Ta Wuienelia

Yehowa Bɔbɔ Dadalawo ƒe Du aɖe Ðe Anyi

Yesaya 13:1–14:23

 1. Nusiwo ava dzɔ emegbe ka ŋue Yesaya ƒe agbalẽa gaƒo nu tsoe azɔ?

WOŊLƆ Yesaya ƒe nyagblɔɖigbalẽa le ƒe alafa enyilia D.M.Ŋ. me esime Asiriatɔwo ho aʋa ɖe Ŋugbedodonyigba la ŋu. Abe alesi míekpɔe le eƒe agbalẽa ƒe ta siwo do ŋgɔ me ene la, Yesaya gblɔ alesi nuwo ava yii ɖi pɛpɛpɛ wòɖe dzesi. Gake agbalẽa ƒo nu tso nusiwo adzɔ le Asiriatɔwo ƒe ŋusẽkpɔɣi megbe hã ŋu. Egblɔ alesi dukɔ si Yehowa bla nu kpli atrɔ gbɔ tso aboyo me le dukɔ geɖe siwo dome Sinear, si nye afisi Babilon nɔ, hã le me ɖi. (Yesaya 11:11) Míekpɔ nyagblɔɖi ɖedzesi aɖe le Yesaya ta 13 lia si me vava aʋu mɔ ɖi na tɔtrɔgbɔ sia. Wodze nyagblɔɖia gɔme kple nya siawo be: “Nya, si Yesaya, Amoz vi la, kpɔ ɖe Babel ŋu enye si.”—Yesaya 13:1.

‘Mate Adegbeƒoƒo Ðe To’

 2. (a) Aleke wòdzɔe be kadodo va nɔ Xizkiya kple Babilon dome? (b) Nukae “aflaga” si woava tu la nye?

² Kadodo va nɔ Yuda kple Babilon dome le Yesaya ƒe agbenɔɣi. Fia Xizkiya dze dɔ vevie gake ehaya. Amedɔdɔwo tso Babilon va be woava do gbe nɛ le esi wòhaya ta, eye anye be ɖe woɖoe be yewoana Xizkiya nava kpe ɖe yewo ŋu ne yewoawɔ aʋa kple Asiria togbɔ be womeɖee gblɔ o hã. Fia Xizkiya wɔ bometsinu esi wòfia eƒe kesinɔnuwo katã wo. Eyata Yesaya gblɔ na fia Xizkiya be le eƒe ku megbe la, woalɔ kesinɔnu mawo katã ayi Babilon. (Yesaya 39:1-7) Esia va eme le ƒe 607 D.M.Ŋ. me esime wotsrɔ̃ Yerusalem eye wokplɔ dukɔa yi aboyo me. Gake Mawu ƒe dukɔ tiatia la matsi aboyo me le Babilon o. Yehowa gblɔ alesi wòaʋu mɔ ɖi be woatrɔ ava wo de la ɖi. Edze egɔme be: “Mitu aflaga ɖe to ƒeƒle la ta me, mido ɣli yɔ wo, mimiã asi wo, ne woage ɖe amegãwo ƒe du la me!” (Yesaya 13:2) “Aflaga” lae nye xexemefiaɖuƒe aɖe si nɔ ŋusẽ kpɔm si ava xɔ bubunɔƒe le Babilon si. Woatui ɖe “to ƒeƒle la ta me”—afisi le dzedzem nyuie si woate ŋu akpɔ tso adzɔge ʋĩ. Woana xexemefiaɖuƒe yeye ma nadze Babilon dzi ahato ‘amegãwo ƒe agbowo,’ si nye dugã ma ƒe agbowo la nu akpasesẽtɔe eye woaɖu edzi.

 3. (a) Amekawoe nye ‘ame kɔkɔe’ siwo Yehowa adɔ? (b) Gɔmesese ka nue ‘wokɔ’ trɔ̃subɔlawo ƒe aʋakɔwo ‘ŋu’ le?

³ Azɔ Yehowa gblɔ be: “Medɔ nye ame kɔkɔewo, meyɔ nye kalẽtɔwo, nye aseyetsolawo kple adegbeƒolawo ɖe nye dɔmedzoe la ŋu. Miƒu to anyi, zi le ɖiɖim le towo dzi abe dukɔ geɖewo tɔ ene; fiaɖuƒewo kple anyigba dzi dukɔ, siwo kpe ta la ƒe howɔwɔ le ɖiɖim. Yehowa Zebaot le aʋakɔwo xlẽm!” (Yesaya 13:3, 4) Amekawoe nye ‘ame kɔkɔe’ siawo siwo wotia be woabɔbɔ Babilon si nye dadalawo ƒe du la ɖe anyi? Wonye “dukɔ, siwo kpe ta” ƒe aʋakɔ siwo wɔ ɖeka. Woɖi aga tso towo dzi le didiƒe ɖo ta Babilon. “Wotso anyigba didi dzi, tso dziƒo ƒe mlɔenu.” (Yesaya 13:5) Gɔmesese ka nue wokɔ wo ŋu le? Edze ƒã be mefia be wonye dukɔ kɔkɔewo o. Trɔ̃subɔlawo ƒe aʋakɔ siwo me Yehowa subɔsubɔ ƒe didi aɖeke mele o ye wonye. Gake ne wobe ‘wokɔ’ nane ‘ŋu’ le Hebri Ŋɔŋlɔawo me la, efia be “Mawu ɖe nua ɖe vovo be yeazã.” Yehowa ate ŋu akɔ dukɔwo ƒe aʋakɔwo ŋu eye wòazã woƒe ɖokuitɔdidi ƒe ŋkɔxɔxɔdidi atsɔ aɖe eƒe dziku afia. Ezã Asiria le mɔ sia nu. Azã Babilon le mɔ ma tɔgbe nu. (Yesaya 10:5; Yeremya 25:9) Eye azã dukɔ bubuwo hã atsɔ ahe toe na Babilon.

