11. Dɔ kae Yehowa de asi na esubɔlawo, eye nukae Yehowa ɖe fia le eƒe Mawunyenye ŋu?

¹¹ Esi ŋusẽ mele alakpamawuwo si o ta la, womate ŋu akplɔ ɖasefo aɖeke vɛ o. Eyata ezu ŋukpe na wo be ame aɖeke meva ɖasefonɔƒea o. Gake ɣeyiɣi ɖo azɔ be Yehowa naɖo kpe eƒe Mawunyenye dzi. Etrɔ kpɔ eƒe dukɔa hegblɔ be: “Miawoe nye nye ɖasefowo kple nye dɔla, si metia, ne mianyae, miaxɔ dzinye ase, eye miadze sii be, nyee. Womewɔ mawu aɖeke do ŋgɔ nam o, eye ɖeke mado megbe nam o. Nyee nye Yehowa, eye xɔnametɔ aɖeke meli kpe ɖe ŋunye o. Medo ŋugbe, eye mexɔ na ame; mena miesee, eye mawu tutɔ aɖeke menɔ mia dome o; . . . Miawoe nye nye ɖasefowo, eye nyee nye Mawu. Nyee li tso tititi ke, eye ame aɖeke maxɔ ame le asinye o; ne mewɔ nu la, ameka [alé nye asi]?”—Yesaya 43:10-13.

14. Nuka dzie Yehowa ɖo ŋkui na Israel-viwo, eye nukata ŋkuɖodzinya sia sɔ ɖe ɣeyiɣia dzi?

¹⁴ Yehowa léa be na amesiwo wɔa nu ɖe eƒe ŋkɔ ŋu bubutɔe, eye ebua wo abe “eƒe ŋkuvi” ene. Eɖo ŋku esia dzi na Israel-viwo, eye wògblɔ alesi wòɖe wo tso Egipte hekplɔ wo to gbedzi dedie la na wo. (Mose V, 32:10, 12) Mawu tutɔ aɖeke menɔ wo dome ɣemaɣi o, elabena woa ŋutɔwo kpɔ alesi gbegbe woɖi gbɔ Egipte-mawuwo katãe. Ẽ, Egiptetɔwo ƒe mawuwo katã mete ŋu kpɔ Egipte ta alo xe mɔ na Israel ƒe dzodzo o. (Mose II, 12:12) Nenema ke Babilon sesẽ si alakpamawuwo ƒe gbedoxɔ 50 ya teti le eƒe dugã me la mate ŋu alé Ŋusẽkatãtɔ la ƒe asi ne ɣeyiɣia de be wòana ablɔɖe eƒe amewo o. Edze ƒã be ‘xɔnametɔ aɖeke meli kpe ɖe Yehowa ŋu o.’