Aleke Gbegbee Nèlɔ̃ Mawu Ƒe Nya Lae?
“Aleke gbegbe nyemehelɔ̃a wò se lae o! Nye ŋugbledede wònye ɖaa.”—PSALMO 119:97.
1. Mɔ ɖeka ka nue mawuvɔ̃lawo ɖea woƒe lɔlɔ̃ na Mawu ƒe Nya la fiana le?
BIBLIA le ŋutsu kple nyɔnu miliɔn alafa geɖe si. Gake vovototo le Biblia ƒe amesinɔnɔ kple Mawu ƒe Nya la lɔlɔ̃ dome. Ne ame aɖe gblɔ be yelɔ̃ Mawu ƒe Nya la gake ƒã hafi wòxlẽnɛ la, nyateƒee wòtoa? Ao ɖe! Gake ame aɖewo siwo medea bubu Biblia ŋu kura o tsã la va le exlẽm gbesiagbe fifia. Wosrɔ̃ alesi woalɔ̃ Mawu ƒe Nyae, eye woawo hã dea ŋugble le Mawu ƒe Nya la ŋu “ɖaa” abe alesi hakpala la wɔe ene.—Psalmo 119:97.
2. Aleke wolé Yehowa Ðasefo aɖe ƒe xɔse ɖe te le nɔnɔme sesẽwo mee?
2 Ame aɖe si va lɔ̃ Mawu ƒe Nya lae nye Nasho Dori. Eya kple haxɔsetɔwo do dzi le Yehowa subɔsubɔ me ƒe bla nanewo le wo denyigba Albania. Le ɣeyiɣi ma ƒe akpa gãtɔ me la, woxe mɔ ɖe Yehowa Ðasefowo ƒe dɔ nu, eye Biblia-srɔ̃gbalẽ ʋɛ aɖewo koe sua Kristotɔ wɔnuteƒe siawo si. Gake xɔse sẽŋu gakpɔtɔ nɔ Nɔviŋutsu Dori si. Aleke wòdzɔe? Egblɔ be: “Nye taɖodzinue nye be maxlẽ Biblia la gaƒoƒo ɖeka ya teti gbesiagbe, eye mewɔe anɔ ƒe 60 kple edzivɔ hafi nye ŋku va tsi.” Vaseɖe nyitsɔ laa la, Biblia bliboa menɔ Albaniagbe me o, gake Nɔviŋutsu Dori srɔ̃ Helagbe le ɖevime, eyata gbe ma me ƒe Bibliae wòxlẽna. Biblia xexlẽ edziedzie lé Nɔviŋutsu Dori ɖe te le dodokpɔ vovovowo me, eye ate ŋu alé míawo hã ɖe te nenema ke.
Mawu ƒe Nya la ‘Nadzro Wò Vevie’
3. Nɔnɔme kae wòle be Kristotɔwo natu ɖo ɖe Mawu ƒe Nya la ŋu?
3 Apostolo Petro ŋlɔ be: “Abe vidzĩewo ene la gbɔgbɔ me notsi tsimatɔ nadzro mi vevie.” (Petro I, 2:2) Abe alesi vidzĩ dada ƒe notsi dzronɛ vevie ene la, nenema ke Kristotɔ siwo tsia dzi ɖe woƒe gbɔgbɔmenuhiahiã ŋu hã kpɔa dzidzɔ geɖe ɖe Mawu ƒe Nya la xexlẽ ŋui. Nenemae nèsenɛ le ɖokuiwò mea? Ne mele nenema o la, dzi megaɖe le ƒowò o. Wò hã àte ŋu atu dzodzro na Mawu ƒe Nya la ɖo.
