Ta Wuiasiekelia

Yehowa Tsi Tiro ƒe Dada Nu

Yesaya 23:1-18

1, 2. (a) Du ka ƒomevie blema Tiro nye? (b) Nya kae Yesaya gblɔ ɖi ɖe Tiro ŋu?

“EƑE nyonyo teƒe mekɔ o” eye “kesinɔnu ɖesiaɖe ƒomevi” bɔ ɖe esi. (Xezekiel 27:4, 12, An American Translation) Eƒe meli gbogboawo tso ƒu yi didiƒewo. Ekpɔ “ho fũ le atsiaƒu titina,” eye wòtsɔ eƒe ‘kesinɔnuwo na anyigba dzi fiawo kpɔ hoe.’ (Xezekiel 27:25, 33) Aleae Tiro—Foinike-du si nɔ Mediterranea-ƒua ƒe ɣedzeƒeƒuta la—nɔ le ƒe alafa adrelia D.M.Ŋ. me.

² Ke hã tsɔtsrɔ̃ nɔ Tiro lalam. Anɔ ƒe 100 hafi Xezekiel naƒo nu tso eŋu la, nyagblɔɖila Yesaya gblɔ Foinike-du sesẽ sia ƒe anyidzedze kple amesiwo ɖoa ŋu ɖe eŋu ƒe nuxaxa ɖi. Yesaya gblɔe ɖi hã be le ɣeyiɣi aɖe megbe la, Mawu agatrɔ eƒe susu ɖe dua ŋu eye wòana nu nagadze edzi nɛ. Aleke nyagblɔɖila la ƒe nyawo va emee? Eye nukae míate ŋu asrɔ̃ tso nusiwo katã dzɔ ɖe Tiro dzi me? Ne míese nusiwo dzɔ ɖe edzi kple nusita wodzɔ me nyuie la, ana míagaxɔ Yehowa kple eƒe ŋugbedodowo dzi ase geɖe wu.

‘Mi Tarsis-ʋuwo, Mifa Avi!’

3, 4. (a) Afikae Tarsis nɔ, eye ƒomedodo kae nɔ Tiro kple Tarsis dome? (b) Nukata wòsɔ be ƒudzidela siwo tsaa asi kple Tarsis la ‘nafa avi’?

³ Yesaya gblɔ le tanya si nye, “Nya ɖe Tiro ŋu” te be: “Mi [Tarsis-ʋuwo, “NW”], mifa avi, elabena etsrɔ̃, aƒe aɖeke megali o, eye tɔtrɔgbɔ megali o!” (Yesaya 23:1a) Woxɔe se be Tarsis nye Spain si gbɔ didi tso Tiro le Mediterranea-ƒua ƒe ɣedzeƒe gome la ƒe akpa aɖe.a Ke hã Foiniketɔwo bi ɖe ƒudzidede me, eye woƒe meliwo lolona hesesẽna. Ŋutinyaŋlɔla aɖewo xɔe se be Foiniketɔwoe nye ame gbãtɔ siwo de dzesi ƒomedodo si le ɣleti kple ƒutsotsoewo dome eye woawoe zã ɣletiviŋutinunya zi gbãtɔ le mɔfiafia meliwo me. Eyata mɔ didi si nɔ Tiro kple Tarsis dome la medo kplamatse wo kura o.

⁴ Le Yesaya ƒe ŋkekea me la, Tarsis si le didiƒe la nye asitsaƒe gã aɖe na Tiro, eye anye be afima koŋue wòkpɔ kesinɔnuwo tsoe le eƒe ŋutinya me ɣeyiɣi aɖe me. Gakuƒe siwo wokua klosalo, gayibɔ, gaɣi, kple ga bubuwo le la nɔ Spain. (Tsɔe sɔ kple Yeremya 10:9; Xezekiel 27:12.) Esɔ be “Tarsis-ʋuwo,” si anye Tiro-tɔdziʋu siwo va tsaa asi kple Tarsis la, ‘nafa avi’ eye woaxa nu le esi wotsrɔ̃ woƒe melidzeƒe vevitɔ la ta.

 5. Afikae ƒudzidela siwo tso Tarsis gbɔna la asee le be Tiro tsrɔ̃?

⁵ Aleke ƒudzidela siwo le ƒu dzi la wɔ se Tiro ƒe tsɔtsrɔ̃? Yesaya ɖo eŋu be: “Wosee le Kititɔwo ƒe anyigba dzi.” (Yesaya 23:1b) Anye be Kipro-ƒukpo si gbɔ didi anɔ kilometa 100 tso egbɔ le Foinike-ƒuta ƒe ɣetoɖoƒe gome lae woyɔ be “Kititɔwo ƒe anyigba.” Afisiae nye teƒe mamlɛtɔ si Tarsis-ʋu siwo ɖo ta ɣedzeƒe la tɔna ɖo hafi woaɖo Tiro. Eyata ne ƒudzidelaawo va ɖo Kipro la, woase be wotsrɔ̃ yewoƒe ʋudzeƒe vevi la. Aleke gbegbe nya sia aɖi ɖe woe nye si! Woalé blanui, eye ‘woafa avi’ le esi wotɔtɔ ta.

