Ta Wuienelia
Yehowa Do Eƒe Dɔla Mesia la Ðe Dzi
1, 2. (a) Wɔ nɔnɔme si dze ŋgɔ Yudatɔ geɖe le ƒe alafa gbãtɔ M.Ŋ. ƒe gɔmedzedze la ƒe kpɔɖeŋu. (b) Ðoɖo kae Yehowa wɔ be wòakpe ɖe Yudatɔ wɔnuteƒewo ŋu be woadze si Mesia la?
TSƆE be ele be nàdo go ame vevi aɖe. Woɖo ɣeyiɣi kple teƒe si miado go le. Gake kuxi aɖe li: Mènya amea ƒe dzedzeme o, gake ava dzaa hoowɔwɔ aɖeke manɔmee. Aleke nàwɔ akpɔe adze sii? Akpe ɖe ŋuwò ne woɖɔ amea na wò nyuie.
2 Nɔnɔme sia tɔgbee dze ŋgɔ Yudatɔ geɖe le ƒe alafa gbãtɔ M.Ŋ. ƒe gɔmedzedze. Wonɔ mɔ kpɔm na Mesia—si nye ame vevitɔ kekeake si anɔ anyi kpɔ. (Daniel 9:24-27; Luka 3:15) Gake aleke Yudatɔ nuteƒewɔlawo awɔ adze sii? Yehowa to Hebritɔ nyagblɔɖilawo dzi gblɔ nusiwo adzɔ ku ɖe Mesia la ŋu si akpe ɖe nugɔmeselawo ŋu woakpɔe dze sii vodadamanɔmee la ɖi tsitotsito.
3. Aleke woƒo nu tso Mesia la ŋui le Yesaya 52:13–53:12?
3 Le Hebri Ŋɔŋlɔawo me nyagblɔɖi siwo ku ɖe Mesia la ŋu me la, ɖewohĩ ɖeke meɖɔe nyuie wòde esi woŋlɔ ɖe Yesaya 52:13–53:12 la nu o. Menye Mesia la ƒe ŋutilãmedzedzemee Yesaya ɖɔ ƒe 700 kple edzivɔ do ŋgɔ o, ke boŋ egblɔ nya siwo ɖe dzesi wu ema—taɖodzinu si le eƒe fukpekpe ŋu kple alesi wòakpe fui kpakple nya siwo ku ɖe eƒe ku, eɖiɖi, kple edodoɖedzi ŋu. Nyagblɔɖi sia kple emevava me dzodzro ado dzidzɔ na mí eye wòado ŋusẽ míaƒe xɔse.
“Nye Dɔla”—Amekae Wònye?
4. Susu kawoe Yudatɔ agbalẽnyalawo do ɖa le amesi “dɔla” la nye ŋu, gake nukata nya siawo mesɔ ɖe Yesaya ƒe nyagblɔɖia nu o?
4 Ðeko Yesaya ƒo nu tso Yudatɔwo ƒe ablɔɖekpɔkpɔ tso aboyo me le Babilon ŋu vɔ koe nye sia. Azɔ esi wòkpɔ nane si lolo wu sã si ava dzɔ la, eŋlɔ Yehowa ƒe nyawo ɖi be: “Kpɔ ɖa, nye dɔla awɔ nu [le nugɔmesese, “NW”] me, woadoe ɖe dzi, axɔ ŋkɔ, eye wòaɖo kpo ŋutɔ.” (Yesaya 52:13) Ameka koŋue nye “dɔla” sia? Le ƒe alafaawo me la, Yudatɔ agbalẽnyalawo gblɔ woƒe susu vovovowo. Ame aɖewo gblɔ be etsi tre ɖi na Israel-dukɔ bliboa esime wonɔ aboyo me le Babilon. Gake numeɖeɖe siawo mesɔ ɖe nyagblɔɖia nu o. Mawu ƒe Dɔla la ŋutɔe lɔ̃ be yeakpe fua. Togbɔ be meɖi fɔ o hã la, ekpe fu ɖe ame bubuwo ƒe nuvɔ̃ ta. Esia mate ŋu aku ɖe Yuda-dukɔ si yi aboyo me ɖe eƒe mɔ vɔ̃wo ta la ŋu kura o. (Fiawo II, 21:11-15; Yeremya 25:8-11) Ame aɖewo gblɔ be Dɔla la tsi tre ɖi na ame ŋkuta siwo bua wo ɖokui ame dzɔdzɔewoe le Israel eye be amesiawo kpe fu ɖe Israel-vi wɔnuvɔ̃wo ta. Gake ƒuƒoƒo tɔxɛ aɖeke mekpe fu ɖe ame bubuwo ta le Israel ƒe xaxaɣiwo o.
5. (a) Ameka ŋue Yudatɔ agbalẽnyala aɖewo tsɔ Yesaya ƒe nyagblɔɖia ku ɖo? (Kpɔ etenuŋɔŋlɔa.) (b) Aleke wona amesi Dɔla la nye dze ƒãe le Biblia-gbalẽ si nye Dɔwɔwɔwo me?
5 Do ŋgɔ na Kristotɔnyenye ƒe vava kple le Mía Ŋɔli me ƒe alafa gbãtɔwo ƒe akpa aɖewo me la, Yudatɔ agbalẽnyala ʋɛ aɖewo tsɔ nyagblɔɖi sia ku ɖe Mesia la ŋu. Nya si dze le Kristotɔwo ƒe Hela Ŋɔŋlɔawo me ɖee fia be amesia ŋue wòku ɖo nyateƒe. Dɔwɔwɔwo ƒe agbalẽa ka nya ta be esi Etiopiatɔ aƒedzikpɔla la gblɔ be yemenya amesi Dɔla si ŋu woƒo nu tsoe le Yesaya ƒe nyagblɔɖia me nye o la, Filipo ‘gblɔ Yesu ŋu nyanyui la fiae.’ (Dɔwɔwɔwo 8:26-40; Yesaya 53:7, 8) Biblia-gbalẽ bubuwo hã gblɔ nenema ke be Yesu Kristoe nye Mesia si nye Dɔla si ŋu Yesaya ƒe nyagblɔɖia ƒo nu tsoe.a Ne míele nyagblɔɖi sia me dzrom la, míakpɔe be amesi Yehowa yɔ be “nye dɔla” la ƒe nɔnɔme sɔ kple Yesu Nazaretetɔ la ɖikekemanɔmee.