4. Nukae wòbia be woana Biblia xexlẽ nazu numame woanɔ wɔwɔm gbesiagbe?
4 Hafi nàte ŋu awɔ esia la, gbã mlã ɖokuiwò ale be nàna Biblia xexlẽ nazu numame nànɔ wɔwɔm edziedzi, ne anya wɔ la, gbesiagbe. (Dɔwɔwɔwo 17:11) Ðewohĩ màte ŋu azã gaƒoƒo ɖeka ɖe Biblia xexlẽ ŋu gbesiagbe abe alesi Nasho Dori wɔe ene o, gake ɖewohĩ anya wɔ be nàɖo ɣeyiɣi aɖe ɖi gbesiagbe atsɔ adzro Mawu ƒe Nya la mee. Kristotɔ geɖe fɔna aɖabaƒoƒo ʋɛ aɖewo do ŋgɔ kple susu be yewoade ŋugble le Biblia ƒe kpukpui aɖe ŋu. Mɔ nyui bubu kae gali wu esia si woatsɔ adze ŋkekea gɔmee? Ame bubuwo tiae be yewoatsɔ Biblia xexlẽ awu ŋkekea nui hafi amlɔ anyi. Ke hã ame bubuwo hã xlẽa Biblia le ɣeyiɣi bubu si de wo dzi me. Nu vevitɔe nye be nàxlẽ Biblia edziedzi. Emegbe nàzã ɣeyiɣi ʋɛ aɖewo atsɔ ade ŋugble le nusi nèxlẽ ŋu. Mina míade ŋugble le ame aɖewo siwo Mawu ƒe Nya la xexlẽ kple ŋugbledede le eŋu ɖe vi na ƒe kpɔɖeŋu aɖewo ŋu kpɔ.
Hakpala si Lɔ̃ Mawu ƒe Se La
5, 6. Togbɔ be míenya Psalmo 119 lia ŋlɔla ƒe ŋkɔ o hã la, nukae míate ŋu asrɔ̃ tso eŋu ne míexlẽ nusiwo wòŋlɔ hede ŋugble le wo ŋu?
5 Psalmo 119 lia ŋlɔla kpɔ ŋudzedze ɖe Mawu ƒe Nya la ŋu vavã. Amekae ŋlɔ psalmo ma? Womeyɔ eŋlɔla ƒe ŋkɔ le Biblia me o. Gake míesrɔ̃ nu geɖe tso eŋu le psalmo la me nyawo me, eye míekpɔe be edo go kuxiwo le agbe me. Amesiwo dome wònɔ, siwo gblɔ be Yehowa subɔlawo yewonye la melɔ̃ Biblia ƒe gɔmeɖosewo abe alesi wòlɔ̃e ene o. Gake hakpala la meɖe mɔ woƒe nɔnɔme na wògbe nu nyui wɔwɔ o. (Psalmo 119:23) Ne mia kple amesi medea bubu Biblia ƒe dzidzenuwo ŋu o ye li alo nèwɔa dɔ kplii la, ke àkpɔe be mia kple hakpala la ƒe nɔnɔmea sɔ le go aɖewo me.
6 Togbɔ be hakpala la nye mawuvɔ̃la hã la, mebu eɖokui ame dzɔdzɔe o. Elɔ̃ ɖe eƒe gbɔdzɔgbɔdzɔwo dzi faa. (Psalmo 119:4b, 6, 67) Gake meɖe mɔ nuvɔ̃ ɖu edzi o. Ebia be: “Aleke ɖekakpui alé eƒe mɔ atsɔ fɔɖiɖi manɔmee?” Eɖo eŋu be: “Ne elé ŋku ɖe eɖokui ŋu ɖe wò nya la nu.” (Psalmo 119:9) Emegbe esi hakpala la nɔ gbe tem ɖe alesi gbegbe Mawu ƒe Nya te ŋu nana wowɔa nu nyuii dzi la, egblɔ kpee be: “Meɣla wò nyawo ɖe nye dzi me, ne nyemagawɔ nuvɔ̃ ɖe ŋuwò o.” (Psalmo 119:11) Ameʋãŋusẽ si ate ŋu ana míaƒo asa na nuvɔ̃ wɔwɔ ɖe Mawu ŋu la sẽ ŋu vavã!
