Ta Evelia
Akɔfafa ƒe Nyagblɔɖinya Siwo Ka Wò
1. Nukata wòle be míatsɔ ɖe le Yesaya ƒe nyagblɔɖia me?
YESAYA ŋlɔ agbalẽ si wotsɔ eƒe ŋkɔ na ƒe 3,000 kloe enye sia, gake asixɔxɔ ŋutɔŋutɔ le eŋu na mí egbea. Míate ŋu asrɔ̃ gɔmeɖose vevi aɖewo tso ŋutinya me nudzɔdzɔ siwo wòŋlɔ ɖi me. Eye míate ŋu asrɔ̃ nyagblɔɖi siwo wòŋlɔ ɖi le Yehowa ƒe ŋkɔ me atsɔ atu míaƒe xɔse ɖoe. Ẽ, Mawu gbagbe la ƒe nyagblɔɖilae Yesaya nye. Yehowa ƒe gbɔgbɔ ʋãe wòŋlɔ ŋutinya ɖi do ŋgɔ—eƒo nu tso nudzɔdzɔwo ŋu hafi wova dzɔ. Yehowa to esia dzi ɖee fia be yeate ŋu agblɔ etsɔme ɖi ahafia nusiwo ava dzɔ. Yesaya ƒe agbalẽa sɔsrɔ̃ na Kristotɔ vavãwo ka ɖe edzi be Yehowa ana ŋugbe siwo katã wòdo nava eme.
2. Nɔnɔme kae nɔ Yerusalem esime Yesaya ŋlɔ eƒe nyagblɔɖigbalẽa, eye tɔtrɔ kae ava?
2 Esime Yesaya wu eƒe nyagblɔɖia ŋɔŋlɔ nu la, Asiria ƒe ŋɔdzidodo na Yerusalem nu va yi. Gbedoxɔa gakpɔtɔ nɔ anyi, eye amewo wɔa woƒe gbesiagbedɔwo abe alesi wowɔnɛ ɖaa ƒe alafa geɖewo ene. Gake nɔnɔme ma ava trɔ. Ɣeyiɣi aɖe ava esime woalɔ Yuda-fiawo ƒe kesinɔnuwo ayi Babilon eye Yudatɔ sɔhɛwo ava zu fiaƒemedɔwɔlawo le du ma me.a (Yesaya 39:6, 7) Nya sia ava eme le ƒe siwo wu 100 megbe.—Fiawo II, 24:12-17; Daniel 1:19.
3. Gbedasi kae le Yesaya 41 lia me?
3 Gake nya si Mawu gblɔ to Yesaya dzi menye dzɔgbevɔ̃e gbedasi ko o. Nya si nye “Mifa akɔ” ye wòtsɔ dze eƒe agbalẽa ƒe ta 40 lia gɔmee.b Kakaɖedzi si wona Yudatɔwo be woa ŋutɔwo loo alo wo viwo ate ŋu atrɔ ayi wo denyigba dzi la afa akɔ na wo. Woyi akɔfafagbedasi ma dzi le ta 41 lia me eye wogblɔe ɖi le afima be Yehowa aɖo fia sẽŋu aɖe si ana eƒe lɔlɔ̃nu nava eme la ɖa. Eƒo nu tso kakaɖedzi si wogana wo ŋu eye wòde dzi ƒo na wo be woaɖo ŋu ɖe Mawu ŋu. Eklo nu le alakpamawu siwo ŋu dukɔwo me tɔwo ɖoa ŋu ɖo la hã ŋuti be ŋusẽ mele wo ŋu o. Nya siawo katã doa ŋusẽ xɔse ŋutɔ, le Yesaya ƒe ŋkekea me kple mía tɔ me siaa.