4, 5. (a) Nya kae Yehowa gblɔ ɖi le Babilon ŋu? (b) Nukawoe wòahiã be amesiwo ava dze Babilon dzi nadze ŋgɔe?

⁴ Babilon mekpɔ zu fiaɖuƒe si kpɔ ŋusẽ ɖe xexeame dzi haɖe o. Gake nya si Yehowa gblɔ to Yesaya dzi la fia be ava nɔ ɖoƒe ma ɣeaɖeɣi, eye egblɔ eƒe anyidzedze ɖi. Egblɔ be: “Mifa avi, elabena Yehowa ƒe ŋkeke la tu aƒe, egbɔna abe ŋusẽkatãtɔ ƒe nugbegblẽ ene.” (Yesaya 13:6) Ẽ, nuxaxa ƒe avifafa axɔ ɖe Babilon ƒe adegbeƒoƒo la teƒe. Nukatae? “Yehowa ƒe ŋkeke,” si nye ŋkeke si dzi Yehowa adrɔ̃ ʋɔnui la tae.

⁵ Gake aleke wòate ŋu adzɔe be woagblẽ Babilon? Ne ɣeyiɣia de be Yehowa nawɔ esia la, adze abe ɖe dugã ma le dedie ene. Gbã ahiã be aʋakɔ siwo ava dze wo dzi la natso Frat Tɔsisi si sina toa dua titina wònye dzɔdzɔmetakpɔnu na dugã la, eye wona wòde nu ʋe gã aɖe si ƒo xlã dua la me hezu woƒe tsinono. Babilon-gli gã eve ƒokpli si dze abe ame aɖeke mate ŋu agbãe age ɖe dua me o la hã li. Tsɔ kpe ɖe eŋu la, nuɖuɖu gbogbo aɖe anɔ dua me. Agbalẽ si nye Daily Bible Illustrations gblɔ be Nabonido—Babilon-fia mamlɛtɔ—“dze agbagba vevie dzra nuɖuɖu gbogbo aɖe ɖo ɖe dua me, eye wogblɔ be [nuɖuɖu] si nɔ afima la ate ŋu asu na dua me tɔwo ƒe blaeve sɔŋ.”

 6. Nukae adzɔ le vome ne Babilon dzi dzedze si wogblɔ ɖi la ɖo edzi?

⁶ Gake nuwo ƒe dzedzeme ate ŋu aflu ame. Yesaya gblɔ be: “Eyata asiwo katã ado agblɔ, eye amegbetɔwo ƒe dziwo katã alólo gbanaa. Dzidzi ƒo wo, nutsoame kple veve lé wo, eye wole ku lém abe nyɔnu dzivi ene; wofɔ ŋku ɖe wo nɔewo dzi gã, eye woƒe mo le [vevem] hẽ!” (Yesaya 13:7, 8) Ne aʋakɔ si aɖu wo dzi va dze dua dzi la, vevesese si nu sẽ abe nyɔnu si le vi dzim tɔ ene axɔ ɖe dua me tɔwo ƒe dziɖeɖi teƒe. Vɔvɔ̃ ana woƒe dzi nalólo. Gbafa aƒo wo wòana woƒe asiwo nado agblɔ, ale be womate ŋu aʋli wo ɖokui ta o. Woƒe mo anɔ “vevem” le vɔvɔ̃ kple dzodzodzoetsitsi ta. Awɔ mo yaa na wo woanɔ wo nɔewo ŋkume kpɔm, eye alesi woƒe dugã la le mumu gee la awɔ nuku na wo.

 7. “Yehowa ƒe ŋkeke” kae nɔ ŋgɔgbe gbɔna, eye nukae ado tso eme na Babilon?

⁷ Gake amu godoo. Ele be Babilon nadze ŋgɔ akɔntabiagbe aɖe si nye “Yehowa ƒe ŋkeke,” si me vevesese geɖe anɔ. Ʋɔnudrɔ̃lagã la aɖe eƒe dziku ɖe Babilon-nɔla nuvɔ̃wɔlawo ŋu eye wòadrɔ̃ ʋɔnu si wodze na la wo. Nyagblɔɖia gblɔ be: “Kpɔ ɖa, Yehowa ƒe ŋkeke dziŋɔ la gbɔna, dziku kple dɔmedzoe heliheli, ne wòado gbegbe anyigba la, eye wòatsrɔ̃ nuvɔ̃wɔlawo ɖa le edzi.” (Yesaya 13:9) Afɔku gã aɖee dze ŋgɔ Babilon. Ðeko wòle abe ɖe ɣe, ɣleti, kple ɣletiviwo katã magaklẽ o ene. “Elabena dziƒoɣletiviwo kple woƒe avũ kple avũtɔwo mana woƒe kekeli naklẽ o, ne ɣe dze la, ado viviti, eye ɣleti mana eƒe kekeli naɖi o.”—Yesaya 13:10.

