Kutsetsewo—Nyuia Kple Kbegblẽa
“Yehowa na mekpɔ gbotsetse kusi eve, . . . Gbotsetse nyui, siwo le abe gbotsetse ŋgɔgbeawo ene la, le kusi ɖeka me, eye gbotsetse gbegblẽwo le kusi evelia me, esiwo gblẽ, ale be womele ɖuɖu me o.”—YEREMYA 24:1, 2.
1. Aleke Yehowa kpɔ nublanuii na eƒe dukɔ Israel, gake aleke wowɔ nu ɖe eŋui?
ƑE 617 D.M.Ŋ. mee. Ƒe ewo pɛ koe susɔ ɣemaɣi hafi Yehowa nahe ʋɔnudɔdrɔ̃ si dze na Yerusalem kple emenɔlawo la ava wo dzi. Yeremya nɔ gbeƒã ɖem ŋusẽtɔe xoxo ƒe 30 sɔŋ enye ema. Ðo to nàse alesi Ezra ɖɔ alesi nuwo nɔ ɣemaɣi nyuie la abe alesi wòle Kronika II, 36:15 mee ene: “Yehowa, wo fofowo ƒe Mawu la, ɖo eƒe dɔlawo ɖe wo enuenu, elabena Yehowa kpɔ eƒe dukɔ kple eƒe nɔƒe la ta.” Nukae do tso agbagbadzedze siawo katã me? Ewɔ nublanui be Ezra gblɔ yi edzi le kpukpui 16 lia me be: “Ke woɖe alɔme le Mawu ƒe ame dɔdɔawo ŋu, wodo vlo eƒe nyawo, eye woɖu fewu le eƒe nyagblɔɖilawo ŋu, vaseɖe esime Yehowa do dɔmedzoe ɖe eƒe dukɔ ŋu ɖe edzi, eye womete ŋu lé enu o.”
2, 3. Ƒo nu tso ŋutega ʋãme si Yehowa ɖe fia Yeremya ŋu.
2 Ðe esia fia be woatsrɔ̃ Yuda-dukɔa ɖa gbidigbidia? Be míaɖo nya ma ŋu la, mina míakpɔ ŋutega vevi aɖe si woɖe fia Yeremya ɣemaɣi si ŋu woŋlɔ nu tsoe ɖe agbalẽ si wotsɔ eƒe ŋkɔ na la ƒe ta 24 me la ɖa. Mawu zã gbotsetse kusi eve le ŋutega sia me tsɔ wɔ kpɔɖeŋui na nusiwo nɔ dzɔdzɔm le eƒe dukɔ si wòbla nu kplii la me. Woatsɔ kutsetse ƒomevi eve siwo to vovo na wo nɔewo keŋkeŋ la awɔ esia ƒe kpɔɖeŋui; woawoe nye nyuia kple gbegblẽa.
3 Yeremya ta 24 kpukpui 1 kple 2 ɖɔ nusi Mawu ƒe nyagblɔɖila la kpɔ: “Esi Babel-fia Nebukadnezar ɖe aboyo Yuda-fia Yexonya, Yoyakim vi, kple Yuda-amegãwo, atikpalawo kple gbedewo tso Yerusalem yi Babel megbe la, Yehowa na mekpɔ gbotsetse kusi eve, si wotsɔ da ɖe Yehowa ƒe gbedoxɔ nu. Gbotsetse nyui, siwo le abe gbotsetse ŋgɔgbeawo ene la, le kusi ɖeka me, eye gbotsetse gbegblẽwo le kusi evelia me, esiwo gblẽ, ale be mele ɖuɖu me o.”
Ŋutega me Gbotsetse Nyuiawo
4. Gbedasi fakɔname kae nɔ gbotsetsewo ŋuti ŋutega la me na Israel-vi nuteƒewɔlawo?
4 Esi Yehowa bia Yeremya be nukae wòkpɔ hã vɔ megbe la, eyi edzi gblɔ nɛ le kpukpui 5 vaseɖe 7 me be: “Ale Yehowa, Israel ƒe Mawu la, gblɔ esi: Mekpɔ nyuie ɖe Yuda ƒe aboyome, siwo menyã tso teƒe sia ɖo ɖe Kaldea-nyigba dzi la ŋu, abe gbotsetse nyui siawo ene. Matsɔ nye ŋku aɖo wo ŋu hena nyuiwɔwɔ, eye mana woatrɔ agbɔ ava anyigba sia dzi, matu wo, eye nyemagbã wo o, mado wo, eye nyemaho wo o. Mana dzi wo, ne woatsɔ adze sim be, nyee nye Yehowa; woanye dukɔ nam, eye manye Mawu na wo, nenye be wotrɔ ɖe ŋunye tso woƒe dzi blibo me.”
