Ta Etɔ̃lia

“Mina Míadzra Mía Dome Ðo”

Yesaya 1:10-31

1, 2. Amekawoe Yehowa tsɔ Yerusalem kple Yuda nɔlawo kple woƒe fiawo sɔ kplii, eye nukata wòsɔ nenema?

ÐEWOHĨ Yerusalem nɔlawo adi be yewoaɖe yewo ɖokui nu le fɔbuamenya siwo woŋlɔ ɖe Yesaya 1:1-9 la sese vɔ megbe. Ðikeke mele eme o be woadi be yewoaƒo nu tso vɔ siwo katã yewosana na Yehowa ŋu dadatɔe. Gake Yehowa ɖe nya si le esi ɖe nɔnɔme sia ŋu gblɔ dzikutɔe le kpukpui 10 vaseɖe 15 lia. Edze egɔme be: “Mi Sodom-amegãwo, mise Yehowa ƒe nya, mi Gomora-dukɔ, miƒu to anyi ɖe mía Mawu ƒe nufiame ŋu!”—Yesaya 1:10.

² Menye gbɔdɔdɔ ƒe agbe baɖa nɔnɔ ta koe wotsrɔ̃ Sodom kple Gomora ɖo o, ke woƒe dzimesesẽ kple dada ƒe nɔnɔmewo hã tae. (Mose I, 18:20, 21; 19:4, 5, 23-25; Xezekiel 16:49, 50) Anya wɔ mo yaa na amesiwo se Yesaya ƒe nyawo be wotsɔ yewo sɔ kple du mawo siwo woƒo fi de.a Gake alesi Yehowa ƒe dukɔa le tututue nye ma wòɖe gblɔ, eye Yesaya metɔ tsi Mawu ƒe gbedasia be ‘wòasɔ tome na wo’ o.—Timoteo II, 4:3.

 3. Nuka fiam Yehowa le esi wògblɔ be dukɔa ƒe vɔsawo ‘ti ye,’ eye nukatae wòdzɔ nenema?

³ Se alesi Yehowa se le eɖokui me le eƒe dukɔa ƒe tadedeagu si nye nusi wowɔna dzro ko ŋu la ɖa. “Yehowa be: Nuka miaƒe akpedavɔsa gbogboawo awɔ nam? Agbowo ƒe numevɔsa kple nyivi damiwo ƒe ami ti kɔ nam, eye nyiwo, alẽviwo kple gbɔ̃tsuwo ƒe ʋu medzea ŋunye o.” (Yesaya 1:11) Ameawo ŋlɔ be be menye yewoƒe vɔsawo ŋue Yehowa nɔa agbe ɖo o. (Psalmo 50:8-13) Nusi amegbetɔwo anae la ƒe ɖeke mehiãe o. Eyata ne dukɔa bu be yewotsɔ yewoƒe nunana siwo metso dzi blibo me o le Yehowa nu vem la, ke woda ƒu. Yehowa zã kpɔɖeŋunyagbɔgblɔ sẽŋu aɖe. Woagate ŋu agblɔ nya si nye “ti kɔ nam” la le mɔ bubu nu be “medzrom o” alo “ewu ko nam.” Edzɔ ɖe dziwò kpɔ be èɖi ƒo ale gbegbe be nuɖuɖua kpɔkpɔ gɔ̃ hã nyɔ ŋu na wòa? Nenemae Yehowa se le eɖokui me le vɔsa mawo ŋu—wonyɔ ŋu nɛ ale gbegbe!

 4. Aleke Yesaya 1:12 klo nu le dukɔa ƒe Yerusalem-gbedoxɔa me yiyi ƒe nu dzodzro nyenye ŋui?

⁴ Yehowa yi edzi be: “Ne mieva, be yewoado ɖe ŋkunye me la, amekae bia esia tso mia si be, mianɔ afɔ ƒom nye xɔxɔnuwo?” (Yesaya 1:12) Ðe menye Yehowa ŋutɔ ƒe see gblɔ be dukɔa ‘nava yeƒe ŋkume,’ si fia be woava yeƒe gbedoxɔa me le Yerusalem oa? (Mose II, 34:23, 24) Ẽ, gake esi wòbe woava afima ta koe wovana va dea ta agu abe kɔnu ko ene, ke menye be ɖe wòtso woƒe dzime o. Yehowa bua eƒe xɔxɔnu si wovana atraɖii la be enye ‘afɔƒoƒo’ teƒea dzro ko, eye ɖeko wotsɔ afɔ le teƒea gblẽm dzodzro.

