Dziɖuɖu Si Ahe Paradiso Vɛ

Esime Yesu nɔ anyigba dzi la, egblɔ na eyomedzelawo be woado gbe ɖa abia be Mawu ƒe Fiaɖuƒea nava hegblɔ be: “Wò Fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” (Mateo 6:9, 10) Egaƒo nu edziedzi le “fiaɖuƒe la ƒe nyanyuie” la ŋuti. (Mateo 4:23) Le nyateƒe me la, eƒo nu le Fiaɖuƒea ŋuti geɖe wu nu bubu ɖesiaɖe. Nukatae? Elabena Fiaɖuƒe lae nye dɔwɔnu si dzi Mawu ato aɖɔ kuxi siwo wɔe be agbenɔnɔ sesẽ egbea la ɖo. Eteƒe madidi o la, Mawu ato Fiaɖuƒea dzi aɖe aʋawɔwɔ, dɔwuame, dɔléle, kple hlɔ̃dodo ɖa eye wòahe ɖekawɔwɔ kple ŋutifafa vɛ.

Ðe nàdi be yeanɔ xexe ma ƒomevi mea? Ne èdii la, ekema ele be nàxlẽ agbalẽ gbadza sia. Àva nyae le eme be Fiaɖuƒe la nye dziɖuɖu, gake enyo wu dziɖuɖu ɖesiaɖe si ɖu ameƒomea dzi kpɔ. Àva kpɔ mɔ dodzidzɔname si dzi Mawu to ɖe eƒe tameɖoɖowo ku ɖe Fiaɖuƒea ŋuti me na esubɔlawo ʋeʋeʋe la hã. Hekpe ɖe eŋu la, àva kpɔ alesi Fiaɖuƒea ate ŋu akpe ɖe ŋuwò egbeae kura gɔ̃ hã.

Le nyateƒe me la, àte ŋu ava nye Mawu ƒe Fiaɖuƒea te nɔla fifi laa. Gake hafi nàtia be yeawɔ esia la, ahiã be nàganya nu geɖe tso eŋuti. Eyata míede dzi ƒo na wò be nàdzro agbalẽ gbadza sia me. Nusianu si wòagblɔ na wò tso Fiaɖuƒea ŋu la tso Biblia me.

Gbã la, na míakpɔ nusita míehiã na Mawu ƒe Fiaɖuƒea alea gbegbe ɖo.

Le amegbetɔ ƒe ŋutinya ƒe gɔmedzedze me la, Mawu wɔ amegbetɔ wòde blibo eye wòdae ɖe paradiso me. Ɣemaɣi la, Fiaɖuƒea mehiã o.

Gake mía dzila gbãtɔ siwo nye Adam kple Xawa ɖo to Satana si nye mawudɔla dzeaglã aɖe. Eka aʋatso na wo tso Mawu ŋu eye wòna woawo hã wodze aglã ɖe Mawu ŋu. Eyata wodze na ku elabena “nuvɔ̃ la ƒe fetue nye ku.”— Romatɔwo 6:23.

Amegbetɔ madeblibo si nye nuvɔ̃me la mate ŋu adzi vi deblibowo o. Eyata wodzi Adam ƒe viwo katã wonye ame madeblibowo, nuvɔ̃me siwo kuna.—Romatɔwo 5:12.

Tso ɣemaɣi dzi la, amegbetɔwo va hiã na Mawu ƒe Fiaɖuƒe be wòaɖe wo tso nuvɔ̃ kple ku ƒe fiƒode me. Fiaɖuƒea aɖe aʋatso siwo Satana ka ɖe Mawu ƒe ŋkɔ ŋuti la hã ɖa.

Yehowa Mawu do ŋugbe be woadzi “dzidzimevi” tɔxɛ aɖe be wòava ɖe ameƒomea tso nuvɔ̃ me. (Mose I, 3:15, NW) “Dzidzimevi” siae anye Mawu ƒe Fiaɖuƒea ƒe Fia.

Amekae wòanye?

Adam ƒe nuvɔ̃wɔwɔ megbe abe ƒe 2,000 ene la, nuteƒewɔla aɖe nɔ anyi si ŋkɔe nye Abraham. Yehowa gblɔ na Abraham be wòaʋu le eya ŋutɔ dedu me ahanɔ agbadɔwo me le Palestina-nyigba dzi.

Abraham wɔ nusiwo katã Yehowa gblɔ nɛ be wòawɔ la, hekpe ɖe dɔ sesẽ aɖe ŋuti. Yehowa gblɔ nɛ be wòatsɔ via Isak asa vɔe le vɔsamlekpui dzi.

