Ta Wuievelia
Migavɔ̃ na Asiriatɔwo O
1, 2. (a) Le amegbetɔ ƒe nukpɔkpɔ nu la, nukata wòdze abe ɖe Yona tɔ dzɔ ene be wòahe ɖe megbe le dɔ si wode esi be wòaɖe gbeƒã na Asiriatɔwo la wɔwɔ me? (b) Aleke Niniwetɔwo xɔ Yona ƒe gbedasiae?
LE ƑE alafa wuiasiekelia D.M.Ŋ. ƒe domedome la, Hebritɔ nyagblɔɖila Yona, Amitai vi, do dzi yi Niniwe, si nye Asiria Fiaɖuƒea ƒe fiadu. Nya vevi aɖe nɔ esi wòagblɔ na wo. Yehowa gblɔ nɛ be: “Tso, nayi Niniwe, du gã la me, eye nagblɔ nya ɖi ɖe eŋu; elabena woƒe nu vɔ̃ɖi wɔwɔ va ŋkunye me.”—Yona 1:2, 3.
2 Esime wode dɔa asi na Yona gbã la, esi to teƒe bubu heɖo ta Tarsis. Le amegbetɔ ƒe nukpɔkpɔ nu la, Yona tɔ dzɔ be wòahe ɖe megbe le dɔa wɔwɔ ŋu. Asiriatɔwo nye ŋutasẽla vɔ̃ɖiwo. Se alesi Asiria-fia aɖe tu nu kple eƒe futɔwoe ɖa: “Melã asi kple afɔ na amegãawo . . . Metɔ dzo aboyome geɖe le wo dome, eye melé ame geɖe wozu aboyome gbagbewo. Melã wo dometɔ aɖewo ƒe asi kple asibidewo, eye melã ɖewo hã ƒe ŋɔti.” Ke hã esi Yona va gblɔ Yehowa ƒe gbedasia mlɔeba la, Niniwetɔwo trɔ dzime tso woƒe nuvɔ̃wo me eye Yehowa metsrɔ̃ du ma ɣemaɣi o.—Yona 3:3-10; Mateo 12:41.
Yehowa Tsɔ “Ameƒoti”
3. Mɔ ka nue alesi Israel-viwo xɔ nuxlɔ̃ame si Yehowa ƒe nyagblɔɖilawo na la to vovo na Niniwetɔwo tɔ le?
3 Ðe Israel-vi siwo Yona ɖe gbeƒã na hã xɔ eƒe nyawoa? (Fiawo II, 14:25) Ao. Wotrɔ megbe de tadedeagu vavãtɔ. Le nyateƒe me la, “wode ta agu na dziƒonuwo katã, eye wosubɔ Baal” gɔ̃ hã. Tsɔ kpe ɖe eŋu la, “wona wo viŋutsuwo kple wo vinyɔnuwo to dzo me, woka afa hesa dzo, eye wotsɔ wo ɖokui ƒle na nu vɔ̃ɖi wɔwɔ le Yehowa ŋku me, ne woatsɔ ado dɔmedzoe nɛ.” (Fiawo II, 17:16, 17) Esime Yehowa dɔ nyagblɔɖilawo ɖa be woaxlɔ̃ nu Israel la, womexɔ nya la abe Niniwetɔwo ene o. Eyata Yehowa ɖoe be yeaɖe afɔ bubu siwo nu sẽ wu.
4, 5. (a) Nukae “Asur” si woyɔ la fia, eye aleke Yehowa azãe abe “ati” ene? (b) Ɣekaɣie woɖu Samaria dzi?
4 Le Yona ƒe Niniwe yiyi megbe ɣeyiɣi aɖe la, Asiriatɔwo megadzea ame dzi kabakaba abe tsã ene o.a Gake le ƒe alafa enyilia D.M.Ŋ. ƒe gɔmedzedze la, Asiria gaɖee fia be asrafoŋusẽ le ye si, eye Yehowa zãe le mɔ wɔnuku aɖe nu. Nyagblɔɖila Yesaya gblɔ nuxlɔ̃amenya aɖe si tso Yehowa gbɔ na Israel dziehefiaɖuƒea: “Baba na Asur, nye dɔmedzoe ƒe ameƒoti wònye, eye nye dziku ƒe ati le esi me. Medɔe ɖe dukɔ vɔ̃ɖi la ŋu, eye meɖe gbe nɛ ɖe nye dɔmedzoe ƒe dukɔ la ŋu, ne wòaɖe aboyo, wòaha nu, eye wòafanyae abe ba le kpɔdome ene.”—Yesaya 10:5, 6.