 5. Nusiwo Yudatɔwo wɔna le woƒe tadedeagu me dometɔ aɖewo ɖe, eye nukata nusiawo va zu “agba” na Yehowa?

⁵ Mewɔ nuku o be fifia Yehowa gazã nya siwo nu sẽ wu tsɔ ƒo nu na wo! “Migasa nuɖuvɔ alakpatɔ azɔ o, dzudzɔdonu nyɔŋu wònye nam. Dzinu yeyewo, dzudzɔgbewo kple gbeƒãɖeɖe takpegbewo la, nyemate ŋu ado dzi atsɔ [ŋusẽ si gbɔ dzɔdzɔmetɔ ŋu, “NW”] kple takpekpewo o! Melé fu miaƒe dzinu yeyewo kple miaƒe ŋkekenyuiwo, wozu agba nam, eye wo tsɔtsɔ glom.” (Yesaya 1:13, 14) Nuɖuvɔsawo, dzudzɔdodo, Dzudzɔgbewo ɖuɖu, kple takpekpe kɔkɔewo katã nɔ Se si Mawu de na Israel me. Le “dzinu yeyewo” gome la, ɖeko Sea gblɔ be woaɖu wo, gake wotsɔ kɔnu nyui aɖewo va kpe ɖe wo ɖuɖu ŋu vivivi. (Mose IV, 10:10; 28:11) Wobua dzinu yeyea be enye sabat si woɖuna ɣleti sia ɣleti, esime ameawo dzudzɔa dɔwɔwɔ eye woƒoa ƒu gɔ̃ hã be nyagblɔɖilawo kple nunɔlawo nafia nu yewo. (Fiawo II, 4:23; Xezekiel 46:3; Amos 8:5) Menye nu gbegblẽe azã siawo ɖuɖu nye o. Nusi gblẽ le eŋue nye be woɖunɛ wònyea gotagome nuwɔwɔ dzro ko. Azɔ hã Yudatɔwo zãa “ŋusẽ si gbɔ dzɔdzɔmetɔ ŋu,” si nye gbɔgbɔyɔyɔnuwɔnawo, tsɔ tsaka nusi Mawu ƒe Sea gblɔ be woawɔ.b Eyata woƒe tadedeagu na Yehowa zu “agba” nɛ.

 6. Gɔmesese ka nue ‘nu glo’ Yehowa le?

⁶ Gake aleke wòate ŋu adzɔe be ‘nu naglo’ Yehowa? Ne míebu eŋu kpɔ la, “alɔkame sesẽ” le esi. “Nu metia kɔ nɛ o, ɖeɖi metea eŋu o.” (Yesaya 40:26, 28) Ðe Yehowa zã kpɔɖeŋunyagbɔgblɔ si me kɔ be míate ŋu ase alesi wòse le eɖokui me la gɔme. Ètsɔ agba kpekpe ɣeyiɣi didi aɖe ale gbegbe be nu te ŋuwò belibeli eye èdi be yeaɖe ta le ete kpɔa? Nenemae Yehowa se le eɖokui me le eƒe dukɔa ƒe tadedeagu me alakpanuwɔwɔ ŋu.

 7. Nukata Yehowa megasea eƒe dukɔa ƒe gbedodoɖa o?

⁷ Azɔ Yehowa ƒo nu tso tadedeagu ƒe akpa si nye ame ŋutɔ ƒe nuwɔna si ɖea eƒe seselelãme ememetɔ fiana wu la ŋu. “Ne mieke miaƒe abɔwo la, matsyɔ nu ŋku me ɖe mi, eye ne mieli kɔ gbedodoɖa gleglegle hã la, nyemasee o, elabena ʋu yɔ asi me na mi!” (Yesaya 1:15) Be woake asi me ado abɔ ɖe dzi nye kokoƒoƒo le gbedodoɖa me nuwɔna. Gɔmesese aɖeke megale nusia wɔwɔ ŋu le Yehowa gbɔ o, elabena ʋu yɔ asi me na eƒe dukɔa. Ŋutasẽnuwɔwɔ bɔ ɖe anyigba la dzi. Wotea ame beliwo ɖe anyi le afisiafi. Ŋunyɔnu wònye be ŋutasẽla kple ɖokuitɔdila siawo nado gbe ɖa na Yehowa abia eƒe yayra. Mewɔ nuku o be Yehowa gblɔ be, “nyemasee o”!

 8. Vodada kae Kristodukɔa wɔna egbea, eye aleke mɔ̃ ma tɔgbe ɖea Kristotɔ aɖewoe?

⁸ Nenema ke le míaƒe ŋkekea me la, Mawu mekpɔa ŋudzedze ɖe Kristodukɔa ƒe gbedodoɖa dzodzro siwo wogbugbɔ gblɔna edziedzi la kple eƒe ‘mawusubɔsubɔdɔ’ bubuawo ŋu o. (Mateo 7:21-23) Ele vevie ŋutɔ be míagage ɖe mɔ̃ ma ke me o. Ate ŋu adzɔ ɣeaɖewoɣi be Kristotɔ nava nɔ nuvɔ̃ gã aɖe wɔm eye wòabui be ne yeɣla nusi wɔm yele hedzi yeƒe dɔwɔwɔ ɖe edzi le Kristo-hamea me la, atutu yeƒe nuvɔ̃a ɖa. Dɔ siawo siwo wɔwɔ zu kɔnu dzro ko la medzea Yehowa ŋu o. Mɔ ɖeka koe li si dzi woate ŋu ato be woada gbɔgbɔmedɔ na ame, abe alesi Yesaya ƒe agbalẽa ƒe kpukpui siwo kplɔe ɖo ɖee fia ene.

Nusi Daa Gbɔgbɔmedɔ

9, 10. Aleke gbegbee dzadzɛnɔnɔ le vevie le míaƒe tadedeagu na Yehowa me?

⁹ Yehowa, Mawu nublanuikpɔla la, ƒo nu azɔ le vividoɖeameŋu me wòwɔ dɔ ɖe ame dzi. “Mile tsi, miklɔ mia ɖokui ŋu! Miɖe miaƒe nuwɔwɔ vɔ̃ɖiwo ɖa le ŋkunye me, eye midzudzɔ vɔ̃ɖiwɔwɔ! Misrɔ̃ nu nyui wɔwɔ, miti nya dzɔdzɔe yome, [miɖɔ ameteɖeanyila la ɖo, “NW”], midrɔ̃ ʋɔnu na tsyɔ̃eviwo, eye mihe nya na ahosiwo!” (Yesaya 1:16, 17) Míekpɔ nu asieke siwo nye sedede, alo nusiwo wòle be woawɔ kokoko, siwo woyɔ kplɔ wo nɔewo ɖo le afisia. Ene gbãtɔawo gblɔ nusiwo mele be woawɔ o le gɔmesese sia nu be woku ɖe nuvɔ̃ ɖeɖeɖa ŋu; atɔ̃ mamlɛawo nye nu nyui siwo wòle be woawɔ bene woaxɔ Yehowa ƒe yayra.

