Ta Blaeve Vɔ Adelia
“Duametɔ Aɖeke Magblɔ be, Yele Dɔ Lém O”
1. Nukata Yesaya 33:24 me nyawo faa akɔ na ame?
“NUWƆWƆ blibo la katã le ŋeŋem, eye fu le eɖum vaseɖe fifi.” Nenemae apostolo Paulo gblɔ. (Romatɔwo 8:22) Togbɔ be wowɔ ŋgɔyiyi le atikewɔwɔ ŋuti nunya me hã la, dɔléle kple ku yi edzi le fu wɔm amegbetɔƒomea. Ekema aleke gbegbe ŋugbedodo si wotsɔ ƒo Yesaya ƒe nyagblɔɖia ƒe akpa sia tae la wɔ nukui enye si! Kpɔ ɣeyiɣi si me “duametɔ aɖeke magblɔ be, yele dɔ lém o” la ɖa le susu me. (Yesaya 33:24) Ɣekaɣie ŋugbedodo sia ava eme eye aleke wòava emee?
2, 3. (a) Mɔ ka nue Israel-dukɔa dze dɔ le? (b) Aleke wozã Asiria wònye Mawu ƒe ‘ameƒotii’?
2 Yesaya ŋlɔ eƒe agbalẽa le ɣeyiɣi si me Mawu ƒe dukɔ si wòbla nu kpli la dze dɔ le gbɔgbɔ me. (Yesaya 1:5, 6) Wonyrɔ wo ɖokui ɖe xɔsegbegbe kple agbegbegblẽnɔnɔ me ale gbegbe be eva hiã be Yehowa Mawu nahe to sesẽ aɖe na wo. Asiria ye nye “ameƒoti” si Yehowa zã tsɔ he to ma na wo. (Yesaya 7:17; 10:5, 15) Gbã, Asiriatɔwo xɔ Israel si nye dziehe to ewo fiaɖuƒe la le ƒe 740 D.M.Ŋ. me. (Fiawo II, 17:1-18; 18:9-11) Le ƒe ʋɛ aɖewo megbe la, Asiria Fia Sanxerib ho aʋa gã aɖe ɖe anyiehe Yuda fiaɖuƒea ŋu. (Fiawo II, 18:13; Yesaya 36:1) Esi Asiria-ʋakɔ sesẽa nɔ duwo xɔm le anyigba la katã dzi la, edze abe naneke mate ŋu axe mɔ na Yuda ƒe tsɔtsrɔ̃ gbidii o ene.
3 Gake fifia ya Asiria wɔ nu wògbɔ ŋusẽ si wonae be wòahe to na Mawu ƒe amewo la ŋu eye eya ŋutɔ tsɔ ŋukeklẽ nɔ didim be yeaɖu xexeame katã dzi. (Yesaya 10:7-11) Ðe Yehowa agbe tohehe nɛ ɖe alesi wòsẽ ŋuta le eƒe dukɔ ŋu la taa? Ðe dukɔa akpɔ hayahaya tso gbɔgbɔmedɔ si wòdze la mea? Alesi Yehowa ɖo biabia siawo ŋui la dze le Yesaya ta 33 lia me.
Nugblẽla la Gbegblẽ
4, 5. (a) Aleke nɔnɔmea atrɔ bubui na Asiria? (b) Gbe kae Yesaya do ɖa ɖe Yehowa ƒe amewo ta?
4 Nyagblɔɖia dze egɔme be: “Baba na wò nugblẽla, si womegblẽna o, wò adzoblasu, si womedaa adzoe o! Ne èwu nugbegblẽ nu la, woagblẽ wò hã, eye ne èda adzo vɔ la, woada adzo wò hã!” (Yesaya 33:1) Yesaya ƒo nu na Asiria si nye nugblẽla la tẽ. Esi dukɔ sesẽnuxɔla ma ƒe ŋusẽ ɖo eƒe kɔkɔƒe la, edze abe ɖe womate ŋu aɖu edzi o ene. ‘Egblẽ nu, evɔ womegblẽ eya ŋutɔ o,’ eye egblẽ Yuda-duwo helɔ Yehowa ƒe aƒeme kesinɔnuwo gɔ̃ hã—eye edze abe maxɔ tohehe aɖeke ɖe nusiawo ta o ene! (Fiawo II, 18:14-16; Kronika II, 28:21) Gake fifia nɔnɔmea ava trɔ bubui. Yesaya gblɔe kalẽtɔe be: “Woagblẽ wò hã.” Aleke gbegbe nyagblɔɖi sia fa akɔ na nuteƒewɔlawoe nye si!
