‘Tsɔ Yehowa Ƒe Ŋkɔ Wɔ Wò Sitsoƒee’
“Mana ame siwo bɔbɔa wo ɖokui hefa tu la nakpɔtɔ ɖe mewò, eye woatsɔ Yehowa ƒe ŋkɔ awɔ woƒe sitsoƒee.”—ZEF. 3:12, NW.
1, 2. Kpɔɖeŋu ƒe ahomtugbe kae ava ameƒomea dzi?
ÐE WÒDZƆ ɖe dziwò kpɔ be tsi gã aɖe nɔ dzadzam eye èƒu du yi ɖabe ɖe agbadɔ aɖe tea? Agbadɔ ate ŋu akpɔ tawò le tsidzadza nu gake ne ahom sesẽ aɖee le tutum la, makpɔ tawò tututu o.
2 Ahom ƒomevi aɖe le ŋgɔ gbɔna tutu ge—anye ahom aɖe si ana ameƒomea katã ƒe agbe naɖo afɔku me. Enye kpɔɖeŋu ƒe ahomtugbe aɖe. Eyae nye “Yehowa ƒe ŋkeke gã” si ava ameƒomea katã dzi. Ke hã, míate ŋu akpɔ sitsoƒe si míehiã. (Mixlẽ Zefaniya 1:14-18.) Alekee míate ŋu akpɔ sitsoƒe le “Yehowa ƒe dɔmedzoedogbe” si ava kpuie la dzi?
Ahomtugbe Siwo Va Le Biblia Ŋlɔɣi
3. “Ahom gblẽnu” kae tu le Israel to ewo fiaɖuƒea me?
3 Alakpasubɔsubɔ nuɖoanyi siwo katã le anyigba dzi la tsɔtsrɔ̃ ɖa ye aʋu Yehowa ƒe ŋkekea nu. Míate ŋu akpɔ ale si míawɔ akpɔ bebeƒe la le Mawu ƒe dukɔ si nɔ anyi le blema la ƒe ŋutinya me. Yesaya, ame si nɔ agbe le ƒe alafa enyilia D.M.Ŋ. me la, tsɔ ʋɔnudɔdrɔ̃ si Yehowa he va Israel to ewo fiaɖuƒea dzi la sɔ kple “ahom gblẽnu” aɖe si amewo mate ŋu axe mɔ na o. (Mixlẽ Yesaya 28:1, 2.) Nyagblɔɖi ma va eme zi gbãtɔ le ƒe 740 D.M.Ŋ. me, esime Asiriatɔwo ho ɖe to ewo mawo ƒe anyigba ŋu; Efrayim ye nye to si ɖe dzesi wu le wo dome.
4. Aleke “Yehowa ƒe ŋkeke gã” aɖe va Yerusalem dzi le ƒe 607 D.M.Ŋ. mee?
4 Le ʋɔnudɔdrɔ̃ si va Israel mawɔnuteƒea dzi megbe la, “Yehowa ƒe ŋkeke gã” aɖe va Yerusalem kple Yuda fiaɖuƒea dzi le ƒe 607 D.M.Ŋ. me. Nu sia dzɔ le esi Yudatɔwo hã va gbe xɔse ta. Babilontɔ siwo Nebukadnezar nɔ ŋgɔ na la do ŋɔdzi na Yuda kple eƒe fiadu Yerusalem. Yudatɔwo trɔ ɖe “aʋatsositsoƒe,” si nye dunyahehe ƒe nubabla si wowɔ kple Egipte la, ŋu hena kpekpeɖeŋu. Ke hã, abe tsikpe sesẽ aɖe ene la, Babilontɔwo kplɔ ‘sitsoƒe’ ma dzoe.—Yes. 28:14, 17.
5. Nu kae woawɔ na Mawu ƒe amewo ƒe ƒuƒoƒoa le alakpasubɔsubɔwo katã tsrɔ̃ɣi?
5 Yehowa ƒe ŋkeke gã si va Yerusalem dzi le blema la nye dzesi be eƒe ʋɔnudɔdrɔ̃ ava Kristodukɔ gbexɔse si li egbea la dzi. Gakpe ɖe eŋu la, woatsrɔ̃ alakpasubɔsubɔ ƒe xexemefiaɖuƒe si nye, “Babilon Gã la” ƒe akpa susɔea ɖa. Ema megbe la, woatsrɔ̃ Satana ƒe nuɖoanyi vɔ̃ɖia ƒe akpa susɔeawo ɖa. Ke hã, woakpɔ Mawu ƒe amewo ƒe ƒuƒoƒoa ta, elabena wosi Yehowa tso.—Nyaɖ. 7:14; 18:2, 8; 19:19-21.