 6. Ƒo nu tso ƒomedodo si nɔ Tiro kple Zidon dome ŋu.

⁶ Amesiwo le Foinike-ƒuta hã atɔtɔ. Nyagblɔɖila la gblɔ be: “Mi ƒutatɔwo, Zidon-sitsalawo, amesiwo toa atsiaƒu dzi, eye woyɔa dua me taŋ la, miaƒe nu netsi te! Wotsɔ Sixor ƒe nukuwo kple Nil ƒe agblemenuwo va me, eye wòzu dukɔwo ƒe asiɖiƒe.” (Yesaya 23:2, 3) Tiro ƒe anyidzedze awɔ nuku na “ƒutatɔwo”—siwo nye dukɔ siwo do liƒo kple Tiro—ale gbegbe be woƒe nu atsi te. Amekawoe nye ‘Zidon-sitsala’ siwo ‘yɔ’ du sia me ‘taŋ’ hena wozu kesinɔtɔwo? Zidon si nye ƒutadu si gbɔ didi kilometa 35 ko le dzigbe gome la ƒe dutanyigbae Tiro nye tsã. Woŋlɔ ɖe Zidontɔwo ƒe gakuwo dzi be enye Tiro dada. Togbɔ be Tiro va kpɔ kesinɔnu wu Zidon hã la, ekpɔtɔ nye “Zidon-ɖetugbi,” eye emenɔlawo gayɔa wo ɖokui be Zidontɔwo kokoko. (Yesaya 23:12) Eyata anye be nyagbɔgblɔ “Zidon-sitsalawo” fia asitsala siwo le Tiro.

 7. Aleke Zidon-sitsalawo na dukɔwo kpɔ kesinɔnui?

⁷ Asitsatsa na be Zidontɔwo tsana le Mediterranea Ƒua dzi. Wotsɔa Sixor si nye Nil Tɔsisia ƒe alɔdze si le ɣedzeƒe ʋĩ gome le Egipte ƒe ɖeɖegonutoa me la ƒe nukuwo yia teƒe geɖee. (Tsɔe sɔ kple Yeremya 2:18.) “Nil ƒe agblemenuwo” hã le nuku bubu siwo wɔna le Egipte la dome. Asitsala ƒudzimɔzɔla siawo kple dukɔ bubuwo kpɔ viɖe geɖe le nusiawo ƒe asitsatsa kple wo tsɔtsɔ ɖɔ li nu bubuwoe me ŋutɔ. Zidon-sitsalawo tsɔa ga gbogbo si wokpɔna la vaa Tiroe. Woaxa nu ɖe eƒe aƒedozuzu ta vavã!

 8. Dɔ kae Tiro ƒe tsɔtsrɔ̃ awɔ ɖe Zidon dzi?

⁸ Azɔ Yesaya gblɔ nya sia na Zidon be: “Zidon, ŋu nekpe wò, elabena atsiaƒu, atsiaƒu ƒe mɔ̃ sesẽ gblɔ be: Fu meɖum o, nyemedzi vi o, eye nyemenyi ɖekakpuiwo kple ɖetugbiwo wotsi o.” (Yesaya 23:4) Ne wotsrɔ̃ Tiro la, ƒuta ƒe akpa si wònɔ tsã la azu dudo kple aƒedo. Adze abe ɖe atsiaƒu tsi dzodzodzoe hele ɣli dom ene, abe vidada si ƒe viwo ku eye eƒe susu tɔtɔ ale gbegbe be wòle gbɔgblɔm fifia be yemedzi vi kpɔ o la ene. Ŋu akpe Zidon ɖe nusi adzɔ ɖe vianyɔnua dzi ta.

 9. Amewo ƒe nuxaxa ɖe Tiro ƒe tsɔtsrɔ̃ ta asɔ kple tɔtɔ si nudzɔdzɔ kawo he vɛ?

⁹ Ẽ, Tiro ƒe tsɔtsrɔ̃ ŋuti nyatakaka ana ame geɖe naxa nu. Yesaya gblɔ be: “Woadzo nyanyanya le Tiro ƒe nya la ta, abe alesi tututu wònɔ le Egipte ƒe nya la gome ene.” (Yesaya 23:5, “NW”) Konyifalawo ƒe vevesese anɔ abe alesi amewo wɔ nui ɖe nya si ku ɖe Egipte ŋu la ŋuti ene. Nya kae nyagblɔɖila la wɔnɛ? Ate ŋu anye “nya” si wògblɔ “ɖe Egipte ŋu” va yi la me vava ye.b (Yesaya 19:1-25) Alo ɖewohĩ nya si ku ɖe Farao ƒe aʋakɔ la tsɔtsrɔ̃ le Mose ƒe ŋkekea me ŋu si na dukɔ geɖe tɔtɔ lae nyagblɔɖila la wɔnɛ. (Mose II, 15:4, 5, 14-16; Yosua 2:9-11) Nya ka ke wòɖanye o, amesiwo ase Tiro ƒe tsɔtsrɔ̃ ŋuti nya la ase veve vevie. Wogblɔ na wo be woasi ava di sitsoƒe le keke Tarsis ke eye wode se na wo be woaxa nu vevie amewo nase: “Miyi Tarsis, mifa avi, mi ƒutatɔwo!”—Yesaya 23:6.

