Ta Asiekelia

Ðo Ŋu Ðe Yehowa Ŋu le Xaxaɣi

Yesaya 7:1–8:18

 1. Nukata Yesaya ta 7 kple 8 lia me dzodzro aɖe vi na Kristotɔ siwo li egbea?

NƆNƆME eve aɖewo siwo tsi tre ɖe wo nɔewo ŋu dze le Yesaya ƒe ta 7 kple 8 lia me. Yesaya kple Axaz siaa nye dukɔ si ɖe adzɔgbe na Yehowa me tɔwo; Mawu de dɔ wo ame evea si, ɖeka nye nyagblɔɖila eye evelia nye Yuda-fia; wo ame evea dze ŋgɔ ŋɔdzidoname ɖeka ma ke—eyae nye be futɔwo ƒe aʋakɔ siwo sesẽ wu va dze Yuda dzi. Gake Yesaya tsɔ kaka ɖe Yehowa dzi dze ŋgɔ ŋɔdzidonameae, ke Axaz ya nɔ vɔvɔ̃m. Nukata alesi wowɔ nui le nɔnɔme sia me to vovo tso wo nɔewo tɔ gbɔ? Esi futɔwo ƒo xlã Kristotɔ siwo li egbea nenema ke ta la, enyo be woadzro Yesaya ƒe ta eve siawo me be woakpɔ nusɔsrɔ̃ siwo le wo me.

Edze Ŋgɔ Nyametsotso aɖe Wɔwɔ

2, 3. Nya siwo woto ɖe eme kae Yesaya gblɔ le eƒe ŋgɔdonya me?

² Abe alesi nutala tea fli ʋɛ aɖewo siwo nye nusi wògbɔna tata ge ƒe nɔnɔmee ene la, Yesaya hã gblɔ nya ʋɛ aɖewo gbadzaa ku ɖe nudzɔdzɔ siwo ŋu wòle nu ƒo ge atsoe la ƒe gɔmedzedze kple nuwuwu ŋu tsɔ dze eƒe nuŋlɔɖia gɔmee be: “Le Yuda-fia Axaz, Uziya vi Yotam ƒe vi ŋɔli la Aram-fia [alo Siria-fia] Rezin kple Israel-fia Remalya ƒe vi Pekax woho aʋa va Yerusalem ɖe wo ŋu, ke womete ŋu wɔ aʋa kpli wo o.”—Yesaya 7:1.

³ Ƒe alafa enyilia D.M.Ŋ. mee. Axaz va nyi fofoa Yotam ƒe dome hezu fia ɖe Yuda dzi. Siria-fia Rezin kple Pekax, Israel dziehefiaɖuƒea ƒe fia, va dze Yuda dzi eye woƒe asrafowo nɔ amewo dzi dzem ŋutasesẽtɔe. Woava dze Yerusalem ŋutɔ dzi mlɔeba. Gake woado kpo nu le woƒe amedzidzedzea me. (Fiawo II, 16:5, 6; Kronika II, 28:5-8) Nukatae? Míava kpɔ nusitae emegbe.

 4. Nukata vɔvɔ̃ yɔ Axaz kple eƒe amewo ƒe dzime?

⁴ Le aʋaa ƒe gɔmedzedze la, “wova gblɔ na Dawid ƒe aƒe la bena: Aram [alo Siria] ƒu asaɖa anyi ɖe Efrayim. Tete eya kple eƒe dukɔ ƒe dzi ʋuʋu nyanyanya, abe alesi avemetiwo ʋuʋuna le ya nu ene.” (Yesaya 7:2) Ẽ, ŋɔdzi lé Axaz kple eƒe amewo esi wose be Siriatɔwo kple Israel-viwo wɔ ɖeka eye be woƒe aʋakɔwo va ƒu asaɖa anyi fifia ɖe Efrayim-nyigba dzi (si nye Israel). Esusɔ ŋkeke eve alo etɔ̃ ƒe mɔzɔzɔ ko ne woaɖo Yerusalem!

 5. Mɔ ka nue Mawu ƒe ame siwo li egbea ɖi Yesaya le?

⁵ Yehowa gblɔ na Yesaya be: “Mia kple viwò Sear-Yasub mido yi ɖakpe Axaz le dzigbeta la ƒe tɔʋu ƒe mlɔenu le avɔnyãla ƒe agblemɔ to.” (Yesaya 7:3) Bu eŋu kpɔ ko! Le ɣeyiɣi si me wòle be fia la nadi Yehowa ƒe nyagblɔɖila yomemɔ ahabia mɔfiafia la, nyagblɔɖila la boŋue va le fia la dim! Togbɔ be edzɔ alea hã, Yesaya lɔ̃ faa wɔ ɖe Yehowa ƒe gbe dzi. Nenema ke Mawu ƒe ame siwo li egbea hã lɔ̃na faa dona ɖadia amesiwo xexe sia me nyaƒoɖeamenuwo doa vɔvɔ̃ na. (Mateo 24:6, 14) Aleke gbegbe wòfaa dzi na amee nye si be ƒe sia ƒe la, ame akpe alafa geɖe xɔa nyanyuigbeƒãɖela siawo eye wova nɔa Yehowa ƒe akpa dzi le eƒe ametakpɔkpɔ te!

 6. (a) Nya dedziƒoname kae nyagblɔɖila la va gblɔ na Fia Axaz? (b) Nɔnɔme kae li egbea?

