Se Vivi Naagbe
VIFOFO aɖe si ŋu kansa nɔ wòɖo kudo nu la nɔ aba dzi le aƒeme. Viaŋutsu nɔ dɔwɔƒea nɔ fofoa ƒe atikpadɔwɔnuwo ŋu tutum nɔ wo dam ɖe wo nɔƒe. Esi wònɔ dɔwɔnuawo ŋu tutum la, enɔ tame bum le nu dzeani siwo fofoa tsɔ wo wɔe kpɔ ŋu. Togbɔ be dɔwɔƒea nɔ aƒea xa hã la, enya be ye fofo magage ɖe eme akpɔ alé dɔwɔnu siawo siwo zazã me wòbi ɖo la gbeɖe o. Ewɔɣi va yi.
Ŋɔŋlɔ si le Nyagblɔla 9:10 va tame na ŋutsuvia be: “Nusianu, si wò asi ate ŋu awɔ la, wɔe kple wò ŋusẽ; elabena nuwɔwɔ alo tamebubu, sidzedze alo nunya mele tsiẽƒe, afisi yi ge nala o.” Enya ŋɔŋlɔ ma nyuie. Ezãnɛ zi geɖe ne wòle Biblia ƒe nyateƒea fiam amewo be wɔna aɖeke meganɔa anyi ne woku o. Nusi fiam Salomo le la ʋã dzi nɛ azɔ—be ele be míaɖu agbe bliboe eye míase vivi na míaƒe agbemeŋkekewo esi ŋutetea li elabena ɣeyiɣi aɖe aɖo si me míagate ŋu awɔe o.
Se Vivi le Agbe Me
Fia Salomo nunyala la de dzi ƒo na eƒe nuxlẽlawo le Nyagblɔla ƒe agbalẽ bliboa katã me be woase vivi le agbe me. Le kpɔɖeŋu me, egblɔ le ta 3 lia me be: “Medze sii bena, nu nyui aɖeke meli na [amewo] wu be, woakpɔ dzidzɔ, eye woaɖu agbe le woƒe agbenɔɣi o. Ke be ame aɖe naɖu nu ano nu, eye wòanyo nɛ le eƒe agbagbadzedzewo katã me la, Mawu ƒe nunanae.”—Nyagblɔla 3:12, 13.
Mawu ƒe gbɔgbɔ ʋã Salomo wògbugbɔ nya sia gblɔ be: “Kpɔ ɖa, nusi nyea mekpɔ be, enyo, eye wòdze ani la, enye be, ame naɖu nu ano nu, eye wòaɖu agbe ɖe eƒe agbagba, siwo katã wòdze le ɣea te la ŋuti le eƒe agbe me ŋkeke, siwo katã Mawu tsɔ nɛ la me; elabena esia nye eƒe gome.”—Nyagblɔla 5:17.
Nenema ke wòde dzi ƒo na sɔhɛwo be: “Ðekakpui, kpɔ dzidzɔ le wò ɖekakpuime, na wò dzi naɖu agbe le wò ɖekakpui ŋkekewo me, eye nazɔ ɖe wò dzi ƒe toƒewo kple nusi wò ŋku kpɔ la nu.” (Nyagblɔla 11:9a) Aleke gbegbe wònyo be woazã ɖekakpuime ŋusẽ kple lãmesẽ bliboe enye si!—Lododowo 20:29.
“Ðo Ŋku Wɔwòla Dzi”
Le nyateƒe me la, Salomo mefia be enyo be míawɔ nusianu si dzro míaƒe dzi alo míaƒe ŋku kpɔ o. (Tsɔe sɔ kple Yohanes I, 2:16.) Míekpɔ nya sia me kɔkɔ le nusi wògaŋlɔ emegbe me be: “Ke nyae be, Mawu le kplɔwò ge ava ʋɔnui le nusiawo [siwo nàwɔ be yeaɖi kɔ na wò dzodzrowo] katã ta.” (Nyagblɔla 11:9b) Ƒe ka kee míexɔ o, ele be míaɖo ŋku edzi be Mawu léa ŋku ɖe nusi míetsɔ míaƒe agbe le wɔwɔme ŋu eye adrɔ̃ ʋɔnu mí ɖe eta.