Woakpɔ Wo Ta Le Gbɔgbɔ Kple Ŋutilã Me Siaa
6. Alekee Yehowa anye sitsoƒe na eƒe amewo?
6 Alekee Mawu ate ŋu anye sitsoƒe na eƒe amewo fifia gɔ̃ hã, le nuwuɣi siawo me? ‘Ŋkuléle ɖe Mawu ƒe ŋkɔa ŋu’ alo eŋu bubu kple Mawu subɔsubɔ dzonɔamemetɔe anye gbɔgbɔmesitsoƒe na mí. (Mixlẽ Maleaxi 3:16-18.) Ke hã, anyo be míade dzesii be ele be míawɔ nu si yi ŋgɔ wu Mawu ƒe ŋkɔa ŋu bubu ko. Biblia gblɔ be: “Ame sia ame si yɔa Yehowa ƒe ŋkɔ la, woaɖee.” (Rom. 10:13) Kadodo le Yehowa ƒe ŋkɔ yɔyɔ kple eƒe ameɖeɖe dome. Eye dzianukwaretɔ geɖe tea ŋu kpɔa vovototo si le Kristotɔ vavãwo, siwo le ‘Mawu ƒe ŋkɔ ŋu bum’ bubutɔe, eye wole esubɔm abe eƒe Ðasefowo ene la, kple ameƒomea me tɔ siwo mele Mawu subɔm o la dome.
7, 8. Mɔ ka dzie ƒe alafa gbãtɔ me Kristotɔwo to tsi agbe, eye nu si sɔ kple ema kae míele mɔ kpɔm na egbea?
7 Ke hã, to vovo na gbɔgbɔmesitsoƒea la, míekpɔa ɖeɖe le mɔ bubu aɖe hã nu. Wodo ŋugbe na Mawu ƒe amewo be woaxɔ wo ɖe agbe. Míekpɔ esia le nu si dzɔ le ƒe 66 M.Ŋ. me, esi aʋafia Cestius Gallus nɔ ŋgɔ na Roma srafowo wova dze Yerusalem dzi megbe, la me. Yesu gblɔe ɖi be “woatso” xaxa ƒe ŋkeke mawo dzi kpɔtɔ. (Mat. 24:15, 16, 21, 22) Esia va eme esime Roma srafo siwo ɖe to ɖe dua la dzo le vo me, si na be “ŋutilã” aɖewo—Kristotɔ vavãwo—‘kpɔ ɖeɖe.’ Mɔnukpɔkpɔ su wo si wosi le dua kple nuto siwo ƒo xlãe la me. Wo dometɔ aɖewo tso Yordan eye wokpɔ sitsoƒe le to siwo le tɔsisi ma ƒe ɣedzeƒe gome la dzi.
8 Míate ŋu akpɔ nanewo siwo sɔ kple wo nɔewo le Kristotɔ mawo kple Mawu ƒe ame siwo li egbea la gome. Ɣemaɣi la, ƒe alafa gbãtɔ me Kristotɔwo di sitsoƒe, eye nenema kee Mawu ƒe ame siwo li egbea hã awɔ. Gake, le ame siwo li egbea gome la, womasi ayi anyigba ƒe teƒe ŋutɔŋutɔ aɖe koŋ o, elabena Kristotɔ vavãwo le anyigba bliboa dzi. Ke hã, abe ƒuƒoƒo ene la, nenye be “ame tiatiawo” kple woƒe zɔhɛ wɔnuteƒeawo si Yehowa tso, eye wonɔ sitsoƒe si nye eƒe habɔbɔ si le abe to ene me la, woatsi agbe le Kristodukɔ gbexɔse la tsrɔ̃ɣi.