Yehowa Tɔ Gbe Dukɔwo
4. Nya kawoe Yehowa gblɔ tsɔ tɔ gbe dukɔwo?
4 Yehowa to eƒe nyagblɔɖila dzi gblɔ be: “Mi ƒukpowo, mimiã nu le ŋkunye me, ŋusẽ yeye neɖo dukɔwo ŋu; woate va, hafi woaƒo nu; mina míaƒo ta kpli ayi ʋɔnu.” (Yesaya 41:1) Yehowa gblɔ nya siawo tsɔ tɔ gbe dukɔ siwo tsi tre ɖe eƒe amewo ŋu. Edi be woava tsi tre ɖe yeƒe ŋkume eye woadzra ɖo aƒo nu! Abe alesi míava kpɔe emegbe ene la, Yehowa wɔ nu abe ʋɔnudrɔ̃la si le ʋɔnu drɔ̃m ene hedi tso dukɔ siawo si be woaɖo kpe edzi ne mawu vavãwoe woƒe legbawo nye. Ðe mawu siawo ate ŋu agblɔ xɔnamedɔ siwo woawɔ na wo subɔlawo alo ʋɔnudrɔ̃nyawo ɖe woƒe futɔwo ŋu ɖia? Ne woate ŋui hã la, ɖe woate ŋu ana woava emea? Ŋuɖoɖoa enye ao. Yehowa koe ate ŋu awɔ nusiawo.
5. Ðe nusita Yesaya ƒe nyagblɔɖiwo ava eme wu zi ɖeka la me.
5 Esi míele Yesaya ƒe nyagblɔɖia me dzrom la, mina wòanɔ susu me na mí be menye zi ɖeka pɛ koe eƒe nyawo ava eme o, abe alesi wòle le Biblia me nyagblɔɖi geɖe gome ene. Le ƒe 607 D.M.Ŋ. me la, woakplɔ Yudatɔwo ayi aboyo me le Babilon. Gake Yesaya ƒe nyagblɔɖia ɖee fia be Yehowa aɖe Israel-vi siwo le aboyo me le afima. Esia dzɔ le ƒe 537 D.M.Ŋ. me. Nane dzɔ le ƒe alafa 20 lia ƒe gɔmedzedze si sɔ kple woƒe ablɔɖekpɔkpɔ ma. Le xexemeʋa gbãtɔ me la, Yehowa subɔla amesiaminawo to xaxaɣi aɖe me. Le ƒe 1918 me la, Satana ƒe xexea ƒe nyaƒoɖeamenu—si Kristodukɔa si nye Babilon Gã la ƒe akpa vevitɔ nɔ megbe na—tɔ te gbeƒãɖeɖe nyanyuia si ŋu ɖoɖo le la keŋkeŋ kloe. (Nyaɖeɖefia 11:5-10) Wotso Gbetakpɔxɔ Habɔbɔa ƒe tatɔ aɖewo nu alakpatɔe hede wo gaxɔ me. Edze abe ɖe xexeame te ŋu ɖu aʋa si woho ɖe Mawu subɔlawo ŋu dzi ene. Gake Yehowa na ablɔɖe wo le vome, abe alesi wòdzɔ le ƒe 537 D.M.Ŋ. mee ene. Woɖe asi le ŋgɔnɔla siwo wode gaxɔ me ŋu le ƒe 1919 me, eye emegbe wote fli ɖe nya siwo wotsɔ ɖe wo ŋu me. Takpekpe aɖe si wowɔ le Cedar Point, Ohio, le September 1919 me gado ŋusẽ Yehowa subɔlawo be woagalé fɔ ɖe gbeƒãɖeɖe Fiaɖuƒenyanyuia ŋu. (Nyaɖeɖefia 11:11, 12) Gbeƒãɖeɖedɔa keke ta tso ɣemaɣi vaseɖe fifia wòɖe dzesi. Tsɔ kpe ɖe eŋu la, Yesaya ƒe nyawo ava eme le mɔ wɔnuku aɖe nu le Paradisonyigba si gbɔna dzi. Eyata nya siwo Yesaya gblɔ gbaɖegbe ʋĩ la ka dukɔ sia dukɔ kple amesiame egbea.
Woyɔ Xɔnametɔ Aɖe
6. Aleke nyagblɔɖila la ƒo nu tso aʋadziɖula aɖe si ava le etsɔme ŋui?
6 Yehowa to Yesaya dzi gblɔ nya ɖi le aʋadziɖula aɖe si aɖe Mawu ƒe dukɔ tso Babilon si me eye wòahe ʋɔnudɔdrɔ̃ ava woƒe futɔwo dzi ŋu. Yehowa bia be: “Ameka nyɔ amesi yome [dzɔdzɔenyenye, “NW”] le kplikplikpli la, tso ɣedzeƒe? Ameka tsɔ dukɔwo de asi le eŋku me, eye wòna wonyã avuzi le fiawo dzi? Ameka na woƒe yi zu abe ke ene, eye woƒe datiwo le abe tsro, si ʋu ya ene? Eti wo yome, eto mɔ, si dzi eƒe afɔ meto kpɔ o, ke naneke mewɔe o. Ameka wɔe heƒoe wòde go? Eya, amesi yɔ ƒomewo tso gɔmedzedzea me ke lae. Nye Yehowa enye gbãtɔ, eye alea ke mele na ame mlɔeawo!”—Yesaya 41:2-4.