Enye Dzidzɔdu “Tso Blema Ke”

10-12. Ƒo nu tso Tiro ƒe kesinɔnuwo, blemaŋutinya, kple eƒe ŋusẽkpɔɖeamedzi ŋu.

¹⁰ Blema due Tiro nye, abe alesi Yesaya ɖo ŋku edzi na mí le eƒe nyabiabia sia me ene be: “Miaƒe dzidzɔdu, si dzɔ tso blema ke la, nye esia?” (Yesaya 23:7a) Tiro ƒe kesinɔnuwo kpɔkpɔ ƒe ŋutinya yi megbemegbe ʋĩ ɖo keke Yosua ƒe ɣeyiɣia me ke. (Yosua 19:29) Le ƒeawo me la, Tiro va xɔ ŋkɔ le ganuwo, ahuhɔ̃enuwo, kple ama dede aɖabɛ me. Tirotɔwo ƒe awu ʋlayawo kple aɖabɛ xɔa asi wu, eye ame ŋkutawoe tia awu xɔasi siwo wowɔna le Tiro la yome. (Tsɔe sɔ kple Xezekiel 27:7, 24.) Tiro nye asiɖiƒe hã na asitsalawo ƒe mɔzɔhawo eye afimae wodɔa nu geɖe tso duta alo ɖonɛ ɖa tonɛ.

¹¹ Tsɔ kpe ɖe eŋu la, dua sesẽ le asrafonya me. L. Sprague de Camp ŋlɔ bena: “Togbɔ be Foiniketɔwo melɔ̃a aʋawɔwɔ o—elabena wonye asitsalawo ke menye asrafowo o—hã la, wotsɔa kalẽwɔwɔ ʋlia woƒe duwo ta akpasesẽtɔe. Tirotɔwo ƒe nɔnɔme siawo kpakple woƒe ƒudziʋawɔŋusẽ na wote ŋu nɔ te ɖe Asiria-ʋakɔ si sesẽ wu le woƒe ɣeyiɣia me la nu.”

¹² Nyateƒee, Tiro zu du ɖedzesi le Mediterranea-nutoa me. “Woƒe afɔwo kɔe yi didiƒe, ne wòaɖanye amedzro le afima.” (Yesaya 23:7b) Foiniketɔwo zɔa mɔ yia didiƒewo va ɖoa asitsaƒewo kple ʋudzeƒewo, eye esiawo dometɔ aɖewo keke ɖe enu va zu woƒe dutanyigbawo. Le kpɔɖeŋu me, Carthage si le Afrika ƒe dzieheƒuta la nye Tiro ƒe dutanyigba. Le ɣeyiɣi aɖe megbe la, eva kpɔ ŋusẽ wu Tiro hesɔ ta kple Roma le ŋusẽkpɔkpɔ ɖe Mediterranea-nutoa dzi me.

Woatsi Eƒe Dada Nu

13. Nukata wobia nya sia be amekae ate kpɔ agblɔ fɔbuamenyawo ɖe Tiro ŋu ɖo?

¹³ Le Tiro ƒe blemaŋutinya kple kesinɔnuwo ta la, esɔ be wobia nya si kplɔe ɖo la be: “Amekae ɖo esia ɖe Tiro, si ɖɔa fiakuku na ame la ŋu? Eƒe asitsalawo nye amegãwo, eye eƒe nudzralawo nye ame ŋkutawo le anyigba dzi.” (Yesaya 23:8) Amekae ado dzi aƒo nu tsi tre ɖe dugã si tsɔ ame sesẽwo ɖo nɔƒe kɔkɔwo le eƒe dutanyigbawo dzi kple teƒe bubuwo—si na wòva zu “[du] si ɖɔa fiakuku na ame”—la ŋu? Amekae ate kpɔ aƒo nu tsi tre ɖe dugã si ƒe asitsalawo nye amegãwo eye eƒe nudzralawo nye ame ŋkutawo la ŋu? Maurice Chehab si nye blemanuwo dzikpɔlagã le Lebanon Dukɔa ƒe Blemanudzraɖoƒe le Beirut la gblɔ be: “Tso ƒe alafa asiekelia vaseɖe adelia D.M.Ŋ. me la, Tiro va nɔ ɖoƒe vevi si tɔgbe nɔ London hã si le ƒe alafa blaevelia ƒe gɔmedzedze.” Eyata amekae ado dzi aƒo nu atsi tre ɖe dugã sia ŋu?

