-
Nu Kae Akpe Ðe Ŋuwò Be Nàyi Biblia Sɔsrɔ̃ Dzi?Kpɔ Dzidzɔ Le Agbe Me Tegbee!—Biblia Me Dzodzro Si Aɖe Vi Na Wò
-
-
NUSƆSRƆ̃ 12
Nu Kae Akpe Ðe Ŋuwò Be Nàyi Biblia Sɔsrɔ̃ Dzi?
Biblia sɔsrɔ̃ ɖea vi geɖe ŋutɔ. Gake menɔa bɔbɔe ɣesiaɣi o. Ɣeaɖewoɣi la, ate ŋu awɔ na wò be yemate ŋu ayi Biblia sɔsrɔ̃a dzi o. Nu ka tae wòanyo be nàdze agbagba ayi esɔsrɔ̃ dzi? Nu kae ate ŋu akpe ɖe ŋuwò be nàyi Biblia sɔsrɔ̃a dzi ne èle kuxiwo me tom gɔ̃ hã?
1. Aleke Biblia sɔsrɔ̃ ate ŋu akpe ɖe ŋuwò?
“Mawu ƒe nya la le agbe, eye ŋusẽ le eŋu.” (Hebritɔwo 4:12) Biblia sɔsrɔ̃ ate ŋu akpe ɖe ŋuwò, elabena ana nànya Mawu ƒe susuwo kple ale si wòsena le eɖokui me tso ŋuwò. Azɔ hã, àsrɔ̃ nu geɖe, wò agbea anyo ɖe edzi, eye ànɔ mɔ kpɔm na etsɔme nyui aɖe. Esi gale vevie wue nye be, Biblia akpe ɖe ŋuwò be nànye Yehowa xɔlɔ̃. Ne èle Biblia srɔ̃m la, akpɔ ŋusẽ nyui ɖe dziwò, eye esia ana be agbea nadze edzi na wò.
2. Nu ka tae wòle vevie be míakpɔ asixɔxɔ si gbegbe le Biblia me nyateƒea ŋu adze sii?
Nyateƒe siwo le Biblia me la le abe kesinɔnu xɔasiwo ene. Esia tae Biblia de dzi ƒo na mí be ‘míaƒle nyateƒe, eye míagatsɔe adzra gbeɖe o.’ (Lododowo 23:23) Ne asixɔxɔ si gbegbe le Biblia me nyateƒea ŋu le susu me na mí la, míaku kutri ayi Biblia sɔsrɔ̃ dzi, ne míele nɔnɔme sesẽwo me tom gɔ̃ hã.—Xlẽ Lododowo 2:4, 5.
3. Aleke Yehowa ate ŋu akpe ɖe ŋuwò be nàyi nusɔsrɔ̃a dzi?
Yehowae nye Ŋusẽkatãtɔ, Wɔwòla kple Xɔ̃wò, eya ta edi be yeakpe ɖe ŋuwò nànya ye nyuie. Ate ŋu ana ‘didia kple ŋusẽ wò be nàwɔ nu si dzea eŋu.’ (Xlẽ Filipitɔwo 2:13.) Eya ta, ne edzɔ ɣeaɖewoɣi be èhiã ŋusẽdodo be nàyi nusɔsrɔ̃a dzi alo awɔ ɖe nu si srɔ̃m nèle dzi la, Yehowa ate ŋu akpe ɖe ŋuwò. Ne ègahiã na kpekpeɖeŋu geɖe le esi nèle kuxiwo me tom alo wole tsitre tsim ɖe ŋuwò ta la, Yehowa ado ŋusẽ wò. Nɔ gbe dom ɖa na Yehowa edziedzi be wòakpe ɖe ŋuwò nàyi Biblia sɔsrɔ̃a dzi.—1 Tesalonikatɔwo 5:17.
SRƆ̃ NU BUBUWO
Àkpɔ ale si nàte ŋu ayi edzi anɔ Biblia srɔ̃m ne vovo menɔa ŋuwò o alo amewo le tsitre tsim ɖe ŋuwò gɔ̃ hã. Azɔ hã, àkpɔ ale si Yehowa akpe ɖe ŋuwò be nàdo dzi ayi nusɔsrɔ̃a dzi.