5 Aleke gbegbe woɖi gbɔ Israel-viwoe nye si! Mawu azã trɔ̃subɔdukɔ—‘Asiria’—abe “ameƒoti” ene atsɔ ahe to na woe. Le ƒe 742 D.M.Ŋ. me la, Asiria Fia Shalmaneser V va ɖe to ɖe Samaria, si nye Israel-dukɔ si gbe xɔse la ƒe fiadu ŋu. Esi Samaria nɔ teƒe deamedzi si le togbɛ si kɔkɔ meta 90 dzi ta la, ete ŋu nya eƒe futɔa ɖa le ƒe etɔ̃ kloe me. Gake amegbetɔ ƒe aɖaŋu aɖeke mate ŋu axe mɔ na Mawu ƒe tameɖoɖo me vava o. Le ƒe 740 D.M.Ŋ. me la, Asiria ɖu Samaria dzi hefanyae.—Fiawo II, 18:10.
6. Mɔ ka nue Asiriatɔwo wɔ nu wògbɔ nusi Yehowa bu ɖe wo ŋu le?
6 Togbɔ be Yehowa zã Asiria tsɔ fia nu eƒe amewo hã la, Asiriatɔwo ŋutɔ medea bubu Yehowa ŋu o. Ema tae wòyi edzi gblɔ be: “Ke eya [Asiriatɔwo] mesusu alea o, eye mebu ɖe dzi me alea o, ke boŋ eɖo ɖe [tame] be, yeagblẽ nu, eye yeatsrɔ̃ dukɔ geɖewo.” (Yesaya 10:7) Yehowa ɖoe be Asiriatɔwo nanye dɔwɔnu le ye si me. Gake Asiriatɔwo di be yewoazu nu bubu. Woƒe dzi ʋã wo be woawɔ ɖoɖo ɖe nusi lolo wu ŋu—be yewoaɖu xexeme si nɔ anyi ɣemaɣi la dzi!
7. (a) Ðe nyagbɔgblɔ si nye “Ðe nye amegãwo katã menye fiawo oa?” la me. (b) Nukae wòle be amesiwo gbea Yehowa egbea nade dzesii?
7 Fiawoe ɖua du siwo menye Israel-viwo ƒe du o siwo Asiria xɔ la dometɔ geɖe dzi tsã. Fifia ele be amesiawo siwo nye fiawo tsã nabɔbɔ ɖe Asiria-fia te azu amegã siwo le fiagã la te, eye esia na wòte ŋu ƒo adegbe wònye nyateƒe be: “Ðe nye amegãwo katã menye fiawo oa?” (Yesaya 10:8) Dukɔwo ƒe dugãwo me alakpamawuwo mete ŋu kpɔ wo subɔlawo ta tso tsɔtsrɔ̃ me o. Mawu siwo Samariatɔwo subɔna, siwo ƒe ɖewoe nye Baal, Molex, kple sikanyiviwo mate ŋu akpɔ dua ta o. Esi Samaria gbe Yehowa ta la, womate ŋu akpɔ mɔ be axɔ na yewo o. Amesiame si agbe Yehowa egbea nade dzesi afɔku si dzɔ ɖe Samaria dzi! Asiriatɔwo ate ŋu aƒo adegbe le Samaria kple dugã bubu siwo woxɔ ŋu wòasɔ be: “Ðe meva me na Kalno abe Karkemis ene, Xamat abe Arpad ene, Samaria abe Damasko ene oa?” (Yesaya 10:9) Nu ɖeka ko wo katã wonye na Asiriatɔwo—wozu aboyonuwo nɛ.
8, 9. Nukata Asiria wɔ nu wògbɔ eme esi wòɖoe be yeaxɔ Yerusalem?
8 Gake Asiria ƒo adegbe wògbɔ eme. Egblɔ be: “Alesi nye asi tu fiaɖuƒe siawo kple woƒe legba, siwo nyo wu Yerusalem kple Samaria tɔwoe la, ɖe nyemawɔ Yerusalem kple eƒe legbawo, abe alesi mewɔ Samaria kple eƒe legbawo ene oa?” (Yesaya 10:10, 11) Legbawo sɔ gbɔ ɖe fiaɖuƒe siwo dzi Asiriatɔwo ɖu xoxo la me wu esiwo le Yerusalem alo Samaria gɔ̃ hã sã. Eyata ebu le susu me be, ‘nukae axe mɔ nam be nyemawɔ Yerusalem abe alesi mewɔ Samaria ene o?’
