Èle Mɔ Ðem Be Mawu Ƒe Gbɔgbɔa Nafia Mɔ Wòa?
“Wò gbɔgbɔ nyui la nekplɔm to anyigba sɔsɔe dzi!”—PS. 143:10.
1, 2. (a) Gblɔ nudzɔdzɔ siwo me Yehowa zã eƒe gbɔgbɔ kɔkɔea tsɔ kpe ɖe esubɔlawo ŋu le la dometɔ aɖewo. (b) Nɔnɔme tɔxɛ siawo me koe gbɔgbɔ kɔkɔea wɔa dɔ lea? Ðe eme.
NU KAE vaa susu me na wò ne èbu gbɔgbɔ kɔkɔea ƒe dɔwɔwɔ ŋu? Gideon kple Simson ƒe kalẽwɔwɔa ye vaa susu me na wòa? (Ʋɔn. 6:33, 34; 15:14, 15) Ðewohĩ wò susu yia dzideƒo si Kristotɔ gbãtɔwo ɖe fia alo ale si Stefano ɖe dzi ɖi bɔkɔɔ esime wòtsi tsitre ɖe Sanhedrin la ŋkume la dzi. (Dɔw. 4:31; 6:15) Ke dzidzɔ si gbegbe míekpɔna le dukɔwo dome takpekpewo me egbea, mía nɔvi siwo wolé de ga le woƒe akpaɖekedzimademade ta la ƒe nuteƒewɔwɔ, kple ale si gbeƒãɖeɖedɔa le ta kekem ɖe edzi nukutɔe ya ɖe? Kpɔɖeŋu siawo katã nye gbɔgbɔ kɔkɔea ƒe dɔwɔwɔ ƒe kpeɖodzi.
2 Gake nɔnɔme tɔxɛwo alo nudzɔdzɔ wɔnukuwo me koe gbɔgbɔ kɔkɔea wɔa dɔ lea? Ao. Mawu ƒe Nya la gblɔ le Kristotɔwo ŋu be ‘wozɔna le gbɔgbɔ me,’ ‘gbɔgbɔ la kplɔa wo,’ eye be ‘wonɔa agbe ɖe gbɔgbɔ la nu.’ (Gal. 5:16, 18, 25) Nyagbɔgblɔ siawo ɖee fia be gbɔgbɔ kɔkɔea ate ŋu ayi edzi anɔ ŋusẽ kpɔm ɖe míaƒe agbe dzi ɖaa. Ele be míanɔ koko ƒom na Yehowa gbe sia gbe be wòatsɔ eƒe gbɔgbɔa afia mɔ míaƒe tamebubu, nuƒoƒo, kple nuwɔnawo. (Mixlẽ Psalmo 143:10.) Ne míeɖea mɔ gbɔgbɔ kɔkɔea wɔa dɔ le míaƒe agbe me la, ana míatse ku si anye akɔfafa na ame bubuwo eye wòahe kafukafu vae na Mawu.
3. (a) Nu ka tae wòhiã be gbɔgbɔ kɔkɔea nafia mɔ mí? (b) Nyabiase kawo mee míadzro?
3 Nu ka tae wòle vevie be gbɔgbɔ kɔkɔea nanɔ mɔ fiam mí? Elabena ŋusẽ bubu aɖe dina be yeakpɔ ŋusẽ ɖe mía dzi, enye ŋusẽ aɖe si tsia tsitre ɖe gbɔgbɔ kɔkɔea ƒe dɔwɔwɔ ŋu. Ŋusẽ mae Ŋɔŋlɔawo yɔ be “ŋutilã la,” si fia míaƒe ŋutilã madebliboa ƒe nudzodzro vɔ̃wo, si nye blibomademade si ƒe dome míenyi esi míenye Adam ƒe dzidzimeviwo ta. (Mixlẽ Galatiatɔwo 5:17.) Ke nu kae wòbia be míaɖe mɔ Mawu ƒe gbɔgbɔa nafia mɔ mí? Ðe afɔ aɖewo li míate ŋu aɖe atsɔ atsi tsitre ɖe míaƒe nu vɔ̃ ŋutilã ƒe ŋusẽkpɔɖeamedzi ŋua? Mina míadzro nyabiase siawo me esi míele ‘gbɔgbɔ la ƒe kutsetsea’ ƒe akpa ade susɔeawo me dzrom—woawoe nye “dzigbɔgbɔ blewu, dɔmenyonyo, nyuiwɔwɔ, xɔse, tufafa, [kple] ɖokuidziɖuɖu.”—Gal. 5:22, 23.