9. Ame kawoe dze agbagba be yewoana amewo naŋlɔ Yehowa ƒe ŋkɔ be? Gblɔ eƒe kpɔɖeŋu aɖe.
9 To vovo na esia la, Kristodukɔa dze na tsɔtsrɔ̃ si gbɔna la, elabena woawo gbɔe wòtso be sɔlemedela geɖe menya nyateƒe si ku ɖe Mawu ŋu kpakple eƒe dzidzenuwo o; Kristodukɔa lé fu Mawu ƒe ŋkɔa hã. Tso ƒe 500 M.Ŋ. va ɖo ƒe 1500 M.Ŋ. me lɔƒo la, ame geɖe nya Mawu ƒe ŋkɔ ŋutɔŋutɔa le Europa. Hebrigbe me ŋɔŋlɔdzesi ene siwo wotsɔ ŋlɔ Mawu ƒe ŋkɔa, siwo nye YHWH (alo JHVH) le míaƒe ŋɔŋlɔdzesiwo nu, si wolɔ̃a yɔyɔ be Ŋɔŋlɔdzesi Eneawo la, dze le gakuwo kple aƒewo ƒe agbowo nu, eye wodze le agbalẽ kple Biblia geɖewo me—edze le esiwo Katolikoha kple Protestanttɔwo ta la dometɔ aɖewo gɔ̃ hã me. Ke hã, nu si va le bɔbɔm egbea ye nye Mawu ƒe ŋkɔa ɖeɖeɖa le Biblia gɔmeɖeɖewo kple nu bubuwo me. Esia dze le mɔfiame aɖe si wona le agbalẽ si woŋlɔ le June 29, 2008 dzi si nye, Lɛta Na Katoliko Bisiɔpwo ‘Ku Ðe Mawu Ƒe Ŋkɔa Ŋu,’ si Mawusubɔsubɔ Kple Sakramento Kɔkɔewo Ŋuti Nufiahaa ŋlɔ la me. Le lɛta ma me la, Roma Katolikoha la gblɔ be woatsɔ nya “Aƒetɔ” aɖɔli Hebrigbe me ŋɔŋlɔdzesi ene siwo wotsɔ ŋlɔ Mawu ƒe ŋkɔa, si gɔme woɖe le mɔ vovovowo nu la. Vatican la de se be mele be woazã Mawu ƒe ŋkɔa alo ayɔe le Katolikoha la ƒe gbedodoɖawo kple subɔsubɔwɔnawo me o. Eye subɔsubɔha bubu siwo gblɔna be Kristotɔwo yewonye kple subɔsubɔha siwo menye Kristodukɔa ƒe akpa aɖeke o la ƒe ŋgɔnɔlawo hã mefia ame si tututu Mawu vavã la nye kple eƒe ŋkɔ tadeagula miliɔn akpe geɖeawo o.
Wokpɔa Ame Siwo Kɔa Mawu Ƒe Ŋkɔ Ŋu La Ta
10. Alekee wole bubu dem Mawu ƒe ŋkɔa ŋu egbea?
10 Yehowa Ðasefowo ya mele nu wɔm abe subɔsubɔha bubuawo ene o, ke boŋ wodea bubu Mawu ƒe ŋkɔ ŋu eye wodonɛ ɖe dzi. Wozãa ŋkɔa le bubumɔ nu hetoa esia dzi kɔa eŋu. Yehowa kpɔa ŋudzedze ɖe ame siwo ɖoa ŋu ɖe eŋu la ŋu, eye wòzua nu sia nu si hiã be wòayra eƒe amewo ahakpɔ wo ta. ‘Enya ame siwo ɖoa dzi ɖe eŋu la.’—Nax. 1:7; Dɔw. 15:14.
11, 12. Ame kawoe tsɔ Yehowa ƒe ŋkɔ wɔ woƒe bebeƒe le blema Yuda, eye ame kawoe le esia wɔm le míaƒe ŋkekea me?