7. Nukata wòle be sɔhɛwo koŋ nanya vevienyenye si le Biblia xexlẽ gbesiagbe ŋu?
7 Anyo be sɔhɛ Kristotɔwo nade ŋugble le hakpala la ƒe nyawo ŋu. Nɔnɔmewo ɖea kpe na Kristotɔ sɔhɛwo egbea. Abosam adi vevie be yeagblẽ Yehowa subɔla matsimatsi siawo dome. Satana ƒe taɖodzinue nye be yeable Kristotɔ sɔhɛwo nu woaɖe asi le wo ɖokui ŋu na ŋutilã ƒe nudzodzrowo ada Mawu ƒe sewo dzi. Abosam ƒe tamesusue dzena le sinimawo kple television dzi wɔnawo me zi geɖe. Edzena abe fefe siawo wɔla xɔŋkɔwo nya kpɔ eye woƒe nu nyoa ame ŋu ene; wobua agbe gbegblẽ si wonɔna be esɔ. Nuka fiam wòle? ‘Esɔ be amesiwo meɖe wo nɔewo o la nadɔ, zi alesi wolɔ̃ wo nɔewo ko.’ Ewɔ nublanui be ƒe sia ƒe la, nukpɔsusu sia ɖea Kristotɔ sɔhɛwo. Wo dometɔ aɖewo ƒe xɔse dzea go. Eyata nyaƒoɖeamenua le edzi yim! Gake ɖe nyaƒoɖeamenua nu sẽ ale gbegbe be wɔna aɖeke megale mi sɔhɛwo ŋu oa? Mele nenema kura o! Yehowa wɔ ɖoɖo ɖe mɔnu aɖe ŋu na Kristotɔ sɔhɛwo bene woate ŋu aɖu dzodzro vɔ̃wo dzi. Ne ‘wolé ŋku ɖe wo ɖokui ŋu le Mawu ƒe Nya la nu, eye wodzra Mawu ƒe nyawo ɖo ɖe woƒe dzi me’ la, woate ŋu anɔ te ɖe Abosam ƒe aʋawɔnu ɖesiaɖe si wòato vɛ nu. Ɣeyiɣi agbɔsɔsɔme kae nèzãna ɖe ɖokuisi Biblia xexlẽ edziedzi kple ŋugble dede le eŋu ŋuti?
8. Aleke kpɔɖeŋu siwo woyɔ le memama sia me ate ŋu akpe ɖe ŋuwò be nàgakpɔ ŋudzedze geɖe ɖe Mose ƒe Sea ŋu?
8 Psalmo 119 lia ŋlɔla kɔ gbe dzi gblɔ be: “Aleke gbegbe nyemehelɔ̃a wò se lae o!” (Psalmo 119:97) Se ka gblɔm wòle? Nya siwo Yehowa ɖe fia, siwo dome Mose ƒe Sea hã le ye wòwɔnɛ. Ne ame aɖewo se Se sia ƒe nya zi gbãtɔ la, woabui tsigãdzinyae abia be aleke woalɔ̃ se siawoe hã. Gake ne míede ŋugble le Mose ƒe Sea ƒe akpa vovovoawo ŋu abe alesi hakpala la wɔe ene la, míakpɔ susu si ta wode Sea ɖo. Le nyagblɔɖi geɖe siwo le Sea me megbe la, dzadzɛnyenye kple nuɖuɖu ƒe se siwo na wonɔ kɔkɔe henɔ lãmesẽ me hã li. (Mose III, 7:23, 24, 26; 11:2-8) Sea de dzi ƒo be woaɖi anukware le asitsanyawo me eye wòxlɔ̃ nu Israel-viwo be woase veve ɖe hati subɔla siwo hiã tu nu. (Mose II, 22:25, 26; 23:6; Mose III, 19:35, 36; Mose V, 24:17-21) Ele be woadrɔ̃ nya ameŋkumemakpɔmakpɔe. (Mose V, 16:19; 19:15) Ðikeke mele eme o be esi Psalmo 119 lia ŋlɔla la va nɔ nuteƒe kpɔm le agbe me la, ekpɔ alesi nuwo dze edzi na amesiwo wɔ Mawu ƒe Sea ŋudɔe, eye alesi gbegbe wòlɔ̃ Seae la gasẽ ɖe edzi. Nenema ke egbea hã esi Kristotɔwo le dzidzedze kpɔm le Biblia ƒe gɔmeɖosewo ŋudɔwɔwɔ me la, alesi gbegbe wolɔ̃ Mawu ƒe Nya lae hekpɔa ŋudzedze ɖe eŋui nu gasẽna ɖe edzi.
