Yehowa Ƒe Nyahehe Kple Dukɔwo
“Howɔwɔ de anyigba ƒe mlɔenu; elabena Yehowa le avu wɔm kple dukɔwo.”—YEREMYA 25:31.
1, 2. (a) Nukae dzɔ le Yuda le Fia Yosiya ƒe ku megbe? (b) Amekae nye Yuda-fia mamletɔ, eye aleke wòkpe fu le eƒe nuteƒemawɔmawɔ tae?
ƔEYIƔI sesẽwo dze ŋgɔ Yuda-nyigba la. Yosiya si nye fia nyui aɖe ƒe nuwɔna he Yehowa ƒe dɔmedzoe helĩhelĩ ɖe megbe vie. Gake nukae dzɔ esime wowu Yosiya le ƒe 629 D.M.Ŋ. me? Fia siwo va ɖu dzi ɖe eyome la do vlo Yehowa.
2 Abe alesi Fiawo II 24:19 gblɔe ene la, Zedekiya, Yuda-fia mamlea si nye Yosiya vi enelia yi edzi ‘wɔ nusi nye vɔ̃ le Yehowa ŋkume abe alesi [foa] Yoyakim wɔ pɛpɛpɛ ene.’ Nukae do tso eme? Nebukadnezar ho ɖe Yerusalem ŋu eye wòlé Zedekiya; ewu viaŋutsuwo le eya ŋutɔ ŋkume eye wògbã ŋku na eya ŋutɔ hekplɔe yi Babilon. Hekpe ɖe eŋu la, Babilontɔwo ha Yehowa ƒe tadeaguƒea ƒe nuzazãwo abe aboyonuwo ene eye wotɔ dzo gbedoxɔa kple dua. Agbetsilawo va zu aboyomewo le Babilon.
3. Ɣeyiɣi kae dze egɔme esi Yerusalem tsrɔ̃ le 607 D.M.Ŋ. me, eye nukae adzɔ le ɣeyiɣi ma ƒe nuwuwu?
3 Menye Yerusalem wɔwɔ aƒedoe keŋkeŋ koe ƒe 607 D.M.Ŋ. ma fia o, ke efia ‘dukɔwo ƒe ɣeyiɣi ɖoɖiwo’ si ŋu woƒo nu le le Luka 21:24 la hã ƒe gɔmedzedze. Ɣeyiɣi sia si ƒe didime nye ƒe 2,520 la wu enu le míaƒe ƒe alafa sia me, le ƒe 1914 me. Ɣemaɣi la, gamea su na Yehowa be wòato Yesu Kristo, Via si woɖo zi dzi, amesi lolo wu Nebukadnezar, dzi adrɔ̃ ʋɔnu xexe gbegblẽ sia eye wòatsrɔ̃e. Ʋɔnudɔdrɔ̃ sia dze egɔme tso nane si ɖi Yuda egbea si nye habɔbɔ aɖe si gblɔna be yele Mawu kple Kristo teƒe le anyigba dzi la dzi.
4. Nyabiabia kawoe fɔ ɖe te le Yeremya ƒe nyagblɔɖia ŋu?
4 Ðe míekpɔe be zitɔtɔ si nɔ Yuda le ƒe ʋee siwo do ŋgɔ na eƒe tsɔtsrɔ̃ me esime eƒe fiawo nɔ edzi ɖum kple alesi eƒe nugbegblẽwɔwɔ gblẽ nui le dukɔ siwo te ɖe eŋu la ŋuti be esɔ kple esiwo le Kristodukɔa hã me egbea? Míekpɔnɛ nyateƒe! Ke nukae Yeremya ƒe nyagblɔɖia fia le alesi Yehowa akpɔ nyawo gbɔe egbea ŋu? Mina míakpɔe ɖa.
5, 6. (a) Tso ƒe 1914 me ke la, aleke nɔnɔme si le Kristodukɔa me ɖi esi nɔ Yuda do ŋgɔ na eƒe tsɔtsrɔ̃ teti lae? (b) Gbedasi kae egbegbe Yeremya va gblɔ na Kristodukɔa?
