Ta 43

Ŋutikɔkɔe ƒe Du La

Ŋutega 16—Nyaɖeɖefia 21:9–22:5

Nyati: Yerusalem Yeyea ɖɔɖɔ

Emevaɣi: Xaxa gã la kple Satana dede aʋli me megbe

1, 2. (a) Afikae mawudɔla aɖe kplɔ Yohanes yie be wòakpɔ Yerusalem Yeyea, eye nusi to vovo kae míekpɔ le afisia? (b) Nukatae esia nye Nyaɖeɖefia taƒoƒo wɔnuku la?

MAWUDƆLA aɖe kplɔ Yohanes yi gbedzi be yeafia Babilon Gã lae. Fifia mawudɔlawo ƒe ƒuƒoƒo ma ke me tɔ ɖeka gakplɔ Yohanes yi to kɔkɔ aɖe dzii. Nusi to vovo na nusi wòɖe fiae do ŋgɔ kae nye si wòkpɔ! Agbegbegblẽnɔdu makɔmakɔ si le abe Babilon gbolo la ene aɖeke mele afisia o, ke boŋ Yerusalem Yeye—dzadzɛ, gbɔgbɔ me tɔ, kɔkɔe—lae li eye dziƒo ŋutɔŋutɔe wòle ɖiɖim tso.—Nyaɖeɖefia 17:1, 5.

² Ŋutikɔkɔe sia gbegbe menɔ anyigba dzi Yerusalem ŋu kpɔ o. Yohanes gblɔ na mí be: “Eye mawudɔla adre, siwo si kplu adre, siwo yɔ fũ kple fuwɔame mamletɔ adreawo nɔ la, dometɔ ɖeka va, eye wòƒo nu kplim gblɔ bena: Va afii, ne mafia ŋugbetɔ, si nye Alẽvi la srɔ̃ la wò! Eye wòkplɔm yi to kɔkɔ gã aɖe dzi le gbɔgbɔ me, eye woɖe du kɔkɔe, Yerusalem, si le ɖiɖim tso dziƒo tso Mawu gbɔ la fiam, esi ŋu Mawu ƒe ŋutikɔkɔe le.” (Nyaɖeɖefia 21:9-11a) Yohanes nɔ to kɔkɔ ma ƒe afisi nu adze le nyuie helé ŋku ɖe du nyui ma ƒe akpa dzeaniawo dometɔ ɖesiaɖe ŋu. Xɔsetɔwo nɔ mɔ kpɔm vevie na eƒe vava tso esime ameƒomea dze anyi ɖe nuvɔ̃ kple ku me la ke. Eva ɖo mlɔeba! (Romatɔwo 8:19; Korintotɔwo I, 15:22, 23; Hebritɔwo 11:39, 40) Enye gbɔgbɔmedu dzeani aɖe si me tɔwoe nye nuteƒewɔla 144,000 siwo le dzo dam le eƒe kɔkɔenyenye me eye Yehowa ƒe kekeli ŋutɔŋutɔ le keklẽm le wo ŋu. Nyaɖeɖefia taƒoƒo wɔnukua ye nye esi!

 3. Aleke Yohanes ƒo nu tso Yerusalem Yeyea ƒe atsyɔ̃ɖoɖo ŋue?

³ Yerusalem Yeyea ƒe atsyɔ̃ɖoɖoa lé dzi na ame: “Eƒe keklẽ le abe kpe xɔasitɔ ŋutɔ aɖe ene, hele abe yaspis-kpe, si me kɔ abe kristalo ene; gli kɔkɔ gã aɖe le eŋu; agbo wuieve le eŋu, eye mawudɔla wuieve le agboawo tame, eye woŋlɔ ŋkɔ, siwo nye Israel-viwo ƒe to wuieveawo ƒe ŋkɔwo la, ɖe wo ŋuti. Ɣedzeƒe gome la agbo etɔ̃ li, eye anyiehe gome la agbo etɔ̃ li, dziehe gome la agbo etɔ̃ li, eye ɣetoɖoƒe gome la agbo etɔ̃ li. Gɔmeɖoɖo wuieve li na dua ƒe gli la, eye Alẽvi la ƒe apostolo wuieveawo ƒe ŋkɔwo le wo ŋu.” (Nyaɖeɖefia 21:11b-14) Aleke wòsɔe nye si be nu wɔdɔɖeamedzi gbãtɔ si Yohanes ŋlɔ ɖi lae nye keklẽ si le dzo dam! Alesi Yerusalem Yeyea le dzo damee abe ŋugbetɔ ene la na wòdze be wòanye Yesu srɔ̃. Eƒe dzodada me kɔ, abe alesi wòdze ‘dziƒokekeliwo Fofo’ ƒe nuwɔwɔe ene.—Yakobo 1:17.

 4. Nukae ɖee fia be Yerusalem Yeyea menye ŋutilã me Israel-dukɔa o?

⁴ Woŋlɔ Israel-to wuieveawo ƒe ŋkɔwo ɖe eƒe agbo wuieveawo dzi. Eyata kpɔɖeŋudu sia me tɔwoe nye ame 144,000 siwo nu wotre “le Israel ƒe toawo katã me.” (Nyaɖeɖefia 7:4-8) Le ɖekawɔwɔ me kple esia la, woŋlɔ Alẽvi la ƒe apostolo 12 la ƒe ŋkɔwo ɖe eƒe gɔmeɖokpewo dzi. Ẽ, menye ŋutilãmedukɔ si nye Israel si gɔme woɖo anyi ɖe Yakob ƒe vi 12 la dzie Yerusalem Yeyea nye o. Gbɔgbɔ me Israel, si gɔme woɖo anyi ɖe “apostolowo kple nyagblɔɖilawo” dzie wònye.—Efesotɔwo 2:20.