7. Amekae nye aʋadziɖula si gbɔna, eye nukae wòva wɔ?
7 Amekae nye amesi woanyɔ tso ɣedzeƒenutowo me? Babilon ƒe ɣedzeƒe gomee Medo-Persia kple Elam le. Afimae Persiatɔ Kores kple eƒe aʋakɔ sesẽwo tso gbɔna. (Yesaya 41:25; 44:28; 45:1-4, 13; 46:11) Togbɔ be menye Yehowa subɔlae Kores nye o hã la, ewɔ nu wòwɔ ɖeka kple Yehowa, Mawu dzɔdzɔetɔ la, ƒe lɔlɔ̃nu. Kores bɔbɔ fiawo ɖe anyi, eye wòka wo hlẽ abe ke ene le eŋgɔ. Le eƒe aʋadziɖuɖu me la, eto mɔ siwo dzi eƒe afɔ meto kpɔ o, “ke naneke mewɔe o,” alo eto wo dzi dedie, eye wòɖu mɔxenu ɖesiaɖe dzi. Le ƒe 539 D.M.Ŋ. me la, Kores ɖo du sesẽ si nye Babilon la gbɔ eye wòmui. Nusi do tso emee nye be wona ablɔɖe Mawu ƒe amewo ale be wotrɔ yi Yerusalem be woagbugbɔ tadedeagu vavãtɔ aɖo anyi.—Ezra 1:1-7.c
8. Nukae Yehowa ɖeɖekoe ate ŋu awɔ?
8 Eyata Yehowa to Yesaya dzi gblɔ Kores ƒe ŋusẽkpɔkpɔ ɖi ɣeyiɣi didi aɖe hafi wova dzi fia ma. Mawu vavã la koe ate ŋu agblɔ nya sia tɔgbe ɖi. Dukɔwo ƒe alakpamawuawo dometɔ aɖeke mede Yehowa nu o. Susu nyui aɖe tae Yehowa gblɔ nya sia ɖo be: “Nyematsɔ nye bubu na ame tutɔ . . . o.” Yehowa koe ate ŋu agblɔe wòasɔ be: “Nyee nye gbãtɔ, eye nyee nye mlɔetɔ; mawu aɖeke mekpe ɖe ŋunye o.”—Yesaya 42:8; 44:6, 7.
Vɔvɔ̃nɔtɔwo Ðoa Ŋu Ðe Legbawo Ŋu
9-11. Aleke dukɔwo wɔ nu ɖe aʋa si Kores ho ŋui?
9 Azɔ Yesaya ƒo nu tso alesi dukɔwo awɔ nui ɖe etsɔme aʋadziɖula sia ŋui la ŋuti be: “Ƒukpowo kpɔe, eye dzidzi ƒo wo, anyigba ƒe mlɔenuwo dzo nyanyanya; woƒo ta kpli heva. Wokpe ɖe wo nɔewo ŋu, eye amesiame gblɔ na nɔvia be: Lé dzi ɖe ƒo! Aɖaŋua de dzi ƒo na sikanutula, amesi ƒoa ga gbabɛ la, de dzi ƒo na zũdala hegblɔ be: Wotsiãe nyuie. Tete woƒo gatagbadzɛ ɖee, be magaʋã o.”—Yesaya 41:5-7.
10 Yehowa lé ŋku ɖe etsɔme ŋu eye wògblɔ alesi nuwo anɔ le xexeame le ƒe siwo ade 200 megbe. Aʋakɔ sesẽ siwo le Kores te ho le ablaɖeɖe me heɖu tsitretsiɖeŋulawo katã dzi. Amewo—ƒukpo siwo le didiƒewo dzi nɔlawo gɔ̃ hã—dzo nyanyanya esi wògogo wo. Wotsɔ vɔvɔ̃ wɔ ɖeka tsi tre ɖe amesi Yehowa yɔ tso ɣedzeƒe be wòahe ʋɔnudɔdrɔ̃ ava wo dzi la ŋu. Wote kpɔ be woade dzi ƒo na wo nɔewo be: “Lé dzi ɖe ƒo!”
