Esime Ku Fia be Woku
“Avũ gbagbe nyo wu dzata kuku. Elabena agbagbeawo nyae be, yewogbɔna kuku ge, ke kukuawo menya naneke o, fetu aɖeke megali na wo o, eye woŋlɔ woƒe ŋkɔwo be.”—Nyagblɔla 9:4, 5.
DZIXƆSE siwo me do viviti le ame geɖe si be luʋɔ ganɔa agbe le ku megbe alo etoa gbugbɔgadzi ƒe nɔnɔme vovovowo me. Ame aɖewo kura gɔ̃ hã xɔe se be ame ate ŋu aku agagbɔ agbe. Wobia nu tso nusi amekukudzraɖola aɖe si ŋkɔe nye Thomas Lynch susu tso agbenɔnɔ le ku megbe ŋu nyitsɔ sia. Egblɔ be: “Menye ku mee amesiwo gblɔna be yewokpɔ nanewo esime yewoku la trɔ gbɔ tso o—agbe ƒe dzesi aɖeke koe meganɔ dzedzem le wo ŋu o tae míebu wo be ke ɖe woku ɖo. Elabena ne èyi mègatrɔ gbɔ o la, ke efia be ‘èku.’”—The New York Times Magazine.
Biblia gblɔ nyateƒea ƒe akpe geɖe nye esia. “Avũ gbagbe nyo wu dzata kuku. Elabena agbagbeawo nyae be, yewogbɔna kuku ge, ke kukuawo menya naneke o, fetu aɖeke megali na wo o, eye woŋlɔ woƒe ŋkɔwo be.” (Nyagblɔla 9:4, 5) Ne èzɔ to ameɖibɔ xoxo aɖe me aɖabaƒoƒo ʋee aɖe ko la, àkpɔ nya ma ƒe nyateƒenyenye.
Ðe wòfia be mɔkpɔkpɔ aɖeke kura meli na ame kukuwo oa? Luʋɔ makumaku si nɔa agbe le ku megbe ƒe dzixɔse ƒe kpeɖodzi aɖeke kura mele Biblia me o. (Mose I, 2:7; Xezekiel 18:4, 20) Gake Yesu Kristo ɖe gbeƒã tso tsitretsitsi va agbe me le anyigba si wowɔ wòzu paradiso me dzi ŋu. Eyomedzela Marta si nye Yudatɔ, si nɔviŋutsue nye Lazaro si ku teti koe nye ma, xɔ tsitretsitsia dzi se, elabena egblɔ le Lazaro ŋu be: “Menyae bena, atsi tre le tsitretsitsi la me le nuwuwuŋkeke la dzi.” (Yohanes 11:24) Yesu ɖo eŋu be: “Nyee nye tsitretsitsi la kple agbe la; amesi xɔa dzinye sena la, ne eku hã la, anɔ agbe; eye amesiame, si le agbe, eye wòxɔa dzinye sena la, maku akpɔ o. Èle esia xɔm le sesema?” (Yohanes 11:25, 26) Egblɔ do ŋgɔ be: “Esia megawɔ mo yaa na mi o; elabena gaƒoƒo gbɔna, le esi me amesiwo katã le yɔdowo me la, woase eƒe gbe; eye amesiwo wɔ nu nyuiwo la, woado go hena agbe ƒe tsitretsitsi, ke amesiwo wɔ nu vlowo la, hena ʋɔnudɔdrɔ̃ ƒe tsitretsitsi.” Gake de dzesii be Yesu meƒo nu tso luʋɔ makumaku aɖeke ŋu o!—Yohanes 5:28, 29; Luka 23:43.
[Nya si ɖe dzesi si le axa 31]
“Ne èyi mègatrɔ gbɔ o la, ke efia be ‘èku.’” Thomas Lynch, amekukudzraɖola