‘Amegbetɔ ƒe Agbanɔamedzi Blibo La’
“Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ!”—NYAGBLƆLA 12:13.
1, 2. Nukatae wòsɔ be míabu agba si le mía dzi le Mawu gbɔ la ŋu?
‘NUKA dim Yehowa le tso asiwò?’ Blema nyagblɔɖila aɖe bia nya ma kpɔ. Eyome eyɔ nusiwo Yehowa le didim—woawɔ nusi le dzɔdzɔe, woalɔ̃ dɔmenyowɔwɔ, woabɔbɔ ame ɖokui ɖe anyi ahazɔ kple Mawu.—Mixa 6:8.
2 Le ɣeyiɣi sia si me amewo dina be yewoawɔ yewo ŋutɔ yewoƒe lɔlɔ̃nu eye yewoanɔ yewo ɖokui si la, medzɔa dzi na ame geɖe be woase be Mawu le nane dim tso yewo si o. Womedina be yewoanɔ ame te alo naneke ƒe agba nanɔ yewo dzi o. Ke Salomo ƒe nyataƒoƒo si le Nyagblɔla ƒe agbalẽa me ya ɖe? “Mina míase nyawo katã ƒe taƒonya be: Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ!”—Nyagblɔla 12:13.
3. Nukatae wòle be míade ŋugble le Nyagblɔla ƒe agbalẽa ŋu vevie?
3 Nɔnɔme ka mee míele o alo nukae nye míaƒe susu le agbe ŋu o, ate ŋu aɖe vi geɖe na mí ne míebu nya siwo na wòƒo nya ta alea la ŋu. Fia Salomo si nye agbalẽ sia si tso gbɔgbɔ me ŋlɔla la lé ŋku ɖe nusiwo tututu míewɔna le míaƒe gbesiagbegbenɔnɔ me la dometɔ aɖewo ŋu. Ame aɖewo atsɔ dzitsitsi agblɔ be dziɖeleameƒonyawo sɔŋ koe bɔ ɖe nusiwo wògblɔ me. Gake Mawu ƒe gbɔgbɔ mee wòtso eye ate ŋu akpe ɖe mía ŋu be míada míaƒe dɔwɔwɔwo kple nusiwo nye míaƒe nu vevitɔwo kpɔ, eye esia wɔwɔ adzi míaƒe dzidzɔkpɔkpɔ ɖe edzi.
Agbemenuhiahiã Veviwo Kpɔkpɔ
4. Nukawo ŋue Salomo lé ŋku ɖo hedzro wo me le Nyagblɔla me?
4 Salomo lé ŋku ɖe ‘amegbetɔviwo ƒe dɔwɔnawo’ ŋu tsitotsito. “Meɖo nye ta me anyi, be matsɔ nunya adzro nusiwo katã dzɔna le dziƒoa te la me akpɔ.” ‘Dɔwɔna’ si Salomo yɔ la mefia dɔ si wowɔna ŋutɔŋutɔ alo dɔwɔɖui kokoko o, ke boŋ efia nu vovovo siwo xɔa ŋutsuwo kple nyɔnuwo ƒe susu kple ɣeyiɣi le woƒe agbenɔɣiwo katã. (Nyagblɔla 1:13) Mina míade ŋugble le dɔawo dometɔ vevi aɖewo ŋu kpɔ, eye míatsɔe asɔ kpɔ kple mía ŋutɔwo míaƒe dɔwɔwɔwo kple nusiwo míebuna nu vevitɔwoe.
5. Nukae nye nusiwo ŋu koŋ amewo tsia dzi ɖo la dometɔ ɖeka?
5 Ðikekemanɔmee la, ga ŋu koŋ ye amegbetɔwo ƒe dzimaɖitsitsi kple dɔwɔwɔ geɖe kuna ɖo. Ame aɖeke mate ŋu agblɔe wòasɔ be Salomo bu ga abe alesi kesinɔtɔ aɖewo bunɛ esi womegatsɔa ɖeke le ga ƒe vevienyenye me ene o. Elɔ̃ ɖe edzi enumake be ga agbɔsɔsɔme aɖe hiã; ga si asu na ame ƒe zazã ƒe amesinɔnɔ nyo wu ahedada. (Nyagblɔla 7:11, 12) Gake ɖewohĩ èkpɔe be ga, kple nunɔamesi siwo wòƒlena la, ate ŋu azu ame ƒe taɖodzinu vevitɔ le agbe me—na ahetɔwo kpakple kesinɔtɔwo siaa.
