“Ðo To Yehowa Ƒe Gbe Ko”

1, 2. Aleke ame siwo ‘lé woawo ŋutɔ woƒe mɔ tsɔ’ la wɔa nui zi geɖe, eye nu ka tae wòle be nàƒo asa na nɔnɔme ma?

TOÐOÐO megadzɔa dzi na ame geɖe egbea o. Fifia ya, amewo megadina be yewoabu ‘nu si nye nyui alo vɔ̃’ ŋu gɔ̃ hã hafi awɔ nyametsotso o. Ke boŋ, ‘Wɔ nu si wò ŋutɔ nèdi’ alo ‘Ame sia ame nelé ye ŋutɔ ƒe mɔ tsɔ’ ye va le tsia dzi. Esia tae ʋukulawo daa ʋukusewo dzi, dɔwɔƒewo megaɖia anukware o, eye dziɖuɖumegãwo daa se siwo woawo ŋutɔ wokpe asi ɖe eŋu wode la dzi. ‘Ame sia ame nelé ye ŋutɔ ƒe mɔ tsɔ’ ƒe nɔnɔme gbegblẽ si me afɔku le, si bɔ egbea la, nɔ anyi le Yeremiya ŋɔli hã.—Yer. 8:6.

² Gake wò ya ènya be mele be ame siwo di be Ŋusẽkatãtɔ la nakpɔ ŋudzedze ɖe yewo ŋu ‘nalé woawo ŋutɔ woƒe mɔ atsɔ o.’ Enye dzidzɔ be Yeremiya na míekpɔ vovototo si le ame siwo gbe “toɖoɖo Yehowa ƒe gbe” kple ame siwo ɖo toe la dome. (Yer. 3:25; 7:28; 26:13; 38:20; 43:4, 7) Ele be mía dometɔ ɖe sia ɖe nadzro eɖokui me ahakpɔe ɖa be toɖolae yenye hã. Nu ka tae? Elabena Satana ƒe ŋku biã vevie be yeagblẽ Yehowa subɔlawo ƒe nuteƒewɔwɔ dome. Ewɔa nu abe ale si da bena ɖi kpoo hedzea nu dzi le vo me ene. Ne míeɖoe kplikpaa be míaɖo to Yehowa ƒe gbe la, esia akpe ɖe mía ŋu míasi le da ma ƒe aɖi wuamea nu. Ke nu kae ado ŋusẽ mí be míaɖo to Yehowa ƒe gbe ɣesiaɣi? Yeremiya ƒe nuŋlɔɖiawo akpe ɖe mía ŋu.

 3. Nu ka tae Yehowa kpɔ mɔ abia tso mía si be míaɖo to ye?

³ Nu ka tae wòsɔ be míaɖo to Yehowa ɣesiaɣi? Susu siwo tae dometɔ ɖeka dze le nya siwo Yeremiya gblɔ tso Yehowa ŋu me be: “Eyae nye ame si tsɔ eƒe ŋusẽ wɔ anyigba, etsɔ eƒe nunya ɖo xexea me te.” (Yer. 10:12) Yehowae nye xexe bliboa ƒe Dziɖulagã. Ele be míavɔ̃e wu dziɖula bubuawo katã. Ekpɔ mɔ abia tso mía si be míaɖo to yeƒe se dzɔdzɔeawo, siwo li ɖe míaƒe nyonyo ta.—Yer. 10:6, 7.

4, 5. (a) Nyateƒenya ka mee kɔ na Yudatɔwo le kuɖiɣiwo? (b) Aleke Yudatɔwo ɖee fia be yewogbe ‘agbetsi’ si tso Yehowa gbɔ la? (d) Aleke nàwɔ ano ‘agbetsi’ si Mawu nana la?

⁴ Menye xexea me katã ƒe Dziɖulagã dzaa koe Yehowa nye o, eyae léa míaƒe agbe ɖe te hã. Yehowa na Yudatɔ siwo nɔ agbe le Yeremiya ŋɔli la se nyateƒenya sia gɔme. Esi wonɔ Egipte la, Nil Tɔsisia me tsiwo nue wonɔa agbe ɖo, gake nɔnɔmea to vovo esi wova Ŋugbedodonyigbaa dzi. Tsidzadza koŋ nue Mawu ƒe amewo nɔa agbe ɖo azɔ, eye zi geɖe la, woɖea tsidowo be tsi naxa ɖe eme. (5 Mose 11:13-17) Yehowa koe ate ŋu ana tsi nadza be nuku nawɔ. Ate ŋu ana ku naɖi hã. Esia tae le Yeremiya ŋɔlimetɔwo ƒe tomaɖomaɖo ta la, ku ɖina enuenu ale gbegbe be woƒe nukuwo kple waingblewo fiãna, eye woƒe tsidowo kple vudowo me ƒuna kplakplakpla.—Yer. 3:3; 5:24; 12:4; 14:1-4, 22; 23:10.