 8. Nukata Yehowa ɖoe be woamu Babilon?

⁸ Nukata nusia adzɔ ɖe dugã sia si me tɔwo dana la dzi? Yehowa gblɔ be: “Matu xexeame ƒe vɔ̃ɖiwɔwɔ kple ame vɔ̃ɖiwo ƒe vodada ŋu fe na wo, mana dadalawo ƒe dàda nu natso, eye mate ŋutasẽlawo ƒe adegbeƒoƒo ɖe to.” (Yesaya 13:11) Yehowa aɖe eƒe dɔmedzoe afia atsɔ ahe to na Babilon ɖe alesi wosẽ ŋuta le Mawu ƒe dukɔ ŋu ta. Anyigba bliboa akpe fu le Babilontɔwo ƒe vɔ̃ɖinyenye ta. Fia ameteɖeanyila siawo magado vlo Yehowa alesi dze wo ŋu azɔ o!

 9. Nukae nɔ Babilon lalam le Yehowa ƒe ʋɔnudrɔ̃gbea?

⁹ Yehowa gblɔ be: “Mana amegbetɔ nave abe sika nyuitɔ ene, eye ame kodzogbea abe Ofir-sika ene.” (Yesaya 13:12) Ẽ, ame aɖeke maganɔ dua me o, wòazu dudo. Yehowa yi edzi be: “Eyata matsɔ Yehowa Zebaot ƒe dzikudodo kple eƒe dɔmedzoedogbe ana dziƒo nadzo kpekpekpe, eye anyigba naʋuʋu le enɔƒe.” (Yesaya 13:13) Babilon ƒe “dziƒo,” si nye eƒe mawu kple mawunɔ gbogboawo, adzo nyanyanya eye womate ŋu akpe ɖe dua ŋu le eƒe hiãtuameɣi o. “Anyigba,” si nye Babilon Fiaɖuƒea, aʋuʋu le enɔƒe, eye ɖeko woayɔ eƒe ŋkɔ le ŋutinya me be enye fiaɖuƒe siwo nɔ anyi kpɔ la dometɔ ɖeka. “Ava me na wo abe sãde, si wonyã ɖe nu, kple alẽ, siwo ame aɖeke mele wo nu o la ene; amesiame atu ta eƒe dukɔ gbɔ, eye amesiame asi ayi eƒe anyigba dzi.” (Yesaya 13:14) Dukɔ bubu siwo doa alɔ Babilon asi agblẽe ɖi, eye woakpɔ mɔ be kadodo yeye nava nɔ yewo kple xexemefiaɖuƒe si ɖu wo dzi la dome. Babilon azu du si dzi woɖu mlɔeba eye wòase veve heliheli, si nye veve si tɔgbe wòna dukɔ bubu geɖe se le eƒe atsyɔ̃ŋkekeawo me: “Woada nu amesi ke woakpɔ, eye amesi ke asi tu la, atsi yi nu; woaxlã wo viwo ɖe nu le wo ŋku me, woaha woƒe aƒewo, eye woade asi wo srɔ̃wo ŋu.”—Yesaya 13:15, 16.

Mawu ƒe Ametsrɔ̃la

10. Amekawoe Yehowa azã atsɔ aɖu Babilontɔwo dzii?

¹⁰ Fiaɖuƒe kae Yehowa azã atsɔ amu Babilon? Yehowa ɖo nya sia ŋu anɔ ƒe 200 do ŋgɔ be: “Kpɔ ɖa, made adã Mediatɔwo ƒe ta me ɖe wo ŋu, amesiwo mebua klosalo o, eye sika medzroa wo o; woƒe dawo tea ɖekakpuiwo, womekpɔa nublanui na fu nɔdɔmee o, eye woƒe ŋkuwo mevea ɖeviwo nu o. Ale wòava me na Babel, si nye fiaɖuƒewo ƒe nu vevi kple Kaldeatɔwo ƒe adegbeƒoƒo kple atsyɔ̃ la, abe alesi Mawu trɔ Sodom kple Gomora bu anyi ene.” (Yesaya 13:17-19) Babilon si ŋu bubu nɔ la amu, eye aʋakɔ siwo tso didiƒe le Media si nye dukɔ si le towo dzi lae Yehowa azã le esia wɔwɔ me.a Mlɔeba la, Babilon azu aƒedo abe Sodom kple Gomora siwo me agbegbegblẽnɔnɔ bɔ ɖo ŋutɔ la ene.—Mose I, 13:13; 19:13, 24.

11, 12. (a) Aleke Media wɔ va zu xexemefiaɖuƒe? (b) Nɔnɔme wɔmoyaa ka ŋue nyagblɔɖia ƒo nu tsoe le Media-ʋakɔwo ŋu?

¹¹ Le Yesaya ƒe ŋkekea me la, Media kple Babilon siaa nɔ Asiria ƒe ŋusẽ te. Anɔ ƒe alafa ɖeka megbe le ƒe 632 D.M.Ŋ. me la, Media kple Babilon ʋakɔwo wɔ ɖeka hemu Niniwe si nye Asiria ƒe fiadu. Esia ʋu mɔ ɖi na Babilon wòva zu xexemefiaɖuƒe si kpɔ ŋusẽ wu. Medze sii be le ƒe siwo ade 100 le ema megbe la, Media ava tsrɔ̃ ye o! Ameka hãe ate ŋu ado dzi agblɔ nya sia tɔgbe ɖi ne menye Yehowa Mawu koe o?

