “Aboloƒeme,” eye wole abolo mèm le nuto ma me ƒe akpe nanewoe nye esia. (Rut 1:22; 2:14) Egbea, Pita bread le abolo siwo woɖuna wu le Betlexem la dome.

Ƒe akpe ene kloe ye nye esia, le teƒe aɖe si medidi boo tso Betlexem ƒe anyiehe o la, Abraham srɔ̃, Sara, mè “abolo” dzodzoe tsɔ ɖo kplɔ̃ na amedzro etɔ̃ siwo womenɔ mɔ kpɔm na o. (1 Mose 18:6, NW) Anɔ eme be “wɔ memee” si Sara tsɔ mè aboloae la nye esi wotsɔ ƒo, alo lu si woyɔna be emmer la tu. Ehiã be Sara namè aboloa kaba, eye ɖewohĩ kpe dzodzoewo dzie wòmèe le.​—1 Fiawo 19:6.

Abe ale si ŋutinya sia ɖee fia ene la, Abraham ƒe ƒomea ŋutɔe mèa woƒe abolo. Esi wonye tsatsalawo ta la, anɔ eme be Sara kple eƒe dɔlanyɔnuwo metea ŋu mèa abolo le abolokpo siwo tɔgbi wozãna esime wonɔ Ur afi si Sara tso la me o. Nuku siwo wɔna le nutoa me lae wòtsɔna tua wɔe. Dɔ sesẽ ŋutɔe esia anye be woatsɔ té sue, kple ɖewohĩ to kple tati, si woate ŋu atsɔ azɔ mɔe la atu wɔe.

Ƒe alafa ene megbe la, Mose ƒe Sea gblɔ be mele be woaxɔ té kple tévi awɔbae le ame si o, elabena eya nue amea anɔ ‘agbe’ ɖo. (5 Mose 24:6) Mawu bua té nu vevii ŋutɔ, elabena eya manɔmee la, ƒomea mate ŋu akpɔ woƒe gbe sia gbe bolo o.​—Kpɔ aɖaka si nye “Gbe Sia Gbe Wɔtutu Kple Abolomeme Le Biblia Ŋlɔɣiwo.”

Ŋɔŋlɔawo yɔ abolo ŋkɔ zi alafa geɖe, eye Biblia ŋlɔlawo yɔa abolo ɖe nuɖuɖu teƒe zi geɖe. Yesu ɖee fia be Mawu subɔlawo ate ŋu ado gbe ɖa kple kakaɖedzi be: “Na míaƒe abolo si asu mía nu egbe la mí.” (Mateo 6:11) Le kpukpui sia me la, “abolo” le tsitre ɖi na nuɖuɖu, eye Yesu le eɖem fia be míate ŋu aɖo ŋu ɖe Mawu ŋu be wòana míaƒe gbe sia gbe nuɖuɖu mí.​—Psalmo 37:25.

Gake nane li si gale vevie wu abolo, alo nuɖuɖu. Yesu gblɔ be: “Mele be ame nanɔ agbe ɖe abolo ɖeɖe ko ŋu o, ke boŋ ɖe nya sia nya si dona tso Yehowa ƒe nu me ŋu.” (Mateo 4:4) Eƒe nya sia he susu yi ɣeyiɣi si me wòhiã be Israel viwo nakpɔ Mawu si nu bliboe hena woƒe nuhiahiãwo la dzi. Esia dze egɔme ɣeyiɣi kpui aɖe le woƒe ʋuʋu tso Egipte megbe. Wonɔ Sinai Gbedadaƒo anɔ abe dzinu ɖeka ene ye nye ema, eye woƒe nuɖuɖuwo nɔ vɔvɔm. Esi wonɔ vɔvɔ̃m be dɔ ava wu yewo yewoaku le dzogbenyigba ma dzi ta la, woli liʋiliʋi be: “Míeɖua abolo ɖia ƒo” esime míenɔ Egipte.​—2 Mose 16:1-3.