Tufafa Kple Dzigbɔgbɔ Blewu Doa Ŋutifafa Ðe Ŋgɔ Le Hamea Me
4. Aleke tufafa kple dzigbɔgbɔ blewu naa ŋutifafa nɔa hamea me?
4 Xlẽ Kolosetɔwo 3:12, 13. Tufafa kple dzigbɔgbɔ blewu wɔa dɔ asi le asi me hedoa ŋutifafa ɖe ŋgɔ le hamea me. Gbɔgbɔa ƒe kutsetsea ƒe akpa eve siawo siaa kpena ɖe mía ŋu be míawɔ nu ɖe ame bubuwo ŋu ameŋububutɔe, be míaɖu mía ɖokui dzi ne wodo dziku na mí, eye be míaƒo asa na wɔɖenuiwɔwɔ ne amewo ƒo nu na mí alo wɔ nu ɖe mía ŋu ameŋumabumabutɔe. Ne masɔmasɔ aɖe ɖo mía kple nɔvi Kristotɔ aɖe dome la, dzigbɔgbɔ blewu, alo dzigbɔɖi, akpe ɖe mía ŋu be mía nɔviawo ƒe nya nagati mí o, ke boŋ míawɔ nu sia nu si míate ŋui be míadzra mía kpli wo dome ɖo. Ðe tufafa kple dzigbɔgbɔ blewu hiã le hamea me vavã? Ɛ̃, wohiã, elabena mí katã míenye ame madeblibowo.
5. Nu kae do mo ɖa le Paulo kple Barnaba dome, eye nu ka dzie esia ɖo kpe?
5 Bu masɔmasɔ si do mo ɖa le Paulo kple Barnaba dome ŋu kpɔ. Wowɔ dɔ kple wo nɔewo ƒe geɖe le nya nyuia dodo ɖe ŋgɔ me. Nɔnɔme nyui geɖe nɔ wo dometɔ ɖe sia ɖe si. Ke hã, gbe ɖeka la, “woʋli nya kpli wo nɔewo dzikutɔe, si wɔe be woma le wo nɔewo ŋu.” (Dɔw. 15:36-39) Nudzɔdzɔ sia ɖo kpe edzi be masɔmasɔ ate ŋu ado mo ɖa le Mawu subɔla dovevienuwo gɔ̃ hã dome ɣeaɖewoɣi. Ne masɔmasɔ aɖe ɖo Kristotɔ aɖe kple haxɔsetɔ aɖe dome la, nu kae wòate awɔ atsɔ akpɔ egbɔ be masɔmasɔa nagazu nyahehe sesẽ si ate ŋu agblẽ ƒomedodo si le wo dome la me ɖaa o.
6, 7. (a) Ŋɔŋlɔawo me aɖaŋuɖoɖo kawo dzie míate ŋu awɔ ɖo hafi masɔmasɔ aɖe si ɖo mía kple haxɔsetɔ aɖe dome la nava zu nya sesẽ? (b) Viɖe kawoe dona tso eme ne ‘míeɖe abla le nusese me, le blewu le nuƒoƒo me, le blewu le dziku me’?