14. Amekae gblɔ fɔbuamenyawo ɖe Tiro ŋu, eye nukatae?

¹⁴ Nya sia ƒe ŋuɖoɖo si tso gbɔgbɔ me la atɔtɔ amewo le Tiro. Yesaya gblɔ be: “Yehowa Zebaot ɖoe ɖe ta me be, yeaɖi gbɔ atsyɔ̃ɖoɖowo katã ƒe dàda, eye yeaklo bubu le ame ŋkutawo ŋu le anyigba dzi.” (Yesaya 23:9) Nukata Yehowa gblɔ fɔbuamenyawo ɖe blemadu sia si kpɔ kesinɔnuwo la ŋu? Esi emetɔwo subɔa alakpamawu Baal taea? Le ƒomedodo si le Tiro kple Izebel—si nye Zidon si me Tiro hã le ƒe Fia Etbaal vinyɔnu—si ɖe Israel Fia Axab eye wòwu Yehowa ƒe nyagblɔɖilawo la dome taea? (Fiawo I, 16:29, 31; 18:4, 13, 19) Biabia eveawo siaa ƒe ŋuɖoɖoe nye ao. Tiro ƒe dada kple ɖokuidodoɖedzi tae wobu fɔe ɖo—egblẽ nu le ame bubuwo, kple Israel-viwo hã ŋu tsɔ kpɔ kesinɔnui. Le ƒe alafa asiekelia D.M.Ŋ. me la, Yehowa to nyagblɔɖila Yoel dzi gblɔ le Tiro kple du bubuwo ŋu be: “Mietsɔ Yuda-viwo kple Yerusalem-viwo dzra na Helatɔwo, ne miaɖe wo tso woƒe anyigba dzi ayi adzɔge ʋĩ.” (Yoel 4:6) Ðe Mawu ate ŋu aŋe aɖaba aƒu alesi Tiro wɔ nu ɖe eƒe dukɔ si wòbla nu kpli ŋu abe adzɔnu wonye ene la dzia?

15. Aleke Tiro awɔ nui ne Nebukadnezar tsrɔ̃ Yerusalem?

¹⁵ Tiro matrɔ le ƒe alafa ɖeka megbe o. Ne Babilon Fia Nebukadnezar ƒe aʋakɔ tsrɔ̃ Yerusalem le ƒe 607 D.M.Ŋ. me la, Tiro atso aseye: ‘Ehẽ, Yerusalem si nye dukɔwo ƒe agbo la gbã, eyi ɖe dzinye, eye nu abɔ ɖe asinye, le esi wòzu gbegbe ŋuti la.’ (Xezekiel 26:2) Tiro akpɔ dzidzɔ ahanɔ mɔ kpɔm be Yerusalem tsɔtsrɔ̃ aɖe vi na ye. Akpɔ mɔ be yeakpɔ asisi geɖe le esi Yudatɔwo ƒe fiadua magaʋli ho kple ye o ta. Yehowa ado vlo amesiwo wɔ wo ɖokui “ame ŋkutawo” hewɔa ɖeka kple eƒe amewo ƒe futɔwo dadatɔe.

16, 17. Nukae adzɔ ɖe Tirotɔwo dzi ne wotsrɔ̃ dua? (Kpɔ etenuŋɔŋlɔa.)

¹⁶ Yesaya yi edzi gblɔ Yehowa ƒe fɔbuamenyawo ɖe Tiro ŋu be: “Gbagba ɖe wò anyigba dzi abe Nil ene, wò Tarsis-nyɔnuvi, alidziblanu aɖeke megali o! Edo eƒe alɔ ɖe atsiaƒu ŋu, eʋuʋu fiaɖuƒewo, Yehowa de se ɖe Kanaan ŋu, ne wòatsrɔ̃ eƒe mɔ̃ sesẽwo, eye wògblɔ bena: Màgatso aseye o, wò Zidon-ɖetugbi, si wogblẽ; tso, nayi Kititɔwo gbɔ, màkpɔ gbɔdzɔe le gama hã o.”—Yesaya 23:10-12.

¹⁷ Nukata woyɔ Tiro be “Tarsis-nyɔnuvi”? Ðewohĩ le esi Tarsis ava zu du sẽŋu aɖe le Tiro dzi ɖuɖu megbe tae.c Tiro si wotsrɔ̃ la nɔlawo aka hlẽ abe tɔsisi si ƒe tɔgowo gbã eye eƒe tsiwo gbagba yi nutoa me baliwo me la ene. Nya si Yesaya gblɔ na “Tarsis-nyɔnuvi” la te gbe ɖe alesi nusi adzɔ ɖe Tiro dzi la asesẽe dzi. Yehowa ŋutɔ do eƒe asi ɖa heɖe gbe. Ame aɖeke mate ŋu atrɔ nusi ava dzɔ la o.

18. Nukata woyɔ Tiro be “Zidon-ɖetugbi,” eye aleke eƒe nɔnɔme le tɔtrɔ gee?

¹⁸ Yesaya gblɔ hã be Tiro nye “Zidon-ɖetugbi,” si fia be dutadukɔ aɖeke meva dze edzi heha emenuwo kpɔ o eye ekpɔtɔ nye du si dzi womeɖu kpɔ o. (Tsɔe sɔ kple Fiawo II, 19:21; Yesaya 47:1; Yeremya 46:11.) Gake fifia woava tsrɔ̃e eye emenɔla aɖewo anɔ abe sitsoƒedilawo ene atso ƒu ayi Kiti si nye Foiniketɔwo ƒe du me. Ke hã esi womegakpɔ ŋusẽ le ganya gome o ta la, womakpɔ gbɔdzɔe le afima o.