6. Nuka míate ŋu asrɔ̃ tso ga ŋu le Yesu ƒe lododowo dometɔ ɖeka me kpakple tso Salomo ŋutɔ ƒe nuteƒekpɔkpɔ me?
6 Ðo ŋku lo si Yesu do le kesinɔtɔ si ŋu nu medzena gbeɖe o, eye wònɔa dɔ dzi na ho kpɔkpɔ ɖe ho dzi la dzi. Mawu bui bometsilae. Nukatae? Elabena míaƒe ‘agbe metsoa míaƒe nunɔamesiwo me o.’ (Luka 12:15-21) Salomo ƒe nuteƒekpɔkpɔ—si ɖewohĩ keke ta wu mía tɔ—ɖo kpe Yesu ƒe nya siawo dzi. Xlẽ nusiwo wògblɔ le Nyagblɔla 2:4-9 kpɔ. Salomo ku kutri ɣeaɖeɣi ƒo kesinɔnuwo nu ƒu. Etu xɔ dzeaniwo eye wòtɔ abɔ nyuiwo. Alɔme nɔ esi wòadi zɔhɛ dzetugbewo eye edi wo hã. Ðe kesinɔnuwo kpɔkpɔ kple nusiwo wòna wòte ŋu wɔ la na wòkpɔ dzidzeme deto, eye wòse le eɖokui me be yeƒe asi su nu gobi aɖe dzi, ale be gɔmesese va le yeƒe agbe ŋua? Eɖo eŋu anukwaretɔe be: “Esi metrɔ kɔ ɖe dɔ, siwo katã nye asi wɔ, kple agbagba, siwo medze ɖe wo ŋu ŋuti la, kpɔ ɖa, tofloko kple dagbadagba ɖe ya me wonye, eye viɖe aɖeke mele ɣe la te o.”—Nyagblɔla 2:11; 4:8.
7. (a) Nuka dzie nuteƒekpɔkpɔ ɖo kpee le asixɔxɔ si le ga ŋu la ŋuti? (b) Nukae wò ŋutɔ nèkpɔ si ɖo kpe Salomo ƒe nyataƒoƒoa dzi?
7 Nyateƒee wòto, eye ame geɖe hã kpɔ eƒe nyawo ƒe nyateƒenyenye le woƒe agbenɔnɔ me. Ele be míalɔ̃ ɖe edzi be gakpɔkpɔ ɖeɖe dzaa mekpɔa kuxiwo katã gbɔ o. Ate ŋu akpɔ ɖewo gbɔ, le kpɔɖeŋu me, ate ŋu ana nuɖuɖu kple awu nanya aƒle na ame. Gake awu dodo ɖeka koe ame ate ŋu ado zi ɖeka eye nuɖuɖu kple nunono agbɔsɔsɔme aɖe koe asu nɛ zi ɖeka. Eye èxlẽ nu le kesinɔtɔ siwo ƒe agbe dome gblẽ le srɔ̃gbegbe, ahatsunono alo atikevɔ̃ɖizazã, kpakple ƒometɔwo dome dzre makemakewo ta la ŋu kpɔ. Kesinɔtɔ gã aɖe si ŋkɔe nye J. P. Getty gblɔ be: “Ga menaa wokpɔa dzidzɔ kokoko o. Ðewohĩ ɖe wòana boŋ be màkpɔ dzidzɔ o.” Eyata susu nyui tae Salomo bu klosalolɔlɔ̃ toflokoe ɖo. Tsɔ nyateƒenya ma sɔ kple nya si Salomo gblɔ be: “[Subɔvi, NW] ɖaɖu nu ʋee o, eɖaɖu nu geɖe o, alɔ̃ vivina nɛ; ke kesinɔtɔ ƒe nu gbogboawo menana wòdɔa alɔ̃ o.”—Nyagblɔla 5:9-11.