¹⁰ Tsilele kple ame ɖokui ŋu kɔkɔ nyea tadedeagu dzadzɛ ƒe akpa vevi aɖe ɣesiaɣi. (Mose II, 19:10, 11; 30:20; Korintotɔwo II, 7:1) Gake Yehowa di be ye subɔlawo ɖokui ŋu kɔkɔa nade to aɖo keke woƒe dzi gbɔ ke. Eƒe akpa vevitɔe nye alesi woanɔ kɔkɔe le agbenɔnɔ kple gbɔgbɔ me, eye esiae Yehowa wɔnɛ. Sedede eve gbãtɔ siwo le kpukpui 16 lia me la menye nya ɖeka gbugbɔgblɔ ko o. Hebri-gbeŋutisenyala aɖe gblɔ be nya gbãtɔ si nye “mile tsi” la nye nu gbãtɔ si woawɔ le ame ɖokui ŋu kɔkɔa me, eye evelia si nye “miklɔ mia ɖokui ŋu” fia alesi woayi edzi adze agbagba be woakpɔtɔ anɔ dzadzɛ.

11. Nukae wòle be míawɔ be míaɖe nuvɔ̃ ɖa, eye nukae mele be míawɔ gbeɖe o?

¹¹ Míate ŋu aɣla naneke ɖe Yehowa o. (Hiob 34:22; Lododowo 15:3; Hebritɔwo 4:13) Eyata nu ɖeka koe se si wòde be, “Miɖe miaƒe nuwɔwɔ vɔ̃ɖiwo ɖa le ŋkunye me” la ate ŋu afia—eyae nye be woadzudzɔ nu vɔ̃ɖi wɔwɔ. Ema mefia be míadze agbagba be míaɣla nuvɔ̃ gãwo o, elabena ema wɔwɔ nye nuvɔ̃ le eɖokui si. Lododowo 28:13 xlɔ̃ nu mí be: “Amesi tsɔ nu tsyɔ eƒe vodada dzi la, madze edzi nɛ o; ke amesi ʋu eme, eye wòdzudzɔe la, woave enu.”

12. (a) Nukata wòle vevie be ‘míasrɔ̃ nu nyui wɔwɔ’? (b) Aleke hamemegãwo koŋ awɔ ɖe mɔfiame siwo nye ‘miti nya dzɔdzɔe yome’ kple “mixɔ na amesi wote ɖe anyi” la dzii?

¹² Míate ŋu asrɔ̃ nu geɖe le afɔɖeɖe nyui siwo Yehowa de se be woawɔ le Yesaya ta 1, kpukpui 17 lia me la me. De dzesii be megblɔ ko be “miwɔ nu nyui” o, ke boŋ be ‘misrɔ̃ nu nyui wɔwɔ.’ Mawu ƒe Nya la sɔsrɔ̃ le ame ɖokui si ye kpena ɖe ame ŋu be wòase nusi nyo le Mawu ŋkume me eye wòadi be yeawɔe. Tsɔ kpe ɖe eŋu la, Yehowa megblɔ ko be “midrɔ̃ ʋɔnu dzɔdzɔe” o ke egblɔ boŋ be ‘miti nya dzɔdzɔe yome.’ Ele be hamemegã kpɔnuteƒewo gɔ̃ hã nadzro Mawu ƒe Nya la me nyuie ale be woakpɔ mɔ nyuitɔ si dzi woato le nya sesẽwo gbɔ kpɔkpɔ me. Woƒe agbanɔamedzi wònye hã be ‘woaɖɔ ameteɖeanyila la ɖo,’ si nye se bubu si Yehowa gade. Mɔfiame siawo le vevie na Kristotɔ alẽkplɔla siwo li egbea, elabena wodi be yewoakpɔ alẽha la ta tso “amegãxi nyanyrawo” si me.—Dɔwɔwɔwo 20:28-30.

13. Aleke míawɔ ɖe se siwo wode ku ɖe tsyɔ̃eviwo kple ahosiwo ŋu la dzi egbea?

¹³ Sedede eve mamlɛawo ku ɖe Mawu ƒe ame siwo ŋu wote ŋu wɔa ŋlɔmi le bɔbɔe wu la dometɔ aɖewo ŋu—woawoe nye tsyɔ̃eviwo kple ahosiwo. Xexeame dina ɣesiaɣi be yeatafa amesiawo; mele be wòanɔ alea le Mawu ƒe amewo dome o. Hamemegã lɔ̃amewo ‘drɔ̃a ʋɔnu’ na tsyɔ̃evi siwo le hamea me, eye wokpena ɖe wo ŋu be woadrɔ̃ ʋɔnu dzɔdzɔe na wo eye woakpɔ wo ta le xexe si dina be yeatafa wo ahagblẽ wo dome la me. Hamemegãwo ‘hea nya’ na ahosiwo alo, “dzea agbagba” na wo, abe alesi Hebrigbe me nya la agate ŋu afia ene. Nyateƒe wònye be Kristotɔwo katã dina be yewoanye sitsoƒe, akɔfafa, kple dzɔdzɔenyenye tsoƒe na amesiwo hiã tu le mía dome elabena woxɔ asi le Yehowa ŋkume.—Mixa 6:8; Yakobo 1:27.