9 Adegbeƒolae wònye nyateƒe! Yehowa maɖe mɔ nɛ wòaxɔ Yerusalem o. Nyateƒee, menye ɣesiaɣie Yuda do alɔ tadedeagu vavãtɔ o. (Fiawo II, 16:7-9; Kronika II, 28:24) Yehowa xlɔ̃ nu Yuda be le eƒe nuteƒemawɔmawɔ ta la, akpe fu geɖe ne Asiria va dze wo dzi. Gake Yerusalem akpɔtɔ anɔ anyi. (Yesaya 1:7, 8) Xizkiya ye nye fia le Yerusalem esime Asiriatɔwo va dze wo dzi. Xizkiya mele abe fofoa Axaz ene o. Le Xizkiya ƒe fiaɖuɣi ƒe ɣleti gbãtɔ me tututu la, egaʋu gbedoxɔa ƒe ʋɔtruwo hegbugbɔ tadedeagu dzadzɛ ɖo anyi!—Kronika II, 29:3-5.
10. Ŋugbe kae Yehowa do le Asiria ŋu?
10 Eyata Asiria ƒe tameɖoɖo be yeadze Yerusalem dzi la medze Yehowa ŋu o. Yehowa ɖoe be yeabia akɔnta xexemefiaɖuƒe dadala ma: “Ava me, ne Aƒetɔ la awu eƒe dɔwo katã nu ɖe Zion-to la kple Yerusalem ŋu vɔ la, atu Asur-fia ƒe dada ƒe kutsetse kpakple eƒe dadaŋku ƒe adegbeƒoƒo ŋu fe nɛ.”—Yesaya 10:12.
Eɖo Ta Yuda Kple Yerusalem!
11. Nukata Asiria bu be yeate ŋu axɔ Yerusalem bɔbɔe?
11 Esi dziehefiaɖuƒea mu le ƒe 740 D.M.Ŋ. megbe ƒe enyi la, Asiria-fiagã yeye, Sanxerib, ho aʋa ɖe Yerusalem ŋu. Yesaya zã hakpanyawo tsɔ ƒo nu tso ɖoɖo si Sanxerib wɔ dadatɔe ŋu be: “Meɖe dukɔwo ƒe liƒowo ɖa, eye metutu fiazikpui dzi nɔlawo ƒu anyi abe ŋusẽtɔ ene; nye asi tu dukɔwo ƒe kesinɔnuwo abe xevitɔ ene, abe alesi wolɔa azi, siwo dzi xeviwo dzo le lae la, nenema melɔ anyigba blibo lae, eye ame aɖeke meƒo aʋala alo ke dɔ heyi xɔxlɔ̃ ge o.” (Yesaya 10:13, 14) Sanxerib bu be yewoxɔ du bubuwo eye Samaria hã megali o, eyata yeate ŋu adze Yerusalem dzi bɔbɔe! Dua me tɔwo atsɔ vɔvɔ̃ awɔ aʋae ya gake womaxlɔ̃ o, ale be woaɖu emenɔlawo dzi kaba, eye woalɔ woƒe kesinɔnuwo abe azi siwo le atɔ siwo wogblẽ ɖi me ene.
12. Nuwo ŋu bubu le mɔ nyuitɔ nu kae Yehowa ɖe fia le Asiria ƒe adegbeƒoƒoa ŋu?
12 Gake Sanxerib ŋlɔ nane be. Samaria si gbe xɔse la dze na to si wohe nɛ la nyuie. Gake le Fia Xizkiya ƒe fiaɖuɣi la, Yerusalem gava zu afisi tadedeagu dzadzɛ xɔ anyinɔ ɖo vevie. Ele be amesiame si aka asi Yerusalem ŋu la nakpe kple Yehowa ŋutɔ! Yesaya bia dzikutɔe be: “Ðe fía aƒo adegbe ɖe amesi tsɔe le nu lãmee la ŋua? Alo ɖe laxalaxa atɔ asi akɔ ɖe amesi le ehem la ŋua? Ðe ati anyè amesi fɔe ɖe dzi la ɖa? Eye ɖe atizɔti akɔ nusi menye ati o la dzia?” (Yesaya 10:15) Asiria Fiaɖuƒea nye dɔwɔnu dzro ko le Yehowa ƒe asi me, abe alesi atitsola, atidzela, alo alẽkplɔla zãa fía, laxalaxa, ati, alo atizɔtii ene. Mɔ kae atizɔti kpɔ fifia ado eɖokui ɖe dzi ɖe amesi si me wòle ŋu!