Le nyateƒe me la, Yehowa mehiã na amegbetɔ ƒe vɔsa o. Gake edi be yeanya alesi Abraham lɔ̃ yee. Esusɔ vie Abraham nawu Isak hafi Yehowa tɔ tee.

Le Abraham ƒe xɔse gã ta la, Yehowa do ŋugbe be yeatsɔ Palestina-nyigba la na eƒe dzidzimeviwo eye wògblɔ be Dzidzimevi si ƒe ŋugbe wodo la atso eƒe ƒome me, eye wòato via Isak dzi.—Mose I, 22:17, 18; 26:4, 5.

Isak dzi ŋutsuvi venɔviwo, Esau kple Yakob. Yehowa gblɔ be Dzidzimevi si ƒe ŋugbe wodo la ato Yakob dzi ava.— Mose I, 28:13-15.

Yakob, amesi Yehowa gana ŋkɔe be Israel la dzi ŋutsuvi 12, eye wo katã wova dzi viwo. Eyata Abraham ƒe viwo va te agbɔ sɔsɔ.—Mose I, 46:8-27.

Esi dɔ vɔ̃ɖi aɖe to le nutoa me la, Yakob kple eƒe ƒomea ʋu yi Egipte esi Farao si nye Egipte-fia la kpe wo.—Mose I, 45:16-20.

Woɖee fia le Egipte be Dzidzimevi si ƒe ŋugbe wodo la anye Yakob ƒe vi Yuda ƒe dzidzimevi.—Mose I, 49:10.

Emegbe la Yakob ku, eye eƒe dzidzimeviwo sɔ gbɔ ɖe edzi ale gbegbe be wova zu abe dukɔ ene. Tete Egiptetɔwo te wo vɔvɔ̃ eye wowɔ wo kluviwoe.—Mose II, 1:7-14.

Emegbe la, Yehowa dɔ Mose, ŋutsu nuteƒewɔla vevi aɖe, be wòabia Farao si nɔ anyi ɣemaɣi la be wòaɖe asi Israel-viwo ŋuti woadzo.—Mose II, 6:10, 11.

Farao gbe, eyata Yehowa he fukpekpe ewo va Egiptetɔwo dzi. Le fukpekpe mamlea me la, edɔ ku ƒe mawudɔla be wòwu Egipte ƒe ŋgɔgbeviwo katã.—Mose II, ta 7 vaseɖe 12.

Mawu gblɔ na Israel-viwo be ne wowu alẽvi hena fiẽnuɖuɖu hetsɔ eƒe ʋu sisi ɖe woƒe ʋɔtrutiwo ŋu la, ku ƒe mawudɔla la ato woƒe aƒewo ŋuti ayi. Esia na woxɔ Israel ƒe ŋgɔgbeviwo ɖe agbe.—Mose II, 12:1-35.

Esia na Farao ɖe gbe na Israel-viwo be woadzo le Egipte. Gake eva trɔ eƒe susu heti wo yome be yeagatrɔ wo agbɔe.

Yehowa ɖe mɔ ɖe Ƒudzĩea me na Israel-viwo be woto eme si dzo. Ke esi Farao kple eƒe aʋakɔwo te kpɔ be yewoadze wo yome la, wono tsi ku.—Mose II, 15:5-21.

Yehowa kplɔ Israel-viwo yi to aɖe si ŋkɔe nye Sinai la gbɔe le gbeadzi. Afimae wòtsɔ eƒe Se na wo le hegblɔ be ne wowɔ ɖe edzi la, woava zu nunɔlawo ƒe fiaɖuƒe kple dukɔ kɔkɔe. Ale wòva dzɔ be mɔnukpɔkpɔ su Israel-viwo si be woava nye Mawu ƒe Fiaɖuƒea ƒe akpa vevi aɖe.—Mose II, 19:6; 24:3-8.

Esi Israel-viwo xɔ abe ƒe ɖeka ene le Sinai-toa gbɔ megbe la, Yehowa kplɔ wo ɖo ta Palestina, si nye anyigba si ƒe ŋugbe wòdo na wo tɔgbui Abraham la gbɔe.

Le Palestina la, Mawu va ɖe mɔ be fiawo va ɖu Israel-viwo dzi. Fiaɖuƒe va nɔ Mawu si le anyigba dzi ɣemaɣi.

Israel ƒe fia eveliae nye Dawid, si nye Yuda ƒe dzidzimevi. Dawid ɖu Israel ƒe futɔwo katã dzi eye wòɖo Yerusalem wònye dukɔa ƒe fiadu.

Nusiwo dzɔ le Dawid ƒe dziɖuɣi la fia be ne Yehowa le megbe na fia aɖe la, anyigba dzi fia aɖeke mate ŋu aɖu edzi o.