5 Le ɣeyiɣi dziŋɔ ma me la, ahiã be Yehowa subɔla wɔnuteƒewo natrɔ ɖe eŋu adi kpekpeɖeŋu. Eyata Yesaya do gbe ɖa be: “Yehowa, ve mía nu, asiwònu kpɔm míele! Nye míaƒe [ŋusẽ kple kpekpeɖeŋu ƒe] alɔ ŋdi sia ŋdi kple míaƒe xɔname le hiãɣi! Dukɔwo si le gbeɖeɖe nu, eye anyigba dzi dukɔwo ka hlẽ le wò tsitretsitsi nu.” (Yesaya 33:2, 3) Esɔ be Yesaya do gbe ɖa be Yehowa naɖe Eƒe dukɔa abe alesi Wòwɔe zi geɖe le ɣeyiɣi siwo va yi me ene. (Psalmo 44:4; 68:2) Eye esi Yesaya do gbe sia ɖa vɔ teti la, egblɔ alesi Yehowa aɖo eŋui ɖi enumake!
6. Nukae adzɔ ɖe Asiria dzi, eye nukata wòsɔ nenema?
6 “Eye woaƒo [mi Asiriatɔwo] miaƒe nuhahawo nu ƒu, abe alesi woƒoa ʋetsuviwo nu ƒu ene, eye woaƒu du ɖe wo ŋu, abe alesi abɔ tia kpoe ene.” (Yesaya 33:4) Yudatɔwo nya nu tso alesi nudzodzoe gblẽnuwo dzea anyigbawo dzii ŋu nyuie. Gake fifia ya la, Yuda ƒe futɔwoe woagblẽ. Woaɖu Asiria dzi atsɔ ado ŋukpee, eye woazi eƒe asrafowo dzi woasi agblẽ aboyonu gbogbo aɖewo ɖi Yudatɔwo nalɔ! Ðeko wòsɔ nyuie be woaha Asiria si wonya ɖe eƒe ŋutasesẽ ta.—Yesaya 37:36.
Egbeŋkekea me Asiriatɔwo
7. (a) Amekae woate ŋu atsɔ sɔ kple Israel-dukɔ si dze dɔ le gbɔgbɔ me la egbea? (b) Amekawoe anye Yehowa ƒe “ameƒoti” si wòatsɔ atsrɔ̃ Kristodukɔae?
7 Aleke Yesaya ƒe nyagblɔɖia ku ɖe míaƒe ŋkekea ŋui? Míate ŋu atsɔ Israel-dukɔ si dze dɔ le gbɔgbɔ me la asɔ kple Kristodukɔ mawɔnuteƒe la. Abe alesi Yehowa zã Asiria wònye “ameƒoti” si wòtsɔ he toe na Israel ene la, nenema ke wòazã “ameƒoti” aɖe atsɔ ahe toe na Kristodukɔa—tsɔ kpe ɖe ‘Babilon Gã’ si nye alakpasubɔsubɔ ƒe xexemefiaɖuƒea ƒe akpa susɔea ŋu. (Yesaya 10:5; Nyaɖeɖefia 18:2-8) “Ameƒoti” ma anye dukɔ siwo le Dukɔ Ƒoƒuawo me—habɔbɔ si woɖɔ le Nyaɖeɖefia me be enye lã wɔadã dzẽ si ta adre kple dzo ewo li nɛ la.—Nyaɖeɖefia 17:3, 15-17.
8. (a) Amekae woate ŋu atsɔ asɔ kple Sanxerib egbea? (b) Amekawo dzie dzi aɖo egbeŋkekea me Sanxerib ƒo be yeadze, eye nukae ado tso eme?