6. Aleke Yesaya ƒe nyagblɔɖia ɖee fiae be Mesia la akpɔ dzidzedze le Mawu ƒe lɔlɔ̃nu wɔwɔ me?
6 Woƒo nu tso dzidzedze si Mesia la akpɔ mlɔeba le Mawu ƒe lɔlɔ̃nu wɔwɔ me ŋu tsɔ dze nyagblɔɖia gɔmee. Nya “dɔla” fia be abɔbɔ eɖokui ɖe Mawu te awɔ eƒe lɔlɔ̃nu, abe alesi dɔla wɔa eƒe aƒetɔ ƒe lɔlɔ̃nu ene. Ne ele esia wɔm la, “awɔ nu le nugɔmesese me.” Nugɔmesese si wozã le afisiae nye ŋutete si wotsɔ dea vovototo nu mee. Nuwɔwɔ le nugɔmesese me fia be woawɔ nu aɖaŋutɔe. Numekugbalẽ aɖe gblɔ le Hebrigbe me dɔwɔnya si wozã le afisia ŋu be: “Susu si dze le emee nye aɖaŋudzedze kple nuwɔwɔ le nunya me. Amesi wɔa nu le nunya me akpɔ dzidzedze.” Nyateƒe si wònye be Mesia la akpɔ dzidzedze la dze le nyagblɔɖia me, esi wogblɔ be “axɔ ŋkɔ, eye wòaɖo kpo ŋutɔ.”
7. Aleke Yesu Kristo ‘wɔ nu le nugɔmesese mee,’ eye aleke ‘wòxɔ ŋkɔ heɖo kpo ŋutɔ’?
7 Yesu ‘wɔ nu le nugɔmesese me’ nyateƒe, eye eɖee fia be yese Biblia me nyagblɔɖi siwo ku ɖe eyama ŋu la gɔme eye wofia mɔe le Fofoa ƒe lɔlɔ̃nu wɔwɔ me. (Yohanes 17:4; 19:30) Nukae do tso eme? Le Yesu ƒe tsitretsitsi kple dziƒoyiyi megbe la, “Mawu do eyama ɖe dzi kakaka, eye wòtsɔ ŋkɔ, si ƒo ŋkɔ sia ŋkɔ ta la kee.” (Filipitɔwo 2:9; Dɔwɔwɔwo 2:34-36) Azɔ le ƒe 1914 me la, wogado Yesu si wodo ŋutikɔkɔe na la ɖe dzi wu. Yehowa doe ɖe dzi hetsɔe ɖo Mesia Fiaɖuƒea ƒe fiazikpuia dzi. (Nyaɖeɖefia 12:1-5) Ẽ, ‘exɔ ŋkɔ heɖo kpo ŋutɔ.’
‘Amewo ƒe Nu Aku ɖe Eŋu’
8, 9. Ne Yesu si wodo ɖe dzi va be yeahe ʋɔnudɔdrɔ̃ va amewo dzi la, aleke anyigba dzi dziɖulawo awɔ nui, eye nukata?
8 Aleke dukɔwo kple wo dziɖulawo awɔ nu ɖe Mesia si wodo ɖe dzi la ŋui? Ne míegblẽ nya si wogblɔ tsɔ ɖe nu mee le kpukpui 14 lia ƒe akpa evelia ɖi vie gbɔ la, nyagblɔɖia axlẽ be: “Alesi ame geɖewo ƒe nu ku ɖe ŋuwò . . . la, nenema wòana dukɔ geɖewo ƒe nu naku, eye fiawo ƒe nu ade ga le eta, elabena nusi womegblɔ na wo kpɔ o la, wokpɔ, eye nusi womese kpɔ o la, wodze sii.” (Yesaya 52:14a, 15) Yesaya gblɔ nya siawo, menye le Mesia la ƒe dodo zi gbãtɔ ŋu o, ke le alesi wòado go kple anyigba dzi dziɖulawo zi mamlɛtɔ ŋu boŋ.
9 Ne Yesu si wodo ɖe dzi va be yeahe ʋɔnudɔdrɔ̃ ava nuɖoanyi mavɔ̃mawu sia dzi la, anyigba dzi dziɖulawo ‘ƒe nu aku ɖe eŋu.’ Enye nyateƒe be dziɖula siwo nye amegbetɔwo makpɔ Yesu si wodo ŋutikɔkɔe na la kple ŋku ya o. Gake woakpɔ Yehowa ƒe Aʋawɔla ma si le dziƒo ƒe ŋusẽ ƒe kpeɖodziwo. (Mateo 24:30) Woazi wo dzi woƒe susu nava nya si subɔsubɔhakplɔlawo megblɔ wose kpɔ o la dzi—be Yesue nye Amesi ahe Mawu ƒe ʋɔnudɔdrɔ̃wo ava amewo dzii! Dɔla si wodo ɖe dzi si woakpɔ la awɔ nu le mɔ si womekpɔ mɔ na o nu.
10, 11. Mɔ ka nue míate ŋu agblɔe le be wogblẽ Yesu ƒe nɔnɔme le ƒe alafa gbãtɔ me, eye aleke wowɔa esia egbeae?
10 Numeɖenya si Yesaya gblɔ le kpukpui 14 lia mee nye be: “Eƒe nɔnɔme vlo wu amegbetɔwo tɔ, eye eƒe kpɔkpɔme vlo wu amegbetɔviwo tɔ.” (Yesaya 52:14b) Ðe Yesu ƒe ŋutilãmedzedzeme vlo le mɔ aɖe nua? Ao. Togbɔ be Biblia megblɔ alesi Yesu ƒe dzedzeme nɔ o hã la, ɖikeke mele eme o be Mawu ƒe Vi deblibo la ƒe dzedzeme nyo eye wòdze ɖeka. Anɔ eme be alesi woɖi gbɔ Yesu ŋue Yesaya ƒe nyaawo ku ɖo. Eklo nu le eƒe ŋkekea me subɔsubɔhakplɔlawo ŋu dzideƒotɔe be wonye alakpanuwɔlawo, aʋatsokalawo, kple amewulawo; eye woawo hã do vloe. (Petro I, 2:22, 23) Wotso enu be enye sedzidala, busunyagblɔla, ameflula, kple amesi dze aglã ɖe Roma ŋu. Alea wòdzɔe be amenutsola alakpatɔ siawo tɔtɔ nɔnɔme si nɔ Yesu si keŋkeŋ.
11 Egbea amewo yia edzi tɔtɔa nɔnɔme si le Yesu si. Ame akpa gãtɔ buna be Yesu nye vidzĩ si le lãnuɖunu me alo abe nublanuitɔ si woklã ɖe atitsoga ŋu, amesi vevesese dze le mo na eye woɖɔ ŋutsihe na ene. Kristodukɔa ƒe osɔfowoe na nukpɔsusu siawo le amewo si. Womeƒoa nu tso Yesu ŋu be enye Dziƒofia sẽŋu si dukɔwo abu akɔnta na o. Ne dziɖula siwo nye amegbetɔwo kpe kple Yesu si wodo ɖe dzi le etsɔme si gbɔna kpuie la, woanya be Mesia si tɔe nye “ŋusẽ katã, si le dziƒo kple anyigba” lae yewodo goe!—Mateo 28:18.
Amekae Axɔ Nyanyui Sia Dzi Ase?
