Ta Blaeve Vɔ Etɔ̃

Kpɔ Mɔ Na Yehowa

Yesaya 30:1-33

1, 2. (a) Nya kawoe le Yesaya ta 30 lia me? (b) Nyabiabia kawo mee míadzro fifia?

NYA bubu siwo Mawu gagblɔ ɖe ame vɔ̃ɖiwo ŋu la dze le Yesaya ta 30 lia me. Gake Yesaya ƒe nyagblɔɖia ƒe akpa sia ɖe Yehowa ƒe nɔnɔme lédzinamewo dometɔ aɖewo fia. Le nyateƒe me la, woƒo nu tso Yehowa ƒe nɔnɔmewo ŋu tsitotsito ale gbegbe be ne míagblɔe le kpɔɖeŋumɔ nu la, míate ŋu akpɔ eƒe anyinɔnɔ fakɔname la, ase eƒe gbe si fiaa mɔ ame, eye míase eƒe asikaka ame ŋu si yɔa dɔ ame.—Yesaya 30:20, 21, 26.

² Togbɔ be ele alea hã la, Yesaya detɔ siwo nye Yudatɔ xɔsegbelawo metrɔ va Yehowa gbɔ o. Woɖo ŋu ɖe amegbetɔ ŋu boŋ. Aleke Yehowa se le eɖokui me le esia ŋu? Eye aleke Yesaya ƒe nyagblɔɖia ƒe akpa sia kpena ɖe Kristotɔ siwo li egbea ŋu be woakpɔ mɔ na Yehowae? (Yesaya 30:18) Mina míakpɔe ɖa.

Bometsitsi Kple Afɔku

 3. Ðoɖo ka dzie Yehowa klo nu le?

³ Ɣeyiɣi aɖee nye sia si Yuda-ŋgɔnɔlawo le ɖoɖo wɔm le adzame be yewoadi mɔ si dzi yewoato aƒo asa na Asiria ƒe ŋusẽ te nɔnɔ. Gake Yehowa nɔ ŋku lém ɖe wo ŋu. Fifia eklo nu le woƒe ɖoɖoa dzi: “Yehowa be, baba na vi sẽtowo, amesiwo de adaŋu nye manɔmee, eye wobla nu nye gbɔgbɔ manɔmee, ne woali kɔ nuvɔ̃ ɖe nuvɔ̃ dzi! Amesiwo [le ɖoɖo wɔm be yewoayi Egipte, “NW”].”—Yesaya 30:1, 2a.

 4. Aleke Mawu ƒe dukɔ dzeaglã la tsɔ Egipte ɖo Mawu teƒee?

⁴ Aleke gbegbe dzika atso kplɔla siwo nɔ tame vɔ̃ ɖom la ƒo enye si be woklo nu le yewoƒe tameɖoɖoa dzi! Egipte yiyi ava bla nu kpli wo menye tsitretsitsi ɖe Asiria ŋu dzro ko o; enye aglãdzedze ɖe Yehowa Mawu ŋu hã. Le Fia Dawid ƒe ɣeyiɣia me la, dukɔa bu Yehowa be enye yewoƒe mɔ sesẽ eye wokpɔ sitsoƒe ‘le eƒe aʋala ƒe vɔvɔli te.’ (Psalmo 27:1; 36:8) Fifia “woasi Farao ƒe ŋusẽ atso,” eye “woabe ɖe Egipte ƒe vɔvɔli te.” (Yesaya 30:2b) Wotsɔ Egipte ɖo Mawu teƒe! Nuteƒemawɔmawɔ kae nye si!—Xlẽ Yesaya 30:3-5.

5, 6. (a) Nukata nubabla kple Egipte nye vodada gã aɖe? (b) Mawu ƒe dukɔa ƒe tsã mɔzɔzɔ kae ɖe Egipte yiyi sia ƒe bometsinunyenye fia?