⁶ Yesaya va kpɔ Axaz le Yerusalem-gliawo godo, afisi fia la le ŋku lém ɖe dua ƒe tsitsoƒe ŋu tsɔ nɔ dzadzram ɖo ɖe wo dzi dzedzea ŋu. Yesaya gblɔ Yehowa ƒe gbedasia nɛ be: “Kpɔ ɖokuiwò dzi, eye nanɔ anyi kpoo! Megavɔ̃ o, eye dzi megaɖe le ƒowò le dzoti takpoe eve, siwo le dzudzɔ tum, le Rezin kple Aram kple Remalya vi ƒe dɔmedzoe la ta o.” (Yesaya 7:4) Esi amedzidzelaawo nɔ nu gblẽm le Yuda do ŋgɔ la, woƒe dziku nu nɔ sesẽm abe dzoƒaɖewo ene. Fifia wozu ‘dzoti takpoe gbɔlo eve siwo le dzudzɔ tum.’ Mele be Axaz navɔ̃ Siria Fia Rezin loo alo Israel Fia Pekax, Remalya vi la o. Nenema ke wòle egbea. Ƒe alafa geɖe enye sia si Kristodukɔa ƒe ŋgɔnɔlawo na woti Kristotɔ vavãwo yome vevie. Gake fifia Kristodukɔa zu abe dzoti si bi vɔ kloe ene. Eƒe ŋkekewo de vɔ.

 7. Nukata Yesaya kple viaŋutsu ƒe ŋkɔwo naa mɔkpɔkpɔ ame?

⁷ Le Axaz ƒe ŋkekea me la, menye Yesaya ƒe gbedasia koe na mɔkpɔkpɔ amesiwo ɖo dzi ɖe Yehowa ŋu o, ke nusi Yesaya kple viaŋutsua siaa ƒe ŋkɔ fia hã na mɔkpɔkpɔ wo. Enye nyateƒe be Yuda ɖo afɔku me ya, gake ŋkɔ Yesaya, si gɔmee nye “Yehowa ƒe Xɔname,” ɖee fia be Yehowa aɖe wo. Yehowa gblɔ na Yesaya be wòakplɔ viaŋutsu Sear-Yasub, amesi ƒe ŋkɔ gɔmee nye “Ame Susɔe Aɖewo Atrɔ Gbɔ” la, ɖe asi. Ne Yuda-fiaɖuƒea va mu mlɔeba hã la, Mawu akpɔ nublanui na wo ahana ame susɔe aɖewo natrɔ gbɔ va anyigba la dzi.

Menye Aʋa Dzro Ko Wònye Dzɔ ɖe Dukɔwo Dome O

 8. Nukata Yerusalem dzi dzedzea menye aʋa dzro si dzɔ ɖe dukɔwo dome ko o?

⁸ Yehowa to Yesaya dzi ɖe tame si Yuda ƒe futɔwo ɖo fia. Nusi woɖo enye si: “Mina míaho ɖe Yuda ŋu, míado ŋɔdzi nɛ, eye miaxɔe na mía ɖokui atsɔ Tabeal vi aɖo fiae ɖe edzi.” (Yesaya 7:5, 6) Siria kple Israel bla nu heɖo tame be yewoaɖu Yuda dzi ale be yewoatsɔ yewoƒe ame aɖo fiae ɖe Axaz si nye Dawid vi la teƒe. Edze ƒã fifia be menye aʋa si dzɔ ɖe dukɔwo dome koe Yerusalem dzi dzedzea nye o. Eva zu ʋiʋli le Satana kple Yehowa dome. Nukatae? Elabena Yehowa Mawu bla nu kple Fia Dawid tsɔ na kakaɖedzii be viaŋutsuwoe aɖu fia ɖe Yehowa ƒe amewo dzi. (Samuel II, 7:11, 16) Aʋadziɖuɖu kae nye si wòanye na Satana ne ɖe wòate ŋu aɖo fiaƒome bubu anyi woanɔ fiazikpuia dzi le Yerusalem! Anye ne ate ŋu atɔtɔ tame si Yehowa ɖo be dzidzimevi aɖe si anɔ anyi ɖaa nado tso Dawid ƒe ƒomea me anye “ŋutifafafia” la gɔ̃ hã me.—Yesaya 9:5, 6.

Kakaɖedzinya Siwo Yehowa Gblɔ Lɔlɔ̃tɔe

 9. Kakaɖedzinya kawoe wòle be wòade dzi ƒo na Axaz kpakple Kristotɔ siwo li egbea?

⁹ Ðe Siria kple Israel ƒe tameɖoɖoa adze dzia? Ao. Yehowa gblɔ be: “Madze edzi o, eye mava me o!” (Yesaya 7:7) Yehowa to Yesaya dzi gblɔ be menye ɖeko Yerusalem dzi dzedzea me agblẽ o ke “le ƒe blaade vɔ atɔ̃ me la woagbã Efrayim gudugudu, eye maganye dukɔ azɔ o.” (Yesaya 7:8) Ẽ, kaka ƒe 65 nava yi la, Israel maganye dukɔ anɔ anyi azɔ o.a Ele be kakaɖedzinya sia kple alesi woɖo ɣeyiɣi ɖe eŋu tẽ la nade dzi ƒo na Axaz. Nenema ke wòdoa ŋusẽ Mawu ƒe amewoe egbea be woanya be ɣeyiɣi si susɔ na Satana ƒe xexeame le vɔvɔm.

10. (a) Aleke Kristotɔ siwo li egbea ate ŋu asrɔ̃ Yehowae? (b) Nukae Yehowa gblɔ na Axaz be newɔ?

