Kpɔ Wò Ŋkɔ Ta

WOYƆA amesi taa xɔ dzeaniwo be xɔtuɖaŋunyala bibi. Woyɔa ɖetugbi si doa vevie nu le suku be sukuvi tagbɔɖaɖɛtɔ. Woate ŋu ayɔ amesi mewɔa naneke o gɔ̃ hã be kuviatɔ. Esi Biblia nɔ gbe tem ɖe asixɔxɔ si le ŋkɔ nyui xɔxɔ ŋu dzi la, egblɔ be: “Ŋkɔ nyui xɔxɔ ƒo kesinɔnu geɖe ta, eye ŋudzedzekpɔkpɔ nyo wu klosalo kple sika.”—Lododowo 22:1.

Nuwɔna suesue siwo ame wɔna le ɣeyiɣi aɖe me dzie wòtona xɔa ŋkɔ nyui. Gake nusi wòatsɔ agblẽ edomee nye bometsinu ɖeka pɛ ko. Le kpɔɖeŋu me, gbɔdɔdɔ ƒe agbegbegblẽnɔnɔ zi ɖeka pɛ ate ŋu aƒo ɖi ŋkɔ nyui si le ame ŋu. Le Biblia ƒe agbalẽ si nye Lododowo ƒe ta 6 lia me la, blema Israel Fia Salomo xlɔ̃ nu ku ɖe nɔnɔme kple nuwɔna siwo gblẽa bubu si le mía ŋu me eye wògblẽa ƒomedodo si le mía kple Yehowa Mawu dome ŋu. Esiawo dometɔ aɖewoe nye atamkaka eŋumabumabui, kuviawɔwɔ, amebeble, kple gbɔdɔdɔ ƒe agbegbegblẽnɔnɔ—wonye nusiwo Yehowa lé fui koŋ. Aɖaŋuɖoɖo siawo dzi wɔwɔ akpe ɖe mía ŋu míakpɔ ŋkɔ nyui si le mía ŋu ta.

Ðe Ðokuiwò tso Atamkaka Abunetɔe Me

Lododowo ta 6 lia dze egɔme kple nya siawo be: “Vinye, ne èƒu asi akɔ ɖe hawòvi nu, eye nèlé fe nu na ame tutɔ, wò numenya de nyagbatee dowòme, eye wò numenya lé wò la, ekema, vinye, wɔ ale, ne naɖe ɖokuiwò—ège ɖe hawòvi si me ɖe—: Yi naxlã ɖokuiwò ɖe eƒe afɔ nu, eye naƒoe ɖe hawòvi nu.”—Lododowo 6:1-3.

Lododo sia ɖo aɖaŋu ku ɖe asitsatsa ɖoɖowo wɔwɔ kple ame bubuwo, vevietɔ ame tutɔwo, ŋu. Ẽ, wodi tso Israel-viwo si be ‘woakpe ɖe wo nɔvi si si nu vɔ le eye wòɖo ko la ŋu.’ (Mose III, 25:35-38) Gake Israel-vi zazɛ̃nyahela aɖewo ƒo wo ɖokui ɖe asitsatsa mɔnu siwo wosusu be aɖe vi na yewo me eye woƒoe ɖe ame bubuwo nu be ‘woada megbe’ na yewo atsɔ xɔ gae, eye woto esia dzi na wozu femewo. Nɔnɔme siawo tɔgbe ate ŋu ado mo ɖa egbea. Le kpɔɖeŋu me, gadzraɖoƒewo ate ŋu abia be ame bubu nade asi agbalẽ te akpe ɖe amesi le gadodo biam ŋu hafi yewoatsɔ ga si wobu be ate ŋu atsi eme la nɛ. Aleke gbegbe nunya manɔ eme o enye si be ame nanɔ du dzi atsɔ eɖokui ana ɖe ame bubuwo ta! Nya lae nye be ate ŋu ana míanyi fe, eye wòagblẽ míaƒe ŋkɔ le gadzraɖoƒewo kple gadola bubuwo gɔ̃ hã gbɔ!