⁵ Yesaya gaƒo nu tso nyaa ŋu yi ŋgɔe abe ɖe wònɔ nya ŋu ɖom na amesiwo gblɔ be Egipte yiyi nye tsaɖiɖi dzro ko la ene. “Nya ɖe dziehe-nyigba ƒe lãwo ŋu. Le hiã kple xaxa ƒe anyigba dzi, afisi dzatanɔ kple dzatatsu dona tsona, afisi ƒli kple da toaʋala le la, afima wotsɔa woƒe nuwo ɖoa tedziwo ƒe mẽdome kple woƒe kesinɔnuwo ɖoa kposɔwo ƒe kpo dzi tsonɛ.” (Yesaya 30:6a) Edze ƒã be ɖe wowɔ ɖoɖo ɖe mɔzɔzɔa ŋu koŋ. Amedɔdɔwo dzra tedzi kple kposɔ siwo wotsɔ nu xɔasiwo do agba na la ɖo eye woto dzogbemɔ si dzi dzata ɖegbewo kple da vɔ̃ɖiwo bɔ ɖo la heɖo ta Egipte. Amedɔdɔawo va ɖo afisi woyina mlɔeba eye wotsɔ woƒe kesinɔnuawo na Egiptetɔwo. Woƒle ametakpɔkpɔ—alo wosusui nenema. Gake Yehowa gblɔ be: “Womanye viɖe aɖeke na dukɔ la o. Eye Egiptetɔwo nye tofloko, eye womate ŋu ana kpekpeɖeŋu aɖeke o. Eyata meyɔe be: ‘Raxab—naneke wɔwɔ mele eŋu o.’” (Yesaya 30:6b, 7, “NW”) “Raxab” si nye ‘ƒumelã klitsu’ la va tsi tre ɖi na Egipte. (Yesaya 51:9, 10) Edoa nusianu ƒe ŋugbe gake mete ŋu wɔa naneke o. Yuda ƒe nubabla kplii nye vodada gã aɖe.

⁶ Esi Yesaya nɔ nu ƒom tso amedɔdɔawo ƒe mɔzɔzɔa ŋu la, ɖewohĩ eƒe nyaselawo ɖo ŋku mɔzɔzɔ sia tɔgbe dzi le Mose ƒe ŋkekeawo me. Wo tɔgbuiwo zɔ to ‘gbe gã dziŋɔ ma ke dzi.’ (Mose V, 8:14-16) Gake le Mose ƒe ŋkekea me la, ɖe Israel-viwo nɔ ʋuʋum tso Egipte hedzo le aboyo me. Fifia ya amedɔdɔawo zɔ mɔ yi Egipte eye wotsɔ wo ɖokui va de wo te ŋutɔŋutɔ. Bometsitsi ka gbegbee nye si! Negadzɔ gbeɖe be míawɔ nyametsotso gbegblẽ sia tɔgbe atsɔ míaƒe gbɔgbɔmeblɔɖe aɖɔ li kluvinyenyee o!—Tsɔe sɔ kple Galatiatɔwo 5:1.

Tsitretsitsi Ðe Nyagblɔɖila la ƒe Gbedasia Ŋu

 7. Nukata Yehowa na Yesaya ŋlɔ Eƒe nuxlɔ̃amenya na Yuda la ɖi?

⁷ Yehowa gblɔ na Yesaya be wòaŋlɔ nya siwo wògblɔ fifi laa la ɖi ale be “wòanɔ anyi anye ɖase tegbee le ŋkeke, siwo gbɔna la me.” (Yesaya 30:8) Ele be wòaŋlɔ nu tso Yehowa ƒe ŋudzedzemakpɔmakpɔ ɖe nu si wobla kple amegbetɔwo tsɔ wu be woaɖo ŋu ɖe Eyama ŋu la ɖi be wòaɖe vi na etsɔme dzidzimewo—kple míaƒe dzidzime si li egbea hã. (Petro II, 3:1-4) Gake hiahiã kpata aɖe hã tae wòle be woaŋlɔ nya mawo ɖi. “Dukɔ sẽto, vi dalakpa, vi, siwo gbe Yehowa ƒe nufiamewo sese la, wonye.” (Yesaya 30:9) Dukɔa gbe Mawu ƒe nuxlɔ̃amewo. Eyata ele be woaŋlɔe ɖi ale be woagava gblɔ emegbe be ɖe womexlɔ̃ nu yewo nyuie o.—Lododowo 28:9; Yesaya 8:1, 2.

8, 9. (a) Mɔ ka nue Yuda-kplɔlawo dze agbagba le be yewoagblẽ Yehowa ƒe nyagblɔɖilawo? (b) Aleke Yesaya ɖee fia be womate ŋu ado vɔvɔ̃ na ye o?