⁵ Yudatɔ mawo kpɔ asixɔxɔ si le tsidzadza ŋu la dze sii, gake wogbe ‘agbetsi’ si Yehowa na wo femaxee ya. Woɖoe koŋ gbe toɖoɖo Mawu ƒe Sea heɖo ŋu ɖe dukɔ siwo ƒo xlã wo ƒe kpekpeɖeŋu ŋu. Eya ta esɔ be wogblɔ tso wo ŋu be wokɔ tsi ɖe tsido siwo gɔme ŋɔ me le kuɖiɣi wòɖuɖu, eye wokpɔ emetsonuawo. (Xlẽ Yeremiya 2:13; 17:13.) Míadi gbeɖe be míaɖe afɔ ma tɔgbi ahahe afɔku ava mía ɖokui dzi o. Yehowa to eƒe Nya la dzi le mɔfiame geɖe nam mí egbea. Edze ƒãa be ne míesrɔ̃a nu edziedzi henɔa agbe ɖe nu si míesrɔ̃na nu ko hafi ‘agbetsi’ ma aɖe vi na mí.

 6. (a) Nɔnɔme kae Fia Zedekiya ɖe fia ku ɖe toɖoɖo Yehowa ŋu? (b) Nu kae ɖee fia be Zedekiya mewɔ nu le nunya me o?

⁶ Esi ɣeyiɣia nɔ dedem be Mawu nadrɔ̃ ʋɔnu Yuda la, toɖoɖo va hiã vevie ŋutɔ. Ne Yudatɔ aɖe di be Yehowa nakpɔ ŋudzedze ɖe ye ŋu ahakpɔ ye ta la, ke ele be wòatrɔ dzi me ahaɖo toe. Nyametsotso sia tututue dze ŋgɔ Fia Zedekiya. Eƒe dzi melé ɖe nu dzɔdzɔe wɔwɔ ŋu o. Esi eteviwo di be yewoawu Yeremiya la, dzi menɔ eƒo wògbe na wo o. Abe ale si míekpɔe le ta si do ŋgɔ me ene la, Ebed-Melex ye va xɔ na Yeremiya. Nudzɔdzɔ sia megbee Yeremiya xlɔ̃ nu Zedekiya be: “Ðo to Yehowa ƒe gbe ko.” (Xlẽ Yeremiya 38:4-6, 20.) Ðe wòle be fia la naɖo to Mawu ne eme nanyo nɛ hafi.

 7. Nɔnɔme siwo ate ŋu ado wò toɖoɖo kpɔ dometɔ aɖewo ɖe?

⁷ Toɖoɖo Yehowa hiã vevie egbea abe ale si wònɔ le Yeremiya ŋɔli ene. Ðe nèɖoe kplikpaa be yeaɖo to Yehowa? Ne èle nane dim le Internet dzi eye nudogoɖenunutɔe nèva ke ɖe amamaɖeɖenuwo ŋu ɖe, ɖe nàkpɔe sẽea, alo ɖe nàɖu ɖokuiwò dzi atsii enumake? Ke ne wò dɔwɔhati alo sukuhati dzimaxɔsetɔ aɖe do lɔlɔ̃nya ɖe gbɔwò ya ɖe? Ðe dzi anɔ ƒowò nàgbea? Ðe xɔsegbelawo ƒe agbalẽ siwo le Internet dzi xexlẽ adzro wòa, alo ɖe woanyɔ ŋu na wò? Ne nɔnɔme siawo tɔgbi dze ŋgɔ wò la, ɖo ŋku Yeremiya 38:20 me nyawo dzi.

8, 9. (a) Nu ka tae nunya le eme be nàlɔ̃ axɔ hamemetsitsiwo ƒe aɖaŋuɖoɖo? (b) Ne eva hiã be hamemetsitsiwo naɖo aɖaŋu na wò enuenu la, aleke wòle be nàbu esiae?