¹⁰ Ðewohĩ edze le Axaz ƒe mo be mexɔ nya siawo dzi se o, elabena Yehowa to Yesaya dzi gblɔ be: “Ne miexɔe se o la, ekema mianɔ te hã o!” Yehowa tsɔ dzigbɔɖi “gaƒo nu kple Axaz.” (Yesaya 7:9, 10) Kpɔɖeŋu nyui kae nye si! Egbea togbɔ be ame geɖe mexɔa Fiaɖuƒegbedasia enumake o hã la, ele be míasrɔ̃ Yehowa ale be ‘míagaƒo nu’ esi míele wo gbɔ yim edziedzi. Azɔ Yehowa gblɔ na Axaz be: “Bia dzesi tso Yehowa, wò Mawu la si, eɖanye tso tsieƒe ke alo tso dziƒo ʋĩ o.” (Yesaya 7:11) Axaz ate ŋu abia dzesi, eye Yehowa awɔe atsɔ aɖo kpe edzi be yeakpɔ Dawid ƒe aƒea ta.

11. Kakaɖedzinya kae dze le Yehowa ƒe nyagbɔgblɔ si nye “wò Mawu” la me?

¹¹ De dzesii be Yehowa gblɔ be: ‘Bia dzesi tso wò Mawu la si.’ Yehowa ƒe dɔme nyo ŋutɔ. Woka nya ta xoxo be Axaz dea ta agu na alakpamawuwo eye wòwɔa trɔ̃subɔsubɔnu nyɔŋuwo. (Fiawo II, 16:3, 4) Togbɔ be Axaz wɔ nusiawo eye vɔvɔ̃ ɖoe hã la, Yehowa gayɔ eɖokui be Axaz ƒe Mawu. Esia na kakaɖedzi mí be Yehowa metsɔa dzitsitsi gbea ame o. Elɔ̃na faa naa kpekpeɖeŋu amesiwo wɔ vodada alo amesiwo ƒe xɔse gbɔdzɔ. Ðe alesi Mawu ka ɖe eƒe lɔlɔ̃ na Axaz dzi alea aʋãe wòaxɔ Yehowa ƒe kpekpeɖeŋua?

Eƒe Ðikekea Va Zu Tomaɖomaɖo

12. (a) Dadagbɔgbɔ kae Axaz ɖe fia? (b) Le esi teƒe be Axaz natrɔ ɖe Yehowa ŋu la, ameka gbɔ boŋue wòbia kpekpeɖeŋu tsoe?

¹² Axaz ɖo eŋu amemabumabutɔe be: “Nyemabiae o, ne nyemahayi Yehowa te ge akpɔ o.” (Yesaya 7:12) Menye ɖe Axaz le wɔwɔm ɖe se si gblɔ be, “migate Yehowa, mia Mawu la kpɔ . . . o” dzi le afisia o. (Mose V, 6:16) Le ƒe alafa geɖe megbe la, Yesu yɔ se ma ke me nyawo esime Satana tee kpɔ. (Mateo 4:7) Gake le Axaz gome la, Yehowa le gbɔgblɔm nɛ be wòagatrɔ ava tadedeagu vavãtɔ gbɔ eye edi be yeawɔ dzesi aɖe atsɔ ado ŋusẽ eƒe xɔse. Gake ametakpɔkpɔ si tso teƒe bubu dimee Axaz nɔ. Anɔ eme be ɣeyiɣi sia mee fia la ɖo ga gbogbo aɖe ɖe Asiria be wòava kpe ɖe ye ŋu ne yeakpe kple futɔ siwo tso dziehe. (Fiawo II, 16:7, 8) Siria kple Israel ʋakɔa ɖe to ɖe Yerusalem ɣemaɣi eye wokpɔtɔ le afima.

13. Tɔtrɔ kae míede dzesii le kpukpui 13 lia, eye nukae wòfia?

¹³ Fia la ƒe xɔsemanɔamesi nɔ susu me na Yesaya esi wògblɔ be: “Dawid ƒe aƒe la, misee: Nu tsɛ wònye na mi be, miana nu nati kɔ na amegbetɔ, hafi miebe, yewoana nu nati kɔ na nye Mawua ke hã?” (Yesaya 7:13) Ẽ, totitri atraɖii ate ŋu ati kɔ na Yehowa. De dzesii hã be fifia nyagblɔɖila la gblɔ be ‘nye Mawu,” ke menye “wò Mawu” o. Tɔtrɔ dziŋɔ aɖee nye ma! Esi Axaz gbe Yehowa hetrɔ ɖe Asiria ŋu la, ebu mɔnukpɔkpɔ nyui si nɔ esi be wòana ƒomedodo nagaɖo wo kple Mawu dome. Negadzɔ gbeɖe be míatsɔ míaƒe ƒomedodo kple Mawu asa vɔe aɖe asi le míaƒe dzixɔse siwo nɔ te ɖe Ŋɔŋlɔawo dzi ŋu ɖe ɣeyiɣi kpui aɖe ƒe viɖekpɔkpɔ ta o.