¹² Esi Yehowa nɔ nu ƒom tso amesiwo wòtia ɖe dɔ sia wɔwɔ ŋu ŋuti la, egblɔ be Media-ʋakɔwo “mebua klosalo o, eye sika medzroa wo o.” Nɔnɔme wɔmoyaa kae nye si dze le asrafo siwo aʋawɔwɔ na woƒe tagbɔ sẽ ŋu! Biblia ŋutinunyala Albert Barnes gblɔ be: “Aʋakɔ amedzidzela ʋɛ aɖewo koe metsia dzi ɖe aboyonuwo haha ŋu o.” Ðe Mediatɔwo na Yehowa ƒe nya sia va eme le go sia mea? Ẽ. Bu nya sia si dze le agbalẽ si nye The Bible-Work, si J. Glentworth Butler ta me ŋu kpɔ: “Mediatɔwo, kple vevietɔ Persiatɔwo, dea asixɔxɔ aʋadziɖuɖu kple ŋkɔxɔxɔ ŋu wu sika, si to vovo na dukɔ siwo wɔ aʋa kpɔ dometɔ akpa gãtɔ ƒe nɔnɔme.”b Esia ta mewɔ nuku o be esime Pesiatɔ fia Kores na ablɔɖe Israel-viwo tso Babilontɔwo ƒe aboyo me la, eɖe asi le sika kple klosalo nu akpe geɖe si Nebukadnezar lɔ tso Yerusalem-gbedoxɔa me la ŋu na wo.—Ezra 1:7-11.

13, 14. (a) Togbɔ be Media kple Persia aʋawɔlawo metsia dzi ɖe aboyonuwo ŋu o hã la, nukae wodina vevie? (b) Aleke Kores ɖu Babilon ƒe ametakpɔnu siwo ta woƒo adegbe ɖo la dzii?

¹³ Togbɔ be Media kple Persia aʋawɔlawo metsia dzi ɖe aboyonuwo ŋu boo o hã la, wodia ŋkɔxɔxɔ ŋutɔ. Womedi be dukɔ bubu aɖeke nanɔ ŋgɔ na yewo le xexeame o. Tsɔ kpe ɖe eŋu la, Yehowa tsɔ “nugbegblẽ” de woƒe dzime. (Yesaya 13:6) Eyata woɖoe kplikpaa be yewoatsɔ yewoƒe dati siwo nye ga—si menye ɖe woate ŋu atsɔ wo ada dawoe ko o ke woate ŋu atsɔ wo aƒo futɔwo ƒe asrafo siwo nye Babilon vidzidziwo ahafanya wo hã—la aɖu Babilon dzii.

¹⁴ Babilontɔwo ƒe ametakpɔnu sesẽwo meɖe dzi le Kores si nye Medo-Persia ʋakɔwo kplɔla la ƒo o. Le October 5/6, 539 D.M.Ŋ. ƒe zã me la, ena wotrɔ Frat Tɔsisia me tsiwo to teƒe bubu. Esi tsia nɔ miemiem la, amedzidzelaawo zɔ dzadzadza to tɔʋu si me tsiwo se ata na wo la me ge ɖe dua me. Wova lili Babilon-nɔlawo, eye Babilon mu. (Daniel 5:30) Yehowa Mawu ƒe gbɔgbɔ ʋã Yesaya wògblɔ nya siawo ɖi, si na ɖikeke aɖeke mele eme o be Eyae na wòdzɔ nenema.

15. Etsɔme kae nɔ Babilon lalam?

¹⁵ Aleke gbegbee woatsrɔ̃ Babilon? Se nya si Yehowa gblɔ ɖa: “Womatso aƒe ɖe afima akpɔ o tegbee, eye wòatsi anyi aƒedoe tso dzidzime yi dzidzime, Arabiatɔwo matu agbadɔ ɖe afima o, eye lãkplɔviwo mana lãwo natsyɔ akɔ ɖe afima o; gbemelãwo atsyɔ akɔ ɖe afima, eye favieʋuto ayɔ woƒe xɔwo me, golowo atso aƒe ɖe afima, eye azizãwo aɖi adzrɔ le afima. Gbevũwo axlɔ̃ le woƒe dziƒoxɔwo me kple amegãxiwo le woƒe agbeɖuɖu ƒe fiasãwo me. Woƒe ɣeyiɣi tu aƒe, eye woƒe ŋkeke mahe ɖe megbe o.” (Yesaya 13:20-22) Dugã ma azu dudo keŋkeŋ.