⁸ Azɔ Yesaya wɔ dukɔa ƒe aglãdzedze ƒe kpɔɖeŋu aɖe. Amesiawo “gblɔ na nukpɔlawo be: Migakpɔ nu o, eye wogblɔ na nyagblɔɖilawo be: Migagblɔ nya, si le eteƒe la, ɖi na mí o, ke boŋ migblɔ nya ŋɔnɔewo na mí, eye migblɔ alakpanyawo ɖi!” (Yesaya 30:10) Esi Yuda ƒe kplɔlawo gblɔ na nyagblɔɖila wɔnuteƒewo be womegagblɔ nya si “le eteƒe,” alo nyateƒenya, na yewo o ke boŋ woagblɔ nya “ŋɔnɔewo” kple “alakpanyawo,” alo ameflunyawo na yewo la, woɖee fia be yewodi be woalũ tome na yewo. Wodi be woakafu yewo ke menye be woabu fɔ yewo o. Le woƒe susu nu la, ele be nyagblɔɖila ɖesiaɖe si medi be yeagblɔ nya si dze yewo ŋu ɖi o la ‘nate ɖa le mɔ la dzi, eye woadze le toƒe la.’ (Yesaya 30:11a) Ele be wòagblɔ nya siwo asɔ tome na wo loo alo wòadzudzɔ gbeƒãɖeɖe kura!

⁹ Amesiwo tsi tre ɖe Yesaya ŋu te tɔ ɖe edzi be: “Mina Israel ƒe kɔkɔetɔ la nabu le mía ŋku me!” (Yesaya 30:11b) Wodi be Yesaya nadzudzɔ nuƒoƒo le Yehowa, “Israel ƒe kɔkɔetɔ la,” ƒe ŋkɔ me! Dzesideŋkɔ sia tututue vea dɔme na wo elabena Yehowa ƒe dzidzenu kɔkɔawo na woƒe nɔnɔme vloewo dzena. Aleke Yesaya wɔ nui? Egblɔ be: “Ale Israel ƒe kɔkɔetɔ la gblɔ esi.” (Yesaya 30:12a) Yesaya mehe ɖe megbe hafi gblɔ nya siwo tututu eƒe tsitretsiɖeŋulawo medi be yewoase o la o. Mevɔ̃ wo o. Kpɔɖeŋu nyui kae nye si wònye na mí! Mele be Kristotɔwo nana ta le gbeƒãɖeɖe Mawu ƒe gbedasia me gbeɖe o. (Dɔwɔwɔwo 5:27-29) Abe Yesaya ene la, woyia edzi gblɔna be: ‘Ale Yehowa gblɔ esi’!

Aglãdzedze Me Tsonuwo

10, 11. Nukae ado tso Yuda ƒe aglãdzedzea me?

¹⁰ Yuda gbe Mawu ƒe nya hexɔ alakpanya dzi se, eye wòɖo ŋu ɖe “ayedzedze” ŋu. (Yesaya 30:12b) Nukae ado tso eme? Le esi teƒe be Yehowa naŋe aɖaba aƒu nɔnɔmea dzi abe alesi dukɔa dii ene la, aɖe dukɔa ɖa boŋ! Esia adzɔ kpata eye woaɖe wo ɖa keŋkeŋ abe alesi Yesaya wɔ kpɔɖeŋu aɖe tsɔ te gbe ɖe edzii ene. Dukɔa ƒe aglãdzedze le abe “gli dzeabi, si le mumũm hetre azã le gli kɔkɔ aɖe ŋu la ene, esi ƒe mũɣi ado zi ɖeka kpoyi.” (Yesaya 30:13) Abe alesi gli kɔkɔ amu mlɔeba ne eƒe akpa aɖe tre azã ene la, nenemae Yesaya ŋɔlimetɔwo ƒe aglãdzedze ɖe edzi ana dukɔa namui.

¹¹ Yesaya gawɔ kpɔɖeŋu bubu tsɔ fia alesi woaɖe wo ɖa keŋkeŋ le tsɔtsrɔ̃ si nɔ ŋgɔ mee be: “Wòagbã wo, abe alesi zemela ƒe ze gbãna gudugudu, ale be sonu gaglɛ aɖeke menɔa gbagbã la me, si woatsɔ aɖe dzo le adokpo me, alo woatsɔ adu tsii le vudo me o la ene.” (Yesaya 30:14) Woatsrɔ̃ Yuda gbidigbidi ale gbegbe be nu xɔasi aɖeke magatsi anyi o—ze kakɛ gɔ̃ hã matsi anyi woatsɔ aɖe dzo le mlekpui me alo woatsɔ aku tsi le tsiʋewo me o. Aleke gbegbe woƒe nuwuwu anye ŋukpee nye si! Nenema ke woatsrɔ̃ amesiwo tsia tre ɖe tadedeagu vavãtɔ ŋu egbea la gbidii le vome.—Hebritɔwo 6:4-8; Petro II, 2:1.