6 Abe ale si nyagbe si nye “woʋli nya kpli wo nɔewo dzikutɔe” ɖee fia ene la, masɔmasɔ si ɖo Paulo kple Barnaba dome la dzɔ kpata eye enu sẽ. Ne Kristotɔ aɖe le nya aɖe me dzrom kple haxɔsetɔ aɖe eye wòde dzesii be yele dziku do ge bɔbɔe la, nunya anɔ eme be wòawɔ ɖe aɖaŋuɖoɖo si dze le Yakobo 1:19, 20 la dzi, afi si gblɔ be: “Ame sia ame naɖe abla le nusese me, nanɔ blewu le nuƒoƒo me, nanɔ blewu le dziku me; elabena ame ƒe dɔmedzoe menana wòwɔa nu dzɔdzɔe abe ale si Mawu di ene o.” Le ale si nɔnɔmea le nu la, nɔvia ate ŋu adze agbagba atrɔ dzeɖoɖoa yi nya bubu aɖe dzi, adoe ɖa be yewoadzro nyaa me ɣebubuɣi, alo ado taflatsɛ atso adzo hafi nyahehea nu nava sẽ ɖe edzi.—Lod. 12:16; 17:14; 29:11.
7 Viɖe kawoe dona tso aɖaŋuɖoɖo sia dzi wɔwɔ me? Ne Kristotɔ aɖe lala eƒe dziku nu fa, ne edo gbe ɖa le nyaa ŋu, eye wòbu mɔ nyuitɔ si nu wòaɖo nya ŋu le ŋuti la, aɖee afia be yele mɔ ɖem be Mawu ƒe gbɔgbɔa nafia mɔ ye. (Lod. 15:1, 28) Le gbɔgbɔa ƒe mɔfiafia te la, ate ŋu aɖe tufafa kple dzigbɔgbɔ blewu afia. Le mɔ sia nu la, asu te be wòawɔ ɖe aɖaŋuɖoɖo si dze le Efesotɔwo 4:26, 29 la dzi, si gblɔ be: “Mibi dzi, gake migawɔ nu vɔ̃ o . . . Migana nya ƒaƒã aɖeke nado go tso miaƒe nu me o, ke boŋ nya sia nya si nyo hena tutuɖo le ale si wòhiã nu, bene wòana nu nyui aɖe ame siwo asee la.” Le nyateƒe me la, ne míedo tufafa kple dzigbɔgbɔ blewu abe awu ene la, míekpea asi ɖe ŋutifafa kple ɖekawɔwɔ ŋu le hamea me.
To Dɔmenyonyo Kple Nyuiwɔwɔ Dzi Nàfa Akɔ Na Wò Ƒomea
8, 9. Nu kae dɔmenyonyo kple nyuiwɔwɔ nye, eye alekee wokpɔa ŋusẽ ɖe nɔnɔme si nɔa ƒomea me dzi?
8 Xlẽ Efesotɔwo 4:31, 32; 5:8, 9. Abe ale si yaƒoƒo fafɛ kple tsi fafɛ faa akɔ na ame ne ŋdɔ le ʋuʋum ene la, nenema kee dɔmenyowɔwɔ kple nyuiwɔwɔ hã faa akɔ na amee. Nɔnɔme siawo nana be dzidzɔ nɔa ƒomea me. Dɔmenyonyo nye nɔnɔme lédziname aɖe si woɖena fiana ne wotsɔ ɖe le eme na ame aɖe vavã, enye ɖetsɔleme si woɖena fiana to kpekpeɖeŋunana kple nya tuameɖowo gbɔgblɔ me. Abe dɔmenyonyo ke ene la, nyuiwɔwɔ nye nɔnɔme nyui aɖe si woɖena fiana to nuwɔna si ɖea vi na ame bubuwo wɔwɔ me. Nunana faa ƒe gbɔgbɔ dzena le eme. (Dɔw. 9:36, 39; 16:14, 15) Gake nyuiwɔwɔ galɔ nu geɖe wu ɖe eme.
9 Nyuiwɔwɔ nye agbe nyui nɔnɔ deŋgɔ. Menye nu si míewɔna koe wòlɔ ɖe eme o, ke vevietɔ wu la, elɔ ame si ƒomevi koŋ míenye ɖe eme. Kpɔe ɖa le susu me be vidada aɖe le atikutsetsewo klɔm be eƒe ƒomea nava ɖu, ele ŋku lém ɖe wo dometɔ ɖe sia ɖe ŋu nyuie esi wòle etsom be yeakpɔ egbɔ be ɖe sia ɖe ɖi nyuie le goawo katã me eye avivi hã, eye be gbegblẽƒe aɖeke mele eŋu alo eme o. Nenema kee Kristotɔ ɖea nyuiwɔwɔ si nye gbɔgbɔa ƒe kutsetsea ƒe akpa aɖe la fiana le eƒe agbenɔnɔ ƒe akpa sia akpa.