 5. Nukae Yerusalem Yeyea ƒe “gli kɔkɔ gã” la kple alesi woda mawudɔlawo ɖe agbo ɖesiaɖe nue la fia?

⁵ Glikpɔ gã aɖe le kpɔɖeŋudua ŋu. Le blema me la, woɖoa gli ɖe dua ƒe dedienɔnɔ ta be woatsɔ axe mɔ na futɔwo. Yerusalem Yeyea ƒe “gli kɔkɔ gã” la fia be ele dedie le gbɔgbɔ me. Dzɔdzɔenyenye ƒe futɔ aɖeke, kple nu makɔmakɔ alo nu fitifiti aɖeke mate ŋu age ɖe eme gbeɖe o. (Nyaɖeɖefia 21:27) Gake le amesiwo woɖe mɔ na woge ɖe eme gome la, gege ɖe du dzeani sia me le abe gege ɖe Paradisoa me ene. (Nyaɖeɖefia 2:7) Le Adam nyanyã megbe la, woda kerubiwo ɖe Paradiso gbãtɔa me be woaxe mɔ na ame makɔmakɔwo ƒe gege ɖe eme. (Mose I, 3:24) Nenema ke woda mawudɔlawo ɖe Yerusalem-du kɔkɔe la ƒe agbowo nu bene woakpɔ dua ƒe gbɔgbɔmededienɔnɔ ta. Le nyateƒe me la, mawudɔlawo le Kristotɔ amesiaminawo ƒe hame si zu Yerusalem Yeyea la ŋu dzɔm tso Babilon ƒe ɖiƒoƒo si me.—Mateo 13:41.

Dua Dzidzedzidze

 6. (a) Aleke Yohanes ɖɔ dua ƒe dzidzemee, eye nukae edzidzedzidze sia fia? (b) Aleke woate ŋu aɖe alesi ‘wònye le amewo ƒe dzidzenu eye le ɣeyiɣi ma ke me wòganye mawudɔlawo tɔ’ la mee? (Kpɔ etenuŋɔŋlɔa.)

⁶ Yohanes yi eƒe nuŋlɔɖia dzi be: “Eye amesi le nu ƒom kplim la, lé sikadzidzeti ɖe asi, be yeadzidze du la kple eƒe agboawo kpakple eƒe gli la. Eye du la le dzogoe ene me, eye eƒe didime le abe eƒe kekeme ene; eye wòdzidze du la kple dzidzeti la, wòle stadio akpe wuieve; eƒe didime kple kekeme kple kɔkɔme wosɔ. Eye wòdzidze du la wòle abɔklugui alafa ɖeka kple blane vɔ ene le amewo ƒe dzidzenu, si [ganye] mawudɔla [hã tɔ] la nu.” (Nyaɖeɖefia 21:15-17) Esime wodzidze gbedoxɔa ƒe kɔkɔeƒe la, esia nye kakaɖedzi be nusiwo nye Yehowa ƒe tameɖoɖowo ku ɖe eŋu la ava eme. (Nyaɖeɖefia 11:1) Azɔ mawudɔla la ƒe Yerusalem Yeye la dzidzedzidze la ɖe alesi Yehowa ƒe tameɖoɖowo ku ɖe ŋutikɔkɔedu sia ŋu la matrɔ o la fia.a

 7. Nukae ɖe dzesi le dua ƒe dzidzeme ŋu?

⁷ Du ɖedzesi kae nye si! Eƒe didime kple kekeme kpakple kɔkɔme sɔ pɛpɛpɛ eye wònye stadio 12,000 (anɔ kilometa 2,220) le goawo katã me eye gli si ƒe kɔkɔme nye abɔklugui 144 alo afɔ 210 la ƒo xlãe. Du ŋutɔŋutɔ aɖeke ƒe dzidzeme mate ŋu anɔ nenema gbeɖe o. Axɔ anyigba si ƒe lolome wu egbegbe Israel tɔ zi gbɔ zi 14 eye akɔkɔ ayi yame wòade kilometa 560 kloe! Wotsɔ Nyaɖeɖefia na le dzesiwo me. Eyata nukae dzidzeme siawo fia mí ku ɖe dziƒo Yerusalem Yeyea ŋu?

 8. Nukae (a) dua ƒe dzidzeme si nye abɔklugui 144 la fia? (b) dua ƒe dzidzeme si nye stadio 12,000 fia? (d) dua ƒe gowo katã ƒe dzidzeme si sɔ la fia?

⁸ Abɔklugui 144 la ɖo ŋku edzi na mí be gbɔgbɔmeme 144,000 siwo woxɔ be woanye Mawu-viwo ƒe ƒuƒoƒoe nye dua me tɔwo. Wozã xexlẽme si nye 12 si dze le dua ƒe dzidzeme stadio 12,000 me—si me didimea, kekemea, kple kɔkɔmea sɔ le—la le kpɔɖeŋumɔ nu le ɖoɖowɔwɔwo me le Biblia me nyagblɔɖiwo me hena Mawu ƒe tameɖoɖo mavɔ dzi wɔwɔ. Eyata Yerusalem Yeyea nye ɖoɖo si ŋu wotrɔ asi le etɔxɛ hena Yehowa ƒe tameɖoɖo mavɔ la dzi wɔwɔ. Yerusalem Yeyea, hekpe ɖe Fia Yesu Kristo ŋu, nye Yehowa ƒe Fiaɖuƒea ƒe habɔbɔ. Emegbe dua ƒe dzedzeme hã li: esɔ le goawo katã me. Le Salomo ƒe gbedoxɔa me la, Kɔkɔeƒewo ƒe Kɔkɔeƒe si me kpɔɖeŋunu si fia Yehowa ƒe afima nɔnɔ nɔ la hã ƒe didime kple kekeme kpakple kɔkɔme sɔ. (Fiawo I, 6:19, 20) Eyata aleke gbegbe wòsɔe nye si be wokpɔ Yerusalem Yeyea, si Yehowa ŋutɔ ƒe kekeli klẽna na la wònye nusi sɔ le go ɖesiaɖe dzi pɛpɛpɛ! Eƒe dzidzemewo katã sɔ ɖe wo nɔewo nu bliboe. Enye du si ƒe akpa aɖeke meto vovo na nɔvia alo esi ŋu vodada le o.—Nyaɖeɖefia 21:22.