4. Na Biblia sɔsrɔ̃ nanye nu vevitɔ na wò
Ɣeaɖewoɣi la, gbe sia gbe dɔwɔnawo xɔa ɣeyiɣi le mía si ale gbegbe be vovo menɔa mía ŋu be míasrɔ̃ Biblia o. Nu kae ate ŋu akpe ɖe mía ŋu? Mixlẽ Filipitɔwo 1:10, eyome miadzro nyabiase siawo me:
Nu kawoe nèsusu be woawoe nye “nu siwo le vevie wu” le agbe me la dometɔ aɖewo?
Aleke nàte ŋu ana wò Biblia sɔsrɔ̃a nanye nu vevitɔ na wò?
Ne èkɔ ke sia katã ɖe nugo sia me hafi fɔ kpeawo kɔ ɖe edzi la, kpeawo katã mate ŋu ayi eme o
Ne èkɔ kpeawo ɖe eme gbã la, mɔ aganɔ anyi be kea katã kloe nayi nugoa me. Nenema kee ne míewɔ “nu siwo le vevie wu” le agbe me la gbãa, míagakpɔ ɣeyiɣi awɔ nu bubuwo hã
Biblia sɔsrɔ̃ kpena ɖe mía ŋu míeɖia kɔ na didi si le mía me be míanya Mawu ahasubɔe. Mixlẽ Mateo 5:3, eyome miadzro biabia sia me:
Ne míena Biblia sɔsrɔ̃ nye nu vevitɔ na mí la, aleke esia ɖea vi na mí?
5. Do dzi nàyi nusɔsrɔ̃a dzi ne amewo tsi tre ɖe ŋuwò gɔ̃ hã
Ɣeaɖewoɣi la, amewo ate ŋu adze agbagba be yewoaɖe dzi le ƒowò be nàdzudzɔ Biblia sɔsrɔ̃. Kpɔ Francesco ƒe kpɔɖeŋua ɖa. Mikpɔ VIDEOA, eyome miadzro biabia siwo gbɔna me.
Le videoa me la, aleke Francesco ƒe xɔlɔ̃wo kple eƒe ƒometɔwo wɔ nui esime wòƒo nu tso nu si srɔ̃m wònɔ la ŋu na wo?
Esi Francesco do dzi yi nusɔsrɔ̃a dzi la, nu nyui kawoe do tso eme?
Mixlẽ 2 Timoteo 2:24, 25, eyome miadzro biabia siawo me:
Aleke wò ƒometɔwo kple xɔ̃wòwo susu tso nu si srɔ̃m nèle la ŋu?
Le mawunyakpukpui sia ƒe nya nu la, aleke wòle be nàwɔ nui ne ame aɖe mekpɔ dzidzɔ ɖe wò Biblia sɔsrɔ̃a ŋu o? Nu ka tae nèɖo eŋu nenema?
6. Ðo ŋu ɖe Yehowa ŋu be wòakpe ɖe ŋuwò
Ne mía kple Yehowa dome va le kplikplikpli la, míegadina vevie wu be míawɔ nu si dzea eŋu. Ke hã, ɣeaɖewoɣi la, ate ŋu asesẽ na mí be míawɔ tɔtrɔ siwo hiã be míanɔ agbe abe ale si wòdii ene. Ne èsena le ɖokuiwò me nenema la, dzi megaɖe le ƒowò o. Yehowa akpe ɖe ŋuwò. Mikpɔ VIDEOA, eyome miadzro nyabiase siwo gbɔna me.
Le videoa me la, tɔtrɔ kawoe Jim wɔ be yeƒe nu nadze Yehowa ŋu?
Nu kae wɔ dɔ ɖe dziwò le eƒe kpɔɖeŋua me?
Mixlẽ Hebritɔwo 11:6, eyome miadzro biabia siawo me:
Nu kae Yehowa awɔ na ame siwo “dinɛ vevie,” alo ame siwo dzea agbagba vevie be yewoanyae eye yewoadze eŋu?
Nu kae esia ɖe fia wò tso ale si Yehowa sena le eɖokui me ne ekpɔ agbagba siwo dzem nèle be yeasrɔ̃ Biblia la ŋu?
AME AÐE ATE ŊU ABIA BE: “Nu ka tae nèna Yehowa Ðasefowo va le Biblia srɔ̃m kpli wò?”
Aleke nàɖo eŋu nɛ?
NU SIWO MÍESRƆ̃
Togbɔ be Biblia sɔsrɔ̃ menɔa bɔbɔe ɣesiaɣi o hã la, ate ŋu akpe ɖe ŋuwò be nàva nɔ agbe tegbee. Yi edzi nàɖo ŋu ɖe Yehowa ŋu, eye ayra wò.
