Ne Àka Ðe Ame Dzi Alo Màka Ðe Edzi O

ATE ŋu asesẽ be nànya nenye be àka ɖe ame dzi alo màka ɖe edzi o. Afɔku le ɖesiaɖe ŋu, vevietɔ le xexe si me amebeble kple yomemɔfiafia bɔ ɖo ŋutɔ me. Ke hã mí katã míehiã xɔlɔ̃ si ŋu míaɖo dzi ɖo be akpe ɖe mía ŋu le xaxaɣi. (Lododowo 17:17) Phaedrus si nye Romatɔ agbalẽŋlɔla ƒo nu tso kuxia ŋu abe ƒe akpe eve enye si va yi ene ale: “Afɔku le eme be woaka ɖe ame dzi alo womaka ɖe ame dzi o.”

Kakaɖeamedzi Ate Ŋu Anye Afɔku

Nukatae afɔku ate ŋu anɔ eme be woaka ɖe ame bubu aɖe dzi? Wò ya de ŋugble le nuxlɔ̃ame si wona le Psychology Today ƒe magazine me ŋu kpɔ. Eƒo nu tso ame aɖewo siwo wɔa alesi amewo ka ɖe wo dzii ŋudɔ madzemadzee ŋu be wole abe “lã lénu” siwo “wɔa ameblenuwo eye wotrɔa wo ɖokui abe agama ene be woaflu amesiwo te ɖe wo ŋu eye woakpɔ ŋusẽ ɖe wo dzi ahagblẽ woƒe agbe dome” ŋu. Edze ƒã be esi ameblela siawo li ta la, enye afɔku vavã be woaka ɖe ame dzi akpa.

Woate ŋu aflu amesi kana ɖe ame dzi akpa, eye esia awɔe be woablee eye woakpɔ ŋusẽ ɖe edzi bɔbɔe. Ame aɖe si woflu bɔbɔe ƒe kpɔɖeŋu ɖedzesi aɖee nye Aƒetɔ Arthur Conan Doyle, amesi to nyagɔmekulagã tagbɔɖaɖɛtɔ Sherlock Holmes ƒe ŋutinya vɛ. Le ƒe 1917 me la, ɖetugbivi eve aɖewo siwo nye Elsie Wright kple eƒe nɔgãnɔɖivi Frances Griffiths gblɔ be yewoɖi kɔ kple azizã aɖewo le abɔ si le yewo ƒe aƒeme le Cottingley, England la me. Wotsɔ azizãawo ƒe foto gɔ̃ hã fia be woatsɔ aɖo kpe nya la dzie.

Conan Doyle si va xɔ gbɔgbɔyɔyɔ dzi se vevie le viaŋutsu ƒe ku megbe la ka ɖe wo dzi eye wòxɔ nya siwo wogblɔ tso azizãwo ŋu dzi se—abe alesi ame geɖe xɔe se ɣemaɣi ene. Gake ƒe 55 megbe ke hafi nyɔnuvi eveawo ʋu eme be amebeblee wònye eye be agbalẽ mee yewo ɖe “azizãwo” tsoe hafi ɖe fotoawo. Ewɔ nuku na Frances Griffiths be amewo xɔ woƒe nya la dzi se. Egblɔ be: “Alesi wote ŋu flu amewo ale gbegbe be woxɔe se be wonye nu ŋutɔŋutɔwo la wɔa nuku nam ɣesiaɣi.”—Hoaxers and Their Victims.

Èkpɔ mɔ̃ si me Conan Doyle ge dzea? Exɔ nya la dzi se nuŋumabumabutɔe le esi wòdi be wòanye nyateƒe ta ko. Agbalẽŋlɔla Norman Moss gblɔ be: “Woate ŋu aflu mí le esi míaƒe nɔnɔme akpɔ ŋusẽ ɖe míaƒe tamesusu dzi ta, eye míebua nuwo ŋu nyuie o. . . . Ɣeaɖewoɣi míelɔ̃na ɖe nane dzi be enye nyateƒe elabena míedi be wòanye nyateƒe.” (The Pleasures of Deception) Esia ɖo kpe nuxlɔ̃ame si Helatɔ nuƒola xɔŋkɔ Demosthenes na abe ƒe 350 lɔƒo do ŋgɔ na Mía Ŋɔli ene la dzi be: “Nusi le bɔbɔe wu kura enye be woable ame ɖokui, elabena nusi ame di dzie wòxɔna sena zi geɖe be enye nyateƒe.” Afɔku ate ŋu anɔ eme be míaka ɖe míaƒe seselelãmewo ɖeɖeko dzi.