Xɔtunu Xɔasiwo

 9. Aleke Yohanes ɖɔ dua ƒe xɔtunuwoe?

⁹ Yohanes yi eƒe nuɖɔɖɔa dzi be: “Eye nusi wotsɔ ɖo glia la, enye yaspis-kpe, eye du la nye sika dzadzɛ hele abe ahũhɔ̃e dzadzɛ ene. Eye wotsɔ kpe xɔasi bubu ƒomeviwo katã wɔ leke na dua ƒe gli la ƒe gɔmeɖoɖoawo. Gɔmeɖokpe gbãtɔ nye yaspis, evelia nye safir, etɔ̃lia nye xalkedon, enelia nye smaragd, atɔ̃lia nye sardonik, adelia nye sardis, adrelia nye krisolit, enyilia nye beril, asiekelia nye topas, ewolia nye krisopras, wuiɖekɛlia nye hiakint, wuievelia nye ametist. Eye agbo wuieveawo nye adzagba wuieve, agboawo dome ɖesiaɖe nye adzagba ɖeka; eye dua ƒe ablɔ nye sika dzadzɛ abe ahũhɔ̃e, si me wokpɔa nu tonɛ la ene.”—Nyaɖeɖefia 21:18-21.

10. Nukae alesi wotsɔ yaspis-kpe, sika kple “kpe xɔasi bubu ƒomeviwo katã” tso duae la fia?

¹⁰ Alesi wotso duae la nye nusi ɖo atsyɔ̃ nyateƒe. Le nu tsɛwo abe anyi alo kpe ene teƒe la, míexlẽ nu tso yaspis, sika dzadzɛ kple “kpe xɔasi bubu ƒomeviwo katã” ŋu. Aleke wòsɔe nye si be nusiawo ɖe alesi dziƒoxɔtunuwo le fia! Naneke magate ŋu aɖo atsyɔ̃ wu ema o. Wofa sika dzadzɛtɔ na nubablaɖaka si nɔ anyi le blema la, eye wozãa nusia le Biblia me wòtsia tre ɖi na nu nyuiwo kple nu xɔasiwo. (Mose II, 25:11; Lododowo 25:11; Yesaya 60:6, 17) Gake wotsɔ “sika dzadzɛ [si le] abe ahũhɔ̃e, si me wokpɔa nu tonɛ la ene” la ɖo atsyɔ̃ na Yerusalem Yeye la katã, kple eƒe ablɔwo gɔ̃ hã, esi nye kpɔɖeŋu na atsyɔ̃ɖoɖo kple asixɔxɔ si gbɔ nusi ŋu amegbetɔ ate ŋu asusu la ŋu.

11. Nukae nye nusi na kakaɖedzi be gbɔgbɔmekekeli dzadzɛ nyuitɔ kekeake aklẽ na Yerusalem Yeyea me tɔwo?

¹¹ Galólola aɖeke mate ŋu alólo sika wòadza alea gbegbe o. Gake Yehowa ye nye Nulólola Gãtɔ. Ebɔbɔ nɔ anyi ‘abe klosaloklɔla kple eŋudzala ene,’ eye edzaa gbɔgbɔ me Israel-vi anukwareɖilawo dometɔ ɖesiaɖe ŋu “abe sika kple klosalo ene” to ɖiƒoƒo ɖesiaɖe ɖeɖe ɖa le wo ŋu dzi. Amesiwo ŋu wodza eye wokɔ wo ŋu ŋutɔŋutɔ koe ate ŋu anye Yerusalem Yeyea me tɔwo mlɔeba, eye to mɔ sia dzi la, Yehowa tsɔa xɔtunu gbagbe siwo klẽna kple gbɔgbɔmedzadzɛnyenye nyuitɔ kekeake tsoa du lae.—Maleaxi 3:3, 4.

12. Nukae nyateƒe si wònye be: (a) wotsɔ kpe xɔasi 12 ɖo atsyɔ̃ na dua ƒe gɔmeɖokpewo la fia? (b) dua ƒe agbowo nye kpe xɔasiwo la fia?

¹² Dua ƒe gɔmeɖokpewo hã dze ani, kpe xɔasi 12 ye wotsɔ ɖo atsyɔ̃e nɛ. Esia na míeɖo ŋku blema Israel nunɔlagã si doa kɔmewu si ŋu wotsi avɔ si wotsɔ kpe xɔasi vovovo 12 siwo ɖi esiwo ŋu míese nu le le afisia ɖo heɖo atsyɔ̃e na le ŋkeke tɔxɛwo dzi la dzi. (Mose II, 28:15-21) Kakaɖedzitɔe la, menye nudogoɖenunue esia nye o! Ke boŋ ete gbe ɖe nunɔlanyenye ƒe dɔ si Yerusalem Yeye, si me Yesu, Nunɔlagã gãtɔ la nye “akaɖi” le la dzi. (Nyaɖeɖefia 20:6; 21:23; Hebritɔwo 8:1) Hekpe ɖe eŋu la, Yerusalem Yeyea dzie Yesu ƒe nunɔlagãnyenye ƒe subɔsubɔdɔa ƒe viɖewo ato ava na ameƒomea. (Nyaɖeɖefia 22:1, 2) Dua ƒe agbo 12 la ƒe kpe xɔasiawo siwo dometɔ ɖesiaɖe xɔ asi sesẽ la, na míeɖo ŋku Yesu ƒe lododo si gblɔ be Fiaɖuƒea ɖi dzonu si ƒe asi sẽ ŋutɔ la dzi. Amesiwo katã ge ɖe agbo mawo me la nye amesiwo ɖe ŋudzedzekpɔkpɔ vavãtɔ fia ɖe gbɔgbɔmenu xɔasiwo ŋu.—Mateo 13:45, 46; tsɔe sɔ kple Hiob 28:12, 17, 18.