Fiavi si Do Dzi Wɔ Nusi To Vovo
9. Nɔnɔme kae va nɔ Fia Xizkiya si ɖe Mawu ƒe Nya la ŋu?
9 Psalmo 119 lia me nyawo sɔ nyuie kple nusi míenya tso Xizkiya ŋu esime wòkpɔtɔ nye fiavi sue. Biblia-nyala aɖewo gblɔ be Xizkiya ye ŋlɔ psalmo la. Togbɔ be míekpɔ kakaɖedzi na nya sia o hã la, míenya be Xizkiya de bubu gã aɖe Mawu ƒe Nya la ŋu. Eɖee fia to alesi wònɔ agbee dzi be yewɔ ɖeka kple nya siwo le Psalmo 119:97 tso dzi ƒe gogloeƒe ke. Biblia gblɔ le Xizkiya ŋu be: “Eku ɖe Yehowa ŋu, eye mete ɖa le eŋu o, eye wòlé Yehowa ƒe se, siwo wòde na Mose la me ɖe asi.”—Fiawo II, 18:6.
10. Dzideƒo kae Xizkiya ƒe kpɔɖeŋua nye na Kristotɔ siwo menye dzila mawuvɔ̃lawoe na hehe wo o?
10 Nuŋlɔɖiawo katã ɖee fia be Xizkiya metsi le ƒome vɔ̃mawu me o. Fofoa Fia Axaz nye trɔ̃subɔla xɔsemanɔsitɔ si ne mede ɖeke o la, etɔ dzo viawo dometɔ ɖeka—si nye Xizkiya ŋutɔ nɔvi—tsɔ sa vɔe na alakpamawu! (Fiawo II, 16:3) Togbɔ be kpɔɖeŋu vɔ̃ɖi sia nɔ anyi hã la, Xizkiya dze agbagba dze si Mawu ƒe Nya la ale be ‘wòɖe trɔ̃subɔsubɔ nuwɔnawo le eƒe mɔ me.’—Kronika II, 29:2.
11. Abe alesi Xizkiya kpɔe ene la, aleke nuwo va nɔ na fofoa mawɔnuteƒe lae?
11 Esi Xizkiya nɔ tsitsim la, eya ŋutɔ kpɔ alesi fofoa trɔ̃subɔla la nɔ Dziɖuɖunyawo gbɔ kpɔmee. Futɔwo ƒo xlã Yuda. Rezin si nye Siria (alo Aram) fia wɔ ɖeka kple Israel Fia Pekax woɖe to ɖe Yerusalem. (Fiawo II, 16:5, 6) Edomtɔwo kple Filistitɔ siwo va dzea Yuda dzi bɔbɔe hexɔa Yuda-du aɖewo gɔ̃ hã nɔ anyi. (Kronika II, 28:16-19) Aleke Axaz kpɔ nya sesẽ siawo gbɔe? Le esi teƒe be Axaz nabia kpekpeɖeŋu tso Yehowa gbɔ atso ɖe Siria ŋu la, etrɔ ɖe Asiria-fia ŋu hetsɔ sika kple klosalo kpakple gbedoxɔ me kesinɔnuwo na zãnui. Gake nusia wɔwɔ mena ŋutifafa nɔ Yuda eteƒe didi o.—Fiawo II, 16:6, 8.