11 Togbɔ be blema Yudatɔ geɖe va gbe xɔse hã la, wo dometɔ aɖewo tsɔ ‘Yehowa ƒe ŋkɔ wɔ woƒe bebeƒee.’ (Mixlẽ Zefaniya 3:12, 13.) Ɛ̃, esi Mawu he to na Yuda gbexɔse la to ale si wòɖe mɔ Babilontɔwo ɖu dukɔa dzi eye wokplɔ emenɔlawo yi aboyome dzi la, wokpɔ ame ɖekaɖeka aɖewo, abe Yeremiya, Barux, kple Ebed-Melex ene, ta. Dukɔ gbexɔse aɖe ‘domee’ ame siawo nɔ. Ame bubuwo wɔ nuteƒe esime wonɔ aboyome. Le ƒe 539 D.M.Ŋ. me la, Kores nɔ ŋgɔ na Mediatɔwo kple Persiatɔwo woɖu Babilon dzi. Eteƒe medidi o, Kores de se be woaɖe mɔ na Yudatɔ susɔeawo woatrɔ ayi wo denyigba dzi.
12 Zefaniya gblɔ ɖi tso ame siwo tadedeagu vavã gbugbɔɖoanyi aɖe vi na la ŋu be Yehowa axɔ na wo eye wòakpɔ dzidzɔ le wo ŋu. (Mixlẽ Zefaniya 3:14-17.) Esia va eme le míaƒe ŋkekea hã me. Esi woɖo Mawu Fiaɖuƒea anyi le dziƒo megbe la, Yehowa ɖe amesiamina wɔnuteƒe susɔeawo tso Babilon Gã la ƒe gbɔgbɔmeboyo me. Eye wòle dzidzɔ kpɔm le wo ŋu va se ɖe egbea.
13. Ablɔɖe ka kpɔmee ame siwo tso dukɔwo katã me la le?
13 Ame siwo si anyigba dzi nɔnɔ ƒe mɔkpɔkpɔ le hã do tso Babilon Gã la me eye wokpɔ gbɔgbɔmeblɔɖe tso subɔsubɔhawo ƒe aʋatsonufiafiawo me. (Nyaɖ. 18:4) Eya ta Zefaniya 2:3, afi si gblɔ be, ‘Midi Yehowa, mi ame siwo katã bɔbɔ mia ɖokui ɖe anyi le anyigba dzi,’ la le eme vam le mɔ si lolo wu nu le míaƒe ɣeyiɣia me. Ðokuibɔbɔla siwo tso dukɔwo katã me la tsɔ Yehowa ƒe ŋkɔ le woƒe sitsoƒe wɔmee fifia, eɖanye dziƒomɔkpɔkpɔe le wo si loo, alo anyigbadzimɔkpɔkpɔ ye le wo si o.
Mawu Ƒe Ŋkɔ Menye Tsila O
14, 15. (a) Nu kawoe ame aɖewo bu abe tsila ene? (b) Nu kae mele be míazã abe atiblɛ ene o?
14 Israel vi aɖewo bu gbedoxɔa abe tsila si akpɔ wo ta tso futɔwo si me ene. (Yer. 7:1-4) Do ŋgɔ na ema la, Israel viwo bu nubablaɖaka la abe atiblɛ si akpɔ wo ta le aʋa me ene. (1 Sam. 4:3, 10, 11) Konstantino Gãtɔ ta Helagbe me ŋɔŋlɔdzesi khi kple rho, siwo nye dzesideŋkɔ “Kristo” ƒe ŋɔŋlɔdzesi eve gbãtɔwo ɖe eƒe asrafowo ƒe akpoxɔnuwo dzi kple susu be wòakpɔ yeƒe asrafoawo ta le aʋa me. Eye wosusu be Swedentɔ Fia Gustav Adolph II, si wɔ Ƒe Blaetɔ̃ Ʋa la, do gakɔtakpoxɔnu si dze le axa 7 lia. Àde dzesii be woŋlɔ ŋkɔ Iehova ɖe edzi wòdze nyuie.
15 Yehowa subɔla siwo gbɔgbɔ vɔ̃wo va nɔ fu ɖem na la dometɔ aɖewo si Yehowa tso to eƒe ŋkɔ yɔyɔ sesĩe me. Ke hã, mele be míabu nane si dzi woŋlɔ Mawu ƒe ŋkɔa ɖo la abe tsila ene alo azãe abe atiblɛ ene le míaƒe gbe sia gbe gbenɔnɔ me abe ɖe vivime ƒe ametakpɔŋusẽ aɖe le eme ene o. Menye esiae Yehowa ƒe ŋkɔ tsɔtsɔ wɔ ame ƒe sitsoƒee fia o.