8 Ne egbeŋkekea me Asiriatɔwo te nugbegblẽ le alakpasubɔsubɔ ƒe nɔƒewo katã la, adze abe ɖe womate ŋu atɔ tee o ene. Dzi aɖo Satana Abosam ƒo abe alesi wònɔ le Sanxerib gome ene be wòadze ame dzi—menye xɔsegbelawo ƒe habɔbɔ siwo dze na tohehe ŋu koe wòaho ɖo o ke ɖe Kristotɔ vavãwo hã ŋu. Yehowa ƒe gbɔgbɔmevi siwo wosi ami na kpakple ame miliɔn geɖe siwo do tso Satana ƒe xexeame, si me Babilon Gã la hã le, la va le Yehowa ƒe Fiaɖuƒea ƒe akpa dzi. Esi Satana si nye “xexe sia me mawu” la do dziku le esi Kristotɔ vavãwo metsɔ bubu nɛ o ta la, aho aʋa gã aɖe ɖe wo ŋu. (Korintotɔwo II, 4:4; Xezekiel 38:10-16) Togbɔ be amedzidzedze sia adzi ŋɔ ɖikekemanɔŋutɔe hã la, mele be Yehowa ƒe amewo nana dzidzi naƒo wo o. (Yesaya 10:24, 25) Mawu na kakaɖedzi wo be yeanye woƒe “xɔname le hiãɣi!” Ade asi nyaa me eye wòatsrɔ̃ Satana kple eƒe amehawo. (Xezekiel 38:18-23) Abe alesi wònɔ le blema ene la, woagblẽ amesiwo le agbagba dzem be yewoagblẽ Mawu ƒe amewo la! (Tsɔe sɔ kple Lododowo 13:22b.) Woakɔ Yehowa ƒe ŋkɔ ŋu, eye woaɖo eteƒe na agbetsilawo elabena wodi “nunya kple sidzedze [kple] Yehowa-vɔvɔ̃.”—Xlẽ Yesaya 33:5, 6.
Nuxlɔ̃ame na Xɔsemanɔsitɔwo
9. (a) Nukae Yuda “kalẽtɔwo” kple “du nyui xɔlawo” awɔ? (b) Aleke Asiriatɔwo awɔ nu ɖe agbagba si Yuda adze ɖe ŋutifafa ŋu la ŋui?
9 Gake nukae adzɔ ɖe xɔsemanɔsitɔ siwo le Yuda dzi? Yesaya gblɔ dzɔgbevɔ̃e si ku ɖe alesi Asiria atsrɔ̃ woe ŋu. (Xlẽ Yesaya 33:7.) Yuda ƒe asrafo “kalẽtɔwo” le avi fam le vɔvɔ̃ ta esi Asiriatɔwo nɔ wo gogom. Woɖu fewu le “du nyui xɔlawo,” amesiwo wodɔ be woava wɔ ŋutifafa ƒe ɖoɖo kple Asiriatɔwo la ŋu eye wodo vlo wo. Woafa avi hehehe ɖe woƒe kpododonu ta. (Tsɔe sɔ kple Yeremya 8:15.) Asiriatɔ ŋutasẽlawo makpɔ nublanui na wo o. (Xlẽ Yesaya 33:8, 9.) Woatsɔ ŋutasesẽ aŋe aɖaba aƒu ɖoɖo siwo wowɔ kple Yudatɔwo la dzi. (Fiawo II, 18:14-16) Asiriatɔwo ‘aɖi gbɔ Yuda-duwo,’ eye wòado vlo wo ahaɖu fewu le wo ŋu, eye amegbetɔ ƒe agbe maɖi naneke nɛ o. Nɔnɔmea asesẽ ale gbegbe be anyigba la ŋutɔ axa nu, le kpɔɖeŋumɔ nu. Libanon, Saron, Basan, kple Karmel axa nu ɖe woƒe aƒedozuzu ta.
10. (a) Aleke Kristodukɔa ƒe “kalẽtɔwo” ado kpo nui? (b) Amekae akpɔ Kristotɔ vavãwo ta le Kristodukɔa ƒe xaxaɣia?