Ke nenye be míekpɔ be míewɔ afɔɖeɖe si dze gbã abe ɖe nunya le eme ene gake esi míegbugbɔ ŋku lé ɖe eŋu nyuie la, míeva kpɔe be enye bometsinu ya ɖe? Aɖaŋuɖoɖoa enye be nàɖe asi le dada ŋu eye ‘nàƒo nya ɖe hawòvi nu’—ɖe kuku nɛ atraɖii. Ele be míawɔ nusianu si míate ŋui be míakpɔ nyaa gbɔ. Numekugbalẽ aɖe gblɔ be: “Wɔ nusianu si nàte ŋui vaseɖe esime mia kple wò futɔ mielɔ̃ ɖe nya ɖeka dzi hekpɔ nyaa gbɔ, ale be woagatsɔ se ɖe ŋuwò alo ƒowòmetɔwo ŋu o.” Eye ele be woawɔ esia enumake, elabena fia la gblɔ kpee be: “Megana alɔ̃ nava wò ŋku dzi o, eye akɔlɔ̃e megaɖo wò aɖaba me o. Ðe ɖokuiwò le esi abe sãde ene, eye abe xevi tso mɔ̃trela si me ene.” (Lododowo 6:4, 5) Anyo wu be míaɖe ta le nubabla manyomanyo te ne anya wɔ tsɔ wu be wòazu agba na mí.

Nye Dɔwɔla abe Anyidi Ene

Salomo xlɔ̃ nu be: “Wò kuviatɔ, yi anyidi gbɔ, kpɔ eƒe nuwɔna ɖa, eye nadze nunya!” Nukae míate ŋu asrɔ̃ tso alesi anyidi sue wɔa nui me? Fia la ɖo eŋu be: “Esi amegã, dzikpɔla kple dziɖula aɖeke mele esi o hã la, eƒoa eƒe abolo le dzomeŋɔli, eye wòtua eƒe nuɖuɖu ɖo le nuŋeɣi.”—Lododowo 6:6-8.

Anyidiwo wɔa nu hã wòwɔa nuku eye woƒe nuwɔwɔ aduadu kple wo nɔewo dze na kafukafu. Woƒe lãmenusese wɔnɛ be woƒoa nuɖuɖu nu ƒu le etsɔ ta. “Amegã, dzikpɔla kple dziɖula aɖeke” mele wo si o. Enye nyateƒe be anyidiawo ƒe fianyɔnu li ya, gake enye fianyɔnu le susua nu be eyae ɖaa azi eye wònye hatsotsoa dada. Meɖea gbe aɖeke na wo o. Togbɔ be dɔnunɔla aɖeke mele anyidiwo si si azi wo dzi alo dɔdzikpɔla aɖeke mele wo dzi kpɔm o hã la, wowɔa woƒe dɔ ɖeɖimateameŋutɔe.

Ðe mele be míanye kutrikulawo abe anyidiwo ene oa? Woɖale ŋku lém ɖe mía ŋu alo womele elém ɖe mía ŋu o, dɔwɔwɔ moveviɖoɖotɔe kple agbagbadzedze be míaƒe dɔ nanyo ɖe edzi ade mía dzi. Ẽ, ele be míawɔ míatɔ sinua le suku, le míaƒe dɔwɔƒe, kple esime míele gome kpɔm le gbɔgbɔmedɔwo me. Abe alesi anyidi ƒe dɔwɔwɔ ɖea vi nɛ ene la, nenema ke Mawu di be ‘wòanyo na míi le míaƒe agbagbadzedzewo katã me.’ (Nyagblɔla 3:13, 22; 5:18) Dzitsinya dzadzɛ kple dzidzemee nyea dɔsesẽwɔwɔ ƒe teƒeɖoɖowo.—Nyagblɔla 5:12.

Salomo zã biabia eve siwo mehiã ŋuɖoɖo o tsɔ dze agbagba be yeanyɔ kuviatɔ tso eƒe kuviawɔwɔ me ale: “Kuviatɔ, ɣekaɣi nanɔ aba dzi ase ɖo? Ɣekaɣi nanyɔ tso wò alɔ̃dɔdɔ me?” Esi fia la nɔ kuviatɔ la ƒe nyagbɔgblɔwo srɔ̃m la, egblɔ kpee be: “Gadɔ alɔ̃ vie, gadɔ akɔlɔ̃e vie, de asi asitɛ me nagbɔ ɖe eme vie! Ekema wò ahedada aɖi kpe wò abe mɔzɔla ene, eye wò hiã abe ŋutsu, si bla akpa ene.” (Lododowo 6:9-11) Esime kuviatɔ la gakpɔtɔ dze ŋe ɖi la, ahedada tui abe amedzidzela ene, eye hiãkame dze edzi abe ŋutsu si bla akpa ene. Eteƒe medidina hafi gbewo kple ŋuwo míena ɖe kuviatɔ ƒe agblẽ dzi kpaŋkpaŋ o. (Lododowo 24:30, 31) Eteƒe medidina hafi wòɖua agba le asi si tsam wòle me o. Ɣeyiɣi didi kae dɔtɔ aɖe mɔ na alɔgblɔdɔwɔla be wòanɔ ye gbɔ ase ɖo? Eye ɖe sukuvi si nusɔsrɔ̃ wɔa kuvia na ŋutɔ ate ŋu akpɔ mɔ be yeawɔ dɔ nyui le sukua?