12. Nukae Xizkiya awɔ be wòaƒo asa na vodada siwo fofoa wɔ?
12 Le ɣeyiɣi aɖe megbe la, Axaz ku eye Xizkiya zu fia esime wòxɔ ƒe 25. (Kronika II, 29:1) Metsi tututu hafi o, gake ema mena wòzu fia makpɔdzidzedze o. Le esi teƒe be wòasrɔ̃ fofoa mawɔnuteƒea ƒe kpɔɖeŋu la, elé ɖe Yehowa ƒe Sea ŋu. Se siawo dometɔ aɖee nye esi wode na fiawo etɔxɛe be: “Ne [fia la va] fiazi dzi la, wòana Lewitɔwo, siwo nye nunɔlawo la, nagbugbɔ se sia aŋlɔ nɛ ɖe agbalẽ me. Eye wòanɔ esi wòaxlẽ le eƒe agbe me ŋkekewo katã me, ne wòanya alesi wòavɔ̃ Yehowa, eƒe Mawu la, eye wòalé se kple ɖoɖo siawo katã me nyawo me ɖe asi, eye wòawɔ wo dzi.” (Mose V, 17:18, 19) Mawu ƒe Nya la xexlẽ gbesiagbe awɔe be Xizkiya nanya alesi wòavɔ̃ Yehowa ahaƒo asa na vodada siwo fofoa mavɔ̃mawua wɔ.
13. Aleke Kristotɔ awɔ aka ɖe edzi be nusianu adze edzi na ye le gbɔgbɔ me?
13 Menye Israel-fiawo koe wode se na be woade ŋugble le Mawu ƒe Nya ŋu ɣesiaɣi o ke wodee na Israel-vi mawuvɔ̃lawo katã hã be woawɔe nenema. Psalmo gbãtɔ ɖɔ dzidzɔme vavãtɔ be enye amesi “[kpɔa] dzidzɔ le Yehowa ƒe se la ŋu, eye wòdea ŋugble le eƒe se la ŋu zã kple keli.” (Psalmo 1:1, 2) Hakpala la gblɔ le amesia tɔgbe ŋu be: “Nusianu, si wòwɔna la, ewɔnɛ wua nu nyuie!” (Psalmo 1:3) Gake Biblia gblɔ le amesi mexɔ Yehowa Mawu dzi se o ŋu be: “Ŋutsu dzimevesusula melina sesĩe le eƒe mɔwo katã dzi o.” (Yakobo 1:8) Mí katã míedi be míakpɔ dzidzɔ eye nu nadze edzi na mí. Biblia xexlẽ edziedzi be míakpɔ tsɔɖui le eme ate ŋu ana míakpɔ dzidzɔ.
Mawu ƒe Nya Lé Yesu Ðe Te
14. Aleke Yesu ɖe lɔlɔ̃ na Mawu ƒe Nya la fiae?
14 Ɣeaɖeɣi la, Yesu dzilawo kpɔe wònɔ anyi ɖe nufialawo dome le gbedoxɔ me le Yerusalem. ‘Eƒe nugɔmesese kple eƒe ŋuɖoɖowo wɔ mo yaa’ na amesiawo siwo bi ɖe Mawu ƒe Se la me ale gbegbe! (Luka 2:46, 47) Ƒe 12 koe Yesu xɔ ɣemaɣi. Ẽ, edze ƒã be elɔ̃ Mawu ƒe Nya la esime wònye ɖevi gɔ̃ hã. Emegbe Yesu zã Ŋɔŋlɔawo tsɔ ka mo na Abosam, be: “Menye abolo ɖeɖe ko ŋuti ame lanɔ agbe ɖo o, negbe ɖe nya sia nya, si dona tsoa Mawu ƒe nu me la ŋuti.” (Mateo 4:3-10) Ema megbe kpuie la, Yesu zã Ŋɔŋlɔawo tsɔ fia nu wo de Nazaretetɔwo.—Luka 4:16-21.