Aleke gbegbe wòanye bometsitsie nye si be míasusu be míate ŋu anɔ agbe adi mía ɖokui tɔ eye míatutu mawusosroɖa da ɖe ŋgɔ vaseɖe esime míetsi hafi! Míaƒe agbe nu ate ŋu atso le ɣeyiɣi ɖesiaɖe me. Ne enu metso o hã la, Mawu manya subɔ le tsitsime o. Salomo nya nusia, eyatae wòŋlɔe be: “Ðo ŋku wɔwòla dzi le wò ɖekakpuiŋkekewo me, hafi ne ŋkeke vɔ̃wo nava, eye ƒe, siwo ŋu nèle gbɔgblɔ ge le be, womedze ye ŋu o la, nagogo.”—Nyagblɔla 12:1.
Nu gblẽna le ame ŋu ne wole tsitsim. Salomo zã kpɔɖeŋunyagbɔgblɔwo tsɔ ƒo nu tso nusiwo dzɔna ne wole tsitsim ŋu. Asi kple abɔwo ƒona kpakpakpa, afɔwo me gbɔdzɔna, eye aɖu megasɔa gbɔ o. Taɖa ƒoa wɔ eye wòbebena. Womegadɔa alɔ̃ yia eme o ale gbegbe be xe ƒe xɔxlɔ̃ teti hã na wonyɔna. Sidzenuwo—nukpɔkpɔ, nusese, nulélekpɔ, nuʋeʋẽse, kple nuɖɔɖɔkpɔ—wo katã gbɔdzɔna. Ŋutilã la ƒe gbɔdzɔgbɔdzɔ na wovɔ̃na na anyidzedze kple na “ŋɔdzi” bubu siwo le ablɔwo dzi. Amea va kuna mlɔeba.—Nyagblɔla 12:2-7.
Tsitsime nyea ŋkeke vɔ̃wo vevietɔ na amesiwo do kpo ‘ŋkuɖoɖo wo Wɔla Gã la dzi’ le woƒe sɔhɛme. Tsitsimeƒewo ‘medzea’ ame ma ŋu o le esi wòzã eƒe agbe yakayaka ta. Mawumavɔ̃mavɔ̃ ƒe agbenɔnɔ hã ate ŋu ana tsitsime kuxiwo kple vevesesewo nasɔ gbɔ. (Lododowo 5:3-11) Ewɔ nublanui be ne ame mawo le etsɔme ŋu bum la, etsɔme nyui aɖeke mevaa tame na wo wu yɔdo o.
Dzidzɔkpɔkpɔ le Tsitsime
Nya sia mefia be amegã kple nyagã ɖeɖiwo mate ŋu akpɔ dzidzɔ o. Le Biblia me la, woyɔ ‘agbenɔnɔ didi kple ƒe nyuiwo’ ɖe Mawu ƒe yayrawo dome. (Lododowo 3:1, 2) Yehowa gblɔ na exɔlɔ̃ Abraham be: “Ke wò la . . . àku amegã belibeli hafi àku.” (Mose I, 15:15) Togbɔ be nuwo medea ame dzi le tsitsime o hã la, Abraham nɔ ŋutifafa kple dziɖeɖi me le eƒe tsitsime, eye eƒe dzi dzea eme ne wòbu agbe si wòtsɔ ɖo anyii na Yehowa ŋu. Xɔse hã nɔ esi wòtsɔ nɔ mɔ kpɔm na “du, si gɔmeɖoɖoanyi li na,” si nye Mawu ƒe Fiaɖuƒea. (Hebritɔwo 11:10) Eyata ‘etsi, eƒe dzi dze eme’ hafi wòku.—Mose I, 25:8.
Eyata Salomo xlɔ̃ nu be: “Ne amegbetɔ nɔ agbe ƒe geɖe la, nekpɔ dzidzɔ le wo katã me.” (Nyagblɔla 11:8) Míeɖanye sɔhɛwo alo ame tsitsiwo o, dzidzɔkpɔkpɔ vavãtɔ nɔ te ɖe mía kple Mawu dome ƒomedodo dzi.
Ðekakpui si nɔ dɔwɔƒea bu nya siawo ŋu esime wòtsɔ fofoa ƒe dɔwɔnu mamlɛtɔ nɔ dadam ɖi. Ebu tame le amesiwo katã wònya be wote kpɔ be yewoase vivi na yewoƒe agbe gake womekpɔ dzidzɔ o le esi ƒomedodo aɖeke menɔ woawo kple wo Wɔla dome o ta ŋu. Esi Salomo de dzi ƒo be ame nakpɔ dzidzɔ le eƒe agbe me vɔ la, ekpɔe be esɔ ŋutɔ be yeaƒo nyaawo katã ta kple nya siawo be: “Mina míase nyaawo katã ƒe taƒonya be: Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ!”—Nyagblɔla 12:13.