Kaldeatɔwo Agblẽe

19, 20. Amekae wogblɔ ɖi be ava ɖu Tiro dzi, eye aleke nyagblɔɖi ma va emee?

¹⁹ Dunyahedziɖuɖu kae ahe Yehowa ƒe ʋɔnudɔdrɔ̃ ava Tiro dzi? Yesaya gblɔ be: “Kpɔ ɖa, Asur tsɔ Kaldeatɔ, siwo meganye dukɔ o la ƒe anyigba na gbedzilãwo; wotu xɔ tsralawo, eye wogbã woƒe fiasãwo wozu glikpo. Mi Tarsis-ʋukulawo, mifa avi, elabena wogblẽ miaƒe mɔ̃ sesẽ la.” (Yesaya 23:13, 14) Kaldeatɔwoe aɖu Tiro dzi—ke menye Asiriatɔwoe o. Woatu xɔ kɔkɔ siwo dzi woanɔ aɖe to ɖe wo, agbã xɔwo le Tiro, eye woawɔ Tarsis-ʋuwo dzeƒe vevi la wòazu afisi xɔgbagbãwo li kɔ ɖo.

²⁰ Eva eme ɖe nyagblɔɖia nu tututu be le Yerusalem ƒe tsɔtsrɔ̃ megbe kpuie la, Tiro dze aglã ɖe Babilon ŋu eye Nebukadnezar ɖe to ɖe dua. Esi Tirotɔwo xɔe se be womate ŋu aɖu yewo dzi o ta la, woawo hã tso ɖe wo ŋu. Le toɖeɖea me la, Babilon-srafowo ƒe tawo “bebe” le esi woƒe gakukuwo nɔ eŋu kukom ta eye woƒe abɔtawo “ɖe bo” le dɔwɔnu siwo wozã le toɖeɖea me tsɔtsɔ ta. (Xezekiel 29:18) Toɖeɖea gblẽ ga geɖe na Nebukadnezar. Etsrɔ̃ Tiro ƒe akpa si le anyigba ƒuƒui dzi ya, ke hã mete ŋu ha emenuwo o. Wolɔ Tiro ƒe kesinɔnuwo ƒe akpa gãtɔ yi ƒukpo sue aɖe si gbɔ medidi ɖo kilometa ɖeka o la dzi. Esi tɔdziʋuwo mele Kaldea-fia la si o ta la, mete ŋu xɔ ƒukpo la o. Le ƒe 13 megbe la, Tiro na ta, gake akpɔtɔ anɔ anyi akpɔ nyagblɔɖi bubuwo me vava teƒe.

‘Agatrɔ Ðe Eƒe Gboloho Ŋu’

21. Mɔ ka nue ‘ŋku adzo le Tiro dzi’ le, eye vaseɖe ɣekaɣi?

²¹ Yesaya yi edzi gblɔ ɖi be: “Ava me le ɣemaɣi be, ŋku adzo le Tiro dzi ƒe blaadre sɔŋ abe fia ƒe ƒe ene.” (Yesaya 23:15a) Ne Babilontɔwo tsrɔ̃ dua ƒe akpa si le anyigba ƒuƒui dzi la vɔ la, “ŋku adzo le” Tiro-dugã si nye ƒukpo la “dzi.” Nyagblɔɖia va eme tututu ale be le “fia ɖeka”—Babilon Fiaɖuƒea—ƒe anyinɔɣi la, ŋusẽ maganɔ Tiro ŋu le ganya gome o. Yehowa to Yeremya dzi gblɔ be Tiro hã anɔ du siwo wòɖo koŋ be woano Yeƒe dɔmedzoe ƒe wein la dome. Egblɔ be: “Dukɔ sia asubɔ Babel-fia ƒe blaadre sɔŋ.” (Yeremya 25:8-17, 22, 27) Enye nyateƒe be Tiro-dugã si nye ƒukpo la menɔ Babilon te wòde ƒe 70 o, elabena Babilon Fiaɖuƒea mu le ƒe 539 D.M.Ŋ. me. Anɔ eme be ƒe 70 la tsi tre ɖi na Babilon ƒe ŋusẽkpɔɣi gãtɔ—esime Babilon-fiaƒomea ƒo adegbe be yewoli yewoƒe fiazikpui ɖe “Mawu ƒe ɣletiviwo” tame. (Yesaya 14:13) Dukɔ vovovo va nɔ fiaɖuƒe ma te le ɣeyiɣi vovovo me. Gake le ƒe 70 ƒe nuwuwu la, fiaɖuƒe ma agbã. Nukae adzɔ ɖe Tiro dzi ɣemaɣi?

22, 23. Nukae adzɔ ɖe Tiro dzi ne edo le Babilon ƒe ŋusẽ te?