14. Nya tuameɖo kae wogblɔ le Yesaya 1:16, 17?

¹⁴ Nya sẽŋu tuameɖo kawoe nye si Yehowa gblɔ le sedede asieke siawo me! Ɣeaɖewoɣi amesiwo wɔ nuvɔ̃ buna be maganya wɔ be yewoawɔ nu nyui o. Susu siawo ɖea dzi le ame ƒo. Tsɔ kpe ɖe eŋu la, womesɔ o. Yehowa nya—eye wòdi be míanya—be to Yeƒe kpekpeɖeŋu me la, nuvɔ̃wɔla ɖesiaɖe ate ŋu adzudzɔ eƒe nu vɔ̃ɖi wɔwɔ, atrɔ eƒe nɔnɔme, ahawɔ nu nyui boŋ.

Amekpekpe si Sɔ eye Nublanuikpɔkpɔ Le Eme

15. Aleke wosea nyagbɔgblɔ si nye “mina míadzra mía dome ɖo” gɔme bubui ɣeaɖewoɣi, gake nukae wòfia ŋutɔŋutɔ?

¹⁵ Vividoɖeameŋu kple nublanuikpɔkpɔ gadze wu le nya siwo Yehowa gagblɔ me. “Yehowa be: [Mina míadzra mía dome ɖo, “NW”]! Ne miaƒe nuvɔ̃wo le abe nyagadzĩ ene la, woafu abe sno ene, eye ne wobiã abe aɖabɛ ene la, woazu abe alẽfu ene.” (Yesaya 1:18) Zi geɖe la, amewo sea amekpekpe si wotsɔ dze kpukpui sia si me nyawo nya se la gɔme bubui. Le kpɔɖeŋu me, The New English Bible gblɔ be, “Mina míaʋli nya la”—abe ɖe wòle be akpa evea nadzaka nyaa akpɔ ava lɔ̃ ɖe nya ɖeka dzi ene. Menye nenemae kura o! Nya aɖeke meku ɖe Yehowa ŋu o eye vodada aɖeke mele alesi wòwɔ nu ɖe dukɔ dzeaglã sia si wɔa alakpanu la ŋu me hã o. (Mose V, 32:4, 5) Menye avuléle le akpa eve siwo ƒe nya sɔ kple wo nɔewo tɔ dome ŋue kpukpuia le nu ƒom tsoe o, ke boŋ enye ʋɔnudɔdrɔ̃ be woada nusianu ɖe enɔƒe. Ele abe ɖe Yehowa le gbɔgblɔm na Israel le afisia be woava ʋɔnu ene.

16, 17. Aleke míewɔ nya be Yehowa tsɔa nuvɔ̃ gãwo gɔ̃ hã kena faa?

¹⁶ Nya sia ate ŋu ado ŋɔdzi na ame, gake Yehowa nye Ʋɔnudrɔ̃la si nyoa dɔme hekpɔa nublanui na ame wu ɖesiaɖe. Ame aɖeke mete ŋu tsɔa nu kena dea enu o. (Psalmo 86:5) Eya koe ate ŋu atsɔ Israel ƒe nuvɔ̃ siwo le “abe nyagadzĩ ene” la, atutu wo ɖa, eye wòana “woafu abe sno ene.” Amegbetɔ ƒe agbagbadzedze, dɔwɔwɔmɔnu, vɔsasa, alo gbedodoɖa aɖeke mate ŋu atutu nuvɔ̃ le ame ŋu o. Yehowa ƒe tsɔtsɔke ko ate ŋu aklɔ nuvɔ̃ ɖa. Mawu nɔa te ɖe nanewo dzi tsɔ kena alea, si ƒe ɖee nye dzimetɔtrɔ vavãtɔ si amea ŋutɔ awɔ.

¹⁷ Nyateƒenya sia le vevie ale gbegbe be Yehowa zã hakpanya vovovowo tsɔ gbugbɔ gblɔe—nuvɔ̃ siwo “biã” ava zu abe alẽfu yeye si womede amae o ene. Yehowa di be míanya be Amesi tsɔa nuvɔ̃ kena ŋutɔŋutɔe yenye, aleke ke nuvɔ̃a ɖaloloe o, zi alesi yekpɔ be míetrɔ dzime nyateƒe ko. Enyo be amesiwo wòsesẽ na be woaxɔe ase be nenemae nya sia le le wo gome nabu kpɔɖeŋuwo abe Manase tɔ ene ŋu kpɔ. Ewɔ nuvɔ̃ ŋɔdzitɔe—ƒe geɖe. Ke hã etrɔ dzime eye wotsɔe kee. (Kronika II, 33:9-16) Yehowa di be mí katã, amesiwo wɔ nuvɔ̃ gãwo hã, míanya be metsi megbe akpa be ‘woadzra mía kplii dome ɖo’ o.

