Biblia Ƒe Nukpɔsusu

Ðe Wòle Be Kristotɔwo Nalé Fu Ŋutsu Dɔwonɔewogbɔwoa?

WOKPA nya aɖe de Eŋlisigbe me le ƒe 1969 me tsɔ ɖɔ vɔvɔ̃ na ŋutsu siwo dɔna kple wo nɔewo alo fuléle wo. Nya lae nye “homophobia.” Nya tɔxɛ ma tɔgbe mele gbegbɔgblɔ geɖe me o, gake hena ƒe akpe geɖe la, dukɔ geɖe me tɔwo kple gbe vovovo dolawo ɖee fia gaglã be yewolé fu ŋutsu alo nyɔnu siwo dɔna kple wo nɔewo.

Gake le ƒe ʋee siawo me la, wode ŋutsu kple ŋutsu alo nyɔnu kple nyɔnu ƒe wo nɔewo gbɔ dɔdɔ dzi be gbɔdɔdɔ ƒe mɔnu bubu koe wònye. Ŋutinyaŋlɔla Jerry Z. Muller ŋlɔ nu nyitsɔ laa tso alesi “ame geɖe wu va le didim be amewo nada asi ɖe vidzinuɖekatɔwo ƒe wo nɔewo gbɔ dɔdɔ dzi ahade bubu eŋu” la ŋu. Eɖe eme be amenɔewogbɔdɔlawo “va le ɖeka wɔm ɖe edzi hele gbeƒã ɖem woƒe wɔna la be enye nu nyui, eye wole tɔ tem ɖe edzi be amewo hã nabui nu nyuii.” Míekpɔa nusia vevietɔ le Ɣetoɖoƒedukɔwo me. Gake wogabua fɔ amenɔewogbɔdɔdɔ eye wotsrii kokoko le xexeame ƒe akpa gãtɔ, kple le dukɔ siwo ɖea mɔ ɖe nu ŋu faa gɔ̃ hã me.

Zi geɖe la, wotɔa ŋku amenɔewogbɔdɔla siwo ŋu wobunɛ ɖo be wodɔa wo nɔewo gbɔ eye wogblɔa vlodoamenyawo ɖe wo ŋu, woɖea fu na wo, eye wodoa adã ɖe wo ŋu. Subɔsubɔhaŋgɔnɔlawo gɔ̃ hã ɖe fuléle ma tɔgbe fia. Wo dometɔ aɖewo dze nanewo siwo dze abe woawo ŋutɔ ƒe aʋahoho ɖe amenɔewogbɔdɔlawo ŋu ene gɔme. Le kpɔɖeŋu me, bu nya siwo Greek Orthodɔks Ha ƒe bisiɔp gblɔ woɖe gbeƒãe le Greece-dukɔa ƒe radio dzi ŋu kpɔ. Egblɔ be: “Mawu atɔ dzo amenɔewogbɔdɔlawo le hell ƒe dzobibi me tegbetegbe. Woƒe nu ƒoɖiawo ƒe ɣlidodowo anɔ ɖiɖim vaseɖe mavɔ me. Woawɔ fu manyagblɔ woƒe ŋutilã ɖigbɔawo.” Ðe nya sia nye nyateƒe tututua? Nukae nye Mawu ƒe nukpɔsusu le amenɔewogbɔdɔlawo ŋu?

Mawu ƒe Nukpɔsusu

Biblia megblɔ nya aɖeke le amenɔewogbɔdɔlawo ŋu abe ƒuƒoƒo ene siwo Kristotɔwo naƒo asa na alo alé fui o. Gakpe ɖe eŋu la, mefia nu be Mawu atɔ dzo amenɔewogbɔdɔlawo—alo eƒe nuwɔwɔ aɖeke—le hell ƒe dzobibi me tegbetegbe atsɔ ahe to na woe o.—Tsɔe sɔ kple Romatɔwo 6:23.