10 Ðikeke mele eme o be nɔnɔme siawo tɔgbe ado mo ɖa le etsɔme kpuie ne dukɔwo ho aʋa ɖe mawusubɔsubɔ ŋu. Abe alesi wònɔ le Xizkiya ƒe ŋkekea me ene la, agbagba si woa ŋutɔwo adze be yewoanɔ te ɖe aʋakɔ gblẽnu siawo nu la azu dzodzro. Kristodukɔa ƒe “kalẽtɔwo”—eƒe dunyahelawo, gaŋutiɖoɖowɔlawo, kple ame ŋkuta bubuwo—mate ŋu axɔ nɛ o. Womawɔ ɖe dunyahehe kple ganya ƒe “nubabla,” alo ɖoɖo siwo Kristodukɔa wɔ hena eya ŋutɔ ƒe nyonyo la dzi o. (Yesaya 28:15-18) Agbagba si woadze vevie be yewoato dukɔwo dome nyagbɔkpɔkpɔ dzi axe mɔ na tsɔtsrɔ̃ la ado kpo nu. Asitsadɔwo atɔ te ne woɖo asi Kristodukɔa ƒe nunɔamesiwo kple gadɔwo dzi alo gblẽ wo dome. Ne ame aɖe ganye Kristodukɔa dzidela hã la, nusi wòate ŋu awɔ koe nye be wòanɔ adzɔge ke anɔ konyi fam ɖe alesi enu va yii la ta. (Nyaɖeɖefia 18:9-19) Ðe woatsrɔ̃ Kristotɔnyenye vavãtɔ akpe ɖe alakpa tɔwo ŋua? Ao, elabena Yehowa ŋutɔ na kakaɖedzi sia be: “Yehowa be: Azɔ matso, azɔ matsi tre, azɔ matso ɖe afɔ dzi.” (Yesaya 33:10) Mlɔeba la, Yehowa ade asi nyaa me axɔ na nuteƒewɔlawo, abe Xizkiya ene, eye wòaɖo asi Asiriatɔ siwo le du dzi gbɔna la dzi.—Psalmo 12:6.
11, 12. (a) Ɣekaɣie Yesaya 33:11-14 me nyawo va eme eye aleke wòva emee? (b) Nuxlɔ̃ame kae Yehowa ƒe nyawo nye egbea?
11 Nuteƒemawɔlawo mate ŋu akpɔ mɔ be woakpɔ yewo ta alea o. Yehowa gblɔ be: “Miefɔ gbe ƒuƒu ƒe fu, eye ahɔ̃liti takpoe miadzi; miaƒe gbɔgbɔ enye dzo, si afiã mi. Woamè dukɔwo abe akalo ene, eye woatɔ dzo wo abe aŋɔka ene. Mi didiƒewo, mise nusi mewɔ, mi kpuiƒewo, midze si nye kalẽwɔwɔ! Dzidzi ƒo nuvɔ̃wɔlawo le Zion, ame vɔ̃ɖiwo ƒe lãme ble fu: Mía dometɔ ka anɔ dzo binu gbɔ, eye mía dometɔ ka anɔ dzoxɔxɔ mavɔ gbɔ?” (Yesaya 33:11-14) Edze ƒã be ɣeyiɣi si me Yuda adze ŋgɔ futɔ bubu, si nye Babilon, ŋue nya siawo ku ɖo. Le Xizkiya ƒe ku megbe la, Yuda gatrɔ ɖe eƒe mɔ vɔ̃wo ŋu. Le ƒe bla nane siwo kplɔe ɖo me la, nuwo gblẽ le Yuda ale gbegbe be eva hiã be Mawu ƒe dɔmedzoe nabi ɖe dukɔ bliboa ŋu.—Mose V, 32:22.
12 Ðoɖo kple aɖaŋu vɔ̃ɖi siwo tosẽlawo to vɛ be yewoatsɔ asi le Mawu ƒe ʋɔnudɔdrɔ̃ nu la zu nu dzodzro abe gbe ƒuƒu ene. Le nyateƒe me la, dukɔa ƒe dada kple aglãdzedze ƒe nɔnɔme ava he nudzɔdzɔ siwo akplɔ wo ade tsɔtsrɔ̃ me mlɔeba la vɛ. (Yeremya 52:3-11) Ame vɔ̃ɖiwo ‘azu abe akalo meme ene’—woatsrɔ̃ wo gbidii! Esi Yudatɔ dzeaglãawo nɔ tsɔtsrɔ̃ si gbɔna ŋu bum la, ŋɔdzi gã aɖe lé wo. Nya siwo Yehowa gblɔ na Yuda mawɔnuteƒe la ɖe nɔnɔme si me Kristodukɔa me tɔwo le egbea fia. Ne womewɔ ɖe Mawu ƒe nuxlɔ̃amea dzi o la, ke etsɔme dziŋɔ aɖe le wo lalam.