13. Gblɔ nusi (a) “ame damiwo,” (b) “aŋɔkawo kple ŋuwo,” (d) “ave” la, tsi tre ɖi na kple nusi dzɔ ɖe wo dzi.
13 Nukae adzɔ ɖe Asiria dzi? “Aƒetɔ, Yehowa Zebaot, aɖo kpexlẽ ɖe eƒe ame damiwo dome, eye eƒe aʋakɔ abi, abe alesi dzo binae ene. Israel ƒe kekeli azu dzo, eye eƒe kɔkɔetɔ la azu dzoƒaɖe ahabi eƒe aŋɔkawo kple ŋuwo le ŋkeke ɖeka dzi, eye wòafiã wo; agblẽ eƒe ave kple atibɔwo tso tu me vaseɖe tsrokpa dzi, eye wo nu ayi abe dɔnɔ ene; woate ŋu axlẽ eƒe avemeti susɔeawo, eye ɖevi ɖeka ade wo agbalẽ me.” (Yesaya 10:16-19) Ẽ, Yehowa akpa Asiria ƒe “ati” ma wòazu sue! Woatsɔ “kpexlẽ” dɔléle aƒu Asiria-ʋakɔa ƒe “ame damiwo,” alo asrafo sesẽwo. Womadze ame sesẽwo kakaka o! Yehowa Mawu, Israel ƒe Kekeli la, afiã eƒe asrafo afɔzɔlawo abe aŋɔkawo kple ŋuvewo ene. Eye eƒe “ave” si nye eƒe asrafomegãwo la avɔ. Ne Yehowa tu nu kple Asiria vɔ la, woƒe amegã siwo asusɔ anɔ ʋɛ ale gbegbe be ɖevi dzaa ate ŋu axlẽ wo ɖe eƒe asibide nu!—Kpɔ Yesaya 10:33, 34 hã.
14. Ƒo nu tso Asiriatɔwo ƒe zɔɖeɖe le Yuda-nyigba dzi va ɖo ƒe 732 D.M.Ŋ. ŋu.
14 Ke hã asesẽ na Yudatɔ siwo nɔ Yerusalem le ƒe 732 D.M.Ŋ. me be woaxɔe ase be woaɖu Asiria dzi. Asiria-ʋakɔ gã la le azɔli dzi gbɔna matɔmatɔe. Se Yuda-du siwo woxɔ ƒe ŋkɔwo ɖa: “Eva dze Ayat . . . Migron . . . Mixmas . . . Geba . . . Rama . . . Saul ƒe Gibea . . . Galim . . . Laisa . . . Anatot . . . Madmena . . . Gebimtɔwo [kple Nob dzi, “NW”].” (Yesaya 10:28-32a)b Mlɔeba la, amedzidzelaawo va ɖo Lakis, si gbɔ didi tso Yerusalem kilometa 50 ko. Eteƒe medidi o Asiria-ʋakɔ gã aɖe va be yewoaxɔ dua. “[Enyè] eƒe asi ɖe Zion-nyɔnuvi ƒe to, Yerusalem ƒe togbɛ la ŋu.” (Yesaya 10:32b) Nukae ate ŋu axe mɔ na Asiriatɔwo?
15, 16. (a) Nukata wòhiã be xɔse sesẽ nanɔ Fia Xizkiya si? (b) Kpeɖodzi kae li si ta Xizkiya ate ŋu axɔe ase be Yehowa akpe ɖe ye ŋu?
15 Fia Xizkiya tsi dzodzodzoe le eƒe fiasã me le dua me. Edze eƒe awuwo eye wòta akpanya. (Yesaya 37:1) Edɔ amewo ɖe nyagblɔɖila Yesaya be wòaɖabia gbe Yehowa na Yuda. Eteƒe medidi o, wotrɔ gbɔ va gblɔ alesi Yehowa ɖo eŋui: “Migavɔ̃ . . . o. Makpɔ du sia ta.” (Yesaya 37:6, 35) Gake ŋɔdzi gale Asiriatɔwo ŋu kokoko eye kakaɖedzi blibo le wo si.