Du si Nye Kekeli

13. Nukae Yohanes gagblɔ ku ɖe Yerusalem Yeyea ŋu, eye nukatae gbedoxɔ ŋutɔŋutɔ mehiã na dua o?

¹³ Le Salomo ŋɔli la, gbedoxɔ si wotu ɖe dua ƒe to kɔkɔtɔ dzi le Moria-to dzi le anyiehe gome lae kpɔ ŋusẽ ɖe Yerusalem dzi. Ke Yerusalem Yeyea ya ɖe? Yohanes gblɔ be: “Eye nyemekpɔ gbedoxɔ aɖeke le eme o; elabena [Yehowa] Mawu ŋusẽkatãtɔ, kple Alẽvi la wonye eƒe gbedoxɔ. Eye dua mehiã ɣe alo ɣleti, bene woaklẽ nɛ o; elabena Mawu ƒe ŋutikɔkɔe klẽna nɛ, eye Alẽvi la enye eƒe akaɖi.” (Nyaɖeɖefia 21:22, 23) Le nyateƒe me la, mehiã be woatu gbedoxɔ ŋutɔŋutɔ aɖeke ɖe afima o. Blema Yudatɔwo ƒe gbedoxɔa nye kpɔɖeŋu ko, eye kpɔɖeŋu ma ƒe nu ŋutɔŋutɔ la nye gbɔgbɔ me gbedoxɔ gã si nɔ anyi tso esime Yehowa si ami na Yesu wòzu Nunɔlagã la le ƒe 29 M.Ŋ. me. (Mateo 3:16, 17; Hebritɔwo 9:11, 12, 23, 24) Gbedoxɔ ƒe anyinɔnɔ hã ɖee fia enumake be nunɔlawo ƒe ha aɖe saa vɔ na Yehowa ɖe amewo ta. Gake amesiwo nye Yerusalem Yeyea me tɔwo katã nye nunɔlawo. (Nyaɖeɖefia 20:6) Eye wosa vɔ gãtɔ si nye Yesu ƒe amegbetɔ deblibo ƒe agbe la zi ɖeka ɖe ɣeyiɣiawo katã nu. (Hebritɔwo 9:27, 28) Gawu la, dua me tɔ ɖesiaɖe ate ŋu ate ɖe Yehowa ŋu.

14. (a) Nukatae Yerusalem Yeyea mehiã na ɣe kple ɣleti ƒe keklẽ o? (b) Nukae Yesaya ƒe nyagblɔɖia gblɔ ku ɖe Yehowa ƒe xexeame katã ƒe habɔbɔ ŋu, eye aleke esia lɔ Yerusalem Yeyea ɖe emee?

¹⁴ Esi Yehowa ƒe ŋutikɔkɔe to Mose ŋu yi le Sinai-toa dzi la, Mose ƒe ŋkume klẽ ale gbegbe be ele be wòatsyɔ nu ŋkume le nɔvia Israel-viwo gbɔ. (Mose II, 34:4-7, 29, 30, 33) Eyata àte ŋu akpɔ alesi gbegbe du si me Yehowa ƒe keklẽ nye kekeli le ɖaa la aklẽe le susu mea? Zã mado le du ma me o. Ɣe alo ɣleti ŋutɔŋutɔ mahiã le afima o. Eƒe kekeli anɔ keklẽm mavɔmavɔe. (Tsɔe sɔ kple Timoteo I, 6:16.) Kekeli ma si me kɔ nyuie la tɔgbe ye xɔ Yerusalem Yeyea fũ. Le nyateƒe me la, ŋugbetɔ sia kple eƒe Ŋugbetɔsrɔ̃ la zu Yehowa ƒe xexeame katã ƒe habɔbɔ—eƒe “nyɔnu” la, “dziƒo Yerusalem” la ƒe fiadu—si ŋu Yesaya gblɔ nya ɖi le be: “Ɣe maganye kekeli na wò le ŋkeke me azɔ o, eye dzinu magaɖi na wò, be xexeme nakɔ o; ke boŋ Yehowa anye wò kekeli tegbee, eye wò Mawu anye wò atsyɔ̃ɖoɖo. Wò ɣe magaɖo to azɔ o, eye wò dzinu magaɖo xɔ o, elabena Yehowa lanye wò kekeli tegbee, eye wò nuxaɣi nu va yi.”—Yesaya 60:1, 19, 20; Galatiatɔwo 4:26.

Kekeli na Dukɔwo

15. Nyaɖeɖefia me nya siwo ku ɖe Yerusalem Yeyea ŋu kawoe ɖi Yesaya ƒe nyagblɔɖia?

¹⁵ Nyagblɔɖi sia ke gagblɔ ɖi be: “Anyigba dzi dukɔwo azɔ le wò kekeli nu kple fiawo le wò keklẽ ƒe dzedze nu.” (Yesaya 60:3) Nyaɖeɖefia ɖee fia be nya siawo alɔ Yerusalem Yeyea ɖe eme: “Eye dukɔwo azɔ eƒe kekeli me, eye anyigba dzi fiawo atsɔ woƒe atsyɔ̃ ava emee. Eye womatu eƒe agbowo le ŋkeke me o; elabena zã mado le afima o; eye woatsɔ dukɔwo ƒe atsyɔ̃ kple bubu ava emee.”—Nyaɖeɖefia 21:24-26.

16. Amekawoe nye ‘dukɔ’ siwo azɔ le Yerusalem Yeyea ƒe kekeli me?

¹⁶ Amekawoe nye ‘dukɔ’ siawo siwo le zɔzɔm le Yerusalem Yeyea ƒe kekeli me? Woawoe nye amesiwo nye xexe vɔ̃ɖi sia me dukɔwo ƒe akpa aɖe kpɔ, amesiwo wɔa nu wòsɔna ɖe kekeli si klẽ to ŋutikɔkɔedziƒodu sia dzi la nu. Amesiawo dometɔ gbãtɔwoe nye ameha gã la, si do go tso “dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ” me xoxo eye wowɔa ɖeka kple Yohanes habɔbɔa le ta dede agu na Mawu zã kple keli me. (Nyaɖeɖefia 7:9, 15) Ne Yerusalem Yeyea ɖi tso dziƒo vɔ eye Yesu zã ku kple Hades safuiwo tsɔ fɔ ame kukuwoe la, ame miliɔn bubu geɖe, siwo nye ‘dukɔ’ siwo va zu Yehowa kple Via si nye Yerusalem Yeyea Srɔ̃ŋutsu si le abe Alẽvi ene la lɔ̃lawo hã ava kpe ɖe wo ŋu.—Nyaɖeɖefia 1:18.

