Ta Blaeve Vɔ Enyilia
Kekeli na Dukɔwo
1, 2. Nukata kekeli hiã vevie, eye viviti ka ƒomevie xɔ anyigba dzi egbea?
YEHOWA ye nye Kekelitsoƒe, “amesi wɔ ɣe, ne wòaklẽ le ŋkeke me, eye wòɖo na ɣleti kple ɣletiviwo be, woaklẽ le zã me.” (Yeremya 31:35) Esia ɖeɖe fia be ele be míakpɔe be eyae nye Agbedzɔƒe, elabena kekeli naa agbe. Ne menye ɖe ɣe ƒe dzoxɔxɔ kple keklẽ ɖoa anyigba dzi ɣesiaɣi o la, anye ne alesi míenya agbee fifia la manya nɔ o. Anye ne womate ŋu anɔ míaƒe anyigba sia dzi o.
2 Eyata eka mí vevie ŋutɔ be esi Yehowa lé ŋku ɖe nusi ava dzɔ le míaƒe ŋkekea me ŋu la, egblɔ be viviti ƒe ɣeyiɣi aɖe ava, ke menye kekeliɣeyiɣi o. Gbɔgbɔ ʋã Yesaya wòŋlɔ bena: “Viviti xɔ anyigba dzi, eye blukɔ tsyɔ dukɔwo.” (Yesaya 60:2) Le nyateƒe me, gbɔgbɔmeviviti ŋue nya siawo ku ɖo, ke menye ŋutilã me tɔ o, gake meɖe alesi wònye ŋkubiãnyae dzi kpɔtɔ o. Amesiwo si gbɔgbɔmekekeli mele o magava ate ŋu anɔ agbe mlɔeba o, abe alesi wòle le amesiwo gbɔ ɣe ƒe keklẽ mete ŋu ɖona o gome ene.
3. Afikae míate ŋu akpɔ kekeli le le ɣeyiɣi doviviti siawo me?
3 Míate ŋu aŋe aɖaba aƒu gbɔgbɔmekekeli si Yehowa naa mí dzi le vivitidoɣi sia dzi o. Ele vevie be míana Mawu ƒe Nya la naklẽ ɖe míaƒe afɔtoƒe, eye míaxlẽ Biblia gbesiagbe ne anya wɔ. (Psalmo 119:105) Kristotɔwo ƒe kpekpewo naa mɔnukpɔkpɔ mí be míade dzi ƒo na mía nɔewo be míayi edzi azɔ ‘ame dzɔdzɔewo ƒe toƒe.’ (Lododowo 4:18; Hebritɔwo 10:23-25) Ŋusẽ si míekpɔna tsoa Biblia sɔsrɔ̃ veviedodotɔe kple Kristotɔwo ƒe hadede tuameɖowo me kpena ɖe mía ŋu be viviti si li le ‘ŋkeke mamlɛ’ siawo me, si ava wu enu ɖe “Yehowa ƒe dzikudogbe” gã dzi la nagami mí o. (Timoteo II, 3:1; Zefanya 2:3) Ŋkeke ma le du dzi gbɔna! Ava godoo abe alesi ŋkeke ma tɔgbe va blema Yerusalemtɔwo dzii ene.
Yehowa ‘He Ʋɔnudɔdrɔ̃ Va Amewo Dzi’
4, 5. (a) Mɔ ka nue Yehowa atso ɖe Yerusalem ŋu le? (b) Nukata míate ŋu aƒo nya ta be ame ʋɛ aɖewo koe tsi agbe le Yerusalem ƒe tsɔtsrɔ̃ le ƒe 607 D.M.Ŋ. me la me? (Kpɔ etenuŋɔŋlɔ.)
4 Le Yesaya ƒe nyagblɔɖi dodzidzɔnamea ƒe kpukpui mamlɛawo me la, Yehowa ƒo nu tso nusiwo adzɔ do ŋgɔ na eƒe dzikudogbe la ŋu kɔte. Míexlẽ be: “Yehowa gbɔna le dzo me, eye eƒe tasiaɖamwo le abe ahom ene, ne wòaɖo eteƒe le eƒe dɔmedzoe ƒe dziku me, eye wòablu le dzoƒaɖe me. Elabena dzo kple yi Yehowa atsɔ adrɔ̃ ʋɔnu ŋutilãwo katãe, eye Yehowa ƒe ame wuwuwo asɔ gbɔ.”—Yesaya 66:15, 16.
