Bu Nuwo Ŋu Nyuie Wɔ Nu Nunyatɔe

KPƆ nudzɔdzɔ sia ɖa le susu me: Yesu Kristo le eme ɖem be amesiwo tsi tre ɖe eƒe subɔsubɔ ŋu le Yerusalem ado nuxaxa nɛ vevie ahawui emegbe. Esesẽ na exɔlɔ̃ kplikplikpli apostolo Petro be wòaxɔe ase. Le nyateƒe me la, eɖe kpɔ Yesu hegbe nya nɛ. Ðikeke aɖeke mele Petro ƒe nuwɔwɔ le dzimekɔkɔ me kple eƒe ɖetsɔleme vavã ŋu o. Gake aleke Yesu bu Petro ƒe nuŋububui? Yesu gblɔ be: “Te ɖa yi megbenye, Satana! Nuɖiaɖia nènye nam, elabena menye Mawu tɔ nèsusu o, negbe nusi nye amegbetɔwo tɔ ko.”—Mateo 16:21-23.

Aleke ema anya dze Petro kpo enye si! Le kpekpeɖeŋunala kple alɔdola si wòanye teƒe la, ezu “nuɖiaɖia” na eƒe Aƒetɔ si gbɔ melɔ̃a nu le o la le go sia me. Aleke wòdzɔe? Ðewohĩ vo si amegbetɔwo katã dana le woƒe nuŋububu me—si nye nusi dzi ko ame di be yeaxɔ se la dzixɔxɔse—ƒe mɔ̃e ɖe Petro.

Mègaka Ðe Ðokuiwò Dzi Akpa O

Nusi ate ŋu agblẽ nu le míaƒe nuŋububu nyuie ŋu enye alesi wòle bɔbɔe be míaka ɖe mía ɖokui dzi akpa. Apostolo Paulo xlɔ̃ nu hati Kristotɔ siwo nɔ blema Korinto be: “Amesi ke susuna be, yele tsitre la, nakpɔ nyuie, bena wòagadze anyi o.” (Korintotɔwo I, 10:12) Nukatae Paulo gblɔ nya sia? Anɔ eme be enya alesi wòle bɔbɔe be amegbetɔwo ƒe nuŋububu me nagblẽe—be Kristotɔwo gɔ̃ hã ƒe susu ‘nagblẽ tso nyateƒetoto kple kɔkɔenyenye siwo dze Kristo la gbɔ.’—Korintotɔwo II, 11:3.

Esia dzɔ ɖe Paulo ƒe tɔgbuiwo ƒe dzidzime blibo aɖe dzi. Ɣemaɣi la, Yehowa gblɔ na wo be: “Nye susuwo menye miaƒe susuwo o, eye miaƒe mɔwo menye nye mɔwo o.” (Yesaya 55:8) Wobu “wo ɖokui nunyalawoe” wòzu afɔku na wo. (Yesaya 5:21) Eyata susu le eme godoo be míalé ŋku ɖe alesi míate ŋu abu nuwo ŋu nyuie be míaƒo asa na afɔku mawo tɔgbe ŋu.

Kpɔ Nyuie le Nuwo Ŋu Bubu le Ŋutilã Nu Ŋu

Nuwo ŋu bubu le ŋutilã nu kpɔ ŋusẽ gbegblẽ ɖe Korintotɔ aɖewo dzi. (Korintotɔwo I, 3:1-3) Woɖoa ŋu ɖe amegbetɔwo ƒe xexemenunya ŋu wu esi wòaɖoe ɖe Mawu ƒe Nya ŋu. Ðikeke mele eme o be Hela nunyala siwo nɔ anyi ɣemaɣi la nye agbalẽnyalawo. Gake le Mawu ŋkume la, wotsi bome. Paulo gblɔ be: “Woŋlɔ ɖi bena: ‘Magblẽ nunyalawo ƒe nunya dome, eye maɖe gɔmeselawo ƒe gɔmesese ɖa.’ Afika nunyala le? Afika agbalẽfiala le? Afika xexe sia me ƒe anukutsyɔla le? Alo menye Mawu trɔ xexe sia me ƒe nunya wòzu bometsitsi o ɖe?” (Korintotɔwo I, 1:19, 20) “Xexeme ƒe gbɔgbɔ” ye kpɔa ŋusẽ ɖe agbalẽnyala siawo dzi tsɔ wu be Mawu ƒe gbɔgbɔ nakpɔe ɖe wo dzi. (Korintotɔwo I, 2:12) Woƒe xexemenunya kple nukpɔsusuwo mewɔ ɖeka kple Yehowa ƒe tamesusu o.

