Ðasefo Siwo Tsi Tre Ðe Alakpamawuwo Ŋu
“Yehowa be: Miawoe nye nye ɖasefowo kple nye dɔla, si metia.”—YESAYA 43:10.
1. Amekae Mawu vavã la nye, eye go kawo mee wòlolo wu mawu gbogbo siwo amewo subɔna egbea le?
AMEKAE nye Mawu vavã la? Esiae nye biabia vevitɔ kekeake si dze ŋgɔ ameƒomea katã egbea. Togbɔ be amegbetɔwo dea ta agu na mawu gbogbo aɖewo hã la, wo dometɔ Ðeka koe ate ŋu ana agbe mí ahana etsɔme si dzidzɔ le la mí. Wo dometɔ Ðeka ŋu ko míate ŋu agblɔ le be: “Eya me míele agbe, eye míeʋãna le, eye míele.” (Dɔwɔwɔwo 17:28) Nyateƒee, Mawu ɖeka aɖe koe dze be woade ta agu na. Abe alesi dziƒohadziha la gblɔ le Nyaɖeɖefia ƒe agbalẽa me ene la: “Mía Aƒetɔ [Yehowa] kple mía Mawu, wòe dze be, naxɔ ŋutikɔkɔe kple bubu kple ŋusẽ; elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.”—Nyaɖeɖefia 4:11.
2, 3. (a) Aleke Satana da alakpa tsɔ tɔ gbe gome si le Yehowa si be woade ta agu nɛ lae? (b) Nukae do tso Xawa ƒe nuvɔ̃ me na Xawa kple viawo, eye nukae do tso eme na Satana?
2 Le Eden-bɔa me la, Satana da alakpa tsɔ tɔ gbe gome si le Yehowa si be woade ta agu nɛ. Eto da dzi gblɔ na Xawa be ne edze aglã ɖe Yehowa ƒe se ŋu heɖu ati si ŋu Yehowa de se ɖo ƒe tsetse la, eya ŋutɔ anɔ abe Mawu ene. Egblɔ be: “Mawu nyae bena, gbesigbe ke miaɖu eƒe ɖe la, miaƒe ŋkuwo laʋu, eye mianɔ abe Mawu ene, anya nyui kple vɔ̃.” (Mose I, 3:5) Xawa xɔ da la dzi se eye wòɖu atikutsetse si ŋu wode se ɖo la.
3 Le nyateƒe me la, alakpae Satana da. (Yohanes 8:44) Alesi ko Xawa va nɔ “abe Mawu ene” esime wòwɔ nuvɔ̃ enye be etsɔe ɖo eɖokui dzi tso nya me le nusi nye nyui kple nusi nye vɔ̃ ŋu, si nye nusi wòle be wòagblẽ ɖe Yehowa si me hafi. Eye togbɔ be Satana da alakpa nɛ hã, eku mlɔeba. Eyata Satana koe Xawa ƒe nuvɔ̃a ɖe vi na. Le nyateƒe me la, taɖodzinu si Satana meɖe gblɔ o si ta wòble Xawa de nuvɔ̃ mee nye be ye ŋutɔ yeava zu mawu. Esime Xawa wɔ nuvɔ̃ la, eva zu amegbetɔ gbãtɔ si nye eyomedzela, eye eteƒe medidi o Adam hã va kpe ɖe eŋu. Menye “nuvɔ̃ me” koe wodzi wo viwo ɖo o, ke woƒe akpa gãtɔ va nɔ Satana ƒe ŋusẽkpɔaɖemedzi te hã, eye le ɣeyiɣi kpuie aɖe megbe la, eva eme be xexe blibo la trɔ le Mawu vavã la yome.—Mose I, 6:5; Psalmo 51:7.
4. (a) Amekae nye xexe sia ƒe mawu? (b) Nuka wɔwɔe hiã kpata?