5 Ele be nya mawo nakpe ɖe Yesaya ŋɔlimetɔwo ŋu woakpɔ afɔku si me wole la adze sii. Ɣeyiɣia gbɔna esime Babilontɔwo azu Yehowa ƒe ametsrɔ̃lawo ava dze Yerusalem dzi, eye woƒe ʋuʋudedi abla kɔtɔɔ ɖe woƒe tasiaɖamwo yome abe ahom ene. Ŋɔdzinu kae nye si eteƒe kpɔkpɔ anye! Yehowa azã amedzidzelaawo ahe eya ŋutɔ ƒe ʋɔnudɔdrɔ̃ siwo le abe dzo ene ava Yudatɔ mawɔnuteƒewo katã ƒe “ŋutilãwo” dzi. Ðeko wòawɔ abe Yehowa ŋutɔe le aʋa wɔm kple eƒe dukɔa ene. Eƒe “dɔmedzoe ƒe dziku” nu mafa o. Yudatɔ geɖe atsi “Yehowa ƒe ame wuwuwo” me. Nyagblɔɖi sia va eme le ƒe 607 D.M.Ŋ. me.a
6. Nusiwo dze mokaka kawoe yi edzi le Yuda?
6 Ðe Yehowa tɔ dzɔ be ‘wòhe ʋɔnudɔdrɔ̃’ va eƒe dukɔa dzia? Ẽ, etɔ dzɔ! Míekpɔe zi geɖe le Yesaya ƒe agbalẽa me dzodzro me be togbɔ be Yudatɔwo ɖe adzɔgbe na Yehowa hã la, wonyrɔ wo ɖokui ɖe alakpasubɔsubɔ me vĩ—eye woƒe nuwɔnawo mele ɣaɣla ɖe Yehowa o. Míegakpɔ esia ake le nyagblɔɖia me nya siwo kplɔe ɖo me be: “Yehowa be: Amesiwo wɔa wo ɖokui kɔkɔe, eye wokɔa wo ɖokui ŋu hena trɔ̃kpɔwo, eye wokplɔa ame ɖeka ɖo le dome, amesiwo ɖua halã, nu nyɔŋuwo kple afiwo la, wo katã nu ayi.” (Yesaya 66:17) Ðe Yudatɔ mawo “wɔa wo ɖokui kɔkɔe, eye wokɔa wo ɖokui ŋu” ale be woadzra ɖo ɖe tadedeagu dzadzɛa ŋua? Kura o. Ðe woƒo wo ɖokui ɖe trɔ̃subɔsubɔ ƒe ameŋukɔkɔ nuwɔnawo me le trɔ̃kpɔ tɔxɛwo me boŋ. Emegbe wotsɔa ŋukeklẽ ɖua halã kple lã bubu siwo ŋu mekɔ le Mose ƒe Sea me o.—Mose III, 11:7, 21-23.
7. Aleke Kristodukɔa ɖi Yudatɔ trɔ̃subɔlawoe?
7 Nɔnɔme nyɔŋu ka gbegbe mee nye si dukɔ si le nubabla me kple Mawu vavã ɖeka kolia la va nɔ! Gake bu eŋu kpɔ: Nɔnɔme nyɔŋu ma tɔgbe li egbea le Kristodukɔa ƒe subɔsubɔhawo me. Amesiawo hã gblɔna nenema ke be yewosubɔa Mawu, eye wo kplɔlawo dometɔ geɖe wɔna abe ɖe wovɔ̃a Mawu ene. Ke hã wotsɔa trɔ̃subɔlawo ƒe nufiafia kple kɔnuwo ƒoa ɖi wo ɖokuii, si ɖenɛ fiana be wole gbɔgbɔmeviviti me. Viviti tsiɖitsiɖi ka gbegbee nye si me wole!—Mateo 6:23; Yohanes 3:19, 20.
‘Woava Kpɔ Nye Ŋutikɔkɔe’
8. (a) Nukae adzɔ ɖe Yuda kple Kristodukɔa siaa dzi? (b) Gɔmesese ka nue dukɔwo ‘akpɔ Yehowa ƒe ŋutikɔkɔe’ le?