8. Susu ka tae mele be míade asixɔxɔ si medze o ga ŋu o?
8 Hekpe ɖe eŋu la, ga kple nunɔamesiwo menaa ame ƒe dzi dzea eme ɖe etsɔme ŋu o. Ne ga kple nunɔamesiwo sɔ gbɔ ɖe asiwò la, anɔ eme be àtsi dzi ɖe alesi nàkpɔ wo tae ŋu wu, gake hã mànya alesi wò etsɔme anɔ o. Ðe wòate ŋu adzɔ be nàbu wo katã, hekpe ɖe wò agbe ŋua? (Nyagblɔla 5:12-16; 9:11, 12) Esi nya la le alea ta la, mele be wòasesẽ na mí be míakpɔ nusita wòle be gɔmesese si de ŋgɔ wu, si nɔa anyi didina, la nanɔ míaƒe agbe ŋu tsɔ wu gakpɔkpɔ kple nunɔamesiwo ƒe amesinɔnɔ o.
Ƒome, Ŋkɔxɔxɔ, Kple Ŋusẽ
9. Nukatae wòsɔ be Salomo lé ŋku ɖe ƒomegbenɔnɔ hã ŋu?
9 Nusiwo ŋu Salomo lé ŋku ɖo ƒe ɖee nye dzitsitsi ɖe ame ƒe ƒome ŋu. Biblia ƒo nu geɖe le ƒomegbenɔnɔ ŋu, si me dzidzɔ si le vidzidzi kple wo nyinyi me hã le. (Mose I, 2:22-24; Psalmo 127:3-5; Lododowo 5:15, 18-20; 6:20; Marko 10:6-9; Efesotɔwo 5:22-33) Gake eyae nye nu vevitɔ kekeake le agbe mea? Edze abe ɖe ame geɖe bunɛ nenema ene, ne èkpɔ asixɔxɔ gã si wodea srɔ̃ɖeɖe, ɖeviwo, kple ƒomekadodowo ŋu le dukɔ aɖewo me. Gake Nyagblɔla 6:3 fia be ne èdzi vi alafa kura hã la, mefia be wò dzi adze eme le agbe me kokoko o. Bu alesi dzila geɖe tsɔ nu geɖe sa vɔe ɖe wo viwo ta bene woana woadze agbe gɔme nyuie eye agbea nanɔ bɔbɔe na wo la ŋu kpɔ. Togbɔ be enyo kpem hã la, ɖikekemanɔmee la, mía Wɔla la meɖoe be vidzidzi ko nanye nu vevitɔ le míaƒe anyinɔnɔ me abe alesi lãwo dzinae le dzɔdzɔmenunya si wode wo me nu be wo ƒomevi magatsrɔ̃ o ene o.
10. Nukatae dzitsitsi ɖe ƒome ŋu akpa ate ŋu azu tofloko?
10 Salomo tsɔ nugɔmesese ƒo nu tso ƒomegbenɔnɔ me nudzɔdzɔ ŋutɔŋutɔ aɖewo ŋu. Le kpɔɖeŋu me, ame aɖe ƒe ŋku ate ŋu abiã ɖe nuwo didi da ɖi na viawo kple tɔgbuiyɔviawo ŋu. Gake ɖe woava nye nunyalawoa? Alo ɖe woava zã nusiwo ŋu wòtso hloloe ɖo ƒo ƒui la bometsitsitɔea? Ne evelia siae dzɔ la, “tofloko kple vɔ̃ gã” kae nye si wòanye!—Nyagblɔla 2:18-21; Fiawo I, 12:8; Kronika II, 12:1-4, 9.
11, 12. (a) Agbemenu kawo ŋue ame aɖewo biã ŋku ɖo? (b) Nukatae míate ŋu agblɔe be ŋkɔ gã didi nye “dagbadagba ɖe ya me”?
11 To vovo na ema kura la, esi ame geɖe ɖonɛ kplikpaa be yewoaxɔ ŋkɔ alo akpɔ ŋusẽ ɖe ame bubuwo dzi ta la, womegatsɔa ɖeke le eme na woƒe ƒomegbenɔnɔ o. Ðewohĩ ŋutsuwo koŋ domee vodada sia bɔna ɖo wu. Ède dzesi nɔnɔme sia le wò sukuhatiwo, dɔwɔhatiwo, alo aƒelikawo ŋua? Ame geɖe ʋlina be woado yewoƒe ta ɖe dzi, alo woabu yewo ame aɖee, alo be yewoakpɔ ŋusẽ ɖe ame bubuwo dzi. Gake gɔmesese ŋutɔŋutɔ kae le agbe sia ŋu?