11 Aɖaŋuwɔlawo wɔ dɔ ɖekae wɔ legbawo be woaxɔ na ameawo. Atikpala kpa ati ɖe nɔnɔme aɖe me, eye wògblɔ na sikanutula be wòafa ga, ɖewohĩ sika, ɖe eŋu. Zũdala ƒo ga la wòzrɔ̃ eye wòkpɔ egbɔ be wotsiãe nyuie. Ðewohĩ ɖe wogblɔe fewuɖuɖutɔe be woaƒo gatagbadzɛ ɖee ale be magaʋã alo madze be mesesẽ o, abe alesi legba si nye Dagon si mu dze Yehowa ƒe aɖaka ŋgɔ nɔ ene.—Samuel I, 5:4.
Migavɔ̃ O!
12. Kakaɖedzi kae Yehowa na Israel-viwo?
12 Azɔ Yehowa trɔ susu ɖe eƒe amewo ŋu. Mele be amesiwo ɖoa ŋu ɖe Mawu vavã la ŋu navɔ̃ gbeɖe abe dukɔ siwo ɖoa ŋu ɖe legba siwo me agbe mele o ŋu ene o. Yehowa dze eƒe kakaɖedzinyaa gɔme kple ŋkuɖodzinya sia be ye xɔlɔ̃ Abraham ƒe dzidzimeviwoe Israel nye. Yesaya gblɔ Yehowa ƒe nya siwo me belélename dze le ŋutɔ la be: “Ke wò, nye dɔla Israel, Yakob, amesi metia, xɔ̃nye Abraham ƒe ƒome, wò, amesi melé tso anyigba ƒe mlɔenuwo, eye meyɔ wò tso eƒe dzogoewo dzi hegblɔ na wò be: Nye dɔla nènye, metia wò, eye nyemegbe wò o; megavɔ̃ o, elabena meli kpli wò; ŋɔ megadzi wò o, elabena nyee nye wò Mawu, mali ke wò, makpe ɖe ŋuwò, eye matsɔ nye xɔname ƒe nuɖusi alé wò.”—Yesaya 41:8-10.
13. Nukata Yehowa ƒe nyawo afa akɔ na Yudatɔ aboyomewo?
13 Aleke gbegbe nya siawo afa akɔ na Yudatɔ nuteƒewɔla siwo wolé aboyoe le dutanyigba dzi enye si! Aleke gbegbe wòade dzi ƒo na woe nye si be woase be Yehowa yɔ yewo be “nye dɔla” le ɣeyiɣi si me wonye aboyomewo kple Babilon-fia ƒe subɔlawo! (Kronika II, 36:20) Togbɔ be Yehowa ahe to na wo ɖe woƒe nuteƒemawɔmawɔ ta hã la, magbe wo o. Yehowa tɔe Israel nye, ke menye Babilon tɔ o. Susu aɖeke meli si ta wòle be dzidzi naƒo Mawu subɔlawo le esi aʋadziɖula Kores ho aʋa ta o. Yehowa anɔ kpli eƒe amewo akpe ɖe wo ŋu.
14. Aleke nya siwo Yehowa gblɔ na Israel faa akɔ na Mawu subɔlawoe egbea?
14 Nya mawo na kakaɖedzi Mawu subɔlawo hedo ŋusẽ wo vaseɖe míaƒe ŋkekea me ke hã. Le ƒe 1918 me ke la, wodi vevie be yewoanya nusi nye Yehowa ƒe lɔlɔ̃nu na yewo. Wodi vevie be woaɖe yewo tso gbɔgbɔmeboyo si me wonɔ me. Egbea míedi vevie be míakpɔ gbɔdzɔe tso nyaƒoɖeamenu siwo tsoa Satana, xexeame, kple mía ŋutɔwo míaƒe blibomademade gbɔ la me. Gake míenya be Yehowa nya ɣeyiɣi si tututu wòatso axɔ na eƒe amewo kple alesi wòawɔe. Míelé eƒe asi sesẽ la abe ɖevi suewo ene heka ɖe edzi be akpe ɖe mía ŋu míanɔ te ɖe nɔnɔmea nu. (Psalmo 63:8, 9) Yehowa dea asixɔxɔ amesiwo subɔnɛ ŋu. Ekpena ɖe mía ŋu egbea abe alesi wòkpe ɖe eƒe amewo ŋui le ƒe 1918-19 ƒe ɣeyiɣi sesẽawo me ene, eye abe alesi wòkpe ɖe Israel-vi nuteƒewɔlawo ŋu le blema ene.