5 Britaniatɔwo ƒe akɔntabula kple xexemenunyafiala Bertrand Russell gblɔ ƒe 40 enye si va yi be: “Tso ƒe 1914 me ke la, nusi dze abe zɔzɔ si woɖo ɖi xoxo do ŋgɔ ɖo ta dzɔgbevɔ̃e si lolo wu gbɔ ene la le fu ɖem na amesiame si nya nusiwo le dzɔdzɔm le xexeame la ŋutɔ.” Eye Germaniatɔ dumegã Konrad Adenauer gblɔ be: “Dedienɔnɔ kple tomefafa bu le amewo ƒe agbe me tso ƒe 1914 me.”
6 Abe alesi wònɔ le Yeremya ƒe ŋkekea me ene la, ʋu maɖifɔ gbogbo aɖe kɔkɔ ɖi nye nusi de dzesi nuɖoanyi sia ƒe nuwuwu ƒe aƒetutu, vevietɔ le ƒe alafa sia me xexemeʋa eveawo me. Kristodukɔa si gblɔna be yedea ta agu na Biblia ƒe Mawu la ƒe dukɔwo mee wowɔ aʋa siawo ƒe akpa gãtɔ le. Alakpanuwɔwɔ kae nye si! Eyata mewɔ nuku o be Yehowa ɖo eƒe Ðasefowo ɖe wo gbɔ kple Yeremya 25:5, 6 me nyawo be: “Amesiame netrɔ tso eƒe mɔ vɔ̃wo dzi kple eƒe nuwɔna vɔ̃ɖiwo me, . . . Migadze mawu tutɔwo yome, ne miasubɔ wo ahade ta agu na wo o, eye migatsɔ miaƒe asinudɔwɔwɔwo do dziku nam o, ekema nyemawɔ vɔ̃ aɖeke mi o.”
7. Ðaseɖiɖi kae li be Kristodukɔa do toku Yehowa ƒe nuxlɔ̃amewo?
7 Gake Kristodukɔa ƒe dukɔwo gbe tɔtrɔ. Esia dze le woƒe vɔ siwo wogasa na aʋawɔmawu le Korea kple Vietnam la me. Eye wogale megbe dam na kusitsala siwo nye aʋawɔnusitsalawo kokoko. Kristodukɔa ƒe anyigbawo dzie dɔlar triliɔn ɖeka kloe si wozãna ƒe sia ƒe ɖe aʋakpababla ŋu le ƒe 1980 ƒe ƒeawo me la ƒe akpa gãtɔ tso. Tso ƒe 1951 vaseɖe 1991 me la, United States ƒe ga si yi nugbe ɖe asrafonyawo ŋu la sɔ gbɔ wu viɖe si Amerikatɔwo ƒe asitsahawo katã kpɔ ne wotsɔ wo katã tɔ ƒo ƒui. Tso esi woɖe gbeƒãe bobobo be Ɣedzeƒedukɔwo kple Ɣetoɖoƒedukɔwo dome dzrea ke la, woɖe nukliaʋawɔnu doxoxowo dzi kpɔtɔ, gake aʋawɔnu gbogbo aɖe siwo gavɔ̃ɖi wu kura gakpɔtɔ li eye wogale asi trɔm le bubuwo ŋu. Ðewohĩ woazã aʋawɔnu siawo gbeɖeka.