17. Amekawoe nye ‘anyigba dzi fia’ siwo ‘tsɔ ŋutikɔkɔe va’ Yerusalem Yeyea me?

¹⁷ Ekema amekawoe nye “anyigba dzi fiawo,” siwo ‘tsɔ woƒe atsyɔ̃ va emee’? Menye anyigba dzi fiawo ŋutɔŋutɔe wonye abe ƒuƒoƒo ene o, elabena wotsrɔ̃ wo le aʋa si wowɔ kple Mawu ƒe Fiaɖuƒea le Harmagedon me la me. (Nyaɖeɖefia 16:14, 16; 19:17, 18) Ðe fia mawo nye dukɔwo ƒe ame ŋkuta aɖewo siwo va zu ameha gã la me tɔwoa, alo fia siwo wofɔ ɖe tsitre siwo bɔbɔ wo ɖokui ɖe Mawu ƒe Fiaɖuƒea te le xexe yeyea meea? (Mateo 12:42) Kura o, elabena le wo dometɔ geɖe gome la, woƒe ŋutikɔkɔe nye esi tso xexeame eye wo nu yi gbaɖegbe ke. Eyata “anyigba dzi fiawo,” siwo tsɔ woƒe ŋutikɔkɔe va Yerusalem Yeyea mee nye ame 144,000, siwo “woƒle . . . tso to sia to kple gbegbɔgblɔ sia gbegbɔgblɔ kple du sia du me” be woaɖu fia kple Alẽvi Yesu Kristo. (Nyaɖeɖefia 5:9, 10; 22:5) Wotsɔ woƒe ŋutikɔkɔe si Mawu na wo la va dua mee bene woatsɔ akpe ɖe eƒe keklẽ ŋu.

18. (a) Amekawoe womaɖe mɔ na woage ɖe Yerusalem Yeyea me o? (b) Amekawo koe woaɖe mɔ na be woage ɖe dua me?

¹⁸ Yohanes yi edzi be: “Eye nusianu, si nye nu makɔmakɔ kple amesiwo wɔa ŋunyɔnuwo, eye wokaa aʋatso la, womele yiyi ge ɖe eme o, negbe amesiwo woŋlɔ ɖe Alẽvi la ƒe agbegbalẽa me la koe.” (Nyaɖeɖefia 21:27) Nusi ŋu Satana ƒe nuɖoanyia ƒe ɖi le la mate ŋu anɔ Yerusalem Yeyea me o. Togbɔ be eƒe ʋɔtruwo le ʋuʋu ɖi ɖaa hã la, womaɖe mɔ na “amesiwo wɔa ŋunyɔnuwo, eye wokaa aʋatso” be woage ɖe eme o. Xɔsegbela aɖeke manɔ du ma me o eye Babilon Gã la me tɔ aɖeke hã manɔ eme o. Eye ne ame aɖewo dze agbagba be yewoado gu du ma to ɖi ƒoƒo amesiwo ava nye emenɔlawo dzi esime wogale anyigba dzi la, woƒe agbagbadzedzewo zua dzodzro. (Mateo 13:41-43) “Amesiwo woŋlɔ ɖe Alẽvi la ƒe agbegbalẽa me,” ame 144,000 la, koe age ɖe Yerusalem Yeyea me.b—Nyaɖeɖefia 13:8; Daniel 12:3.

Agbetsitɔsisi La

19. (a) Aleke Yohanes ɖɔ Yerusalem Yeyea be yayra le edzi tom le vavam na ameƒome lae? (b) Ɣekaɣie ‘agbetsitɔsisia’ si, eye aleke míewɔ nya?

¹⁹ Yerusalem Yeyea si ƒe atsyɔ̃ɖoɖo le dzo dam la anye mɔnuɖoɖo si dzi yayra wɔnukuwo ato ava na ameƒomea si le anyigba dzi. Esiae nye nusi wogagblɔ na Yohanes: “Eye wòfia agbetsitɔsisi aɖe, si le dzo sim abe kristalo ene, hele dodom tso Mawu kple Alẽvi la ƒe fiazikpui me le eƒe ablɔ la titina lam.” (Nyaɖeɖefia 22:1, 2a) Ɣekaɣie ‘tɔsisi’ sia te sisi? Esi wòle dodom “tso Mawu kple Alẽvi la ƒe fiazikpui me” ta la, Aƒetɔ la ƒe ŋkekea ƒe gɔmedzedze le ƒe 1914 me megbe koe wòanye. Ɣemaɣie gamea su hena nudzɔdzɔ si ŋu woƒo nu le le kpẽkuku adrelia me la kpakple gbeƒãɖeɖe wɔnuku la be: “Azɔ xɔname kple ŋusẽ kpakple fiaɖuƒe la zu mía Mawu la tɔ, eye ŋusẽ la zu eƒe Kristo la tɔ.” (Nyaɖeɖefia 11:15; 12:10) Do ŋgɔ na ɣemaɣi la, womeɖo “Alẽvi la” Mesia Fiae o. Gawu la, esi tɔsisia le sisim to Yerusalem Yeyea ƒe ablɔwo dzi ta la, ele be ŋutega sia ƒe emevaɣi nanye le Satana ƒe xexeame tsɔtsrɔ̃ vɔ megbe, esime Yerusalem Yeyea ‘ɖi tso dziƒo tso Mawu gbɔ.’—Nyaɖeɖefia 21:2.

20. Nukae ɖee fia be agbetsia ƒe agbɔsɔsɔme aɖe li xoxo fifia?

²⁰ Menye esiae nye zi gbãtɔ si wole agbetsi nam ameƒomea o. Esime Yesu nɔ anyigba dzi la, eƒo nu tso tsi si naa agbe mavɔ ame ŋu. (Yohanes 4:10-14; 7:37, 38) Gawu la, esusɔ vie ko Yohanes nase amekpekpe si me lɔlɔ̃ le la be: “Gbɔgbɔ la kple ŋugbetɔ la le gbɔgblɔm bena: Va! Eye amesi le esem la, negblɔ be: Va! Eye amesi tsikɔ le ewum la, neva; amesi lɔ̃ la, nexɔ agbetsi la no faa.” (Nyaɖeɖefia 22:17) Wole amekpekpe sia gblɔm fifia gɔ̃ hã, esi fia be agbetsi gbogbo aɖe li fifia xoxo. Gake le xexe yeyea me la, tsi mawo asi atso Mawu ƒe fiazikpui la me kple to Yerusalem Yeyea dzi abe tɔsisi gã aɖe ene.