16. Kakaɖedzi kae alesi Babilon le fifia la na mí?

¹⁶ Esia medzɔ enumake le ƒe 539 D.M.Ŋ. me o. Ke hã edze ƒã egbea be nya sia nya si Yesaya gblɔ ɖi le Babilon ŋu la va eme. Biblia ŋuti numeɖela aɖe gblɔ be Babilon “nye dudo gã aɖe fifia eye xɔ gbagbãwoe li kɔ ɖe afima, eye nenemae wòle ƒe alafa geɖe enye sia.” Egblɔ kpe ɖe eŋu be: “Asesẽ be nàkpɔ teƒe sia eye nàgbe ŋkuɖoɖo alesi gbegbe Yesaya kple Yeremya ƒe nyawo va eme pɛpɛpɛe dzi.” Edze ƒã be amegbetɔ aɖeke mate ŋu agblɔ Babilon ƒe mumu kple eƒe aƒedozuzu mlɔeba ɖi le Yesaya ƒe ŋkekea me o. Ne míebu eŋu kpɔ la, esi Yesaya ŋlɔ eƒe agbalẽa ƒe 200 megbe hafi Babilon mu dze Media kple Persia tɔwo si me! Eye ƒe alafa geɖe megbe hafi wòva zu aƒedo keŋkeŋ. Ðe esia medo ŋusẽ míaƒe xɔse be Biblia nye Mawu ƒe Nya si tso gbɔgbɔ me oa? (Timoteo II, 3:16) Tsɔ kpe ɖe eŋu la, esi Yehowa na nyagblɔɖiwo va eme le ɣeyiɣi siwo va yi me ta la, míate ŋu aka ɖe edzi bliboe be Biblia ƒe nyagblɔɖi siwo meva eme haɖe o hã ava eme le Mawu ƒe ɣeyiɣi ɖoɖi dzi.

‘Kpɔ Gbɔdzɔe tso Wò Fuɖeɖewo Me’

17, 18. Yayra kawoe wòanye na Israel ne woɖu Babilon dzi?

¹⁷ Babilon ƒe mumu ana gbɔdzɔe Israel. Ana woavo tso aboyomenɔnɔ me eye wòana mɔnukpɔkpɔ wo be woatrɔ ayi Ŋugbedodonyigba la dzi. Eyata Yesaya gblɔ azɔ be: “Yehowa ave Yakob nu, eye wòagatia Israel ahakplɔ wo aɖo woƒe anyigba dzi, du bubu me tɔwo akpe ɖe wo ŋu, eye woaku ɖe Yakob ƒe aƒe la ŋu. Woakplɔ dukɔwo ayi wo teƒee, eye woazu Israel ƒe aƒe la tɔ anye dɔlaŋutsuwo kple dɔlanyɔnuwo le Yehowa ƒe anyigba la dzi; ale woalé amesiwo ɖe aboyo wo la, eye woaɖu amegã ɖe woƒe ŋutasẽlawo dzi.” (Yesaya 14:1, 2) “Yakob” si woyɔ le afisia la fia Israel bliboa—to 12 la katã. Yehowa akpɔ nublanui na “Yakob” aɖe mɔ na dukɔ la be woatrɔ ayi wo de. Amedzro akpe geɖe ayi kpli wo, amesiwo dometɔ geɖe ava subɔ Israel-viwo anye gbedoxɔmesubɔviwo. Israel-vi aɖewo ava kpɔ ŋusẽ ɖe amesiwo ɖe aboyo wo tsã la dzi gɔ̃ hã.c

¹⁸ Womagaxaxa le aboyomenɔnɔ ta o. Ke boŋ Yehowa ana eƒe dukɔ nakpɔ “gbɔdzɔe [tso woƒe] fuɖeɖewo kple hiãkakawo kpakple dɔ sesẽ, siwo wotsɔ do kluvi [woe] me.” (Yesaya 14:3) Esi wona ablɔɖe Israel tso kluvidɔwo wɔwɔ me ta la, womagase veve alo atɔtɔ le alakpamawusubɔlawo dome nɔnɔ ta o. (Ezra 3:1; Yesaya 32:18) Esi agbalẽ si nye Lands and Peoples of the Bible nɔ nu ƒom tso esia ŋu la, egblɔ be: “Babilontɔwo bua woƒe mawuwo abe woa ŋutɔwo ɖokui ene, elabena woƒe nɔnɔme vɔ̃ɖitɔ kekeakewo hã le mawuawo hã si. Wonye vɔvɔ̃nɔtɔwo, ahanomunɔwo kple bometsilawo.” Gbɔdzɔe ka gbegbee nye si wòanye be woavo tso mawusubɔsubɔ ƒe nɔnɔme ɖigbɔ sia me!

19. Nukae hiã hafi Yehowa natsɔ ake Israel, eye nukae míesrɔ̃ tso esia me?

¹⁹ Gake nanewo dzie Yehowa ƒe nublanuikpɔkpɔ nɔa te ɖo. Ele be eƒe dukɔa naɖee afia be yewose veve ɖe yewoƒe nuvɔ̃ɖiwɔwɔ si na Mawu he to sesẽ ma gbegbe na wo la ta. (Yeremya 3:25) Ne wotso dzime ʋu woƒe nuvɔ̃ me anukwaretɔe la, Yehowa atsɔ ake wo. (Kpɔ Nexemya 9:6-37; Daniel 9:5.) Gɔmeɖose sia ke wɔa dɔ egbea hã. Esi “amegbetɔ aɖeke megbea nuvɔ̃wɔwɔ o” ta la, mí katã míehiã na Yehowa ƒe nublanuikpɔkpɔ. (Kronika II, 6:36) Yehowa, Mawu nublanuikpɔla la, kpe mí lɔlɔ̃tɔe be míaʋu míaƒe nuvɔ̃wo me na ye, míatrɔ dzime, eye míaɖe asi le mɔ vɔ̃ ɖesiaɖe ŋu be míaƒe lãme nasẽ. (Mose V, 4:31; Yesaya 1:18; Yakobo 5:16) Menye ɖeko esia na wògava kpɔa ŋudzedze ɖe mía ŋu ko o ke efaa akɔ na mí hã.—Psalmo 51:3; Lododowo 28:13; Korintotɔwo II, 2:7.

