Sidzedze Dɔla Nyuitɔwo

“Eya, amesi nana eƒe dɔlawo ƒe nya vaa me, eye wòwɔa eƒe ame dɔdɔ ƒe aɖaŋuɖoɖo dzi.”—YESAYA 44:26.

 1. Aleke Yehowa dea dzesi dɔla nyateƒetɔwoe, eye aleke wòkloa nu le aʋatsotɔwo ŋui?

YEHOWA MAWUE nye eƒe dɔla vavãwo ƒe Dzesidela Gãtɔ. Edea dzesi wo to alesi wònaa nya siwo wògblɔna toa wo dzi vaa emee la me. Yehowa nye dɔla alakpatɔwo Ðefiala Gãtɔ hã. Aleke wòkloa nu le wo ŋui? Meɖea mɔ woƒe dzesiwo kple nyagblɔɖiwo vaa eme o. Etoa mɔ sia dzi ɖenɛ fiana be wonye amesiwo ɖo wo ɖokui nyagblɔɖilawoe, amesiwo gblɔa woa ŋutɔwo ƒe alakpasusuwo—ẽ, woƒe bometsitsi ƒe ŋutilãmenukpɔsusu!

 2. Nyaʋiʋli kae dzɔ ɖe dɔlawo dome le Israel le blema?

² Yesaya kple Xezekiel siaa gblɔ be Yehowa Mawu ƒe dɔlawoe yewonye. Nyateƒeea? Mina míakpɔe ɖa. Yesaya gblɔ nya ɖi le Yerusalem anye tso ƒe 778 D.M.Ŋ. vaseɖe ɣeaɖeɣi le ƒe 732 D.M.Ŋ. megbe. Woɖe aboyo Xezekiel yi Babilon le ƒe 617 D.M.Ŋ. me. Egblɔ nya ɖi na nɔvia Yudatɔ siwo nɔ afima. Nyagblɔɖila eveawo ɖe gbeƒãe kalẽtɔe be woatsrɔ̃ Yerusalem. Nyagblɔɖila bubuwo hã gblɔ be Mawu mana esia nadzɔ o. Amekawoe va nye dɔla vavãtɔwo?

Yehowa Klo Nu le Aʋatsonyagblɔɖilawo Ŋu

3, 4. (a) Gbedasi eve siwo tsi tre ɖe wo nɔewo ŋu kawoe wogblɔ na Israel-viwo le Babilon, eye aleke Yehowa ɖe aʋatsodɔlawo ɖe goe? (b) Nukae Yehowa gblɔ be adzɔ ɖe aʋatsonyagblɔɖilawo dzi?

³ Esime Xezekiel nɔ Babilon la, wona wòkpɔ ŋutega le nusiwo nɔ edzi yim le Yerusalem-gbedoxɔa me ŋu. Ŋutsu 25 nɔ eƒe ɣedzeƒegbo nu. Amegã eve siwo nye Yaazanya kple Pelatya nɔ wo dome. Aleke Yehowa bu woe? Xezekiel 11:2, 3 ɖo eŋu be: “Amevi, ŋutsu siawo nye amesiwo le tame gbegblẽ ɖom, eye wole adaŋu vɔ̃ɖi dem le du sia me, woawoe le gbɔgblɔm be: Xɔtutu gbɔ metsɔ o.” Ŋutifafa ƒe dɔla dadala siawo nɔ gbɔgblɔm be, ‘Afɔku aɖeke mava Yerusalem dzi o. Míele xɔ geɖe gɔ̃ hã tu ge ɖe eme kpuie!’ Eyata Mawu gblɔ na Xezekiel be wòagblɔ nya ɖi atsɔ atsi tre ɖe nyagblɔɖila alakpatɔ siawo ŋu. Xezekiel gblɔ nusi dzɔ ɖe wo dometɔ ɖeka dzi na mí le ta 11 ƒe kpukpui 13 lia be: “Eye wòva me, esi mele nya gblɔm ɖi la, kasia Pelatya, Benaya vi la ku.” Ðewohĩ edzɔ alea le esi Pelatya nye amegã, ame ŋkuta si amewo buna, kple trɔ̃subɔla gãtɔ ta. Eƒe ku kpata la ɖee fia be aʋatsonyagblɔɖilae wònye!