Wogbe Yehowa ƒe Nunana

12. Aleke Yudatɔwo awɔ aƒo asa na tsɔtsrɔ̃?

¹² Gake Yesaya ƒe nyaselawo ate ŋu aƒo asa na tsɔtsrɔ̃ hafi. Nane li woawɔ le eŋu. Nyagblɔɖila la ɖe eme be: “Ale Aƒetɔ Yehowa, Israel ƒe kɔkɔetɔ la, gblɔ esi: Tametɔtrɔ kple anyinɔnɔ kpoo woatsɔ axɔ na mi, eye miaƒe ŋusẽ le ɖoɖoezizi kple ŋuɖoɖo ɖe eŋu me.” (Yesaya 30:15a) Yehowa le klalo be yeaxɔ na yeƒe dukɔa—ne woɖe xɔse fia ‘henɔ anyi kpoo,’ alo ne wodzudzɔ agbagbadzedze be yewoabla nu kple amegbetɔwo bene woaxɔ na yewo, eye ‘wozi ɖoɖoe,’ alo ne womena vɔvɔ̃ ɖu wo dzi o tsɔ ɖee fia be yewoka ɖe Mawu ƒe ametakpɔŋusẽ dzi. Yesaya gblɔ na dukɔa be: “Ke mielɔ̃ o.”—Yesaya 30:15b.

13. Nuka ŋue Yuda-kplɔlawo ɖo ŋu ɖo, eye ɖe wòsɔ nenemaa?

¹³ Azɔ Yesaya ɖe eme yi edzi be: “[Miegblɔ] bena: Kpao, ke boŋ míanɔ sɔwo dzi asi, eye míado sɔ ɖiduwo. Eyata miasi, eye mia yometilawo ado sɔ ɖiduwo.” (Yesaya 30:16) Yudatɔwo bu be sɔ ɖeablawoe ana yewoakpɔ ɖeɖe, ke menye Yehowa o. (Mose V, 17:16; Lododowo 21:31) Gake nyagblɔɖila la gblɔ nya si to vovo na wo be nusi ŋu wole ŋu ɖom ɖo la madze edzi o elabena woƒe futɔwo ƒe asi atu wo. Ne wogasɔ gbɔ fũ hã la, made wo dzi o. “Mia dometɔ akpe ɖeka asi le ame ɖeka kolia ƒe bublu nu, eye mi katã miasi le ame atɔ̃ ƒe bublu nu.” (Yesaya 30:17a) Dzidzi aƒo Yuda-ʋakɔwo eye woasi le futɔ ʋɛ aɖewo ko ƒe bublu nu.a Mlɔeba la, ame ʋɛ aɖewo koe asusɔ, eye woagblẽ wo ɖi “abe aflagati le to ta me kple aflaga le togbɛ dzi ene.” (Yesaya 30:17b) Nyagblɔɖia va eme pɛpɛpɛ ale be esime wotsrɔ̃ Yerusalem le ƒe 607 D.M.Ŋ. me la, ame ʋɛ aɖewo koe tsi agbe.—Yeremya 25:8-11.

Akɔfanyawo le Fɔbuamenyawo Me

14, 15. Akɔfanya kae le Yesaya 30:18 na Yudatɔwo le blema kple Kristotɔ vavãwo egbea?

¹⁴ Esi Yesaya ƒe nyaselawo ganɔ nya siawo siwo na wobua tame la sem la, eƒe gbedasia ƒe nɔnɔme trɔ. Edzudzɔ nuƒoƒo tso afɔku si gbɔna ŋu heƒo nu tso yayrawo ƒe ŋugbedodo aɖe ŋu. “Eyata Yehowa le lalam, be yeave mia nu, eyata wòtso, be yeakpɔ nublanui na mi; elabena ʋɔnudɔdrɔ̃ ƒe Mawu enye Yehowa. Woayra amesiwo katã kpɔa esinu!” (Yesaya 30:18) Dzideƒonamenya kawo gbegbee nye si! Yehowa nye Fofo nublanuikpɔla si dina vevie be yeakpe ɖe ye viwo ŋu. Elɔ̃a nublanuikpɔkpɔ.—Psalmo 103:13; Yesaya 55:7.