Wodo “Hamelo” ɖe Babilon Ŋu

20, 21. Aleke dukɔ siwo ƒo xlã Babilon kpɔ dzidzɔ ɖe eƒe mumu ŋui?

²⁰ Ƒe 100 kple edzivɔ hafi Babilon nava zu xexemefiaɖuƒe ɖedzesi la, Yesaya gblɔ alesi xexeame awɔ nu ɖe eƒe mumu ŋui ɖi. Ede se si nye nyagblɔɖi na Israel-vi siwo wona ablɔɖee tso eƒe aboyomenɔnɔ me la be: “Àdo hamelo sia ɖa ɖe Babel-fia ŋu agblɔ bena: Funyafunyawɔwɔ nu tso, eye ŋutasesẽ wu enu! Yehowa ŋe ame vɔ̃ɖiwo ƒe ati, dziɖulawo ƒe atikplɔ, si ƒo dukɔwo le dziku me atraɖi, si te anyigba dzi dukɔwo ɖe anyi le dɔmedzoe me heti wo yome madzudzɔmadzudzɔe la.” (Yesaya 14:4-6) Wonya Babilon be enye duwo xɔla kple ameteɖeanyila si wɔa ablɔɖemewo kluviwoe. Aleke wòsɔe nye si be woado “hamelo” ɖe Babilonia-fiaƒome ƒe mumu ŋu—si dze egɔme tso Nebukadnezar dzi hewu nu ɖe Nabonido kple Belsazar dzi—si nɔ dzi ɖum le dugã la ƒe ŋusẽkpɔɣi!

²¹ Aleke gbegbe eƒe mumu atrɔ nuwoe enye si! “Anyigba blibo la gbɔ ɖe eme bɔkɔɔ, wode asi aseyetsotso me. Sesewuwo kple Libanon ƒe sedertiwo le dzidzɔ kpɔm ɖe ŋuwò be: Esime nèmlɔ anyi kpaa la, mía lãlawo megaho ɖe mía ŋu kpɔ o.” (Yesaya 14:7, 8) Babilon-fiawo bua dukɔ siwo ƒo xlã wo ƒe fiawo abe ati siwo woatso ahazã na woa ŋutɔwo ƒe dɔwo wɔwɔ ene. Fifia megale nenema o. Babilon si nye atilãla la lã eƒe atiwo vɔ!

22. Le hakpanya ƒe gɔmesese nu la, dɔ kae Babilon-fiaƒomea ƒe mumu wɔ ɖe tsiẽƒe dzi?

²² Babilon ƒe mumu awɔ mo yaa ale gbegbe be yɔdo gɔ̃ hã gblɔ be: “Tsieƒe le to me ʋĩ dzo nyanyanya le ŋkuwò me, le esi nèva do goe la ta; enyɔ ŋɔli, siwo nye anyigba dzi ŋusẽtɔwo katã le ŋkuwò me, ena dukɔwo ƒe fiawo katã tso le woƒe fiazikpuiwo dzi. Wo katã woxɔ dzi gblɔ na wò bena: Wò hã ègbɔdzɔ abe míawo ke ene, èzu abe míawo ene. Wò atsyɔ̃ kple wò saŋkuwo ƒe ɖiɖi yi tsieƒe, wotsɔ nyẽwo ɖo aba na wò, eye ŋɔwo tsyɔ dziwò.” (Yesaya 14:9-11) Hakpanya me kpɔɖeŋu sẽŋu ka gbegbee nye si! Ele abe ɖe ameƒomea ƒe yɔdo nyɔ fia mawo siwo katã ku do ŋgɔ na Babilon-fiaƒomea me tɔwo ale be woate ŋu ado dzaa na woƒe amedzroa ene. Woɖu fewu le Babilon-fiaɖuƒe si ŋu wɔna vɔ le fifia, eye wòmlɔ nyẽwo me ɖe aba xɔasi teƒe, eye ŋɔviwo tsyɔ edzi ɖe aklala xɔasi teƒe la ŋu.

‘Abe Lã Kuku si Wofanya Kple Afɔ Ene’

23, 24. Dada si gbɔ eme kae Babilon-fiawo ɖe fia?

²³ Yesaya yi eƒe lododoa dzi be: “Wò ŋukeɣletivi, agudzevi, ale nège tso dziƒo enye si! Wò, amesi te dukɔwo ɖe anyi, woƒo wò ƒu anyigba!” (Yesaya 14:12) Ðokuitɔdidi ƒe dada na Babilon-fiawo do wo ɖokui ɖe dzi wu amesiwo dome wonɔ. Wotsɔ ŋusẽ ɖu amewo dzi dadatɔe, abe fɔŋli me ɣletivi si le keklẽm sesĩe le dziŋgɔli ene. Nusi koŋ nye dada na woe nye Nebukadnezar ƒe Yerusalem dzi ɖuɖu, si nye nusi Asiria mete ŋu wɔ o. Lododoa ɖee fia be Babilon-fiaƒome si dana la gblɔ be: “Malia dziƒo, mali nye fiazikpui ɖe Mawu ƒe ɣletiviwo ta me, eye mabɔbɔ nɔ takpeto la dzi le anyiehe kekeake; malia alilikpowo ta me, eye mía kple dziƒoʋĩtɔ la míanɔ tasɔsɔ me.” (Yesaya 14:13, 14) Ðe nya sia megbɔ eme akpa oa?