Ʋɔnudɔdrɔ̃ Kristodukɔa ɖe Eƒe Mɔɖeɖe ɖe Nugbegblẽwɔwɔ Ŋu Ta
8. Aleke Yeremya 25:8, 9 me nyawo ava eme ɖe Kristodukɔa dzii?
8 Azɔ Yehowa ƒe nya siwo gakplɔe ɖo le Yeremya 25:8, 9 me la yi na Kristodukɔa si do kpo agbenɔnɔ ɖe Kristotɔwo ƒe dzɔdzɔenyenye ƒe dzidzenu nu la koŋ be: “Eyata ale Yehowa Zebaot gblɔ esi: Esi miegbe toɖoɖo nye nyawo la, eyata, kpɔ ɖa, makplɔ anyiehe ƒomeawo katã kple nye dɔla Babel-fia Nebukadnezar vɛ, eye mana woava ƒo ɖe anyigba sia kple edzinɔlawo kple dukɔ sia katã dzi godoo, matsrɔ̃ wo gbidigbidi, eye matsɔ wo awɔ bibi, alɔmeɖenu kple aƒedoe tegbee; Yehowa ye gblɔe!” Eyata xaxa gã la adze egɔme tso Kristodukɔa, amesiwo gblɔna be Mawu ƒe dukɔe yewonye la dzi, eye wòakeke ɖe enu mlɔeba aɖo xexeame ƒe afisiafi, aɖo ‘dukɔwo katã gbɔ godoo.’
9. Mɔ kawo nue Kristodukɔa ƒe gbɔgbɔ me nɔnɔme gblẽ ɖe edzi le míaƒe ɣeyiɣia me le?
9 Ɣeyiɣi aɖe va yi kpɔ le Kristodukɔa me la, wode bubu Biblia ŋu, enye ɣeyiɣi si me wobu srɔ̃ɖeɖe kple ƒomegbenɔnɔ dzidzɔnui le afisiafi kloe, esime amewo fɔna kaba eye wokpɔa dzidzɔ le woƒe gbesiagbedɔwɔnawo me. Ame geɖe sia akaɖi fiẽsiwo xlẽa Mawu ƒe Nya la hesrɔ̃nɛ tsɔ ɖina ɖe emee. Gake egbea, gbɔdɔdɔ vivivo, srɔ̃gbegbe, atikevɔ̃ɖizazã kple ahamumu, ɖeviwo ƒe gbegblẽ, ŋukeklẽ, kuviadɔwɔwɔ, television kpɔkpɔ tsɔtsɔ ɖo dɔe, esiawo kple nu vlo bubuwo va tɔtɔ agbenɔnɔ ale gbegbe. Esiawo nye nusiwo adzɔ do ŋgɔ na tsɔtsrɔ̃ si Yehowa Mawu ahe va Kristodukɔa me tɔ siwo ɖea mɔ ɖe nugbegblẽwɔwɔ ŋu la dzi.
10. Ƒo nu tso alesi nuwo anɔ na Kristodukɔa ne Yehowa drɔ̃ ʋɔnui vɔ la ŋu.
10 Yehowa gblɔ, abe alesi míexlẽ le Yeremya ta 25, kpukpui 10 kple 11 me ene, be: “Matsi aseyetsotso ƒe ɖiɖi kple dzidzɔ ƒe ɖiɖi, ŋugbetɔsrɔ̃ ƒe gbe kple ŋugbetɔ ƒe gbe, tetutu ƒe ɖiɖi kple akaɖi ƒe keklẽ nu le wo dome. Anyigba sia azu aƒedo kple gbegbe.” Anye aƒedozuzu si awɔ nuku vavã ne womu Kristodukɔa ƒe gbedoxɔ gãwo kple fiasã ɖoatsyɔ̃wo hegbã wo gudugudu. Aleke gbegbe tsɔtsrɔ̃ sia aloloe? Le Yeremya ŋɔli la, Yuda kple dukɔ siwo ƒo xlãe ƒe aƒedozuzu xɔ ƒe 70, si Psalmo 90:10 gblɔ be eyae nye amegbetɔ ƒe agbenɔƒe blibo katã ƒe didime. Ʋɔnudɔdrɔ̃ si Yehowa ahe vɛ egbea hã ade blibo, anye nusi anɔ anyi tso mavɔ me yi ɖe mavɔ me.