Imanuel ƒe Dzesi La

14. Aleke Yehowa ɖee fia be yegaɖoa ŋku nu si yebla kple Dawid dzi?

¹⁴ Yehowa gaɖoa ŋku nubabla si wòwɔ kple Dawid dzi kokoko. Egblɔ be yeawɔ dzesi, eye ele dzesia wɔ ge hã! Yesaya yi edzi be: “Aƒetɔ la ŋutɔ ana dzesi mi: Kpɔ ɖa, ɖetugbi afɔ fu, eye wòadzi ŋutsuvi ana ŋkɔe be ‘Mawu li kpli mí,’ [Imanuel, “NW”]. Notsi kpekẽ kple anyitsi wòano, vaseɖe esime wòanya vɔ̃tsitsri kple nyuitiatia. Elabena hafi ɖevi la nava nya vɔ̃tsitsri kple nyuitiatia la, anyigba, si ƒe fiawo kple eve le ŋɔ dzim na wò la, lazu gbegbe!”—Yesaya 7:14-16.

15. Nya eve kawoe nyagblɔɖi si ku ɖe Imanuel ŋu la ɖe fia mí?

¹⁵ Esia nye nyanyui na amesiame si le vɔvɔ̃m be amedzidzelaawo ahe Dawid ƒomea me fiawo ƒe dziɖuɖua ava nuwuwui. “Imanuel” gɔmee nye “Mawu Li Kpli Mí.” Mawu li kple Yuda eye maɖe mɔ eƒe nubabla kple Dawid me nagblẽ o. Tsɔ kpe ɖe eŋu la, menye nusi Yehowa awɔ koe wogblɔ na Axaz kple eƒe amewo o, ke wogblɔ ɣeyiɣi si me wòawɔe hã na wo. Hafi ŋutsuvi si nye Imanuel la natsi ate ŋu anya nyui kple vɔ̃ la, dukɔ siwo nye futɔwo la atsrɔ̃. Eye esia va eme hã!

16. Anye be nukatae Yehowa mena amesi tututu Imanuel nye le Axaz ƒe ŋkekea me dze ƒã o?

¹⁶ Biblia megblɔ amesi ƒe vi Imanuel nye na mí o. Gake esi wogblɔ be ɖevi si nye Imanuel anye dzesi eye Yesaya gblɔ emegbe be ye kple ye viwo ‘nye dzesiwo’ ta la, ate ŋu anye be nyagblɔɖila la ƒe vie Imanuel la nye. (Yesaya 8:18) Ðewohĩ Yehowa meɖe amesi tututu Imanuel nye le Axaz ƒe ŋkekea me fia o ale be wòagahe megbeviwo ƒe susu ɖa le Imanuel Gãtɔ la dzi o. Amekae nye amesia?

17. (a) Amekae nye Imanuel Gãtɔ, eye nuka ƒe dzesie eƒe dzidzi nye? (b) Nukata Mawu ƒe amewo ate ŋu agblɔ kple gbe sesẽ be, “Mawu li kpli mí”?

¹⁷ Le Yesaya ƒe agbalẽa megbe la, zi ɖeka koe Imanuel gadze le Biblia me, le Mateo 1:23. Yehowa ƒe gbɔgbɔ ʋã Mateo wòɖee fia be Imanuel dzidzi ŋuti nyagblɔɖia ku ɖe Yesu, amesi dze anye Dawid ƒe fiazikpuia Domenyila la, ƒe dzidzi ŋu. (Mateo 1:18-23) Imanuel gbãtɔa dzidzi nye dzesi be Mawu megblẽ Dawid ƒe aƒea ɖi o. Nenema ke Yesu si nye Imanuel Gãtɔ la dzidzi nye dzesi be Mawu megblẽ ameƒomea alo Fiaɖuƒenubabla si wòwɔ kple Dawid ƒe aƒea ɖi o. (Luka 1:31-33) Esi Yehowa teƒenɔla gãtɔ nɔ ameƒomea dome ta la, Mateo te ŋu gblɔe wònye nyateƒe be, ‘Mawu li kpli mí.’ Egbea Yesu nye Fia le dzi ɖum le dziƒo eye eli kple eƒe hamea si le anyigba dzi. (Mateo 28:20) Nyateƒee, Mawu ƒe amewo tɔ dzɔ ŋutɔ be woagblɔe kakaɖedzitɔe be: “Mawu li kpli mí!”

Tomaɖomaɖo Me Tsonu Bubuwo

18. (a) Nukata Yesaya ƒe nya siwo kplɔe ɖo de vɔvɔ̃ lãme na eƒe nyaselawo? (b) Aleke nuwo ava trɔe kpuie?

¹⁸ Togbɔ be Yesaya ƒe nya mamlɛawo faa akɔ na ame hã la, eƒe nya siwo kplɔe ɖo do ŋɔdzi na eƒe nyaselawo: “Yehowa akplɔ Asur-fia [alo Asiria-fia] aƒu mia kple wò dukɔ kpakple fofowò ƒe aƒe, ŋkeke, siwo meva kpɔ tso esime Efrayim klã ɖa le Yuda ŋu o!” (Yesaya 7:17) Ẽ, afɔku gbɔna, eye Asiria-fia gbɔe wòatso. Anye be nyanya be Asiriatɔwo atsɔ ŋutasesẽ si gbɔ eme ava ɖu yewo dzie wɔe be Axaz kple eƒe amewo tsi zãdomadɔlɔ̃e ŋkeke geɖe. Axaz bu be xɔlɔ̃dzedze Asiria ana yeavo tso Israel kple Siria si me. Le nyateƒe me la, Asiria-fia atso ɖe Axaz ƒe kukuɖeɖea ŋu ava dze Israel kple Siria dzi mlɔeba. (Fiawo II, 16:9) Anɔ eme be esiae azi Pekax kple Rezin dzi woadzudzɔ woƒe toɖeɖe ɖe Yerusalem ŋu. Alea wòadzɔe be Siria kple Israel mate ŋu axɔ Yerusalem le woƒe nubabla la me o. (Yesaya 7:1) Gake fifia Yesaya gblɔ na eƒe nyaselawo wòdo voɖi na wo be Asiria si nye wo takpɔla si ŋu woɖo dzi ɖo la ava zu wo teɖeanyila!—Tsɔe sɔ kple Lododowo 29:25.