12. Biabia vevi kawoe nya siwo le Yesaya 53:1 fɔ ɖe te?
12 Esi Yesaya ƒo nu tso alesi Mesia la ƒe nɔnɔme trɔ nukutɔe—tso “nɔnɔme vlo” me va zu amesi ‘ɖo kpo ŋutɔ’—ŋu vɔ la, ebia be: “Amekae xɔ nya, siwo wogblɔ na mí la dzi se, eye ameka ŋue Yehowa ƒe alɔ ɖe eɖokui fia ɖo?” (Yesaya 53:1) Yesaya ƒe nya siawo fɔ biabia vevi aɖewo ɖe te: Ðe nyagblɔɖi sia ava emea? Ðe “Yehowa ƒe alɔ,” si tsi tre ɖi na ŋusẽ zazã ƒe ŋutete si le esi la adze eye wòana nya siawo nava emea?
13. Aleke Paulo ɖee fia be Yesaya ƒe nyagblɔɖia va eme ɖe Yesu dzi, eye aleke amewo xɔ nya lae?
13 Ðikeke mele eme o be ava eme nenema! Le lɛta si Paulo ŋlɔ na Romatɔwo me la, eyɔ Yesaya ƒe nyawo tsɔ fia be nyagblɔɖi si Yesaya se eye wòŋlɔ ɖi la va eme ɖe Yesu dzi. Ŋutikɔkɔe si wodo na Yesu le eƒe fukpekpe le anyigba dzi megbe la nye nyanyui. Paulo he susu yi Yudatɔ dzimaxɔsetɔwo dzi gblɔ be: “Gake la menye wo katãe ɖoa to nyanyui la o; elabena Yesaya gblɔ bena: ‘Aƒetɔ, amekae xɔ míaƒe nyagbɔgblɔ dzi se mahã?’ Ekema xɔse la tso nyagbɔgblɔ me, hafi nyagbɔgblɔ la tsoa Mawu ƒe nya me vana.” (Romatɔwo 10:16, 17) Gake nublanuitɔe la, ame ʋɛ aɖewo koe xɔ nyanyui si ku ɖe Mawu ƒe Dɔla la ŋu dzi se le Paulo ƒe ŋkekea me. Nukatae?
14, 15. Nɔnɔme ka mee Mesia la ava anyigba dzi le?
14 Azɔ nyagblɔɖia ɖe nusita wobia nya siwo le kpukpui 1 la me na Israel-viwo, eye esia na nusita ame geɖe maxɔ Mesia la o me va kɔ: “Edzè abe atilɔ fẽ ene le [eteƒekpɔla ŋkume], eye abe ke ƒe dzedzè tso anyigba ƒuƒu me ene. Nɔnɔme kple ɖekadzedze mele eŋu, ne míaɖe ŋku ɖee o, eye kpɔkpɔme mele eŋu, ne eƒe nu nadzro mí o.” (Yesaya 53:2) Míekpɔ nɔnɔme si me Mesia la ato ava anyigba dzi la le afisia. Adze ame tsɛ le gɔmedzedzea me, eye eteƒekpɔlawo mabui be ava zu ame ɖedzesi aɖeke o. Tsɔ kpe ɖe eŋu la, anɔ abe atilɔ fẽ si dze ɖe atia ƒe kpeme alo eƒe alɔ ŋu ene. Azɔ hã, anɔ abe ati ƒe ke si hiãna tsi le anyigba ƒuƒu sesẽ me ene. Eye fia ƒe nɔnɔme kple atsyɔ̃ manɔ eŋu o—fiawu loo alo fiakuku dadzo aɖeke manɔ esi o. Ke boŋ anye ame tsɛ maɖoatsyɔ̃ le gɔmedzedzea me.
15 Aleke nya mawo ɖɔ Yesu ƒe amegbetɔgbenɔnɔ ƒe gɔmedzedze wòsɔ ale! Yudatɔ ɖetugbi nɔaƒe Maria ye dzii ɖe lãkpo me le du sue aɖe si woyɔna be Betlexem me.b (Luka 2:7; Yohanes 7:42) Maria kple srɔ̃a Yosef nye ame dahewo. Anɔ ŋkeke 40 le Yesu dzidzi megbe la, wotsɔ nuvɔ̃vɔsa si ŋu woɖe mɔ ɖo na ame dahewo vɛ, si nye “akpakpa eve alo ahɔ̃nevi eve.” (Luka 2:24; Mose III, 12:6-8) Le ɣeyiɣi aɖe megbe la, Maria kple Yosef ʋu va nɔ Nazaret, afisi Yesu tsi le ƒome gã aɖe me le, eye anɔ eme be nu boo aɖeke menɔ wo si o.—Mateo 13:55, 56.
16. Aleke wònye nyateƒee be “nɔnɔme” alo “ɖekadzedze” menɔ Yesu si o?
16 Edze abe esime Yesu nye amegbetɔ la, eƒe ke medze ɖe anyigba nyuitɔ dzi o ene. (Yohanes 1:46; 7:41, 52) Togbɔ be enye ame deblibo kple Fia Dawid ƒe dzidzimevi hã la, nɔnɔme madeamedzi si me wòva nɔ wɔe be ‘nɔnɔme tɔxɛ’ alo “ɖekadzedze” medze le eŋu o—ne mede ɖeke o hã nenemae amesiwo nɔ mɔ kpɔm be Mesia la ado tso ƒome xɔŋkɔ aɖe me la bui. Ame geɖe siwo Yuda-subɔsubɔhakplɔlawo de dzi ƒo na mebui ɖe naneke me o eye wodo vloe gɔ̃ hã. Nusi va do tso emee nye be amehaawo mekpɔ nu dzeameŋu aɖeke le Mawu ƒe Vi deblibo la ŋu o.—Mateo 27:11-26.
‘Amegbetɔwo Do Vloe Hegbee’
17. (a) Nuka ŋue Yesaya va le nu ƒom tsoe, eye nukata wòŋlɔ nyawo abe ɖe wodzɔ va yi ene? (b) Amekawoe ‘do vlo’ Yesu ‘hegbee,’ eye aleke wowɔe?
17 Azɔ Yesaya dze egɔme ƒo nu tso alesi amewo abu Mesia la ahawɔ nu ɖe eŋui ŋu tsitotsito be: “Amegbetɔwo do vloe, eye wogbee, ŋutsu kpehiã kple amesi dzi dɔléle le la wònye, wodo vloe abe amesi ta wotsyɔ nu ŋku me ɖo la ene, eye míebui ɖe naneke me o.” (Yesaya 53:3) Esi Yesaya ka ɖe edzi be yeƒe nyaawo ava eme ta la, eŋlɔe wònye nusi dzɔ va yi, abe ɖe wova eme xoxo ene. Ðe amewo do vlo Yesu Kristo hegbee nyateƒea? Ẽ, eva me nenema! Subɔsubɔhakplɔla siwo bua wo ɖokui ame dzɔdzɔewoe la kple wo yomedzelawo bui amegbetɔ si vloe wu ɖesiaɖe. Woyɔe be nudzɔlawo kple gbolowo xɔlɔ̃. (Luka 7:34, 37-39) Woɖe ta ɖe mo nɛ. Wotu kɔe hedzui. Woɖu fewu heɖe alɔme le eŋu. (Mateo 26:67) Yesu “ŋutɔ tɔwo mexɔe o” le esi nyateƒea ƒe futɔ siawo kpɔ ŋusẽ ɖe wo dzi ta.—Yohanes 1:10, 11.