15, 16. (a) Nukae adzɔ ɖe Israel ƒe futɔwo dzi, eye mɔ kawo nue Israel ɖi nyẽvi le? (b) Amedzidzedze kae le ŋgɔ gbɔna si ta Yehowa ƒe nyawo gadea dzi ƒo na ame wu egbea?
15 Bu nya si Yehowa gagblɔ to Yesaya dzi ŋu kpɔ: “Kpɔ ɖa, ŋukpe kple vlododo ava amesiwo katã do dɔmedzoe ɖe ŋuwò la dzi, wò ketɔwo atsrɔ̃, eye wo nu ayi. Àdi amesiwo le dzre wɔm kpli wò la, ke màkpɔ wo o, amesiwo le aʋa wɔm kpli wò la, azu tofloko agazui ɖe dzi. Elabena nye Yehowa, wò Mawu, amesi le gbɔgblɔm na wò be, megavɔ̃ o, makpe ɖe ŋuwò lae lé wò nuɖusi ɖe asi. Wò, nyẽvi Yakob, wò, ha sue Israel, megavɔ̃ o! Makpe ɖe ŋuwò, Yehowa ye gblɔe; wò xɔnametɔ enye Israel ƒe kɔkɔetɔ la.”—Yesaya 41:11-14.
16 Israel ƒe futɔwo makpɔ dzidzedze o. Ŋu akpe amesiwo do dɔmedzoe ɖe Israel ŋu. Amesiwo awɔ aʋa kplii atsrɔ̃. Togbɔ be Israel-vi aboyomewo adze ame beli siwo le abe nyẽvi si ŋu wɔna aɖeke mele o si le ke me zɔm ene hã la, Yehowa akpe ɖe wo ŋu. Dzideƒonamenya kae nye si esia nye le “ŋkeke mamlɛawo” katã me esi Kristotɔwo dze ŋgɔ ame gbogbo aɖewo ƒe fuléle kaɖikaɖi le xexeame! (Timoteo II, 3:1) Eye aleke gbegbe Yehowa ƒe ŋugbedodoa doa ŋusẽ amee nye si esi Satana si ŋu woƒo nu tsoe le nyagblɔɖi me be enye ‘Gog si le Magog-nyigba dzi’ ƒe amedzidzedze le ŋgɔ! Le Gog ƒe amedzidzedze dziŋɔa me la, Yehowa ƒe amewo anɔ abe nyẽvi si ŋu wɔna aɖeke mele o ene—amesiwo li eye “gli, gameti kple agbo mele wo si o.” Ke hã mele be ŋɔdzi nalé amesiwo kpɔa mɔ na Yehowa o. Ŋusẽkatãtɔ la ŋutɔ awɔ aʋa aɖe wo.—Xezekiel 38:2, 11, 14-16, 21-23; Korintotɔwo II, 1:3.
Akɔfafa na Israel
17, 18. Aleke Yesaya ƒo nu tso alesi woana ŋusẽ Israel ŋui, eye emevava ka dzie míate ŋu aka ɖo?
17 Yehowa yi edzi fa akɔ na eƒe dukɔa be: “Kpɔ ɖa, matsɔ wò awɔ luƒotasiaɖam yeye ɖaɖɛ, si nu dɔ geɖe le. Àfanya towo, àgbã wo gudugudu, eye àwɔ togbɛwo abe tsro ene. Àgbɔ wo, ya alɔ wo ɖe nu, eye ahom aka wo ahlẽ; ke wò la àtso aseye ɖe Yehowa ŋu, eye àƒo adegbe ɖe Israel ƒe kɔkɔetɔ la ŋu.”—Yesaya 41:15, 16.