“Amesi ƒe Zɔzɔme To Mɔ Ðeka”
13. Ŋugbe kae wodo na amesi ƒe “zɔzɔme to mɔ ɖeka,” eye aleke wòva eme le Yeremya gomee?
13 Azɔ Yehowa gblɔ nya si to vovo be: “Amesi ƒe zɔzɔme to mɔ ɖeka, eye eƒe nuƒoƒo le eme, amesi tsri ŋutasesẽ tsɔtsɔ kpɔ viɖee, amesi ʋuʋu eƒe asi, be magaxɔ zãnunana o, amesi xe eƒe towo, be magase hlɔ̃dodo o, amesi miã eƒe ŋkuwo, be womagakpɔ vɔ̃ɖiwɔwɔ o la, eyae anɔ kɔkɔƒewo, mɔ̃ sesẽ, siwo le agakpewo dzi la, anye eƒe bebeƒe, woana aboloe, eye eƒe tsi mamie o.” (Yesaya 33:15, 16) Abe alesi apostolo Petro gblɔe emegbe ene la, “[Yehowa, NW] nya alesi wòaɖe mawumemewo atso tetekpɔwo me, eye wòadzra ame madzɔmadzɔwo ɖo hena ʋɔnudrɔ̃gbe, bene woatu fe vɔ̃ na wo.” (Petro II, 2:9) Yeremya kpɔ ɖeɖe sia tɔgbe teƒe. Esime Babilontɔwo va ɖe to ɖe wo la, eva hiã be amewo ‘natsɔ vɔvɔ̃ aɖu abolo ɖe dada nu.’ (Xezekiel 4:16) Nyɔnu aɖewo ɖu woa ŋutɔwo ƒe viwo gɔ̃ hã. (Konyifahawo 2:20) Ke hã Yehowa kpɔ egbɔ be wokpɔ Yeremya ta wònɔ dedie.
14. Aleke Kristotɔ siwo li egbea ate ŋu ayi edzi ana ‘woƒe zɔzɔme nato mɔ ɖeka’?
14 Ele be Kristotɔ siwo li egbea hã ƒe ‘zɔzɔme nato mɔ ɖeka,’ eye woanɔ agbe ɖe Yehowa ƒe dzidzenuwo nu gbesiagbe. (Psalmo 15:1-5) Ele be woagblɔ ‘nya dzɔdzɔe’ eye woatsri aʋatsokaka kple nya siwo menye nyateƒe o la gbɔgblɔ. (Lododowo 3:32) Ametafatafa kple zãnuxɔxɔ abɔ ɖe dukɔ geɖe me ya, gake wonye ŋunyɔnu na amesi ƒe “zɔzɔme to mɔ ɖeka.” Ele be “dzitsinya nyui” nanɔ Kristotɔwo si le dɔwɔnyawo me, eye woadze agbagba vevie atsri dɔwɔɖoɖo siwo ŋu nya ku ɖo alo esiwo me amebaba le. (Hebritɔwo 13:18; Timoteo I, 6:9, 10) Eye amesi ‘xe eƒe towo be magase hlɔ̃dodo o eye wòmiã eƒe ŋkuwo be magakpɔ vɔ̃ɖiwɔwɔ o’ la awɔ tiatia le ha siwo wòsena kple modzaka si wòɖena me. (Psalmo 119:37) Le Yehowa ƒe ʋɔnudrɔ̃ŋkekea dzi la, akpɔ esubɔla siwo nɔa agbe ɖe dzidzenu siawo nu la ta ahalé wo ɖe te.—Zefanya 2:3.
Woƒe Fia la Kpɔkpɔ
15. Ŋugbedodo kae alé Yudatɔ aboyome wɔnuteƒewo ɖe te?