Yehowa gblɔ be Dzidzimevi si ƒe ŋugbe wodo la anye Dawid ƒe dzidzimeviwo dometɔ ɖeka.—Kronika I, 17:7, 11, 14.

Salomo si nye Dawid ƒe vi la ɖu fia ɖe eyome. Enye fia nyanu, eye nu dze edzi na Israel le eƒe dziɖuɖu te.

Salomo tu gbedoxɔ nyuia ɖe hã na Yehowa le Yerusalem. Nɔnɔme siwo nɔ Israel le Salomo ƒe dziɖuɖu te la fia mí yayra siwo Mawu ƒe Fiaɖuƒea ahe nɛ na ameƒomea la ƒe ɖewo.—Fiawo I, 5:4, 5.

Gake fia siwo va ɖe Salomo yome la dometɔ geɖe mewɔ nuteƒe kura o.

Gake esime Dawid ƒe dzidzimeviwo ganɔ dzi ɖum le Yerusalem la, Yehowa to eƒe nyagblɔɖila Yesaya dzi gblɔ Dawid ƒe Vi aɖe si ava gbaɖegbe, amesi aɖu anyigba bliboa dzi le nuteƒewɔwɔ me la ƒe nya ɖi. Amesiae anye Dzidzimevi si ƒe ŋugbe wodo la.—Yesaya 9:6, 7.

Nyagblɔɖila Yesaya gblɔe ɖi be Eƒe dziɖuɖu la ade ŋgɔ wu Salomo tɔ kura gɔ̃ hã.—Yesaya, ta 11 kple 65.

Azɔ la, Mawu ƒe subɔlawo di vevie be yewoanya amesi Dzidzimevi sia anye.

Gake hafi Dzidzimevi la nava la, Israel-fiawo va vɔ̃ɖi ale gbegbe be le ƒe 607 D.M.Ŋ. me la, Yehowa na Babilontɔwo va ɖu dukɔa dzi eye woɖe aboyo wo dometɔ geɖe yi Babilon. Gake Mawu meŋlɔ eƒe ŋugbedodoa be o. Dzidzimevi la atso Dawid ƒe ƒomea me ava kokoko—Xezekiel 21:30-32.

Nusi dzɔ ɖe Israel dzi la fia be togbɔ be amegbetɔ ƒe fia nunyala kple nuteƒewɔla ate ŋu ahe viɖewo vɛ hã la, viɖe siawo mede naneke o. Nuteƒewɔlawo kuna eye wo teƒexɔlawo mawɔ nuteƒe o. Nukae aɖɔ nɔnɔmea ɖo? Dzidzimevi si ƒe ŋugbe wodo lae.

Mlɔeba la, le mɔ kpɔkpɔ hena ƒe akpewo megbe la, Dzidzimevi la va do. Amekae wònye?

Mawudɔla aɖe ɖo nya sia ŋu na Israel-nyɔnuvia ɖe si meɖe srɔ̃ o si ŋkɔe nye Maria. Egblɔ nɛ be adzi ŋutsuvi si woayɔ be Yesu. Ale mawudɔla la gblɔ:

“Eya la anye gã, eye woayɔe be dziƒoʋĩtɔ la ƒe Vi, eye Yehowa Mawu la atsɔ fofoa Dawid ƒe fiazikpui la anae; eye wòaɖu fia.”—Luka 1:32, 33.

Eyata Yesue anye Dzidzimevi si ƒe ŋugbe wodo la eye eyae ava nye Mawu ƒe Fiaɖuƒea ƒe Fia. Gake nukatae Yesu to vovo tso nuteƒewɔla siwo nɔ agbe do ŋgɔ la gbɔ?

Nukumɔ dzie woto dzi Yesu. Dadaa nye ɖetugbi leaƒe, eye amegbetɔ fofo aɖeke menɔ Yesu si o. Yesu nɔ dziƒo tsã eye Mawu ƒe gbɔgbɔ kɔkɔe alo dɔwɔŋusẽ la ɖe Yesu ƒe agbe tso dziƒo va de Maria ƒe vidzidɔ me. Eyata menyi Adam ƒe nuvɔ̃ la ƒe dome o. Yesu mewɔ nuvɔ̃ o le eƒe agbe me katã.—Petro I, 2:22.

Esi Yesu xɔ ƒe 30 la, wona nyɔnyrɔe.

Egblɔ Mawu ƒe Fiaɖuƒe ŋuti nya na amewo eye wòva ɖe eɖokui fia wo be yee nye Fiaɖuƒe ma ƒe Fia.—Mateo 4:23; 21:4-11.

Ewɔ nukunu geɖe hã.

Eda gbe le dɔnɔwo ŋu.—Mateo 9:35.