19. Nuxlɔ̃ame kae le ŋutinyamenudzɔdzɔ sia me na Kristotɔwo egbea?

¹⁹ Nuxlɔ̃ame aɖe le ŋutinyamenudzɔdzɔ ŋutɔŋutɔ sia me na Kristotɔ siwo li egbea. Ne míeɖo nɔnɔme sesẽwo me la, ɖewohĩ adzro mí be míaɖe asi le Kristotɔwo ƒe gɔmeɖosewo ŋu, eye míato ema wɔwɔ me agbe Yehowa ƒe ametakpɔkpɔ. Esia nye akɔmekpɔkpɔ, si ate ŋu ava gblẽ nu le mía ŋu emegbe gɔ̃ hã, abe alesi wòdze le nya siwo Yesaya gagblɔ mee ene. Nyagblɔɖila la yi edzi ƒo nu tso nusi ado tso Asiriatɔwo ƒe amedzidzedzea me na anyigba la kple edzinɔlawo ŋu.

20. Amekawoe nye “togbato” kple “anyi,” eye nukae woawɔ?

²⁰ Yesaya ma eƒe nyawo me ɖe akpa ene, eye ɖesiaɖe gblɔ nusi adzɔ le “ŋkeke ma dzi”—si nye ŋkeke si dzi Asiria adze Yuda dzi—la ɖi. “[Ava] me le ŋkeke ma dzi be, Yehowa ala aku ayɔ togbato, siwo le Egiptetsiwo ƒe mlɔenu, kple anyĩ, siwo le Asur-nyigba dzi, eye wo katã woava aƒo ɖe bali globowo kple kpetowo kple ŋuvegoewo katã kpakple lãnyiƒewo katã.” (Yesaya 7:18, 19) Woahe Egipte kple Asiria ʋakɔ siwo le abe togbato kple anyiwo ƒe hatsotsowo ene la ƒe susu ayi Ŋugbedodonyigba la dzi. Menye be ɖe woava tso eme ayi o. ‘Togbatoawo’ kple ‘anyiawo’ ava ƒo ɖe anyi, eye woaxɔ dzogoe kple do ɖesiaɖe si le anyigba la dzi me.

21. Mɔ ka nue Asiria-fia anɔ abe talũhɛ ene le?

²¹ Yesaya yi edzi be: “Gbemagbe la Aƒetɔ la aɣe talũhɛ, si nye Asur-fia tso tɔsisi la ƒe go kemɛ, alũ ta kple aŋɔ me fu nɛ, eye wòaƒlɔ ge nɛ.” (Yesaya 7:20) Fifia Asiria si ŋu ŋɔdzi le wu la koe woyɔ. Axaz na ga Asiria-fia be ‘wòalũ ta’ na Siria kple Israel. Gake ‘talũhɛ sia si woɣe’ tso Frat-nutome la “alũ ta” na Yuda kolikoli, eye wòaƒlɔ ge gɔ̃ hã nɛ!

22. Kpɔɖeŋu kawoe Yesaya zã tsɔ fia nusiwo Asiria ƒe amedzidzedze si gogo la ahe vɛ?

²² Nukae ado tso eme? “[Ava] me le ɣemaɣi be, ame ɖeka anyi nyinɔvi ɖeka kple alẽvi eve. Eye le esi notsi bɔ ta la, woano notsi kpekẽ, elabena amesiwo kpɔtɔ ɖe anyigba dzi la dometɔ ɖesiaɖe ano notsi kpekẽ kple anyitsi.” (Yesaya 7:21, 22) Kaka Asiriatɔwo ‘nalũ ta’ na anyigba la vɔ la, ame ʋɛ aɖewo koe asusɔ ale be lã ʋɛ aɖewo koe woahiã hena nuɖuɖu. Woano “notsi kpekẽ kple anyitsi”—naneke mekpe ɖe eŋu o, elabena wein, abolo, alo nuɖuɖu bubu aɖeke megali o. Yesaya gblɔe zi gbɔ zi etɔ̃ sɔŋ abe ɖe wòtsɔe le gbe tem ɖe alesi aƒedozuzua nu asẽe dzi ene be afisi anyigba nyui wɔnu nɔ tsã la azu ŋuve kple gbe teƒe fifia. Ahiã be amesiwo ado dzi ayi kɔƒenutowo me nalé “aŋutrɔ kple da” ɖe asi atsɔ akpɔ wo ɖokui ta tso lã wɔadã siwo be ɖe avekɔawo me la si me. Agble siwo woŋlɔ ava zu nyikplɔƒe kple alẽwo toƒe. (Yesaya 7:23-25) Nyagblɔɖi sia te emevava le Axaz ŋutɔ ƒe ŋkekea me.—Kronika II, 28:20.

Nyagblɔɖi Siwo Fia Asi Ɣeyiɣi aɖe Tẽ

23. (a) Nukae wode se na Yesaya be wòawɔ azɔ? (b) Aleke woɖo kpe nuŋlɔkpe ƒe dzesi la dzii?