10. Nu kae míate ŋu awɔ atsɔ akpe ɖe míaƒe ƒomea me tɔwo ŋu woatu gbɔgbɔa ƒe kutsetsea ɖo?
10 Le Kristotɔwo ƒe ƒomewo me la, nu kae akpe ɖe ƒomea me tɔwo ŋu be woaɖe dɔmenyonyo kple nyuiwɔwɔ afia wo nɔewo? Mawu ƒe Nya la ŋuti sidzedze vavãtɔ wɔa akpa vevi aɖe. (Kol. 3:9, 10) Ƒome ƒe ta aɖewo wɔa ɖoɖo ƒomea dzroa gbɔgbɔa ƒe kutsetsea hã me le woƒe kwasiɖa sia kwasiɖa ƒe Ƒometadedeagu fiẽsiwo me. Ðoɖowɔwɔ ɖe gbɔgbɔa ƒe kutsetsea me dzodzro ŋu mesesẽ o. Zã numekugbalẽ siwo le mia degbe me eye nàtia nyati siwo dzro gbɔgbɔa ƒe kutsetsea ƒe akpa ɖe sia ɖe me. Miate ŋu adzro memama ʋɛ aɖewo ko me kwasiɖa ɖe sia ɖe, eye miate ŋu azã kwasiɖa geɖe atsɔ adzro kutsetsea ƒe akpa ɖe sia ɖe me. Ne miele nyatia me dzrom la, mixlẽ mawunyakpukpui ɖe sia ɖe si woyɔ la, eye miadzro eme. Mide ŋugble tso ale si miate ŋu awɔ nu siwo miesrɔ̃ dzi la ŋu, eye mido gbe ɖa be Yehowa nayra ɖe miaƒe agbagbadzedzewo dzi. (1 Tim. 4:15; 1 Yoh. 5:14, 15) Ðe mèkpɔe be numedzodzro sia tɔgbi ana ale si wò ƒomea me tɔwo wɔa nu ɖe wo nɔewo ŋu la naganyo ɖe edzi oa?
11, 12. Aleke nusɔsrɔ̃ tso dɔmenyonyo ŋu ɖe vi na Kristotɔ atsu kple asi eve aɖewo?
11 Atsu kple asi aɖe siwo ɖe srɔ̃ yeyee eye woɖoe be yewona yewoƒe srɔ̃ɖeɖea nakpɔ dzidzedze la ɖoe koŋ srɔ̃ nu tso gbɔgbɔa ƒe kutsetsea ŋu tsitotsito. Aleke wòɖe vi na woe? Srɔ̃nyɔnua gblɔ be: “Esi nusɔsrɔ̃a kpe ɖe mía ŋu míekpɔe be dɔmenyonyo lɔ nuteƒewɔwɔ kple kuku ɖe ame nɔewo ŋu siaa ɖe eme la, ena ale si míewɔa nu ɖe mía nɔewo ŋu tso ɣemaɣi va de asi na egbea la ganyo ɖe edzi wu. Míesrɔ̃e be ele na mí be míase nu gɔme na mía nɔewo ahatsɔ anɔ mía nɔewo kem faa. Eye esia kpe ɖe mía ŋu míesrɔ̃ ‘akpe’ kple ‘meɖe kuku’ gbɔgblɔ na mía nɔewo ɣesiaɣi si wòsɔ.”
