Dze Nunya Eye Nàxɔ Amehehe

YEHOWA MAWU ye nye Nufialagã si fiaa nu eƒe amewo. Mefiaa nu wo le eɖokui ko ŋu o, ke efiaa nu tso agbenɔnɔ ŋu hã. (Yesaya 30:20; 54:13; Psalmo 27:11) Le kpɔɖeŋu me Yehowa na nyagblɔɖilawo, Lewitɔwo—vevietɔ nunɔlawo—kple nunyala bubuwo Israel-dukɔa be woanye woƒe nufialawo. (Kronika II, 35:3; Yeremya 18:18) Nyagblɔɖilaawo fia Mawu ƒe tameɖoɖowo kple eƒe nɔnɔmewo ameawo eye wofia wo mɔ dzɔdzɔetɔ si dzi woato. Enye nunɔlawo kple Lewitɔwo ƒe agbanɔamedzi be woafia Yehowa ƒe Sea. Eye nunyalaawo alo ame tsitsiwo ɖoa aɖaŋu nyuiwo ku ɖe gbesiagbegbenɔnɔ ŋu.

Salomo si nye Dawid vi la ɖe dzesi le Israel nunyalawo dome. (Fiawo I, 5:10, 11) Esi Seba-fianyɔnu si nye amedzro vevitɔ kekeake siwo va srãe kpɔ dometɔ ɖeka kpɔ eƒe ŋutikɔkɔe kple kesinɔnuwo la, egblɔ be: “Womegblɔ woƒe afã gɔ̃ hã nam o; èƒo nya, si wogblɔ le wò nunya kple wò kesinɔnu ŋuti mese la ta.” (Fiawo I, 10:7) Nuka gbɔe Salomo ƒe nunyaa tso? Esi Salomo zu Israel-fia le ƒe 1037 D.M.Ŋ. me la, edo gbe ɖa bia “nunya kple sidzedze.” Esi Yehowa kpɔ ŋudzedze ɖe eƒe biabiaa ŋu ta la, ena sidzedze, nunya kple dzi senugɔmee. (Kronika II, 1:10-12; Fiawo I, 3:12) Mewɔ nuku o be Salomo “[bu] abe akpe etɔ̃”! (Fiawo I, 5:12) Woŋlɔ abebubu siawo dometɔ aɖewo tsɔ kpe ɖe ‘Agur ƒe nyawo’ kpakple “Fia Lemuel ƒe nyawo” ŋu ɖe Biblia ƒe agbalẽ si nye Lododowo me. (Lododowo. 30:1; 31:1) Nyateƒenya siwo dze le lododo siawo me ɖe Mawu ƒe nunya fia eye woanɔ anyi ɖaa. (Fiawo I, 10:23, 24) Wohiã vevie na amesiame si di be yeakpɔ dzidzɔ kple dzidzedze le agbe me egbea abe alesi wonɔ le wo gblɔɣi ene.

Dzidzedzekpɔkpɔ Kple Agbedzadzɛnɔnɔ—Alekee?

Woɖe Lododowo ƒe agbalẽa ƒe taɖodzinu me le eƒe ŋgɔdonyawo me be: “Israel-fia Salomo, Dawid vi la, ƒe lododowo nye esi, ne woadze nunya kple amehehe, eye woase nuƒoƒo nunyatɔwo gɔme, ne woaxɔ amehehe, si fiaa gɔmesese ame, dzɔdzɔenyenye, nu dzɔdzɔe wɔwɔ kple nuteƒewɔwɔ na ame ɖokui; ne gegemewo nadze aɖaŋu, eye ɖekakpuiwo nadze si nu, eye woabu tame.”—Lododowo 1:1-4.

Taɖodzinu kɔkɔ ka gbegbee nye esi le ‘Salomo ƒe lododoawo’ ŋu. Wofiaa “nunya kple amehehe” ame. Nunya bia be woakpɔ alesi nuwo le ŋutɔŋutɔ adze sii ahazã sidzedze ma atsɔ akpɔ kuxiwo gbɔe, aɖo taɖodzinuwo gbɔ, aƒo asa na kuxiwo, alo akpe ɖe amewo ŋu be woawɔe nenema. Numekugbalẽ aɖe gblɔ be: “Le Lododowo ƒe Agbalẽa me la, ‘nunya’ fia alesi woadze aɖaŋu le agbenɔnɔ me—be woate ŋu awɔ nyametsotso siwo me nunya le ahanɔ agbe dzidzedzetɔe.” Aleke gbegbe wòle vevie enye esi be míaƒle nunya!—Lododowo. 4:7.