²² Yesaya yi edzi be: “Le ƒe blaadre megbe la ava me na Tiro, abe alesi wodzia gbolohae ene be: Wò gbolo, si woŋlɔ be, tsɔ kasaŋku natsa le dua me godoo; ƒo saŋku nyuie, dzi ha geɖe, ne woagaɖo ŋku dziwò! Le ƒe blaadre megbe la Yehowa agaɖo ŋku Tiro dzi, eye wòagatrɔ ɖe eƒe gboloho ŋu, eye wòawɔ gbolo kple anyigba dzi fiaɖuƒe, siwo katã le xexea me.”—Yesaya 23:15b-17.

²³ Esi Babilon mu le ƒe 539 D.M.Ŋ. me la, Foinike va zu Medo-Persia Fiaɖuƒea ƒe nuto si nu wotsɔ nutomedzikpɔla ɖoe. Persia-fiagã, Kores Gãtɔ, nye dziɖula si ƒe nya me mesẽ o. Tiro agadze dɔ siwo wòwɔna tsã la gɔme le dziɖuɖu yeye sia te eye wòadze agbagba vevie be yeazu asitsaƒe gã aɖe le xexeame—abe alesi gbolo si woŋlɔ be eye ahiãviwo megale esi o anɔ tsatsam le dua me anɔ eƒe kasaŋku ƒom eye wòanɔ ha dzim be yeagakpɔ ahiãvi yeyewo la ene. Ðe nu adze dzi na Tiroa? Ẽ, Yehowa ana nu nadze edzi nɛ. Le ɣeyiɣi aɖe megbe la, dugã si nye ƒukpo la akpɔ dzidzedze ale gbegbe be le ƒe alafa adelia D.M.Ŋ. ƒe nuwuwu lɔƒo la, nyagblɔɖila Zaxarya agblɔ be: “Tiro tu mɔ̃ sesẽ na eɖokui, eli kɔ klosalo gleglegle abe ke ene kple sika abe gbeɖuɖɔ le kpɔdomee ene.”—Zaxarya 9:3.

‘Eƒe Viɖe Ŋu Akɔ’

24, 25. Aleke Tiro ƒe viɖekpɔkpɔ ŋu va kɔ na Yehowae? (b) Togbɔ be Tiro kpe ɖe Mawu ƒe amewo ŋu hã la, nya kae Yehowa na wogblɔ ɖi ɖe eŋu?

²⁴ Aleke gbegbe nyagblɔɖinya siwo kplɔe ɖo ɖe dzesi enye si! “Eƒe viɖe kple gboloho ŋu akɔ na Yehowa; womali kɔe o, eye womatui ɖo gleglegle o, ke boŋ eƒe adzɔdodo anye amesiwo le Yehowa ŋku me la tɔ, ne woaɖu nu aɖi ƒo, eye woata avɔ nyuiwo.” (Yesaya 23:18) Aleke ŋutilãmeviɖe si Tiro akpɔ la ŋu akɔe? Yehowa ade asi nyaa me ale be woazãe wòasɔ ɖe eƒe didi nu—na eƒe amewo be woakpɔ nu aɖu aɖi ƒo eye woakpɔ avɔ hã ata. Esia va eme esime Israel-viwo trɔ gbɔ tso aboyo me le Babilon. Tirotɔwo kpe ɖe wo ŋu esi woɖo sedertiwo ɖe wo be woatsɔ agbugbɔ atu gbedoxɔae. Wogadze asitsatsa kple Yerusalem-dua hã gɔme.—Ezra 3:7; Nexemya 13:16.

²⁵ Togbɔ be edzɔ alea hã la, Yehowa na wogagblɔ nya bubu ɖi ɖe Tiro ŋu. Zaxarya gblɔ nya ɖi ɖe ƒukpo dzi dugã si kpɔ kesinɔnuwo fifia la ŋu be: “Kpɔ ɖa, Aƒetɔ la ana woaxɔe, eye atsiaƒu agblẽ eƒe ŋusẽ dome, ke dzo afiã eya ŋutɔ.” (Zaxarya 9:4) Esia va eme le July 332 D.M.Ŋ. me esime Alexander Gãtɔ gbã aƒenɔ dadala si le atsiaƒu dzi la.

Tsri Ŋutilãmenudidi Kple Dada

26. Nukata Mawu bu fɔ Tiro?

²⁶ Yehowa bu fɔ Tiro ɖe eƒe dada si nye nɔnɔme si medzea eŋu kura o la ta. ‘Dadaŋkuwoe’ nye nu gbãtɔ si woyɔ le nu adre siwo Yehowa lé fui la dome. (Lododowo 6:16-19) Paulo ƒo nu tso dada ŋu be enye Satana Abosam ƒe nɔnɔme, eye nya aɖewo le alesi Xezekiel ƒo nu tso Tiro ƒe dada ŋui me siwo nye nɔnɔme siwo dze le Satana ŋutɔ ŋu. (Xezekiel 28:13-15; Timoteo I, 3:6) Nukata Tiro nɔ dadam? Esi Xezekiel nɔ nu ƒom tso Tiro ŋu la, egblɔ be: “Wò dzi de asi dada me le wò kesinɔnuawo ta.” (Xezekiel 28:5) Dua ƒe nu vevitɔe nye asitsatsa kple gadidi vivivo. Tiro ƒe dzidzedzekpɔkpɔ le esia me na wòva nɔ dadam wu gbɔgblɔ. Yehowa to Xezekiel dzi gblɔ na “Tiro-amegã” be: “Wò dzi le dadam, eye nèle gbɔgblɔm be, Mawu yenye, eye Mawu ƒe nɔƒe yele.”—Xezekiel 28:2.