⁸ Yehowa dɔ Yeremiya wòxlɔ̃ nu eƒe amewo enuenu be: “Mia dome ame sia ame netrɔ tso eƒe mɔ vɔ̃wo dzi, miɖɔ miaƒe nuwɔnawo ɖo.” (Yer. 7:3; 18:11; 25:5; xlẽ Yeremiya 35:15.) Kristotɔ hamemetsitsi siwo li egbea hã dzea agbagba nenema ke be yewoakpe ɖe haxɔsetɔwo ŋu be woagadze gbɔgbɔmefɔku o. Ne hamemetsitsiwo xlɔ̃ nu wò be nàtsri afɔɖeɖe gbegblẽ aɖe alo nuwɔna aɖe si ate ŋu akplɔ wò ade afɔku me la, anyo be nàɖo to wo. Abe Yeremiya ene la, woƒe taɖodzinu koe nye be yewoakpe ɖe ŋuwò.

⁹ Ɣeaɖewoɣi la, ahiã be hamemetsitsiwo nagaɖo ŋku Biblia me gɔmeɖose aɖe si dzi wohe wò susu yi va yi la dzi na wò. Nyae be aɖaŋuɖoɖo na ame enuenu mele bɔbɔe o, eye esia gasesẽna ɖe edzi ne ame si wole aɖaŋua ɖom na la ɖe Yeremiya ŋɔlimetɔwo ƒe nɔnɔme fia. Ne hamemetsitsiwo xlɔ̃ nu wò enuenu la, se egɔme be esia nye kpeɖodzi be Yehowa lɔ̃ wò. Azɔ hã, de dzesii be ne ɖe Yudatɔ mawo xɔ Yeremiya ƒe nyawo de eme la, anye ne magahiã be wòaxlɔ̃ nu wo atraɖii o. Ɛ̃, ne mèdi be woaɖo aɖaŋu na ye enuenu o la, nyuitɔae nye be nàwɔ tɔtrɔ kaba.

10. Nu ka tae Yehowa di nanewo tso mía si hafi wòatsɔ míaƒe nu vɔ̃wo ake mí?

¹⁰ Ne míedze agbagba ʋuu hã la, míate ŋu aɖo to Yehowa le nuɖoanyi sia me le mɔ deblibo nu gbeɖe o. Eya ta míeda akpe be ne vodada ɖi ɖe mí la, Yehowa lɔ̃na faa be yeatsɔe ake mí. Gake esia mefia be ne ame nya wɔ nu vɔ̃ ko la, ɖeko Mawu tsɔnɛ kenɛ o. Nu ka tae? Elabena nu vɔ̃ nyɔa ŋu na Yehowa. (Yes. 59:2) Eya ta ebia nanewo tso mía si hafi wòatsɔ míaƒe nu vɔ̃wo ake mí.

11. Nu ka tae míate ŋu agblɔ be nu vɔ̃ aɖeke mate ŋu anɔ ɣaɣla o?

¹¹ Abe ale si míekpɔe va yi ene la, Mawu ƒe dzigbɔɖi kple nublanuikpɔkpɔ ŋuti nukpɔsusu totro va su Yudatɔ siwo nɔ agbe le Yeremiya ŋɔli la si, si na wotsɔ tosesẽ ɖo dɔe. Ðe wòate ŋu adzɔ be nɔnɔme ma tɔgbi nava su Mawu subɔla aɖe si egbea? Ɛ̃, ate ŋu adzɔ ne eŋea aɖaba ƒu Yehowa ƒe ŋkuɖodzinyawo dzi hele nuvɔ̃gbe nɔm. Le go aɖewo me la, esia dzena gaglã, le kpɔɖeŋu me, ne ame aɖe ɖe ahasisrɔ̃. Gake ne ame si gbe toɖoɖo Yehowa ƒe nu vɔ̃ le ɣaɣla ɖe amegbetɔwo hã la, ele eɖokui dem afɔku me. Ame si le agbe eve nɔm ate ŋu aflu eɖokui be, ‘Ame aɖeke manya o.’ Ke hã, nyateƒeae nye be, Mawu nya nu si le míaƒe susu kple míaƒe dzi me, eye wòkpɔa nu sia nu si míewɔna le ɣaɣlaƒe. (Xlẽ Yeremiya 32:19.) Nu kae wòle be ame nawɔ ne ekpɔe be yemeɖo to Mawu o?

