“Ðe Menye Esia Woyɔna Be Sidzedzem Oa?”

1, 2. Nu ka tae mesɔ be Yoyakim natu fiasã yeye hafi o?

FIA YOYAKIM le aƒe tsom. Aƒe gã aɖe ŋutɔe wòanye. Anye dziƒoxɔ, eye xɔawo me akeke nyuie. Fesre gãwo anɔ eŋu ale be xɔawo me nagado viviti le ŋkeke me o, ya fafɛ naƒo to wo me nyuie bene fia la kple eƒe ƒomea ƒe dzi nadze eme. Woafa Lebanon sederʋuƒo siwo ʋẽna lilili ɖe xɔawo me atsɔ aɖo atsyɔ̃ nɛ. Eye woasi aŋɔ dzẽ si wodɔ tso duta, si ame ŋkutawo kple amegãwo dina vevie la ɖe eme be wòanya kpɔ ɖe edzi.—Yer. 22:13, 14.

² Menye ga vie wòagblẽ ɖe xɔtudɔ sia ŋu o. Ɣemaɣi la, edze ƒãa be ga siwo wozãna le dukɔa ta kpɔkpɔ me kple fe gbogbo siwo Egiptetɔwo bla na wo xexe wɔe be ganyawo yi to. (2 Fia. 23:33-35) Gake Yoyakim dze agbagba di mɔ si dzi wòato atu eƒe fiasã yeyea. Eɖoe be yemaxe fe na xɔtulawo o! Yoyakim zã wo abe kluviwo ene ɖokuitɔdiditɔe wowɔ dɔ nɛ dzodzro.

 3. Aleke Yoyakim ƒe nuwɔna to vovo na fofoa tɔe, eye nu ka tae?

³ Mawu to Yeremiya dzi bu fɔ Yoyakim ɖe eƒe ɖokuitɔdidia ta.a Eɖo ŋku edzi na fia la be fofoa Yosiya ya ve dukɔa ƒe dɔwɔlawo kple ame dahewo nu eye wòwɔ dɔmenyo manyagblɔ na wo. Yosiya xɔ woƒe ʋɔnudrɔ̃nyawo ɖe akɔ gɔ̃ hã. Esi Yehowa he Yoyakim ƒe susu yi ale si fofoa Yosiya ƒe dɔme trɔna ɖe ame dahewo ŋui dzi vɔ la, ebiae be: “Ðe menye esia woyɔna be sidzedzem oa?”—Xlẽ Yeremiya 22:15, 16.

 4. Nu ka tae wòle be sidzedze Yehowa nanɔ vevie na wò?

⁴ Esi wònye gbegblẽm ko nɔnɔmeawo le ɖe edzi le Satana ƒe xexe sia me ta la, míehiã kpekpeɖeŋu kple takpɔkpɔ si Yehowa nana ame siwo nyae nyuie. Eya ta ele be míate ɖe Mawu ŋu kplikplikpli fifia wu tsã. Ehiã hã be míasrɔ̃ eƒe nɔnɔme nyuiawo be míate ŋu akpɔ dzidzedze le gbeƒãɖeɖe nya nyuia me. Gake ɖewohĩ àbia be, ‘Aleke Kristotɔ awɔ anya Yehowa nyuie abe ale si Fia Yosiya nyae ene?’

5, 6. (a) Nu kawoe vifofo nyui ƒe viwo ate ŋu asrɔ̃ tso egbɔ? (b) Be míaɖee afia be míenya Yehowa la, nu ka tae mele be míawɔ nu abe Yoyakim ene o?

⁵ Wò ya de ŋugble tso ale si vifofo nyui ƒe nuwɔnawo kpɔa ŋusẽ nyui ɖe viawo dzii ŋu kpɔ. Le kpɔɖeŋu me, ne wokpɔa wo fofo wònaa nu ame siwo dzi nu mede o la, ate ŋu awɔe be woava zu ame siwo ʋua asi me. Ale si wo fofo wɔa nu ɖe wo dada ŋu le lɔlɔ̃ kple ameŋububu me ate ŋu akpe ɖe wo ŋu woanya ale si woawɔ nu ɖe ame si ƒe vidzinu to vovo na wo tɔ ŋu nyuie. Ne wonya be yewo fofo toa nyateƒe eye wòɖia anukware le ganyawo me la, aʋã wo woanye nyateƒetolawo kple anukwareɖilawo. Ɛ̃, wo fofo ƒe nɔnɔme nyuiwo kple nuwɔnawo nyanya nyuie ate ŋu awɔe be ne wova tsi la, woadi be yewoawɔ nu abe yewo fofo ene.