16 Xɔse—eyae nye nusi alé Fia Xizkiya ɖe te le xaxa sia me. Xɔsee nye “kaka ɖe nusiwo womekpɔna o la dzi.” (Hebritɔwo 11:1) Ebia be woakpɔ nu ayi ŋgɔ wu nusi le dzedzem. Gake sidzedze dzie wotua xɔse ɖo. Anɔ eme be Xizkiya ɖo ŋku edzi be Yehowa gblɔ nya fakɔname siawo do ŋgɔ be: “Nye dukɔ, si le Zion, megavɔ̃ Asur . . . o! Elabena ekpɔtɔ vie ko dziku la nu natso, eye nye dɔmedzoe natrɔ ɖe wo ŋu, ne wòatsrɔ̃ wo. Yehowa Zebaot aɖe atam ɖe wo dzi, abe alesi wòƒo Midian le Oreb-kpe la gbɔ ene, eye eƒe atikplɔ anɔ atsiaƒu dzi, abe alesi wòdoe ɖe dzi ɖe Egipte ŋu ene.” (Yesaya 10:24-26)c Ẽ, Mawu ƒe dukɔa to nɔnɔme sesẽwo me kpɔ. Edze abe Egipte-ʋakɔa ƒe agbɔsɔsɔ na mɔkpɔkpɔ bu ɖe Xizkiya tɔgbuitɔgbuiwo ene esime wonɔ Ƒudzĩa gbɔ. Ƒe alafa geɖe do ŋgɔ la, aʋakɔ gã aɖe dze ŋgɔ tɔgbuia Gideon esime Midian kple Amalek va dze Israel dzi. Ke hã Yehowa ɖe eƒe amewo le nɔnɔme eveawo me.—Mose II, 14:7-9, 13, 28; Ʋɔnudrɔ̃lawo 6:33; 7:21, 22.
17. Aleke ‘woŋe’ Asiria ƒe kɔkuti lae, eye nukatae?
17 Ðe Yehowa agawɔ nusi wòwɔ le ɣeyiɣi mawo me va yi la akea? Ẽ. Yehowa do ŋugbe be: “Ava me le ɣemaɣi be, eƒe agba aɖe le wò abɔta kple eƒe kɔkuti le wò kɔ, eye kɔkuti la aŋe le amidada ta.” (Yesaya 10:27) Woaɖe Asiria ƒe kɔkutia ɖa le Mawu ƒe dukɔ si wòbla nu kpli la ƒe abɔta kple kɔ. Le nyateƒe me la, kɔkuti la “aŋe”—eye eŋe hã! Le zã ɖeka me la, Yehowa ƒe dɔla wu ame 185,000 le Asiriatɔwo dome. Asiriatɔwo dzudzɔ woƒe toɖeɖea hetrɔ dzo, eye womegaɖo afɔ Yuda-nyigba dzi kpɔ o. (Fiawo II, 19:35, 36) Nukatae? “Le amidada ta.” Ðewohĩ ami si wotsɔ si na Xizkiya wòzu fia si tso Dawid ƒe ƒomea me ŋue esia ku ɖo. Ale Yehowa wɔ ɖe eƒe ŋugbedodoa dzi be: “Makpɔ du sia ta, eye maɖee, le nye ŋutɔ kple nye dɔla Dawid ta.”—Fiawo II, 19:34.
18. (a) Ðe Yesaya ƒe nyagblɔɖia ava eme wu zi ɖekaa? Ðe eme. (b) Habɔbɔ kae ɖi blema Samaria egbea?
18 Yesaya ƒe nuŋlɔɖi si me míedzro le ta sia me la ku ɖe nusiwo dzɔ le Yuda ƒe 2,700 kple edzivɔ enye si va yi ŋu. Gake gɔmesese vevi aɖe le nudzɔdzɔ mawo ŋu egbea. (Romatɔwo 15:4) Ðe esia fia be amesiwo ŋu koŋ ŋutinya ʋãme sia ku ɖo—Samaria kple Yerusalem tɔwo kpakple Asiriatɔwo—ƒe kpɔɖeŋuwo li le egbeŋkekeawo mea? Ẽ, woli. Abe Samariatɔ trɔ̃subɔlawo ene la, Kristodukɔa gblɔna be yesubɔa Yehowa, gake egbe xɔse keŋkeŋ. Roma Katolikotɔ Papatenɔla John Henry Newman lɔ̃ ɖe edzi le agbalẽ si nye An Essay on the Development of Christian Doctrine me be nusiwo Kristodukɔa zãna ƒe alafa geɖe enye sia, siwo ƒe ɖewoe nye lifi, bosomikaɖiwo, tsi kɔkɔe, nunɔlawo ƒe awu, kple nɔnɔmewɔwɔwo la “katã dzɔ tso trɔ̃subɔsubɔ me.” Kristodukɔa ƒe tadedeagu si me trɔ̃subɔsubɔ yɔ la medzea Yehowa ŋu o abe alesi Samaria ƒe trɔ̃subɔsubɔ medze eŋu o ene.