12. Nu kae wòahiã ɣeaɖewoɣi be hamemetsitsiwo nawɔ atsɔ akpɔ hamea ta?

¹² Yudatɔ geɖewo do toku nuxlɔ̃ame si Yehowa na wo to Yeremiya dzi enuenu la. Ate ŋu adzɔ egbea hã be ame si wɔ nu vɔ̃ gã nagbe dzimetɔtrɔ, eye mabu kpekpeɖeŋu si hamemetsitsiwo di be yewoanae la ɖe ɖeke me o. Ne edzɔ alea la, hamemetsitsiwo aɖe amea le haa me atsɔ akpɔ hamea ta abe ale si Ŋɔŋlɔawo fia mɔe ene. (1 Kor. 5:11-13; kpɔ aɖaka si nye “Wozu Semanɔsitɔwo,” le axa 73.) Gake ɖe ema fia be mɔkpɔkpɔ aɖeke megali be Yehowa nakpɔ ŋudzedze ɖe amea ŋu oa? Menye nenemae kura o. Israel viwo dze aglã eteƒe mekɔ o, gake Mawu gblɔ na wo be: “Migatrɔ va, eye mahaya mi tso miaƒe tatrawo me!” (Yer. 3:22)a Yehowa di be nu vɔ̃ wɔlawo nagatrɔ ava ye gbɔ. Ɛ̃, efia ale si woawɔe hã wo.

13. Hafi ame si wɔ nu vɔ̃ nate ŋu atrɔ ava Yehowa gbɔ la, nu kawo gɔmee wòle be wòase?

¹³ Hafi ame aɖe nate ŋu atrɔ ava Mawu gbɔ abe ale si Yeremiya de eƒe dzi ƒoe ene la, ele be wòadzro eɖokui me ahase egɔme be yeɖe afɔ gbegblẽ, eye wòana Ŋɔŋlɔawo nakpe ɖe eŋu wòawɔ tɔtrɔ siwo hiã. Yudatɔ siwo nɔ anyi le Yeremiya ŋɔli gbe wo ɖokuiwo me dzodzro alea, eya tae wometrɔ dzi me o. Esi womekpɔ ale si gbegbe woƒe nu vɔ̃wo keke tae dze sii o ta la, Yehowa mate ŋu atsɔe ake wo o—eye metsɔe ke wo hã o. (Xlẽ Yeremiya 8:6.) Gake nu vɔ̃ wɔla si trɔ dzi me ya sea egɔme be yedze agɔ le Yehowa dzi, eye yeƒo ɖi Mawu kple Kristo hamea siaa ƒe ŋkɔ. Ame si trɔ dzi me vavã la ase veve vevie ɖe nu si eƒe nu vɔ̃a gblẽ le ame bubuwo ŋu ta. Ase egɔme hã be ne yeƒe dzimetɔtrɔ ƒe todede sɔ kple nu vɔ̃ siwo yewɔ ƒe kpekpeme ko hafi Yehowa atsɔe ake ye. Gake nu bubu aɖewo hã gali wòle be ame nawɔ hafi Mawu nagakpɔ ŋudzedze ɖe eŋu.