4 Wotsrɔ̃ xexe ma le Tsiɖɔɖɔa me. (Petro II, 3:6) Le Tsiɖɔɖɔa megbe la, xexe evelia aɖe si menya Yehowa o va nɔ anyi, eye wògali vaseɖe fifia. Biblia gblɔ le eŋu be: “Xexeme blibo la katã le vɔ̃ɖitɔ la me.” (Yohanes I, 5:19) Esi xexe sia wɔa nu tsia tre ɖe Yehowa ƒe sewo kple nusita wòde wo ŋu ta la, Satana ƒe taɖodzinuwo ŋudɔe wowɔna. Eyae nye eƒe mawu. (Korintotɔwo II, 4:4) Ke hã la, mawu wɔnamanɔsitɔe wònye. Mate ŋu ana amewo nakpɔ dzidzɔ alo ana agbe wo o; Yehowa koe ate ŋu awɔ nenema. Eyata gbã la, ele be amesiwo di agbenɔnɔ si ŋu gɔmesese le kple xexeme si nyo wu la nanyae be Yehowae nye Mawu vavã la eye azɔ woasrɔ̃ eƒe lɔlɔ̃nu wɔwɔ. (Psalmo 37:18, 27, 28; Nyagblɔla 12:13) Eyata ehiã kpata be ŋutsu kple nyɔnu xɔsetɔwo naɖi ɖase, alo aɖe gbeƒã nyateƒe si ku ɖe Yehowa ŋu.
5. “Ðaseɖilawo ƒe alilikpo” ka ŋue Paulo ƒo nu tsoe? Yɔ amesiwo ƒe ŋkɔ wòyɔ la dometɔ aɖewo.
5 Tso gɔmedzedzea me kee nuteƒewɔla siawo le xexeame. Le Hebritɔwo ta 11 me la, apostolo Paulo yɔ wo dometɔ geɖe ƒe ŋkɔ eye wògblɔ be wonye “ɖaseɖilawo ƒe alilikpo gã ŋutɔ.” (Hebritɔwo 12:1) Adam kple Xawa ƒe viŋutsu evelia Abel ƒe ŋkɔe Paulo yɔ gbã. Woyɔ Henox kple Noa hã be wonɔ anyi do ŋgɔ na Tsiɖɔɖɔa. (Hebritɔwo 11:4, 5, 7) Wo dometɔ si xɔ ŋkɔ wue nye Abraham, Yudatɔwo ƒe tɔgbui la. Abraham si woyɔ be “[Yehowa] xɔlɔ̃” la va zu Yesu si nye “ɖaseɖila nuteƒewɔla kple nyateƒetɔ” la tɔgbui.—Yakobo 2:23; Nyaɖeɖefia 3:14.
Abraham ƒe Ðaseɖiɖi na Nyateƒea
6, 7. Mɔ kawo nue Abraham ƒe agbenɔnɔ kple nuwɔnawo ɖi ɖase be Yehowae nye Mawu vavã la?
6 Aleke Abraham nye ɖaseɖilae? To alesi wòxɔ Yehowa dzi se vevie heɖo toe nuteƒewɔwɔtɔe me. Esi wogblɔ na Abraham be wòaʋu le Ur-dugã la me aɖanɔ anyigba didi aɖe dzi le eƒe agbemeŋkeke mamleawo me la, ewɔ nenema. (Mose I, 15:7; Dɔwɔwɔwo 7:2-4) Zi geɖe la, wo detɔ siwo nɔa tsatsam la dzudzɔa tsaglãlatsatsa va nɔa agbe si le dedie wu le dugã me. Eyata esi Abraham dzo le dugã la me va nɔ avɔgbadɔwo me la, eɖo kpe eƒe ŋuɖoɖo ɖe Yehowa Mawu ŋu dzi wòdze ƒã. Eƒe toɖoɖo nye ɖaseɖiɖi na eteƒekpɔlawo. Yehowa yra Abraham geɖe le eƒe xɔse ta. Togbɔ be Abraham nɔ avɔgbadɔwo me hã la, ekpɔ ŋutilãmenu geɖe. Esi woɖe aboyo Lot kple eƒe ƒomea la, Yehowa kpe ɖe Abraham ŋu esi wòti wo yome, ale be wòte ŋu tso wo xɔ. Abraham srɔ̃ dzi vi le eƒe nyagãkuku me, eye ema na ŋugbe si Yehowa do na Abraham be dzidzimevi aɖe ado tso eme la va eme. To Abraham dzi la, amewo kpɔe be Mawu gbagbe si wɔa eƒe ŋugbedodowo dzie Yehowa nye.—Mose I, 12:1-3; 14:14-16; 21:1-7.