18. Tiatia kae Yehowa tsɔ ɖo eƒe dukɔ dzeaglã la ŋkume?

¹⁸ Yehowa ɖo ŋku edzi na eƒe amewo be woate ŋu awɔ tiatia. “Ne mielɔ̃, eye mieɖo to la, ekema miaɖu anyigba ƒe nu nyuitɔ. Ke ne miegbe, eye miesẽ to la, yi aɖu mi, elabena Yehowa ƒe nue gblɔe.” (Yesaya 1:19, 20) Yehowa te gbe ɖe nɔnɔme siwo míaɖe afia dzi le afisia, eye ezã kpɔɖeŋunyagbɔgblɔ bubu si me kɔ nyuie tsɔ kɔ eƒe nya la mee. Tiatia si Yuda ate ŋu awɔ enye si: Woaɖu nu loo alo woaɖu woawo ŋutɔ boŋ. Ne woƒe nɔnɔme si woɖe fiae nye be yewoalɔ̃ faa aɖo to Yehowa ahawɔ eƒe gbe dzi la, woaɖu anyigbaa ƒe nu nyuiwo. Gake ne woyi woƒe aglãdzedzea dzi la, ke woaɖu wo—woƒe futɔwo ƒe yi awɔ dɔ ma! Ewɔ mo yaa ŋutɔ be dukɔ aɖe natia woƒe futɔwo ƒe yi tsɔ wu be woatia nublanuikpɔkpɔ kple Mawu si tsɔa nuvɔ̃ kena ƒe nu nyui gbogbowo. Gake nenemae wòdzɔe le Yerusalem gome, abe alesi Yesaya ƒe agbalẽa ƒe kpukpui siwo kplɔe ɖo ɖee fia ene.

Wodzi Konyifaha ɖe Du Lɔlɔ̃a Ŋu

19, 20. (a) Aleke Yehowa ƒo nu tso alesi wòse le eɖokui me be wogblẽ ye ɖi ŋui? (b) Mɔ ka nue ‘dzɔdzɔenyenye nɔ Yerusalem kpɔ’ le?

¹⁹ Alesi gbegbe Yerusalem ƒe nuvɔ̃ɖiwɔwɔ sɔ gbɔe le ɣeyiɣi sia me la dze nyuie le Yesaya 1:21-23. Fifia Yesaya dze hakpanya si tso gbɔgbɔ me si wòkpa abe nublanuiha, alo konyifaha, ene la ŋɔŋlɔ gɔme: “Aleke du wɔnuteƒe, si me nya dzɔdzɔe nɔ fũ la, zu gbolo? Afisi dzɔdzɔenyenye nɔ tsã la, hlɔ̃dolawo li fifia!”—Yesaya 1:21.

²⁰ Aleke gbegbe Yerusalem-dugã la dze anyii enye si! Enye srɔ̃nyɔnu wɔnuteƒe tsã, gake fifia etrɔ zu gbolo. Ðe nya bubu aɖe agate ŋu aɖe alesi Yehowa se le eɖokui me be wogblẽ ye ɖi hedo naxaxa na ye la fia nyuie wu esia? “Dzɔdzɔenyenye nɔ” du sia me “tsã.” Ɣekaɣi? Hafi Israel nava dzɔ gɔ̃ hã, le keke Abraham ƒe ŋkekea me ke la, woyɔ du sia be Salem. Ŋutsu aɖe si nye fia kple nunɔla ye ɖu edzi. Eƒe ŋkɔ, Melxizedek, gɔmee nye “dzɔdzɔenyenye ƒe fia,” eye edze ƒã be ŋkɔa sɔ nɛ ŋutɔ. (Hebritɔwo 7:2; Mose I, 14:18-20) Anɔ ƒe 1,000 le Melxizedek ƒe fiaɖuɖu megbe la, Yerusalem ƒe ŋutikɔkɔe ɖo eƒe kɔkɔƒe le Dawid kple Salomo ƒe fiaɖuɣi. ‘Nya dzɔdzɔe nɔ eme fũ,’ vevietɔ esime eƒe fiawo zɔ Yehowa ƒe mɔwo dzi tsɔ ɖo kpɔɖeŋu na dukɔa. Gake kaka Yesaya ƒe ŋkekeawo naɖo la, ɣeyiɣi siawo va zu blemanya.

21, 22. Nuka ƒe kpɔɖeŋue wotsɔ aŋukawo kple wein si wotɔ tsii wɔ, eye nukata nya sia sɔ na Yuda-kplɔlawo nyuie?

²¹ Edze abe dukɔa kplɔlawo gbɔe kuxia ƒe akpa gãtɔ tso ene. Yesaya yi eƒe konyifahaa dzi be: “Wò klosalo zu aŋuka, eye wotsɔ tsi dzro wò wein! Wò amegãwo zu aglãdzelawo kple fiafiwo xɔlɔ̃; wo dome amesiame lɔ̃a zãnunana, eye wotia fetu yome; womedrɔ̃a ʋɔnu na tsyɔ̃eviwo o, eye ahosiwo ƒe nya medea wo gbɔ o.” (Yesaya 1:22, 23) Wotsɔ nya eve wɔ kpɔɖeŋu kplɔ wo nɔewo ɖo be wòaɖe nusi ava dzɔ afia. Gbede lɔa aŋukawo ɖa le klosalo si wòlólo dzi le eƒe nutuƒe tsɔ ƒua gbe. Israel megãwo kple ʋɔnudrɔ̃lawo le abe aŋukawo ene, ke menye klosalo la o. Ele be woatsɔ wo aƒu gbe. Womeganyo na naneke wɔwɔ o abe wein si wotɔ tsii si ƒe vivi bu ene. Ðeko wotsɔa aha sia tɔgbe ƒua gbe!