To Nyateƒe

Esime Salomo nɔ agbenɔnɔ bubu si gblẽa bubu si le ame ŋu le nutoa me kple eƒe ƒomedodo kple Mawu dome gblɔm la, eyi edzi be: “Yakame kple ame gbegblẽ enye amesi tsɔa alakpadanu nɔa yiyimee, eya, amesi miãa ŋku ɖe ame, etoa nya kple eƒe afɔ, eye wòtsɔa eƒe asi fiaa dzesii, eya, amesi ƒe dzi me ayedzedze le, eɖoa vɔ̃ ɖe tame ɣesiaɣi, eye wòdea dzre aƒe.”—Lododowo 6:12-14.

Esia ku ɖe ameblela ŋu. Zi geɖe la, alakpatɔ dzea agbagba be yeatsyɔ nu yeƒe alakpadada dzi. Aleke? Menye ‘alakpanyawo’ ɖeɖeko wògblɔna o, ke egblɔa nya kple eƒe ŋutinuwo hã. Agbalẽnyala aɖe gblɔ be: “Ŋutinuwo zazã, gbeɖiɖi, kple moɖoɖo nye ameblemɔnu siwo woɖona zãna; susu gbegblẽ kple dzredidi nɔa nyateƒe si woɖo mo be wole totom la tome.” Tame vɔ̃wo koe yakame sia tɔgbe ɖona eye edea dzre aƒe ɣesiaɣi. Aleke nuwo ava nɔ nɛ?

Israel fia la ɖo eŋu be: “Eyata eƒe gbegblẽ aƒo ɖe edzi kpoyi, agbã zi ɖeka, eye hayahaya manɔ eŋu o.” (Lododowo 6:15) Ne woklo nu le alakpatɔ dzi la, bubu si le eŋu dome gblẽna enumake. Amekae agaka ɖe eyama dzi? Eƒe nuwuwu anye gbegblẽ nyateƒe, elabena woyɔ “aʋatsokalawo katã” ɖe amesiwo aku tegbee dome. (Nyaɖeɖefia 21:8) Mina míato mɔ sia mɔ nu ‘ato nyateƒe le nusianu me.’—Hebritɔwo 13:18.

Lé Fu Nusiwo Yehowa Lé Fui

Fuléle nugbegblẽwɔwɔ—nusi awɔe be míawɔ nusiwo agblẽ bubu si le mía ŋu dome o ka gbegbee nye si! Ekema ɖe mele be míasrɔ̃ nugbegblẽ tsitsri oa? Gake nukawo tututue wòle be míatsri? Salomo gblɔ be: “Nu ade Yehowa lé fui, eye adadrelia nye ŋunyɔ na eƒe luʋɔ: dadaŋkuwo, aʋatsoɖe kple asi, siwo kɔa ʋu maɖifɔ ɖi, dzi, si ɖoa tame gbegblẽ, afɔ, siwo tsɔna ɖe vɔ̃ ŋu, amesi ɖua aʋatsoɖasefo hedaa alakpa, kpakple amesi dea dzre nɔviwo dome.”—Lododowo 6:16-19.

Nu adre siwo lododoa yɔ la nye vevitɔawo eye ne míagblɔe la, wolɔ vodada ƒomeviwo katã kloe ɖe eme. “Dadaŋkuwo” kple “dzi, si ɖoa tame gbegblẽ” nye nuvɔ̃ siwo wowɔna le tamesusu me. “Aʋatsoɖe” kple “amesi ɖua aʋatsoɖasefo hedaa alakpa” nye nyagbɔgblɔ vɔ̃wo. “Asi, siwo kɔa ʋu maɖifɔ ɖi” kple “afɔ, siwo tsɔna ɖe vɔ̃ ŋu” nye nuwɔna vɔ̃ɖiwo. Eye nusi Yehowa lé fui vevie wu enye amesiwo lɔ̃a dzredede amesiwo, anye ne woanɔ anyi ɖekae le ŋutifafa me hafi la dome. Alesi woyi nuawo yɔyɔ dzi tso ade yi adre fia be mese ɖe afima o, elabena amegbetɔwo le edzi le woƒe nuwɔna vɔ̃ɖiwo dzim ɖe edzi.