7 Esi Abraham va xɔ na Lot hetrɔ gbɔna la, Melxizedek si nye Salem (si wova yɔ emegbe be Yerusalem) ƒe fia la va do goe, eye wòdo dzaa na Abraham gblɔ be: “Mawu dziƒoʋĩtɔ [ƒe] Abram.” Sodom-fia hã va kpee eye wòdi be yeatsɔ nunanawo nɛ. Abraham gbe. Nukatae? Medi be ɖikeke aɖeke nanɔ yeƒe yayrawo Tsoƒe ŋu o. Egblɔ be: “Meta Yehowa, Mawu dziƒoʋĩtɔ, si wɔ dziƒo kple anyigba la bena, nyemaxɔ naneke atso nusiwo katã nye tɔwò la me o, ka loo, alo atokotaka gɔ̃ hã o, bena nagagblɔ bena, yee wɔ Abram wòzu kesinɔtɔ o!” (Mose I, 14:17-24) Ðasefo nyui kae nye si Abraham nye!
Ðasefowo ƒe Dukɔ Aɖe
8. Aleke Mose ɖee fia be yexɔ Yehowa dzi se vevie?
8 Mose si nye Abraham ƒe dzidzimevi hã le ɖasefo siwo ƒe ŋkɔ Paulo yɔ la me. Mose gbe Egipte-kesinɔnuwo eye emegbe edze ŋgɔ xexemefiaɖuƒe gã ma dzi ɖula kalẽtɔe be yeakplɔ Israel-viwo ayi ablɔɖe mee. Afikae wòkpɔ dzideƒoa tsoe? Eƒe xɔse mee. Paulo gblɔ be: “[Mose do] dzi, abe ɖe wòle amesi womekpɔna o la kpɔm ene.” (Hebritɔwo 11:27) Wote ŋu kpɔa Egipte-mawuwo kple ŋku hekaa asi wo ŋu. Woƒe kpememewo wɔa dɔ ɖe amewo dzi egbea gɔ̃ hã. Gake Yehowa si womekpɔna kple ŋku o la nye ame ŋutɔŋutɔ na Mose sã wu alakpamawu mawo katã. Ðikeke aɖeke menɔ Mose me o be Yehowa li eye be aɖo eteƒe na Esubɔlawo. (Hebritɔwo 11:6) Mose va zu ɖasefo ɖedzesi aɖe.
9. Aleke woɖoe be Israel-dukɔa nasubɔ Yehowae?
9 Esi Mose kplɔ Israel-viwo yi ablɔɖe me megbe la, eva zu nubabla si nɔ Yehowa kple Abraham ƒe dzidzimevi siwo do tso Yakob me la domenɔla. Nusi do tso emee nye be Israel va zu Yehowa ƒe dukɔ tɔxɛ. (Mose II, 19:5, 6) Esiae nye zi gbãtɔ si dukɔ blibo aɖi ɖase. Nya siwo Yehowa gblɔ to Yesaya dzi le ƒe 800 aɖewo megbe ƒe gɔmeɖosea wɔ dɔ tso dukɔa dziɣi ke be: “Miawoe nye nye ɖasefowo kple nye dɔla, si metia, ne mianyae, miaxɔ dzinye ase, eye miadze sii be, nyee.” (Yesaya 43:10) Aleke dukɔ yeye sia anye Yehowa ƒe ɖasefowoe? To woƒe xɔse kple toɖoɖo kpakple alesi Yehowa awɔ nu atsɔ ade wo dzii me.