⁴ Ku si Yehowa he va Pelatya dzi mena aʋatsonyagblɔɖila bubuawo dzudzɔ aʋatsokaka le Mawu ƒe ŋkɔ me o. Ameblela siawo yi woƒe nuwɔna vɔ̃ɖi si nye nya siwo tsi tre ɖe Mawu ƒe lɔlɔ̃nu ŋu gbɔgblɔ ɖi dzi. Eyata Yehowa Mawu gblɔ na Xezekiel be: “Baba na nyagblɔɖila tsibomewo, amesiwo dze woawo ŋutɔ ƒe dzi kple nusi womekpɔ o la yome!” Abe Pelatya ene la, ‘wo nu ayi’ le esi wokpɔa “ŋutifafaŋutega” le Yerusalem ŋu tsitretsiɖeŋutɔe, evɔ “ŋutifafa meli o hafi” ta.—Xezekiel 13:3, 15, 16.

5, 6. Togbɔ be aʋatsodɔlaawo nɔ anyi hã la, aleke wokɔ Yesaya ŋui be enye nyagblɔɖila nyateƒetɔ?

⁵ Le Yesaya gome la, Mawu ƒe gbedasi siwo katã wògblɔ ɖe Yerusalem ŋu la va eme. Le ƒe 607 D.M.Ŋ. ƒe dzomeŋɔli la, Babilontɔwo tsrɔ̃ dugã la eye wokplɔ Yudatɔ susɔeawo yi Babilon wozu aboyomewo. (Kronika II, 36:15-21; Xezekiel 22:28; Daniel 9:2) Ðe afɔku siawo na aʋatsonyagblɔɖilawo dzudzɔ toflokonyawo gbɔgblɔ ɖe Mawu ƒe amewo ŋua? Ao, dɔla alakpatɔ mawo yi egbɔgblɔ dzi!

⁶ Tsɔ kpe ɖe esia ŋu la, Babilon ƒe etsɔmegblɔɖilawo, afakalawo, kple ɣletivimefakala adegbeƒolawo hã ɖe kpe na Israel-vi aboyomeawo. Gake Yehowa ɖee fia be dɔla alakpatɔ siawo nye bometsila siwo tɔtɔ, amesiwo gblɔa nusi mava eme o ɖi. Eteƒe medidi o eɖee fia be Xezekiel nye yeƒe dɔla vavã, abe Yesaya ke ene. Yehowa na nya siwo katã wògblɔ to wo dzi la va eme, abe alesi tututu wògblɔ ɖi ene be: “Eya, amesi gblẽa nu kpoloe ƒolawo ƒe dzesi me, eye wòdoa bometsila afakalawo; eya, amesi nana nunyalawo gbugbɔna, eye wòdoa lã woƒe nunya; eya, amesi nana eƒe dɔlawo ƒe nya vaa me, eye wòwɔa eƒe ame dɔdɔ ƒe aɖaŋuɖoɖo dzi.”—Yesaya 44:25, 26.

Gbedasi Dovoɖinamewo Le Babilon Kple Yerusalem Ŋu

7, 8. Gbedasi si tso gbɔgbɔ me kae nɔ Yesaya si na Babilon, eye eƒe nyawo gɔme ɖe?

⁷ Wogblɔ be Yuda kple Yerusalem azu aƒedo eye ame aɖeke manɔ afima o ƒe 70. Gake Yehowa gblɔ to Yesaya kple Xezekiel dzi be woagbugbɔ dugã la atso eye amewo ava nɔ anyigba la dzi le ɣeyiɣi si tututu wòɖo ɖi dzi! Nyagblɔɖi wɔnukue esia nye. Nukatae? Elabena wonya Babilontɔwo be womenaa ablɔɖe woƒe gamenɔlawo gbeɖe o. (Yesaya 14:4, 15-17) Eyata amekae ate ŋu ana ablɔɖe aboyome siawo? Amekae ate ŋu amu Babilon-du sesẽ si ŋu gli nyadriwo le eye tɔsisiwo zu takpɔnu na? Yehowa Ŋusẽkatãtɔ lae! Eye egblɔe be yeawɔe hã: “[Nyee nye] amesi gblɔ na tɔ gɔme [si nye tsi siwo nye takpɔnu na dua] be, mie, eye mana wò tɔsisiwo naƒu kplakplakpla; . . . amesi gblɔ na Kores be: Nye lãkplɔvi nènye! Eyae awɔ nye didiwo katã ade goe, eye wòagblɔ na Yerusalem be, woatsoe, eye na gbedoxɔ be, woaɖo egɔme anyi!”—Yesaya 44:25, 27, 28.