12 Kristotɔ atsu kple asi bubu aɖe hã siwo nɔ srɔ̃ɖekuxiwo me tom la kpɔe be yewomeganyoa dɔme na yewo nɔewo o. Wotiae be yewoasrɔ̃ nu tso dɔmenyonyo ŋu ɖekae. Viɖe kae do tso eme? Srɔ̃ŋutsua gblɔ be: “Esi míesrɔ̃ nu tso dɔmenyonyo ŋu la, míekpɔe be, le esi míanɔ susu vɔ̃wo bum ɖe mía nɔewo ŋu teƒe la, ehiã be míaka ɖe mía nɔewo dzi eye míaƒe ŋku nanɔ nɔnɔme nyui siwo le mía nɔewo si la ŋu boŋ. Esia wɔe be míeva te ɖetsɔtsɔ le mía nɔewo ƒe nuhiahiãwo me geɖe wu. Be manyo dɔme bia hã be mabia tso srɔ̃nye si be wòagblɔ eƒe susu faa eye be nyemagaɖe mɔ nya siwo wòagblɔ la navem o. Esia bia be maɖu dadagbɔgbɔ si nɔ menye la dzi. Esi míeva te dɔmenyonyo ɖeɖe fia mía nɔewo le míaƒe srɔ̃ɖeɖea me la, vivivi la, míeva dzudzɔ nyaʋiʋli kple mía nɔewo kura. Esia na míevo le mía ɖokui me ŋutɔ.” Ðe mèkpɔe be nusɔsrɔ̃ tso gbɔgbɔa ƒe kutsetsea ŋu aɖe vi na wò ƒomea oa?
Ðe Xɔse Fia Ne Wò Ðeɖe Nèli
13. Nu kawoe ate ŋu agblẽ mía kple Yehowa dome ƒomedodoa me, siwo wòle be míaƒo asa na?
13 Ehiã be Kristotɔwo naɖe mɔ Mawu ƒe gbɔgbɔa nafia mɔ wo ne wole amewo dome alo woawo ɖeɖe woli. Gbɔdɔdɔ ƒe agbe gbegblẽ nɔnɔ ƒe fotowo kple modzakaɖeɖe maɖɔʋuwo bɔ ɖe Satana ƒe xexea me egbea ŋutɔ. Esia ate ŋu agblẽ mía kple Yehowa dome ƒomedodoa me. Nu kae wòle na Kristotɔ be wòawɔ? Mawu ƒe Nya la ɖo aɖaŋu na mí be: “Miɖe ɖiƒoƒo katã kple nɔnɔme maɖevi ma, si nye vɔ̃ɖinyenye, la ɖa, eye mitsɔ tufafa lɔ̃ be woaƒã nya la, si ate ŋu axɔ miaƒe luʋɔwo ɖe agbe la, ɖe mia me.” (Yak. 1:21) Mina míakpɔ ale si xɔse, si nye gbɔgbɔa ƒe kutsetsea ƒe akpa bubu aɖe la, ate ŋu akpe ɖe mía ŋu míakpɔtɔ anɔ dzadzɛ le Yehowa ŋkume ɖa.
14. Alekee xɔsemanɔamesi ate ŋu ana ame aɖe naƒo eɖokui ɖe nuwɔna gbegblẽwo me?
14 Ne xɔse le mía si vavã la, míabu Yehowa Mawu be enye ame ŋutɔŋutɔ. Ne ewɔna na mí be Mawu menye ame ŋutɔŋutɔ o la, esia awɔe be míaƒo mía ɖokui ɖe nuwɔna gbegblẽwo me bɔbɔe. Bu nane si yi edzi le Mawu ƒe amewo dome le blema ŋu kpɔ. Yehowa ɖe ŋunyɔnu siwo wonɔ wɔwɔm le ɣaɣlaƒe la fia nyagblɔɖila Ezekiel hegblɔ be: ‘Amevi, èle nu si Israel ƒe aƒe la ƒe ame tsitsiwo dometɔ ɖe sia ɖe le wɔwɔm le vivi me le eƒe xɔvi, si me nɔnɔmetatawo le me la kpɔma? Wole gbɔgblɔm be: Yehowa mele mía kpɔm o, Yehowa gblẽ anyigba la ɖi!’ (Eze. 8:12) Ède dzesi nu si gbɔ kuxia tsoa? Womexɔe se be Yehowa nya nu siwo wɔm yewonɔ o. Womebua Yehowa be enye ame ŋutɔŋutɔ o.