Sitsoƒedidi Egbea
16. Aleke míate ŋu akpɔ sitsoƒe le gbɔgbɔ me egbea?
16 Gbɔgbɔmededienɔƒe si me Mawu ƒe amewo sea vivi le abe ƒuƒoƒo ene la nyea gbɔgbɔmesitsoƒe na mí egbea. (Ps. 91:1) “Kluvi nyateƒetɔ kple aɖaŋudzela” la kpakple hamemetsitsiwo xlɔ̃a nu mí tso xexea me nuwɔna siwo ate ŋu ade míaƒe dedienɔnɔ afɔku me la ŋu. (Mat. 24:45-47; Yes. 32:1, 2) Bu zi gbɔ zi ale si woxlɔ̃ nu mí ku ɖe ŋutilãmenudidi vivivo ŋu la ŋu kpɔ, eye de ŋugble le ale si nuxlɔ̃ame siawo kpɔ mía ta tso gbɔgbɔmefɔkuwo me la hã ŋu kpɔ. Ke afɔku si li be ‘ɖekematsɔleme’ ƒe nɔnɔme ava su mía si, si ana be míava gbɔdzɔ le Yehowa subɔsubɔ me ya ɖe? Mawu ƒe Nya la gblɔ be: “Bometsilawo ƒe ɖekematsɔlemee atsrɔ̃ wo. Ke ame si ɖoa tom la, anɔ anyi dedie, eye vɔ̃ ƒe ŋɔdzidoname aɖeke maɖe fu nɛ o.” (Lod. 1:32, 33, NW) Agbagbadzedze be míanɔ dzadzɛ le agbenɔnɔ gome hã akpe ɖe mía ŋu be míakpɔtɔ anɔ dedie le gbɔgbɔ me.
17, 18. Nu kae le kpekpem ɖe ame miliɔn geɖe ŋu wotsɔ Yehowa ƒe ŋkɔ le woƒe sitsoƒe wɔmee egbea?
17 Gabu ale si kluvi nuteƒewɔla la dea dzi ƒo na mí be míawɔ ɖe se si Yesu de be míaɖe gbeƒã Fiaɖuƒe ŋuti nya nyuia le anyigba bliboa dzi la dzi ŋu kpɔ? (Mat. 24:14; 28:19, 20) Zefaniya ƒo nu tso tɔtrɔ aɖe si akpe ɖe amewo ŋu be woatsɔ Mawu ƒe ŋkɔa awɔ woƒe sitsoƒee la ŋu. Eŋlɔ bena: “Ɣemaɣi la, mana dukɔwo nado gbegbɔgblɔ dzadzɛ aɖe, eye wo katã woayɔ Yehowa ƒe ŋkɔ, ne woatsɔ nusɔsɔe asubɔe.”—Zef. 3:9, NW.
18 Nu kae nye gbegbɔgblɔ dzadzɛ sia? Gbegbɔgblɔ dzadzɛ lae nye nyateƒe si ku ɖe Yehowa Mawu kple eƒe tameɖoɖowo ŋu si le eƒe Nya si tso gbɔgbɔ me la me. Le mɔ aɖe nu la, ne ènaa amewo sea nu si tututu Mawu Fiaɖuƒea nye kple ale si wòakɔ Mawu ƒe ŋkɔa ŋu la gɔme nyuie, ètea gbe ɖe Mawu ƒe dziɖulanyenye ta ʋiʋli dzi, eye nèƒoa nu tso yayra mavɔ siwo amegbetɔ wɔnuteƒewo akpɔ ŋu kple dzidzɔ la, aɖee afia be èle gbegbɔgblɔ dzadzɛa dom. Ale si ame gbogbo aɖewo le kpɔɖeŋugbegbɔgblɔ sia dom la wɔe be ame siwo ƒe xexlẽme le dzidzim ɖe edzi la le ‘Yehowa ƒe ŋkɔ yɔm’ eye ‘wotsɔ nu sɔsɔe le esubɔm.’ Ɛ̃, ame miliɔn geɖe siwo le xexea me godoo la tsɔ Yehowa le woƒe sitsoƒe wɔmee fifia.—Ps. 1:1, 3.