Ʋɔnudɔdrɔ̃ Babilon Gã La
11. Amekawoe woazã atsɔ atsrɔ̃ Kristodukɔae? Nukatae?
11 Abe alesi wogblɔe ɖi ɖe Nyaɖeɖefia 17:12-17 me ene la, ɣeyiɣia ava esime Yehowa adze eƒe nu dziŋɔ la wɔwɔ gɔme esi wòadee ‘dzo ewoawo’—Dukɔ Ƒoƒuawo ƒe dukɔ siwo bla aʋakpa—ƒe dzi me “bene woawɔ eƒe tameɖoɖo ɖeka dzi” si nye be woawɔ xexeame katã ƒe alakpasubɔsubɔha ƒe fiaɖuƒe la aƒedoe. Aleke nusia ava adzɔe? Mɔ vovovowo li siwo dzi Nyaɖeɖefia ta 17 me ‘dzo ewoawo’ ate ŋu ato “alé fu gbolo la . . . eye woatɔ dzoe wòafiã keŋkeŋ.” Nyateƒee, wole nukliaʋawɔnu geɖewo wɔm eye wogale kɔlili wo dzi le anyigba la ƒe afisiwo aʋawɔwɔ le. Gake ele be míalala akpɔ alesi Yehowa atsɔe ade dunyahedziɖulawo ƒe dzi me be woahe yeƒe hlɔ̃biabia vɛ la.
12. (a) Nukae dzɔ ɖe Babilon dzi esi wòtsrɔ̃ Yerusalem vɔ megbe? (b) Nukae adzɔ ɖe dukɔwo dzi ne wotsrɔ̃ Kristodukɔa vɔ megbe?
12 Le blema la, Yehowa ƒe dɔmedzoe helĩhelĩ va Babilon hã dzi. Eyata tso Yeremya ta 25, kpukpui 12 dzi la, nyagblɔɖia ƒo nu tso alesi nuwo ava trɔe emegbe ŋu. Fifia si Nebukadnezar meganye Yehowa ƒe Ametsrɔ̃la o la, wobu wo kple Babilon de xexemedukɔwo katã me azɔ. Esia ɖi alesi nɔnɔmea le egbea. Nyaɖeɖefia ta 17 me ‘dzo ewoawo’ awɔ alakpasubɔsubɔha aƒedoe, gake emegbe woatsrɔ̃ woa ŋutɔwo kple anyigba dzi ‘fia’ bubuwo katã, abe alesi wogblɔe le Nyaɖeɖefia ta 19 me ene. Yeremya 25:13, 14 gblɔ alesi woadrɔ̃ ʋɔnu Babilon hekpe ɖe ‘dukɔ siwo katã’ te Mawu ƒe amewo ɖe anyi la ŋu nya. Yehowa zã Nebukadnezar wònye eƒe ametsrɔ̃la wòtsɔ he to na Yuda. Gake eya kple Babilon-fia siwo ɖu dzi ɖe eyome la va do wo ɖokui ɖe dzi ɖe Yehowa ŋuti ŋutɔ, abe alesi wòdze le gudodo Yehowa ƒe gbedoxɔ me nuzazãwo mee ene. (Daniel 5:22, 23) Eye esi Babilontɔwo tsrɔ̃ Yerusalem la, dukɔ siwo ƒo xlã Yuda—Moab, Amon, Tiro, Edom, kple bubuwo—tso aseye eye woɖu fewu le Mawu ƒe dukɔa ŋu. Ele be woawo hã naxɔ fetu si dze wo dedie tso Yehowa gbɔ.
Ʋɔnudɔdrɔ̃ “Dukɔwo Katã”