8 Ðe Yehowa léa ŋku ɖe Kristodukɔa ƒe nuwɔna siwo dze na mokaka kple eƒe alakpanufiafiawo ŋua? Xlẽ Yehowa ƒe nya siwo kplɔe ɖo si Yesaya ŋlɔ ɖi nàkpɔ nya ta si nàƒo ɖa: “Nye la, menya woƒe nuwɔwɔwo kple tameɖoɖowo. Azã su, be woaƒo dukɔwo katã kple aɖewo nu ƒu, eye woava akpɔ nye ŋutikɔkɔe la.” (Yesaya 66:18) Yehowa nya amesiwo be yewonye esubɔlawo la ƒe dɔwɔwɔwo kple woƒe tamesusuwo hã eye ele klalo be yeadrɔ̃ ʋɔnu wo. Yuda gblɔ be yexɔ Yehowa dzi se, gake eƒe legbasubɔsubɔ kple trɔ̃subɔsubɔ nuwɔnawo mesɔ ɖe dzixɔse ma nu o. Dzodzroe dukɔa me tɔwo ‘kɔ wo ɖokui ŋu’ le trɔ̃subɔsubɔkɔnuwo me. Woatsrɔ̃ dukɔa, eye ne nusia dzɔ la, dukɔ siwo ƒo xlãe siwo hã subɔa trɔ̃wo la akpɔe ŋkume kple ŋkumee. Dukɔ siawo ‘akpɔ Yehowa ƒe ŋutikɔkɔe’ le gɔmesese sia nu be woakpɔ nusiwo adzɔ la teƒe eye azi wo dzi woalɔ̃ ɖe edzi be Yehowa ƒe nya va eme nyateƒe. Aleke nya siawo katã ku ɖe Kristodukɔa ŋui? Ne eƒe nuwuwu ɖo la, woazi exɔlɔ̃ xoxoawo kple amesiwo tsaa asi kplii dzi woanɔ te anɔ nu kpɔm wɔnamanɔŋutɔe ne Yehowa ƒe nya va eme.—Yeremya 25:31-33; Nyaɖeɖefia 17:15-18; 18:9-19.
9. Nyanyui kae Yehowa gblɔ?
9 Ðe Yerusalem ƒe tsɔtsrɔ̃ le ƒe 607 D.M.Ŋ. me fia be ɖasefowo maganɔ Yehowa si le anyigba dzi oa? Ao. Nuteƒewɔla ɖedzesiwo, abe Daniel kple eƒe zɔhɛ etɔ̃awo, ayi edzi asubɔ Yehowa ne wozu aboyomewo le Babilon gɔ̃ hã. (Daniel 1:6, 7) Ẽ, Yehowa ƒe ɖasefo nuteƒewɔlawo anɔ anyi ɣesiaɣi, eye le ƒe 70 ƒe nuwuwu la, ŋutsu kple nyɔnu nuteƒewɔlawo adzo le Babilon agbɔ va Yuda be woagbugbɔ tadedeagu dzadzɛtɔ aɖo anyi. Nya si Yehowa gagblɔ la ku ɖe nusia ŋu: “Mawɔ dzesi ɖe wo ŋu, eye maɖo ame sisiwo ɖa tso wo dome ɖe dukɔwo, ɖe Tarsis, Pul kple Lud, amesiwo nye aŋutrɔdalawo, ɖe Tubal kple Yawan kpakple ɖe didiƒe ƒukpowo, amesiwo mese ŋkɔnye o, eye womekpɔ nye ŋutikɔkɔe o la gbɔ, eye woaɖe gbeƒã nye ŋutikɔkɔe le dukɔwo dome.”—Yesaya 66:19.
10. (a) Gɔmesese ka nue Yudatɔ siwo wona ablɔɖee tso Babilon la anye dzesi le? (b) Amekawoe nye dzesi egbea?
10 Ŋutsu kple nyɔnu nuteƒewɔla gbogbo siwo atrɔ yi Yerusalem le ƒe 537 D.M.Ŋ. me anye dzesi wɔnuku aɖe, woanye ɖaseɖiɖi be Yehowa ɖe eƒe dukɔ la. Anye ne amekae aku drɔ̃e akpɔ be Yudatɔ aboyomenɔlawo ava nɔ ablɔɖe me gbeɖeka be woagawɔ tadedeagu dzadzɛtɔa ƒe dɔwo le Yehowa ƒe gbedoxɔa me? Le mɔ si sɔ kplii nu la, amesiwo zu “dzesi kple kpɔɖeŋu” le ƒe alafa gbãtɔ mee nye Kristotɔ amesiaminawo, amesiwo gbɔ ɖokuibɔbɔla siwo di be yewoasubɔ Yehowa la yi. (Yesaya 8:18; Hebritɔwo 2:13) Egbea Kristotɔ amesiamina siwo le dzidzedze kpɔm le woƒe anyigba si wogbugbɔ ɖo anyi dzi la nye dzesi ɖedzesi aɖe le anyigba dzi. (Yesaya 66:8) Wonye Yehowa ƒe gbɔgbɔ la ƒe ŋusẽ ƒe dɔwɔwɔ ƒe kpeɖodzi siwo woate ŋu akpɔ ŋutɔŋutɔ, eye woƒe nuwɔna hea ɖokuibɔbɔla siwo ƒe dzi ʋãa wo be woasubɔ Yehowa.