5, 6. (a) Aleke woɖo Israeltɔ aɖewo ɖe Kaldea ‘ɖe nyui dzii’? (b) Aleke Yehowa ‘tsɔ eƒe ŋku ɖo’ Israel-vi nuteƒewɔlawo ‘ŋu hena nyuiwɔwɔ’ le aboyo mee?
5 Eyata ewɔ abe ɖe Yehowa le gbɔgblɔm le afisia be ɣeyiɣi nyuiwo le ŋgɔgbe gbɔna eye womatsrɔ̃ Yuda-dukɔa ɖa gbidii o ene. Gake gɔmesese kae le gbotsetse nyui kusi sia ŋu?
6 Ɣleti etɔ̃ kple ŋkeke ewo pɛ koe Yexonya, alo Yoyakin, ɖu fia ɖe Yuda dzi hafi lɔ̃ be yeatsɔ Yerusalem ade asi na Fia Nebukadnezar. Amesiwo wokplɔ yi aboyo mee kpe ɖe eŋu dometɔ aɖewoe nye Daniel kple eƒe zɔhɛ Hebri-vi etɔ̃ siwo nye Xananya, Misael, kple Azarya hekpe ɖe Xezekiel ŋu. Babilon-fia kpɔ woƒe agbe ta, eyata woate ŋu agblɔ be Yehowa bu aboyome siawo be wonye amesiwo ‘woɖo ɖe Kaldeatɔwo ƒe anyigba dzi hena nyui.’ Ède dzesii hã be Yehowa do ŋugbe be ‘yeatsɔ yeƒe ŋku aɖo wo ŋu hena nyuiwɔwɔa?’ Aleke esia va emee? Le ƒe 80 kple edzivɔwo megbe, esi nye le ƒe 537 D.M.Ŋ. me la, Yehowa na Fia Kores de se si ɖe mɔ na woƒe dzidzimeviwo ƒe ame susɔe aɖewo be woagatrɔ gbɔ va Yuda-nyigba dzi. Yudatɔ nuteƒewɔla siawo gbugbɔ Yerusalem-dua tso; wotu gbedoxɔ yeye hena woƒe Mawu Yehowa ƒe tadedeagu; eye wotrɔ va egbɔ kple woƒe dzi blibo katã. Eyata le esiawo katã me la, aboyome siawo kple woƒe dzidzimeviwo nɔ abe gbotsetse ŋgɔgbea siwo nyo ŋutɔ ene na Yehowa.
7. Ɣekaɣie Yehowa ƒe ŋku nɔ egbegbe Yeremya habɔbɔa “ŋu hena nyuiwɔwɔ,” eye alekee?
7 Àɖo ŋku edzi be le míaƒe Yeremya ƒe nyagblɔɖinyawo me dzodzro le nyati si do ŋgɔ me la, míekpɔe be gɔmesese le nusiawo ŋu na míaƒe ƒe alafa 20 lia sia. Eye nenema ke nye ta 24 lia sia hã. Le Xexemeʋa I ƒe ŋkeke siwo ɖi vɔvɔ̃ me la, Yehowa subɔla adzɔgbeɖela geɖe va nɔ Babilon Gã la ƒe ŋusẽkpɔɖeamedzi te le mɔ vovovowo nu. Gake Yehowa ‘ƒe ŋku si kpɔa ame ta la nɔ wo ŋu le mɔ nyui aɖe nu.’ Eyata to Yesu Kristo si nye Kores Gãtɔ dzi la, Yehowa xɔ ŋusẽ si Babilon Gã la kpɔ ɖe wo dzi la le esi eye wòkplɔ wo ʋeʋeʋe yi gbɔgbɔmeparadiso mee. Gbɔgbɔ me Israel-vi siawo ɖo to eye wotrɔ va Yehowa gbɔ kple woƒe dzi blibo. Emegbe le ƒe 1931 me la, wotsɔ dzidzɔ xɔ ŋkɔ Yehowa Ðasefowoe. Nyateƒee, woate ŋu agblɔe azɔ be wozu abe kusi si me gbotsetse siwo nyo ŋutɔ le ene le Yehowa ŋkume.