Numetoto
Nu ka tae nyateƒe siwo le Biblia me la xɔ asi na wò?
Aleke nàte ŋu aɖee afia be ‘èkpɔ nu siwo le vevie wu la dze sii’?
Nu ka tae wòle be nàbia Yehowa be wòakpe ɖe ŋuwò nàyi Biblia sɔsrɔ̃a dzi?
KU NU ME TSO NYATIA ŊU
De dzesi nu ene siwo kpe ɖe ame geɖe ŋu wozã woƒe ɣeyiɣiwo le mɔ nyuitɔ nu.
Kpɔ ale si Yehowa kpe ɖe nyɔnu aɖe ŋu esime srɔ̃a mese nu si tae wònɔ agbagba dzem be yeasubɔ Mawu ɖo la gɔme o.
Kpɔ ale si srɔ̃nyɔnu aɖe ƒe dzidodo ɖe vi na srɔ̃ae ɖa.
Ame aɖewo gblɔna be Yehowa Ðasefowo nana ƒomewo gbãna. Gake ɖe esia nye nyateƒea?
“Ðe Yehowa Ðasefowo Gbãa Ƒomewo Loo Alo Ðe Wotua Wo Ðoa?” (Nyati sia le jw.org)
-
-
Ale Si Nàwɔ Atso Nya Me NyuieKpɔ Dzidzɔ Le Agbe Me Tegbee!—Biblia Me Dzodzro Si Aɖe Vi Na Wò
-
-
NUSƆSRƆ̃ 35
Ale Si Nàwɔ Atso Nya Me Nyuie
Ehiãna be mí katã míatso nya me le nanewo ŋu. Eye míaƒe nyametsotsowo ate ŋu aɖe vi na mí loo alo agblẽ nu le mía ŋu, eye ate ŋu ana míaƒe nu nadze Yehowa ŋu alo madze eŋu o. Le kpɔɖeŋu me, ate ŋu ahiã be míatso nya me le afi si míanɔ, alo dɔ si míawɔ atsɔ akpɔ mía ɖokui dzi la ŋu, alo atso nya me be míaɖe srɔ̃ loo alo míaɖe srɔ̃ o. Ne míetsoa nya me nyuie la, míakpɔ dzidzɔ le agbe me eye míaƒe nu adze Yehowa ŋu.
1. Aleke nàte ŋu awɔ Biblia ŋu dɔ be wòakpe ɖe ŋuwò nàtso nya me nyuie?
Hafi nàtso nya me le nane ŋu la, do gbe ɖa na Yehowa be wòakpe ɖe ŋuwò, eye nàdzro Biblia me be nàkpɔ eƒe susu le nyaa ŋu. (Xlẽ Lododowo 2:3-6.) Le nya aɖewo gome la, Yehowa de se siwo me kɔ nyuie. Le go mawo me la, nu nyuitɔ si wòle be nàwɔ ye nye be nàwɔ ɖe seawo dzi.
Ke ne Biblia mede se aɖeke tẽe ku ɖe nu si wòle be nàwɔ ŋu o ya ɖe? Le go mawo gɔ̃ hã me la, Yehowa akpe ɖe ŋuwò be nànya “mɔ si dzi wòle be nàto.” (Yesaya 48:17) Aleke wòakpe ɖe ŋuwòe? Gɔmeɖosewo alo mɔfiamewo le eƒe Nya, Biblia, me siwo ate ŋu akpe ɖe ŋuwò. Biblia me gɔmeɖosewo nye nyateƒenya vevi siwo nana míenyana Mawu ƒe susu kple ale si wòsena le eɖokui me le nuwo ŋu. Zi geɖe la, míenyana ale si Mawu sena le eɖokui me le nya aɖe ŋu ne míexlẽ Biblia me ŋutinya aɖe. Ne míede dzesi ale si Yehowa sena le eɖokui me le nya aɖe ŋu la, míate ŋu awɔ nyametsotso siwo adze eŋu.