Àte ŋu agblɔ be kpɔɖeŋu ma ya gbɔ eme akpa eye be yemanye ame tsibome abe Conan Doyle ene o. Gake menye amesi woate ŋu aflu bɔbɔe koe woblena o. Amesiwo dze abe amesiwo dzi woate ŋu aka ɖo ene la flu ame geɖe siwo ɖɔa ŋu ɖo eye wonɔa mo xexi la heble wo.

Makamaka Ðe Ame Dzi Ate Ŋu Anye Afɔku

Gake afɔkuwo le makamaka ɖe ame aɖeke alo naneke dzi o me. Makamaka ɖe ame dzi le abe ɣebia si nyia ga ene. Ate ŋu agblẽ nu le ƒomedodo kplikplikpli si me wòle be dzidzɔ nanɔ hafi ŋu eye wòagblẽ eme. Ðikeke si xɔ aƒe ɖe ame me kple makamaka ɖe ame dzi nugɔmemasemasetɔe ate ŋu ana nàzu dzidzɔmakpɔla kple xɔlɔ̃mawɔla. Ate ŋu agblẽ ƒomedodo si le mia kple ame bubuwo dome la me ale gbegbe be Englandtɔ agbalẽŋlɔla Samuel Johnson ŋlɔe bena, “anyo ne woba wò ɣeaɖewoɣi wu esi màka ɖe ame aɖeke dzi o.”

Makamaka ɖe ame dzi ate ŋu agblẽ nu le wò lãmesẽ gɔ̃ hã ŋu. Ðewohĩ ènya be seselelãme sesẽwo abe dzikudodo ene ate ŋu ana nàxɔ dzidɔ. Gake ènya be numekuku aɖewo ɖee fia be makamaka ɖe ame dzi hã ate ŋu agblẽ nu nenema kea? Chatelaine magazine gblɔ be: “Menye amesiwo ƒe dɔmedzoe flana kabakaba koe ate ŋu axɔ dzidɔ bɔbɔe le woƒe nɔnɔmea ta o. Numekuku yeye ɖee fia be fuléle ƒe nɔnɔme siwo menya kpɔna dzea sii bɔbɔe o, abe amedzimaxɔse kple makamaka ɖe ame dzi ene, ate ŋu ade wò afɔku me.”

Lé Ŋku Ðe Wò Afɔɖeɖe Ŋu Nyuie

Nukae nàte ŋu awɔ? Biblia ɖo aɖaŋu nyui aɖewo le esia ŋu. Lododowo 14:15 gblɔ be: “Ame bebewu xɔa nya sia nya dzi sena.” Esia mefia ɖikeke manyatalenu o. Enye ŋkuɖodzi nyuie be ehiã be woaɖɔ ŋu ɖo. Ame manyanu kple nuteƒemakpɔla koe axɔ nya sia nya si wòase la dzi ase. Eyata esɔ be Biblia me lododoa yi edzi be: “Ke nunyala léa ŋku ɖe eƒe afɔɖeɖe ŋu.” Englandtɔ fefeŋlɔla William Shakespeare ŋlɔe be: “Mègaka ɖe ʋuƒo vovowo dzi o.” Anye bometsitsi ŋutɔ be ame aɖe nasusu be ʋuƒo siwo wotsɔ wɔ tɔdzisasrã ɖe ʋe gã aɖe dzi la vo gake wòaɖo afɔ wo dzi. Ekema aleke nàte ŋu ‘alé ŋku ɖe wò afɔɖeɖewo ŋu nyuie’ be màwɔ vodada le kakaɖeamedzi me o?

Biblia de dzi ƒo na mí be míado nya siwo amewo gblɔna la akpɔ tsɔ wu be míaxɔ nya sia nya si míesena la ade eme ko. Egblɔ be: “To doa nya kpɔna, abe alesi veme ɖɔa nuɖuɖu kpɔna ene.” (Hiob 34:3) Ðe ema menye nyateƒe oa? Ðe míeɖɔa nuɖuɖu kpɔna zi geɖe hafi minɛ oa? Ele be míado amewo ƒe nyawo kple nuwɔnawo hã akpɔ hafi axɔ wo ade eme. Ame nyui aɖeke mabi dzi nenye be míelé ŋku ɖe eƒe ɖaseɖigbalẽviwo ŋu o. Ŋkuléle ɖe nu ŋu akpɔ be enyo la wɔ ɖeka kple Scotlandtɔwo ƒe lododo si gblɔ be: “Amesi ablem zi gbãtɔ la, adze ŋukpe dzi nɛ; ne eblem zi evelia la, adze ŋukpe dzi nam.”