27, 28. Mɔ̃ kae ate ŋu aɖe amewo, eye aleke Yesu wɔ esia ƒe kpɔɖeŋui?

²⁷ Ate ŋu adzɔ be dada nakpɔ ŋusẽ ɖe dukɔwo dzi eye kesinɔnuwo ŋuti nukpɔsusu gbegblẽ nanɔ wo si—eye nenema ke wòate ŋu adzɔ le ame ɖekaɖekawo hã gomee. Yesu do lo aɖe si ɖe alesi mɔ̃ sia ate ŋu aflu amee fia. Eƒo nu tso kesinɔtɔ aɖe si ƒe agble wɔ nu geɖe ŋu. Dzi dzɔ ŋutsua ale gbegbe be ewɔ ɖoɖo be yeatu ava siwo lolo wu na yeƒe agblemenukuawo eye wòtsɔ dzidzɔ nɔ mɔ kpɔm be yeanɔ agbe didi dzidzemetɔe. Gake meva me nɛ nenema o. Mawu gblɔ nɛ be: “Ame tsibome, zã sia me ke woabia wò agbe le asiwò me; ke nusiwo nèdzra ɖo la, ameka tɔ woazu mahã?” Ẽ, ŋutsua ku, eye eƒe kesinɔnuwo meɖe vi aɖeke nɛ o.—Luka 12:16-20.

²⁸ Yesu wu lododoa nu be: “Ale amesi le nu nyuiwo dzram ɖo na eɖokui, eye kesinɔnuwo mele esi le Mawu gome o la, le enye si.” (Luka 12:21) Menye nu gbegblẽ wònye be woanye kesinɔtɔ o, eye agblemenu geɖe xaxa hã menye nuvɔ̃ o. Vodada si ŋutsua wɔ enye be ena nusiawo zu nu vevitɔwo le eƒe agbe me. Eƒe kesinɔnuwo koe nye nusi ŋu wòɖoa ŋu ɖo. Esime wònɔ etsɔme ŋu bum la, mebu Yehowa Mawu ŋu o.

29, 30. Aleke Yakobo xlɔ̃ nu le ŋuɖoɖo ɖe ame ɖokui ŋu ŋutii?

²⁹ Yakobo te gbe ɖe nya sia ke dzi nyuie. Egblɔ be: “Azɔ la miheyi, mi amesiwo gblɔna bena: Egbe alo etsɔ míayi du si kple du si me, eye míanɔ afima ƒe ɖeka, eye míatsa asi, eye míakpɔ viɖe! Gake mienya nusi ava dzɔ etsɔ o; elabena nukae nye miaƒe agbe mahã? Elabena dzudzɔ, si dzena ɣeyiɣi kpui aɖe, eye emegbe la megadzena o la, ke mienye. Le esia teƒe la ele na mi be, miagblɔ bena: Ne [Yehowa, NW] lɔ̃ la, míanɔ agbe, eye míawɔ esi kple esi.” (Yakobo 4:13-15) Azɔ Yakobo ɖe ƒomedodo si le kesinɔnuwo kple dada dome fia esi wòyi edzi gblɔ be: “Miekana ɖe nu ŋu le miaƒe adegbe ƒuƒlu ƒoƒo me. Kakaɖenuŋu sia katã la vɔ̃ wònye.”—Yakobo 4:16.

³⁰ Egadze le afisia hã be menye nuvɔ̃e asitsatsa nye o. Ke dada, ɖokuidodoɖedzi, kple kakaɖeameɖokuidzi si kesinɔnukpɔkpɔ te ŋu ƒana ɖe ame me boŋue nye nuvɔ̃. Blema lododo aɖe gblɔ nunyatɔe be: “Megana ahedada kple hotsuim o.” Ahedada ate ŋu ana agbenɔnɔ nasesẽ ŋutɔ. Gake kesinɔnuwo ate ŋu ana ame ‘nagbe Mawu ahagblɔ bena: “Amekae nye Yehowa hã.”’—Lododowo 30:8, 9.