Salomo ƒe lododoawo naa amehehe hã. Ðe míehiã hehe sia? Le Ŋɔŋlɔawo me la, amehehe fia ɖɔɖɔɖo, mokaname, alo ƒoƒo. Le Biblia-nyala aɖe ƒe nya nu la, “efia ame ƒe dzɔdzɔme mamlã, si bia be wòaɖɔ dzodzro si henɛ yia vɔ̃wɔwɔ gbɔ la ɖo.” Menye ɖeko hehexɔxɔ kpɔa mía ta be míagawɔ vɔ̃ o, ke boŋ eʋãa mí hã be míawɔ tɔtrɔ nyuiwo, eɖanye mía ŋutɔe mlã mía ɖokui alo ame bubuwoe nae o. Ẽ, ne míedi be míayi edzi anɔ agbe dzadzɛ la, ke míehiã amehehe.

Eyata taɖodzinu evee le lododoawo ŋu—be wòana nunya kple amehehe. Agbenyuinɔnɔ gome hehenana kple susua ƒe ŋutete to vovo le mɔ geɖe nu. Le kpɔɖeŋu me, dzɔdzɔenyenye kple nudzɔdzɔewɔwɔ nye agbenyuinɔnɔ ƒe nɔnɔmewo, eye wokpena ɖe mía ŋu be míazɔ ɖe Yehowa ƒe dzidzenu kɔkɔwo dzi.

Nu vovovo siwo ƒoa ƒu zua nunyae nye nugɔmesese, gɔmesese, aɖaŋudzedze kple nuŋububu ŋutete. Nugɔmesese bia be woaku nya me alé ŋku ɖe eƒe akpa vovovoawo ŋu be woanya alesi nya bliboa le si ana be woase egɔme. Gɔmesese bia nusita nuwɔna aɖe nyo alo menyo o la gɔme sese. Le kpɔɖeŋu me, ne ame aɖe le mɔ gbegblẽ dzi la, nugɔmesela ate ŋu akpɔe adze sii, eye wòate ŋu axlɔ̃ nui le afɔku si le eŋgɔ ŋu. Gake ebia gɔmesese hafi wòase nusita amea le afɔ ma ɖem gɔme eye be woadi mɔ nyuitɔ kekeake si dzi woato aɖee.

Nunyalawo bua tame—mele bɔbɔe be woaflu wo o. (Lododowo 14:15) Wote ŋu kpɔa afɔku doa ŋgɔ eye wodzrana ɖo ɖe eŋu. Nunya kpena ɖe mía ŋu hã be míate ŋu asusu nu ɖɔʋu siwo fiaa mɔ nyuitɔ mí le agbe me ŋu. Le nyateƒe me la, ne míesrɔ̃ Biblia me lododowo la, míakpɔ teƒeɖoɖowo elabena ɖe woŋlɔ wo ɖi be míanya nusi nunya kple amehehe nye. Ne “gegemewo” gɔ̃ hã lé to ɖe lododoawo ŋu la, woadze nunya eye “ɖekakpuiwo” adze si nu ahabu tame.

Lododowo na Nunyalawo

Gake menye gegemewo kple ɖekakpuiwo koe wodo loawo na le Biblia me o. Wodo wo na amesiame si si nunya le si aɖo to asee. Fia Salomo gblɔ be: “Nunyala nasee, eye wòadzi eƒe nunya ɖe dzi, eye mɔ sɔsɔe nasu nugɔmesela si; ne woase lododowo, abebubuwo, nunyalawo ƒe nyawo kple adzowo gɔme.” (Lododowo 1:5, 6) Amesi dze nunya xoxo adzi eƒe nusɔsrɔ̃ ɖe edzi ne eɖo to lododoawo, eye nugɔmesela adzi eƒe ŋutete be wòafia mɔ eɖokui le agbe me dzidzedzetɔe ɖe edzi.