13. Nukae “dɔmedzoe ƒe weinkplu sia” fia, eye nukae adzɔ ɖe amesiwo anoe la dzi?
13 Eyata Yeremya gblɔ le ta 25, kpukpui 15 kple 16 be: “Ale Yehowa, Israel ƒe Mawu la, gblɔ nam enye si: Xɔ dɔmedzoe ƒe weinkplu sia le asinye, eye natsɔe na dukɔ, siwo katã gbɔ maɖo wò ɖo la, woano. Eye ne wonoe la, woanɔ mumũm sagãsagã, eye woadze aɖaʋa le yi, si maɖo ɖe wo dome la ta.” Nukatae wònye Yehowa ƒe “dɔmedzoe ƒe weinkplu” ɖo? Yesu ƒo nu tso “kplu” aɖe ŋu le Mateo 26:39, 42 kple Yohanes 18:11 tsɔ fia nusi nye Mawu ƒe lɔlɔ̃nu si wòle be wòawɔ la ƒe kpɔɖeŋui. Nenema ke wozã kplu le afisia tsɔ wɔ kpɔɖeŋu na alesi wònye Yehowa ƒe lɔlɔ̃nu be dukɔwo nano eƒe hlɔ̃biabia lae. Yeremya 25:17-26 yɔ dukɔ siawo ŋkɔ, esi nye kpɔɖeŋu na egbegbe dukɔwo.
14. Abe alesi Yeremya ƒe nyagblɔɖia gblɔe ene la, amekawoe no nu le Yehowa ƒe dɔmedzoe ƒe weinkplu sia nu, eye nukae esia tsi tre ɖi na le míaƒe ŋkekea me?
14 Ne wotsɔ Kristodukɔa ‘wɔ bibi, alɔmeɖenu, aƒedo kple ɖiŋudonui’ abe Yuda ene vɔ la, ke tsɔtsrɔ̃ ava xexeame katã ƒe alakpasubɔsubɔha ƒe fiaɖuƒe bliboa katã hã dzi. Le ema megbe la, xexeame katã, si Egipte nye kpɔɖeŋu na la ano Yehowa ƒe dɔmedzoe weinkplu la! Ẽ, “anyiehe fiawo katã, esiwo le kpuiƒe kple esiwo le adzɔge tso wo nɔewo gbɔ kple xexeme fiaɖuƒe, siwo katã le anyigba dzi” anoe. Mlɔeba “Sesax-fia anoe ɖe wo yome.” Amekae nye “Sesax-fia” sia? Sesax nye nuŋɔŋlɔ ɣaɣla si le tsitre ɖi na Babilon. Abe alesi Satana nye Babilon ƒe vivimefiae ene la, nenema ke wòganye “xexemefia” va de asi na egbea, abe alesi Yesu ɖee fia ene. (Yohanes 14:30) Eyata Yeremya 25:17-26 me nyawo sɔ kple Nyaɖeɖefia ta 18 vaseɖe 20 me nyawo le alesi nudzɔdzɔwo ayii ne wokpe Yehowa ƒe dɔmedzoekplua na amewo gbɔgblɔ me. Gbã, ele be woatsrɔ̃ alakpasubɔsubɔ ƒe xexemefiaɖuƒe la eye dunyaheŋusẽwo nakplɔe ɖo, eye emegbe woade Satana ŋutɔ aʋli me.—Nyaɖeɖefia 18:8; 19:19-21; 20:1-3.
15. Nukae adzɔ ne míese “ŋutifafa kple dedienɔnɔ” ƒe ɣli la?
15 Tso esime ke wobui be Ɣetoɖoƒe kple Ɣedzeƒe dukɔwo dome dzrehehewo ke eye wòsusɔ xexemeŋusẽ gãtɔ ɖeka ko la, wogblɔ nya geɖe tso ŋutifafa kple dedienɔnɔ ŋu. Abe alesi Nyaɖeɖefia 17:10 gblɔe ene la, xexemeŋusẽ gãtɔ ma si nye lã wɔadã la ƒe ta adrelia la ‘anɔ anyi ʋee ko.’ Gake ‘ɣeyiɣi kpui’ ma yina ɖe eƒe nuwuwu. Esusɔ vie ko dunyahelawo ƒe “ŋutifafa kple dedienɔnɔ” ƒe ɣli sesẽwo ana ‘tsɔtsrɔ̃ kpata nava lili wo.’ Nenemae apostolo Paulo gblɔe.— Tesalonikatɔwo I, 5:2, 3.
16, 17. (a) Nukae atso eme ne ame aɖe dze agbagba be yeasi le Yehowa ƒe ʋɔnudɔdrɔ̃ nu? (b) Tsɔtsrɔ̃ ƒe mɔ ka nue Yehowa ƒe lɔlɔ̃nu ava eme le anyigba dzi le kpuie?