14. Aleke ame awɔ ‘atrɔ ɖe Yehowa ŋu le anukware me’? (Kpɔ aɖaka si nye “Nu Kae Nye Dzimetɔtrɔ?” hã.)

¹⁴ Ame si trɔ dzi me vavã la dzroa eɖokui me nyuie be yeanya yeƒe dzimedidiwo, numamewo, kple nu siwo ʋãa ye yewɔa nu. (Xlẽ Konyifahawo 3:40, 41.) Alé ŋku ɖe ale si wònɔa agbee ŋu akpɔe ɖa be nu kawo mee yegbɔdzɔ le hã. Le kpɔɖeŋu me, ate ŋu akpɔe ɖa be aleke yewɔa nu ɖe ga, ame si ƒe vidzinu to vovo na ye tɔ, aha muame kple atama nono, alo Internet zazã ŋu hã. Abe ale si ko nyɔnu kua kutri tutua eƒe xɔ ƒe gogloeƒewo kekeake bene xɔa me nanɔ dzadzɛ ene la, ele be ame si trɔ dzi me nadze agbagba atutu ɖinu ɖe sia ɖe ɖa le eƒe tamesusu kple nuwɔnawo me, nu siwo wòwɔna le ɣaɣlaƒe hã le eme. Ele be wòato nu siwo Mawu di tso esi wɔwɔ kple agbenɔnɔ ɖe eƒe dzidzenuwo nu dzi ‘atrɔ ɖe Yehowa ŋu le anukware me.’ Yudatɔ siwo nɔ anyi le Yeremiya ŋɔli dometɔ aɖewo wɔ “alakpanu” be yewotrɔ ɖe Yehowa ŋu. Wowɔ ameŋkumenu abe ɖe wose veve ɖe woƒe nu vɔ̃wo ta ene, evɔ wometrɔ dzi me ŋutɔŋutɔ o. (Yer. 3:10) Gake ame si di be woatsɔ yeƒe nu vɔ̃wo ake ye vavã ya medaa alakpa na Yehowa kple eƒe hamea o. Menye didi be yeagaɖu ŋukpe o, alo be yeƒe ƒometɔ kple hamea me tɔwo nagade ha kpli ye ye nɔa vevie nɛ o, ke boŋ eƒe didie nye be yeatrɔ megbe de nu gbegblẽ siwo yewɔ la keŋkeŋ bene Mawu natsɔe ake ye ahakpɔ ŋudzedze ɖe ye ŋu.

15. Aleke nu vɔ̃ wɔla si trɔ dzi me vavã ado gbe ɖae?

¹⁵ Dzimetɔtrɔ ƒe dzesi vevi bubue nye gbedodoɖa. Le blema la, enye nu si bɔ be amewo kɔa woƒe asiwo dzi ne wole gbe dom ɖa. Egbea, ne ame aɖe trɔ dzi me vavã la, ‘akɔ eƒe dzi ɖe dzi ɖo ɖe Mawu, ke menye eƒe asiwo ko o,’ abe ale si Yeremiya gblɔe ene. (Kony. 3:41, 42) Vevesese ɖe nu vɔ̃ si wòwɔ ta aʋãe wòatrɔ agbenɔnɔ wòawɔ ɖeka kple eƒe gbedodoɖaa, ne wòadze ƒãa be edi be woatsɔe ake ye vavã. Ado gbe ɖa anukwaretɔe, tso keke dzi me ke.

16. Nu ka tae wònyo be ame si wɔ nu vɔ̃ la nagatrɔ ava Mawu gbɔ?

¹⁶ Ðikeke mele eme o be ebia ɖokuibɔbɔ hafi ame nalɔ̃ ɖe eƒe nu vɔ̃wo dzi. Gake nu ma tututue Yehowa di tso ame siwo wɔ nu vɔ̃ si bene woate ŋu atrɔ ava ye gbɔ. Ne ame aɖe se veve ɖe eƒe nu vɔ̃ ta anukwaretɔe la, Mawu hã sea veve ɖe amea nu. Eƒe ‘dɔme atrɔ’ ɖe eŋu, elabena edi vevie be yeatsɔ ame siwo katã trɔ dzi me la ƒe nu vɔ̃wo ake wo abe ale si ko wòwɔe na Israel vi siwo trɔ gbɔ tso aboyo me ene. (Yer. 31:20) Aleke gbegbe míaƒe dzi dzea emee nye esi be míenya be mɔkpɔkpɔ kple ŋutifafa ƒe tamee Mawu ɖo ɖe ame siwo aɖo toe ahatrɔ ava egbɔ ŋu! (Yer. 29:11-14) Woagate ŋu ade ha kple Mawu ƒe amewo ake.

17, 18. (a) Ame kawoe nye Rexab viwo? (b) Nɔnɔme nyui kae woɖe fia abe ale si wòdze le nɔnɔmetata si le axa 77 me ene?