Le nyateƒe me la, ehiã be míanyɔ ŋu nusiwo Mawu lé fui. Le kpɔɖeŋu me, ele be míatsri “dadaŋkuwo” alo dada ƒomevi bubu ɖesiaɖe. Eye ele be míaƒo asa na ameŋunyagbɔgblɔ vɔ̃ɖi nyateƒe, elabena ate ŋu ade “dzre nɔviwo dome” bɔbɔe. Ne míelé nyasegblɔ manyomanyo, ɖeklemiɖenya siwo mesɔ o, alo alakpanyawo ɖe nu la, anɔ eme be míanɔ ‘ʋu maɖifɔ kɔm ɖi’ ya o, gake míate ŋu agblẽ bubu si le ame bubu ŋu dome godoo.

‘Eƒe Tugbedzedze Megadzro Wò O’

Salomo dze eƒe aɖaŋuɖoɖoa ƒe akpa si kplɔe ɖo gɔme be: “Vinye, dzra fofowò ƒe sedede ɖo, eye megagblẽ dawò ƒe nufiame ɖi o. Blae ɖe wò dzi ŋu ɖaa, eye naxatsae ɖe wò kɔ ŋu.” Susu ka tae? “Ne èle azɔli dzi la, akplɔ wò, ne èmlɔ anyi la, adzɔ ŋuwò, eye ne ènyɔ la, aɖo dze kpli wò.”—Lododowo 6:20-22.

Ðe alesi wotsɔ Ŋɔŋlɔa he míi ate ŋu akpɔ mía ta tso gbɔdɔdɔ ƒe agbegbegblẽnɔnɔ ƒe mɔ̃tetre mea? Ẽ, ate ŋui. Woka ɖe edzi na mí be: “Akaɖie nye se la, kekelie nye nufiame la, eye agbemɔ enye mokaname, siwo fiaa mɔnu ame la. Ne nadzra ɖokuiwò ɖo tso nyɔnu vɔ̃ɖi la si me kpakple dutanyɔnu aɖe zɔzrɔ̃etɔ la si me.” (Lododowo 6:23, 24) Ŋkuɖoɖo aɖaŋuɖoɖo siwo le Mawu ƒe Nyaa me dzi kple wo zazã abe ‘akaɖi na míaƒe afɔ kple kekeli na míaƒe toƒe’ ene akpe ɖe mía ŋu míatsi tre ɖe nyɔnu vɔ̃ɖi, alo míagagblɔe be ŋutsu vɔ̃ɖi, ƒe ameyɔyɔ fluamewo ŋu.—Psalmo 119:105.

Fia nunyala la xlɔ̃ nu be: “Eƒe tugbedzedze megadzro wò le dzi me o, eye megatsɔ eƒe aɖaba lé wò o.” Nukatae? “Elabena gbolo ɖe wòɖia gbɔ ame vaseɖe abolo dzi, eye nyɔnu srɔ̃tɔ le agbe xɔasi la minyam.”—Lododowo 6:25, 26.

Ðe Salomo nɔ srɔ̃nyɔnu ahasiwɔla yɔm be gboloa? Anye nenemae. Alo anye be enɔ vovototo dem nusiwo dona tsoa agbegbegblẽnɔnɔ kple gbolo kpakple ahasiwɔwɔ kple ŋutsu bubu srɔ̃ me dome. Woaɖi gbɔ amesi dea gbolo gbɔ “vaseɖe abolo dzi”—si fia hiãkame kolikoli. Ate ŋu axɔ nulɔdɔ siwo vena ŋutɔ eye wogblẽa ame dome bɔbɔe, siwo dome AIDS vɔ̃ɖi la hã le. Le go bubu me la, amesi dea ame bubu srɔ̃ gbɔ adze afɔku gã aɖe me bɔbɔe le Se nu. Srɔ̃nyɔnu wɔahasi dea amesi nɔ agbegbegblẽa kplii ƒe “agbe xɔasi” afɔku me. Numekugbalẽ aɖe gblɔ be: “Nusi wu agbe dzi ɖeɖe kpɔtɔ vivivi . . . ye wòanye. Woate ŋu awu nuvɔ̃wɔla la.” (Mose III, 20:10; Mose V, 22:22) Le goawo katã me la, aleke ke nyɔnu sia dze tugbee o, mele be eƒomevi nadzro ame o.