19. Nuka ŋue woxlɔ̃ nu Kristodukɔa le, eye amekawoe xlɔ̃ nui?
19 Ƒe geɖe enye sia si Yehowa Ðasefowo xlɔ̃ nu Kristodukɔa le Yehowa ƒe ŋudzedzemakpɔmakpɔ ɖe wo ŋu la ŋuti. Le kpɔɖeŋu me le ƒe 1955 me la, woƒo dutoƒonuƒo si ƒe tanyae nye “Kristodukɔa loo alo Kristotɔnyenye—Kae Nye ‘Xexeame ƒe Kekeli’?” le xexeame katã. Nuƒoa ɖe alesi Kristodukɔa tra tso Kristotɔ vavãtɔwo ƒe nufiafia kple agbenɔnɔ gbɔe la me nyuie. Le ema megbe la, woɖo nuƒo sẽŋu ma ƒe tatawo ɖe osɔfowo le dukɔ geɖe me. Kristodukɔa ƒe habɔbɔ bliboa gbe nuxlɔ̃amea sese. Ena be naneke meli Yehowa nagawɔ tsɔ wu be wòatsɔ “ati” ahe to na wo o.
20. (a) Nukae ava zu egbeŋkekea me Asiria, eye aleke woazãe abe ati ene? (b) Afikae woahe to na Kristodukɔa ase ɖo?
20 Amekae Yehowa azã atsɔ ahe to na Kristodukɔ dzeaglã la? Míekpɔ ŋuɖoɖoa le Nyaɖeɖefia ta 17 lia me. Woƒo nu tso gbolo aɖe, si nye ‘Babilon Gã,’ si tsi tre ɖi na xexeme alakpasubɔsubɔwo katã si me Kristodukɔa hã le la ŋu na mí le afima. Gbolo la do lã wɔadã dzĩ aɖe si ta adre kple dzo ewo li na. (Nyaɖeɖefia 17:3, 5, 7-12) Lã wɔadã la tsi tre ɖi na Dukɔ Ƒoƒuawo ƒe habɔbɔ.d Abe alesi blema Asiria tsrɔ̃ Samaria ene la, lã wɔadã dzĩ la “alé fu gbolo la, eye woawɔe aƒedo, eye woaɖe amamae, eye woaɖu eƒe ŋutilã, eye woatɔ dzoe wòafia keŋkeŋ.” (Nyaɖeɖefia 17:16) Eyata egbeŋkekea me Asiria (dukɔ siwo le Dukɔ Ƒoƒuawo me) agblẽ Kristodukɔa eye woagbãe gudugudu.
21, 22. Amekae aƒo dzo ɖe lã wɔadã la te be wòadze Mawu ƒe amewo dzi?
21 Ðe Yehowa ƒe Ðasefo nuteƒewɔlawo atsrɔ̃ akpe ɖe Babilon Gã la ŋua? Ao. Mawu kpɔa ŋudzedze ɖe wo ŋu. Tadedeagu dzadzɛ akpɔtɔ anɔ anyi. Gake lã wɔadã si atsrɔ̃ Babilon Gã la atsɔ ŋukeklẽ atɔ ŋku Yehowa ƒe amewo hã. Le esia wɔwɔ me la, manye Mawu ƒe tamesusu dzie woanɔ wɔwɔm ɖo o, ke boŋ ame bubu aɖe ƒe tamesusu dzie. Amekae nye ma? Satana Abosam ye.