11. (a) Aleke dukɔwo me tɔwo awɔ ava nya nu tso Yehowa ŋu le gbugbɔɖoanyia megbe? (b) Aleke Zaxarya 8:23 va eme gbãe?
11 Gake aleke dukɔwo me tɔ siwo mese Yehowa ŋuti nya aɖeke o awɔ ava dze si eyama le ƒe 537 D.M.Ŋ. ƒe gbugbɔɖoanyia megbe? Menye Yudatɔ nuteƒewɔlawo katãe atrɔ ayi Yerusalem le aboyomenɔnɔ le Babilon la megbe o. Ame aɖewo, abe Daniel ene, akpɔtɔ anɔ Babilon. Ame bubuwo akaka ayi anyigba ƒe dzogoe eneawo dzi. Va ɖo ƒe alafa atɔ̃lia D.M.Ŋ. me la, Yudatɔwo nɔ Persia-fiaɖuƒea katã me. (Ester 1:1; 3:8) Ðikeke mele eme o be wo dometɔ aɖewo ƒo nu tso Yehowa ŋu na woƒe aƒelika siwo nye trɔ̃subɔlawo, elabena ame geɖe tso dukɔ mawo me va zu Yudatɔwo. Anye aleae wònɔ le Etiopiatɔ aƒedzikpɔla si Kristotɔ nusrɔ̃la Filipo ɖe gbeƒã na le ƒe alafa gbãtɔ me la gome. (Dɔwɔwɔwo 8:26-40) Nusiawo katã dzɔ wònye nyagblɔɖila Zaxarya ƒe nya siwo gbɔna me vava gbãtɔ, esi gblɔ be: “Ɣemaɣi la ŋutsu ewo atso dukɔwo ƒe gbegbɔgblɔwo katã me alé Yuda-ŋutsu ɖeka ƒe awu toga agblɔ bena: Míayi kpli mi, elabena míese be, Mawu li kpli mi.” (Zaxarya 8:23) Yehowa ɖo kekeli ɖe dukɔwo vavã!—Psalmo 43:3.
Woatsɔ ‘Nuɖuvɔsa Vɛ na Yehowa’
12, 13. Mɔ ka nue woakplɔ “nɔviwo” ava Yerusalem tso ƒe 537 D.M.Ŋ. mee?
12 Esi wogbugbɔ Yerusalem tso la, Yudatɔ siwo kaka yi teƒe siwo didi tso wo denyigba gbɔ la abu dua kple eƒe nunɔlanyenye ƒe ɖoɖo si wogbugbɔ ɖo anyi la be enye tadedeagu dzadzɛ ƒe nɔƒe. Wo dometɔ geɖe azɔ mɔ didiwo ava ɖu ƒezãwo le afima. Gbɔgbɔ ʋã Yesaya wòŋlɔ bena: “Woakplɔ mia nɔviwo katã tso dukɔwo katã dome aɖo sɔwo dzi kple tasiaɖam kple apakawo me kple tedzisɔwo kple kposɔwo dzi abe [nunana, “NW”] ene na Yehowa ahava Yerusalem le nye to kɔkɔe la dzi, abe alesi Israel-viwo tsɔa [nunana, “NW”] dea nu dzadzɛwo me vaa Yehowa ƒe mee ene, Yehowa ye gblɔe! Yehowa be: Matsɔ wo dometɔ aɖewo hã awɔ nunɔlawo kple Lewi-viwoe!”—Yesaya 66:20, 21.
13 ‘Nɔvi mawo siwo tso dukɔwo katã dome’ la dometɔ aɖewo nɔ eteƒe le Pentekoste-ŋkekea dzi esime wokɔ gbɔgbɔ kɔkɔe ɖe Yesu ƒe nusrɔ̃lawo dzi. Nuŋlɔɖia xlẽ be: “Yudatɔ aɖewo nɔ Yerusalem, ŋutsu, siwo vɔ̃a Mawu la, wotso dukɔ, siwo katã le dziƒo te la me.” (Dɔwɔwɔwo 2:5) Wova Yerusalem be yewoava de ta agu le Yudatɔwo ƒe kɔa nu, gake esime wose Yesu Kristo ŋuti nyanyui la, wo dometɔ geɖe xɔ edzi se eye wona nyɔnyrɔ wo.