Gake Ŋɔŋlɔawo gblɔ mía Wɔla la ƒe agbenyuinɔnɔ ŋuti dzidzenu siwo tsia tre ɖe egbegbe nuwɔnawo ŋu zi geɖe la na mí. Wobu fɔ amenɔewogbɔdɔdɔ, ŋutsu kple nyɔnu siwo menye srɔ̃tɔwo o ƒe gbɔdɔdɔ, kple lã gbɔ dɔdɔ le Biblia me. (Mose II, 22:19; Efesotɔwo 5:3-5) Gbɔdɔdɔnuwɔna mawo tae Mawu tsrɔ̃ Sodom kple Gomora ɖo.—Mose I, 13:13; 18:20; 19:4, 5, 24, 25.

Mawu ƒe Nya gblɔ le amenɔewogbɔdɔdɔ ŋu tẽ be: “Ŋunyɔnu wònye.” (Mose III, 18:22) Ele Se si Mawu de na Israel-viwo me be: “Ne ŋutsu aɖe dɔ ŋutsu gbɔ, abe alesi wodɔa nyɔnu gbɔe ene la, ekema woa kple eve wowɔ ŋunyɔnu; ele be, woawu wo.” (Mose III, 20:13) Tohehe ma kee wogblɔ be woahe na amesiwo dɔa lã gbɔ, amesiwo dɔa ƒometɔ kpamkpam gbɔ, kple amesiwo wɔa ahasi.—Mose III, 20:10-12, 14-17.

Gbɔgbɔ ʋã apostolo Paulo wògblɔ be amenɔewogbɔdɔdɔ nye “ahɔhlɔ̃bɔbɔ yomenɔnɔ” kple be enye “nusi mele dzɔdzɔme nu o.” Eŋlɔe be: “Eyaŋuti Mawu tsɔ wo de asi na ahɔhlɔ̃bɔbɔ yomenɔnɔ; elabena woƒe nyɔnuwo tsɔ dzɔdzɔme ƒe kɔnu wɔ nusi mele dzɔdzɔme nu o; nenema ke woƒe ŋutsuwo hã gblẽ nyɔnuwo ƒe dzɔdzɔmekɔnu ɖi, eye wofiã le woƒe fiẽŋufiẽŋui me ɖe wo nɔewo ŋu, eye ŋutsu kple ŋutsu wɔ ŋukpenanuwo, eye wokpɔ woƒe vodada ŋuti fetu, si dze wo la, le wo ɖokui ŋu. Eye alesi womebu eŋu bena, woalé Mawu ƒe sidzedze ɖe asi o la, nenema Mawu hã tsɔ wo de asi na tamebubu, si medze o, bene woawɔ nusiwo medze o.”—Romatɔwo 1:26-28.

Ŋɔŋlɔawo meɖe naneke le eme o, meɖe mɔ ɖe naneke ŋu o, mena míetsi vedome o; amenɔewogbɔdɔdɔ, ahasiwɔwɔ, matrewɔwɔ, wo katã wonye ŋunyɔnu le Mawu ŋkume. Eyata Kristotɔ vavãwo metɔa tsi nya si Biblia gblɔ le “ahɔhlɔ̃bɔbɔ yomenɔnɔ” ŋu kple susu be yewoadze amewo ŋu wu alo be yewoawɔ nu wòasɔ kple egbegbe tɔwo tɔ o. Eye womedea habɔbɔ aɖeke si woɖo be woatsɔ aʋli amenɔewogbɔdɔdɔ ta be enye agbenɔnɔ si nyo dzi hã o.

“Milé Fu Vɔ̃”

Biblia ɖo aɖaŋu be: “Mi amesiwo lɔ̃a Yehowa la, milé fu vɔ̃!” (Psalmo 97:10) Eyata wobia tso Kristotɔwo si be woalé fu nuwɔna ɖesiaɖe si tsi tre ɖe Yehowa ƒe sewo ŋu. Ðewohĩ ame aɖewo atsɔ fuléle si nu sẽ awɔ nu ɖe amenɔewogbɔdɔdɔ ŋu alo anyɔ ŋui wu alesi woawɔ ɖe agbegbegblẽnɔnɔ ƒomevi bubuwo ŋu, ahabu amenɔewogbɔdɔdɔ be enye gbɔdɔdɔ ƒe nutovowɔwɔ si mele dzɔdzɔme nu o. Gake ɖe wòle be Kristotɔ nalé fu amesiwo wɔa nu mawoa?