8. Mɔ ka nue Yehowa Ðasefowo ɖe gbeƒã vivi si le Fiaɖuƒe gbedasia ŋu abe gbotsetse ene la yi didiƒe le?
8 Yehowa Ðasefowo medo kpo agbenɔnɔ ɖe taɖodzinu si le Mawu ƒe amenuveve si ta wona wo vo tso Babilon Gã me la nu o. Womena alesi Fiaɖuƒe gbedasia vivina abe gbotsetse ene la tsi woawo ɖeɖeko gbɔ o, ke boŋ woɖe gbeƒãe ɖo didiƒe ʋĩ abe alesi Yesu ƒe nya siwo le Mateo 24:14 gblɔe ene be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã.” Eye nukae do tso dɔ sia me? Ame 4,700,000 kple edzivɔ siwo si alẽwo ƒe nɔnɔme le siwo menye gbɔgbɔ me Israel-viwo o la do go tso Babilon Gã la ƒe kluvinyenye me!
Ŋutega me Gbotsetse Gbegblẽawo
9. Amekawoe gbotsetse gbegblẽ si le Yeremya ƒe ŋutegaa me la tsi tre ɖi na, eye nukae adzɔ ɖe wo dzi?
9 Ke kusi ma si me gbotsetse gbegblẽwo le si Yeremya kpɔ le ŋutega me ya ɖe? Yeremya he eƒe susu katã yi Yehowa ƒe nya siwo le Yeremya ta 24, kpukpui 8 vaseɖe 10 me dzi azɔ: “Ale Yehowa gblɔ esi: Alesi gbotsetse gbegblẽawo gblẽ, ale be ɖuɖu mele wo ŋu o la, nenema mawɔ Yuda-fia Zedekiya kple eƒe amegãwo, amesiwo kpɔtɔ ɖe Yerusalem, kpakple amesiwo le Egipte-nyigba dzi lae. Matsɔ wo awɔ bibi kple dzɔgbevɔ̃e na anyigba dzi fiaɖuƒewo katã, woanye alɔmeɖenu, lodonu, ahamasinu kple ɖiŋudonu le teƒe, siwo katã manyã wo aɖo ɖo. Maɖo yi, dɔwuame kple dɔvɔ̃ ɖe wo, vaseɖe esime woatsrɔ̃ avɔ le anyigba, si metsɔ na woawo kple wo fofowo la dzi.”
10. Nukata Yehowa bu Zedekiya be enye ‘gbotsetse gbegblẽ’?
10 Eyata Zedekiya va zu ‘gbotsetse gbegblẽ’ le Yehowa ŋkume vavã. Menye Nebukadnezar ŋu koe wòdze aglã ɖo esi wòtu nuteƒewɔwɔ ƒe atam si wòka na fia ma le Yehowa ƒe ŋkɔ me la o, ke boŋ egbe nublanui si Yehowa kpɔ nɛ to Yeremya dzi la hã keŋkeŋ. Le nyateƒe me la, ena wode Yeremya gaxɔ me gɔ̃ hã! Eyata mewɔ nuku o be Ezra ƒo nu tso nɔnɔme si fia la ɖe fia ŋu kpuie ko le Kronika II, 36:12 be: “Ewɔ nusi nye vɔ̃ le Yehowa, eƒe Mawu la ŋku me, eye mebɔbɔ eɖokui . . . o.” Le Yehowa ŋkume la, Zedekiya kple amesiwo susɔ ɖe Yerusalem la nɔ abe gbotsetse vóvo si gblẽ ƒe kusi ene!
Gbotsetse Vóvo ƒe Kpɔɖeŋu le Míaƒe Ŋkekea Me
11, 12. Amekawoe wode dzesi be wonye gbotsetse gbegblẽwo egbea, eye nukae ava dzɔ ɖe wo dzi?