14, 15. (a) Aleke Kristotɔ amesiaminawo ƒo woƒe ‘gbɔgbɔmenɔvi’ geɖe nu ƒui le Xexemeʋa I megbe, eye aleke wokplɔ amesiawo vɛ na Yehowa abe ‘nunana siwo le nu dzadzɛ me’ ene? (b) Mɔ ka nue Yehowa ‘tsɔ wo dometɔ aɖewo wɔ nunɔlawoe’ le? (d) Amekawoe nye Kristotɔ amesiamina siwo kpɔ gome le woƒe gbɔgbɔmenɔviwo nuƒoƒoƒu me dometɔ aɖewo? (Kpɔ aɖaka si le axa sia.)
14 Ðe nyagblɔɖi sia va eme le míaƒe ɣeyiɣia mea? Ẽ, eva eme. Le Xexemeʋa I megbe la, Yehowa subɔla amesiaminawo kpɔe dze sii tso Ŋɔŋlɔawo me be woɖo Mawu ƒe Fiaɖuƒea anyi ɖe dziƒo le ƒe 1914 me. To Biblia sɔsrɔ̃ nyuie me la, wokpɔe be woagaƒo Fiaɖuƒe domenyila, alo ‘nɔvi,’ bubuwo nu ƒu. Subɔla siwo ƒo dzi nɔ ɖo ʋu ƒomevi vovovo yi ‘anyigba ƒe teƒe didiwo’ va di amesiwo ate ŋu ava zu amesiamina susɔea me tɔwo, eye Kristodukɔa ƒe sɔlemehawo mee woƒe akpa gãtɔ do tso. Esi woke ɖe amesiawo ŋu la, wokplɔ wo vɛ wozu nunana na Yehowa.—Dɔwɔwɔwo 1:8.
15 Amesiamina siwo nu woƒo ƒu le gɔmedzeƒe mawo me la mekpɔ mɔ be Yehowa axɔ yewo le nɔnɔme si me yewonɔ hafi Biblia me nyateƒea ƒe sidzedze va su yewo si la me o. Wowɔ afɔɖeɖewo tsɔ kɔ wo ɖokui ŋui tso gbɔgbɔ me kple agbenɔnɔ me ɖiƒoamenuwo me ale be woate ŋu azu ‘nunana siwo le nu dzadzɛ me,’ alo abe alesi apostolo Paulo gblɔe ene la, woazu ‘ɖetugbi dzadzɛ na Kristo.’ (Korintotɔwo II, 11:2) Tsɔ kpe ɖe nufiafia dadawo gbegbe ŋu la, eva hiã be amesiaminawo nasrɔ̃ alesi womade akpa aɖeke dzi kura le xexe sia me dunyahenyawo me o. Le ƒe 1931 me, esime wokɔ Yehowa subɔlawo ŋu alesi dze la, Yehowa na mɔnukpɔkpɔ wo be yeƒe ŋkɔ nanɔ wo ŋu ale be woyɔ wo be Yehowa Ðasefowo. (Yesaya 43:10-12) Gake mɔ ka nue Yehowa ‘atsɔ wo dometɔ aɖewo awɔ nunɔlawoe’ le? Amesiamina siawo ƒe ƒuƒoƒoa va zu “fia nunɔlanyenye, dukɔ kɔkɔe,” si tsɔa kafukafuvɔsawo naa Mawu.—Petro I, 2:9; Yesaya 54:1; Hebritɔwo 13:15.
Amewo Nuƒoƒoƒudɔa Gale Edzi Yim
16, 17. Amekawoe nye “miaƒe ƒome” la le Xexemeʋa I megbe?
16 “Fia nunɔlanyenye” ma ƒe xexlẽme bliboae nye ame 144,000, eye le ɣeyiɣi aɖe megbe la, woƒo wo nu ƒu vɔ. (Nyaɖeɖefia 7:1-8; 14:1) Ðe ema he amewo nuƒoƒoƒudɔa va nuwuwua? Ao. Yesaya ƒe nyagblɔɖia yi edzi be: “Yehowa be: Alesi dziƒo yeye kple anyigba yeye, si wɔ ge mala la, anɔ anyi le ŋkunye mee la, nenema ke miaƒe ƒome kple miaƒe ŋkɔ anɔ anyi tegbee.” (Yesaya 66:22) Yudatɔ siwo trɔ gbɔ tso aboyo me le Babilon la ate vidzidzi, le nya mawo me vava gbãtɔ me. Esia na woɖo Yudatɔwo ƒe ame susɔe siwo wogbugbɔ ɖo te, siwo nye “anyigba yeye” si le Yudatɔwo ƒe dɔdzikpɔla, siwo nye “dziƒo yeye” la te gɔme anyi wòli ke nyuie. Gake nyagblɔɖia va eme wòɖe dzesi wu le míaƒe ŋkekea me.