Eto nukumɔ dzi nyi dɔwuitɔwo.—Mateo 14:14-22.

Efɔ ame kukuwo gɔ̃ hã ɖe tsitre.—Yohanes 11:38-44.

Nukunu siawo fia nusiwo ƒomevi Yesu si nye Mawu ƒe Fiaɖuƒea ƒe Fia la awɔ na ameƒomea.

Èɖo ŋku alesi Fia Dawid tsɔ Yerusalem wɔ eƒe fiaɖuƒea ƒe fiadue la dzia? Yesu gblɔ be Mawu ƒe Fiaɖuƒea manɔ anyigba dzi o, ke boŋ anɔ dziƒo. (Yohanes 18:36) Ema tae woyɔa Fiaɖuƒea be “dziƒo Yerusalem.”—Hebritɔwo 12:22, 28.

Yesu gblɔ se siwo dzi wòle be amesiwo anye Fiaɖuƒea te nɔlawo nawɔ ɖo la. Se siawo le Biblia la me fifia. Se vevitɔwoe nye be amewo nalɔ̃ Mawu ahalɔ̃ wo nɔewo.—Mateo 22:37-39.

144,000

Yesu gaɖee fia be menye ye ɖekae aɖu dzi le yeƒe Fiaɖuƒea me o. Woatia amegbetɔwo be woayi dziƒo ahaɖu fia kplii le afima. (Luka 12:32; Yohanes 14:3) Ame nenie woanye? Nyaɖeɖefia 14:1 ɖo eŋu be: 144,000.

Ne ame 144,000 pɛ koe ayi dziƒo aɖu fia kple Yesu la, ekema nukae ameƒomea mamlea ate ŋu akpɔ mɔ na?

Biblia la gblɔ be: “Ame dzɔdzɔewo anyi anyigba la dome, eye woanɔ edzi tegbee.”—Psalmo 37:29.

Amesiwo anɔ anyigba dzi tegbee la, woyɔna wo be “alẽ bubuwo.”—Yohanes 10:16.

Eyata mɔkpɔkpɔ evee li. Ame 144,000 siwo Yehowa Mawu yɔ be woayi dziƒo aɖu fia kple Yesu Kristo la li. Gake mɔkpɔkpɔ like le ame miliɔn geɖe bubuwo si be woanɔ agbe tegbee le anyigba dzi abe eƒe Fiaɖuƒea te viwo ene.—Nyaɖeɖefia 5:10.

Satana lé fu Yesu hetsi tre ɖe eŋu. Esi Yesu ɖe gbeƒã ƒe etɔ̃ kple afã megbe la, Satana na wolée heklãe ɖe ati ŋu wòku. Nukata Mawu ɖe mɔ wowɔ esia?

Ðo ŋku edzi be, esi wònye Adam mee mí katã míetso ta la, míewɔa nuvɔ̃ eye míedze na ku.—Romatɔwo 6:23.

Ðo ŋku edzi ake be, nukumɔ si dzi woto dzi Yesu ta la, ede blibo eye medze be wòaku o. Gake Mawu ɖe mɔ be Satana ‘ɖu afɔkpodzi na Yesu’ be wòwui. Gake Mawu gafɔe ɖe tsitre abe gbɔgbɔ makumaku ene. Esi wònye egadze kokoko na amegbetɔ ƒe agbe deblibo ta la, ate ŋu atsɔ esia aɖe mí amegbetɔwo tso nuvɔ̃ me.— Mose I, 3:15; Romatɔwo 5:12, 21; Mateo 20:28.

Be míate ŋu ase nusi Yesu ƒe vɔsa la nye gɔme nyuie la, Biblia zãna nyagblɔɖi kpɔɖeŋuwo tsɔ ƒoa nu le eŋue.

Le kpɔɖeŋu me, èɖo ŋku alesi Yehowa gblɔ na Abraham be wòatsɔ via asa vɔe be yeatsɔ ado eƒe lɔlɔ̃ kpɔ la dzia?

Esia nye Yesu ƒe vɔsa la ƒe nyagblɔɖi kpɔɖeŋu. Efia alesi Yehowa ƒe lɔlɔ̃ na ameƒomea loloe ale gbegbe be eɖe mɔ be Via, Yesu, naku ɖe mía ta be míakpɔ agbe.—Yohanes 3:16.

Èɖo ŋku alesi Yehowa ɖe Israel-viwo tso Egipte, eye wòɖe woƒe ŋgɔgbeviwo esime wòna ku ƒe mawudɔla la to wo ŋuti la dzia?—Mose II, 12:12, 13.