18. Esi Yesu medze dɔ kpɔ o ta la, aleke wònye “ŋutsu kpehiã kple amesi dzi dɔléle le”?
18 Esi Yesu nye ame deblibo ta la, medze dɔ o. Ke hã enye “ŋutsu kpehiã kple amesi dzi dɔléle le.” Menye eya ŋutɔ ŋue hiãkame kple dɔléle siawo nɔ o. Yesu tso dziƒo va xexe si le dɔ lém me. Afisi fukpekpe kple vevesese le ye wònɔ, gake meƒo asa na amesiwo dze dɔ o, ne dɔlélea ɖanye ŋutilã me tɔ alo gbɔgbɔ me tɔ o. Enya amesiwo dome wòle ƒe fukpekpe nyuie abe atikewɔla si léa be na ame ene. Azɔ hã ete ŋu wɔ nusi atikewɔla si nye amegbetɔ dzro ko mate ŋu awɔ o.—Luka 5:27-32.
19. Ameka ƒe ŋkumee ‘wotsyɔ nui,’ eye aleke Yesu ƒe futɔwo ɖee fiae be ‘yewomebui ɖe naneke me o’?
19 Gake Yesu ƒe futɔwo bu eyama dɔnɔe eye wogbe ŋudzedzekpɔkpɔ ɖe eŋu. “Wotsyɔ nu” ŋkume nɛ gake menye ɖe wòɣla eƒe ŋkume ɖe amewo tae o. Esi wonɔ Yesaya 53:3 gɔme ɖem ɖe The New English Bible me la, wozã nyagbɔgblɔ “nusi ŋu amewo ɖea ŋku le.” Amesiwo tsi tre ɖe Yesu ŋu nyɔ ŋui ale gbegbe be wote ɖa le eŋu abe ɖe ekpɔkpɔ nyɔ ŋu akpa ene. Wobu eya kple kluviwo ɖe tasɔsɔ me. (Mose II, 21:32; Mateo 26:14-16) Wode bubu amewula Baraba ŋu wu eyama. (Luka 23:18-25) Nukae woagate ŋu awɔ atsɔ ɖe alesi wobu Yesu ame tsɛe la afia wu esia?
20. Akɔfafa kae Yesaya ƒe nyawo nye na Yehowa ƒe amewo egbea?
20 Yehowa subɔla siwo li egbea ate ŋu akpɔ akɔfafa geɖe tso Yesaya ƒe nyawo me. Ɣeaɖewoɣi tsitretsiɖeŋulawo ado vlo Yehowa subɔla nuteƒewɔlawo alo womabu wo ɖe naneke me o. Ke hã abe alesi wònɔ le Yesu gome ene la, nusi le vevie ŋutɔŋutɔe nye alesi Yehowa Mawu bua míi. Togbɔ be amewo ‘mebu Yesu ɖe naneke me o’ hã la, esia metrɔ asixɔxɔ gã si le eŋu le Mawu ŋkume o!
“Wode Abi Eŋu le Míaƒe Dzidadawo Ta”
21, 22. (a) Nukae Mesia la tsɔ hede ta ete ɖe ame bubuwo ta? (b) Aleke ame geɖe bu Mesia lae, eye nuka mee eƒe fukpekpea va wu nu ɖo?
21 Nukata wòle be Mesia la nakpe fu ahaku? Yesaya ɖe eme be: “Eyae tsɔ míaƒe dɔlélewo, eye wòde ta míaƒe vevesesewo te; evɔ wònye míawo míebui abe amesi wohe to na, amesi Mawu ƒo, eye wòwɔ funyafunyae ene hafi. Ke wode abi eŋu le míaƒe dzidadawo ta, eye wogbãe gudugudu le míaƒe vodadawo ta. Míaƒe ŋutifafa ƒe tohehe le edzi, eye eƒe kabiwo wotsɔ yɔ dɔ mí. Mí katã míetra mɔ abe alẽwo ene, eye amesiame lé eƒe mɔ tsɔ; ke Yehowa na míaƒe vodadawo katã va eyama dzi.”—Yesaya 53:4-6.
22 Mesia la tsɔ ame bubuwo ƒe dɔléle hede ta woƒe vevesesewo te. Etsɔ woƒe agbawo, eye eda wo ɖe eya ŋutɔ ƒe abɔta, hetsɔ wo le kpɔɖeŋumɔ nu. Eye esi dɔléle kple vevesese nye nuvɔ̃ si le ameƒomea ŋu me tsonu ta la, Mesia la tsɔ ame bubuwo ƒe nuvɔ̃wo. Ame geɖe mese nusita wònɔ fu kpem gɔme o eye wobu be Mawue tsɔ dɔléle nyɔŋu aɖe nɔ fu wɔmee tsɔ nɔ to hem nɛ.c Afisi Mesia la ƒe fukpekpe va wu nu ɖoe nye be woƒo nu ɖee, wogbãe gudugudu, hede abi eŋu—nya sẽŋu siawo fia be wowɔ anyra le eŋu wòku le vevesese me. Gake avuléŋusẽ nɔ eƒe kua ŋu; enye nusi dzi woanɔ te ɖo agaɖo amesiwo le vodada kple nuvɔ̃ me la te, ahakpe ɖe wo ŋu ŋutifafa nanɔ wo kple Mawu dome.
23. Mɔ ka nue Yesu de ta ame bubuwo ƒe fukpekpe te le?
23 Aleke Yesu de ta ame bubuwo ƒe fukpekpe tee? Mateo ƒe Nyanyuigbalẽ la yɔ nya tso Yesaya 53:4 hegblɔ be: “Ke esi fiẽsi ɖo la, wotsɔ ame geɖe, siwo gbɔgbɔ vɔ̃wo le wo me la, va egbɔ; eye wògblɔ nya henyã gbɔgbɔ vɔ̃awo do goe, eye wòda gbe le amesiwo katã ƒe lãme gblẽ la ŋuti, bena woawu nya, si wogblɔ ɖi to Yesaya, nyagblɔɖila dzi la nu bena: ‘Eya ŋutɔ tsɔ míaƒe gbɔdzɔgbɔdzɔwo kple dɔlélewo ɖo eɖokui dzi.’” (Mateo 8:16, 17) Esi Yesu da dɔ na amesiwo tsɔ dɔléle vovovowo va egbɔe la, efia be etsɔ woƒe fukpekpe ɖo eɖokui dzi. Eye dɔdada siawo xɔ eƒe ŋusẽ. (Luka 8:43-48) Alesi wòte ŋu da dɔléle ƒomevi ɖesiaɖe—le ŋutilã me kple gbɔgbɔ me siaa—ɖo kpe edzi be wona ŋusẽe be wòakɔ amewo ŋu tso nuvɔ̃ me.—Mateo 9:2-8.