15. Aleke Yesu ɖo kpɔɖeŋu esime wònɔ gbeƒã ɖem na amewo?
15 Yesu yɔa nya zi geɖe tsoa Mawu ƒe Nya la me tsɔ ɖoa kpe eƒe nufiafiawo dzi. ‘Eƒe nufiafia nana eƒe nyaselawo ƒe nu kuna.’ (Mateo 7:28) Eye mewɔ nuku o—Yehowa Mawu ŋutɔ gbɔe Yesu ƒe nufiafiawo tso! Yesu lɔ̃ ɖe edzi be: “Nye nufiafia la menye tɔnye o, ke boŋ amesi dɔm ɖa la tɔe. Amesi le nu ƒom le ye ŋutɔ ɖokui ŋuti la, dia ye ŋutɔ ƒe kafukafu; ke amesi le amesi dɔe ɖa la ƒe kafukafu dim la, eyae nye nyateƒetɔ, eye nu madzɔmadzɔ mele eyama me o.”—Yohanes 7:16, 18.
16. Afikae Yesu ɖe eƒe lɔlɔ̃ na Mawu ƒe Nya la fia se ɖo?
16 “Nu madzɔmadzɔ mele” Yesu me abe alesi wònɔ Psalmo 119 lia ŋlɔla me ene o. Nuvɔ̃ menɔ eŋu o, enye Mawu ƒe Vi si “[bɔbɔ] eɖokui ɖe anyi, eye wòɖo to yiɖase ku me.” (Filipitɔwo 2:8; Hebritɔwo 7:26) Gake togbɔ be Yesu de blibo hã la, esrɔ̃ Mawu ƒe Sea hewɔ edzi. Nusia nye nu vevi aɖe si na wòte ŋu lé nuteƒewɔwɔ me ɖe asi. Esime Petro zã yi be yeaʋli yeƒe Aƒetɔ ta woagalée o la, Yesu ka mo na apostoloa eye wòbia be: “Alo èsusu bena, nyemate ŋu aɖe kuku na Fofonye, eye wòatsɔ mawudɔlawo nam wòawu aʋakɔ wuieve o mahã? Ke aleke awɔ ne woawu ŋɔŋlɔawo nu mahã? Elabena ele be, woava me nenema tsã!” (Mateo 26:53, 54) Ẽ, Ŋɔŋlɔawo me vava nɔ vevie na Yesu wu be wòasi le ŋutasesẽ kple ŋukpe ƒe ku nu. Mawu ƒe Nyaa lɔlɔ̃ ɖedzesi ka gbegbee nye si!
Kristo Srɔ̃la Bubuwo
17. Aleke gbegbee Mawu ƒe Nya la nɔ vevie na apostolo Pauloe?
17 Apostolo Paulo ŋlɔ na hati Kristotɔwo be: “Mizu srɔ̃nyelawo, abe alesi nye hã menye Kristo-srɔ̃la ene.” (Korintotɔwo I, 11:1) Paulo va lɔ̃ Ŋɔŋlɔawo abe alesi eƒe Aƒetɔ hã lɔ̃e ene. Eʋu eme be: “Mekpɔa dzidzɔ le Mawu ƒe se la ŋuti le ememe la gome.” (Romatɔwo 7:22) Paulo yɔa nya tsoa Mawu ƒe Nya me edziedzi. (Dɔwɔwɔwo 13:32-41; 17:2, 3; 28:23) Esime Paulo nɔ eƒe mɔfiame mamlɛtɔwo nam Timoteo, si nye ehati subɔla la, ete gbe ɖe akpa vevi si wòle be Mawu ƒe Nya nawɔ le “Mawu ƒe ame” ƒe gbesiagbegbenɔnɔ me la dzi.—Timoteo II, 3:15-17.