Esia nye nyagblɔɖi kpɔɖeŋu. Alesi alẽvi la ƒe ʋu nye agbe na Israel-viwo ƒe ŋgɔgbeviwoe la, Yesu ƒe ʋu si wokɔ ɖi la anye agbe na amesiwo xɔa edzi sena. Eye alesi zã ma ƒe nudzɔdzɔwo na ablɔɖe Israel-viwoe la, nenema kee Yesu ƒe ku hã ana ɖeɖe ameƒomea tso nuvɔ̃ kple ku mee.

Ema tae woyɔa Yesu be “Mawu ƒe alẽvi, si le xexeame ƒe nuvɔ̃ la tsɔm yina la.”—Yohanes 1:29.

Gake esi Yesu nɔ anyigba dzi la, eƒo nusrɔ̃lawo nu ƒu hã eye wòna hehe wo be woaɖe gbeƒã Fiaɖuƒea ŋuti nyanyui la, le eƒe ku megbe gɔ̃ hã.—Mateo 10:5; Luka 10:1.

Amesiawoe nye ame gbãtɔ siwo Mawu tia be woaɖu dzi kple Kristo le eƒe Fiaɖuƒea me.—Luka 12:32.

Èɖo ŋku edzi be Mawu do ŋugbe na Yudatɔwo be ne woawɔ ɖe Sea dzi la, woanye “nunɔlawo ƒe fiaɖuƒe” mahã? Azɔ mɔnukpɔkpɔ su wo si be ne woaxɔ Yesu dzi ase la, woanye Mawu ƒe Fiaɖuƒea ƒe akpa aɖe ahasubɔ abe nunɔlawo ene le dziƒo. Gake wo dometɔ geɖe gbe Yesu.

Eyata tso ɣemaɣi dzi heyi la, Yudatɔwo meganye Mawu ƒe dukɔ tiatia o; Palestina meganye Ŋugbedodo-nyigba la o.—Mateo 21:43; 23:37, 38.

Tso Yesu ƒe ŋkekea me vaseɖe mía ŋɔli la, Yehowa nɔ amesiawo siwo aɖu dzi kple Yesu le dziƒo la nu ƒom ƒu. Wo dometɔ akpe ʋee aɖewo gale agbe le anyigba dzi egbea. Míeyɔa wo be amesiamina susɔeawo.—Nyaɖeɖefia 12:17.

Fifia èle si dzem nusi Mawu ƒe Fiaɖuƒea nye. Enye dziɖuɖu si le dziƒo, eƒe Fia enye Yesu Kristo, eye ame 144,000 siwo tso anyigba dzi lae akpe ɖe eŋu. Aɖu ameƒome nuteƒewɔla siwo anɔ anyigba dzi la dzi eye ŋusẽ anɔ esi be wòahe ŋutifafa va anyigba dzie.

Esi Yesu ku la, wofɔe ɖe tsitre emegbe eye wòyi dziƒo. Enɔ Mawu lalam le afima be wòagblɔ ɣeyiɣi si game ade nɛ be wòadze dzi ɖuɖu gɔme abe Mawu ƒe Fiaɖuƒea ƒe Fia ene. (Psalmo 110:1) Ɣekaɣie ɣeyiɣi ma ade?

Ɣeaɖewoɣi la, Yehowa na amewo kua drɔ̃e be wòagblɔ eƒe Fiaɖuƒea ŋuti nya na wo.

Le Daniel ƒe ŋkekea me la, Yehowa na Nebukadnezar, Babilon-fia la ku drɔ̃e ma tɔgbe. Eku ɖe ati gã aɖe ŋu.—Daniel 4:7-34.

Wolã ati la eye wobla takpoea ƒe adre sɔŋ.

Atia nɔ tsitre ɖi na Nebukadnezar. Alesi wobla takpoe lae ƒe adre la, nenemae Nebukadnezar dze aɖaʋa ƒe adre. Emegbe la, wogana wòɖo ame me.

Esia katã nye nyagblɔɖi kpɔɖeŋu. Nebukadnezar nɔ tsitre ɖi na Yehowa ƒe xexeame katã ƒe fianyenye. Gbã la, esia wɔ dɔ tso Fia Dawid ƒe dzidzimeviwo dzi le Yerusalem. Esi Babilon ɖu Yerusalem dzi le ƒe 607 D.M.Ŋ. me la, woɖe fiawo ƒe ƒome ma ɖa. Fia bubu aɖeke maganɔ anyi gbeɖe le Dawid ƒe ƒome me o “vaseɖe esime amesi tɔ wònye la nava.” (Xezekiel 21:32)

Ame mae nye Yesu Kristo.