24. (a) Nukata ame geɖe bui be Mawue ‘he to’ na Yesu? (b) Nukata Yesu kpe fu heku?
24 Ke hã ewɔ na ame geɖe be Mawue ‘he to’ na Yesu. Elabena woate ŋu abui be subɔsubɔhakplɔla siwo ŋu amewo dea bubui na wowɔ fui. Gake ɖo ŋku edzi be menye eya ŋutɔ ƒe nuvɔ̃ aɖeke tae wòkpe fu ɖo o. Petro gblɔ be: ‘Kristo kpe fu le mia ta, eye wògblẽ kpɔɖeŋu ɖi na mi, bene miadze eƒe afɔɖoƒewo yome tututu, amesi mewɔ nuvɔ̃ aɖeke o, eye womekpɔ beble le eƒe nu me hã o. Amesi tsɔ míaƒe nuvɔ̃wo da ɖe ye ŋutɔ ƒe ŋutilã dzi heyi ɖe fuwɔameti ŋu, bene mí amesiwo ku na nuvɔ̃wo la, míanɔ agbe hena dzɔdzɔenyenye; amesi ƒe kabiwo yɔ dɔ mí la.’ (Petro I, 2:21, 22, 24) Mí katã míebu ɣeaɖeɣi le nuvɔ̃ ta, “abe alẽ tatrawo ene.” (Petro I, 2:25) Gake Yehowa to Yesu dzi wɔ ɖoɖo ɖe mía ɖeɖe tso míaƒe nuvɔ̃ ƒe nɔnɔmea me ŋu. Ena míaƒe vodadawo “va” Yesu “dzi,” be wòatsɔ. Yesu si ŋu nuvɔ̃ mele o la lɔ̃ faa xɔ míaƒe nuvɔ̃ ŋuti tohehe. Eto ŋukpeku si wòku le ati ŋu si medze na hafi o dzi na wònya wɔ be woadzra mía kple Mawu dome ɖo.
‘Eɖe Mɔ Wowɔ Fui’
25. Aleke míewɔ nya be Mesia la ŋutɔe lɔ̃ faa kpe fu heku?
25 Ðe Mesia la lɔ̃ be yeakpe fu ahakua? Yesaya gblɔ be: “Wowɔ fui, ke ebɔbɔ eɖokui, eye meke nu o; abe alẽ, si wokplɔ yina wuwu ge, kple alẽvi, si li kpoo le eƒe fukolawo ŋku me ene la, nenema eya hã meke nui o.” (Yesaya 53:7) Le Yesu ƒe agbenɔnɔ ƒe zã mamlɛa me la, ate ŋu ana ‘mawudɔla siwo wu aʋakɔ wuieve’ nava kpe ɖe eŋu hafi. Gake egblɔ be: “Ke aleke awɔ ne woawu ŋɔŋlɔawo nu mahã?” (Mateo 26:53, 54) Nusi “Mawu ƒe alẽvi” la wɔ boŋue nye be meʋli kura o. (Yohanes 1:29) Esime nunɔlagã kple dumegãwo tso Yesu nu alakpatɔe le Pilato ŋkume la, “meɖo nya aɖeke ŋu o.” (Mateo 27:11-14) Medi be yeagblɔ nya aɖeke wòagblẽ Mawu ƒe lɔlɔ̃nu wɔwɔ me na eyama o. Yesu lɔ̃ be yeaku azu Alẽvi si wotsɔ sa vɔe, elabena enya nyuie be yeƒe kua aɖe ameƒomea me tɔ toɖolawo tso nuvɔ̃, dɔléle, kple ku me.
26. Mɔ ka nue Yesu ƒe tsitretsiɖeŋulawo ‘ɖo asi nu dzi’ le?
26 Azɔ Yesaya gagblɔ nya bubuwo le Mesia la ƒe fukpekpe kple alesi woado vloe ŋu. Nyagblɔɖila la ŋlɔ bena: “[Wokplɔe dzoe le asiɖoɖonudzi kple ʋɔnudɔdrɔ̃ ta; eye amekae abu eƒe dzidzime ŋu nyawo gɔ̃ hã ŋu akpɔ? “NW”] Woɖee ɖa le agbagbeawo ƒe anyigba dzi, eye wowɔ fui le nye dukɔ ƒe dzidadawo ta?” (Yesaya 53:8) Esime Yesu ƒe futɔwo va lée mlɔeba la, mawusubɔsubɔ me tsitretsiɖeŋula siawo ‘ɖo asi nu dzi’ le alesi wowɔ nu ɖe eŋui me. Menye ɖe woɖo asi woƒe fuléle ɖeɖefia dzi o ke boŋ woɖo asi ʋɔnu dzɔdzɔe dɔdrɔ̃ dzi, alo gbe eŋudɔwɔwɔ. Helagbe me Septuagint la zã “gbɔɖiame” ɖe “asiɖoɖonudzi” teƒe le Yesaya 53:8 gɔmeɖeɖe me. Yesu ƒe futɔwo ɖi gbɔe esi wogbe nusi sɔ si nuvlowɔla gɔ̃ hã dze na la wɔwɔ nɛ. Alesi wodrɔ̃ ʋɔnu Yesu la mesɔ ɖe ʋɔnu dzɔdzɔe dɔdrɔ̃ nu le go aɖeke me o. Aleke wowɔe?
27. Esime Yuda-subɔsubɔhakplɔlawo nɔ Yesu ƒe nya drɔ̃m la, se kawo dzie woŋe aɖaba ƒui, eye mɔ kawo nue woda le Mawu ƒe Sewo dzi le?