17 “Ƒome” si gbɔgbɔmenɔviwo ƒe dukɔ ma aɖo anyie nye “ameha gã” siwo ƒe mɔkpɔkpɔe nye agbe mavɔ nɔnɔ le anyigba dzi. “[Wotso] dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me,” eye wole tsitre “ɖe fiazikpui la ŋgɔ kple alẽvi la ƒe ŋku me.” Amesiawo ‘nyã woƒe awuwo eye wowɔ wo ɣie le Alẽvi la ƒe ʋu me.’ (Nyaɖeɖefia 7:9-14; 22:17) Egbea “ameha gã” la le dodom tso gbɔgbɔmeviviti me hele kekeli si tso Yehowa gbɔ la gbɔ vam. Woɖea Yesu Kristo dzixɔxɔse fiana, eye wodzea agbagba be yewoanɔ dzadzɛ le gbɔgbɔ me kple le agbenɔnɔ me, abe wo nɔviŋutsu kple nɔvinyɔnu amesiaminawo ke ene. Woƒe ƒuƒoƒoa yi edzi le subɔsubɔm le Kristo ƒe mɔfiafia te eye ‘woanɔ tsitre’ tegbee!—Psalmo 37:11, 29.
18. (a) Aleke ameha gã la me tɔwo wɔ nu abe wo nɔvi amesiaminawo ene? (b) Aleke amesiaminawo kple woƒe zɔhɛwo dea ta agu na Yehowa le “dzinu yeye sia dzinu yeye kple dzudzɔgbe sia dzudzɔgbe” dzii?
18 Ŋutsu kple nyɔnu dɔsesẽwɔla siawo siwo si anyigbadzinɔnɔ ƒe mɔkpɔkpɔ le la nya be togbɔ be ele vevie be yewoanɔ dzadzɛ le agbenɔnɔ me kple le gbɔgbɔ me hã la, nu bubu aɖewo hã hiã hafi yewoƒe nu nadze Yehowa ŋu. Amewo nuƒoƒoƒudɔa gale edzi yim vevie, eye wodina be yewoakpɔ gome le eme. Nyaɖeɖefia ƒe agbalẽa gblɔ ɖi le wo ŋu be: “Wole Mawu ƒe fiazikpui la ŋgɔ, eye wosubɔnɛ zã kple keli le eƒe xɔ la me.” (Nyaɖeɖefia 7:15) Nya mawo naa míeɖoa ŋku Yesaya ƒe nyagblɔɖia ƒe kpukpui si do ŋgɔ na mamlɛtɔ la dzi, si gblɔ be: “[Ava] me, ne dzinu yeye sia dzinu yeye kple dzudzɔgbe sia dzudzɔgbe ɖo la, ŋutilãwo katã ava ado gbe ɖa le ŋkunye me, Yehowa ye gblɔe!” (Yesaya 66:23) Nusia le dzɔdzɔm egbea. “Ne dzinu yeye sia dzinu yeye kple dzudzɔgbe sia dzudzɔgbe ɖo”—si fia ɣletia ƒe kwasiɖa ɖesiaɖe me—la, Kristotɔ amesiaminawo kple woƒe zɔhɛ, ameha gã la, va ƒoa ƒu dea ta agu na Yehowa. Alesi wowɔa esiae la dometɔ aɖewoe nye Kristotɔwo ƒe kpekpewo dede kple dutoƒosubɔsubɔdɔa wɔwɔ. Ðe nènye amesiwo ‘va dzea klo ɖe Yehowa ŋkume’ edziedzi la dometɔ ɖekaa? Yehowa ƒe amewo kpɔa dzidzɔ geɖe le esia wɔwɔ me, eye ameha gã la me tɔwo le mɔ kpɔm na ɣeyiɣi si me “ŋutilãwo katã”—agbagbeawo katã—asubɔ Yehowa le “dzinu yeye sia dzinu yeye kple dzudzɔgbe sia dzudzɔgbe” dzi ayi ɖe mavɔmavɔ me.
Mawu ƒe Futɔwo ƒe Nuwuwu Keŋkeŋ
19, 20. Nukae wozã Gehenna tsɔ wɔ le Biblia ƒe ɣeyiɣiwo me, eye nuka ƒe kpɔɖeŋue wònye?