¹⁵ Yudatɔwo ƒe ame susɔe siwo wokpɔ nublanui na wotsi agbe le Yerusalem ƒe tsɔtsrɔ̃ le ƒe 607 D.M.Ŋ. me kple ame ʋɛ siwo trɔ yi Ŋugbedodonyigbaa dzi le ƒe 537 D.M.Ŋ. me ŋue nya siawo siwo doa ŋusẽ ame ƒe kakaɖedzi la ku ɖo. Gake nyagblɔɖila la ƒe nyawo faa akɔ na Kristotɔ siwo li egbea hã. Woɖo ŋku edzi na mí be Yehowa ‘atso’ aɖe mí, eye wòahe xexe vɔ̃ɖi sia ava nuwuwui. Tadeagula wɔnuteƒewo ate ŋu aka ɖe edzi be Yehowa—“ʋɔnudɔdrɔ̃ ƒe Mawu”—maɖe mɔ Satana ƒe xexea nanɔ anyi adidi ŋkeke ɖeka pɛ hã wu alesi dzɔdzɔenyenye bia o. Eyata esɔ be “amesiwo katã kpɔa esinu” la nakpɔ dzidzɔ.

Yehowa Ðoa Gbedodoɖawo Ŋu Tsɔ Faa Akɔ na Eƒe Amewoe

16. Aleke Yehowa faa akɔ na amesiwo ƒo dzi ɖe le?

¹⁶ Gake dzi aɖe le ame aɖewo ƒo le esi ɖeɖekpɔkpɔ meva kaba alesi wokpɔ mɔe o ta. (Lododowo 13:12; Petro II, 3:9) Yesaya ƒe nya siwo kplɔe ɖo siwo te gbe ɖe Yehowa ƒe amenyenye ƒe akpa tɔxɛ aɖe dzi la nefa akɔ na amesiawo. “Zion-dukɔ, si le Yerusalem, meganɔ avifafa dzi o, elabena ave nuwò vavã le wò aƒadodo ta; ne enya see ko la, atɔ na wò.” (Yesaya 30:19) Lɔlɔ̃ɖeɖefia dze le Yesaya ƒe nya siawo me esi wòtrɔ “mi” si fia ame geɖe le kpukpui 18 lia me wòzu “wò” si fia ame ɖeka le kpukpui 19 lia me. Ne Yehowa le akɔ fam na fukpelawo la, ewɔa nu kple wo dometɔ ɖesiaɖe ɖekaɖekae. Esi wònye Vifofo ta la, mebiaa via si ƒo dzi ɖe le be, ‘Nukata màte ŋu asẽ ŋu abe nɔviwò ene o?’ (Galatiatɔwo 6:4) Ke boŋ eɖoa to sea wo dometɔ ɖesiaɖe ƒe nya. Le nyateƒe me “ne enya see ko la, atɔ na wò.” Nya kawoe nye si doa ŋusẽ ame ƒe kakaɖedzi ale! Amesiwo ƒo dzi ɖe le ate ŋu akpɔ tutuɖo geɖe ne wodo gbe ɖa na Yehowa.—Psalmo 65:3.

Xlẽ Mawu ƒe Nya la be Nàse Eƒe Gbe si Fiaa Mɔ Ame

17, 18. Aleke Yehowa naa mɔfiame le ɣeyiɣi sesẽwo gɔ̃ hã mee?

¹⁷ Yesaya yi eƒe nuƒoa dzi heɖo ŋku edzi na eƒe nyaselawo be wole fu kpe ge. Woana “abolo” dukɔa “le hiã me kple tsi . . . le xaxa me.” (Yesaya 30:20a) Hiã kple xaxa si me woato ne woɖe to ɖe wo la abɔ abe abolo kple tsi ene. Togbɔ be ele nenema hã la, Yehowa le klalo be yeaxɔ na dzinyuitɔwo. “Miaƒe [Nufiala Gãtɔ, “NW”] magabe azɔ o, ke boŋ miakpɔ miaƒe [Nufiala Gãtɔ, “NW”] kple ŋku, eye miaƒe to ase nya sia le mia megbe bena: Mɔ la enye si, mito edzi! nenye ɖusi me alo mia me miebe, yewoato.”—Yesaya 30:20b, 21.b