27 Esi Yuda-subɔsubɔhakplɔlawo ɖoe kplikpaa be yewoaɖe Yesu ɖa ta la, woda le woa ŋutɔwo ƒe sewo dzi. Ðoɖo si nɔ wo sie nye be akpata si wotsɔ kpe kpakpawo tu si le gbedoxɔa gbɔ la me koe Sanhedrin la ate ŋu adrɔ̃ nya si me woate ŋu atsɔ ku ahe toe na ame la le, ke menye le nunɔlagã ƒeme o. Ŋkeke mee woɖia ʋɔnu sia, ke menye le ɣeɖoto megbe o. Eye le ʋɔnunya si me woate ŋu atsɔ ku ahe toe me la, gbesigbe wodrɔ̃ nyaa ƒe ŋufɔkee wòle be woagblɔe nenye be amea ɖi fɔ. Eyata womate ŋu aɖi ʋɔnu aɖeke le ŋkeke si do ŋgɔ na Sabat alo azã aɖe dzi o. Woŋe aɖaba ƒu se siawo katã dzi le ʋɔnu si wodrɔ̃ Yesu me. (Mateo 26:57-68) Nusi gavloe wue nye be subɔsubɔhakplɔlaawo da le Mawu ƒe Se dzi wòdze gaglãa le nyaa dɔdrɔ̃ me. Le kpɔɖeŋu me, wona zãnu be yewoƒe asi nasu Yesu dzi. (Mose V, 16:19; Luka 22:2-6) Wose aʋatsoɖasefowo ƒe nya. (Mose II, 20:16; Marko 14:55, 56) Eye woɖoe be yewoaɖe asi le amewula ŋu, si fia be wohe ʋufɔɖiɖi va wo ɖokui kple woƒe anyigba dzi. (Mose IV, 35:31-34; Mose V, 19:11-13; Luka 23:16-25) Eyata womete ŋu ‘drɔ̃ ʋɔnu’ ameŋkumemakpɔmakpɔe si ana woaɖo nyametsotso nyuitɔ gbɔ o.
28. Nuka ŋue Yesu ƒe futɔwo mebu o?
28 Ðe Yesu ƒe futɔwo ku nu me be yewoakpɔe ɖa be ameka tututue yewole ʋɔnu drɔ̃meea? Yesaya bia nya ma tɔgbe be: “Amekae abu eƒe dzidzime ŋu nyawo gɔ̃ hã ŋu akpɔ?” Nya “dzidzime” ate ŋu afia ƒome si me ame dzɔ tso, alo nɔnɔme si me wodzii ɖo. Esime Sanhedrin la me tɔwo nɔ ʋɔnu drɔ̃m Yesu la, womebu nɔnɔme si me wodzii ɖo—be ena nusiwo woakpɔ mɔ na le Mesia si ŋugbe wodo ŋu va eme—la ŋu o. Ðe wotso enu boŋ be egblɔ busunya eye wobui be edze na ku. (Marko 14:64) Emegbe Roma-mɔmefia Pontio Pilato na ta woƒe nyaƒoɖeamenu eye wòtso afia be woaklã Yesu ɖe ati ŋu. (Luka 23:13-25) Alea wòdzɔe be esi Yesu xɔ ƒe 33 1/2 ko la, “woɖee ɖa,” alo tsrɔ̃e ɖa, le eƒe ɖekakpuimenɔɣi.
29. Aleke wòdzɔe be woɖi Yesu ɖe “ame vɔ̃ɖiwo” kple “kesinɔtɔwo dome”?
29 Yesaya yi edzi ŋlɔ le Mesia la ƒe ku kple eɖiɖi ŋu be: “Woɖe yɔdo nɛ ɖe ame vɔ̃ɖiwo dome, eye esi wòku la, enɔ [kesinɔtɔwo, “NW”] dome, evɔ wònye mesẽ ŋuta o, eye alakpa menɔ eƒe nu me kpɔ o hafi.” (Yesaya 53:9) Aleke Yesu nɔ ame vɔ̃ɖiwo kple kesinɔtɔwo dome le eƒe ku kple eɖiɖi mee? Le Nisan 14, 33 M.Ŋ. me la, eku ɖe amewuti ŋu le Yerusalem-gliawo godo. Esi wònye nuvɔ̃wɔla eve domee woklãe ɖo ta la, míate ŋu agblɔ be woɖe yɔdo nɛ ɖe ame vɔ̃ɖiwo dome le gɔmesese ma nu. (Luka 23:33) Gake le Yesu ƒe ku megbe la, Yosef si nye kesinɔtɔ aɖe si tso Arimatia tsɔ dzideƒo bia mɔ le Pilato gbɔ be yeaɖe Yesu ƒe kukua le atia ŋu aɖaɖi. Yosef, si ŋu Nikodemo va kpe ɖo la, dzra ame kukua ɖo be yeaɖi eye wòtsɔe mlɔ yɔdo yeye si wòna woɖe me. (Mateo 27:57-60; Yohanes 19:38-42) Eyata woɖi Yesu ɖe kesinɔtɔwo dome hã.
‘Edzɔ Dzi na Yehowa be Yeagbãe Gudugudu’
30. Gɔmesese ka nue wòdzɔ dzi na Yehowa le be woagbã Yesu gudugudu?
30 Azɔ Yesaya gblɔ nya wɔmoyaa aɖe be: “[Edzɔ dzi na Yehowa, “NW”] be, yeatsɔ dɔléle agbãe gudugudu; ne etsɔ eɖokui wɔ fɔɖivɔsae la, akpɔ dzidzimeviwo, anɔ agbe didie, eye Yehowa ƒe tameɖoɖo adze edzi to eƒe asi dzi. Akpɔ nu kple ŋku, wòaɖi ƒo nɛ le eƒe luʋɔ ƒe agbagbadzedze ta. Nye dɔla dzɔdzɔe la atsɔ nunya atso afia na ame geɖewo, eye wòade ta woƒe vodadawo te.” (Yesaya 53:10, 11) Aleke wòadzɔ dzi na Yehowa be yeakpɔ dɔla wɔnuteƒe sia wòagbã gudugudu? Edze ƒã be menye Yehowa ŋutɔe wɔ fu Via lɔlɔ̃a o. Yesu ƒe futɔwo dzie nusi wowɔ ɖe eŋu ƒe fɔbubu bliboa le. Gake Yehowa ɖe mɔ wosẽ ŋuta le eŋu. (Yohanes 19:11) Nukatae? Anye vevesese na Mawu si sea veve ɖe ame ti eye eƒe dɔme trɔna ɖe ame ŋu lɔlɔ̃tɔe la godoo esi wòkpɔ Via maɖifɔ la wònɔ fu kpem. (Yesaya 63:9; Luka 1:77, 78) Edze ƒã be menye ɖe Yehowa mekpɔ ŋudzedze ɖe Yesu ŋu le mɔ aɖeke nu o. Togbɔ be ele nenema hã la, edzɔ dzi na Yehowa be Via lɔ̃ faa be yeakpe fu le yayra siwo wòahe vɛ ta.
31. (a) Mɔ ka nue Yehowa ɖo Yesu ƒe luʋɔ ɖi wònye ‘fɔɖivɔsa’ le? (b) Nukae ana Yesu ƒe dzi nadze eme ŋutɔŋutɔ le xaxa geɖe siwo me wòto esime wònye amegbetɔ la megbe?