18. Gblɔ kpɔɖeŋu ɖeka ku ɖe ame aɖe si de bubu Mawu ƒe Nya la ŋu le egbeŋkekeawo me ŋu.
18 Yehowa subɔla wɔnuteƒe siwo li egbea dometɔ geɖe hã srɔ̃ lɔlɔ̃ si le Yesu si na Mawu ƒe Nyaa nenema ke. Le ƒe alafa sia ƒe gɔmedzedze lɔƒo la, ɖekakpui aɖe xɔ Biblia tso exɔlɔ̃ aɖe gbɔ. Eƒo nu tso ŋusẽ si nunana xɔasi sia kpɔ ɖe edzi ŋuti be: “Meɖoe ɖokuinye dzi be makpɔ egbɔ be mexlẽ Biblia ƒe akpa aɖe gbesiagbe.” Ðekakpui mae nye Frederick Franz, eye alesi wòlɔ̃ Biblia la na wònɔ agbe didi kpɔdzidzedze le Yehowa subɔsubɔ me. Woɖoa ŋku edzi nyuie le alesi wòte ŋu yɔa nya siwo le Biblia ƒe ta blibowo me tso susu me la ta.
19. Aleke ame aɖewo wɔa ɖoɖo ɖe Teokrasi Subɔsubɔ Sukua ƒe kwasiɖa ɖesiaɖe ƒe Biblia xexlẽa ŋui?
19 Yehowa Ðasefowo bua Biblia xexlẽ edziedzi nu vevi aɖee. Kwasiɖa ɖesiaɖe ne wole dzadzram ɖo ɖe Kristotɔwo ƒe kpekpeawo dometɔ ɖeka si nye Teokrasi Subɔsubɔ Sukua ŋu la, woxlẽa Biblia ƒe ta geɖe. Wodzroa Biblia ƒe akpa si wode asi na wo be woaxlẽ ƒe nya veviwo me le kpekpea me. Ðasefo aɖewo kpɔe be ade yewo dzi be yewoama kwasiɖaa ƒe Biblia xexlẽa ɖe akpa sue adre me axlẽ akpa ɖeka gbesiagbe. Wodea ŋugble le nyaawo ŋu ne wole wo xlẽm. Ne anya wɔ la, wowɔa numekuku bubuwo le Biblia-srɔ̃gbalẽwo me.
20. Nukae hiã bene woate ŋu akpɔ ɣeyiɣi ɖe Biblia xexlẽ edziedzi ŋu?
20 Ðewohĩ ahiã be ‘nàƒle ɣeyiɣi’ tso dɔwɔna bubuwo me bene nàte ŋu axlẽ Biblia edziedzi. (Efesotɔwo 5:16) Gake viɖeawo lolo sasasã wu nusiwo nàtsɔ asa vɔe. Ne Biblia xexlẽ gbesiagbe va te numame zuzu na wò la, wò lɔlɔ̃ na Mawu ƒe Nya la atsi ɖe edzi. Madidi o aʋã wò nàgblɔ abe alesi hakpala la gblɔe ene be: “Aleke gbegbe nyemehelɔ̃a wò se lae o! Nye ŋugbledede wònye ɖaa.” (Psalmo 119:97) Abe alesi woaɖee afia le nyati si kplɔe ɖo me ene la, nɔnɔme sia aɖe vi geɖe na wò fifia kple le etsɔme.
Èɖo Ŋku Wo Dzia?
◻ Aleke Psalmo 119 lia ŋlɔla ɖe lɔlɔ̃ deto na Mawu ƒe Nya la fiae?
◻ Nukawoe míate ŋu asrɔ̃ tso Yesu kple Paulo ƒe kpɔɖeŋuwo me?
◻ Aleke mía ŋutɔwo míawɔe be míaƒe lɔlɔ̃ na Mawu ƒe Nya la natsi ɖe edzi?
[Nɔnɔmetata siwo le axa 10]
Wobia tso fia wɔnuteƒewo si be woaxlẽ Mawu ƒe Nya la edziedzi. Èxlẽnɛa?
[Nɔnɔmetata si le axa 12]
Esime Yesu nye ɖevi gɔ̃ hã la, elɔ̃ Mawu ƒe Nya la