²² Kpukpui 23 lia ɖe nusita nya siawo sɔ na kplɔlaawo fia. Mose ƒe Sea na bubu nɔ Mawu ƒe amewo ŋu eye ena woɖe vovo tso dukɔ bubuwo gbɔ. Le kpɔɖeŋu me, ewɔ esia esi wòbia be woakpɔ tsyɔ̃eviwo kple ahosiwo ta. (Mose II, 22:22-24) Gake le Yesaya ƒe ŋkekea me la, mɔkpɔkpɔ gobi aɖeke menɔ tsyɔ̃eviwo si be woadrɔ̃ ʋɔnu dzɔdzɔe na yewo o. Le ahosiwo gome la, womete ŋu kpɔa amesi ase nya na wo gɔ̃ hã ʋuu wòayi agbagba dze ge be yeakpe ɖe wo ŋu o. Ʋɔnudrɔ̃la kple kplɔla siawo ƒe ŋku biã ɖe woa ŋutɔwo ƒe nuwo didi ŋu—wobiana be woana zãnu yewo, wotia nunanawo yome, eye wowɔa ɖeka kple fiafiwo, si ate ŋu afia be wokpɔa nuvlowɔlaawo ta henaa amesiwo ŋu wogblẽ nu le kpea fu. Nusi vɔ̃ɖi wue nye be wozu “aglãdzelawo,” alo totitritɔwo, le woƒe nu vɔ̃ɖiwo wɔwɔ me. Nɔnɔme wɔnublanui kae nye si!

Yehowa Akɔ Eƒe Amewo Ŋu

23. Seselelãme kae Yehowa ɖe gblɔ le eƒe futɔwo ŋu?

²³ Yehowa mazi kpi akpɔe woazã ŋusẽ ɖe mɔ gbegblẽ nu alea ɖaa o. Yesaya yi edzi be: “Eyata Aƒetɔ, Yehowa Zebaot, Israel ƒe ŋusẽtɔ la ƒe gbe enye si: Alele, mele akɔ fa ge na ɖokuinye ɖe nye ketɔwo ŋu, eye mele hlɔ̃ bia ge ɖe nye futɔwo ŋu.” (Yesaya 1:24) Wozã dzesideŋkɔ etɔ̃ na Yehowa le afisia, si te gbe ɖe eƒe aƒetɔnyenye si dze kple eƒe ŋusẽ triakɔ dzi. Anɔ eme be ɣlidonya si nye ‘Alele!’ la fia be togbɔ be nɔnɔmea wɔ nublanui na Yehowa hã la, eɖoe kplikpaa be yeawɔ nu ɖe yeƒe dziku nu. Edze ƒã be esɔ be wòawɔe nenema.

24. Aleke Yehowa ɖo tame be yeakɔ yeƒe amewo ŋui?

²⁴ Yehowa ŋutɔ ƒe amewo wɔ wo ɖokui eƒe futɔwoe. Mawu tɔ dzɔ le go sia go me be wòdo dziku ɖe wo ŋu. Yehowa ‘afa akɔ na eɖokui,’ alo aɖe wo ɖa le eɖokui ŋu. Ðe esia fia be aɖe dukɔ si ŋu eƒe ŋkɔ le la ɖa keŋkeŋ tegbeea? Ao, elabena Yehowa yi edzi gblɔ be: “Matrɔ nye asi ɖe ŋuwò, eye malólo wò aŋukawo abe adzalẽɖaɖi wotsɔ wɔe ene, eye maɖe wò tsumiwo katã ɖa.” (Yesaya 1:25) Fifia Yehowa zã alesi wolóloa gae tsɔ wɔ kpɔɖeŋu. Blema galólola zãa adzalẽɖaɖi zi geɖe tsɔ ɖea ɖi ɖa le ga xɔasia ŋu. Le mɔ ma tɔgbe ke nu la, Yehowa si mebua eƒe amewo be wovɔ̃ɖi le go sia go me o la ‘ahe to si sɔ na wo.’ Nusi wòaɖe ɖa le wo ŋu koe nye “tsumiwo”—wo dometɔ siwo nye aglãdzela gbegblẽ siwo gbe nusɔsrɔ̃ kple toɖoɖo.c (Yeremya 46:28) Mɔnukpɔkpɔ su Yesaya si wòtsɔ nya siawo ŋlɔ ŋutinya ɖi do ŋgɔ hafi nua ŋutɔ va dzɔ.

25. (a) Aleke Yehowa dza eƒe amewo ŋu le ƒe 607 D.M.Ŋ. mee? (b) Ɣekaɣie Yehowa dza eƒe amewo ŋu le egbeŋkekeawo me?

²⁵ Yehowa kɔ eƒe amewo ŋu nyateƒe, eye wòɖe aŋuka ƒoɖi siwo nye kplɔla gbegblẽwo kple aglãdzela bubuwo ɖa le wo ŋu. Le ƒe 607 D.M.Ŋ. me, si nye ɣeyiɣi didi aɖe le Yesaya ƒe ŋkekeawo megbe la, wotsrɔ̃ Yerusalem eye wokplɔ emenɔlawo yi aboyo me le Babilon ƒe 70. Esia sɔ kple afɔ si Mawu gaɖe ɣeyiɣi didi aɖe le ema emegbe la le go aɖewo me. Nyagblɔɖi si le Maleaxi 3:1-5 si woŋlɔ ɣeyiɣi didi aɖe le Babilon-boyomenɔɣia megbe la ɖee fia be Mawu agawɔ nuŋukɔkɔdɔ aɖe. Efia asi ɣeyiɣi si me Yehowa Mawu ava eƒe gbɔgbɔmegbedoxɔa me eye Yesu Kristo si nye eƒe “nubabla ƒe dɔla” anɔ eŋu. Edze ƒã be esia dzɔ le Xexemeʋa I ƒe nuwuwu. Yehowa lé ŋku ɖe amesiwo katã gblɔ be Kristotɔwo yewonye la ŋu, eye wòɖe nyateƒetɔwo ɖe vovo tso aʋatsotɔwo gbɔ. Nukae do tso eme?

26-28. (a) Aleke Yesaya 1:26 va eme zi gbãtɔe? (b) Aleke nyagblɔɖi sia va eme le míaƒe ɣeyiɣia mee? (d) Aleke nyagblɔɖi sia ate ŋu aɖe vi na hamemegãwo egbeae?