⁸ Bu ema ŋu kpɔ! Frat Tɔsisi si nye mɔxenu gã aɖe na amegbetɔwo vavã la, nɔ na Yehowa abe tsi si ge toŋ ɖe nu xɔdzo dzi ene. Mɔxenu la amie enumake! Babilon amu. Togbɔ be ƒe 150 megbee woava dzi Persiatɔ Kores hã la, Yehowa na Yesaya gblɔ ɖi be fia sia ava xɔ Babilon eye aɖe gbe ana ablɔɖe Yudatɔ aboyomeawo be woatrɔ ayi aɖagbugbɔ atso Yerusalem eye woatu eƒe gbedoxɔa.

 9. Ameka ƒe ŋkɔe Yehowa yɔ be eyae yeazã atsɔ ahe to na Babilon?

⁹ Míekpɔ nyagblɔɖi sia le Yesaya 45:1-3 be: “Ale Yehowa gblɔ na Kores, eƒe amesiamina la, amesi ƒe nuɖusi melé, ne mafanya dukɔwo le eŋgɔ, . . . maʋu ʋɔwo le eŋku me, eye agbowo matsi dodo o la, enye si: Madze ŋgɔwò, eye mana kpoƒewo nasɔ, magbã akɔbligbowo, eye maŋe gametiwo, eye matsɔ kesinɔnu, si le blukɔ me, kple nu xɔasi, siwo woɣla la, ana wò, ne nadze sii be, nye Yehowa, Israel ƒe Mawu la, enye amesi tsɔ ŋkɔ yɔ wòe.”

10. Mɔ ka nue ‘wosi ami na’ Kores le, eye aleke Yehowa te ŋu ƒo nu nɛ ƒe alafa ɖeka kple edzivɔ do ŋgɔ na edzidzi?

¹⁰ De dzesii be Yehowa ƒo nu na Kores abe ɖe wòle agbe xoxo ene. Esia wɔ ɖeka kple nya si Paulo gblɔ be Yehowa “[yɔa] nusiwo meli o, abe nusiwo li la ene.” (Romatɔwo 4:17) Azɔ hã, Mawu yɔ Kores be enye ‘yeƒe amesiamina.’ Nukata wòyɔe nenema? Ne èbu eŋu kpɔ la, Yehowa ƒe nunɔlagã mekɔ ami kɔkɔe ɖe Kores ƒe tame tsɔ si ami nɛ gbeɖe o. Nyateƒee, gake amisisi le nyagblɔɖimɔ nue esia nye. Efia amexɔxɔ ɖe dɔ tɔxɛ aɖe me. Eyata Mawu ate ŋu agblɔ le eƒe Kores tiatia do ŋgɔ ŋu be enye amisisi nɛ.—Tsɔe sɔ kple Fiawo I, 19:15-17; Fiawo II, 8:13.

Mawu Na Eƒe Dɔlawo ƒe Nyawo Va Eme

11. Nukatae Babilon-nɔlawo susu be yewole dedie?

¹¹ Esime Kores ho ɖe Babilon ŋu la, emenɔlawo bu be yewole dedie ŋutɔ eye be womate ŋu aɖu yewo dzi gbeɖe o. Ʋe gã globo si me Frat Tɔsisia to la ƒo xlã dugã la wòzu etakpɔnu. Wotu ʋudzeƒe legbewo ɖe tɔsisia ƒe ɣedzeƒego dzi le afisi wòto dua me le. Nebukadnezar ɖo nusi wòyɔ be “gli gã, si womate ŋu aho o abe to ene” tsɔ mã wo kple dua mee. “[Eɖoe] wòkɔkɔ abe to ene.”a Agbo siwo nu akɔbliʋɔtru gãwo le la nɔ gli sia ŋu. Tɔgo ɖiabu la koe woalia hafi ate ŋu age ɖe eme. Eyata mewɔ nuku o be mɔkpɔkpɔ menɔ Babilon-gamenɔlawo si be woana ablɔɖe yewo gbaɖegbe o!

12, 13. Aleke Yehowa ƒe nya siwo wògblɔ to eƒe dɔla Yesaya dzi va emee esime Kores xɔ Babilon?