15 Azɔ Yesaya ƒo nu tso etsɔme nɔnɔme dodzidzɔname sia ŋu be: “Wò ŋkuwo akpɔ fia la le eƒe atsyɔ̃ me, àkpɔ anyigba keke la, eye wò dzi abu ŋɔdziɣi la ŋu bena: Afika agbalẽŋlɔla le, afika nudala le, eye afika amesi xlẽ xɔ tsralawo la le? Màgakpɔ dukɔ nyanyrã azɔ o, dukɔ, si ƒe gbegbɔgblɔ sesẽ, eye womate ŋu ase eme o, woƒe aɖe kɔkɔna, eye gɔmesese aɖeke mele eŋu o.” (Yesaya 33:17-19) Mesia Fia la kple eƒe Fiaɖuƒe si ava le etsɔme ŋuti ŋugbedodo alé Yudatɔ nuteƒewɔlawo ɖe te le ƒe gbogbo siwo woatsɔ nɔ aboyo me le Babilon la me, togbɔ be ɖeko woate ŋu akpɔ Fiaɖuƒe ma le adzɔge ʋĩ ke hã. (Hebritɔwo 11:13) Ne Mesia ƒe dziɖuɖua va eme ŋutɔŋutɔ la, Babilontɔwo ƒe ameteteɖeanyia azu blemanya. Amesiwo tsi agbe le Asiriatɔwo ƒe amedzidzedzea me atsɔ dzidzɔ abia be: “Afikae amegã siwo xɔ adzɔ le mía si, wodo fe na mí, eye woka ga na mí be míaxe la le?”—Yesaya 33:18, Moffatt.
16. Tso ɣekaɣie Mawu ƒe amewo te ŋu ‘kpɔ’ Mesia Fia la, eye nukae do tso eme?
16 Togbɔ be Yesaya ƒe nyawo gblɔe kakaɖedzitɔe be woaɖe wo tso Babilon ƒe aboyo me agaɖo wo te hã la, ne wofɔ Yudatɔ aboyomeawo ɖe tsitre hafi woate ŋu akpɔ nyagblɔɖia ƒe akpa sia me vava teƒe bliboe. Ke Mawu subɔla siwo li egbea ya ɖe? Tso ƒe 1914 me la, Yehowa ƒe amewo te ŋu ‘kpɔ,’ alo de dzesi, Mesia Fia, Yesu Kristo, si woɖo atsyɔ̃ geɖe na le gbɔgbɔ me la. (Psalmo 45:3; 118:22-26) Esia na wokpɔ ɖeɖe tso Satana ƒe nuɖoanyi vɔ̃ɖia ƒe ameteteɖeanyi kple ŋusẽkpɔɖeamedzi me. Wole gbɔgbɔmededienɔnɔ me le Zion si nye Mawu ƒe Fiaɖuƒea ƒe nɔƒe la te.
17. (a) Ŋugbe kawoe wodo le Zion ŋu? (b) Aleke ŋugbe siwo Yehowa do le Zion ŋu va eme ɖe Mesia Fiaɖuƒea kple edzidela siwo le anyigba dzi la dzii?
17 Yesaya yi edzi be: “Kpɔ Zion, du, si nye míaƒe takpeƒe la ɖa! Wò ŋkuwo akpɔ Yerusalem, nɔƒe dedie la, agbadɔ, si womakaka o, eƒe tsyotiwo maho o, eye eƒe kawo katã matso akpɔ o. Ke boŋ Yehowa enye ŋusẽ na mí le afima, abe tɔsisi gã keke le goawo kple eve me ene, esi dzi atablukulawo mato o, eye ʋu gãwo mazɔ o.” (Yesaya 33:20, 21) Yesaya na kakaɖedzi mí be womate ŋu aho Mawu ƒe Mesia Fiaɖuƒea alo atsrɔ̃e o. Tsɔ kpe ɖe eŋu la, edze ƒã be woakpɔ Fiaɖuƒea dzi dela nuteƒewɔla siwo le anyigba dzi egbea hã ta nenema ke. Ne wodo Mawu Fiaɖuƒea tevi geɖe kpɔ vevie gɔ̃ hã la, woate ŋu aka ɖe edzi be agbagba ɖesiaɖe si woadze be woatsrɔ̃ yewoƒe ha bliboa ɖa la mate ŋu adze edzi o. (Yesaya 54:17) Yehowa akpɔ eƒe amewo ta abe alesi ʋe gã si me tsi yɔ alo tsitoƒe kpɔa du tae ene. Futɔ ɖesiaɖe si atso ɖe wo ŋu—ne wogasesẽ abe “atablukulawo” alo “ʋu gãwo” ene hã la—atsrɔ̃!