Satana Abosam, amesi zã da tsɔ ble Xawa, ye nye amesi koŋ gbɔ nuŋububu le ŋutilã nu tso. (Mose I, 3:1-6; Korintotɔwo II, 11:3) Ðe wògakpɔtɔ nye afɔku na mía? Ẽ! Mawu ƒe Nya gblɔ be Satana “gbã ŋku na” amewo ale gbegbe be, ele ‘xexeame katã blem’ fifia. (Korintotɔwo II, 4:4; Nyaɖeɖefia 12:9) Aleke gbegbe wòle vevie enye si be míanɔ ŋudzɔ ɖe eƒe ayemɔwo ŋui!—Korintotɔwo II, 2:11.

Nɔ Ŋudzɔ Ðe “Amewo ƒe Beble” Ŋu

Apostolo Paulo hã xlɔ̃ nu ku ɖe “amewo ƒe beble” ŋu. (Efesotɔwo 4:14) Edo go “dɔwɔla, siwo blea ame” siwo wɔ abe nyateƒea gblɔmee wole ene gake wonye amesiwo tututu tɔtɔe. (Korintotɔwo II, 11:12-15) Be amesiawo naɖo woƒe taɖodzinuawo gbɔ la, wozãa kpeɖodzi tiatia aɖewo, nya wɔdɔɖeamedziwo, nya trama siwo ƒe akpa aɖewo nye nyateƒe, ameflunyawo, kple alakpa ŋutɔŋutɔ gɔ̃ hã.

Ameflunyagblɔlawo zã nya abe “kɔmamã” ene zi geɖe tsɔ gblẽa ame bubuwo ŋui. Nya aɖe si woɖo Europa ƒe Aɖaŋuɖotakpekpea ƒe Sewɔtakpekpea ŋkume gblɔ be “woaɖo aɖaŋu na” dziɖuɖumegã siwo le numekuku wɔm le subɔsubɔha yeyewo ŋu be “woadzudzɔ nyagbe sia zazã.” Nukatae? Wobui be nya “kɔmamã” nye ameŋugblẽnya vevi aɖe. Egblɔ yi edzi be: “Ame hahoowo bua kɔmamã egbea be enye nu vɔ̃ɖi aɖe ŋutɔ alo edoa afɔku ame.” Le mɔ ma ke nu la, Hela agbalẽnyalawo tsɔ nya ɖe apostolo Paulo ŋu madzemadzee be enye “nuƒola,” alo ‘nukuiwo fɔla.’ Nusi wodi be yewoafia enye be enye nukpoloe ƒuƒlu ƒola, amesi ƒoa nu tso nunya kui siwo le esi ŋu ɣeawokatãɣi. Le nyateƒe me la, ‘Yesu kple tsitretsitsia ƒe nyanyui la gblɔmee’ Paulo nɔ.—Dɔwɔwɔwo 17:18.

Ðe ameflunyagblɔlawo ƒe aɖaŋuawo wɔ dɔa? Ẽ. Wowɔ akpa vevi aɖe le gbevovovodolawo kple subɔsubɔhawo dome fuléle hehe vɛ me to amewo ƒe nukpɔsusu le dukɔ alo subɔsubɔ bubu me tɔwo ŋu totro me. Ame geɖe zã wo tsɔ da ame ƒomevi siwo ame geɖewo menya o la ɖe anyi. Adolf Hitler zã mɔnu siawo nyuie esime wòna wova bu Yudatɔwo kple ame bubuwo be wonye “ame gbegblẽwo,” “ame vɔ̃ɖiwo,” kple “ŋɔdzinu” na Dukɔa. Mègaɖe mɔ ame fuflu sia ƒomevi naƒo ɖi alesi nèbua nuwo ŋui o.—Dɔwɔwɔwo 28:19-22.