12 Bu alesi ame aɖewo dzea agbagba be yewoaxɔ ŋkɔ, le nu suewo alo nu gãwo me, la ŋu kpɔ. Míekpɔnɛ le sukuwo, le míaƒe aƒelikawo dome, kple le amewo ƒe ƒuƒoƒo vovovowo me. Eya hãe nye nusi ʋãa amesiwo dina be woanya yewo le nutata, modzakaɖeɖe, kple dunyahehe me. Gake ɖe menye agbagba dzodzro dzedze koe eƒe akpa gãtɔ nye oa? Esɔ be Salomo yɔe be “tofloko kple dagbadagba ɖe ya me.” (Nyagblɔla 4:4) Ne sɔhɛ aɖe xɔ ŋkɔ le hadomeƒuƒoƒo aɖe me, le kamedeha aɖe me, alo le hadziha aɖe me—alo ne ŋutsu alo nyɔnu aɖe xɔ ŋkɔ le dɔwɔha aɖe me alo le nuto si me wòle me—hã, ame nenie sea eŋunya? Ðe amesiwo le xexeame ƒe akpa bubu (alo le dukɔ ma ke me gɔ̃ hã) nya nu tso eŋua? Alo ɖe woyia woƒe dɔwo dzi ŋkɔ vi si ŋutsu alo nyɔnu ma xɔ ŋu mabumabuia? Eye míate ŋu agblɔ nya ma ke le ŋusẽ ɖesiaɖe si ame akpɔ le dɔwɔƒe, le du me, alo le ƒuƒoƒo aɖe me hã ŋu.
13. (a) Aleke Nyagblɔla 9:4, 5 kpe ɖe mía ŋui be míaƒe nukpɔsusu nasɔ le ŋkɔxɔxɔ alo ŋusẽ didi ŋu? (b) Nyateƒenya kawo dzie wòle be míalɔ̃ ɖo ne agbea katã koe nye esia? (Kpɔ etenuŋɔŋlɔa.)
13 Afikae nye ŋkɔ alo ŋusẽ ma ƒe seƒe? Abe alesi dzidzime nu va yina bubu vanae ene la, ŋkɔxɔlawo kple ŋusẽtɔwo hã nu va yina eye woŋlɔa wo be. Aleae wòle le xɔtulawo, hakpalawo kple aɖaŋudɔwɔla bubuwo, hadomeɖɔɖɔɖowɔlawo, kple ame bubuwo gome, abe alesi wòle le dunyahela kple asrafomegã akpa gãtɔ hã gome ene. Le dɔ mawo wɔlawo dome la, wo dometɔ nenie nènya siwo nɔ anyi le ƒe 1700 kple 1800 dome? Alesi Salomo bu nuwo ŋui la sɔ, esi wògblɔ be: “Avũ gbagbe nyo wu dzata kuku. Elabena agbagbeawo nyae be, yewogbɔna kuku ge, ke kukuawo menya naneke o, . . . eye woŋlɔ woƒe ŋkɔ be.” (Nyagblɔla 9:4, 5) Eye ne agbea katã koe nye esia la, ke ʋiʋli be woaxɔ ŋkɔ alo akpɔ ŋusẽ nye nu dzodzro nyateƒe.a
Nusi dzi Míaƒe Susu Anɔ Kple Míaƒe Agbanɔamedzi
14. Nukatae wòle be Nyagblɔla ƒe agbalẽa nakpe ɖe mía dometɔ ɖesiaɖe ŋu?
14 Salomo meƒo nu tso dɔ, taɖodzinu, kple dzidzɔkpɔkpɔ siwo dzi amewo tua woƒe agbenɔnɔ ɖo la dometɔ geɖe ŋu o. Gake nusi wòŋlɔ la su. Mele be nusi me míedzro le eƒe agbalẽa me nana míalé blanui alo wòaɖe dzi le mía ƒo o, elabena Biblia-gbalẽ si Yehowa Mawu ɖo koŋ be wòaŋlɔ ɖi be wòaɖe vi na mí mee wònye míedzro. Ate ŋu akpe ɖe mía dometɔ ɖesiaɖe ŋu be míatrɔ asi le míaƒe nukpɔsusu le agbe kple nusi dzi míetui ɖo la ŋu. (Nyagblɔla 7:2; Timoteo II, 3:16, 17) Esia le alea vevietɔ le alesi Yehowa kpe ɖe Salomo ŋu wòƒo nyaawo tae ŋuti.