¹⁷ Toɖoɖo Yehowa ɣesiaɣi kpɔa ame ta. Esia ƒe kpɔɖeŋu dze le ale si Rexab vi siwo nɔ anyi le Yeremiya ŋɔli wɔ nui me. Ƒe alafa eve aɖewo do ŋgɔ la, wo tɔgbui Yonadab, Kenitɔ la, ame si kpe asi ɖe Yehu ŋu nuteƒewɔwɔtɔe, de se aɖewo na wo. Seawo dometɔ ɖekae nye be woagano wain o. Yonadab ku gbe aɖe gbe ʋĩi ke, gake Rexab viwo lé eƒe sea me ɖe asi. Gbe ɖeka esi Yeremiya di be yeado wo kpɔ la, ekplɔ wo yi gbedoxɔa ƒe nuɖuxɔ me eye wòna wain wo be woano. Woɖo eŋu be: “Míele wain no ge o.”—Yer. 35:1-10.

¹⁸ Rexab viwo ɖoe kplikpaa be togbɔ be yewo tɔgbuia ku xoxoxo hã la, ele be yewoaɖo toe. Ele be Mawu subɔla vavãwo ƒe didi vevie be yewoaɖo to yewoƒe Mawu gbagbe la nu nasẽ wu esia gɔ̃ hã. Rexab viawo ƒe toɖoɖo wɔ dɔ ɖe Yehowa dzi ŋutɔ. Esia to vovo na tomaɖomaɖo ƒe nɔnɔme si le Yudatɔwo si. Mawu do ŋugbe na Rexab viawo be yeakpɔ wo ta le afɔku si ava dukɔa dzi me. Ðe mesɔ be míaƒo nya ta be Yehowa akpɔ ame siwo ɖoa toe ɣesiaɣi la ta le xaxa gã si gbɔna me oa?—Xlẽ Yeremiya 35:19.

19. Aleke Mawu akpɔ mía ta ne míeɖoa toe?

¹⁹ Mele be míasusui be blemaɣeyiɣiwo me koe Mawu kpɔ eƒe amewo ta o. Egbea hã la, Yehowa kpɔa ame siwo ɖoa toe la ta be woagadze gbɔgbɔmefɔku o. Abe ale si woɖoa gli kɔkɔwo ƒoa xlã blemaduwo bene wòakpɔ dua me tɔwo ta ene la, Mawu ƒe sewo kpɔa ame siwo srɔ̃nɛ henɔa agbe ɖe enu la ta. Ðe nàɖe mɔ Mawu ƒe dzidzenuwo nanye glikpɔ ɖe ŋuwòa? Ka ɖe edzi be ne èwɔe alea la, eme anyo na wò. (Yer. 7:23) Nuteƒekpɔkpɔ geɖewo ɖo kpe esia dzi.—Kpɔ aɖaka si nye “Toɖoɖo Yehowa Kpɔa Ame Ta.”

20, 21. (a) Kakaɖedzi kae wòle be wòanɔ asiwò esi nèle Yehowa subɔm? (b) Aleke Fia Yoyakim wɔ nu ɖe nya siwo Mawu gblɔ to Yeremiya dzi ŋui?

²⁰ Wò ƒometɔwo, dɔwɔhatiwo, sukuhatiwo, alo dziɖuɖumegãwo ƒe tsitretsiɖeŋu ate ŋu ana Mawu ƒe lɔlɔ̃nu wɔwɔ nasesẽ na wò. Ke hã, ka ɖe edzi be ne èɖoa to Yehowa ɣesiaɣi la, ado ŋusẽ wò le nɔnɔme sesẽtɔ kekeake gɔ̃ hã me. Ðo ŋkui be esi Mawu do ŋugbe na Yeremiya be yealée ɖe te le tsitretsiɖeŋu sesẽwo me la, ewɔ eƒe ŋugbedodoa dzi. (Xlẽ Yeremiya 1:17-19.) Ɣeyiɣi siwo me wòdze le ƒãa be Mawu megblẽ Yeremiya ɖi o dometɔ ɖekae nye Fia Yoyakim ƒe dziɖuɣi.