11 Azɔ lé ŋku ɖe xexeame ŋu egbea kpɔ. Èsusu be míate ŋu akpɔ kpɔɖeŋugbotsetse gbegblẽ ƒe kusiwoa? Mina míalé ŋku ɖe nudzɔdzɔawo ŋu to míaƒe ŋkekea tsɔtsɔ sɔ kple Yeremya tɔ ŋu me. Le míaƒe ƒe alafa 20 lia sia me la, Yehowa zã Yeremya habɔbɔ si nye amesiaminawo ƒe ame susɔeawo tsɔ xlɔ̃ nu dukɔwo enuenu be yeƒe dɔmedzoe helĩhelĩ le mɔ dzi gbɔna le xaxa gã la me. Exlɔ̃ nu dukɔwo be woatsɔ ŋutikɔkɔe si dze na yeƒe ŋkɔ la nɛ, be woade ta agu na ye le gbɔgbɔ kple nyateƒe me, eye woalɔ̃ axɔ Ye Vi, Kristo Yesu, si le fia ɖum la be eyae nye anyigba la Dziɖula si dze. Aleke wowɔ nu ɖe eŋui? Wowɔ abe Yeremya ŋɔlimetɔwo pɛpɛpɛ ene. Dukɔwo le nusi nye vɔ̃ le Yehowa ŋkume wɔwɔ dzi.
12 Amekawoe le aglãdzegbɔgbɔ sia dem amewo me? Amekawoe tsɔa Mawu ƒe dɔtsɔla siawo siwo ɖi Yeremya la nɔa alɔmeɖenu wɔmee le alesi wokea ɖi ŋusẽ si wokpɔ be woanye Mawu ƒe subɔlawo la me? Amekawoe nɔa vlo dom Mawu ƒe Nya la? Amekawoe nɔa megbe na amewo ɣesiaɣi be woati Yehowa Ðasefowo yome egbea? Ŋuɖoɖoa dze ƒã be amesiame nakpɔ—Kristodukɔae, vevietɔ woƒe osɔfowo! Eye wò ya lé ŋku ɖe Kristodukɔa ƒe kutsetse gbegblẽ vóvo siwo me míedzro le nyati si va yi me ŋu kpɔ ko. Nyateƒee, kpɔɖeŋugbotsetse gbegblẽ ƒe kusi nya le anyigba la dzi egbea baa. Le nyateƒe me la, Yehowa gblɔ be ‘wogblẽ ale be ɖuɖu mele wo ŋu o.’ Yehowa ƒe nya siwo wògblɔ to Yeremya dzi la gale ɖiɖim va de asi na egbea be: ‘Woatsrɔ̃ ɖa avɔ’! Naneke mate ŋu alé dɔmedzoe helĩhelĩ si Yehowa do ɖe Kristodukɔa ŋuti la nu o.
Nuxlɔ̃ame si me Nufiame Le na Mí
13. Le Paulo ƒe nya siwo le Korintotɔwo I, 10:11 ŋu bubu me la, aleke wòle be míase gbotsetse kusi eve ŋuti ŋutega la gɔmee?
13 Esime míele nusi Yeremya ƒe nuxlɔ̃amenya siwo tso gbɔgbɔ me fia la me dzrom la, apostolo Paulo ƒe nya siwo le Korintotɔwo I, 10:11 ɖina sesĩe ɖe tome na mí be: “Ke nusiawo katã va amewo mawo dzi abe kpɔɖeŋu ene, eye woŋlɔe ɖi bene wòanye nuxɔxlɔ̃ hena mí amesiwo dzi xexe sia me ƒe nuwuwu va ɖo la.” Ðe míena nuxlɔ̃ame si le gbotsetse kusi eveawo me le ŋutega sia me la de dzi gbɔ na mía? Nusi me dzrom míele la nye nusiwo dzɔ ɖe Israel-viwo dzi ƒe nuxlɔ̃amekpɔɖeŋu ƒe akpa vevi aɖe na mí.