²³ Azɔ Yesaya gahe susu yi nusi le dzɔdzɔm fifi laa dzi. Esime Siria kple Israel siwo wɔ ɖeka la yi edzi ɖe to ɖe Yerusalem ŋu la, Yesaya ka nya ta be: “Yehowa gblɔ nam bena: Tsɔ nuŋlɔkpe gã aɖe, eye naŋlɔ nuŋɔŋlɔ hahootɔ ɖe edzi bena: Aboyonu, afɔ netsɔ, nuhaha, va kaba, [Maher-shalal-hash-baz, “NW”]! Ðe ɖasefo wɔnuteƒewo nam: nunɔla Uriya kple Zaxarya, Yeberexya vi.” (Yesaya 8:1, 2) Ŋkɔ Maher-shalal-hash-baz gɔmee nye “Aboyonu, Afɔ Netsɔ, Nuhaha, Va Kaba.” Yesaya bia tso ŋutsu siwo ŋu bubu le le nutoa me dometɔ eve si be woanye ɖasefowo le nusi wòŋlɔ ɖe kpe gã aɖe dzi ŋu, ale be woate ŋu aɖo kpe nya la ƒe nyateƒenyenye dzi emegbe. Gake woatsɔ dzesi evelia aɖe aɖo kpe dzesi sia dzii.

24. Dɔ kae wòle be dzesi si nye Maher-shalal-hash-baz nawɔ ɖe Yuda-dukɔa dzi?

²⁴ Yesaya gblɔ be: “Eye mete ɖe nyɔnu nyagblɔɖila ŋu wòfɔ fu, eye wòdzi ŋutsuvi. Tete Yehowa gblɔ nam be: Yɔ eƒe ŋkɔ be ‘Aboyonu, afɔ netsɔ, nuhaha, va kaba!’ Elabena hafi ɖevi la nade asi fofo kple dada yɔyɔ me la, woatsɔ Damasko ƒe kesinɔnuwo kple Samaria ƒe aboyonuwo adze Asur-fia ŋgɔe.” (Yesaya 8:3, 4) Nuŋlɔkpe gã la kple vi fẽ la siaa anye dzesi be Asiria aha Siria kple Israel siwo te Yuda ɖe anyi la kpuie. Ɣekaɣie wòaha wo? Hafi ŋutsuvia nate nuƒoƒo agblɔ nya siwo vidzĩ akpa gãtɔ srɔ̃na gbã—siwo nye “Papa” kple “Dada.” Ele be nyagblɔɖi si fia asi ɣeyiɣi aɖe tẽ alea nana ameawo naka ɖe Yehowa dzi. Alo ate ŋu ana ame aɖewo naɖu fewu le Yesaya kple viaŋutsuwo ŋu. Aleke ke wòdzɔe o, Yesaya ƒe nyagblɔɖinyaawo va eme.—Fiawo II, 17:1-6.

25. Nukawoe ɖi wo nɔewo le Yesaya ƒe ŋkekeawo kple fifi ɣeyiɣia me?

²⁵ Kristotɔwo ate ŋu asrɔ̃ nu tso nuxlɔ̃amenya siwo Yesaya gblɔ atraɖii la me. Apostolo Paulo ɖee fia mí be le ŋutinyamenudzɔdzɔ sia me la, Yesaya tsi tre ɖi na Yesu Kristo eye Yesaya viŋutsuwo hã tsi tre ɖi na Yesu ƒe nusrɔ̃la amesiaminawo. (Hebritɔwo 2:10-13) Yesu toa eyomedzela amesiamina siwo le anyigba dzi la dzi ɖoa ŋku alesi wòhiã be ‘woanɔ ŋudzɔ’ le ɣeyiɣi sesẽ siawo me dzi na Kristotɔ vavãwo. (Luka 21:34-36) Le ɣeyiɣi ma ke me la, woxlɔ̃a nu tsitretsiɖeŋula matrɔdzimewo le woƒe tsɔtsrɔ̃ si gbɔna ŋu, togbɔ be woɖua fewu le nuxlɔ̃amenya siawo ŋu zi geɖe hã. (Petro II, 3:3, 4) Alesi nyagblɔɖi siwo ŋu woɖo ɣeyiɣi ɖo va eme le Yesaya ƒe ŋkekea me la ɖo kpe edzi be Mawu ƒe ɣeyiɣi ɖoɖi na míaƒe ŋkekea hã le “vava ge kokoko, eye mahe ɖe megbe o.”—Xabakuk 2:3.

‘Tsi’ si Gblẽa Nu

26, 27. (a) Nudzɔdzɔ kawoe Yesaya gblɔ ɖi? (b) Nukae Yesaya ƒe nyawo fia na Yehowa subɔlawo egbea?

²⁶ Yesaya yi eƒe nuxlɔ̃amea dzi be: “Esi dukɔ sia do vlo Siloa-tsi, si sina blewu la, eye wòkpɔ dzidzɔ kple Rezin kpakple Remalya vi la, eyata Aƒetɔ la akplɔ tɔsisi la ƒe tsi gã sẽŋuwo ava ƒo ɖe wo dzi, si nye Asur-fia kple eƒe ŋusẽ blibo; ayɔ eƒe baliwo katã me, eye wòagbagba eƒe tɔgowo katã, asi ato Yuda, eye aɖo agbagba vaseɖe ve ke, eye eƒe aʋala, siwo ke la, asɔ wò anyigba ƒe kekeme. Mawu li kpli mí!”—Yesaya 8:5-8.