Ðikeke mele eme o be abolo viviwo nɔ Egipte. Le Mose ƒe ɣeyiɣia me la, aboloƒola bibiwo mèa abolo kple akpɔnɔvivi ƒomevi vovovowo na Egiptetɔwo. Gake Yehowa meɖoe be yeagblẽ yeƒe amewo ɖi abolodɔ nawu wo o. Edo ŋugbe be: “Kpɔ ɖa mana abolo nadza tso dziƒo na mi.” Eye kaka ŋu nake la, wokpɔ abolo sia si dza tso dziƒo la ŋdi kanya; enye “nu sue nogonogoewo,” si ƒe dzedzeme le abe kpetsi wluiwluiwo ene. Esi Israel viwo kpɔe zi gbãtɔ la, wobia be: “Nu kae nye esi?” Mose gblɔ na wo be: “Esiae nye abolo, si Yehowa na mi, be miaɖu.” Woyɔe be mana,a eye wonɔ agbe ɖe abolo sia nu ƒe 40 sɔŋ.​—2 Mose 16:4, 13-15, 31.

Mana sia si Mawu na Israel viwo nukutɔe la anya wɔ dɔ ɖe wo dzi le gɔmedzedzea. Evivina ‘abe abolo gbabɛ si me wode anyitsii ene,’ eye wòsɔ gbɔ ade ame sia ame nu. (2 Mose 16:18) Gake ɣeyiɣi aɖe megbe la, nuɖuɖu vovovo siwo woɖuna le Egipte tsã la va nɔ wo dzrom. Woto nyatoƒoe be: “Naneke mele afi sia o, negbe mana sia ko kpɔm míele.” (4 Mose 11:6) Emegbe wodo dziku gblɔ be: “Nuɖuɖu vlo sia le ŋu nyɔm na mí.” (4 Mose 21:5) Mlɔeba la, “dziƒobolo” la megava dze wo ŋu o eye wònyɔ ŋu na wo.​—Psalmo 105:40.

Eme kɔ ƒãa be ate ŋu adzɔ bɔbɔe be woabu abolo kple nu bubu geɖewo nu tsɛe. Gake Biblia ƒo nu tso abolo tɔxɛ aɖe si mele be míado vloe gbeɖe o la ŋu. Abolo sia si Yesu tsɔ sɔ kple mana si Israel viwo do vloe la ate ŋu ana yayra mavɔwo nasu ame si.

Yesu gblɔ na eƒe nyaselawo be: “Nyee nye agbebolo la. Mia tɔgbuiwo ɖu mana le gbedadaƒo, ke hã, woku. Esiae nye abolo si ɖi tso dziƒo va, bene ame sia ame naɖu eƒe ɖe, be wòagaku o. Nyee nye agbebolo si ɖi tso dziƒo va; ne ame aɖe ɖua abolo sia ƒe ɖe la, anɔ agbe tegbee; eye le nyateƒe me la, abolo si mana ɖe xexea ƒe agbe ta lae nye nye ŋutilã.”​—Yohanes 6:48-51.

Ale si Yesu ƒo nu tso “abolo” kple “ŋutilã” ŋu le kpɔɖeŋunyagbɔgblɔ nu la me mekɔ na eƒe nyaselawo dometɔ geɖe o. Gake kpɔɖeŋua sɔ ŋutɔ. Yudatɔwo nɔa agbe ɖe abolo ŋutɔŋutɔ nu gbe sia gbe, abe ale si ko Israel viwo nɔ agbe ɖe mana nu le gbeadzi ƒe 40 ene. Togbɔ be mana la nye nunana tso Mawu gbɔ hã la, mena eɖulawo nɔ agbe tegbee o. Gake Yesu ƒe vɔsaa ya ana agbe mavɔ nasu ame siwo xɔ eyama dzi se la si. Eyae nye “agbebolo la” vavã.

Ne dɔ le wuwòm la, ɖewohĩ èdia abolo aɖe ɖuna. Eye anɔ eme be èdaa akpe na Mawu ɖe wò ‘gbe sia gbe bolo’ ta. (Mateo 6:11, The New English Bible) Ele eme be nuɖuɖu vivi doa dzidzɔ na mí, gake negadzɔ gbeɖe be míado kpo asixɔxɔdede “agbebolo la,” si nye Yesu Kristo, ŋu o.

To vovo na Israel vi siwo nɔ anyi le Mose ŋɔli siwo mekpɔa ŋudzedze ɖe nu ŋu o la, aleke míawo ya míate ŋu aɖee afia be míebua abolo xɔasi sia nu tsɛe o? Yesu gblɔ be: “Ne mielɔ̃am la, ekema miawɔ nye sewo dzi.” (Yohanes 14:15) Ne míewɔa Yesu ƒe sewo dzi la, ke mɔkpɔkpɔ li be míaɖu abolo kple dzidzɔ yi ɖe mavɔmavɔ me.​—5 Mose 12:7.