10. Mɔ ka nue Yehowa ƒe ŋusẽdɔwɔwɔ ɖe Israel nu nye ɖaseɖiɖi le, eye nukae do tso eme?
10 Esime woɖo Israel anyi ƒe 40 aɖewo megbe la, ɣeyiɣi de be woaxɔ Ŋugbedodonyigba la wòazu wo tɔ. Ŋkutsalawo yi ɖatsa ŋku le Yerixo-dua me, eye Raxab si nɔ Yerixo la kpɔ wo ta. Nukatae? Nyɔnua gblɔ be: “Míese, alesi Yehowa na Avaƒu la mie le mia ŋgɔ, esime mieʋu tso Egipte, kpakple nusi miewɔ Amoritɔwo ƒe fia eveawo, siwo nye Sixon kple Og le Yordan godo, amesiwo mietsrɔ̃ gbidigbidi. Esi míesee la, dzi ɖe mía ƒo, eye kalẽ megale ame aɖeke me ɖe mia ŋu o, elabena Yehowa, mia Mawu, enye Mawu le dziƒo afime kple anyigba dzi afi.” (Yosua 2:10, 11) Yehowa ƒe ŋusẽdɔwɔwɔwo ŋuti nyatakaka ʋã Raxab kple eƒe ƒomea woʋu le Yerixo kple eƒe alakpamawuwo gbɔ va kpe ɖe Israel ŋu wode ta agu na Yehowa. Edze ƒã be Yehowa ɖi ɖase sẽŋu aɖe to Israel dzi.—Yosua 6:25.
11. Agba kae nɔ Israel-vi siwo katã nye dzilawo dzi le ɖaseɖiɖi ŋu?
11 Esime Israel-viwo kpɔtɔ nɔ Egipte la, Yehowa dɔ Mose ɖe Farao gbɔ gblɔ bena: “Yi Farao gbɔ, elabena nyee na eya ŋutɔ kple eŋu mewo ƒe dzime sẽ, bena mawɔ nye dzesi siawo le wo dome; eye bene nava xlẽ nusiwo mewɔ Egiptetɔwo kple dzesi, siwo mewɔ le wo dome la, afia viwòwo kple wò tɔgbuiyɔviwo, bena miadze sii be, nyee nye Yehowa.” (Mose II, 10:1, 2) Israel-vi toɖolawo agblɔ Yehowa ƒe nutsuwɔwɔwo na wo viwo. Wo viwo hã agblɔ wo na wo viwo, eye woanɔ ewɔm nenema tso dzidzime yi dzidzime. To esia me la, woaɖo ŋku Yehowa ƒe ŋusẽdɔwɔwɔwo dzi ɣesiaɣi. Agba le dzilawo dzi be woaɖi ɖase na wo viwo egbea hã.—Mose V, 6:4-7; Lododowo 22:6.
12. Aleke Yehowa ƒe yayra si nɔ Solomon kple Israel dzi ɖi ɖasee?
12 Alesi Yehowa yra Israel le ɣeyiɣi si me wowɔ nuteƒe la nye ɖaseɖiɖi na dukɔ siwo ƒo xlã wo. Esi Mose ƒo nu tso yayra siwo ƒe ŋugbe Yehowa do ŋu vɔ megbe la, egblɔ be: “Anyigba dzi dukɔwo katã akpɔe bena, Yehowa ƒe ŋkɔ le ŋuwò, eye woavɔ̃ wò.” (Mose V, 28:10) Wona nunya kple kesinɔnuwo Salomo le eƒe xɔse ta. Dukɔa kpɔ dzidzedze kple ŋutifafa ɣeyiɣi didi aɖe le eƒe dziɖuɖu te. Míexlẽ le ɣeyiɣi ma ŋu be: “Amewo tso dukɔwo katã kple anyigba dzi fia, siwo katã se eƒe nunya ŋkɔ la, dome va, be yewoase Salomo ƒe nunya.” (Fiawo I, 5:5, 9, 10, 14) Amesiwo va kpɔ Salomo ɖa dometɔ si ɖe dzesie nye Seba-fianyɔnu la. Esi eya ŋutɔ kpɔ Yehowa ƒe yayra si le dukɔa kple eƒe fia dzi vɔ megbe la, egblɔ be: “Woakafu Yehowa, wò Mawu, amesi ŋu wò nu nyo, be wòtsɔ wò ɖo eƒe fiazikpui dzi nènye fia na Yehowa, wò Mawu la. [Elabena] Mawu lɔ̃ Israel.”—Kronika II, 9:8.