Zi geɖe la lododo nyea nyateƒenya vevi aɖe si wozã nya ʋɛ aɖewo tsɔ gblɔe. Biblia me lododowo ate ŋu anye abebubu ƒomevi aɖe. (Lododowo 1:17-19) Lododo aɖewo nye adzowo—nyagbɔgblɔ si gɔmesese sẽ eye wòahiã be woaku wo me. Lododo ate ŋu anye alobalo, kpɔɖeŋunyagbɔgblɔ kple abebubu ƒomevi bubuwo hã. Ebia ɣeyiɣi kple ŋugbledede hafi woase nya siawo gɔme. Le nyateƒe me la, Salomo si do lo geɖe la nye amesi si ŋutete le wòte ŋu sea lododowo kple nya goglowo gɔme. Etsɔe ɖo eɖokui dzi le Lododowo ƒe agbalẽa me be yeana ŋutete ma nasu yeƒe nuxlẽlawo si, nusi nunyala adi be yeaɖo toe.

Gɔmedzedze si Kplɔa Ame Yia Taɖodzinu la Gbɔe

Afikae wòle be woadze nunya kple amehehe didi gɔme tsoe? Salomo ɖo eŋu be: “Yehowa-vɔvɔ̃ enye sidzedze ƒe gɔmetoto; ke bometsilawo doa vlo nunya kple amehehe.” (Lododowo 1:7) Yehowa-vɔvɔ̃e nye nunya ƒe gɔmetoto. Sidzedze manɔmee la, nunya kple amehehe aɖeke manɔ anyi o. Ekema Yehowa-vɔvɔ̃e nye nunya kple amehehe ƒe gɔmetoto.—Lododowo 9:10; 15:33.

Mawuvɔvɔ̃ mele abe nu dziŋɔ aɖe vɔvɔ̃ ene o. Ke boŋ enye bubu deto kple vɔvɔ̃ si sɔ. Vɔvɔ̃ sia manɔmee la, sidzedze vavãtɔ manɔ anyi o. Yehowa Mawu gbɔe agbe tso, eye le nyateƒe me la, ehiã be míanɔ agbe hafi sidzedze ɖesiaɖe nasu mía si. (Psalmo 36:10; Dɔwɔwɔwo 17:25, 28) Gakpe ɖe eŋu la, Mawue wɔ nuwo katã; eyata amegbetɔwo ƒe sidzedzewo katã nɔ te ɖe nusɔsrɔ̃ tso eƒe asinudɔwɔwɔwo ŋu dzi. (Psalmo 19:2, 3; Nyaɖeɖefia 4:11) Mawu ƒe gbɔgbɔe ʋã amewo hã woŋlɔ eƒe Nya si ‘nyo na nufiafia, na mokaka, na ɖɔɖɔɖo, na amehehe, si le dzɔdzɔenyenye me’ ɖi. (Timoteo II, 3:16, 17) Eyata amesi gbɔ koŋ sidzedze vavãtɔ tsoe nye Yehowa, eye ele be amesi le edim la navɔ̃e ahatsɔ bubu deto nɛ.

Viɖe kae le amegbetɔ ƒe sidzedze kple xexemenunya ŋu ne mawuvɔvɔ̃ mekpe ɖe eŋu o? Apostolo Paulo ŋlɔ bena: “Afika nunyala le? Afika agbalẽfiala le? Afika xexe sia me ƒe anukutsyɔla le? Alo menye Mawu trɔ xexe sia me ƒe nunya wòzu bometsitsi o ɖe?” (Korintotɔwo I, 1:20) Xexemenunyala si mevɔ̃a Mawu o nɔa te ɖe nusiwo wònya dzi wɔa nyametsotso siwo naa wòzua ‘bometsila’ mlɔeba.

“Kɔgɛ na Wò Kɔ”

Azɔ fia nyanu la trɔ ɖe sɔhɛwo ŋu: “Vinye, se fofowò ƒe amehehe, eye megagblẽ dawò ƒe nufiame ɖi o; elabena seƒoƒotsihe nyui wònye na wò ta kple kɔgɛ na wò kɔ.”—Lododowo 1:8, 9.