19 Esusɔ kpukpui ɖeka le Yesaya ƒe nyagblɔɖi si me dzrom míele la me. Wotsɔ nya siawo ƒo agbalẽa tae be: “Woado ayi, be woakpɔ amesiwo dze go ɖem la ƒe kukuwo; elabena woƒe nyẽwo maku o, woƒe dzo matsi o, eye woanye ŋunyɔ na ŋutilãwo katã.” (Yesaya 66:24) Anɔ eme be nyagblɔɖi sia nɔ susu me na Yesu Kristo esime wòde dzi ƒo na eƒe nusrɔ̃lawo be woanɔ agbe si bɔbɔ ɖe anyi eye woatsɔ Fiaɖuƒea ƒe nuwo aɖo nɔƒe gbãtɔ. Egblɔ be: “Ne wò ŋku ɖia nu wò la, hoe le eme; enyo na wò bena, nayi ɖe mawufiaɖuƒe la me kple ŋku ɖeka, wu esi ŋku eve nanɔe na wò, eye woatsɔ wò aƒu gbe ɖe [Gehenna, NW] me, afisi woƒe nyẽ mekuna le o, eye dzo la hã metsina le o.”—Marko 9:47, 48; Mateo 5:29, 30; 6:33.
20 Nukata woyɔ teƒe sia be Gehenna? Ƒe alafa geɖe enye sia va yi la, Yudatɔ agbalẽnyala David Kimhi ŋlɔ bena: “Enye teƒe . . . si te ɖe Yerusalem ŋu, eye wònye teƒe nyɔŋu aɖe, eye afimae wotsɔa nu makɔmakɔwo kple nu kukuwo ƒua gbe ɖo. Azɔ hã dzo nɔa bibim le afima ɣesiaɣi be wòafiã nu makɔmakɔawo kple nu kukuawo ƒe ƒuwo. Eyata woyɔ ame vɔ̃ɖiwo ƒe ʋɔnudɔdrɔ̃ le kpɔɖeŋumɔ nu be Gehinnom.” Ne wotsɔa gbeɖuɖɔ kple amesiwo wobu be womedze be woaɖi wo o ƒe kukuawo ƒua gbe ɖe Gehenna, abe alesi Yudatɔ agbalẽnyala sia gblɔe ene la, ke mɔ nyuitɔ si dzi woato aɖe gbeɖuɖɔ sia ɖae nye be woatɔ dzoe. Nusi dzoa mete ŋu fiã o la, nyẽwo ɖunɛ. Mawu ƒe futɔwo ƒe nuwuwu keŋkeŋ ƒe kpɔɖeŋu kae wowɔ wòsɔ ale!b
21. Amekawoe Yesaya ƒe agbalẽa taƒoƒo nye dzidzɔ gã aɖe na, eye nukatae?
21 Esi woƒo nu tso ame kukuwo, dzo, kple nyẽwo ŋu alea ta la, ɖe menye nyateƒe be alesi wowu Yesaya ƒe nyagblɔɖi ʋãmea nu la ɖi vɔvɔ̃ ŋutɔ oa? Ðikeke mele eme o be nenemae amesiwo ɖoe be Mawu ƒe futɔwo ko yewoanye la abui. Gake alesi Yesaya ɖɔ ame vɔ̃ɖiwo tsɔtsrɔ̃ mavɔe la doa dzidzɔ geɖe na Mawu xɔlɔ̃wo ya. Ehiã be Yehowa ƒe amewo nakpɔ kakaɖedzi sia be yewoƒe futɔwo magakpɔ ŋusẽ ɖe yewo dzi gbeɖe azɔ o. Tsɔtsrɔ̃ mavɔ ava na futɔ mawo siwo na Mawu subɔlawo kpe fu geɖe eye wohe vlododo geɖe va Mawu ƒe ŋkɔa dzii. Ekema “xaxa mado ta ɖa zi evelia o.”—Naxum 1:9.
22, 23. (a) Gblɔ mɔ siwo nu Yesaya ƒe agbalẽa sɔsrɔ̃ ɖe vi na wò le la dometɔ aɖewo. (b) Esi míesrɔ̃ Yesaya ƒe agbalẽa vɔ la, nukae nye wò tameɖoɖo kplikpaa, eye nukae nèle mɔ kpɔm na?