22 Yehowa klo nu le tame si Satana ɖo dadatɔe la ŋu be: “Gbemagbe la nu aɖo dzi me na wò [Satana], eye àɖo tame vɔ̃ɖi agblɔ bena: Maho . . . ɖe amesiwo li bɔkɔɔ, eye woɖe dzi ɖi la dzi, amesiwo li, eye [ametakpɔkpɔ ƒe] gli . . . mele wo si o [ŋu], ne naha nu, naɖe aboyo nu.” (Xezekiel 38:10-12) Satana abu be, ‘Ẽ, nukata nyemaƒo dzo ɖe dukɔwo te ne woadze Yehowa Ðasefowo dzi o? Wonye ame beliwo, ametakpɔnu mele wo si o, eye dunyahehe ƒe ŋusẽ aɖeke mele wo si o ɖe. Womate ŋu ake nu hã o. Wo dzi dzedze anɔ bɔbɔe ŋutɔ abe azi siwo le xevitɔ si wogblẽ ɖi me ene!’
23. Nukata egbeŋkekea me Asiria mate ŋu awɔ nusi wòawɔ Kristodukɔa ɖe Mawu ƒe amewo ŋu o?
23 Gake dukɔwo, mikpɔ nyuie! Ele be mianya be ne mieka asi Yehowa ƒe amewo ŋu la, ele be miadze ŋgɔ Mawu ŋutɔ hã! Yehowa lɔ̃ eƒe amewo, eye kakaɖedzi li be awɔ aʋa ɖe wo nu abe alesi wòwɔ aʋa na Yerusalem le Xizkiya ƒe ŋkekeawo me ene. Ne egbeŋkekea me Asiria te kpɔ be yeatsrɔ̃ Yehowa subɔlawo ɖa la, anye aʋa ŋutɔŋutɔ si wòakpe kple Yehowa Mawu kple Alẽvi, Yesu Kristo. Enye aʋa si dzi Asiriatɔwo mate ŋu aɖu o. Biblia gblɔ be: “Alẽvi la laɖu wo dzi; elabena aƒetɔwo dzi aƒetɔ kple fiawo dzi fia wònye.” (Nyaɖeɖefia 17:14; tsɔe sɔ kple Mateo 25:40.) Abe blema Asiria ene la, lã wɔadã dzĩ la ‘ayi ɖe tsɔtsrɔ̃ me.’ Womagavɔ̃e azɔ o.—Nyaɖeɖefia 17:11.
24. (a) Nukae Kristotɔ vavãwo ɖo be yewoawɔ atsɔ adzra ɖo ɖe etsɔme ŋu? (b) Aleke Yesaya ƒe agbalẽa kpɔ nu yi ŋgɔ ʋĩ? (Kpɔ aɖaka si le axa 155.)
24 Kristotɔ vavãwo ate ŋu akpɔ mɔ na etsɔme vɔvɔ̃manɔmee ne wona ƒomedodo nyui nɔ wo kple Yehowa dome eye wona eƒe lɔlɔ̃nu wɔwɔ zu woƒe nu vevitɔ le agbe me. (Mateo 6:33) Ekema mele be ‘woavɔ̃ dzɔgbevɔ̃e aɖeke o.’ (Psalmo 23:4) Woatsɔ woƒe xɔseŋkuwo akpɔ Mawu ƒe alɔ sesẽ si wòdo ɖe dzi la, menye be wòatsɔ ahe toe na wo o, ke boŋ be wòatsɔ akpɔ wo ta tso eƒe futɔwo si me. Eye woƒe to ase nya sia si ganaa kakaɖedzi ame la be: ‘Migavɔ̃ o.’—Yesaya 10:24.
[Etenuŋɔŋlɔwo]
a Kpɔ Insight on the Scriptures ƒe Babla 1, axa 203.
b Be eme nakɔ ta la, míedzro Yesaya 10:28-32 me do ŋgɔ na Yesaya 10:20-27.
c Àkpɔ Yesaya 10:20-23 ŋuti numedzodzro le “Yesaya ƒe Agbalẽa Kpɔ Ŋgɔgbe Ʋĩ,” le axa 155.
d Nusi gbolo la kple lã wɔadã dzĩ la nye ŋuti nyatakaka bubuwo dze le Nyaɖeɖefia—Etaƒoƒo Keŋkeŋ la Ðo Vɔ!, si Watchtower Bible and Tract Society of New York, Inc. ta la ƒe ta 34 kple 35 lia me.