¹⁸ Yehowa ye nye “Nufiala Gãtɔ.” Nufiala aɖeke mede enu o. Gake aleke amewo awɔ ‘akpɔe’ eye ‘woase’ eƒe gbe? Yehowa ɖe eɖokui fia to eƒe nyagblɔɖila siwo ƒe nya woŋlɔ ɖe Biblia me dzi. (Amos 3:6, 7) Egbea ne tadeagula wɔnuteƒewo le Biblia xlẽm la, enɔa abe ɖe Mawu si nye vifofo la ƒe gbee le mɔ si woato la fiam wo ene eye edea dzi ƒo na wo be woawɔ tɔtrɔ le woƒe agbenɔnɔ me ale be woazɔ edzi. Ele be Kristotɔ ɖesiaɖe naɖo to nyuie ne Yehowa le nu ƒom to Biblia kple agbalẽ siwo me nyawo tso Biblia me si “dɔla nuteƒewɔla kple aɖaŋudzela” la tana dzi. (Mateo 24:45-47) Mina mía dometɔ ɖesiaɖe míado vevie Biblia xexlẽ, elabena ‘míaƒe agbee.’—Mose V, 32:46, 47; Yesaya 48:17.

Bu Etsɔme Yayrawo Ŋu

19, 20. Yayra kawoe le amesiwo wɔna ɖe Nufiala Gãtɔ la ƒe gbe dzi lalam?

¹⁹ Amesiwo wɔna ɖe Nufiala Gãtɔ la ƒe gbe dzi agblẽ woƒe legba memewo dome, eye woabu wo ŋunyɔnuwoe. (Xlẽ Yesaya 30:22.) Esia ana toɖola siawo nakpɔ yayra geɖe. Yesaya ƒo nu tso yayra siawo ŋu le Yesaya 30:23-26, wònye gbugbɔgaɖoanyi ŋuti nyagblɔɖi si va eme zi gbãtɔ esime Yudatɔwo ƒe ame susɔe aɖewo trɔ gbɔ tso aboyo me le ƒe 537 D.M.Ŋ. me. Egbea nyagblɔɖi sia kpena ɖe mía ŋu míekpɔa yayra wɔnuku siwo Mesia la he vɛ le gbɔgbɔmeparadiso si li fifia me kple esiwo ava le Paradisoa ŋutɔŋutɔ me le etsɔme.

²⁰ “Ana tsi nadza ɖe nuku, siwo nèƒã ɖe agble me la dzi, nuɖuɖu, si tso wò agble me nukuwo me la, avivi, eye woada ami; le ɣemaɣi la wò lãwo aɖu gbe le lãnyiƒe kekewo; eye nyitsuwo kple tedzi, siwo ŋlɔa agble la, aɖu bli tsakatsaka, si me dze le, eye wotsɔ sofi kple gaflo gã dzoboe.” (Yesaya 30:23, 24) Nu ‘vivi siwo da ami’—nuɖuɖu siwo me nunyiame geɖe le—ye anye amewo ƒe gbesiagbenuɖuɖu. Anyigba la awɔ nu geɖe ale gbegbe be aɖe vi na lãwo gɔ̃ hã. Aƒemelãwo aɖu “bli tsakatsaka, si me dze le”—si nye bli si wodzra ɖo na hiãɣi. ‘Wodzobo’ nuɖuɖu sia gɔ̃ hã—si nye alesi wotrɔa asi le bli ŋu tsɔ dzraa ɖoe zi geɖe be amegbetɔ naɖu. Nya dodzidzɔname kawoe nye si Yesaya gblɔ le afisia tsɔ wɔ alesi gbegbe Yehowa ƒe yayra asɔ gbɔ ɖe ameƒome wɔnuteƒea dzii ƒe kpɔɖeŋu!

21. Ƒo nu tso yayra siwo gbɔna ƒe blibonyenye ŋu?