13. Ðewohĩ nukae nye Israel ƒe ɖaseɖiɖi si nu sẽ wu, eye aleke wògaɖea vi na míi?
13 Apostolo Paulo ƒo nu tso nusi ɖewohĩ enye Israel ƒe ɖaseɖiɖi si nu sẽ wu ŋu. Esi wònɔ nu ƒom tso ŋutilã me Israel kple Kristo-hame si nɔ Roma ŋu la, egblɔ be: “Wotsɔ Mawu ƒe nyawo de wo si.” (Romatɔwo 3:1, 2) Tso Mose dzi la, gbɔgbɔ ʋã Israel-vi nuteƒewɔla aɖewo woŋlɔ alesi Yehowa wɔ nu kple Israel, kpakple eƒe aɖaŋuɖoɖo, eƒe sewo, kple eƒe nyagblɔɖiwo ɖi. Blemanuŋlɔla siawo to nuŋlɔɖi siawo dzi ɖi ɖase na dzidzime siwo va emegbe—mía tɔ si li egbea hã le eme—be Mawu ɖeka kolia ye li, eye eŋkɔe nye Yehowa.—Daniel 12:9; Petro I, 1:10-12.
14. Nukata woti amesiwo ɖi ɖase na Yehowa la dometɔ aɖewo yome?
14 Nublanuitɔe la, Israel do kpo xɔse ɖeɖefia zi geɖe, eye emegbe eva hiã be Yehowa nadɔ ɖasefowo aɖo ɖe ye ŋutɔ ƒe dukɔ gbɔ. Woti amesiawo dometɔ geɖe yome. Paulo gblɔ be wo dometɔ aɖewo “[to] fewuɖuɖu kple ƒoƒo ƒe dodokpɔ me, ke gawu la bablawo kple gaxɔ me nɔnɔ me.” (Hebritɔwo 11:36) Ðasefo wɔnuteƒewoe wonye vavã! Aleke wòwɔ nublanui enye si be wo hati siwo hã nye Yehowa ƒe dukɔ tiatia me tɔwoe ti wo yome zi geɖe! (Mateo 23:31, 37) Le nyateƒe me la, dukɔa ƒe nuvɔ̃ va lolo ale gbegbe be le ƒe 607 D.M.Ŋ. me la, Yehowa kplɔ Babilontɔwo vɛ wova tsrɔ̃ Yerusalem kple eƒe gbedoxɔa eye wokplɔ Israel-vi siwo tsi agbe ƒe akpa gãtɔ yi aboyo mee. (Yeremya 20:4; 21:10) Ðe dukɔ blibo ƒe ɖaseɖiɖi le Yehowa ƒe ŋkɔ ŋu tɔ ɖe afima? Ao.
Mawuwo Dodokpɔ
15. Aleke woɖi ɖase le Babilon ƒe aboyo me gɔ̃ hãe?
15 Togbɔ be dukɔa nɔ aboyo me le Babilon hã la, wo dometɔ siwo nye nuteƒewɔlawo mehe ɖe megbe le ɖaseɖiɖi le Yehowa ƒe Mawunyenye kple ŋusẽ ŋu o. Le kpɔɖeŋu me, Daniel ɖe Nebukadnezar ƒe drɔ̃ewo gɔme dzideƒotɔe, eɖe nuŋɔŋlɔ si nɔ glia ŋu me na Belsazar, eye egbe ta nana le gbedodoɖa ƒe nya la me le Dario ŋkume. Hebritɔ etɔ̃awo hã ɖi ɖase wɔnuku aɖe na Nebukadnezar esime wogbe tadedeagu na legba aɖe.—Daniel 3:13-18; 5:13-29; 6:4-27.