31. Nya kawoe wòanyo be Kristotɔ nabia eɖokui?

³¹ Míele xexe si me ame geɖe zu ŋuklẽlawo kple ɖokuitɔdilawo le me. Asitsatsa ƒe nɔnɔme si bɔ la na wotea gbe ɖe kesinɔnuwo dzi vevie. Eyata ele be Kristotɔ nadzro eɖokui me akpɔe ɖa be yemele gegem ɖe mɔ̃ si ɖe Tiro si nye asitsadu la ke me o hã. Ðe wòzãa eƒe ɣeyiɣi kple ŋusẽ geɖe ɖe ŋutilãmenuwo yome titi ŋu ale be wòva zu kluvi na kesinɔnuwoa? (Mateo 6:24) Ðe wòʋãa ŋu ame aɖewo siwo si kesinɔnu geɖe alo esiwo nyo wu le laa? (Galatiatɔwo 5:26) Ne kesinɔtɔe wònye la, ɖe wòdina dadatɔe be woahe susu ava ye dzi alo be yedze na mɔnukpɔkpɔwo xɔxɔ wu ame bubuwoa? (Tsɔe sɔ kple Yakobo 2:1-9.) Ne menye kesinɔtɔe wònye o la, ɖe ‘wòdina be yeazu kesinɔtɔ,’ eɖanye nuka ke wòagblẽ le eŋu oa? (Timoteo I, 6:9) Ðe wòtsɔ eɖokui de dɔwɔnyawo me ale gbegbe be eƒe agbe ƒe akpa sue ŋutɔ aɖe koe susɔ na Mawu subɔsubɔa? (Timoteo II, 2:4) Ðe wònyrɔ eɖokui ɖe ŋutilãmenuwo yome titi me vĩ ale gbegbe be wòŋea aɖaba ƒua Kristotɔwo ƒe gɔmeɖosewo dzi le eƒe dɔwɔwɔ mea?—Timoteo I, 6:10.

32. Nuxlɔ̃ame kae Yohanes na, eye aleke míate ŋu awɔ eŋudɔe?

³² Aleke ke míaƒe ganyawo le o, ele be míatsɔ Fiaɖuƒea aɖo nɔƒe gbãtɔ le míaƒe agbe me ɣesiaɣi. Ele vevie be míaƒe susu nagadzo le apostolo Yohanes ƒe nya siawo dzi o be: “Migalɔ̃ xexeame kple nusiwo le eme o. Ne ame aɖe lɔ̃ xexeame la, Fofoa ƒe lɔlɔ̃ mele eme o.” (Yohanes I, 2:15) Nyateƒee, ele be míawɔ xexeame ƒe gaŋutiɖoɖowo ŋudɔ anɔ agbe ɖe eŋu. (Tesalonikatɔwo II, 3:10) Eyata ‘míewɔa xexeame ŋuti dɔ’—gake míewɔa eŋuti dɔ “bliboe” o. (Korintotɔwo I, 7:31, NW) Ne míelɔ̃a ŋutilãmenuwo—si nye nusiwo le xexeame—akpa la, ke míegalɔ̃a Yehowa o. “Ŋutilã ƒe nudzodzro kple ŋkuwo ƒe ŋubiabiã kple agbe ƒe adegbe ƒuƒlu ƒoƒo” yome nɔnɔ mesɔ ɖe Mawu ƒe lɔlɔ̃nu nu o.d Eye Mawu ƒe lɔlɔ̃nu wɔwɔe kplɔa ame yia agbe mavɔ me.—Yohanes I, 2:16, 17.

33. Aleke Kristotɔwo awɔ aƒo asa na mɔ̃ si ɖe Tiro la?

³³ Dzitsitsi ɖe ŋutilãmenuwo yome titi ŋu wu nu bubu ɖesiaɖe ƒe mɔ̃ ye ɖe Tiro. Ekpɔ dzidzedze le ŋutilã me gome, eva do eɖokui ɖe dzi ale gbegbe, eye wohe to nɛ ɖe eƒe dada ta. Eƒe kpɔɖeŋua nye nuxlɔ̃ame na dukɔwo kple ame ɖekaɖekawo egbea. Aleke gbegbe wòanyo wu be míawɔ ɖe apostolo Paulo ƒe aɖaŋuɖoɖo sia dzi enye si! Ede dzi ƒo na Kristotɔwo be “woagado wo ɖokui ɖe dzi glodzo o, eye womagatsɔ woƒe mɔkpɔkpɔ aɖo kesinɔnuwo ƒe dediemanɔmanɔ dzi o; ke boŋ ɖe Mawu gbagbe, si tsɔ nuwo katã na mí fũ be, míawɔ wo ŋuti dɔ la dzi.”—Timoteo I, 6:17.

[Etenuŋɔŋlɔwo]

[Anyigbatata si le axa 256]

(Edze nyuie le agbalẽa ŋutɔ me)

EUROPA

SPAIN (Afisi ɖewohĩ TARSIS nɔ)

MEDITERRANEA ƑU

SARDINIA

KIPRO

ASIA

ZIDON

TIRO

AFRIKA

EGIPTE

[Nɔnɔmetata si le axa 250]

Babilon ye ɖu Tiro dzi, ke menye Asiria o

[Nɔnɔmetata si le axa 256]

Gaku si dzi Tiro mawugã Melkart le

[Nɔnɔmetata si le axa 256]

Foiniketɔwo ƒe tɔdziʋuwo tɔgbe aɖe