¹² Gake menɔ nenema le Yudatɔ aboyome siwo xɔ Yehowa dzi se la gome o! Mɔkpɔkpɔ nyui aɖe nɔ wo si. Mawu do ŋugbe to eƒe nyagblɔɖilawo dzi be yeaɖe wo. Aleke Mawu wɔ na eƒe ŋugbedodoa va eme? Kores na eƒe asrafowo trɔ Frat Tɔsisia ƒe tsimɔ to teƒe bubu le afisi didi tso Babilon ƒe dziehe gome agbadroƒe geɖe. Eyata dugã la ƒe takpɔnu vevitɔ va zu tɔʋu ƒuƒui le mɔ aɖe nu. Le zã vevi ma me la, ahatsunola aglotula siwo le Babilon la ɖe ŋu ɖi gblẽ ʋɔtru agavee si le Frat-tɔsisia to ɖi wònɔ ʋuʋu. Yehowa megbã akɔbliʋɔtruawo kakɛkakɛ ŋutɔŋutɔ o; eye meŋe gayibɔ si wotsɔ tua woe hã o, gake alesi wòto nukumɔ dzi na wonɔ ʋuʋu ɖi eye womede ga wo me o la na nusi ado tso eme la dzɔ. Babilon-gliwo zu nu maɖinuwo. Mehiã be Kores ƒe asrafowo nalia wo hafi age ɖe eme o. Yehowa dze ŋgɔ na Kores wòna “kpoƒewo” sɔ, ẽ, eɖu mɔxenu ɖesiaɖe dzi. Wona Yesaya zu Mawu ƒe dɔla nyateƒetɔ.

¹³ Esi Kores xɔ dua keŋkeŋ vɔ la, eme nu xɔasiwo katã, kple esiwo katã ɣla ɖe xɔ dovivitiwo me, va zu Kores tɔ. Nukata Yehowa Mawu wɔ nusia na Kores? Be wòanya be Yehowa, ‘amesi tsɔ eƒe ŋkɔ yɔ eyama’ la nye nyagblɔɖi vavã ƒe Mawu kple xexeame katã ƒe Aƒetɔ Fiagã. Anya be Mawue wɔ ɖoɖo be wòava ɖu dzi ana ablɔɖe Eƒe dukɔ, Israel.

14, 15. Aleke míewɔ nya be Yehowae na Kores ɖu Babilon dzi?

¹⁴ Se nya si Yehowa gblɔ na Kores ɖa: “Le nye dɔla Yakob kple nye ame tiatia Israel ta; metsɔ wò ŋkɔ yɔ wò, eye metsɔ bubuŋkɔ na wò, esi mèkpɔ dze sim haɖe o. Nyee nye Yehowa, ɖeke megali o; mawu aɖeke mekpe ɖe ŋunye o; mebla ali dzi na wò, esi mèkpɔ dze sim haɖe o, ne woadze sii tso ɣedzeƒe kple ɣetoɖoƒe be, ame aɖeke mekpe ɖe ŋunye o. Nyee nye Yehowa, ɖeke megali o, nye amesi ɖo kekeli, eye mewɔ viviti, amesi wɔ dzɔgbenyui [na eƒe ame siwo woɖe aboyoe], eye mehe dzɔgbevɔ̃e [va Babilon dzi.] Nye Yehowa ye wɔ nusiawo katã!”—Yesaya 45:4-7.

¹⁵ Yehowa ye na Kores te ŋu ɖu Babilon dzi, elabena Eyae do ŋusẽe be wòawɔ Eƒe lɔlɔ̃nu ɖe dugã vɔ̃ɖi ma ŋu eye wòana ablɔɖe Eƒe dukɔ aboyomeawo. Le esia wɔwɔ me la, Mawu na eƒe dziƒowo ɖuɖu ŋusẽkpɔɖeamedzi alo ŋusẽ dzɔdzɔewo ɖi. Ena Eƒe anyigba la ʋu mɔ ɖi be nudzɔdzɔ dzɔdzɔewo nadzɔ eye xɔname nava na eƒe dukɔ si le aboyo me. Eye eƒe kpɔɖeŋu dziƒowo kple anyigba wɔ ɖe sedede sia dzi. (Yesaya 45:8) Le Yesaya ƒe ku megbe ƒe alafa ɖeka kple edzivɔ la, woɖee fia be enye Yehowa ƒe dɔla nyateƒetɔ!