16. Aleke Yehowa gblɔe ɖi be Israel atrɔ ava eƒe anyigba dzii, eye tameɖoɖo kae anɔ tɔtrɔgbɔ sia ŋu?
16 Gake Yehowa ɖo tame be dukɔ bliboa agaɖi ɖase le Israel-nyigba dzi. Xezekiel si gblɔ nya ɖi le Yudatɔ aboyomenɔlawo dome le Babilon la ŋlɔ nu tso Yehowa ƒe tameɖoɖo le anyigba si zu aƒedo la ŋu be: “Mana Israel ƒe aƒe blibo la ƒe amewo nasɔ gbɔ ɖe mia dzi, amewo anɔ duwo me, eye woaɖo gli gbagbãwo.” (Xezekiel 36:10) Nukata Yehowa awɔ esia? Vevietɔ be wòaɖi ɖase le eya ŋutɔ ƒe ŋkɔ ŋu. Egblɔ to Xezekiel dzi be: “Israel ƒe aƒe, menye mia ta mele ewɔm ɖo o, ke boŋ nye ŋkɔ kɔkɔe, si miedo gui le dukɔwo dome [tae].”—Xezekiel 36:22; Yeremya 50:28.
17. Nya kawoe ƒo xlã Yesaya 43:10 me nyawo?
17 Esime nyagblɔɖila Yesaya nɔ nya gblɔm ɖi le Israel ƒe tɔtrɔgbɔ tso aboyo me le Babilon ŋue gbɔgbɔ ʋãe wòŋlɔ nya siwo le Yesaya 43:10, si gblɔ be Israel nye Yehowa ƒe ɖasefo kple esubɔla la ɖi. Le Yesaya ta 43 kple 44 me la, woƒo nu tso Yehowa ŋu be enye Israel ƒe Wɔla, Gɔmeɖoanyila, Mawu, Kɔkɔetɔ, Ðela, Xɔnametɔ, kple Fia. (Yesaya 43:3, 14, 15; 44:2) Eɖe mɔ Israel yi aboyo me elabena enuenu la, dukɔa mede bubu eŋu nenema o. Gake wo kpɔtɔ nye eƒe amewo. Yehowa gblɔ na wo be: “Megavɔ̃ o, elabena meɖe wò, metsɔ wò ŋkɔ yɔ wò be: Tɔnye nènye.” (Yesaya 43:1) Israel ƒe aboyomenɔnɔ le Babilon awu enu.
18. Aleke Israel ɖeɖe tso Babilon ɖo kpe edzi be Yehowae nye Mawu vavã ɖeka kolia?
18 Ẽ, Yehowa tsɔ Israel ɖeɖe tso Babilon wɔ dodokpɔ na mawuwo. Etɔ gbe dukɔwo ƒe alakpamawuwo be woakplɔ woƒe ɖasefowo vɛ, eye wòyɔ Israel be enye yeƒe ɖasefo. (Yesaya 43:9, 12) Esi wòɖe Israel-viwo tso aboyo me la, eɖee fia be menye mawuwoe Babilon-mawuwo nye kura o eye be ye koe nye Mawu vavã la. (Yesaya 43:14, 15) Ƒe 200 do ŋgɔ na nudzɔdzɔ ma, esime wòyɔ Persiatɔ Kores be enye yesubɔla si dzi yeato ana ablɔɖe Yudatɔwo la, egaɖo kpe eƒe Mawunyenye dzi. (Yesaya 44:28) Woana ablɔɖe Israel. Nukatae? Yehowa ɖe eme be: “[Be Israel naxlẽ] nya afia le nye kafukafu ŋu.” (Yesaya 43:21) Agaʋu ɖaseɖiɖi ƒe mɔnukpɔkpɔ geɖe ɖi.