21. Nuka ƒe kpɔɖeŋue ‘agbetsitɔsisia’ nye, eye aleke tɔsisi sia ƒe ŋutega si Xezekiel kpɔ la kpe ɖe mía ŋue be míanya?

²¹ Nukae nye “agbetsitɔsisi” sia? Tsi ŋutɔŋutɔ nye nu vevi aɖe hena agbenɔnɔ. Ne womekpɔ naneke ɖu o la, woate ŋu anɔ agbe vaseɖe kwasiɖa aɖewo, gake ne womekpɔ tsi no o la, kwasiɖa ɖeka koe woate ŋu anɔ agbe ase ɖo. Tsi nye nusi klɔa ɖi hã eye ehiã vevie hena lãmesẽ. Eyata agbetsi la anye kpɔɖeŋu na nane si le vevie ŋutɔ hena ameƒomea ƒe agbe kple lãmesẽ. Wove nyagblɔɖila Xezekiel hã nu wòkpɔ “agbetsitɔsisi” sia ƒe ŋutega, eye le eƒe ŋutega la me la, tɔsisia dzi tso Yerusalem gbedoxɔa me eye wòɖade nu Ƒu Kukua me. Tete nukunuwo ƒe nukunu dzɔ! Tsi ma si me nu gbagbe aɖeke mele o eye wònye dze ɖeɖe sɔŋ la trɔ zu tsi nyui si me tɔmelãwo dzi ɖo fũ! (Xezekiel 47:1-12) Ẽ, tɔsisi si wokpɔ le ŋutega me na nane si ku tsã la gbɔ agbe, esi le kpe ɖom edzi be agbetsitɔsisia tsi tre ɖi na mɔnuɖoɖo si to Yesu Kristo dzi hena amegbetɔ ƒe agbe deblibo nana ameƒomea si ‘ku’ la ake. Tsia me ‘kɔ abe kristalo ene,’ esi fia alesi Mawu ƒe mɔnuɖoɖowo me dzae hele kɔkɔe la. Mele abe Kristodukɔa ƒe “tsi” siwo ʋu tsaka eye wowua ame la ene o.—Nyaɖeɖefia 8:10, 11.

22. (a) Afikae tɔsisia dzɔ tso, eye nukatae esia nye nusi sɔ? (b) Nukae agbetsia lɔ ɖe eme, eye nukae kpɔɖeŋutɔsisi sia lɔ ɖe eme?

²² Tɔsisia do tso “Mawu kple Alẽvi la ƒe fiazikpui la me.” Esia nye nusi sɔ, elabena nusi nye gɔmeɖokpe na Yehowa ƒe mɔnuɖoɖowo hena agbekpɔkpɔ la to tafevɔsa la dzi, eye Yehowa na esia le alesi “gbegbe [wòlɔ̃] xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ” la ta. (Yohanes 3:16) Agbetsia lɔ Mawu ƒe Nya la, si ŋu woƒo nu le le Biblia me abe tsi ene la hã ɖe eme. (Efesotɔwo 5:26) Gake menye nyateƒea koe agbetsia lɔ ɖe eme o, ke boŋ elɔ Yehowa ƒe mɔnuɖoɖo bubu ɖesiaɖe si wotu ɖe Yesu ƒe vɔsa la dzi hena amesiwo nye toɖolawo ɖeɖe tso nuvɔ̃ kple ku si me ahana agbe mavɔ wo la hã ɖe eme.—Yohanes 1:29; Yohanes I, 2:1, 2.

23. (a) Nukatae wònye nusi sɔ be agbetsitɔsisia si tso Yerusalem Yeyea ƒe ablɔwo me? (b) Ŋugbe si Mawu do na Abraham kae ava eme le esime agbetsia asi le agbɔsɔsɔ gã me bababa?

²³ Le Ƒe Akpe Ðeka Dziɖuɖua me la, woazã vɔsa la ƒe viɖewo bliboe to Yesu kple eƒe nunɔlatevi 144,000 la ƒe nunɔlanyenye dzi. Eyata esɔ be agbetsitɔsisia va to Yerusalem Yeyea ƒe ablɔ me. Amesiwo le emee nye gbɔgbɔ me Israel-viwo, amesiwo kpe ɖe Yesu ŋu be wonye Abraham ƒe dzidzimevi vavãtɔ la. (Galatiatɔwo 3:16, 29) Eyata ne agbetsi la si le agbɔsɔsɔ gã me to kpɔɖeŋudua ƒe ablɔ me la, mɔnukpɔkpɔ blibo asu “anyigba dzi dukɔwo katã” si be woayra wo ɖokui to Abraham ƒe dzidzimevia dzi. Ekema ŋugbe si Yehowa do na Abraham la ava eme bliboe.—Mose I, 22:17, 18.

Agbetiwo

24. Nukae Yohanes kpɔ azɔ le agbetsitɔsisia ƒe go eveawo dzi, eye nuka ƒe kpɔɖeŋue wonye?

²⁴ Le Xezekiel ƒe ŋutega la me la, tɔsisia va zu tɔsisi gã aɖe gɔ̃ hã, eye wòkpɔ ati tseku ƒomevi ɖesiaɖe le eƒe go eveawo dzi. (Xezekiel 47:12) Gake nukae Yohanes kpɔ? Nusiae: “Eye le tɔsisi la ƒe goawo kple eve dzi la agbeti li, si tsea ku wuieve, eye wòtsena le ɣleti sia ɣleti, eye atiawo ƒe aŋgbawo nye dɔyɔgbe na dukɔwo.” (Nyaɖeɖefia 22:2) Ele be “agbeti” siawo nanye kpɔɖeŋu na Yehowa ƒe mɔnuɖoɖo hena agbe mavɔ nana ameƒome toɖolawo.