Le blema Israel la, Mawu de dɔ asi na dzilawo be woafia nu wo viwo. Mose xlɔ̃ nu vifofowo be: “Nya, siwo megblɔ na wò egbe la, natsi dzi me na wò. Ku wo ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mɔ dzi, ne èmlɔ anyi, alo nèfɔ.” (Mose V, 6:6, 7) Ŋusẽkpɔɖeamedzi aɖe hã tsoa vidadawo gbɔ. Srɔ̃nyɔnu Hebritɔ ate ŋu akpɔ egbɔ be wozɔ ɖe ƒomea ƒe sewo dzi le srɔ̃aŋutsua ƒe tanyenye te.

Le nyateƒe me le Biblia katã me la, ƒomeae nye afisi wodzea nufiafia gɔme tsonɛ. (Efesotɔwo 6:1-3) Ne ɖeviwo ɖo to wo dzila xɔsetɔwo la, anye seƒoƒotsihe nyui kple kɔgɛ na woƒe kɔ le kpɔɖeŋumɔ nu.

“Aɖe Ekpɔlawo ƒe Agbe Ða”

Hafi vifofo aɖe si nye Asiatɔ naɖo viaŋutsu si xɔ ƒe 16 ɖe suku kɔkɔ le United States la, exlɔ̃ nui be wòagade ha baɖa o. Salomo ƒe nuxlɔ̃amenyawo dze le aɖaŋuɖoɖo sia me: “Vinye, ne nuvɔ̃wɔlawo le nuwò blem la, megalɔ̃ [ɖe] edzi o!” (Lododowo 1:10) Azɔ Salomo tɔ asi amenublenya siwo wozãna dzi: “Wogblɔna be Yi kpli mí, míade xa ɖe ʋukɔkɔɖi ŋu, eye míanɔ adeklo dzi ɖe ame maɖifɔ ŋu naneke mawɔmawɔe, míami wo agbagbe abe tsiẽƒe ene, míaƒe asi asu nu vevi vovovowo dzi, eye míatsɔ aboyonu ayɔ míaƒe xɔwoe, nanɔ tasɔsɔ ɖeka me kpli mí, eye akplo ɖeka nanɔ mí katã mía si.”—Lododowo 1:11-14.

Edze ƒã be kesinɔnuwoe nye amenublenua. Le viɖekpɔkpɔ kaba ta la, “nuvɔ̃wɔlawo” blea amewo nu be woakpɔ gome kpli yewo le yewoƒe ŋutasesẽ alo numadzɔmadzɔwo wɔwɔ me. Ame vɔ̃ɖi siawo ƒe afɔ tsɔna ɖe ʋukɔkɔɖi ŋu le ŋutilã me kesinɔnuwo ta. ‘Womia amesiwo dzi wodzena la bliboe abe tsiẽƒe ene,’ eye woxɔa woƒe nunɔamesiwo katã abe alesi tsiẽƒe xɔa ame bliboa katãe ene. Wokpea ame be woatsɔ nuvlowɔwɔ aɖo dɔe—wodi be yewoatsɔ ‘aboyonuwo ayɔ yewoƒe aƒewoe,’ eye wodi be bebewuwo ‘nawɔ ɖeka kpli yewo.’ Nuxlɔ̃ame si sɔ ɖe ɣeyiɣia nu ka gbegbee nye esi esia nye na mí! Ðe menye mɔnu mawoe sɔhɛwo ƒe nuvlowɔhawo kple atikevɔ̃ɖidzralawo zãna tsɔ blea amewo nui oa? Ðe menye hokpɔkpɔ kaba ye tea ame geɖe kpɔna woƒoa wo ɖokui ɖe asitsamɔnu fitifitiwo me oa?