²¹ Israel fiawo dometɔ aɖeke metsi tre ɖe Mawu ƒe nyagblɔɖilawo ŋu vɔ̃ɖivɔ̃ɖitɔe de Yoyakim nu o. Esia dze le nu si wòtu kple Uriya, si hã nye nyagblɔɖila le Yeremiya ŋɔli la me. Esi Yehowa ƒe nyagblɔɖila Uriya si yi Egipte la, Fia vɔ̃ɖi Yoyakim dɔ ame woti eyome yi keke afi ma ɖalée gbɔe, eye fia la na wowui. (Yer. 26:20-23) Le Yoyakim ƒe fiaɖuɖu ƒe ƒe enelia me la, Yehowa gblɔ na Yeremiya be wòaŋlɔ nya siwo katã yegblɔ nɛ va se ɖe ɣemaɣi la ɖe agbalẽ me, eye emegbe wòaxlẽe na amewo le gbedoxɔa me. Esi Yoyakim ƒe asi ka Yeremiya ƒe agbalẽa la, ena fiasãmedɔwɔla aɖe xlẽe nɛ. Ne wonya xlẽ axa aɖe vɔ ko la, fia la lãnɛ dea dzo me, evɔ amegã siwo nɔ eŋu dometɔ aɖewo xlɔ̃ nui be wòagawɔe o hafi. Azɔ edɔ ame be woaɖalé Yeremiya kple Barux vae na ye. Ðe eƒe asi tu woa? Ao, elabena “Yehowa tsɔ wo ɣla.” (Yer. 36:1-6; xlẽ Yeremiya 36:21-26.) Yehowa meɖe mɔ Yoyakim wɔ nuvevi nuteƒewɔla eve siawo o.

22, 23. Nu kae nèsrɔ̃ tso kpekpeɖeŋu si Mawu nana ŋu le mía nɔvinyɔnu si le titina Asia ƒe nuteƒekpɔkpɔa me?

²² Ne ehiã la, Yehowa ate ŋu atsɔ esubɔla siwo li egbea dometɔ aɖewo hã aɣla be afɔku nagadzɔ ɖe wo dzi o. Gake nu si wòwɔna zi geɖee nye be, enaa nunya kple dzinɔameƒo wo ale be woaɖo to ye ahayi edzi aɖe gbeƒã nya nyuia. Le kpɔɖeŋu me, Gulistan nye mía nɔvinyɔnu dzilaɖekɛ aɖe si si vi ene le. Yehowa lée ɖe te le nɔnɔme sesẽwo me. Ɣeyiɣi aɖee nye esia la, eya ɖeka koe nye Ðasefo le nuto gã aɖe si me woɖo asi Fiaɖuƒegbeƒãɖeɖedɔa dzi le le titina Asia. Hame si tsɔ egbɔ wu la le afi si didi abe kilometa 400 sɔŋ ene, si wɔe be mete ŋu dea ha kple Kristotɔ bibi bubuwo edziedzi o. Togbɔ be edoa go tsitretsiɖeŋu kple kuxi bubuwo hã la, eɖea gbeƒã tso aƒe me yi aƒe me, eye wòke ɖe dzinyuitɔ geɖewo ŋu. Nyitsɔ laa la, nyatakakawo ɖee fia be esrɔ̃a Biblia kple ame 20 aɖewo. Woɖo ƒuƒoƒo aɖe hã, si me tɔwo le dzidzim ɖe edzi, eye wòdzea agbagba kpɔa Yehowa ƒe alẽ siawo ƒe nuhiahiãwo gbɔ na wo.

²³ Abe ale si Mawu kpe ɖe Yeremiya, Gulistan, kple Ðasefo toɖola bubuwo ŋui ene la, ele klalo be yeakpe ɖe wò hã ŋuwò. Ðoe kplikpaa be yeaɖo toe abe Dziɖula ene wu amegbetɔwo. Esia akpe ɖe ŋuwò be tsitretsiɖeŋu kple kplamatsɛdonu bubuwo mana nàdzudzɔ nuƒoƒo tso Mawu vavã ɖeka kolia la ŋu na amewo le wò nutoa me o.—Yer. 15:20, 21.

24. Aleke toɖoɖo aɖe vi na wò fifiae?

²⁴ Toɖoɖo mía Wɔla la koe ate ŋu ana míakpɔ dzidzɔ kple dzidzeme vavãtɔ le agbe me. (Yer. 10:23) Esi nèva srɔ̃ nu siwo Yeremiya ŋlɔ ɖi tso toɖoɖo ŋu la, ɖe nèkpɔ ale si nàwɔ aɖe mɔ Yehowa nafia mɔ wò le agbe me nyuie wua? Eƒe mɔfiamewo dzi wɔwɔ koe ana míakpɔ dzidzɔ vavãtɔ ahakpɔ dzidzedze le agbe me. Yehowa le nu xlɔ̃m mí be: “Mise nye gbe, . . . be eme nanyo na mi.”—Yer. 7:23.