²⁶ Yehowa ɖo eŋu be: “Magaɖo ʋɔnudrɔ̃lawo na wò abe tsã ene, kple adaŋudelawo na wò abe le gɔmedzedzea me ene. Esia megbe woayɔ wò be dzɔdzɔenyenye ƒe du, du wɔnuteƒe. Woatsɔ ʋɔnudɔdrɔ̃ aɖe Zion, eye woatsɔ dzɔdzɔenyenye aɖe eƒe amesiwo trɔ ta me la.” (Yesaya 1:26, 27) Nyagblɔɖi sia va eme zi gbãtɔ na blema Yerusalem. Esi aboyomeawo trɔ yi woƒe du lɔlɔ̃a me le ƒe 537 D.M.Ŋ. megbe la, wogakpɔ ʋɔnudrɔ̃la kple aɖaŋuɖola nuteƒewɔlawo abe tsãtɔwo ene. Nyagblɔɖila Xagai kple Zaxarya, nunɔla Yosua, agbalẽŋlɔla Ezra, kple mɔmefia Zerubabel, wo katã wofia mɔ ame susɔe wɔnuteƒe siwo trɔ gbɔ la heɖo aɖaŋu na wo be woazɔ Mawu ƒe mɔwo dzi. Gake egava eme le mɔ si le vevie wu nu le ƒe alafa 20 lia me.

²⁷ Le ƒe 1919 me la, Yehowa ƒe egbeŋkekea me dukɔ to dodokpɔɣi la me do. Woɖe wo tso gbɔgbɔmeboyomenɔnɔ le Babilon Gã si nye alakpasubɔsubɔ ƒe xexemefiaɖuƒe la me. Vovototo si le amesiamina susɔe nuteƒewɔlawo kple Kristodukɔa ƒe osɔfo xɔsegbelawo dome va dze ƒã. Mawu gayra eƒe amewo eye ‘wògaɖo ʋɔnudrɔ̃lawo kple aɖaŋuɖolawo na wo’—ŋutsu nuteƒewɔla siwo ɖoa aɖaŋu na Mawu ƒe amewo ɖe eƒe Nya la nu ke menye ɖe amegbetɔ ƒe kɔnyinyiwo nu o. Egbea ŋutsu siawo siwo de akpe geɖe la le “ha sue” si me tɔwo le vɔvɔm kple woƒe zɔhɛ ‘alẽ bubu’ miliɔn geɖe si me tɔwo le dzidzim ɖe edzi la dome.—Luka 12:32; Yohanes 10:16; Yesaya 32:1, 2; 60:17; 61:3, 4.

²⁸ Enɔa susu me na hamemegãwo be yewozua “ʋɔnudrɔ̃lawo” le hamea me ɣeaɖewoɣi ale be yewoana wòanɔ dzadzɛ le agbenɔnɔ kple gbɔgbɔ me eye be yewoaɖɔ nuvɔ̃wɔlawo ɖo. Wodina vevie be yewoawɔ nu wòasɔ ɖe Mawu ƒe mɔ nu, eye wosrɔ̃a eƒe nublanuikpɔkpɔ kple dzɔdzɔenyenye si da sɔ la. Gake ‘aɖaŋuɖolawoe’ wonyena le nya akpa gãtɔ me. Le nyateƒe me la, wowɔa nu wòtoa vovo na amegãwo alo ameteɖeanyilawo, eye wodzea agbagba ɖesiaɖe be yewomawɔ nu gbeɖe wòadze abe ɖe yewole ‘aƒetɔ ɖum ɖe Mawu ƒe domenyinu la dzi’ ene gɔ̃ hã o.—Petro I, 5:3, NW.

29, 30. (a) Nukae Yehowa gblɔ be adzɔ ɖe amesiwo gbe viɖe kpɔkpɔ tso nuŋudzadza ƒe ɖoɖoa me dzi? (b) Gɔmesese ka nue ‘ŋu kpe’ ameawo ɖe atiwo kple abɔwo ta le?

²⁹ Ke “aŋuka” si woyɔ le Yesaya ƒe nyagblɔɖia me ya ɖe? Nukae dzɔna ɖe amesiwo gbea viɖekpɔkpɔ tso Mawu ƒe nuŋudzadza ƒe ɖoɖoa me dzi? Yesaya yi edzi be: “Woagbã godzelawo kple nuvɔ̃wɔlawo siaa nyanyanya, eye amesiwo trɔ le Yehowa yome la nu ayi. Elabena ŋu akpe mi le logoti, siwo ŋu miekpɔa dzidzɔ le la ŋu, eye miaƒe mo atsi dã le abɔ, siwo mielɔ̃na la ŋu.” (Yesaya 1:28, 29) Amesiwo dze go hewɔ nuvɔ̃ ɖe Yehowa ŋu eye wogbe toɖoɖo eƒe nyagblɔɖilawo ƒe nuxlɔ̃amegbedasiwo vaseɖe esime wòtsi megbe akpa la ‘gbã’ eye ‘wonu yi’ nyateƒe. Esia dzɔ le ƒe 607 D.M.Ŋ. me. Gake nukae ati kple abɔ siwo woyɔ le afisia la fia?