15. Ne míaƒe Yehowa dzi xɔxɔ se me sẽ la, alekee esia kpɔa mía tae?
15 To vovo na esia la, bu Yosef ƒe kpɔɖeŋua ŋu kpɔ. Togbɔ be Yosef nɔ didiƒe ʋĩi tso eƒe ƒomea kple eƒe amewo gbɔ hã la, egbe be yemawɔ ahasi kple Potifar srɔ̃ o. Nu ka tae? Egblɔ be: ‘Aleke gɔ̃ mawɔ vɔ̃ gã sia, eye mada vo ɖe Mawu ŋuti mahã?’ (1 Mose 39:7-9) Ɛ̃, Yehowa nye ame ŋutɔŋutɔ nɛ. Ne Mawu nye ame ŋutɔŋutɔ na mí la, míakpɔ modzakaɖenu makɔmakɔwo alo aƒo mía ɖokui ɖe nu bubu aɖe si míenya be medzea Mawu ŋu o la me ne míawo ɖeɖe míeli o. Míaɖo tame kplikpaa abe hakpalaa ke ene, esi wòdzi ha be: ‘Mazɔ le nye dzi ƒe fɔmaɖimaɖi me le aƒenye me. Nyematsɔ nu tovo aɖo ŋkume o.’—Ps. 101:2, 3.
Dzɔ Wò Dzi Ŋu To Ðokuidziɖuɖu Me
16, 17. (a) Abe ale si woɖɔe le Lododowo ƒe agbalẽa me ene la, alekee ‘ɖekakpuivi bometsila’ aɖe wɔ ge ɖe nu vɔ̃ ƒe mɔ̃ me? (b) Abe ale si wòdze le foto si le axa 26 lia me ene la, aleke nu sia tɔgbi ate ŋu adzɔ ɖe ame aɖe dzi egbea eɖanye ƒe ka kee wòxɔ o?
16 Ðokuidziɖuɖu si nye gbɔgbɔa ƒe kutsetsea ƒe akpa mamlɛtɔa kpena ɖe mía ŋu be míeƒoa asa na nu siwo nu Mawu de se ɖo la wɔwɔ. Ate ŋu akpe ɖe mía ŋu míadzɔ míaƒe dzi ŋu. (Lod. 4:23) Bu nudzɔdzɔ si ŋu woƒo nu tso le Lododowo 7:6-23, si me woɖɔ ale si ‘ɖekakpuivi bometsila aɖe’ ɖe mɔ gbolo aɖe ƒe amenublenyawo flui la ŋu kpɔ. Ege ɖe eƒe mɔ̃ me esime wònɔ ‘tsatsam le kpɔdomee le eƒe dzogoe kasa.’ Ðewohĩ ŋkukeke ɖe nu me tsitotsito ye wɔe be wònɔ tsatsam le gboloa ƒe aƒe gbɔ. Kasia eŋlɔ eɖokui be, eye megate ŋu de dzesii be yele bometsimɔ aɖe si ‘anye ku na ye’ la dzi o.
17 Alekee ɖekakpui ma ate ŋu aƒo asa na vodada ma si gblẽ nu le eŋu la hafi? Ne eɖo to nuxlɔ̃ame si nye: ‘Mègatra yi etoƒewo o.’ (Lod. 7:25) Nufiame aɖe le nudzɔdzɔ sia me na mí: Ne míedi be Mawu ƒe gbɔgbɔa nafia mɔ mí la, ehiã be míaƒo asa na nu siwo ate ŋu akplɔ mí ayi tetekpɔ me la wɔwɔ. Mɔ ɖeka aɖe si dzi ame aɖe ate ŋu ato atra ayi bometsimɔ si dzi ‘ɖekakpuivi bometsila’ ma to la dzi ye nye tsatsa le television wɔna vovovowo alo Internet nyatakakadzraɖoƒe vovovowo me dzodzro. Amea ɖaɖoe koŋ alo meɖoe o, ate ŋu adzɔ be ava ke ɖe ɖeɖefia siwo nyɔa gbɔdɔdɔ ƒe dzodzro ɖe ame me la ŋu bɔbɔe. Eye vivivi la, amamaɖeɖenuwɔnawo kpɔkpɔ si nye nu makɔmakɔ ate ŋu ava zu numame nɛ, eye emetsonuawo agblẽ nu le eƒe dzitsinya kpakple woa kple Mawu dome ƒomedodoa ŋu vevie. Ate ŋu akplɔe ayi ku me gɔ̃ hã.—Mixlẽ Romatɔwo 8:5-8.