²⁷ “Dukɔ sia” si nye Israel dziehefiaɖuƒea gbe nubabla si Yehowa wɔ kple Dawid la. (Fiawo II, 17:16-18) Woawo bui be enye nu tsɛ abe Siloa-tsi si sina blewu, eye wònaa tsi Yerusalemtɔwo la ko ene. Wokpɔ dzidzɔ ɖe aʋa si wɔm wole kple Yuda ŋu. Gake womagbe tohehe na wo ɖe vlodoame sia ta o. Yehowa aɖe mɔ Asiriatɔwo ‘nagbagba ɖi,’ alo woaƒo ɖe Siria kple Israel dzi bibibi, abe alesi eteƒe madidi o Yehowa aɖe mɔ egbexexea ƒe akpa si nye dunyahedziɖuɖuwo nagbagba ɖe teƒe siwo alakpasubɔsubɔ kpɔ ŋusẽ ɖo la ene. (Nyaɖeɖefia 17:16; tsɔe sɔ kple Daniel 9:26.) Yesaya gblɔ yi edzi be ‘tɔ’ sia si le ɖɔɖɔm la “asi ato Yuda,” wòaɖo keke “ve ke,” vaseɖe Yerusalem, afisi Yuda ƒe ta (eƒe fia) ɖua dzi le.b Le míaƒe ɣeyiɣia me la, dunyahedziɖuɖu siwo atsrɔ̃ alakpasubɔsubɔ la aɖe to ɖe Yehowa subɔlawo, eye woaƒo xlã wo “vaseɖe ve ke.” (Xezekiel 38:2, 10-16) Nukae ado tso eme? Aleke wòdzɔe le Yesaya ƒe ɣeyiɣia me? Ðe Asiriatɔwo to dua ƒe gliwo ta va tsrɔ̃ Mawu ƒe amewoa? Ao. Mawu li kpli wo.

Migavɔ̃ O—“Mawu Li Kpli Mí!”

28. Togbɔ be futɔwo adze agbagba vevie hã la, nuka dzie Yehowa ka ɖo na Yuda?

²⁸ Yesaya xlɔ̃ nu be: “Mi dukɔwo [esiwo tsi tre ɖe dukɔ si Mawu bla nu kplii ŋu], midze agbo, eye dzi neɖe le mia ƒo; mi amesiwo katã le didiƒe le anyigba dzi la, miƒu to anyi! Mibla ali dzi, eye dzi neɖe le mia ƒo, ẽ, mibla ali dzi, eye dzi neɖe le mia ƒo! Ne miede adaŋu la, woagblẽ eme, ne mieɖo gbe ɖi la, mava me o; elabena Mawu li kpli mí!” (Yesaya 8:9, 10) Nya siawo va eme le ƒe aɖewo megbe, le Axaz vi nuteƒewɔla Xizkiya ƒe fiaɖuɣi. Esime Asiriatɔwo do ŋɔdzi na Yerusalem la, Yehowa ƒe dɔla wu ame 185,000 le wo dome. Edze ƒã be Mawu li kple eƒe amewo kpakple Dawid ƒe fiaƒomea. (Yesaya 37:33-37) Nenema ke le Harmagedon-ʋa si gbɔna me la, menye ɖeko Yehowa adɔ Imanuel Gãtɔ be wòagbã Eƒe futɔwo gudugudu ko o ke ana wòaɖe amesiwo katã ɖoa ŋu ɖe Eŋu hã.—Psalmo 2:2, 9, 12.

29. (a) Aleke Yudatɔ siwo nɔ anyi le Axaz ƒe ŋkekea me ƒe nɔnɔme to vovo na Xizkiya ƒe ŋkekea me tɔwoe? (b) Nukata Yehowa subɔla siwo li egbea menɔa mawusubɔsubɔ kple dunyahehe me nubablawo me o?

²⁹ Axaz ŋɔlimetɔwo mexɔe se be Yehowa akpɔ yewo ta o, si to vovo na nɔnɔme si Yudatɔ siwo nɔ anyi le Xizkiya ƒe ɣeyiɣia me ɖe fia. Nubabla, alo “nugbeɖoɖo” kple Asiriatɔwoe nye woƒe ametakpɔnu si wotsɔ dze ŋgɔ Siria kple Israel siwo bla nu lae. Gake Yehowa ƒe “asi” ʋã Yesaya wòƒo nu tsi tre ɖe “dukɔ sia ƒe mɔ,” si nye nusi ame geɖe wɔna ŋu. Exlɔ̃ nu be: “Migavɔ̃ nusiwo wovɔ̃na la o, eye megadzi ŋɔ na mi o. Mibu Yehowa Zebaot kɔkɔe, eye eya nenye vɔvɔ̃ kple ŋɔdzi na mi.” (Yesaya 8:11-13) Esi esia le susu me na Yehowa subɔlawo egbea ta la, wonɔa ŋudzɔ be nubabla aɖeke naganɔ yewo kple subɔsubɔhawo ƒe adaŋudehawo dome o eye womenɔa dunyahehe me nubablawo me loo alo ɖoa ŋu ɖe wo ŋu o. Yehowa subɔlawo ka ɖe Mawu ƒe ametakpɔŋusẽ dzi bliboe. Elabena ne ‘Yehowa li kpli mí la, nuka amegbetɔ ate ŋu awɔ mí?’—Psalmo 118:6.