18 Woana ŋusẽ Israel be wòatso aɖu eƒe futɔ siwo le abe towo ene la dzi le gbɔgbɔmegɔmesese nu. Ne Israel trɔ gbɔ tso aboyo me la, akpe eƒe futɔ siwo adze agbagba be yewoaxe mɔ ɖe gbedoxɔa tutu kple Yerusalem-glia ɖoɖo nu la dzi. (Ezra 6:12; Nexemya 6:16) Gake Yehowa ƒe nyaawo ava eme ɖe “Mawu ƒe Israel” dzi le mɔ si lolo wu nu. (Galatiatɔwo 6:16) Yesu do ŋugbe na Kristotɔ amesiaminawo be: “Amesi ke ɖu dzi, eye wòlé nye dɔwɔwɔwo me ɖe asi yiɖase ɖe nuwuwu la, mana ŋusẽe ɖe [dukɔwo] dzi, eye wòakplɔ wo kple gatikplɔ, eye wòagbã wo gudugudu abe zemela ƒe zewo ene, abe alesi nye hã mekpɔ ŋusẽ tso Fofonye gbɔ ene.” (Nyaɖeɖefia 2:26, 27) Ɣeyiɣia ade godoo esime Kristo nɔvi siwo wofɔ yi dziƒoŋutikɔkɔe me akpɔ gome le Yehowa Mawu ƒe futɔwo tsɔtsrɔ̃ me.—Tesalonikatɔwo II, 1:7, 8; Nyaɖeɖefia 20:4, 6.
19, 20. Nya kae Yesaya ŋlɔ le alesi woagbugbɔ Israel aɖo anyi le teƒe dzeani ŋu, eye aleke esia va emee?
19 Azɔ Yehowa gaɖo kpe ŋugbe si wòdo be yeakpe ɖe yeƒe dukɔa ŋu la dzi le kpɔɖeŋunyagbɔgblɔ me. Yesaya ŋlɔ bena: “Ame dahewo kple hiãtɔwo, siwo le tsi dim, ke ɖeke meli o, eye woƒe aɖe ƒu le tsikɔwuame ta la, nye Yehowa makpe ɖe wo ŋu, nye Israel ƒe Mawu, nyemagblẽ wo ɖi o. Maʋu go tɔsisiwo le to ƒeƒlewo ta me, eye tsidzɔƒe anɔ balimewo; mana gbegbe nazu tá, eye tsi nado bababa le kuɖiɖinyigba dzi. Mado sederti, xe, gbemiti kple amiti ŋutɔ ɖe gbe dzi, eye mado sesewu, fɔfɔli kple kpomi siaa ɖe gbegbe; ne woakpɔe, eye woadze sii, wòade dzigbɔ na wò, eye woanyae be, Yehowa ƒe asie wɔ esia, Israel ƒe kɔkɔetɔ lae wɔe.”—Yesaya 41:17-20.
20 Togbɔ be xexemefiaɖuƒe aɖe si me kesinɔnuwo bɔ ɖo ƒe fiadu mee Israel-vi aboyomeawo nɔ hã la, ɖeko wònɔ na wo abe gbegbe si tsi mele o ene. Wose le wo ɖokui me abe Dawid ene esime wònɔ sisim tso Fia Saul nu. Le ƒe 537 D.M.Ŋ. me la, Yehowa ʋu mɔ na wo be woatrɔ ayi Yuda eye woagbugbɔ yeƒe gbedoxɔ si le Yerusalem la atu ahagbugbɔ tadedeagu vavãtɔ aɖo anyi. Yehowa yra wo hã. Yesaya gblɔe ɖi emegbe be: “Yehowa afa akɔ na Zion, afa akɔ na woƒe aƒedowo katã, awɔ woƒe gbegbe abe Eden ene kple woƒe tagba abe Yehowa ƒe abɔ ene.” (Yesaya 51:3) Nya sia va eme ŋutɔŋutɔ esime Yudatɔwo trɔ yi wo denyigba dzi.
21. Gbugbɔɖoanyi kae va eme le egbeɣeyiɣiawo me, eye nukae adzɔ le etsɔme?
21 Nusia tɔgbe dzɔ le egbeɣeyiɣiwo me esime Kores Gãtɔ, Kristo Yesu, ɖe eyomedzela amesiaminawo tso gbɔgbɔmeboyo me ale be woate ŋu agbugbɔ tadedeagu vavãtɔ aɖo anyi. Wotsɔ gbɔgbɔmeparadiso dama aɖe si nye kpɔɖeŋu Eden-bɔ la yra nuteƒewɔla mawoe. (Yesaya 11:6-9; 35:1-7) Eteƒe madidi o, ne Mawu tsrɔ̃ eƒe futɔwo la, woatrɔ anyigba bliboa wòazu paradiso ŋutɔŋutɔ, abe alesi Yesu do ŋugbe na nuvɔ̃wɔla si nɔ ati ŋu la ene.—Luka 23:43.
