16, 17. Nukae Edom ava zu, eye ɣeyiɣi didi kae wòanɔ nɔnɔme sia me ase ɖo?

¹⁶ Yesaya ƒe nyagblɔɖia yi edzi gblɔ ɖi be lã wɔadãwo ava xɔ ɖe amegbetɔ siwo le Edom la teƒe, eye esia fia aƒedozuzu si gbɔna: “Atsi anyi gbegbee tso dzidzime yi dzidzime, eye ame aɖeke mato edzi akpɔ o tegbee. Aluge kple hlɔ̃made anɔ edzi, eye adzexe kple akpaviã atso aƒe ɖe edzi; ada dzidzeka ɖe edzi, be wòazu gbegbe kple nudakpe ɖe edzi, be wòazu aƒedo. Eƒe bubumewo maganɔ afima atsɔ fiaɖuƒe la anɔ boblo dome o, eye eƒe amegãwo katã nu atso. Aŋɔka amie ɖe eƒe fiasãwo me kple dzawo kpakple ŋuwo ɖe eƒe mɔ̃ sesẽwo me, eye wòazu aƒe na amegãxiwo kple kpɔtɔtɔ na goloviwo. Gbedzilãwo kple amegãxiwo ado go le afima, azizãwo ayɔ wo nɔewo le afima, eye gbetsiwo adzudzɔ le afima, agbɔ ɖe eme bɔkɔɔ. Dakpui awɔ atɔ ɖe afima, aɖa azi.”—Yesaya 34:10b-15.a

¹⁷ Ẽ, Edom azu anyigba ƒuƒlu. Azu aƒedo eye lã wɔadãwo, xeviwo, kple dawo koe anɔ afima. Abe alesi kpukpui 10 lia gblɔe ene la, anyigba la ayi edzi anye gbegbe “tegbee.” Amewo magava nɔ edzi akpɔ o.—Obadya 18.