²⁴ Le Biblia me la, wotsɔ fia siwo tso Dawid ƒe fiaƒomea me la sɔ kple ɣletiviwo. (Mose IV, 24:17) Tso Dawid dzi heyina la, ‘ɣletivi’ mawo nɔ Zion Toa dzi ɖu fia. Esi Salomo tu gbedoxɔ ɖe Yerusalem megbe la, wova nɔ du bliboa yɔm be Zion. Le Se ƒe nubablaa te la, wobia tso Israel-ŋutsuwo katã si be woayi Zion zi etɔ̃ ƒe ɖeka. Ale wòdzɔe be wòva zu “takpeto.” Nebukadnezar ɖe tame si wòɖo be yeado ye ɖokui ɖe dzi wu ‘ɣletivi’ mawo la fia esi wòɖoe be yeaɖu Yuda-fiawo dzi aɖe wo ɖa le to ma dzi. Metsɔ wo dzi ɖuɖu ƒe kafukafu na Yehowa o. Ke boŋ eƒe nuwɔna fia be etsɔ eɖokui ɖo Yehowa teƒe dadatɔe.

25, 26. Aleke Babilon-fiaƒomea va nuwuwu ŋukpetɔe?

²⁵ Aleke gbegbe nuwo ava trɔe na Babilon-fiaƒome si dana lae nye si! Babilon mexa ɖo Mawu ƒe ɣletiviwo tame nɔnɔ gbɔ kura o. Ke boŋ Yehowa gblɔ be: “Woatutu wò aƒu tsiẽƒe, ɖe aʋli doblukɔ tsiɖitsiɖi la me. Amesiwo kpɔ wò la, aɖe ŋku ɖe wò, agaɖe ŋku ɖe wò ʋuu agblɔ bena: Ŋutsu, si na anyigba dzo nyanyanya, eye wòʋuʋu fiaɖuƒewo la, nye esia? Amesi wɔ xexeame wòzu gbegbe, gbã eƒe duwo ƒu anyi, eye meɖe asi le eƒe aboyomewo ŋu ɖo ɖe aƒe o la, nye esia?” (Yesaya 14:15-17) Ŋkɔxɔxɔdilawo ƒe fiaƒomea ayi tsiẽƒe (Sheol), abe amegbetɔ bubu ɖesiaɖe ene.

²⁶ Ekema afikae ŋusẽ si ɖu fiaɖuƒewo dzi, tsrɔ̃ anyigba wɔnuwo, eye woxɔ du gbogbo aɖewo la anɔ? Afikae xexemefiaɖuƒe si ɖe aboyo amewo eye meɖe asi le wo ŋu ɖo ɖe aƒe o la anɔ? Womaɖi Babilon-fiaƒomea bubutɔe gɔ̃ hã o! Yehowa gblɔ be: “Anyigba dzi dukɔwo ƒe fiawo katã la, wo katã womlɔ anyi le bubu me, wo dometɔ ɖesiaɖe ɖe eƒe ɖiƒe. Ke wotsɔ wò ya ƒu gbe tso wò yɔdo gbɔ, abe atilɔ, si wotsɔ ƒu gbe, kple lã kuku, si wofanya kple afɔ la ene, eye ame tsiaʋa, siwo woda yii, eye woyi agu me kpewo gbɔ la, tsyɔ dziwò. Màsɔ kple woamawo le yɔ me o; elabena ègblẽ wò anyigba, eye nèwu wò dukɔ. Womayɔ ame vɔ̃ɖiwo ƒe viwo ŋkɔ akpɔ o tegbee.” (Yesaya 14:18-20) Le blemaxexeame la, enyea ŋukpe be woagbe fia ɖiɖi bubutɔe. Eyata aleke wònɔ le Babilon-fiaƒomea gome? Enye nyateƒe be ɖewohĩ woɖi fia ɖekaɖekawo bubutɔe ya, gake wotsɔ fiagãwo ƒe ƒome si tso Nebukadnezar me la ƒu gbe “abe atilɔ, si wotsɔ ƒu gbe” ene. Enɔ abe ɖe wotsɔ fiaƒomea ƒu gbe ɖe yɔdo si ŋu dzesi aɖeke mele o me ene—abe asrafo afɔzɔla si tsi aʋa ene! Aleke gbegbe woɖi gbɔ woe enye si!

27. Mɔ ka nue Babilontɔwo ƒe dzidzimeviwo akpe fu le wo tɔgbuiwo ƒe vodada ta le?

²⁷ Wotsɔ nya mamlɛ sia si wogblɔ na Media kple Persia si va ɖu wo dzi la ƒo lododoa tae be: “Midzra wuƒe ɖo hena viawo le wo fofowo ƒe vodada ta. Womegatso, ne woaxɔ anyigba la, eye woatsɔ anyiglãgowo ayɔ xexeame o.” (Yesaya 14:21) Babilon magafɔ tso eƒe anyidzedzea me o. Woaho Babilon-fiaƒomea kple ke. Ŋusẽ magaɖo eŋu akpɔ o. Babilontɔwo ƒe dzidzimeviwo akpe fu le “wo fofowo ƒe vodada ta.”