‘Megaɖe Dzo ɖe Wò Akɔnu O’

Be Salomo nagate gbe ɖe afɔku si le ahasiwɔwɔ me dzi ayi ŋgɔe la, ebia be: “Ðe ame aɖe ate ŋu aɖe dzo ɖe akɔnu, eye eƒe avɔ nagbe fiafiã? Alo ɖe ame aɖe azɔ dzoka xɔxɔ dzi, eye eƒe afɔ nagbe fiafiã?” Esi wònɔ kpɔɖeŋua me ɖem la, egblɔ be: “Alea ke wòanɔ na amesi de ehavisrɔ̃ gbɔe; amesiame, si de asi eŋu la, matsi to mahemahe o.” (Lododowo 6:27-29) Woahe to na nuvɔ̃wɔla sia godoo.

Woɖo ŋku edzi na mí be: “Womedoa vlo fiafitɔ, ne efi fi, be wòatsɔ atsi eƒe dɔwuame nu, esime ƒomenui le ewɔm o.” Togbɔ be ele alea hã la, “ne asi tui la, aɖo eteƒe zi adre, eye wòatsɔ eƒe nuwo katã ana.” (Lododowo 6:30, 31) Le blema Israel la, wobiana tsoa fiafitɔ si be wòaɖo nusiwo wòfi la teƒe ne esia axɔ nusiwo katã le esi gɔ̃ hã.a Ekema aleke madze wu be woahe to na ahasiwɔla, si mate ŋu aɖe nusi wòwɔ la nu o!

Salomo gblɔ be: “Amesi wɔ ahasi kple nyɔnu aɖe la, tagbɔ gbegblẽtɔ wònye.” Tagbɔgbegblẽtɔ mewɔa nyametsotso nyuie o, elabena ‘etsrɔ̃a eya ŋutɔ ƒe agbe.’ (Lododowo 6:32) Eyama adze le gotagome abe bubume ene, gake ta mele amesi wònye le ememe nu o.

Ku siwo ahasiwɔla ŋena geɖe gali. “Ƒoƒo kple dzu atso eme nɛ, eye eƒe ŋukpe nu matsi o. Elabena ŋutsu ƒe dziku ɖe wòʋãa ŋu, eye mekpɔa nublanui le hlɔ̃biagbe o. Avulénu aɖeke malé enu o, eye ne èna nu geɖe hã la, malɔ̃ o.”—Lododowo 6:33-35.

Fiafitɔ ate ŋu aɖo nusi wòfi la teƒe, gake ahasiwɔla mate ŋu aɖo naneke teƒe o. Nukae wòate ŋu ana srɔ̃ŋutsu si do dziku? Anɔ eme be aleke ke nugbegblẽwɔla la ɖaɖe kukui o, womakpɔ nublanui nɛ o. Ahasiwɔla la mate ŋu aɖɔ eƒe nuvɔ̃a ɖo le mɔ aɖeke nu o. Ŋukpe kple dzu si wòde eya ŋutɔ ƒe ŋkɔ ŋu atsi anyi. Gakpe ɖe eŋu la, mate ŋu axe tafe alo aƒle eɖokui tso tohehe si wòdze na la me o.

Aleke gbegbe nunya le eme enye si be míaƒo asa na ahasiwɔwɔ kpakple agbenɔnɔ kple nuwɔna bubu siwo ƒoa ɖi ŋkɔ nyui si le mía ŋu eye woate ŋu ado vlo Mawu! Ekema mina míakpɔ nyuie be míagaka atam abunetɔe o. Mina dɔwɔwɔ moveviɖoɖotɔe kple nyateƒetoto naɖo atsyɔ na bubu si le mía ŋu. Eye esi míele agbagba dzem be míalé fu nusiwo Yehowa lé fui la, mina ŋkɔ nyui nanɔ mía ŋu le eya kple mía haviwo gbɔ.

[Etenuŋɔŋlɔwo]

[Nɔnɔmetata si le axa 25]

Kpɔ nyuie le asidede agbalẽ te ada megbe na ame aɖe le gadodo me ŋu

[Nɔnɔmetata si le axa 26]

Nye dɔwɔla kutrikula abe anyidi ene

[Nɔnɔmetata si le axa 27]

Kpɔ nyuie le amenyagbɔgblɔ si gblẽa nu ŋu