Mègable Ðokuiwò O

Mía ɖokuiwo beble hã le bɔbɔe ŋutɔ. Le nyateƒe me la, anye nusesẽ ŋutɔ be woaɖe asi le nukpɔsusu ŋu alo abia nya le eŋu. Nukatae? Elabena míaƒe dzi kuna ɖe míaƒe nukpɔsusuwo ŋu vevie. Ekema míato alakpa nukpɔsusuwo me ayi mía ɖokuiwo ble ge—to nukpɔsusu aɖewo toto vɛ be míatsɔ aʋli dzixɔse siwo ŋu vodada le eye wokplɔa ame tranae la tae me.

Esia dzɔ ɖe ƒe alafa gbãtɔ me Kristotɔ aɖewo dzi. Wonya Mawu ƒe Nya la, gake womena wòkpɔ ŋusẽ ɖe woƒe nuŋububu dzi o. Ewɔe be wova zu ‘amesiwo tsɔ alakpa nukpɔsusu nɔ wo ɖokui blemee.’ (Yakobo 1:22, 26) Nusiwo ɖenɛ fiana be ameɖokuibeble ƒe mɔ̃ sia ɖe mí la dometɔ ɖekae nye ne míedoa dziku ne wobia nya ku ɖe míaƒe dzixɔsewo ŋu. Le esi teƒe be míado dziku la, nunya le eme be nukpɔsusu nyui nanɔ mía si eye míalé to ɖe nusi ame bubuwo di be yewoagblɔ ŋu—nenye be míeka ɖe edzi be míaƒe nukpɔsusue nye dzɔdzɔea hã.—Lododowo 18:17.

Di “Sidzedze Mawu”

Nukae nàte ŋu awɔ be nàbu nuwo ŋu nyuie? Kpekpeɖeŋunu geɖe li, gake ele be míalɔ̃ faa be míadii. Fia nunyala Salomo gblɔ be: “Vinye, ne èxɔ nye nuƒoƒo wɔ tɔwòe, eye nèdzra nye sewo ɖo ɖe ɖokuiwò gbɔ, be nèƒu wò to anyi ɖe nunya ŋu, eye nèbi wò dzi ɖe gɔmesese ŋuti, ẽ, ne èyɔ nunya, eye nèkɔ wo gbe dzi ɖe gɔmesese ŋu la, ne èdii abe klosalo ene, eye nèdi eyome mɔ abe kesinɔnu, si le to me ene la, ekema àse Yehowa-vɔvɔ̃ gɔme, eye wò asi atu sidzedze Mawu.” (Lododowo 2:1-5) Ẽ, ne mía ŋutɔwo míedze agbagba be míana nyateƒenya siwo le Mawu ƒe Nya me naxɔ míaƒe susu kple dzi me la, nunya, gɔmesese, kple nugɔmesese akuakua asu mía si. Ema afia be míele nusiwo xɔ asi sasasã wu klosalo alo ŋutilãmenu xɔasi ɖesiaɖe la dim.—Lododowo 3:13-15.

Le nyateƒe me la, nunya kple sidzedze nye nu veviwo le nuŋububu nyuie me. Mawu ƒe Nya gblɔ be: “Ekema nunya age ɖe wò dzi me, eye sidzedze avivi wò luʋɔ nu. Tamebubu akpɔ dziwò, eye gɔmesese adzɔ ŋuwò, ne wòaɖe wò tso mɔ vɔ̃ dzi, le amesiwo gblɔa godzenya la ŋu, amesiwo gblẽ mɔ dzɔdzɔe la ɖi, be woazɔ blukɔ ƒe mɔ dzi.”—Lododowo 2:10-13.