28. Nuka gbɔe Babilon-fiawo ƒe nuvɔ̃ tso, eye nukae míesrɔ̃ tso esia me?

²⁸ Nusɔsrɔ̃ vevi aɖe le ʋɔnu si wodrɔ̃ Babilon-fiaƒomea me na mí. Nusi gbɔ Babilon-fiawo ƒe nuvɔ̃ tsoe nye ŋkɔxɔxɔdidi atraɖii. (Daniel 5:23) Woƒe dzime yɔ fũ kple ŋusẽ didi. Wodi be yewoaɖu ame bubuwo dzi. (Yesaya 47:5, 6) Eye wodi vevie be amewo natsɔ bubu si dze na Mawu la ana yewo. (Nyaɖeɖefia 4:11) Esia nye nuxlɔ̃ame na amesiame si le ŋusẽnɔƒe—le Kristo-hamea me gɔ̃ hã. Yehowa maɖe mɔ ɖe nɔƒegãdidi kple ɖokuitɔdidi ƒe dada ŋu o, eɖanye na ame ɖekaɖekawo loo alo dukɔwo o.

29. Nuka ɖeɖefiae Babilon-fiawo ƒe dada kple ŋkɔxɔxɔdidi nye?

²⁹ Babilon-fiawo ƒe dada nye “xexe sia me mawu,” Satana Abosam, ƒe nɔnɔme ɖeɖefia. (Korintotɔwo II, 4:4) Eya hã dia ŋusẽ ŋkubiãtɔe eye wòdi be yeado ye ɖokui ɖe dzi wu Yehowa Mawu. Abe alesi wòdzɔ le Babilon-fia kple amesiwo dzi wòɖu gomee ene la, Satana ƒe nɔƒegãdidi ƒoɖi la he xaxa kple fukpekpe vɛ na ameƒomea katã.

30. Babilon bubu ka ŋue woƒo nu tsoe le Biblia me, eye nɔnɔme kae wòɖe fia?

³⁰ Tsɔ kpe ɖe eŋu la, míexlẽ nu tso Babilon bubu ŋu le Nyaɖeɖefia ƒe agbalẽa me—eyae nye “Babilon gã la.” (Nyaɖeɖefia 18:2) Habɔbɔ sia si nye alakpasubɔsubɔ ƒe xexemefiaɖuƒe la ɖe dada, ameteteɖeanyi, kple ŋutasesẽ ƒe nɔnɔme fia. Esia ta ele be eya hã nadze ŋgɔ “Yehowa ƒe ŋkeke” aɖe eye woatsrɔ̃e le Mawu ƒe ɣeyiɣi ɖoɖi dzi. (Yesaya 13:6) Woɖe gbeƒã gbedasi sia tso ƒe 1919 me ke be: “Babilon gã la mu!” (Nyaɖeɖefia 14:8) Emu esi mete ŋu zi Mawu ƒe amewo dzi ɖe aboyo me o ta. Eteƒe madidi o woatsrɔ̃e ɖa keŋkeŋ. Yehowa de se sia le blema Babilon ŋu be: “Miɖo eƒe nuwɔna teƒe nɛ, miwɔ nɛ pɛpɛpɛ, abe alesi wòwɔ ene, elabena Yehowa, Israel ƒe kɔkɔetɔ la ŋu wòwɔ nu tovo ɖo.” (Yeremya 50:29; Yakobo 2:13) Ʋɔnu ma tɔgbe ye woadrɔ̃ Babilon Gã la hã.

31. Nukae adzɔ ɖe Babilon Gã la dzi kpuie?

³¹ Eyata menye blema Babilon ŋu koe nya mamlɛ si Yehowa gblɔ le nyagblɔɖi sia me le Yesaya ƒe agbalẽa me la ku ɖo o ke eku ɖe Babilon Gã la hã ŋu be: “Matso ɖe wo ŋu . . . Matsrɔ̃ ŋkɔ kple ame susɔeawo, viwo kple dzidzimeviwo ɖa le Babel ŋu. . . . Matsɔe awɔ hlɔ̃madewo nɔƒe kple simee, eye matsɔ tsɔtsrɔ̃ ƒe abaya akplɔe.” (Yesaya 14:22, 23) Blema Babilon ƒe dudowo ɖe nusi Yehowa le Babilon Gã la wɔ ge kpuie fia. Akɔfafa kae nye si wònye na tadedeagu vavã lɔ̃lawo! Dzideƒo ka gbegbee nye si wònye na mí be míadze agbagba be míagaɖe mɔ gbeɖe be Satana ƒe nɔnɔme siwo nye dada, ɖokuidodoɖedzi, alo ŋutasesẽ nage ɖe mía me o!

[Etenuŋɔŋlɔwo]

[Nɔnɔmetata si le axa 178]

Babilon si mu la va zu dzogbelãwo ƒe adzrɔɖiƒe

[Nɔnɔmetata siwo le axa 186]

Babilon Gã la azu du gbagbã abe blema Babilon ene