Hakpala la kɔ nya sia me vie le Psalmo 139:21, 22 be: “Yehowa, ɖe nyemalé fu amesiwo léa fu wò, eye nyemanyɔ ŋu amesiwo tsona ɖe ŋuwò la oa? Melé fu wo gbidigbidi, futɔwo wozu nam.” Míaƒe kuku ɖe Yehowa kple eƒe gɔmeɖosewo ŋu nanyɔ fuléle sesẽ aɖe ɖe mía me ɖe amesiwo ɖonɛ koŋ dzea aglã ɖe Yehowa ŋu kple amesiwo wɔ wo ɖokui Mawu ƒe futɔwo la ŋu. Satana kple eƒe gbɔgbɔ vɔ̃wo le Mawu ƒe futɔ dzimesẽla mawo dome. Ele eme be amegbetɔ aɖewo hã le hatsotso sia me ya. Gake asesẽ ŋutɔ na Kristotɔ be wòadze si ame mawo le gotagome. Míate ŋu anya nusi le amewo ƒe dzi me o. (Yeremya 17:9, 10) Manyo be míasusu be le esi ame aɖe le nuvɔ̃wɔwɔ dzi ta ko la, enye Mawu ƒe futɔ si gbe dzimetɔtrɔ o. Le go aɖewo me la, Mawu ƒe dzidzenuwo koe nuvɔ̃wɔlawo menya o.

Eyata ne míagblɔe gbadza ko la, Kristotɔwo gbɔa dzi ɖi le fuléle wo havi amegbetɔwo me. Ne wonyɔa ŋu agbenɔnɔ ƒomevi aɖe vevie hã la, womedina be yewoawɔ nuvevi amewo o, eye womeléa wo ɖe dɔme alo dia vɔ̃ na wo o. Ke boŋ Biblia ɖo aɖaŋu na Kristotɔwo be ‘woanɔ anyi kple amewo katã le ŋutifafa me.’—Romatɔwo 12:9, 17-19.

“Mawu Mekpɔa Ame Ŋku Me O”

Agbe gbegblẽ ka ke nɔm ame aɖe le o, ne etrɔ dzime nyateƒe ko la, Yehowa atsɔe akee. Kpeɖodzi aɖeke meli si fia be Yehowa bua agbegbegblẽnɔnɔ ƒomevi aɖe be evɔ̃ɖi wu bubu aɖe o. “Mawu mekpɔa ame ŋku me o.” (Dɔwɔwɔwo 10:34, 35) Le kpɔɖeŋu me, bu ƒe alafa gbãtɔ me Korinto-hamea ƒe nya ŋu kpɔ. Apostolo Paulo ŋlɔ ɖo ɖe wo be: “Ahasiwɔlawo kple trɔ̃subɔlawo kple matrewɔlawo kple hadzelawo kple ŋutsu, siwo dɔna kple ŋutsuwo, kple fiafitɔwo kple ŋubiãlawo kple ahamulawo kple busubɔlawo kple adzodalawo la womanyi mawufiaɖuƒe la ƒe dome o.” (Míawoe te gbe ɖe edzi.) Emegbe Paulo lɔ̃ ɖe edzi be woxɔ amesiwo nye matrewɔlawo, ahasiwɔlawo, amenɔewogbɔdɔlawo, kple fiafitɔwo tsã la ɖe Kristo-hame si le Korinto me. Eɖe eme be: “Eye nenem mia dome ame aɖewo nɔ tsã; ke wole tsi na mi, ke wona mia ŋuti kɔ, ke wotso afia na mi le Aƒetɔ Yesu ƒe ŋkɔ la kple mía Mawu ƒe Gbɔgbɔ la me.”—Korintotɔwo I, 6:9-11.