30. Nukae adzɔ ɖe amesiwo meɖoa ŋu ɖe Yehowa ŋu o dzi?

³⁰ Yesaya yi edzi gagblɔ be Yehowa azu “kɔkɔeƒe,” alo ametakpɔkpɔ, na amesiwo ɖoa ŋu ɖe eŋu. Gake amesiwo gbee “[akli nu] adze anyi ahaŋe keŋkeŋ, eye mɔ̃ aɖe wo alé wo”—ezã dɔwɔnya atɔ̃ siwo ɖe nusi adzɔ ɖe amesiwo meɖoa ŋu ɖe Yehowa ŋu o dzi fia ɖikekemanɔmee. (Yesaya 8:14, 15) Le ƒe alafa gbãtɔ me la, amesiwo gbe Yesu hã kli nu hedze anyi nenema ke. (Luka 20:17, 18) Nusia ke adzɔ ɖe amesiwo gbe be yewomalɔ̃ ɖe Fia Yesu, si woɖo zi dzi le dziƒo ƒe fianyenye dzi o dzi.—Psalmo 2:5-9.

31. Aleke Kristotɔ vavãwo ate ŋu asrɔ̃ Yesaya kple amesiwo ɖo to eƒe nufiafia ƒe kpɔɖeŋui egbea?

³¹ Menye amesiamee kli nu le Yesaya ƒe ŋkekea me o. Yesaya gblɔ be: “Bla ɖaseɖiɖi la, eye natre nufiame la nu ɖe nye nusrɔ̃viwo me. Eyata mele Yehowa, amesi tsyɔ nu eƒe ŋku me ɖe Yakob ƒe aƒea la sinu dzɔm, eye mele mɔ kpɔm nɛ.” (Yesaya 8:16, 17) Yesaya kple amesiwo wɔ ɖe eƒe nufiafia dzi magbe Mawu ƒe Sea dzi wɔwɔ o. Woyi edzi ɖo ŋu ɖe Yehowa ŋu, togbɔ be wo detɔ dzeaglãwo gbe esia wɔwɔ eye wòna Yehowa tsyɔ nu ŋkume ɖe wo hã. Neva me be míasrɔ̃ amesiwo ɖoa ŋu ɖe Yehowa ŋu ƒe kpɔɖeŋu eye míawo hã míaɖoe kplikpaa be míaku ɖe tadedeagu dzadzɛ ŋu nenema ke!—Daniel 12:4, 9; Mateo 24:45; tsɔe sɔ kple Hebritɔwo 6:11, 12.

“Dzesi” Kple “Nukunuwo”

32. (a) Amekawoe nye “dzesi kple nukunuwo” egbea? (b) Nukata wòle be Kristotɔwo nato vovo tso xexeame gbɔ?

³² Azɔ Yesaya ɖe gbeƒãe be: “Kpɔ ɖa, mía kple vi, siwo Yehowa tsɔ nam la, míenye dzesi kple [nukunuwo, “NW”] le Israel tso Yehowa Zebaot, amesi le Zion-to dzi la gbɔ.” (Yesaya 8:18) Ẽ, Yesaya, Sear-Yasub, kple Maher-shalal-hash-baz wonye Yehowa ƒe tameɖoɖo na Yuda ƒe dzesiwo. Egbea Yesu kple nɔvia amesiaminawo hã nye dzesiwo nenema ke. (Hebritɔwo 2:11-13) Eye ‘alẽ bubuawo’ ƒe “ameha gã” aɖe va kpe ɖe wo ŋu le woƒe dɔa wɔwɔ me. (Nyaɖeɖefia 7:9, 14; Yohanes 10:16) Gake ne dzesi le dzedzem nyuie le enɔƒe ko hafi asixɔxɔ nɔa eŋu. Nenema ke Kristotɔwo hã wɔa dzesi ƒe dɔae ne woɖee fia be yewoto vovo tso xexe sia gbɔ eye woɖo ŋu ɖe Yehowa ŋu bliboe heɖe gbeƒã eƒe tameɖoɖowo dzinɔameƒotɔe.

33. (a) Nukae Kristotɔ vavãwo ɖo kplikpaa be yewoawɔ? (b) Nukata Kristotɔ vavãwo ate ŋu anɔ te sesĩe?

³³ Ekema mina mí katã míanɔ agbe ɖe Mawu ƒe dzidzenuwo nu, ke menye ɖe xexe sia me tɔ nu o. Miyi edzi mianɔ dzedzem nyuie—abe dzesiwo ene—vɔvɔ̃manɔmee eye miawɔ dɔ si wode asi na Yesaya Gãtɔ, Yesu Kristo, la ayi edzi, si nye be: ‘Ðe gbeƒã Yehowa ƒe amenuveƒe kple mía Mawu ƒe hlɔ̃biaŋkeke la.’ (Yesaya 61:1, 2; Luka 4:17-21) Nyateƒee, ne Asiriatɔwo ƒe tsia ɖɔ xɔ anyigba dzi katã—ne eɖo keke míaƒe kɔ gɔ̃ hã—la, makplɔ Kristotɔ vavãwo adzoe o. Míanɔ te sesĩe elabena “Mawu li kpli mí.”

[Etenuŋɔŋlɔwo]

[Nɔnɔmetata si le axa 103]

Yesaya kplɔ Sear-Yasub ɖe asi esime wònɔ Yehowa ƒe gbedasi gblɔm na Axaz

[Nɔnɔmetata si le axa 111]

Nukata Yesaya ŋlɔ “Maher-shalal-hash-baz” ɖe nuŋlɔkpe gã aɖe dzi?