Dɔla la ƒe Nyanyui na Zion!

16. Nyanyui kae woate ŋu aɖe gbeƒãe le Yerusalem-dugã si zu aƒedo la me esime woɖu Babilon dzi?

¹⁶ Gake nu geɖe gali. Yesaya 52:7 ƒo nu tso nyanyui aɖe ŋu na Yerusalem be: “Du nyui xɔla ƒe afɔwo nyo le towo dzi loo! Eya, amesi ɖea gbeƒã ŋutifafa, eye wòtoa gbe nyui, eɖea gbeƒã xɔname, eye wòle gbɔgblɔm na Zion be: Wò Mawu enye fia!” Kpɔ alesi gbegbe wòanye dzidzɔ be woakpɔ dɔla aɖe wòaɖi tso towo dzi gbɔna Yerusalem ɖa! Nya aɖewo anɔ esi. Nya kawoe wòanye? Enye nya dodzidzɔnamewo na Zion. Ŋutifafanyae, ẽ, Mawu ƒe nyuidiname ŋuti nyae. Woagbugbɔ atso Yerusalem eye woatu eƒe gbedoxɔa! Eye dɔla la tsɔ dzidzɔgbe gblɔe aʋadziɖuɖutɔe be: “Wò Mawu enye fia!”

17, 18. Ŋusẽ kae Kores ƒe Babilon dzi ɖuɖu kpɔ ɖe Yehowa ƒe ŋkɔ dzi?

¹⁷ Esime Yehowa ɖe mɔ Babilontɔwo mu eƒe kpɔɖeŋufiazikpui si dzi fia siwo do tso Dawid ƒe ƒomea me nɔ la, adze abe ɖe Eyama meganye Fia o ene. Edze abe Marduk si nye Babilon-mawu gãtɔ la boŋ ye nye fia ene. Gake esime Zion ƒe Mawu mu Babilon la, eɖe eƒe xexeame katã ƒe fiagãnyenye fia—be Fia gãtɔ kekeakee yenye. Eye be wòatsɔ aɖo kpe nyateƒenya ma dzi la, woagatso Yerusalem si nye ‘Fia gã la ƒe du la’ kple eƒe gbedoxɔa. (Mateo 5:35) Le dɔla si he du nyui sia vɛ gome la, togbɔ be ʋuʋudedi yɔ eƒe afɔwo ŋu, eƒo ɖi, eye nuwo de abi eŋu hã, le Zion kple eƒe Mawu lɔ̃lawo ŋkume ya la, wonya kpɔ ale gbegbe!

¹⁸ Le nyagblɔɖi ƒe gɔmesese nu la, Babilon ƒe mumu fia be woɖo Mawu ƒe Fiaɖuƒea anyi eye dunyuixɔla la nye nyateƒenya ma ŋuti gbeƒãɖela. Tsɔ kpe ɖe eŋu la, blemadɔtsɔla sia, si ŋu nya wogblɔ ɖi to Yesaya dzi la, nye kpɔɖeŋu na nyanyui gãtɔ ƒe dɔla—enye gãtɔ le emenyawo ƒe vevienyenye kple Fiaɖuƒea si nye eƒe tanya la ta, eye nu nyui geɖe le eme na xɔsetɔwo katã.

19. Israel-nyigba ŋuti gbedasi kae Yehowa gblɔ to Xezekiel dzi?

¹⁹ Wona Xezekiel hã gblɔ gbugbɔɖoanyi ŋuti nya ɖedzesiwo ɖi. Egblɔe ɖi be: “Ale Aƒetɔ Yehowa gblɔ esi: . . . mana ame nanɔ duawo me, eye woagaɖo gli gbagbãwo. Eye woagblɔ bena: ‘Anyigba, si nye gbegbe tsã la, zu abe Eden-bɔ ene.’ ”—Xezekiel 36:33, 35.

20. Dzidzɔ kple dzideƒonya kae Yesaya gblɔ ɖi na Yerusalem?

²⁰ Mawu ƒe amewo fa avi ɖe Zion ta esime wonɔ aboyo me le Babilon. (Psalmo 137:1) Fifia woate ŋu akpɔ dzidzɔ. Yesaya de dzi ƒo na wo be: “Mi Yerusalem ƒe aƒedowo, mido aƒa, mitso aseye yoo; elabena Yehowa fa akɔ na eƒe dukɔ, eye wòɖe Yerusalem! Yehowa klo nu le eƒe alɔ kɔkɔe la ŋu le dukɔwo katã ŋku me, eye anyigba ƒe mlɔenuwo katã akpɔ mía Mawu ƒe xɔname.”—Yesaya 52:9, 10.