2. Nu kawo ŋue wòle be nàbu hafi atso nya me le nya aɖe ŋu?
Biblia gblɔ be: “Aɖaŋudzela léa ŋku ɖe eƒe afɔɖeɖewo katã ŋu.” (Lododowo 14:15) Esia fia be hafi míatso nya me la, ele be míagbɔ dzi ɖi ade ŋugble le tiatia ɖe sia ɖe si dze ŋgɔ mí la ŋu. Ne èle afɔ vovovo siwo nàte ŋu aɖe ŋu bum la, bia ɖokuiwò be: ‘Biblia me mɔfiame kawoe ku ɖe nya sia ŋu? Aleke afɔɖeɖe sia ana mase le ɖokuinye me? Ðe nye nyametsotsoa aɖe vi na ame bubuwo loo alo agblẽ nu le wo ŋu? Vevietɔ wu la, ɖe wòana Yehowa nakpɔ dzidzɔa?’—5 Mose 32:29.
Yehowa ye nye ame si agblɔ nu si nyo kple nu si menyo o na mí. Ne míeva nya Yehowa ƒe sewo kple eƒe mɔfiamewo nyuie eye míeɖoe kplikpaa be míawɔ wo dzi la, ekema míele hehe nam míaƒe dzitsinya. Dzitsinya ye nye ame ƒe seselelãme si nana wònyana nenye be nane nyo alo menyo o. (Romatɔwo 2:14, 15) Ne míena hehe míaƒe dzitsinya la, akpe ɖe mía ŋu míanɔ nya me tsom nyuie.
SRƆ̃ NU BUBUWO
Àkpɔ ale si Biblia me mɔfiamewo kple míaƒe dzitsinya kpena ɖe mía ŋu míetsoa nya me.
3. Na Biblia nafia mɔ wò
Aleke Biblia ƒe gɔmeɖosewo ate ŋu afia mɔ mí ne eva hiã be míatso nya me le nane ŋu? Mikpɔ VIDEOA, eyome miadzro biabia siwo gbɔna me.
Nu kae nye tiatiawɔblɔɖe?
Nu ka tae Yehowa na tiatiawɔwɔ ƒe ablɔɖe mí?
Nu kae wòna mí be wòakpe ɖe mía ŋu míawɔ míaƒe tiatiawɔblɔɖea ŋu dɔ le mɔ nyuitɔ nu?
Mixlẽ Efesotɔwo 5:15, 16 be miakpɔ Biblia me gɔmeɖose aɖe. Eyome, midzro biabia siwo gbɔna me. Aleke nàte ŋu awɔ wò “ɣeyiɣi ŋu dɔ le mɔ nyuitɔ nu” ale be . . .
nànɔ Biblia xlẽm edziedzi?
nànye srɔ̃ŋutsu nyui alo srɔ̃nyɔnu nyui, dzila nyui, viŋutsu nyui alo vinyɔnu nyui?
nànɔ hame ƒe kpekpewo dem?
4. Na hehe wò dzitsinya be wòakpe ɖe ŋuwò nànɔ nya me tsom nyuie
Ne Biblia de se ku ɖe nya aɖe ŋu tẽe la, enɔa bɔbɔe be míatso nya me nyuie. Ke ne se aɖeke meku ɖe nyaa ŋu tẽe o ɖe? Mikpɔ VIDEOA, eyome miadzro nyabiase si gbɔna me.
Le videoa me la, afɔ kawoe nɔvinyɔnua ɖe tsɔ na hehe eƒe dzitsinya ale be wòatso nya me wòadze Yehowa ŋu?
Nu ka tae mele be míabia tso ame bubuwo si be woatso nya me ɖe mía nu o? Mixlẽ Hebritɔwo 5:14, eye miadzro nyabiase siawo me:
Togbɔ be adze nu si le bɔbɔe wu be míana ame bubuwo natso nya me ɖe mía nu hã la, nu kae wòle be míawo ŋutɔwo míade dzesii?
Nu vovovo kawoe li siwo ate ŋu akpe ɖe ŋuwò nàna hehe wò dzitsinya ale be nàwɔ nyametsotso nyuiwo?
Ale si ko anyigbatata kpena ɖe mía ŋu míenyana mɔ si míato la, nenema kee míaƒe dzitsinya hã fiaa mɔ mí le agbe me
5. Bu ame bubuwo ƒe dzitsinya ŋu
Ale si ame sia ame atso nya me le nya aɖe ŋu la ate ŋu ato vovo. Aleke míate ŋu aɖee afia be míebua ame bubuwo ƒe dzitsinya ŋu? Bu kpɔɖeŋu eve siawo ŋu kpɔ:
Kpɔɖeŋu 1: Nɔvinyɔnu aɖe si lɔ̃a lekewɔnuwo sisi ɖe mo kple nuto la ʋu yi hame aɖe me, evɔ le hame ma me la, eɖiaa nɔvinyɔnu geɖe nu ne wokpɔe be ame aɖe zã lekewɔnu mawo.