Wotɔ Gbe Israel ƒe Futɔwo
22. Nya kawoe Yehowa gatsɔ tɔ gbe dukɔwo?
22 Azɔ Yehowa gatrɔ ɖe eƒe nyahehe kple dukɔwo kpakple woƒe legbawo ŋu: “Yehowa be, mihe miaƒe dzrenyawo vɛ, Yakob ƒe fia la be, mihe miaƒe ɖokuitaʋlinyawo vɛ. Woate va, ne woagblɔ nusi gbɔna dzɔdzɔ ge la, na mí. Kawoe nye tsãtɔwo? Migblɔe, ne míalé ŋku ɖe woawo kple woƒe nuwuwu ŋu, alo mina míase nusi le dzɔdzɔ ge la. Migblɔ nusi gbɔna dzɔdzɔ ge la, ne míadze sii be, mawuwo mienye; miwɔ nyui alo vɔ̃ aɖe, ekema míaƒe nu aku, eye mí katã míakpɔe kple ŋku. Kpɔ ɖa, miele ɖeke me o, eye tofloko enye miaƒe dɔwɔwɔ; amesi tia mi la, ŋunyɔ wònye!” (Yesaya 41:21-24) Ðe dukɔwo ƒe mawuwo ate ŋu agblɔ nya ɖi wòava eme pɛpɛpɛ atsɔ aɖo kpe edzi be yewoƒe sidzedze gbɔ dzɔdzɔmetɔ ŋua? Ne woate ŋui la, ke ele be emetsonu aɖewo naɖo kpe woƒe nyawo dzi, eɖanye nyui alo vɔ̃ o. Gake le nyateƒe me la, legbawo mate ŋu awɔ naneke o eye wole abe nusi meli o ene.
23. Nukata Yehowa to eƒe nyagblɔɖilawo dzi bu fɔ legbawo enuenu?
23 Le míaƒe ŋkekea me la, ɖewohĩ ame aɖewo mase nusita Yehowa to Yesaya kple ehati nyagblɔɖilawo dzi zã ɣeyiɣi geɖe ɖe fɔbubu trɔ̃subɔsubɔ si nye tofloko ŋu la gɔme o. Ðewohĩ ame geɖe kpɔe egbea be legba siwo amewo wɔ nye nu maɖinuwo. Gake ne wonya ɖo alakpadzixɔse ƒe nuɖoanyi eye ame geɖe xɔ edzi se ko la, esesẽna be woaɖe wo ɖa keŋkeŋ le wo dzi xɔselawo ƒe susu me. Gɔmesese aɖeke mele mía ŋɔlimetɔwo ƒe dzixɔse geɖe ŋu o abe alesi legba siwo me agbe mele o la bubu mawu ŋutɔŋutɔwoe nye nusi ŋu gɔmesese mele o ene. Ke hã amewo lé dzixɔse siawo me ɖe asi togbɔ be amewo ƒo nu tsi tre ɖe wo ŋu hã. Nyateƒea sese enuenu koe ʋãa ame aɖewo wokpɔa nunya si le ŋuɖoɖo ɖe Yehowa ŋu me.
24, 25. Aleke Yehowa gahe susu yi Kores dzii, eye nyagblɔɖi bubu kawo dzie esia ɖo ŋkui na mí?
24 Yehowa gahe susu yi Kores dzi be: “Menyɔ ame aɖe tso [dziehe] wòva, amesi aɖe gbeƒã nye ŋkɔ la, tso ɣedzeƒe; azɔ anyigbanunɔlawo dzi abe anyi me ene, eye abe alesi zemela nyãa tsui ene.” (Yesaya 41:25)d Yehowa ya te ŋu wɔa nuwo eye mele abe dukɔwo ƒe mawuwo ene o. Ne Mawu kplɔ Kores tso “ɣedzeƒe” la, aɖe eƒe nyagblɔɖiŋutete kple alesi wòte ŋu trɔa asi le etsɔme ŋu be eƒe nyagblɔɖi nava eme la afia.