31 Yayraawo dometɔ ɖekae nye be Yehowa ɖo Yesu ƒe luʋɔ ɖi wònye ‘fɔɖivɔsa.’ Eyata esi Yesu trɔ yi dziƒo la, edo ɖe Yehowa ŋkume tsɔ eƒe amegbetɔ ƒe agbe si wòtsɔ sa vɔe la ƒe asixɔxɔ yii, eye edze Yehowa ŋu be yeaxɔe ɖe ameƒomea katã nu. (Hebritɔwo 9:24; 10:5-14) Yesu to eƒe fɔɖivɔsaa dzi kpɔ “dzidzimeviwo.” Esi wòzu “fofo mavɔ” ta la, ate ŋu ana agbe—si nye agbe mavɔ—amesiwo xɔa eƒe ʋu si wòkɔ ɖi dzi sena. (Yesaya 9:5) Aleke gbegbe ameƒomea ɖeɖe tso nuvɔ̃ kple ku me ƒe mɔkpɔkpɔa ana Yesu ƒe dzi nadze emee nye si le xaxa geɖe siwo me wòto esime wònye luʋɔ si nye amegbetɔ la megbe! Eƒe dzi agadze eme wu gɔ̃ hã be wòanyae be yeƒe nuteƒewɔwɔ na ye Fofo si le dziƒo nye nyaŋuɖoɖo na Eƒe Futɔ, Satana Abosam, ƒe alɔmeɖenyawo.—Lododowo 27:11.
32. “Nunya” kae Yesu atsɔ ana ‘tenɔnɔ dzɔdzɔe ame geɖe,’ eye amekawo sie tenɔnɔ sia suna?
32 Yayra bubu si Yesu ƒe kua he vɛ enye be ana ‘tenɔnɔ dzɔdzɔe nasu ame geɖe si’ fifia gɔ̃ hã. Yesaya gblɔ be “atsɔ nunya” awɔ esiae. Anye be esi Yesu va zu amegbetɔ hekpe fu madzemadzee ɖe eƒe toɖoɖo Mawu ta ye nunya sia su esi. (Hebritɔwo 4:15) Esi Yesu kpe fu vaseɖe ku me ta la, ete ŋu zu vɔsa si hiã be wòakpe ɖe ame bubuwo ŋu tenɔnɔ dzɔdzɔe nasu wo si. Amekawoe kpɔa tenɔnɔ dzɔdzɔe sia? Ame gbãtɔwoe nye eyomedzela siwo wosi ami na. Esi woxɔ Yesu ƒe vɔsa dzi se ta la, Yehowa bu dzɔdzɔenyenye na wo be yeaxɔ wo woazu ye viwo eye yeawɔ wo Yesu ƒe hadomenyilawoe. (Romatɔwo 5:19; 8:16, 17) Emegbe ‘alẽ bubuawo’ ƒe “ameha gã” aɖe hã xɔa Yesu ƒe ʋu si wòkɔ ɖi dzi se eye tenɔnɔ dzɔdzɔe le wo si be woazu Mawu xɔlɔ̃wo ahatsi agbe le Harmagedon me.—Nyaɖeɖefia 7:9; 16:14, 16; Yohanes 10:16; Yakobo 2:23, 25.
33, 34. (a) Nukae míesrɔ̃ le Yehowa ŋu si doa dzidzɔ na míaƒe dzi? (b) Amekawoe nye ‘ame geɖe’ siwo dome woana ‘gome’ Dɔla si nye Mesia la ɖo?
33 Mlɔeba la, Yesaya ƒo nu tso Mesia la ƒe dziɖuɖukpɔkpɔ ŋu be: “Eyata mana gomee ɖe ame geɖewo dome, eye eya kple kalẽtɔwo ama aboyonu, elabena etsɔ eƒe agbe de ku me, eye wòna wobui kpe ɖe vodalawo ŋu, evɔ wònye ede ta ame geɖewo ƒe nuvɔ̃wo te, eye wòɖe kuku ɖe vodalawo ta hafi.”—Yesaya 53:12.
34 Yesaya ƒe nyagblɔɖia ƒe akpa sia taƒonyawo fia nu dodzidzɔname aɖe mí le Yehowa ŋu: Edea asixɔxɔ amesiwo wɔa nuteƒe nɛ ŋu. Esia dze le ŋugbe si wòdo be ‘yeana gome’ Dɔla si nye Mesia la “ɖe ame geɖewo dome” la me. Edze ƒã be ɖoɖo si nu womaa aboyonuwo ɖo ŋue wokpɔ gblɔ nya sia. Yehowa kpɔa ŋudzedze ɖe nuteƒewɔla ‘geɖe’ siwo nɔ anyi le blema, siwo dome Noa, Abraham, kple Hiob le ƒe nuteƒewɔwɔ ŋu, eye eɖo ‘gome’ ɖi na wo le eƒe xexe yeye si gbɔna me. (Hebritɔwo 11:13-16) Nenema ke wòana gome eƒe Dɔla si nye Mesia lae. Nyateƒee, Yehowa mana eƒe nuteƒewɔwɔ nazu dzodzro o. Míawo hã míate ŋu aka ɖe edzi be Yehowa ‘maŋlɔ míaƒe dɔwɔwɔ kple lɔlɔ̃ si míeɖe fia le eƒe ŋkɔ ta la be o.’—Hebritɔwo 6:10.
35. Amekawoe nye ‘kalẽtɔ’ siwo Yesu ama aboyonuwo kpli, eye nukawoe aboyonuawo nye?
35 Mawu ƒe Dɔla akpɔ aboyonuwo hã ne eɖu eƒe futɔwo dzi. Ama aboyonu siawo kple “kalẽtɔwo.” Amekawoe nye “kalẽtɔwo” le nya sia me vava me? Woawoe nye Yesu ƒe nusrɔ̃la gbãtɔ siwo ɖu xexeame dzi abe alesi eya ŋutɔ wɔe ene—siwo nye “Mawu ƒe Israel” me tɔ 144,000. (Galatiatɔwo 6:16; Yohanes 16:33; Nyaɖeɖefia 3:21; 14:1) Ke nukawoe nye aboyonuawo? Wo dometɔ aɖewo ate ŋu anye ‘nunana siwo nye amewo,’ amesiwo Yesu xɔ tso Satana ƒe ŋusẽkpɔɖeamedzi te sesẽe hetsɔ na Kristo-hamea, le kpɔɖeŋumɔ nu. (Efesotɔwo 4:8-12) Woana aboyonu bubu aɖewo hã ƒe gome ‘kalẽtɔ’ 144,000 mawo. Esi woɖu xexeame dzi ta la, woana be susu aɖeke maganɔ Satana si si ta wòaɖe alɔme le Mawu ŋu o. Wo ɖokui tsɔtsɔ na Yehowa tamanamanae la do eyama ɖe dzi, eye wòna eƒe dzi kpɔa dzidzɔ.
36. Ðe Yesu nya be yena nyagblɔɖi si ku ɖe Mawu ƒe Dɔla ŋu nɔ eme vama? Ðe eme.