³⁰ Trɔ̃subɔsubɔ ƒe kuxi nɔ Yudatɔwo ŋu ɣeyiɣi didi aɖe. Wowɔa atiwo, abɔwo, kple kutsetsetiwo ŋudɔ zi geɖe le woƒe nuwɔna ɖigbɔawo me. Le kpɔɖeŋu me, Baal kple srɔ̃a Astarte subɔlawo xɔe se be mawu eveawo kuna woɖia wo le pepi me. Nusi trɔ̃subɔlaawo wɔna be woatsɔ anyɔ wo ne woadɔ ale be woana anyigba la nawɔ nu enye be wokpea ta hekpɔa gome le gbɔdɔdɔnuwɔna ɖigbɔwo me le ati “kɔkɔewo” te le atikutsetsegblewo alo abɔwo me. Ne tsi dza eye nukuwo wɔ la, wotsɔa kafukafua naa alakpamawuawo; ena dzi gaɖoa trɔ̃subɔlaawo ƒo le woƒe alakpadzixɔsewo me. Gake esime Yehowa gbã trɔ̃subɔla dzeaglãawo nyanyanya la, trɔ̃ aɖeke mete ŋu kpɔ wo ta o. ‘Ŋu kpe’ aglãdzelaawo ɖe ati kple abɔ siawo siwo ŋu wɔna aɖeke mele la o ta.

31. Nukae dze ŋgɔ trɔ̃subɔlawo si vɔ̃ɖi wu ŋukpe?

³¹ Gake Yudeatɔ trɔ̃subɔlawo dze ŋgɔ nane si vɔ̃ɖi wu ŋukpe. Yehowa trɔ kpɔɖeŋua eye fifia etsɔ trɔ̃subɔla la ŋutɔ sɔ kple ati. “Mia ŋutɔwo mianɔ abe logoti, siwo ƒe aŋgba yrɔ, kple abɔ, si tsi aɖeke meli na o la ene.” (Yesaya 1:30) Kpɔɖeŋu sia sɔ ŋutɔ na Titina Ɣedzeƒe si xɔa dzo eye yame ƒuna le. Ati alo abɔ aɖeke manɔ anyi adidi ne mekpɔ tsi ɣesiaɣi o. Ne agble sia ƒu la, dzo ate ŋu afiã wo bɔbɔe. Eyata esɔ be wotsɔ kpɔɖeŋu si le kpukpui 31 lia kplɔe ɖo.

32. (a) Amekae nye “ame sesẽ” si ŋu woƒo nu tsoe le kpukpui 31 lia? (b) Gɔmesese ka nue wòava zu abe “ɖetifu” ene le, “dzoxi” kae ana wòalé dzo, eye nukae ado tso eme?

³² “Ame sesẽ la azu ɖetifu, eye eƒe dɔwɔwɔ azu dzoxi; wo kple eve la siaa woabi, eye ame aɖeke mate ŋu atsi wo o.” (Yesaya 1:31) Amekae nye “ame sesẽ” sia? Hebrigbe me nyagbɔgblɔ si wozã la fia ŋusẽ kple kesinɔnuwo. Anɔ eme be alakpamawuwo yomenɔla kesinɔtɔ siwo ka ɖe wo ɖokui dzi la ŋue wòku ɖo. Le Yesaya ƒe ŋkekea me la, ame geɖe gbe Yehowa kple tadedeagu dzadzɛ, abe alesi wòle le míaƒe ŋkekea me hã ene. Edze abe ɖe nu dze edzi na wo dometɔ aɖewo gɔ̃ hã ene. Ke hã Yehowa xlɔ̃ nu be amesiawo anɔ abe “ɖetifu,” ɖetifu babla siwo bɔbɔ heƒu ale gbegbe be ɖeko wokakana ne dzo gbɔ ɖe wo ko ene. (Ʋɔnudrɔ̃lawo 16:8, 9) Trɔ̃subɔla ƒe dɔwo—eɖanye eƒe trɔ̃wo, eƒe kesinɔnuwo, alo nuka ke wòɖasubɔna ɖe Yehowa teƒe o—anɔ abe “dzoxi” si léa nu ene. Dzoxi kple ɖetifu la siaa abi avɔ le dzo si ame aɖeke mate ŋu atsi o la me. Ŋusẽ aɖeke mele xexeame si ate ŋu atrɔ Yehowa ƒe ʋɔnudɔdrɔ̃ debliboawo bubui o.

33. (a) Aleke Mawu ƒe nuxlɔ̃ame le ʋɔnudɔdrɔ̃ si gbɔna ŋu ɖe eƒe nublanuikpɔkpɔ fiae? (b) Mɔnukpɔkpɔ kae Yehowa ʋu ɖi na ameƒomea fifia, eye dɔ kae esia wɔna ɖe mía dometɔ ɖesiaɖe dzi?

³³ Ðe gbedasi mamlɛ sia sɔ ɖe nublanuikpɔkpɔ kple tsɔtsɔke ƒe gbedasi si dze le kpukpui 18 lia me la nua? Esɔ ɖe nu ŋutɔ! Yehowa na esubɔlawo ŋlɔ nuxlɔ̃amenya siawo ɖi hegblɔ wo le esi wònye nublanuikpɔla ta. Ne míebu eŋu kpɔ la, “melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ.” (Petro II, 3:9) Enye mɔnukpɔkpɔ na nyateƒe Kristotɔ ɖesiaɖe egbea be wòaɖe gbeƒã Mawu ƒe nuxlɔ̃amegbedasiwo na ameƒomea ale be eƒe tsɔtsɔke faa la naɖe vi na dzimetrɔlawo eye woanɔ agbe tegbee. Aleke gbegbe Yehowa ƒe dɔme nyoe enye si be wòna mɔnukpɔkpɔ ameƒomea be ‘woaɖɔ wo kplii dome ɖo’ hafi wòatsi megbe akpa!

[Etenuŋɔŋlɔwo]