16 Ele be Satana ƒe xexemenuɖoanyia katã nano Yehowa ƒe hlɔ̃biabiakplu la, eye Kristodukɔa dzie wòadze egɔme tsoe. Nya si wògagblɔ na Yeremya, le ta 25, kpukpui 27 vaseɖe 29 ɖo kpe esia dzi: “Eye nagblɔ na wo bena: Ale Yehowa Zebaot, Israel ƒe Mawu la, gblɔ esi: Mino aha miamu, eye miɖe xe, midze anyi, eye migafɔ o, le yi, si maɖo ɖe mia dome la ta. Eye ne wogbe be, yewomaxɔ kplu la le asiwò o la, ekema gblɔ na wo be: Ale Yehowa Zebaot gblɔ esi: Mianoe kokoko! Elabena keke du, si ŋu woyɔ nye ŋkɔ ɖo ke ŋue medze vɔ̃wɔwɔ gɔme ɖo, eye miawo miato le emea? Womagbe tohehe na mi o! Elabena meyɔ yi ɖe anyigbadzitɔwo katã ŋu, Yehowa Zebaot ye gblɔe.”
17 Nya mawo nu sẽ—wonye dzikatsoƒoenyawo vavã, elabena xexeame katã ƒe Fiagã kple Aƒetɔ Yehowa Mawu nue wodo le. Etsɔ dzigbɔɖi do dzi le busunya kple vlodoamenya siwo wogblɔ ɖe eƒe ŋkɔ kɔkɔe la ŋu, kpakple alesi wolé fui le ƒe akpe geɖe siawo mee la me. Gake ɣeyiɣia de nɛ azɔ be wòaɖo gbe si Via lɔlɔ̃tɔ, Yesu Kristo, fia eƒe nusrɔ̃lawo be woado ɖa le esime wònɔ anyigba dzi be: “Mido gbe ɖa ale: Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” la ŋu. (Mateo 6:9, 10) Yehowa ƒe lɔlɔ̃nu wònye be Yesu nanye yi na Ye le yeƒe hlɔ̃biabia la me.
18, 19. (a) Amekae do sɔ be yeaɖu dzi le Yehowa ƒe ŋkɔ me, eye nuka lalam wòle hafi awu eƒe aʋadziɖuɖua nu? (b) Ne mawudɔlawo ɖe asi le Yehowa ƒe dɔmedzoe ƒe ahomya ŋu la, nu dziŋɔ kawoe adzɔ le anyigba dzi?
18 Míexlẽ le Nyaɖeɖefia ta 6 me be gbã Yesu do sɔ ɣi ‘be yeaɖu aʋa dzi eye yeawu yeƒe aʋadziɖuɖu nu.’ (Kpukpui 2) Esia dze egɔme esime woɖoe zi dzi wòzu Dziƒofia le ƒe 1914 me. Sɔdola bubuwo kplɔe ɖo, siwo fia aʋawɔwɔ gã, dɔwuame, kple dɔvɔ̃ siwo ɖe fu na míaƒe anyigba la tso ɣemaɣi ke. Gake ɣekaɣie zitɔtɔ siawo katã nu ayi? Nyaɖeɖefia ta 7 gblɔ na mí be mawudɔla ene lé “anyigba ƒe yaƒoƒo eneawo” me ɖe asi sesĩe vaseɖe esime woƒo gbɔgbɔ me Israel kple ameha gã la nu ƒu tso dukɔ sia dukɔ me hena agbekpɔkpɔ. (Kpukpui 1) Ke nukae akplɔe ɖo?