25. Mɔnuɖoɖo gbogbo kawoe Yehowa wɔ ɖi na ameƒome toɖolawo le Paradiso si xɔ xexeame katã me?

²⁵ Mɔnuɖoɖo siwo Yehowa wɔ na amegbetɔ siwo ɖoa to la sɔ gbɔ loo! Menye ɖeko woate ŋu ano tsi fakɔname mawo ko o ke boŋ woate ŋu agbe ati mawo ƒe tsetse siwo nye atikutsetse ƒomevi vovovo siwo nyia ame la hã. Oo, ne ɖe atikutsetse ‘nyui’ mawo tɔgbe ƒe mɔnuɖoɖo si le Eden ƒe Paradisoa me nahadze mía dzila gbãtɔwo ŋu ɖe! (Mose I, 2:9) Gake Paradiso si xɔ xexeame katãe nye si azɔ, eye Yehowa wɔ mɔnuɖoɖo gɔ̃ hã be kpɔɖeŋuti mawo ƒe aŋgbawo nanye “dɔyɔgbe na dukɔwo.”c Esi wòde ŋgɔ wu atike ɖesiaɖe si wonana egbea, eɖanye gbe nyanyɛ alo atike kae o ta la, kpɔɖeŋu aŋgba mawo zazã si faa akɔ na ame la akpe ɖe ameƒome toɖolawo ŋu be woaɖo ŋutilã me kple gbɔgbɔ me blibodede gbɔ.

26. Nuka hãe agbetiawo ate ŋu anye kpɔɖeŋu na, eye nukatae?

²⁶ Ati mawo siwo tɔsisia dea tsii nyuie la ate ŋu anye kpɔɖeŋu si sɔ nyuie hã na ame 144,000 siwo nye Alẽvi la ƒe ŋugbetɔ la me tɔwo. Le woƒe anyigbadzinɔɣi la, amesiawo hã noa Mawu ƒe mɔnuɖoɖo hena agbekpɔkpɔ si to Yesu Kristo dzi ƒe tsi la eye woyɔ wo be “dzɔdzɔenyenye ƒe logotiwo.” (Yesaya 61:1-3; Nyaɖeɖefia 21:6) Wotse gbɔgbɔmeku geɖe siwo nye kafukafu na Yehowa la xoxo. (Mateo 21:43) Eye le Ƒe Akpe Ðeka Dziɖuɖua me la, woakpɔ gome le tafea ƒe mɔnuɖoɖo siwo anye ‘gbedada na dukɔwo’ tso nuvɔ̃ kple ku si me la nana me.—Tsɔe sɔ kple Yohanes I, 1:7.

Zã Magado O

27. Yayra bubu kawoe Yohanes yɔ be woava na amesiwo nu wove be woage ɖe Yerusalem Yeyea me la, eye nukatae wogblɔ be “[fiƒode] aɖeke megale anyi nɔ ge o”?

²⁷ Gege ɖe Yerusalem Yeyea me—kakaɖedzitɔe la, mɔnukpɔkpɔ aɖeke magate ŋu awɔ nuku wu ema o! Bu eŋu kpɔ ko—amegbetɔ madeblibo tsɛ mawo adze Yesu yome ayi dziƒo be woanye ŋutikɔkɔe ƒe ɖoɖo ma gbegbe me nɔlawo! (Yohanes 14:2) Yohanes na míaƒe susu ke ɖe yayra siwo me woase vivi le la ŋu vie esi wògblɔ be: “Eye [fiƒode] aɖeke megale anyi nɔ ge o, eye Mawu kple Alẽvi la ƒe fiazikpui la anɔ me, eye woƒe dɔlawo asubɔe, eye woakpɔ eƒe ŋku me, eye eƒe ŋkɔ anɔ woƒe ŋgowonu.” (Nyaɖeɖefia 22:3, 4) Esime Israel-viwo ƒe nunɔlawo va zu nugbegblẽwɔlawo la, Yehowa ƒe fiƒode va wo dzi. (Maleaxi 2:2) Yesu gblɔ be wogblẽ Yerusalem ƒe “aƒe” maɖianukware la ɖi. (Mateo 23:37-39) Gake le Yerusalem Yeyea me la, “[fiƒode] aɖeke megale anyi nɔ ge o.” (Tsɔe sɔ kple Zaxarya 14:11.) Wotsɔ dodokpɔ ƒe dzo do wo katã kpɔe le anyigba afisia, eye esi woɖu aʋa dzi la, ‘woado magblẽmagblẽ kple makumakunyenye.’ Le wo gome la, Yehowa nya, abe alesi wònyae le Yesu gome ene, be womadze anyi akpɔ gbeɖe o. (Korintotɔwo I, 15:53, 57) Hekpe ɖe eŋu la, “Mawu kple Alẽvi la ƒe fiazikpui” anɔ afima, esi ana dua nanɔ dedie ɖaa tegbee.

28. Nukatae woŋlɔ Mawu ƒe ŋkɔ ɖe Yerusalem Yeyea me tɔwo ƒe ŋgonu, eye mɔkpɔkpɔ ʋãme kawoe le wo ŋgɔ?

²⁸ Abe Yohanes ŋutɔ ene la, amesiwo ava nye dziƒodu ma me tɔwo katã nye “dɔlawo” na Mawu. Le esia ta Mawu ƒe ŋkɔ dze gaglã le woƒe ŋgonu, esi le dzesi dem wo be eyae nye woƒe Aƒetɔ. (Nyaɖeɖefia 1:1; 3:12) Woabui gomekpɔkpɔ si ƒe asixɔxɔ naneke mesɔ kplii o be woatsɔ subɔsubɔ kɔkɔe nɛ abe Yerusalem Yeyea me tɔwo ene. Esime Yesu nɔ anyigba dzi la, edo ŋugbe ʋãme aɖe na ame mawo siwo ava nye fiawo be: “[Dzidzɔtɔwoe nye] amesiwo dza le woƒe dzi me la; elabena woawoe akpɔ Mawu.” (Mateo 5:8) Dzi kae nye si adzɔ dɔla mawo be woakpɔ Yehowa ŋutɔŋutɔ ahasubɔe!