14. Aleke Israel wɔ nu ɖe Yehowa ƒe beléle na wo lɔlɔ̃tɔe ŋu?
14 Mlɔeba la, mina míaɖo ŋku nya siwo Yehowa gblɔ na Fia Dawid tso Israel ŋu, esi le Samuel II, 7:10 me la dzi: “Mana nɔƒe nye dukɔ Israel, eye mana wòaɖo zunu anyi.” Yehowa lé be na eƒe dukɔ Israel lɔlɔ̃tɔe le go sia go me. Eyata gɔmesese blibo le eŋu be Israel-viwo natse ku nyuiwo le woƒe agbenɔnɔ me. Ðeko wòle be woaɖo to Yehowa ƒe nufiafia ahalé eƒe sewo me ɖe asi hafi. Gake wo dometɔ ʋee aɖewo koe wɔe nenema. Wo dome ame akpa gãtɔ ƒe tome tri eye wodze aglã ale gbegbe be ku gbegblẽ si vó koe wotse.
15. Aleke gbɔgbɔ me Israel si li egbea kple woƒe zɔhɛ siwo nye alẽwo la wɔ nu ɖe Yehowa ƒe nublanuikpɔkpɔ ŋui?
15 Ke míaƒe ŋkekea me ya ɖe? Yehowa kpɔ nublanui na eƒe gbɔgbɔ me Israel ƒe ame susɔeawo kple woƒe zɔhɛ siwo nye alẽwo la ale gbegbe. Eƒe ŋku nɔ wo ŋu ɖaa tso esime woɖe wo tso aboyo me le gbɔgbɔ me le ƒe 1919 me ke. Abe alesi wògblɔe ɖi to Yesaya dzi ene la, woxɔa Mawu ƒe mɔfiame gbesiagbe tso Yehowa Mawu, xexeame katã ƒe Nufiala gãtɔ kekeake la gbɔ. (Yesaya 54:13) Mawu ƒe nufiafia sia si wòtsɔ to Via lɔlɔ̃ Yesu Kristo dzi la na be ŋutifafa gbogbo aɖe le wo dome eye wòna ƒomedodo kplikplikpli si le wo kple Yehowa dome la le nyonyom ɖe edzi ɖaa. Gbɔgbɔ me nɔnɔme wɔnuku kae nye esi esia nye na mí katã be míanya Yehowa, aɖo toe, eye míayi edzi atse ku nyuiwo—ku siwo nyea kafukafu na Yehowa—le míaƒe agbe me! Anye agbekpɔkpɔ na mí!
16. Aleke mía dometɔ ɖesiaɖe ate ŋu awɔ gbotsetse kusi eve ŋuti ŋutega la ŋudɔe?
16 Gake le Mawu ƒe amenuveve gbogbo siawo katã megbe hã la, ame aɖewo gali kokoko siwo dzea aglã eye wosẽa dzime, abe alesi ame geɖe wɔe le blema le Yuda ene, eye amesiawo tsea ku gbegblẽ siwo vó le woƒe agbenɔnɔ me. Woƒe nya wɔ nublanui loo! Migana wòadzɔ ɖe mía dometɔ aɖeke dzi gbeɖe be míaŋlɔ nuxlɔ̃amenya si me wokɔ na mí nyuie alea le gbotsetse kusi eveawo kple kutsetse siwo le wo me—nyuia kple gbegblẽa—la be o. Esi Yehowa ƒe ʋɔnudɔdrɔ̃ si dze na Kristodukɔ xɔsegbela la le aƒe tum kabakaba la, mina míaxɔ apostolo Paulo ƒe nuxlɔ̃amenya sia ade dzi me be: ‘Mizɔ alesi dze Yehowa hena eƒe ŋudzedze katã, miatse ku le dɔ nyui sia dɔ nyui wɔwɔ me.’—Kolosetɔwo 1:10.
Emetoto—“Kutsetsewo—Nyuia Kple Gbegblẽa” kple “Yehowa ƒe Nyahehe Kple Dukɔwo” ƒe memamã 1-4
◻ Nukae gbotsetse nyui kusi la tsi tre ɖi na?
◻ Aleke ŋutega me gbotsetse gbegblẽ kusi la va dze ƒãe?
◻ Nuxlɔ̃ame kae le Yeremya ƒe gbedasia me na mí?
◻ Nukae ɖe dzesi le ƒe 607 D.M.Ŋ. kple ƒe 1914 M.Ŋ. ŋu?
[Nɔnɔmetata si le axa 15]
Abe gbotsetse nyuiwo ene la, Mawu ƒe amewo tse Fiaɖuƒeku viviwo
[Nɔnɔmetata si le axa 15]
Kristodukɔa ɖee fia be yewonye gbotsetse gbegblẽ kusi la