Fia nyanu la ɖo aɖaŋu be: “Vinye, megazɔ mɔ ɖeka dzi kpli wo o, eye nahe wò afɔ ɖe megbe tso wo toƒewo. Elabena woƒe afɔwo le tsɔtsɔm ɖe vɔ̃ɖiwɔwɔ ŋu, eye wole abla ɖem, be woakɔ ʋu ɖi. Elabena dzodzroe woɖoa mɔ̃ ɖi le xewo katã ŋku me. Woawo la woawo ŋutɔ ƒe ʋu ŋue wole xa dem ɖo, eye woawo ŋutɔ ƒe agbe ŋue wole adeklo dzi ɖo. Alea wòanɔ na amesiwo katã le viɖe madzɔmadzɔ yome tim lae; aɖe ekpɔlawo ƒe agbe ɖa.”—Lododowo 1:15-19.

‘Amesiame si le viɖe madzemadze yome tim’ la atsrɔ̃ le eya ŋutɔ ƒe mɔ me. Adeklo si dzi ame vɔ̃ɖiwo le na amewo la ava zu mɔ̃ aɖe woawo ŋutɔ. Ðe amesiwo tsɔ nuvɔ̃wɔwɔ ɖo dɔe atrɔ woƒe agbenɔnɔa? Ao. Mɔ̃ te ŋu nɔa dzedzem gaglã, gake xewo—siwo nye ‘nuwɔwɔ siwo si aʋala le’—dzona gena ɖe eme. Nenema ke nye ame vɔ̃ɖiwo hã, esi woƒe ŋukeklẽ gbã ŋku na wo ta la, wonɔa woƒe nuvlowɔwɔ dzi togbɔ be asi ava su wo dzi godoo hã.

Amekae Ase Nunya ƒe Gbe?

Ðe nuvɔ̃wɔlawo nya nyateƒe be yewoƒe nuwɔna ahe afɔku vɛ na yewoa? Ðe woxlɔ̃ nu wo le nusi ado tso woƒe nuwɔnawo me ŋua? Womate ŋu agblɔ be yewomenya o, elabena wole boblo dom gbedasi aɖe si me kɔ ƒã le ablɔwo dzi.

Salomo gblɔ be: “Nunya le ɣli dom le kpɔdomee, eye wòkɔ eƒe gbe dzi le ablɔwo me. Ele ɣli dom le kpɔdomeewo ƒe dzogoe, siwo dzi zi le, kple agbowo nu, du blibo la katã me wòle eƒe nyawo gblɔm le.” (Lododowo 1:20, 21) Nunya le ɣli dom sesĩe le ablɔwo dzi eye eme hã kɔ be amesiame nasee. Le blema Israel la, ame tsitsiwo ɖoa aɖaŋu siwo me nunya le eye wodrɔ̃a ʋɔnu le dua ƒe agbowo nu. Le míawo gome la, Yehowa na woŋlɔ nunya vavãtɔ ɖe eƒe Nya, Biblia, me eye ele afisiafi. Eye eƒe subɔlawo ƒe ŋku biã wole gbeƒã ɖem gbedasi sia le dutoƒo le afisiafi. Nyateƒee, Mawu na wole gbeƒã ɖem nunya na amesiame.

Nuka gblɔm nunya vavãtɔa le? Eyae nye esi: “Ɣekaɣi mi gegemewo mialɔ̃ bometsitsi, mi fewuɖulawo miakpɔ dzidzɔ le fewuɖuɖu ŋu . . . ase ɖo? Mele ame yɔm, eye miegbe, meke nye abɔwo, eye ame aɖeke melé ŋku ɖe eŋu o.” Bometsilawo meɖoa to nunya ƒe gbe kura o. Eyata “woaɖu woƒe zɔzɔme ƒe kutsetsewo.” Woawo ŋutɔ ƒe ‘godzedze kple anyinɔnɔ bɔkɔɔ atsrɔ̃ wo.’—Lododowo 1:22-32.

Ke amesi xɔ ɣeyiɣi ɖo to nunya ƒe gbe ya ɖe? “Anɔ anyi bɔkɔɔ, eye dzɔgbevɔ̃e ƒe ŋɔdzidoname maɖe dzi le eƒo o.” (Lododowo 1:33) Neva eme be nànɔ amesiwo ɖoa to Biblia me lododowo eye wodzea nunya hexɔa amehehe la dome.

[Nɔnɔmetata si le axa 15

Nunya vavãtɔ bɔ ɖe afisiafi