19 Yeremya ta 25, kpukpui 30 kple 31, yi edzi be: “Yehowa le gbe ɖem tso dzi me, eye wòna eƒe gbe ɖi tso eƒe nɔƒe kɔkɔe la me; ele gbe ɖem ɖe eƒe lãnyiƒe ŋu, eye wòtso ayiboopɛɛ abe weinfiãlawo ene ɖe anyigbadzitɔwo katã ŋu. Howɔwɔ de anyigba ƒe mlɔenu; elabena Yehowa le avu wɔm kple dukɔwo, ele ʋɔnu drɔ̃m ŋutilãwo katã, eye wòatsɔ ame vɔ̃ɖiwo ade asi na yi, Yehowa ye gblɔe.” Dukɔ aɖeke masi le Yehowa ƒe dɔmedzoekplu sia nono nu o. Eyata ehiã kpata fifia be amesiwo katã si dzi dzɔdzɔe le la naɖe wo ɖokui ɖa tso dukɔwo ƒe vɔ̃ɖinyenye ŋu hafi mawudɔla eneawo naɖe asi le Yehowa ƒe dɔmedzoeya ʋuduʋudua ŋu. Enye ya ʋuduʋudu nyateƒe, elabena Yeremya ƒe nyagblɔɖia yi edzi le kpukpui 32 kple 33 be:
20. Nudzɔdzɔ kae ɖe alesi Yehowa ƒe ʋɔnudɔdrɔ̃a nu asẽe la fia, gake nukatae afɔɖeɖe sia hiã?
20 “Ale Yehowa Zebaot gblɔ esi: Kpɔ ɖa, dzɔgbevɔ̃e tso dukɔ gbɔ yi dukɔ gbɔ, eye wode zi ahom gã me le anyigba ƒe mlɔenu. Yehowa ƒe amesiwo wòwu le ŋkeke ma me la, woanɔ anyi tso anyigba ƒe mlɔenu ɖaseɖe anyigba ƒe mlɔenu; womafa na wo o, womaƒo wo nu ƒu o, eye womaɖi wo o, eye woazu aɖuɖɔ le agble me.” Nudzɔdzɔ sia dzi ŋɔ ŋutɔ vavã, gake ehiã bene woatsɔe aɖe vɔ̃ɖinyenye siwo katã le anyigba dzi la ɖa hafi Paradiso si ŋugbe Mawu do la nava.
Lãkplɔviwo Afa Avi eye Woado Aƒa
21, 22. (a) Amekawoe nye “lãkplɔviwo” si ŋu Yeremya 25:34-36 ƒo nu le le Israel, eye nukata wozi wo dzi be woafa avi? (b) Egbegbe lãkplɔvi kawoe dze na Yehowa ƒe dɔmedzoe, eye nukata wodze nɛ ale gbegbe?
21 Kpukpui 34 vaseɖe 36 gaƒo nu le Yehowa ƒe ʋɔnudɔdrɔ̃a ŋu yi ŋgɔ be: “Mifa avi, mi lãkplɔviwo, mido aƒa, eye miƒo togotogoe, mi lãhawo ƒe bubumewo, elabena miaƒe azã de, ne woawu mi, eye makaka mi ahlẽ, ne mianɔ abe agba xɔasi, si ge dze anyi ene! Sitsoƒe abu ɖe lãkplɔviwo, eye sisi abu ɖe lãha la ƒe bubumewo. Lãkplɔviwo ƒe ɣli kple lãha la ƒe bubumewo ƒe avi le ɖiɖim; elabena Yehowa gblẽ woƒe lãnyiƒe.”
22 Amekawoe nye lãkplɔvi siawo? Menye woawoe nye subɔsubɔhakplɔla siwo no Yehowa ƒe dɔmedzoe la xoxo o. Woawoe nye asrafowo ƒe lãkplɔviwo, amesiwo ŋu Yeremya 6:3 hã ƒo nu le, amesiwo ƒo woƒe aʋakɔwo nu ƒu abe lãhawo ene tsɔ tsi tre ɖe Yehowa ŋui. Woawoe nye dunyahedziɖulawo, amesiwo to wo teviwo dzi zu kesinɔtɔwo. Amesiawo dometɔ geɖe nyea ayetɔwo, nuvlowɔla gãwo. Wometsɔa dzo ɖe dɔwuame si le dukɔ blibo siwo le anyigba siwo dzi nuwo mede ame dzi le o me tɔwo tsrɔ̃m la nu tsitsi ŋu o. Wowɔa “lãha la ƒe bubumewo,” abe aʋawɔnusitsalawo kple amesiwo gblẽa nu le míaƒe yamenutoa me ŋu la kesinɔtɔwoe, gake womelɔ̃na be yewoakpe ɖe ɖevi miliɔn gbogbo siwo kuna ŋu awɔ atike na wo eye woana nuɖuɖu si me nunyiame le wo be woatsɔ akpɔ wo tae o togbɔ be ema wɔwɔ magblẽ ga aɖeke o hã.