[Aɖaka/Nɔnɔmetata si le axa 155, 156]
YESAYA ƑE AGBALẼA KPƆ NU YI ŊGƆ ƲĨ
Alesi Yehowa azã Asiria ƒe amedzidzedze atsɔ adrɔ̃ ʋɔnu Israel kple ŋugbe si wòdo be yeakpɔ Yerusalem ta ŋu koŋue Yesaya ƒe agbalẽa ƒe ta 10 lia ƒo nu tsoe. Esi nyagblɔɖi sia ƒe domedome ye kpukpui 20 vaseɖe 23 le ta la, míate ŋu abui be wo katã va eme le ɣeyiɣi ɖeka me. (Tsɔe sɔ kple Yesaya 1:7-9.) Gake nya siwo wozã fia be ɣeyiɣi si ava emegbe ŋu koŋue kpukpui siawo ku ɖo, esime woabia akɔnta Yerusalem hã le emenɔlawo ƒe nuvɔ̃wo ta.
Fia Axaz te kpɔ be yeakpɔ dedienɔnɔ esi wòtrɔ ɖe Asiria ŋu be wòakpe ɖe ye ŋu. Nyagblɔɖila Yesaya gblɔe ɖi be le etsɔme ɣeyiɣi aɖe me la, Israel ƒe aƒea ƒe ame susɔeawo magawɔ bometsinu alea akpɔ o. Yesaya 10:20 gblɔ be “woaɖo dzi ɖe Yehowa, Israel ƒe kɔkɔetɔ la ŋu le nyateƒe me.” Gake kpukpui 21 lia ɖee fia be ame ʋɛ aɖewo koe awɔ nu nenema: ‘Ame susɔe ʋɛ aɖewo koe atrɔ gbɔ.’ Esia na míeɖo ŋku Yesaya viŋutsu Sear-Yasub, amesi nye dzesi le Israel eye eƒe ŋkɔ gɔmee nye “Ame Susɔeawo Atrɔ” la dzi. (Yesaya 7:3) Ta 10 ƒe kpukpui 22 lia xlɔ̃ nu le ‘tsɔtsrɔ̃’ aɖe si woɖo be ava ŋu. Tsɔtsrɔ̃ sia anye nu dzɔdzɔe elabena enye tohehe si sɔ na dukɔ dzeaglã ma. Nusi ado tso emee nye be ame susɔe aɖewo koe atrɔ gbɔ le dukɔ si me tɔwo sɔ gbɔ fũ abe “ƒutake” ene la dome. Kpukpui 23 lia xlɔ̃ nu be tsɔtsrɔ̃ sia si gbɔna ava anyigba bliboa katã dzi. Fifia ya womagakpɔ Yerusalem ta o.
Kpukpui siawo ɖe nusi dzɔ le ƒe 607 D.M.Ŋ. me, esime Yehowa zã Babilon Fiaɖuƒea wònye eƒe “ati” la fia nyuie. Anyigba bliboa, kple Yerusalem hã, dze amedzidzela la si me. Wokplɔ Yudatɔwo yi aboyo me le Babilon ƒe 70. Gake le ema megbe la, ame aɖewo—ne woganye ‘ame susɔe ʋɛ aɖewo’ ko hã—trɔ va gbugbɔ tadedeagu vavãtɔ ɖo anyi le Yerusalem.
Nyagblɔɖi si le Yesaya 10:20-23 gava eme le ƒe alafa gbãtɔ me, abe alesi Romatɔwo 9:27, 28 ɖee fia ene. (Tsɔe sɔ kple Yesaya 1:9; Romatɔwo 9:29.) Paulo ɖe eme be le gbɔgbɔmegɔmesese nu la, Yudatɔwo ƒe ‘ame susɔe’ aɖewo ‘trɔ gbɔ va’ Yehowa gbɔ le ƒe alafa gbãtɔ M.Ŋ. me, esime Yudatɔ nuteƒewɔlawo dome ame ʋɛ aɖewo va zu Yesu Kristo yomedzelawo eye wova nɔ Yehowa subɔm “le gbɔgbɔ kple nyateƒe me.” (Yohanes 4:24) Emegbe Trɔ̃subɔdukɔwo me tɔwo va kpe ɖe amesiawo ŋu, eye wozu gbɔgbɔmedukɔ, si nye “Mawu ƒe Israel.” (Galatiatɔwo 6:16) Ɣeyiɣi sia mee Yesaya 10:20 me nyawo va eme: dukɔ si ɖe adzɔgbe na Yehowa magatrɔ le eyome ava di kpekpeɖeŋu le amegbetɔwo gbɔ “azɔ o.”
[Nɔnɔmetata si le axa 147]
Sanxerib bu be dukɔwo haha le bɔbɔe abe azi fɔfɔ le xevitɔ me ene