22 Esi míele Yesaya ƒe agbalẽa me dzodzro nu wum la, míekpɔe kɔte be menye ŋutinya gbɔlo koe Biblia-gbalẽ ma nye o. Gbedasi aɖe le eme na mí egbea. Ne míebu ɣeyiɣi sesẽ si me Yesaya nɔ ŋu la, míate ŋu akpɔ nusiwo ɖi wo nɔewo le ɣemaɣi kple míaƒe ŋkekea me. Dunyahehe me zitɔtɔ, mawusubɔsubɔ me alakpanuwɔwɔ, ʋɔnu madzɔmadzɔ dɔdrɔ̃, kple nuteƒewɔlawo kpakple ame dahewo teteɖeanyi bɔ ɖe Yesaya ƒe ɣeyiɣia me fũ, eye wobɔ ɖe mía tɔ hã me nenema ke. Yudatɔ nuteƒewɔla siwo nɔ anyi le ƒe alafa adelia D.M.Ŋ. ada akpe ɖe Yesaya ƒe nyagblɔɖia ta godoo, eye esɔsrɔ̃ faa akɔ na mí amesiwo li egbea.
23 Le ɣeyiɣi sesẽ sia si me viviti xɔ anyigba dzi eye blukɔ tsyɔ dukɔwo la, mí katã míedaa akpe geɖe be Yehowa to Yesaya dzi na kekeli ameƒomea katã! Nusi gbɔgbɔmekekeli ma ahe vɛ ŋutɔŋutɔe nye agbe mavɔ na amesiwo katã xɔe tso dzi bliboe me, eɖanye dukɔ alo to ka me tɔwoe wonye o. (Dɔwɔwɔwo 10:34, 35) Eyata neva eme be míayi edzi azɔ le Mawu ƒe Nya la ƒe kekelia me, míaxlẽe gbesiagbe, míade ŋugble le eŋu, eye míade asixɔxɔ gbedasi si le eme ŋu. Esia ahe yayra mavɔ vɛ na mía ŋutɔwo eye wòana woakafu Yehowa ƒe ŋkɔ kɔkɔe la!
[Etenuŋɔŋlɔwo]
a Esi Yeremya 52:15 nɔ alesi nuwo nɔ le Babilontɔwo ƒe Yerusalem tsɔtsrɔ̃ vɔ megbe ŋu nya gblɔm la, eƒo nu tso ‘ame dahewo dometɔ aɖewo, dukɔ la ƒe ame mamlɛa, siwo kpɔtɔ ɖe dua me’ ŋu. Insight on the Scriptures, Babla 1, axa 415, gblɔ esi wònɔ nu ƒom tso nya sia ŋu be: “Edze ƒã be nyagbɔgblɔ ‘siwo kpɔtɔ ɖe dua me’ la fia be dɔwuame, dɔléle, alo dzo wu ame gbogbo aɖewo, alo be wowu wo le aʋa la me.”
b Esi wònye nu kukuwo, ke menye ame gbagbewo o, ye wofiãna le Gehenna ta la, teƒe sia menye funyafunya mavɔ wɔameƒe ƒe kpɔɖeŋu o.
[Aɖaka si le axa 409]
Amesiamina Siwo Nye Nunanawo na Yehowa tso Dukɔwo Katã Me
Le ƒe 1920 me la, Juan Muñiz dzo le United States yi Spain eye tso afima eyi Argentina, afisi wòkpɔ egbɔ be wowɔ nuwo ɖe ɖoɖo nu le le amesiaminawo ƒe hamewo me. Tso ƒe 1923 me yina la, nyateƒea ƒe kekeli klẽ na dzianukwaretɔ siwo le Ɣetoɖoƒe Afrika esime dutanyanyuigblɔla William R. Brown (si woyɔna zi geɖe be Bible Brown) dze Fiaɖuƒegbedasia gbɔgblɔ gɔme le teƒe siwo dometɔ aɖewoe nye Sierra Leone, Ghana, Liberia, Gambia, kple Nigeria. Le ƒe ma ke me Canadatɔ George Young yi Brazil eye tso afima eyi Argentina, Costa Rica, Panama, Venezuela, kple Soviet-dukɔwo gɔ̃ hã me. Le ɣeyiɣi ma ke me lɔƒo la, Edwin Skinner zɔ ƒudzimɔ tso England yi India, afisi wòdze agbagba geɖe le hena ƒe gbogbo aɖewo le nuŋeŋedɔa me.
[Nɔnɔmetata si le axa 411]
Yudatɔ siwo nɔ anyi le Pentekoste-ŋkekea dzi la dometɔ aɖewo nye ‘nɔvi siwo tso dukɔwo katã me’
[Nɔnɔmetata si xɔ axa 413]