19, 20. Aleke ame siwo ɖo ŋu ɖe ‘aʋatsositsoƒewo’ ŋu le blema la ɖu ŋukpee?
19 Ame siwo le xexea me la dzea ŋgɔ kuxi siwo dzena abe ɖe womate ŋu awɔ naneke le wo ŋu o ene. Esi ame geɖewo tsi dzi be yewoakpɔ yewoƒe kuxiwo gbɔ ta la, wotrɔna ɖe amegbetɔ madeblibowo ŋu hena kpekpeɖeŋu. Alo wokpɔa mɔ be dunyahehabɔbɔwo nakpɔ kuxiawo gbɔ, abe ale si ko Israel vi siwo nɔ anyi le blema hã kpɔ mɔ be dukɔ siwo ƒo xlã yewo la nana kpekpeɖeŋu yewo eye wobla nu kpli wo ene. Ke hã, ènyae be esia wɔwɔ mekpe ɖe Israel viwo ŋu o. Eye dunyahedziɖuɖuwo loo alo Dukɔ Ƒoƒuawo ƒe habɔbɔa mate ŋu akpɔ ameƒomea ƒe kuxiwo katã gbɔ bliboe o. Ke nu ka tae wòle be ame aɖe nabui be dunyahehabɔbɔ kple dunyahenubablawo nye sitsoƒe na ye? Biblia yɔ wo le nyagblɔɖi me be wonye “aʋatsositsoƒe.” Asɔ be nàbu wo nenema, elabena ŋukpe alé ame siwo katã ɖoa ŋu ɖe wo ŋu la vevie.—Mixlẽ Yesaya 28:15, 17.
20 Eteƒe madidi o, Yehowa ƒe ŋkeke la ƒe kpɔɖeŋutsikpe la adza ɖe anyigba la dzi. Amegbetɔwo ƒe ɖoɖowo makpɔ amewo ta o; nenema kee nukliaʋawɔnuwo kple kesinɔnuwo hã manye takpɔnu na amewo o. Yesaya 28:17 gblɔe kɔtɛ be: “Dzikpe [la] atsrɔ̃ aʋatsositsoƒe la, eye tsi akplɔ bebeƒe la adzoe.”
21. Ne míewɔ ƒe 2011 ƒe mawunyakpukpuia me nyawo dzi la, vi kawoe wòaɖe na mí?
21 Yehowa Mawu ana eƒe amewo nakpɔ dedienɔnɔ vavãtɔ fifia kple etsɔme siaa. Zefaniya ƒe ŋkɔ si gɔmee nye “Yehowa Ɣlae” la fia asi bebeƒe vavã sia. Esɔ ŋutɔ be ƒe 2011 ƒe mawunyakpukpuia nye aɖaŋuɖoɖo si me nunya le, si nye: ‘Tsɔ Yehowa ƒe ŋkɔ wɔ wò sitsoƒee.’ (Zef. 3:12, NW) Fifia gɔ̃ hã la, míate ŋu atsɔ Yehowa ƒe ŋkɔ awɔ míaƒe sitsoƒee ahaɖo ŋu ɖe eŋu bliboe, eye ele be míawɔe hã. (Ps. 9:11) Mina be kakaɖedzinya sia si tso gbɔgbɔ me la nanɔ susu me na mí gbe sia gbe: ‘Yehowa ƒe ŋkɔ enye mɔ sesẽ; afi ma ame dzɔdzɔe la sina yina, eye wònɔa dedie.’—Lod. 18:10.
Èɖo Ŋku Wo Dzia?
• Alekee míatsɔ Yehowa ƒe ŋkɔ awɔ míaƒe sitsoƒee fifia?
• Nu ka tae mele be míaɖo ŋu ɖe “aʋatsositsoƒe” la ŋu o?
• Sitsoƒe kae woka ɖe edzi na mí be míakpɔ le etsɔme?
[Nya si ɖe dzesi si le axa 6]
Ƒe 2011 ƒe mawunyakpukpuiae nye: ‘Tsɔ Yehowa ƒe ŋkɔ wɔ wò sitsoƒee.’—Zefaniya 3:12, NW.
[Nɔnɔmetata si le axa 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”