23. Ðɔ alesi Satana ƒe dziɖuƒe anɔ ne Yehowa he tsɔtsrɔ̃ la vɛ megbe.
23 Eyata mewɔ nuku o be nya si Yeremya ta 25 tsɔ wu enui le kpukpui 37 kple 38 me gblɔ na amesiawo siwo dia woawo ɖeɖe dzaa ko ƒe ŋutifafa la be: “Gbeɖuƒe, si wovona ɖo la nu yi le Yehowa ƒe dɔmedzoe nu. Egblẽ eƒe avegoe ɖi abe dzata ene; elabena woƒe anyigba zu gbegbe le yi gblẽnu kple eƒe dɔmedzoe helĩhelĩ nu.” Nukunue wònye vavã! Gake Yehowa ƒe dɔmedzoe helĩhelĩ la ava to eƒe “yi”—Amesi woyɔ le Nyaɖeɖefia 19:15, 16 be “fiawo dzi Fia kple aƒetɔwo dzi Aƒetɔ,” amesi tsɔa gatikplɔ kplɔa dukɔwoe—la dzi godoo. Ke nukae akplɔe ɖo?
24. Yayra kawoe asu ameƒomea me tɔ dzɔdzɔewo si ne wotsrɔ̃ alakpasubɔsubɔhawo kple Satana ƒe xexeame ƒe akpa mamleawo?
24 Ènɔ anyi ahom sesẽ aɖe tu alo ya ʋuduʋudu aɖe ƒo kpɔa? Eteƒe menya kpɔna ya o. Gake togbɔ be ne ŋu ke àkpɔ eƒe nugblẽƒe le afisiafi hã la, yame kɔna hefana ale gbegbe be nàdi be yeada akpe na Yehowa ɖe ŋkeke nyui ma ta. Nenema ke ne xaxa gã la ƒe ahomyawo nu fa vɔ la, ne èlé ŋku ɖe anyigba la dzi la, àda akpe be yele agbe hesɔ gbe be yeakpɔ gome le dɔ bubu si le Yehowa si si nye anyigba si ŋuti wokɔ la wɔwɔ ŋutikɔkɔe paradisoe me. Ɣemaɣi woaɖo nya si Yehowa le hehem ɖe dukɔwo ŋu la ƒe taƒoƒo gã la gbɔ, eye akɔ eƒe ŋkɔ la ŋu ahadzra mɔ dzi ɖo be woawɔ eƒe lɔlɔ̃nu le anyigba dzi le Mesia Fiaɖuƒea ƒe Ƒe Akpe Ðeka Dziɖuɖua me. Fiaɖuƒe ma neva kaba!
Nyati sia ƒe memamã 5-24 me toto
◻ Kristodukɔa ƒe alakpanuwɔna kawoe wole ʋɔnu drɔ̃mee fifia?
◻ Alesi ʋɔnudɔdrɔ̃a akeke ɖe enui ŋu nya kae míese le Yeremya 25:12-38?
◻ Hlɔ̃biabiakplu kae wotsɔ na dukɔwo katã?
◻ Amekawoe nye lãkplɔvi siwo fa avi hedo aƒa, eye nukatae wotɔtɔ?
[Nɔnɔmetata si le axa 18]
Yehowa tia nusi wòazã atsɔ atsrɔ̃ Kristodukɔae
[Nɔnɔmetata si le axa 23]
Ne xaxa gã la ƒe ahom sesẽawo tu vɔ la, anyigba si ŋuti wokɔ axɔ ɖe eteƒe