15, 16. (a) Nukae nye Salomo ƒe susu le vivisese na agbe ŋu? (b) Nukae Salomo gblɔ wòsɔ be ehiã hafi míase vivi na agbe?
15 Nya vevi aɖe si dzi Salomo te gbe ɖo zi geɖee nye be ele be Mawu vavãtɔ subɔlawo nakpɔ dzidzɔ le dɔ siwo wowɔna le Eŋkume la me. “Medze sii bena, nu nyui aɖeke meli na wo wu be, woakpɔ dzidzɔ, eye woaɖu agbe le woƒe agbenɔɣi o. Ke be ame aɖe naɖu nu ano nu, eye wòanyo nɛ le eƒe agbagbadzedzewo katã me la, Mawu ƒe nunanae.” (Nyagblɔla 2:24; 3:12, 13; 5:17; 8:15) De dzesii be menye aglotutu ƒe dzi dem ƒo Salomo nɔ o; eye mede ‘Mina míaɖu nu, ano nu, akpɔ dzidzɔ, elabena etsɔ míele kuku ge’ ƒe nɔnɔme hã dzi o. (Korintotɔwo I, 15:14, 32-34) Nusi gblɔm wòle enye be ele be míase vivi na dzidzɔkpɔkpɔ siwo sɔ, abe nuɖuɖu kple nunono ene, esime ‘míele nu nyui wɔm le míaƒe agbe me.’ Ðikekemanɔmee la, ema ana míatu míaƒe agbe ɖe nusi nye Wɔla, amesi tsoa nya me le nusi nyo ŋutɔŋutɔ ŋu, la ƒe lɔlɔ̃nu dzi.—Psalmo 25:8; Nyagblɔla 9:1; Marko 10:17, 18; Romatɔwo 12:2.
16 Salomo ŋlɔ be: “Yi naɖu wò abolo kple dzidzɔ, eye nano wò wein le dzidzeme me, elabena gbaɖegbe ke Mawu tso na wò nuwɔwɔ sia.” (Nyagblɔla 9:7-9) Nyateƒee, ŋutsu alo nyɔnu si ƒe agbe ɖɔ ʋu eye wòɖo ta la doa vevie nu le dɔ siwo dzɔa dzi na Yehowa la wɔwɔ me. Ema wɔwɔ bia tso mía si be míanɔ eyama ŋu bum ɣesiaɣi. Aleke gbegbe nukpɔsusu sia to vovo na ame akpa gãtɔ siwo tua woƒe agbenɔnɔ ɖe amegbetɔ tɔ dzi la ƒe nuŋububue nye si!
17, 18. (a) Aleke ame geɖe wɔna ɖe agbemenudzɔdzɔwo ŋu? (b) Emetsonu kae wòle be nenɔ susu me na mí ɣesiaɣi?
17 Togbɔ be subɔsubɔha aɖewo fiaa nu be agbe aɖe gale agbe sia godo hã la, ame geɖe xɔe se be le nyateƒe me la, agbe sia dzi koe yewoate ŋu aka ɖo. Ðewohĩ àkpɔ woawɔ nu abe alesi Salomo gblɔe ene be: “Esi afia menya tsona le nu vɔ̃ɖi wɔwɔ ŋu kaba o ŋuti la, eyata dzi ɖoa amegbetɔviwo ƒo ŋutɔ ɖe nu vɔ̃ɖi wɔwɔ ŋu.” (Nyagblɔla 8:11) Amesiwo menyrɔa wo ɖokui ɖe nu vɔ̃ɖiwo wɔwɔ me vĩ o hã ɖenɛ fiana be nusiwo li fifia ŋu koe yewotsia dzi ɖo. Eyae nye susu siwo ta wotsia dzi ɖe ga, nunɔamesiwo, ŋkɔxɔxɔ, ŋusẽkpɔkpɔ ɖe ame dzi, ƒome, alo nusiawo tɔgbe ŋu akpa ɖo la dometɔ ɖeka. Gake Salomo metɔ nya la ɖe afima o. Egblɔ kpee be: “Ne nuvɔ̃wɔla wɔa vɔ̃ zi alafa, gake nɔa agbe didie hã la, nyea menyae be, eme anyo na mawuvɔ̃la, siwo sia eƒe ŋku me. Ke eme manyo na ame vɔ̃ɖiwo o, eye abe vɔvɔli ene womanɔ agbe didie o, elabena womevɔ̃a Mawu o.” (Nyagblɔla 8:12, 13) Eme kɔ be Salomo ka ɖe edzi be eme anyo na mí ‘ne míevɔ̃a Mawu vavã la.’ Aleke wòanyoe? Míate ŋu akpɔ ŋuɖoɖoa le nu bubu si to vovo si wòtsɔ sɔ kplii me. Yehowa ate ŋu ‘adzi míaƒe ŋkekewo ɖe edzi.’