18. Agbanɔamedzi kae Yehowa xɔ?
18 Gake nukata Mawu ƒe Fiaɖuƒea lɔ̃lawo ate ŋu aka ɖe edzi nenema gbegbe be Mawu akpɔ yewo ta? Yesaya ɖe eme be: “Yehowa enye míaƒe ʋɔnudrɔ̃la, Yehowa enye míaƒe aʋafia, Yehowa enye míaƒe fia, eya aɖe mí.” (Yesaya 33:22) Yehowa xɔ agbanɔamedzia be yeakpɔ yeƒe ame siwo lɔ̃ ɖe yeƒe ɖoƒe si nye Fiagã Nuwokatãtaƒola dzi la ta ahafia mɔ wo. Amesiawo bɔbɔa wo ɖokui faa ɖe eƒe dziɖuɖu si to Mesia Fia dzi la te eye wode dzesii be menye ɖeko ŋusẽ le Yehowa si be wòade sewo ko o ke ete ŋu kpɔa egbɔ be wowɔ ɖe wo dzi hã. Gake esi Yehowa lɔ̃a dzɔdzɔenyenye kple ʋɔnu dzɔdzɔe dɔdrɔ̃ ta la, eƒe dziɖuɖu to Via dzi menye agba na esubɔlawo o. Ðe ‘wòɖea vi na wo’ boŋ ne wobɔbɔ wo ɖokui ɖe eƒe ŋusẽ te. (Yesaya 48:17) Magblẽ eƒe nuteƒewɔlawo ɖi akpɔ o.—Psalmo 37:28.
19. Aleke Yesaya ƒo nu tso alesi Yehowa ƒe nuteƒewɔlawo ƒe futɔwo ado kpo nui ŋu?
19 Yesaya gblɔ na Yehowa ƒe ame wɔnuteƒewo ƒe futɔwo be: “Wò atagbiwo me do agblɔ, womedzi abalati la goŋgoŋ o, eye womehe abala me o. Emegbe woamã aboyonu kple nuhaha; xɔdrɔ̃wo ke hã aha nu.” (Yesaya 33:23) Futɔ ɖesiaɖe si atso ɖe Yehowa ŋu ado kpo nu eye makpɔ xɔnametɔ o abe aʋawɔʋu si ƒe atagbiwo me do agblɔ, eƒe abalatiwo mesẽ o, eye womehe eƒe abala me o ene. Mawu ƒe futɔwo tsɔtsrɔ̃ ana aboyonuwo nabɔ ale gbegbe be nuwɔametɔwo gɔ̃ hã aha nu. Eyata míate ŋu aka ɖe edzi be Yehowa ato Fia Yesu Kristo dzi aɖu eƒe futɔwo dzi le “xaxa gã” si gbɔna la me.—Nyaɖeɖefia 7:14.
Dɔdada Aɖe
20. Dɔ ka ƒomevie woada na Mawu ƒe dukɔa, eye ɣekaɣie?
20 Wotsɔ ŋugbedodo dodzidzɔname aɖe ƒo Yesaya ƒe nyagblɔɖia ƒe akpa sia tae be: “Duametɔ aɖeke magblɔ be, yele dɔ lém o; wotsɔ vodada ke amesiwo le eme.” (Yesaya 33:24) Dɔléle si ŋu Yesaya ƒo nu tsoe la nye gbɔgbɔ me tɔ koŋ, elabena edo ƒome kple nuvɔ̃, alo “vodada.” Nu gbãtɔ si ŋu nya siawo ku ɖoe nye be Yehowa do ŋugbe be le dukɔa ƒe ablɔɖekpɔkpɔ tso Babilon ƒe aboyo me megbe la, woayɔ dɔ wo le gbɔgbɔ me. (Yesaya 35:5, 6; Yeremya 33:6; tsɔe sɔ kple Psalmo 103:1-5.) Ne wotsɔ Yudatɔ siwo trɔ gbɔ ƒe tsã nuvɔ̃wo ke wo la, woate ŋu agbugbɔ tadedeagu dzadzɛ aɖo anyi le Yerusalem.