Ele vevie ŋutɔ be míana Mawu ƒe tamesusuwo nafia mɔ alesi míebua nuwo ŋui le xaxa alo afɔku ƒe ɣeyiɣiwo me. Seselelãme sesẽwo abe dziku alo vɔvɔ̃ ene ate ŋu ana wòasesẽ na mí be míabu nuwo ŋu nyuie. Salomo gblɔ be: “Sesẽnuɖuɖu doa bometsila nunyalawo.” (Nyagblɔla 7:7) Ele bɔbɔe gɔ̃ hã be miaƒe ‘dzi nanyrã ɖe Yehowa ŋu.’ (Lododowo 19:3) Le mɔ ka nu? To míaƒe kuxiwo ƒe fɔ bubu Mawu me kpakple wo zazã atsɔ ado taflatsee le nusiwo mewɔ ɖeka kple eƒe sewo kple gɔmeɖosewo o la wɔwɔ me. Le esi míanɔ bubum be míenya nu wu teƒe la, mina míalé to ɖe aɖaŋuɖola nyanu siwo dina be yewoakpe ɖe mía ŋu to Ŋɔŋlɔawo zazã me ŋu ɖokuibɔbɔtɔe. Eye ne ehiã la, mina míalɔ̃ faa be míaɖe asi le nukpɔsusu vevi siwo míeƒoa asii o gɔ̃ hã ŋu ne eva dze ƒã be vodada le wo ŋu.—Lododowo 1:1-5; 15:22.

‘Ðe Kuku na Mawu’

Ɣeyiɣi siwo tɔtɔa ame hedoa afɔku ame mee miele. Nenye be míawɔ nyametsotso nyuiwo ahaɖe afɔ nyuie la, gbedodoɖa edziedzi be Yehowa nafia mɔ mí le vevie. Paulo ŋlɔ bena: “Migatsi dzimaɖi le naneke ŋuti o, ke boŋ le nusianu me la mitsɔ gbedodoɖa kple kukuɖeɖe na Mawu nanya miaƒe dzimedidiwo, eye mitsɔ akpedada kpe ɖe eŋuti. Eye Mawu ƒe ŋutifafa, si ƒo gɔmesesewo katã ta la, adzɔ miaƒe dziwo kple miaƒe tamesusuwo ŋu adzra wo ɖo le Kristo Yesu me.” (Filipitɔwo 4:6, 7) Ne nunya si míatsɔ akpɔ kuxi alo tetekpɔ siwo tɔtɔa ame gbɔe mele mía si o la, ehiã be ‘míaɖe kuku na Mawu, si na amewo katã faa, eye medoa ŋukpe ame o la.’—Yakobo 1:5-8.

Esi apostolo Petro nyae be ehiã be hati Kristotɔwo nawɔ nu le nunya me ta la, edi be ‘yeanyɔ woƒe tamesusu, si me kɔ la.’ Edi be ‘woaɖo ŋku nya, siwo nyagblɔɖila kɔkɔeawo gblɔ ɖi tsã la, kple Aƒetɔ kple Xɔla, Yesu Kristo, ƒe se, si wòde la dzi.’ (Petro II, 3:1, 2) Ne míewɔ esia hena míaƒe susu wɔ ɖeka kple Yehowa ƒe Nya la, míabu nuwo ŋu nyuie ahaɖe afɔ nyuie.

[Nɔnɔmetata si le axa 21]

Kristotɔ gbãtɔwo na mawumenunya kpɔ ŋusẽ ɖe woƒe nuŋububu dzi, ke menye xexemenunya o

[Afi Si Míexɔ Mɔɖeɖe Tso]

Xexemenunyalawo tso miame yi ɖe ɖusime: Epikuro: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini

[Nɔnɔmetata si le axa 23]

Gbedodoɖa kple Mawu ƒe Nya sɔsrɔ̃ le vevie