Akaɖi si Akplɔ Wò Ato Agbemɔ la Dzi

“YEHOWA, menyae be, amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” (Yeremya 10:23) Nyagblɔɖila Yeremya gblɔ nya mawo tsɔ fia be amegbetɔwo mate ŋu azɔ agbemɔa dzi kpekpeɖeŋu maxɔmaxɔe wòadze edzi o. Afikae woaxɔ kpekpeɖeŋu ma atsoe? Gbe si hakpala la do ɖa na Yehowa Mawu la ɖo eŋu be: “Wò nya enye akaɖi na nye afɔ kple kekeli na nye toƒe.”—Psalmo 119:105.

Amesiwo srɔ̃a Mawu ƒe Nya, Biblia Kɔkɔe la, eye wowɔa nya siwo wògblɔ dzi la le abe amesi dze mɔzɔzɔ gɔme ŋdikanya ene. Gbã, esi xexeme tsyɔ ta la, mate ŋu akpɔ nu nyuie o. Gake ne agu le dzedzem la, eƒe nukpɔkpɔ me anɔ kɔkɔm ɖe edzi. Mlɔeba la, ɣea klẽna le eƒe tame. Ekpɔa nusianu nyuie azɔ. Kpɔɖeŋu ma na míeɖo ŋku Biblia me lododo aɖe dzi be: “Ame dzɔdzɔe ƒe toƒe le abe agudzedze ƒe kekeli, si nɔa kɔkɔm ɖe dzi, vaseɖe esime ŋu kena keŋ ene.”—Lododowo 4:18.

Ke amesiwo gbe Mawu ƒe mɔfiafia ya ɖe? Biblia gblɔ be: “Ame vɔ̃ɖi ƒe mɔ le abe blukɔ ene; womenya afika wole nu kli ge le o.” (Lododowo 4:19) Ẽ, ame vɔ̃ɖiwo le abe amesi klia nu le viviti me ene. Ne ewɔ abe ɖe nu le edzi dzem na wo ene hã la, ɣeyiɣi kpui aɖe koe wònɔa anyi, elabena “nunya kple gɔmesese kpakple aɖaŋuɖoɖo aɖeke meli [si atsi tre] ɖe Yehowa ŋu o.”—Lododowo 21:30.

Eyata wɔ ɖe Mawu ƒe Nya, Biblia, ƒe mɔfiafia dzi. Ne èwɔ ɖe edzi la, àkpɔ nyateƒe si le Lododowo 3:5, 6 ƒe nyawo me, si gblɔ be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.”