Ɣeyiɣi didi kae ava yi tso 607 D.M.Ŋ. hafi Yesu nadze fia ɖuɖu gɔme? Nyagblɔɖi ƒe ƒe adree, esi nye ƒe 2,520. (Nyaɖeɖefia 12:6, 14) Eye ne míexlẽ ƒe 2,520 tso ƒe 607 D.M.Ŋ. me la, ekplɔ mí va ɖo ƒe 1914 M.Ŋ.

Eyata Yesu dze fia ɖuɖu gɔme le dziƒo le ƒe 1914 me. Nukae ema fia?

Biblia la na míenya to ŋutega si apostolo Yohanes kpɔ la dzi.

Ekpɔ nyɔnu aɖe le dziƒo wòdzi ŋutsuvi.—Nyaɖeɖefia 12:1-12.

Nyɔnua le tsitre ɖi na Mawu ƒe dziƒohabɔbɔa, esi nye Mawu ƒe dɔla siwo katã le dziƒo la. Ŋutsuvi la le tsitre ɖi na Mawu ƒe Fiaɖuƒea. “Wodzii” le ƒe 1914 me.

Nukae dzɔ emegbe? Abe Fia ene la, nu gbãtɔ si Yesu wɔ enye be enyã Satana kple mawudɔla siwo dze aglã kpe ɖe eŋuti la tso dziƒo ɖo ɖe anyigba dzi.—Nyaɖeɖefia 12:9.

Biblia gblɔ nusi do tso eme na mí be: “Dzi nedzɔ mi, mi dziƒowo kple amesiwo nɔ wo me la! Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.”—Nyaɖeɖefia 12:12.

Eyata esi Yesu dze fia ɖuɖu gɔme le dziƒo la, eƒe futɔwo nyrã ŋutɔ le anyigba dzi. Abe alesi Biblia gblɔe ɖi ene la, edze fia ɖuɖu gɔme le eƒe futɔwo titina.—Psalmo 110:1, 2.

Nukae esia ahe vɛ na ameƒomea?

Yesu gblɔ na mí be: aʋawɔwɔwo, dɔwuame, dɔlélewo, kple anyigbaʋuʋuwo ava.—Mateo 24:7, 8; Luka 21:10, 11.

Míekpɔ be nusiawo dzɔ tso ƒe 1914, esi nye nu bubu si na míenya be ɣemaɣie Fiaɖuƒea dze dzi ɖuɖu gɔme.

Nyaɖeɖefia ƒe agbalẽa gblɔ na mí be amewo anɔ ‘anyigba la gblẽm.’ (Nyaɖeɖefia 11:18) Míekpɔ ema hã, vevietɔ tso ƒe 1914 me.

Apostolo Paulo gblɔ kpe ɖe eŋu be amewo lanye “ɖokuilɔ̃lawo, galɔ̃lawo, . . . ame maɖoto dzilawo, . . . amesiwo gbea avuléle, ameŋuzɔlawo, amesiwo mete ŋu ɖua wo ɖokui dzi o.”—Timoteo II, 3:1-5.

Fifia èkpɔ nusita agbenɔnɔ sesẽ egbea. Satana le nyanyram vevie ŋutɔ. Gake Mawu ƒe Fiaɖuƒea hã le dɔ wɔm.

Eteƒe medidi o le ƒe 1914 megbe la, amesiwo si mɔkpɔkpɔ le be woaɖu dzi kple Yesu le dziƒo la ƒe ame susɔeawo dze nyanyuie la gbɔgblɔ gɔme be woɖo Fiaɖuƒe la anyi. Dɔ sia keke ta ɖe anyigba blibo la dzi abe alesi Yesu gblɔ be anɔ ene.—Mateo 24:14.

Tameɖoɖo kae le gbeƒãɖeɖedɔ sia ŋuti?

Gbã la, be woagblɔ Mawu ƒe Fiaɖuƒea ŋuti nya na amewo.

Evelia la, be woakpe ɖe amewo ŋu be woatso nya me be yewodi be yewoanye Fiaɖuƒea te viwo alo yewomedi o.

Yesu gblɔ be le mía ŋɔli la, woama ameƒomea katã me, ale be mlɔeba la amesiwo ƒe nɔnɔme ɖi alẽwo kple amesiwo ƒe nɔnɔme ɖi gbɔ̃wo la ƒe hatsotsowo ava nɔ anyi.—Mateo 25:31-46.

Amesiwo lɔ̃ Yesu kple nɔviawo lae anye “alẽwo.” Amesiwo melɔ̃ wo o lae anye “gbɔ̃wo.”

‘Alẽawoe’ akpɔ agbe mavɔ, eye “gbɔ̃wo” makpɔe o.

Gbeƒã si ɖem wole Fiaɖuƒe ƒe nyanyuiea le kpekpem ɖe amewo ŋu be woaɖee afia ne alẽwo alo gbɔ̃woe wonye.