21. Mɔ kawo nue woda dɔ na Yehowa subɔla siwo li egbea le gbɔgbɔ me le?
21 Gake Yesaya ƒe nyagblɔɖia gava eme le míaƒe ɣeyiɣia me hã. Woda dɔ na Yehowa ƒe ame siwo li egbea hã le gbɔgbɔ me. Wona ablɔɖe wo tso alakpanufiafiawo abe luʋɔ makumaku, Mawuɖekaetɔ̃, kple dzomavɔ ene me. Wonaa agbenyuinɔnɔ ŋuti mɔfiafia wo, si na woƒoa asa na agbegbegblẽnɔnɔ nuwɔnawo eye wòkpena ɖe wo ŋu be woawɔ nyametsotso nyuiwo. Yesu Kristo ƒe tafevɔsa la na be tenɔnɔ nyui le wo si le Mawu ŋkume eye dzitsinya nyui hã le wo si. (Kolosetɔwo 1:13, 14; Petro I, 2:24; Yohanes I, 4:10) Gbɔgbɔmedɔdada sia ɖea vi le ŋutilã me hã. Le kpɔɖeŋu me, ne Kristotɔwo ƒo asa na gbɔdɔdɔ ƒe agbegbegblẽnɔnɔ kple atama zazã la, ekpɔa wo ta tso dɔléle siwo woxɔna tsoa gbɔdɔdɔ me kple kansa ƒomevi aɖewo si me.—Korintotɔwo I, 6:18; Korintotɔwo II, 7:1.
22, 23. (a) Aleke Yesaya 33:24 ava eme le mɔ si lolo wu nu le etsɔmee? (b) Nukae nye tadeagula vavã siwo li egbea ƒe tameɖoɖo kplikpaa?
22 Tsɔ kpe ɖe eŋu la, Yesaya 33:24 me nyawo ava eme le mɔ si lolo wu nu le Harmagedon megbe, le Mawu ƒe xexe yeyea me. Le Mesia Fiaɖuƒea ƒe dziɖuɖu te la, ŋutilã me dɔdada gã aɖe ayi edzi na amegbetɔwo tsɔ kpe ɖe woƒe gbɔgbɔmedɔdadaa ŋu. (Nyaɖeɖefia 21:3, 4) Ne wotsrɔ̃ Satana ƒe nuɖoanyia vɔ megbe teti la, ɖikeke mele eme o be nukunu siwo anɔ abe esiwo Yesu wɔ esime wònɔ anyigba dzi ene la ayi edzi le xexeame katã. Ŋkuagbãtɔwo akpɔ nu, tokunɔwo ase nu, eye lãmetututɔwo azɔ azɔli! (Yesaya 35:5, 6) Esia ana be amesiwo katã tsi agbe le xaxa gã la me nate ŋu akpɔ gome le dɔ gã si nye anyigba la wɔwɔ wòazu paradiso me.
23 Emegbe ne tsitretsitsia dze egɔme la, ɖikeke mele eme o be amesiwo woagbɔ agbee la anɔ lãmesẽ me. Gake ne wole tafevɔsa la ƒe viɖewo ŋudɔ wɔm ɖe edzi vivivi la, aɖe vi geɖe le ŋutilã me, vaseɖe esime ameƒomea naɖo blibodede gbɔ. Ekema ame dzɔdzɔewo ‘agbɔ agbe’ le gɔmesese deblibo nu. (Nyaɖeɖefia 20:5, 6) Ɣemaɣi la, “duametɔ aɖeke magblɔ be, yele dɔ lém o,” le gbɔgbɔ me kple ŋutilã me siaa. Ŋugbedodo dodzidzɔname ka gbegbee nye si! Neva me be tadeagula vavãwo katã naɖoe kplikpaa be yewoanɔ amesiwo akpɔ emevava teƒe la dome!
[Nɔnɔmetata si le axa 344]
Yesaya tsɔ kakaɖedzi do gbe ɖa na Yehowa
[Nɔnɔmetata siwo le axa 353]
Dzidzɔtɔe la, tafevɔsa la na be tenɔnɔ dzadzɛ le Yehowa ƒe amewo si le eŋkume
[Nɔnɔmetata si le axa 354]
Ŋutilãmedɔdada gã aɖe ayi edzi le xexe yeyea me