18. Nu kawoe Kristotɔ ate ŋu awɔ atsɔ adzɔ eƒe dzi ŋu, eye nu ka tae esia wɔwɔ bia ɖokuidziɖuɖu?
18 Kakaɖedzitɔe la, míate ŋu aɖu mía ɖokui dzi eye ele be míawɔe hã; míate ŋu awɔ esia ne míewɔ nu kpata ne míeke ɖe foto siwo nyɔa gbɔdɔdɔ ɖe ame me la ŋu. Gake ɖe manyo wu be míaƒo asa na nɔnɔme siwo ana míake ɖe nu mawo ŋu oa? (Lod. 22:3) Ebia ɖokuidziɖuɖu hafi míate ŋu awɔ ɖoɖo siwo akpɔ mía ta tso nu siawo me ahawɔ ɖe wo dzi. Le kpɔɖeŋu me, ne míetsɔ kɔmpiuta la da ɖe afi si ame bubuwo ate ŋu anɔ ekpɔm le la anye takpɔkpɔ na mí. Ame aɖewo hã kpɔe be anyo be yewoazã kɔmpiuta alo akpɔ television le ɣeyiɣi si me ame bubuwo le aƒe me. Ame aɖewo hã tso nya me be yewomazã Internet kura o. (Mixlẽ Mateo 5:27-30.) Mina míaɖe afɔ ɖe sia ɖe si hiã atsɔ akpɔ míawo ŋutɔwo kple míaƒe ƒomea ta ale be míate ŋu asubɔ Yehowa “tso dzi dzadzɛ kple dzitsinya nyui kpakple xɔse si me alakpanuwɔwɔ mele o la me.”—1 Tim. 1:5.
19. Ne míeɖea mɔ gbɔgbɔ kɔkɔea fiaa mɔ mí la, vi kawoe wòaɖe na mí?
19 Ku si gbɔgbɔ kɔkɔea ƒe mɔfiafia mí naa míetsena la ɖea vi geɖe na mí. Tufafa kple dzigbɔgbɔ blewu naa ŋutifafa nɔa hamea me. Dɔmenyonyo kple nyuiwɔwɔ naa ƒomea kpɔa dzidzɔ. Xɔse kple ɖokuidziɖuɖu kpena ɖe mía ŋu míenɔa Yehowa ŋu kplikplikpli henɔa dzadzɛ le eŋkume. Gakpe ɖe eŋu la, Galatiatɔwo 6:8 na kakaɖedzi mí be: “Ame si le nu ƒãm hena gbɔgbɔa la, aŋe agbe mavɔ tso gbɔgbɔ la me.” Le nyateƒe me la, Yehowa anɔ te ɖe Kristo ƒe tafevɔsaa dzi azã gbɔgbɔ kɔkɔea atsɔ ana agbe mavɔ ame siwo katã ɖea mɔ gbɔgbɔ kɔkɔea fiaa mɔ wo.
Aleke Nàɖo Wo Ŋui?
• Aleke tufafa kple dzigbɔgbɔ blewu nana ŋutifafa nɔa hamea me?
• Nu kae ate ŋu akpe ɖe Kristotɔwo ŋu woaɖe dɔmenyonyo kple nyuiwɔwɔ afia le aƒe me?
• Aleke xɔse kple ɖokuidziɖuɖu kpena ɖe Kristotɔ ŋu wòdzɔa eƒe dzi ŋu?
[Nɔnɔmetata si le axa 24]
Nu kae míawɔ be masɔmasɔ aɖe si ɖo mía kple nɔvi aɖe dome la nagava zu nya sesẽ o?
[Nɔnɔmetata si le axa 25]
Nusɔsrɔ̃ tso gbɔgbɔa ƒe kutsetsea ŋu ate ŋu aɖe vi na wò ƒomea
[Nɔnɔmetata si le axa 26]
Afɔku kawoe míaƒo asa na ne míeɖea xɔse kple ɖokuidziɖuɖu fiana?