29. Nukatae Yohanes gblɔ be “zã megale dodo ge” le dziƒo Yerusalem Yeyea “o”?

²⁹ Yohanes yi edzi be: “Eye zã megale dodo ge o; eye womele akaɖi alo ɣe ƒe keklẽ hiã ge o; elabena [Yehowa] Mawu ana keklẽ wo.” (Nyaɖeɖefia 22:5a) Abe du bubu ɖesiaɖe ene la, blema Yerusalem ɖo ŋu ɖe ɣe ŋu le ŋkeke me kple ɖe dzinuɖiɖi kpakple akaɖi ŋu le zã me hena kekeli. Gake le dziƒo Yerusalem Yeyea me la, kekeli mawo mahiã o. Yehowa ŋutɔ anye kekeli na dua. Woate ŋu azã “zã” hã le kpɔɖeŋugɔmesese nu atsɔ afia fuléle, alo alesi woaɖe ɖa tso Yehowa ŋue. (Mixa 3:6; Yohanes 9:4; Romatɔwo 13:11, 12) Zã ma ƒomevi mate ŋu ado gbeɖe le Mawu ŋusẽkatãtɔ la ƒe ŋkume afisi ŋutikɔkɔe si le dzo dam le la o.

30. Aleke Yohanes ƒo ŋutega dzeania tae, eye nuka dzie Nyaɖeɖefia ka ɖo na mí?

³⁰ Yohanes ƒo ŋutega dzeani sia ta esi wògblɔ tso Mawu ƒe dɔla siawo ŋu be: “Eye woaɖu fia tso mavɔ me yi ɖe mavɔ me.” (Nyaɖeɖefia 22:5b) Nyateƒee, le ƒe akpe ɖeka la ƒe nuwuwu la, woawu tafea ƒe viɖewo zazã nu, eye Yesu atsɔ ameƒome si de blibo ade asi na Fofoa. (Korintotɔwo I, 15:25-28) Nusi le Yehowa ƒe susu me na Yesu kple ame 144,000 mawo le ema megbe la, míenya o. Gake Nyaɖeɖefia ka ɖe edzi na mí be woƒe subɔsubɔ kɔkɔe ƒe mɔnukpɔkpɔa ayi edzi tso mavɔ me yi ɖe mavɔ me.

Nyaɖeɖefia Taƒoƒo Dodzidzɔname La

31. (a) Etaƒoƒo kae Yerusalem Yeyea ŋuti ŋutega la de dzesii? (b) Nukae Yerusalem Yeyea awɔ na ameƒomea me tɔ anukwareɖila bubuwo?

³¹ Yerusalem Yeyea, si nye Alẽvi la ƒe ŋugbetɔ la, ƒe ŋutega sia me vavae nye taƒoƒo dodzidzɔname si Nyaɖeɖefia fia asii, eye esɔ nenema. Yohanes hati Kristotɔ siwo katã nɔ anyi le ƒe alafa gbãtɔ me, amesiwo woŋlɔ agbalẽa na gbã la dometɔ ɖesiaɖe kpɔ mɔ na du ma me yiyi abe gbɔgbɔmeme makumaku hatidziɖulawo kple Yesu Kristo ene. Mɔkpɔkpɔ ma kee le Kristotɔ amesiaminawo ƒe ame susɔe siwo gale anyigba dzi egbea la hã si. Eyata Nyaɖeɖefia ɖe zɔ yi eƒe taƒoƒo wɔnuku la gbɔ, esime ŋugbetɔ la ƒe xexlẽme blibo la katã wɔ ɖeka kple Alẽvi la. Emegbe to Yerusalem Yeyea dzi la, woazã Yesu ƒe tafevɔsa la ƒe viɖewo na ameƒomea, ale be mlɔeba la, anukwareɖilawo katã nage ɖe agbe mavɔ la me. Le mɔ sia nu la, Yerusalem Yeyea, abe Fia si nye Ŋugbetɔsrɔ̃ la ƒe kpeɖeŋutɔ ene la akpɔ gome le anyigba dzɔdzɔe si anɔ anyi ɖaa la ɖoɖo anyi me—eye esia katã anye hena mía Dziɖulagã Aƒetɔ Yehowa ƒe ŋutikɔkɔe.—Mateo 20:28; Yohanes 10:10, 16; Romatɔwo 16:27.

32, 33. Nukae míesrɔ̃ le Nyaɖeɖefia me, eye nukae wòle be míaƒe dzi naʋã mí be míawɔ?

³² Eyata aleke gbegbe dzi le mía dzɔmee nye si esi míele míaƒe Nyaɖeɖefiagbalẽa me dzodzro tsitotsito ƒe nuwuwu gogom! Míekpɔ Abosam ƒe agbagbadzedze mamleawo kple alesi eƒe dzidzimevi la do kpo nui keŋkeŋ eye Yehowa ƒe ʋɔnudɔdrɔ̃ dzɔdzɔewo katã va eme bliboe. Babilon Gã la nu ayi tegbee, eye Satana ƒe nuɖoanyia ƒe akpa mamlea siwo ƒe gbegblẽ womagate ŋu aɖɔ ɖo o la akplɔe ɖo. Woade Satana ŋutɔ kpakple eƒe gbɔgbɔ vɔ̃wo aʋli me eye emegbe woatsrɔ̃ wo. Yerusalem Yeye aɖu dzi kple Kristo tso dziƒo esime tsitretsitsi kple ʋɔnudɔdrɔ̃a le edzi yim, eye ameƒomea si ŋu wokpe ɖo woɖo blibodede gbɔ la akpɔ agbe mavɔ mlɔeba le anyigba dzi Paradisoa me. Aleke gbegbee nye si Nyaɖeɖefia ƒo nu tso nusiawo ŋu le mɔ si ʋã ame nue! Aleke gbegbe wòdo ŋusẽ mí enye si be ‘míagblɔ nyanyuie mavɔ sia na dukɔ kple to kple gbegbɔgblɔ ɖesiaɖe’ si le anyigba dzi egbea la! (Nyaɖeɖefia 14:6, 7) Ðe nèle wò ŋutete ɖesiaɖe wɔm le dɔ gã sia mea?

³³ Esi akpedada yɔ dzi me na mí la, mina míalé ŋku ɖe Nyaɖeɖefia ƒe nyataƒonyawo ŋu.

[Etenuŋɔŋlɔwo]