Mixlẽ Romatɔwo 15:1 kple 1 Korintotɔwo 10:23, 24, eye miadzro biabia siawo me:
Le mawunyakpukpui siawo ƒe nya nu la, nu kae nɔvinyɔnua ate ŋu atso nya me be yeawɔ? Ne wò dzitsinya ɖea mɔ na wò be nàwɔ nane evɔ nèkpɔe be nu ma wɔwɔ ɖea fu na hawòvi ƒe dzitsinya la, nu kae nàwɔ?
Kpɔɖeŋu 2 lia: Nɔviŋutsu aɖe nyae be Biblia megblɔ be enye nu gbegblẽ be ame nano aha sesẽ o, gake etiae be yemano aha sesẽ aɖeke o. Eva dzɔ be wokpee va kplɔ̃ɖoƒe aɖe eye wòkpɔe be nɔviwo le aha sesẽ nom.
Mixlẽ Nyagblɔla 7:16 kple Romatɔwo 14:1, 10, eye miadzro biabia siawo me:
Le mawunyakpukpui siawo ƒe nya nu la, nu kae nɔviŋutsua ate ŋu atso nya me be yeawɔ? Ne wò dzitsinya meɖea mɔ na wò be nàwɔ nane o, evɔ èkpɔ ame bubu wòle ewɔm la, nu kae nàwɔ?
Afɔɖeɖe kawoe akpe ɖe ŋuwò be nàtso nya me nyuie?
1. Bia Yehowa be wòakpe ɖe ŋuwò nànya nu si wòle be nàwɔ.—Yakobo 1:5.
2. Ku nu me le Biblia kple Biblia srɔ̃gbalẽwo me be nàkpɔ gɔmeɖose siwo ŋu dɔ nàte ŋu awɔ. Àte ŋu aɖo dze tso nyaa ŋu kple Kristotɔ siwo tsi le xɔse me hã.
3. De ŋugble le ŋusẽ si wò nyametsotsoa akpɔ ɖe wò dzitsinya kple ame bubuwo ƒe dzitsinya dzi la ŋu.
AME AÐEWO GBLƆNA BE: “Àte ŋu awɔ nu sia nu si dze ŋuwò faa. Mehiã be nàtsi dzi ɖe nu si amewo asusu ŋu o.”
Nu ka tae wòle be míabu ale si Mawu, kple ame bubuwo hã ase le wo ɖokui me tso nu si míedi be míawɔ la ŋu?
NU SIWO MÍESRƆ̃
Nu si akpe ɖe mía ŋu míatso nya me nyuie le nya aɖe ŋue nye be míanya ale si Yehowa sena le eɖokui me le nyaa ŋu, eye míabu eŋu kpɔ be ɖe míaƒe nuwɔnawo aɖe vi na ame bubuwo loo alo agblẽ nu le wo ŋu hã.
Numetoto
Nu kawoe nàte ŋu awɔ be nàtso nya me wòadze Yehowa ŋu?
Aleke nàte ŋu ana hehe wò dzitsinyae?
Aleke nàte ŋu aɖee afia be yebua ame bubuwo ƒe dzitsinya ŋu?
KU NU ME TSO NYATIA ŊU
Aleke nàte ŋu awɔ nyametsotso siwo ana ƒomedodo kplikplikpli nanɔ wò kple Mawu dome?
“Wɔ Nyametsotso Siwo Dea Bubu Mawu Ŋu” (Gbetakpɔxɔ, April 15, 2011)
Video sia akpe ɖe ŋuwò nàsrɔ̃ nu geɖe tso ale si Yehowa ɖoa aɖaŋu na míi ŋu.
Kpɔ nu siwo kpe ɖe ŋutsu aɖe ŋu wòkpɔ ta na nyametsotso sesẽ aɖe si dze ŋgɔe la le video sia me.
Le nyati sia me la, àkpɔ ale si nàwɔ adze Yehowa ŋu ne mena mɔfiame aɖeke tẽe tso nya aɖe ŋu o.
“Ðe Nèhiã Biblia Me Se Aɖe Ɣesiaɣia?” (Gbetakpɔxɔ, December 1, 2003)
-