²¹ “Tɔʋuwo anɔ tsi tsam le to kɔkɔwo katã kple togbɛ kɔkɔwo katã ta me.” (Yesaya 30:25b)c Yesaya zã nya siwo sɔ nyuie tsɔ te gbe ɖe Yehowa ƒe yayrawo ƒe blibonyenye dzii. Tsi mave o—menye baliwo me koe tsi xɔasi sia atsa le o ke atsa le to ɖesiaɖe dzi, le “to kɔkɔwo katã kple togbɛ kɔkɔwo katã ta me” gɔ̃ hã. Ẽ, dɔwuame maganɔ anyi o. (Psalmo 72:16) Tsɔ kpe ɖe eŋu la, nyagblɔɖila la he susu yi nusiwo kɔ wu towo gɔ̃ hã dzi. “Gbesigbe Yehowa bla eƒe dukɔ ƒe kakaƒe, eye wòda gbe le eƒe abi, si wòxɔ ŋu la, ɣleti ƒe keklẽ anɔ abe ɣe tɔ ene, eye ɣe ƒe keklẽ adzi ɖe dzi zi gbɔ zi adre abe keklẽ le ŋkeke adre me ene.” (Yesaya 30:26) Aleke gbegbe wowu nyagblɔɖi wɔdɔɖeamedzi sia nu wòdo dzidzɔ na amee nye si! Mawu ƒe ŋutikɔkɔe aklẽ le eƒe atsyɔ̃ katã me. Yayra siwo le Mawu subɔla nuteƒewɔlawo lalam la agbɔ nusianu si teƒe wokpɔ kpɔ la ŋu sã—agbɔ eŋu zi gbɔ zi adre.

Ʋɔnudɔdrɔ̃ Kple Dzidzɔ

22. Nukae Yehowa dzra ɖo ɖi na ame vɔ̃ɖiwo si to vovo na yayra siwo nuteƒewɔlawo akpɔ?

²² Yesaya ƒe gbedasia ƒe nɔnɔme gatrɔ ake. Egblɔ be, “Kpɔ ɖa,” abe ɖe wòdi be yeatsɔ ahe eƒe nyaselawo ƒe susui ene. “Yehowa ƒe ŋkɔ tso adzɔge gbɔna, eƒe dɔmedzoe le bibim, eye wòde dzi kɔtɔɔ; eƒe nuyiwo dzi yɔ fũ kple dziku, eƒe aɖe le abe dzo binu ene.” (Yesaya 30:27) Vaseɖe ɣemaɣi la, Yehowa nɔ adzɔge nɔ eƒe dukɔa ƒe futɔwo kpɔm wonɔ nusi dze wo ŋu wɔm. Fifia ete ɖe wo ŋu—abe ahom si le tutum gbɔna tẽ ene—be yeadrɔ̃ ʋɔnu wo. “Eƒe gbɔgbɔ le abe tɔɖɔɖɔ, si me woase ve le ene, ne wòanyè dukɔwo, vaseɖe esime woatsrɔ̃ avɔ, eye wòade numega dukɔwo ƒe nu me, si akplɔ wo atrae.” (Yesaya 30:28) “Tɔɖɔɖɔ” aƒo xlã Mawu ƒe amewo ƒe futɔwo, ‘woanyè’ wo sesĩe, eye woade “numega” woƒe nu me. Woatsrɔ̃ wo.

23. Nukae na Kristotɔwo ƒe ‘dzi kpɔa dzidzɔ’ egbea?

²³ Yesaya ƒe gbedasia gatrɔ ake esi wònɔ nu ƒom tso dzidzɔ si me tadeagula wɔnuteƒe siwo atrɔ gbɔ va woƒe anyigba dzi gbeɖeka la anɔ ŋu. “Miadzi ha abe le ŋkekenyuiɖuɣi ƒe zã me ene, eye miaƒe dzi akpɔ dzidzɔ abe amesiwo le dze kum le mɔ zɔm heyina ɖe Yehowa ƒe to la, ɖe Israel ƒe agakpe la gbɔ ene.” (Yesaya 30:29) Kristotɔ vavãwo ƒe ‘dzi kpɔa dzidzɔ’ ma tɔgbe egbea ne wobu Satana ƒe xexea ƒe ʋɔnudɔdrɔ̃; alesi Yehowa, “xɔname ƒe agakpe” la, kpɔa wo ta; kple Fiaɖuƒea ƒe yayra siwo ava ŋu.—Psalmo 95:1.

24, 25. Aleke Yesaya ƒe nyagblɔɖia te gbe ɖe edzii be ʋɔnudɔdrɔ̃ si ava Asiria dzi nye nu ŋutɔŋutɔ?