Gake Yehowa melɔ̃na wonɔa eƒe agbenyuinɔnɔ ŋuti dzidzenu debliboawo dzi dam agbadre o. Etsri kura be woatsɔ totitri aŋe aɖaba aƒu eƒe gɔmeɖosewo dzii. Gake eʋua mɔ ɖi hena tɔtrɔwɔwɔ. (Psalmo 86:5; Yesaya 55:7) Le ɖekawɔwɔ me kple esia la, Kristotɔwo metɔa ŋku amenɔewogbɔdɔlawo, alo ame bubu ɖesiaɖe, hewɔa ŋlɔmi le wo ŋu, ɖua fewu le wo ŋu, alo ɖea fu na wo o. Nyateƒe Kristotɔwo bua wo havi amegbetɔwo be woate ŋu ava zu Kristo ƒe nusrɔ̃lawo, ale be wowɔa nu ɖe wo ŋu le bubu kple nudzeamewɔwɔ me. Biblia gblɔ be: “Elabena esia nyo, eye wòdze Mawu, mía xɔla ŋu, amesi le didim be, woaxɔ amewo katã, bene woava nyateƒe ƒe sidzedze la me.”—Timoteo I, 2:3, 4.

Kristotɔwo Xɔa Dzimetrɔla La

Biblia gblɔnɛ enuenu be Mawu tsɔna kena. Egblɔ le eŋu be enye ‘Mawu si tsɔa nuvɔ̃wo kena, amenuvela kple nublanuikpɔla, amesi gbɔa dzi blewu eye eƒe amenuveve sɔ gbɔ.’ (Nexemya 9:17; Xezekiel 33:11; Petro II, 3:9) Biblia gatsɔe sɔ kple vifofo si le Yesu ƒe lododo si ku ɖe viŋutsu nudomegblẽla si va zã eƒe domenyinu yakayaka to agbeblibanɔnɔ me le dukɔ didi aɖe me ŋu. Esi viŋutsua nyɔ le eɖokui me mlɔeba, trɔ dzime, eye wòtrɔ va eƒe ƒomea ƒeme la, vifofoa ke abɔ me nɔ viŋutsua lalam be yeaxɔe atuu.—Luka 15:11-24.

Ẽ, nuvɔ̃wɔla ate ŋu atrɔ. Ŋɔŋlɔawo lɔ̃ ɖe nya sia dzi esi wòde dzi ƒo na amewo be woaɖe asi le amenyenye xoxoa ŋu eye woatsɔ yeyetɔ ado eye be ‘woawɔ wo ɖokui yeye le tamesusu ƒe gbɔgbɔ la me.’ (Efesotɔwo 4:22-24) Amesiwo wɔa nuvɔ̃, siwo dome amenɔewogbɔdɔlawo hã le la, ate ŋu atrɔ woƒe nukpɔsusu kple agbenɔnɔ kura, eye ame geɖe te ŋu wɔ tɔtrɔ siawo dzidzedzetɔe nyateƒe.a Yesu ŋutɔ ɖe gbeƒã na amesiawo tɔgbe; eye esi wotrɔ dzime la, woƒe nu dze eŋu.—Mateo 21:31, 32.

Kristotɔwo xɔa amesiwo nɔ agbe ƒomevi vovovo kpɔ gake wotrɔ dzime la. Ne woɖe asi le agbegbegblẽnuwɔnawo ŋu vɔ, nuwɔna ka kee woɖanye o hã la, wo katã woate ŋu axɔ Mawu ƒe tsɔtsɔke ƒe viɖewo elabena “Yehowa [nye] dɔmenyotɔ na amewo katã, eye eƒe nublanuikpɔkpɔ gbagba ɖe eƒe dɔwɔwɔwo katã dzi.”—Psalmo 145:9.

Kristotɔwo le klalo be yewoana gbɔgbɔmekpekpeɖeŋu si hiã, ne woɖanye amesiwo kpɔtɔ le avu wɔm kple amenɔewogbɔdɔdɔ ƒe dzodzrowo gɔ̃ hã o. Nusia sɔ kple lɔlɔ̃ si Mawu ŋutɔ ɖe fia, elabena Biblia gblɔ be: “Mawu ɖe ye ŋutɔ ƒe lɔlɔ̃, si wòtsɔ lɔ mí la fia bena, esime míeganye nuvɔ̃wɔlawo la, Kristo ku ɖe mía ta.”—Romatɔwo 5:8.

[Etenuŋɔŋlɔ]

[Nɔnɔmetata Tsoƒe si le axa 26]

Kristotɔwo metɔa tsi Biblia ƒe nukpɔsusu le amenɔewogbɔdɔdɔ ŋu o

[Nya si ɖe dzesi si le axa 25]

Punch