18 Ehiã vevietɔ na amesiwo metsi le ƒe me o koŋ be woade ŋugble le nyateƒenya sia si ŋu kakaɖedzi blibo le be eme anyo na yewo ne yewovɔ̃ Mawu la ŋu. Abe alesi wò ŋutɔ nàkpɔe ene la, amesi si afɔ ɖeablɛ le le duƒuƒu me ate ŋu akli nu adze anyi woato eŋu. Woate ŋu aɖu aʋakɔ sesẽ aɖe dzi. Asitsala tagbɔɖaɖɛtɔ ate ŋu azu hiãtɔ. Eye nu bubu siwo ŋu kakaɖedzi mele ana màte ŋu aka ɖe agbea dzi kura o. Gake àte ŋu aka ɖe nya sia ya dzi bliboe: Nunyanu nyuitɔ si ŋu kakaɖedzi blibo le ye nye be nàse vivi na agbenɔnɔ esime nànɔ nyui wɔm le Mawu ƒe agbenyuinɔnɔsewo nu wòasɔ kple eƒe lɔlɔ̃nu. (Nyagblɔla 9:11) Eƒe akpa aɖee nye nusi nye Mawu ƒe lɔlɔ̃nu sɔsrɔ̃ tso Biblia me, wò agbe tsɔtsɔ ɖe adzɔgbe nɛ, kple Kristotɔ si xɔ nyɔnyrɔ zuzu.—Mateo 28:19, 20.
19. Aleke sɔhɛwo ate ŋu azã woƒe agbee, gake nukae nye nunyanu si woawɔ?
19 Wɔla la mazi sɔhɛwo alo ame bubuwo dzi be woazɔ ɖe yeƒe mɔfiafia dzi o. Woate ŋu aƒo wo ɖokui ɖe sukudede me, ɖewohĩ woazu amegbetɔ ƒe nunyagbalẽ siwo xexlẽme meli na o la srɔ̃lawo. Mlɔeba la, ɖeɖi ko wòate woƒe ŋutilã ŋu. Alo woate ŋu azɔ ɖe woƒe dzi madeblibo la ƒe mɔwo dzi alo akplɔ nusiwo dzɔa dzi na woƒe ŋku la ɖo. Ahe nuxaxa vɛ na wo godoo, eye ne ame aɖe nɔ eƒe agbe nenema la, tofloko koe wòazu mlɔeba. (Nyagblɔla 11:9–12:12; Yohanes I, 2:15-17) Eyata Salomo le koko ƒom na sɔhɛwo—enye kokoƒoƒo si ŋu wòle be míabu nyuie, eɖanye ƒe ka ke míexɔ o be: “Ðo ŋku wɔwòla dzi le wò ɖekakpuiŋkekewo me, hafi ne ŋkeke vɔ̃wo nava, eye ƒe, siwo ŋu nèle gbɔgblɔ ge le be, womedze ye ŋu o la nagogo.”—Nyagblɔla 12:1.
20. Nukae nye nukpɔsusu si da sɔ si le Nyagblɔla me nyawo ŋu?
20 Ke nya ta kae míaƒo? Enyo, nya ta si Salomo ƒo ɖe? Ekpɔ alo lé ŋku ɖe “nusiwo katã wowɔna le ɣea te la ŋu, eye kpɔ ɖa, wo katã tofloko kple dagbadagba ɖe ya me wonye.” (Nyagblɔla 1:14) Míekpɔ naneke le Nyagblɔla ƒe agbalẽa me si nye ɖeklemiɖela alo dzidzɔmakpɔla ƒe nyagbɔgblɔ o. Mawu ƒe Nya si tso gbɔgbɔ me la ƒe akpa aɖee wònye eye edze be míabu eŋu.
21, 22. (a) Agbenɔnɔ ƒe akpa kawo ŋue Salomo bu? (b) Nyataƒonya si me nunya le kae wògblɔ? (d) Aleke Nyagblɔla me nyawo me dzodzro wɔ dɔ ɖe dziwòe?