Nyagblɔɖila Yesaya ƒe nyagblɔɖi aɖee nye si.

“Ava me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, eye wòaƒo togbɛwo ta, eye anyigba dzi dukɔwo katã aƒo zi ɖe eŋu.”—Yesaya 2:2.

Ameƒomea le “ŋkeke mlɔeawo” me fifia.

Yehowa ƒe tadedeagu ƒe “aƒe” la ‘ƒo’ alakpasubɔsubɔwo katã ta.

“Eye dukɔ geɖewo atso agblɔ bena: Mina míayi Yehowa ƒe to la, Yakob ƒe Mawu ƒe aƒe la gbɔ, ne wòafia nu mí le eƒe mɔwo ŋu, eye míazɔ eƒe toƒewo.”—Yesaya 2:3.

Eyata ame geɖe siwo tso dukɔwo katã me la va subɔa Yehowa heyɔa ame bubuwo be woava kpe ɖe yewo ŋu. Wosrɔ̃a alesi woawɔ nue le mɔ si Yehowa di la nu.

“Woatsɔ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.”—Yesaya 2:4.

Amesiwo subɔa Yehowa la le ɖekawɔwɔ me helɔ̃a ŋutifafa.

Nusi do tso Mawu ƒe Fiaɖuƒea ƒe dɔwɔwɔ sia me lae nye be fifia la, ame miliɔn geɖe le xexeame katã, amesiwo nye Fiaɖuƒea te viwo.

Woƒo ƒu ɖe ame susɔe siwo nye amesiwo si mɔkpɔkpɔ le be woayi dziƒo aɖu fia kple Kristo la ƒe ame mamleawo ŋu.

Wokpɔa gbɔgbɔmenuɖuɖu to Mawu ƒe habɔbɔa dzi.—Mateo 24:45-47.

Wonye dukɔwo dome nɔvi Kristotɔ siwo lɔ̃a wo nɔewo vevie.—Yohanes 13:35.

Wokpɔa tomefafa, eye ɣeyiɣi si gbɔna ƒe mɔkpɔkpɔ le wo si.—Filipitɔwo 4:7.

Esusɔ vie woawu nyanyuie gbeƒãɖeɖea nu, eye woaƒo ‘alẽawo’ nu ƒu avɔ. Ekema nukae Fiaɖuƒea awɔ?

Èɖo ŋku alesi Fia Dawid nuteƒewɔla la ɖu Mawu ƒe amewo ƒe futɔwo katã dzie la dzia? Ẽ, nenema kee Fia Yesu awɔ.

Fia Nebukadnezar ku drɔ̃e aɖe kpɔ hekpɔ legba gã aɖe si le tsitre ɖi na xexemefiaɖuƒewo katã tso eƒe ŋkekea me vaseɖe mía ŋɔli.

Emegbe ekpɔ kpe aɖe si woda tso to aɖe dzi, eye wògbã legba la kakɛkakɛ. Kpe la le tsitre ɖi na Mawu ƒe Fiaɖuƒea.

Esia fia fifi nuɖoanyi vɔ̃ɖiawo ƒe tsɔtsrɔ̃.—Daniel 2:44.

Nanewo siwo Fiaɖuƒea aɖe ɖa lae nye si.

Alakpasubɔsubɔ nu ava yi abe té si wotsɔ ƒu gbe ɖe atsiaƒu me ene.—Nyaɖeɖefia 18:21.

Eyatae wole dzi dem ƒo na amesiwo katã lɔ̃ Mawu la be woado le alakpasubɔsubɔ me FIFIA.—Nyaɖeɖefia 18:4.

Emegbe la, Fia Yesu “adza dukɔwo, eye wòatsɔ gatikplɔ akplɔ wo.”—Nyaɖeɖefia 19:15.

Eyatae togbɔ be Yehowa Ðasefowo xea woƒe adzɔwo hewɔna ɖe dukɔa ƒe sewo dzi hã la, womeƒoa wo ɖokui ɖe dunyahehe me o.

Mlɔeba la, woatsɔ Satana ŋutɔ si nye “ʋɔ driba” gã la aƒu gbe ɖe aʋli me.—Nyaɖeɖefia 20:2, 3.

“Alẽwo,” amesiwo bɔbɔa wo ɖokui ɖe Yesu si nye Fia te la koe atsi agbe le xaxa sia me.—Mateo 25:31-34, 41, 46.

Apostolo Yohanes kpɔ ‘alẽ’ siwo atsi agbe le xaxa ma me la ƒe ŋutega.