Apostolo Paulo xlɔ̃ nu be: “Mido nuwo katã kpɔ.” (Tesalonikatɔwo I, 5:21) Wozã nya si apostolo Paulo zã na ‘do kpɔ’ hã na tomenu xɔasiwo dodo kpɔ be woanya ne wonye nyuitɔ. Nunyala doa nusi ƒlem wòle kpɔna ɣesiaɣi nenye be enye nyuitɔ. Ne menye nenema o la nusi asu esi anye esi woyɔna be bometsila ƒe sika—nusi ɖi sika gake, le nyateƒe me la, enye nu maɖinu.

Se Nu gɔme eye Nàda Asɔ

Le nyateƒe me la, míedi be míanye nugɔmeselawo le nya sia me eye mele be míabu susu vɔ̃ ɖe ame bubuwo ŋu madzemadzee o. (Filipitɔwo 4:5) Mègayɔ akpa atso nya me be tameɖoɖo vɔ̃e le ame aɖe si o. Nazãbubu ɖe ame ŋu ate ŋu anye mɔ kpuitɔ si dzi woato agblẽ ƒomedodo nyui me. Zi geɖe la, anye nusi sɔ wu ne èbui be nu nyuitɔe xɔ̃wòwo di be yewoawɔ na wò tsɔ wu be nàbui be susu vɔ̃e le wo si nenye be nɔnɔme sesẽwo do mo ɖa.

Ðe mɔ ɖe ame bubuwo ƒe blibomademade kple vodadawo ŋu. Kristin von Kreisler si nye agbalẽŋlɔla gblɔ be: “Xɔlɔ̃ ƒe amefuflu nye kakaɖeamedzi dome gbegblẽ.” Gake amefuflu sia ate ŋu anye numaɖowɔe alo ate ŋu atso gbɔdzɔgbɔdzɔ aɖe si ŋu amea bu fɔ eɖokui le vevie fifia gbɔ. Eyata eyi dzi gblɔ be: “Mègabu amefuflua ŋu fũ o—ne menye nenema o la awɔe be màgaka ɖe ame bubuwo dzi o.” Megana nuteɖeamedzi kple nu madzemadze siwo wowɔ ɖe ŋuwò va yi naxe mɔ na dzidzɔ si nàte ŋu akpɔ tso kakaɖeamedzi ƒe ƒomedodo si nàtu ɖo kple ame bubuwo me o.

Da sɔ. Mele be nàŋe aɖaba ƒu nuwo dzi ne èle ame bubuwo dom kpɔ o; ŋuɖɔɖola nɔa ŋute. Ðɔkta Redford Williams hã ɖo aɖaŋu be míate kpɔ abui be nu nyuitɔ si ame bubu ate ŋu awɔ la wɔmee wole, dze agbagba nàse nu gɔme na wo, eye ɣesiaɣi si wòanya wɔ la “srɔ̃ alesi nàka ɖe ame bubuwo dzi.” Anyo ne èka ɖe ame dzi akpa tsɔ wu be màka ɖe ame dzi kura o.

Biblia-gbalẽ si nye Lododowo ŋlɔla lɔ̃ ɖe edzi be “xɔlɔ̃ geɖe dzedze aʋlie”—si nye amesiwo adi be yewoawɔ wò kakaɖeamedzi ŋudɔ le mɔ gbegblẽ nu. Wobɔ ɖe xexeame ŋutɔ. Gake na ɣeyiɣi ame bubuwo eye nàɖe mɔ na wo woaɖee afia be yewonye ame ɖoŋuɖeŋuwo, eye vavãe, àkpɔ xɔlɔ̃ siwo “kuna ɖe ame ŋu wu ame nɔvi.”—Lododowo 18:24.

Ekema ɖe ame aɖe, alo nane li, si dzi nàte ŋu aka ɖo bliboe, eye màvɔ̃ be awɔ yeƒe kakaɖeamedzi ŋudɔ le mɔ gbegblẽ nu alo aflu wò oa? Ẽ, eli vavã. Nyati si kplɔ esia ɖo adzro amesi ŋu nàɖo dzi ɖo le kakaɖeamedzi blibo me la me.

[Nya si ɖe dzesi si le axa 6]

“Ame bebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.”—Lododowo 14:15

[Nɔnɔmetata si le axa 7]

Ðe mɔ ɖe ame bubuwo ƒe blibomademade kple vodadawo ŋu