19. Ðase kae Kores ɖi esi wògblɔ na Israel-viwo be woatrɔ ayi Yerusalem eye aleke Yudatɔ wɔnuteƒewo ƒe nuwɔna ɖi ɖase esi wotrɔ yi?
19 Esime ɣeyiɣia de la, Kores si nye Persiatɔ la ɖu Babilon dzi abe alesi wogblɔe ɖi tututu ene. Togbɔ be trɔ̃subɔlae Kores nye hã la, eɖe gbeƒã Yehowa ƒe Mawunyenye esime wòde se aɖe na Yudatɔwo le Babilon be: “Mi eƒe dukɔ la dome amesiame neyi Yerusalem le Yuda, eye eƒe Mawu anɔ kplii, ne wòatu xɔ na Yehowa, Israel ƒe Mawu, si nye Mawu le Yerusalem.” (Ezra 1:3) Yudatɔ geɖe wɔ ɖe edzi. Wozɔ mɔ trɔ va Ŋugbedodonyigba la dzi eye wotu vɔsamlekpui ɖe afisi blemagbedoxɔ la nɔ. Togbɔ be wotsɔ dziɖeleameƒo kple tsitretsiɖeŋu sẽŋu do kplamatse wo hã la, wote ŋu gbugbɔ gbedoxɔa tu hetso Yerusalem-dua mlɔeba. Nusiawo katã dzɔ elabena Yehowa ŋutɔ gblɔ be, “[menye] to aʋakɔ alo ŋusẽ me o, ke boŋ to [yeƒe] gbɔgbɔ dzi.” (Zaxarya 4:6) Dzidzedzekpɔkpɔ siawo gaɖo kpe edzi be Yehowae nye Mawu vavã la.
20. Togbɔ be gbɔdzɔgbɔdzɔwo nɔ Israel ŋu hã la, nukae míate ŋu agblɔ le woƒe ɖaseɖiɖi le Yehowa ƒe ŋkɔ ŋu na blemaxexeame?
20 Eyata Yehowa yi edzi zã Israel wònye eƒe ɖasefo, togbɔ be wonye dukɔ si me tɔwo mede blibo o eye wodzea aglã ɣeaɖewoɣi hã. Dukɔ ma kple eƒe gbedoxɔ kpakple nunɔlawoe tsi tre ɖi na tadedeagu vavãtɔ ƒe nɔƒe do ŋgɔ na Kristotɔwo ƒe ɣeyiɣia. Ðikeke aɖeke manɔ amesiame si xlẽa nu tso alesi Yehowa wɔ nu kple Israel ŋu le Hebri Ŋɔŋlɔawo me la me o be Mawu vavã ɖeka kolia ye li, eye eƒe ŋkɔe nye Yehowa. (Mose V, 6:4; Zaxarya 14:9) Gake woagaɖi ɖase si lolo wu sã le Yehowa ƒe ŋkɔ ŋu, eye míadzro esia me le nyati si kplɔe ɖo me.
Èɖo Ŋku Wo Dzia?
◻ Aleke Abraham ɖi ɖase be Yehowae nye Mawu vavã la?
◻ Mose ƒe nɔnɔme ɖedzesi kae na wòte ŋu zu ɖasefo nuteƒewɔla?
◻ Mɔ kawo nue Israel-dukɔ bliboa ɖi ɖase le Yehowa ŋu le?
◻ Aleke Israel ɖeɖe tso Babilon ɖee fia be Yehowae nye Mawu vavã la?
[Nɔnɔmetata si le axa 10]
Abraham to eƒe xɔse kple toɖoɖo me ɖi ɖase ɖedzesi aɖe le Yehowa ƒe Mawuwunyenye ŋu