21. Aleke Yesaya 52:9, 10 me nyawo va emee le Babilon ƒe tsɔtsrɔ̃ megbe?

²¹ Ẽ, Yehowa ƒe ame tiatiawo tɔ dzɔ ŋutɔ be woakpɔ dzidzɔ. Fifia woagava nɔ afisi zu aƒedo tsã la, eye woana teƒea nazu abe Eden-bɔ ene. Yehowa “klo nu le eƒe alɔ kɔkɔe la ŋu” na wo. Eŋlɔ eƒe awu ƒe abɔ yi dzi le kpɔɖeŋumɔ nu, ale be wòate ŋu ana woatrɔ va wo denyigba lɔlɔ̃a dzi. Esia menye ŋutinya me nudzɔdzɔ sue aɖe si dzɔ le bebeme o. Ao, amesiwo katã nɔ agbe ɣemaɣi kpɔ Mawu ƒe ‘abɔ si ŋu wòklo nu le’ si kpɔ ŋusẽ ɖe amegbetɔ ƒe nyawo dzi ale be wòna dukɔ aɖe kpɔ ɖeɖe si ɖe dzesi. Wona wokpɔ kpeɖodzi si womate ŋu ake ɖii o be Yesaya kple Xezekiel nye Yehowa ƒe dɔla vavãwo nyateƒe. Ame aɖeke mate ŋu ake ɖii o be Zion ƒe Mawu la koe nye nyateƒe Mawu gbagbe la le anyigba katã dzi. Míexlẽ le Yesaya 35:2 be: “Woakpɔ Yehowa ƒe ŋutikɔkɔe kple mía Mawu ƒe atsyɔ̃.” Amesiwo xɔ Yehowa ƒe Mawunyenye ŋuti kpeɖodzi sia la va de ta agu nɛ.

22. (a) Nuka tae mí amesiwo li egbea míada akpe ɖo? (b) Nukata wòle be míada akpe vevie wu be Yehowa kloa nu le aʋatsodɔlawo ŋu?

²² Aleke gbegbe wòle be míada akpee nye si be Yehowa dea dzesi eƒe dɔla vavãwo! Vavãe, eyae nye “amesi nana eƒe dɔlawo ƒe nya vaa me, eye wòwɔa eƒe ame dɔdɔ ƒe aɖaŋuɖoɖo dzi.” (Yesaya 44:26) Gbugbɔɖoanyi ŋuti nyagblɔɖi siwo wòna Yesaya kple Xezekiel la ɖe eƒe lɔlɔ̃, amenuveve, kple nublanuikpɔkpɔ na esubɔlawo fia. Nyateƒee, Yehowa dze na míaƒe kafukafu ɖesiaɖe ɖe esia ta! Eye ele be mí amesiwo li egbea míada akpe vevie wu be ekloa nu le dɔla alakpatɔwo ŋu. Ele alea elabena wobɔ ɖe xexeame fũ fifia. Woƒe gbedasi vivivoawo medea bubu Yehowa ƒe tameɖoɖo siwo wòɖe gbeƒãe ŋu o. Nyati si kplɔe ɖo akpe ɖe mía ŋu míade dzesi dɔla aʋatsotɔ mawo.

[Etenuŋɔŋlɔ]

Àte Ŋu Aɖe Wo Mea?

◻ Aleke Yehowa dea dzesi eƒe dɔla nyateƒetɔwoe?

◻ Ameka ƒe ŋkɔe Yehowa yɔ to Yesaya dzi be eyae yeazã atsɔ aɖu Babilon dzi?

◻ Aleke nya siwo Yesaya gblɔ ɖi tso Babilon dzi ɖuɖu ŋu va emee?

◻ Nu nyui kae Babilon dzi ɖuɖu he va Yehowa ƒe ŋkɔ dzi?

[Nɔnɔmetata si le axa 9]

Xezekiel ŋɔli me dukɔwo bu be womate ŋu aɖu Babilon dzi o