36 Yesu nya be yena nyagblɔɖi si ku ɖe Mawu ƒe Dɔla la ŋu nɔ eme vam. Le zã si me wolée me la, eyɔ nya siwo woŋlɔ ɖe Yesaya 53:12 hetsɔe ku ɖe eɖokui ŋu be: “Mele egblɔm na mi bena: Ele be, woawu nusia, si woŋlɔ ɖi la nu ɖe ŋunye bena: ‘Eye wobui ɖe vodalawo dome;’ elabena nusi wogblɔ ɖi le ŋutinye la, le enu wu ge.” (Luka 22:36, 37) Nublanuitɔe la, wowɔ nu ɖe Yesu ŋu abe vodala ene nyateƒe. Wowui abe sedzidala ene eye woklãe ɖe ati ŋu ɖe adzodala eve dome. (Marko 15:27) Ke hã elɔ̃ faa tsɔ vlodoame sia le esi wònya nyuie be yele nya xɔm ɖe mía nu ta. Efia be etsi tre ɖe nuvɔ̃wɔlawo kple ku ƒe tohehea dome, eye eya ŋutɔ xɔ tohehea.
37. (a) Nukae Yesu ƒe agbenɔnɔ kple ku ƒe ŋutinya me nuŋlɔɖi na míete ŋu kpɔna dzea sii? (b) Nukata wòle be míada akpe na Yehowa Mawu kple eƒe Dɔla, Yesu Kristo, si wòdo ɖe dzi?
37 Ŋutinya me nuŋlɔɖi si ku ɖe Yesu ƒe agbenɔnɔ kple ku ŋu na míete ŋu dea dzesi nusia vodadamanɔmee be: Yesu Kristoe nye Mesia si nye Dɔla le Yesaya ƒe nyagblɔɖia me. Aleke gbegbe míedaa akpee nye si be Yehowa lɔ̃ faa be Via lɔlɔ̃a nana akpa si Dɔla la wɔ le nyagblɔɖi me la va eme, eye wòkpe fu heku ale be woate ŋu aɖe mí tso nuvɔ̃ kple ku me! Yehowa to esia me ɖe lɔlɔ̃ gã aɖe fia mí. Romatɔwo 5:8 gblɔ be: “Mawu ɖe ye ŋutɔ ƒe lɔlɔ̃, si wòtsɔ lɔ̃ mí la fia bena, esime míeganye nuvɔ̃wɔlawo la, Kristo ku ɖe mía ta.” Akpe kae nye si wòle be míada na Yesu Kristo, Dɔla si wodo ɖe dzi la, amesi lɔ̃ faa tsɔ eƒe luʋɔ na vaseɖe ku me ke!
[Etenuŋɔŋlɔwo]
a Nya si woŋlɔ ɖe Yesaya 52:13 le Jonathan ben Uzziel (ƒe alafa gbãtɔ M.Ŋ.) ƒe Targum si gɔme J. F. Stenning ɖe me lae nye: “Kpɔ ɖa, nye dɔla, Amesiamina (alo, Mesia) la, akpɔ dzidzedze.” Nenema ke Babilontɔwo ƒe Talmud (ƒe alafa etɔ̃lia M.Ŋ. lɔƒo) gblɔ be: “Mesia la—eŋkɔ ɖe? . . . [; amesiwo] nye Rabi ƒemetɔwo [gblɔ be, Dɔnɔ la], elabena wogblɔ be ‘etsɔ míaƒe dɔlélewo vavã.’”—Sanhedrin 98b; Yesaya 53:4.
b Nyagblɔɖila Mixa gblɔ be Betlexem nye “suetɔ le Yuda ƒe ƒomeawo dome.” (Mixa 5:1) Ke hã Betlexem sue la ŋu koe wode bubui wònye du si me wodzi Mesia la le.
c Wozã Hebrigbe me nya si gɔme woɖe be “wohe to na” la le anyidɔ gome hã. (Fiawo II, 15:5) Agbalẽnyala aɖewo gblɔ be Yudatɔ aɖewo se Yesaya 53:4 gɔme be anyidɔ anɔ Mesia la ŋu. Babilontɔwo ƒe Talmud la tsɔ kpukpui sia ku ɖe Mesia la ŋu, eye wòyɔe be “agbalẽnyala anyidzela.” Woɖe kpukpui sia gɔme ɖe Katolikotɔwo ƒe Douay Version me wòsɔ kple Latingbe me Vulgate la me tɔ be: “Míebui abe anyidzela ene.”
[Nyaɖoɖo si le 212]
YEHOWA ƑE DƆLA
Alesi Yesu Na Eŋu Nyawo Va Emee
NYAGBLƆÐI
NUDZƆDZƆ
EMEVAVA
Wodoe ɖe dzi hekɔ eŋu
Dɔw. 2:34-36; Fil. 2:8-11; Pet. I, 3:22
Woka aʋatso ɖe esi hegblẽ eŋu
Mat. 11:19; 27:39-44, 63-64; Yoh. 8:48; 10:20
Eƒe nu wɔ mo yaa na dukɔ geɖe
Mat. 24:30; Tes. II, 1:6-10; Nyaɖ. 1:7
Womexɔ edzi se o
Yoh. 12:37, 38; Rom. 10:11, 16, 17
Nɔnɔme madeamedzi mee wònɔ tsi
Wodo vloe hegbee
Mat. 26:67; Luka 23:18-25; Yoh. 1:10, 11
Etsɔ míaƒe dɔlélewo
Woƒo nu ɖee
Ekpe fu ɖe ame bubuwo ƒe vodadawo ta
Meke nu he nya le enutsolawo ŋkume o Mat. 27:11-14; Mar. 14:60, 61; Dɔw. 8:32, 35
Wodrɔ̃ ʋɔnu madzɔmadzɔe hetso kufia nɛ Mat. 26:57-68; 27:1, 2, 11-26; Yoh. 18:12-14, 19-24, 28-40
Woɖii ɖe kesinɔtɔwo dome
Wotsɔ eƒe luʋɔ wɔ fɔɖivɔsae
Eʋu mɔ na ame geɖe be tenɔnɔ dzɔdzɔe nasu wo si
Rom. 5:18, 19; Pet. I, 2:24; Nyaɖ. 7:14
Wobui ɖe nuvɔ̃wɔlawo dome
Mat. 26:55, 56; 27:38 Luka 22:36, 37
[Nɔnɔmetata si le axa 203]
‘Amegbetɔwo do vloe’
[Nɔnɔmetata si le axa 206]
“Meke nu o”
[Afi Si Míexɔ Mɔɖeɖe Tso]
Nya si wogblɔ ɖe “Ecce Homo” si Antonio Ciseri ta dzi
[Nɔnɔmetata si le axa 211]
“Etsɔ eƒe agbe de ku me”