²⁴ Le dzidzɔnya sia gbɔgblɔ vɔ megbe la, Yesaya gatrɔ ɖe ʋɔnudrɔ̃nya la ŋu eye wògblɔ amesi dzi Mawu ƒe dziku ava. “Yehowa ana woase eƒe gãnyenye ƒe gbe, eye woakpɔ eƒe alɔ ƒe ɖiɖiɖeanyi le dɔmedzoe ƒe bublu, dzo binu ƒe aɖe, ahom, tsidzadza gãwo kple dzikpewo me. Elabena Yehowa ƒe gbe aɖe dzi le Asur ƒo, nenye be, etsɔ ati ƒoe.” (Yesaya 30:30, 31) Yesaya zã nya siwo me kɔ la tsɔ te gbe ɖe edzi be Mawu ƒe ʋɔnudɔdrɔ̃ Asiria nye nu ŋutɔŋutɔ si ava eme. Efia be Asiria tsi tre ɖe Mawu ŋkume hele ƒoƒom kpakpakpa esi wòkpɔ eƒe ʋɔnudɔdrɔ̃ ƒe “alɔ ƒe ɖiɖiɖeanyi.”

²⁵ Nyagblɔɖila la yi edzi be: “Zi geɖe alesi eƒe toheti, si wòɖo ɖe eŋu la, dze edzii la, zi geɖe ma ke asiʋuiwo kple kasaŋkuwo anɔ ɖiɖimi, eye wòawɔ aʋa kplii anɔ alɔnyènye dzi ɖaa. Elabena wodzra [Tofet, “NW”] ɖo ɖi xoxo, fiawo hãe wodzrae ɖo ɖi na, eye wògoglo hekeke; dzo kple nake li kpaŋkpaŋ hekpe ɖe eƒe nakekɔwo ŋu; Yehowa ƒe gbɔgbɔ enye aŋɔtɔʋu, si atɔ dzoe.” (Yesaya 30:32, 33) Wozã Tofet si nɔ Hinom Bali me la le afisia wònye kpɔɖeŋu ƒe teƒe si dzo metsina le o. Yesaya ɖee fia be afimae Asiriatɔwo ava yi, si te gbe ɖe edzi be tsɔtsrɔ̃ ɖikaa ava dukɔ ma dzi kpata.—Tsɔe sɔ kple Fiawo II, 23:10.

26. (a) Aleke nya siwo Yehowa gblɔ ɖe Asiria ŋu ku ɖe egbeŋkekea ŋui? (b) Aleke Kristotɔ siwo li egbea kpɔa mɔ na Yehowae?

²⁶ Togbɔ be Asiria ŋue wogblɔ ʋɔnudrɔ̃gbedasi sia ɖo hã la, Yesaya ƒe nyagblɔɖia yi ŋgɔ wu ema. (Romatɔwo 15:4) Yehowa agatso adzɔge ke ava le kpɔɖeŋumɔ nu, be wòana tɔ naɖɔ aɖe amesiwo katã tea eƒe amewo ɖe anyi, wòaʋuʋu wo, eye wòade ga nume na wo. (Xezekiel 38:18-23; Petro II, 3:7; Nyaɖeɖefia 19:11-21) Ŋkeke ma neva kaba! Gake fifia la, Kristotɔwo le mɔ kpɔm na woƒe ɖeɖeŋkekea vevie. Ŋugbledede le nya siwo me kɔ nyuie siwo le Yesaya ta 30 lia me ŋu doa ŋusẽ wo. Nya siawo dea dzi ƒo na Mawu subɔlawo be woade asixɔxɔ gbedodoɖa ƒe mɔnukpɔkpɔa ŋu, woado vevie Biblia sɔsrɔ̃, eye woade ŋugble le Fiaɖuƒea ƒe yayra siwo gbɔna ŋu. (Psalmo 42:2, 3; Lododowo 2:1-6; Romatɔwo 12:12) Eyata Yesaya ƒe nyawo kpena ɖe mí katã mía ŋu be míakpɔ mɔ na Yehowa.

[Etenuŋɔŋlɔwo]

[Nɔnɔmetata siwo le axa 305]

Le Mose ƒe ŋkekea me la, Israel-viwo si dzo le Egipte. Le Yesaya ƒe ŋkekea me la, Yudatɔwo trɔ yi Egipte ɖadi kpekpeɖeŋu

[Nɔnɔmetata si le axa 311]

“Tɔʋuwo anɔ tsi tsam le . . . togbɛ kɔkɔwo katã ta me”

[Nɔnɔmetata si le axa 312]

Yehowa ava le ‘eƒe dɔmedzoe si le bibim eye wòde dzi kɔtɔɔ’ la me