21 Salomo lé ŋku ɖe amegbetɔ ƒe hloloetsotso, kuxi siwo dzea ŋgɔe, kple nudidiwo ŋu. Ede ŋugble le alesi nuwo yia edzii le agbe me, dziɖeleameƒonu kple nu gbɔlo siwo ame geɖe hena vaa wo ɖokui dzii ŋu. Ebu amegbetɔ ƒe blibomademade kple ku si wòhena vɛ la ƒe nu ŋutɔŋutɔ nyenye ŋu. Eye ebu nusi Mawu na míenya le nɔnɔme si me ame kukuwo le kple agbenɔnɔ ake le etsɔme ƒe mɔkpɔkpɔ ŋuti la hã ŋu. Amesi ƒe nunya Mawu dzi ɖe edzi, ẽ, amesiwo nya nu wu le amesiwo katã nɔ anyi kpɔ dome la dometɔ ɖekae bu nusiawo katã ŋu. Eye wode nya ta si wòƒo la Ŋɔŋlɔ Kɔkɔeawo me be wòaɖe vi na amesiwo katã di be gɔmesese ŋutɔŋutɔ nanɔ yewoƒe agbe ŋu. Ðe mele be míalɔ̃ ɖe edzi oa?
22 “Mina míase nyawo katã ƒe taƒonya be: Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ! Elabena Mawu le nuwɔwɔwo katã, siwo ɣla la, he ge ava ʋɔnui, eɖanye nyui alo vɔ̃ o.”—Nyagblɔla 12:13, 14.
[Etenuŋɔŋlɔ]
a Gbetakpɔxɔ gblɔ nya sia si ɖe nugɔmesese geɖe fia kpɔ be: “Mele be míagblẽ agbe sia ɖe nu dzodzrowo ŋu o . . . Ne agbea katã koe nye esia la, ke naneke mele vevie o. Agbe sia ya ɖeko wòle abe bɔl si woda ɖe yame eye kasia ko ege dze anyi hã xoxo ene. Enye vɔvɔli si va yina kaba, seƒoƒo si yrɔna, gbe si ne wolãe ko eyrɔ xoxo. . . . Ne woda míaƒe agbenɔƒe le mavɔmavɔnyenye ƒe nudanu dzi la, ʋuʋudedi sue aɖe ŋutɔ koe wònye. Ne wodzidzee le ɣeyiɣi ƒe didime gome la, mede tsigege toŋ ɖeka hã ale o. Kakaɖedzitɔe la, [Salomo] tɔ dzɔ be esi wòto nu geɖe siwo nye amegbetɔ ƒe dzitsitsiwo kple dɔwɔnawo me vɔ wògblɔ be tofloko wonye. Mía nu va yina kaba ale gbegbe be ɖeko wòwɔna abe ɖe míedzɔ kpɔ ŋutɔ o ene, míenye ame biliɔn siwo vana gadzona dometɔ ɖeka, eye amesiwo nya be míenɔ anyi kpɔ la dzi nɔa ɖeɖem kpɔtɔ ɖaa. Menye dziɖeleameƒo alo blanuidoamenya alo dzikatsoƒoedonamenyae nukpɔsusu sia nye o. Nyateƒee, nudzɔdzɔ si nu womate ŋu asi le o, kple susu si sɔe wònye, ne agbea katã koe nye esia.”—August 1, 1957, axa 472.
Èɖo Ŋku Wo Dzia?
◻ Ðoƒe kae nunya anɔ eme be nàda nunɔamesiwo ɖo le wò agbenɔnɔ me?
◻ Nukatae mele be míatsi dzi akpa ɖe ƒome, ŋkɔxɔxɔ, alo ŋusẽkpɔkpɔ ɖe amewo dzi ŋu o?
◻ Nɔnɔme si sɔ ɖe Mawu ƒe nukpɔsusu nu ka ƒe dzie Salomo de ƒo?
◻ Aleke Nyagblɔla ƒe agbalẽa me dzodzro ɖe vi na wòe?
[Nɔnɔmetata siwo le axa 15]
Ga kple nunɔamesiwo mehea dzidzeme vɛ kokoko o
[Nɔnɔmetata si le axa 17]
Sɔhɛwo ate ŋu aka ɖe edzi be eme anyo na yewo ne yewovɔ̃ Mawu