25 Nya siawo na míeɖo ŋku alesi apostolo Yohanes ƒo nu tso fia siwo atso ɖe dɔ ŋu le míaƒe ɣeyiɣia me le nyagblɔɖi me dzi na mí. Míexlẽ le Nyaɖeɖefia 16:12 be woadzra mɔ ɖo na “ɣedzeƒefiawo.” Fia siawo menye ame bubu aɖeke wu Yehowa Mawu kple Yesu Kristo o. Abe alesi Kores ɖe Mawu ƒe dukɔ le blema ene la, fia siawo siwo sesẽ wu sã la atsrɔ̃ Yehowa ƒe futɔwo eye woakplɔ eƒe amewo to xaxa gã la me ayi ɖe dzɔdzɔenyenye ƒe xexe yeyea me.—Psalmo 2:8, 9; Petro II, 3:13; Nyaɖeɖefia 7:14-17.
Yehowae Nye Ŋusẽtɔ Gãtɔ Kekeake!
26. Nya kae Yehowa bia azɔ, eye ɖe woɖo eŋua?
26 Yehowa gagblɔ nyateƒea ake be ye koe nye Mawu vavã la. Ebia be: “Ameka gblɔe tso gɔmedzedzea me, ne míadze sii, eye ameka gblɔe tso gbaɖegbe, ne míagblɔ be, etɔ dzɔ? Ame aɖeke megblɔe o, ame aɖeke mena wosee o, eye ame aɖeke mese miaƒe nyawo o.” (Yesaya 41:26) Trɔ̃ aɖeke meɖe gbeƒãe be aʋadziɖula aɖe gbɔna ava ɖe amesiwo ɖoa ŋu ɖe eŋu o. Agbe mele mawu siawo tɔgbe me o, eye womete ŋu ƒoa nu o. Womenye mawuwo kura o.
27, 28. Nyateƒenya vevi ka dzie wote gbe ɖo le Yesaya ta 41 lia ƒe kpukpui mamlɛawo me, eye amekawo koe ɖea gbeƒã nya sia?
27 Esi Yesaya gblɔ Yehowa ƒe nyagblɔɖinya ʋãme siawo vɔ la, ete gbe ɖe nyateƒenya vevi aɖe dzi be: “Nyee nye ame gbãtɔ gblɔ na Zion be: Kpɔ ɖa, woawoe nye esi! Eye meɖo du nyui xɔlawo ɖe Yerusalem. Metsa ŋu, ke ame aɖeke meli o; aɖaŋuɖola aɖeke mele wo dome, ne mabia nyae wòaɖo eŋu o. Kpɔ ɖa, wo katã mele ɖeke me o, nu dzodzroa enye woƒe dɔwɔwɔ, ya kple tofloko enye woƒe legbawo.”—Yesaya 41:27-29.
28 Yehowa ye nye gbãtɔ. Ekpɔ ŋusẽ wu amesiame! Eyae nye Mawu vavã si ɖea gbeƒã eƒe amewo ƒe ɖeɖekpɔkpɔ, si nye nyanyui na wo. Eye eƒe Ðasefowo koe gblɔa eƒe gãnyenye na dukɔwo. Yehowa bu fɔ amesiwo ɖoa ŋu ɖe trɔ̃subɔsubɔ ŋu fewuɖuɖutɔe, eye wògblɔ be woƒe legbawo nye “ya kple tofloko.” Susu vevi ka gbegbee nye si si ta wòle be míaku ɖe Mawu vavã la ŋu! Yehowa ŋu koe wòdze be míaɖo ŋu ɖo kple kakaɖedzi.
[Etenuŋɔŋlɔwo]
c Kores Gãtɔ, amesi na ablɔɖe “Mawu ƒe Israel” tso gbɔgbɔmeboyo me le ƒe 1919 me, la menye ame bubu aɖeke wu Yesu Kristo, amesi bɔbɔ nɔ fiazikpui dzi hezu Mawu ƒe Dziƒofiaɖuƒea ƒe Fia tso ƒe 1914 me la o.—Galatiatɔwo 6:16.
d Togbɔ be Babilon ƒe ɣedzeƒe gomee Kores denyigba nɔ hã la, Asia Sue si le dziehe ye wòtso va dze dua dzi zi mamlɛtɔ.
[Nɔnɔmetata si le axa 19]
Togbɔ be trɔ̃subɔlae Kores nye hã la, wotiae be wòawɔ Mawu ƒe dɔ
[Nɔnɔmetata si le axa 21]
Dukɔwo ɖoa ŋu ɖe legba siwo me agbe mele o ŋu
[Nɔnɔmetata siwo le axa 27]
Israel si le abe “luƒotasiaɖam” ene la ‘agbã towo gudugudu’