“Mekpɔ, eye kpɔ ɖa, ameha gã, si ame aɖeke mete ŋu xlẽ o la, tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me, le tsitre ɖe fiazikpui la ŋgɔ kple alẽvi la ƒe ŋku me, wodo awu ʋlaya ɣiwo, eye wolé deʋayawo ɖe asi.”—Nyaɖeɖefia 7:9.

Amesiwo katã wɔ ɖe nyanyuie ƒe gbeƒãɖeɖea dzi lae nye “ameha gã” la.

Woawoe “do go tso xaxa gã la me.”—Nyaɖeɖefia 7:14.

“Deʋayawo” fia be woxɔ Yesu be wòanye yewoƒe Fia.

‘Awu ʋlaya ɣi’ siwo wodo la fia be woxɔ Yesu ƒe vɔsa la dzi se.

“Alẽvi” lae nye Yesu Kristo.

Yayra kawoe woakpɔ ɣemaɣi? Èɖo ŋku dzidzɔ si wokpɔ le Israel esime Fia Salomo nuteƒewɔla la nɔ dzi ɖum la dzia? Esia nye dzidzɔ si woakpɔ le anyigba dzi le Fia Yesu te la ƒe kpɔɖeŋu sue aɖe.

Ŋutifafa ŋutɔŋutɔ anɔ ameƒomea dome kple le amegbetɔwo kple lãwo dome abe alesi Yesaya gblɔe ɖi ene.—Psalmo 46:10; Yesaya 11:6-9.

Alesi Yesu da gbe le dɔnɔwo ŋue esi wònɔ anyigba dzi la, nenemae wòle dɔléle ɖe ge ɖa le ameƒomea katã ŋue.—Yesaya 33:24.

Alesi wònyi amehawoe la, nenemae wòle dɔwuame ɖe ge ɖae le ameƒomea katã dome.—Psalmo 72:16.

Alesi wòfɔ ame kukuwo ɖe tsitree la, nenemae wòafɔ ame kuku siwo si mɔnukpɔkpɔ blibo mesu be woabɔbɔ wo ɖokui ɖe Mawu ƒe Fiaɖuƒea te o la ɖe tsitree.—Yohanes 5:28, 29.

Ʋeʋeʋe la, akplɔ ameƒomea aɖo blibodede si Adam bu la gbɔe.

Ðe ema menye etsɔ ƒe ɣeyiɣi wɔnuku aɖe oa? Àdi be yeakpɔ eteƒea? Ne èdi la, ekema wɔ afɔɖeɖe be nàte ŋu aƒo ɖokuiwò ɖe Mawu ƒe Fiaɖuƒea te fifia be nàva zu ‘alẽawo’ dometɔ ɖeka.

Srɔ̃ Biblia la be nàva nya Yehowa Mawu kple Yesu Kristo.—Yohanes 17:3.

De ha kple ame bubu siwo nye Fiaɖuƒea te viwo la.—Hebritɔwo 10:25.

Srɔ̃ Fiaɖuƒea ƒe sewo eye nàwɔ wo dzi.—Yesaya 2:3, 4.

Tsɔ wò agbe ɖe adzɔgbe be nàsubɔ Yehowa, eye nàxɔ nyɔnyrɔ.—Mateo 28:19, 20.

Dzudzɔ nu gbegblẽwo abe fififi, aʋatsokaka, agbegbegblẽnɔnɔ, kple ahamumu ene siwo medzea Yehowa Mawu ŋu o la.—Korintotɔwo I, 6:9-11.

Kpɔ gome le Fiaɖuƒe ŋuti nyanyuiea ƒe gbeƒãɖeɖe me.—Mateo 24:14.

Ekema le Mawu ƒe kpekpeɖeŋu me la, àkpɔ Paradiso si Adam bu na eƒe dzidzimeviwo si wogbugbɔ ɖo anyi la, eye àkpɔ ŋugbedodo sia ƒe emevava be: “Eye mese gbe gã aɖe tso fiazikpui la gbɔ le gbɔgblɔm bena: Kpɔ ɖa, Mawu ƒe agbadɔ la le amewo gbɔ, eye wòanɔ anyi kpli wo, eye woawo hã woanye eƒe dukɔ, eye Mawu ŋutɔ anɔ anyi kpli wo, eye wòanye woƒe Mawu. Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:3, 4.

[Nyaɖoɖo si le axa 20]

(Edze nyuie le agbalẽa ŋutɔ me)

607 D.M.Ŋ. 1914 M.Ŋ.

D.M.Ŋ. M.Ŋ.

500 1,000 1,500 2,000 2,520

[Nɔnɔmetata siwo le axa 11]

Abraham

Isak

Yakob

Yuda

Dawid

[Nɔnɔmetata si le axa 14]

144,000

[Nɔnɔmetata siwo le axa 16]

Adam

Yesu