⁶ Le mɔ ma ke nu la, be Kristotɔ nanya Yehowa abe ale si Yosiya nyae ene mefia be wòanya be eyae nye Xexea Me Katã Dziɖulagã ko evɔ o. To Biblia xexlẽ dzi la, Kristotɔ va nyaa ale si Mawu wɔa nu ɖe amewo ŋui, eye wòdina be yeasrɔ̃ ye Fofo si le dziƒo la. Lɔlɔ̃ si le esi na Yehowa nu anɔ sesẽm ɖe edzi gbe sia gbe ne esrɔ̃a ale si wòalɔ̃ nu siwo Mawu lɔ̃na ahalé fu nu siwo wòlé fui. Gake ame si ŋea aɖaba ƒu Mawu ƒe sewo kple ŋkuɖodzinyawo dzi, si na be mɔfiame siwo Mawu nana meɖea vi nɛ o ya mate ŋu agblɔ be yenya Mawu vavã la o. Ame sia sɔ kple Yoyakim si vuvu agbalẽ si me Yehowa ƒe nya siwo wògblɔ to Yeremiya dzi le la de dzo me.—Xlẽ Yeremiya 36:21-24.

 7. Nu ka tae nàdi be yeanya Yehowa abe ale si Fia Yosiya nyae ene?

⁷ Hafi míakpɔ dzidzedze le míaƒe subɔsubɔdɔ kɔkɔea me ahakpɔ mɔ na agbe nɔnɔ le xexe yeyea me la, ele be míanya Yehowa nyuie. (Yer. 9:24) Mina míadzro Mawu ƒe nɔnɔme nyui siwo dze le Yeremiya ƒe nuŋlɔɖiawo me dometɔ ʋɛ aɖewo me kpɔ. Esi míele Mawu ƒe amenyenye ƒe akpa siawo me dzrom la, kpɔe ɖa be mɔ kawo dzie nàto anyae nyuie ahasrɔ̃ eƒe nɔnɔme nyuiawo abe ale si Fia Yosiya wɔe ene hã.

 8. Nu kae nye amenuveve?

⁸ Le gbegbɔgblɔ geɖe me la, esesẽ be woakpɔ nya ɖeka atsɔ aɖe Mawu ƒe nɔnɔme si nye amenuveve, alo lɔlɔ̃ si nu metsina o, gɔme. Biblia gɔmeɖegbalẽ aɖe gblɔ be nɔnɔme etɔ̃, siwo nye, nu si le eteƒe me léle ɖe asi sesĩe, kukuɖenuŋu ɖikaa, kple lɔlɔ̃, ye woƒo ƒu wònye Hebrigbe me nya ɖeka si gɔme woɖe be amenuveve. Nyagɔmeɖegbalẽ ma yi edzi be: “Ne woɖe Hebrigbe me nya sia gɔme eye nɔnɔme etɔ̃ siawo medze le eme o la, ke gɔmesesea mede keŋkeŋ o.” Esia fia be ame si vea ame nu ƒe nuwɔna dea ŋgɔ wu nu nyui wɔwɔ dzro ko. Esi amenuvela tsɔa ɖe le eme na ame vevie ta la, edzea agbagba ɖe sia ɖe be yeakpe ɖe amewo ŋu woƒe asi nasu nu siwo wohiã dzi, vevietɔ gbɔgbɔmenuwo. Didi be yeƒe nu nadze Mawu Ŋusẽkatãtɔ la ŋu koŋ ye ʋãnɛ wòɖea ɖokuitɔmadimadi sia fiana.

 9. Nu kae ale si Yehowa wɔ nu ɖe Israel viwo ŋu ɖe fia?

⁹ Mɔ nyuitɔ si dzi míato ase nya si gɔme woɖe le Biblia me be “amenuveve” gɔmee nye be míasrɔ̃ nu tso ale si Mawu wɔa nu ɖe esubɔla vavãwo ŋui tso gbe aɖe gbe ke la ŋu. Yehowa kpɔ Israel viwo ta henyi wo ƒe 40 sɔŋ le gbea dzi. Esi wova ɖo Ŋugbedodonyigbaa dzi la, Mawu ɖo ʋɔnudrɔ̃lawo na wo be woaɖe wo tso woƒe futɔwo si me eye woakpe ɖe wo ŋu woagatrɔ ɖe subɔsubɔ vavãtɔ ŋu. Esi Yehowa yi edzi nɔ wo ŋu le ɣeyiɣi nyuiwo kple vɔ̃awo siaa me ƒe alafa gbogbo mawo ta la, ete ŋu gblɔ na dukɔa be: “Metsɔ lɔlɔ̃ mavɔ lɔ̃ wò, eya ta meɖo amenuveve ɖi na wò didie alea.”—Yer. 31:3.b

10. Abe ale si Yudatɔ siwo nɔ aboyo me le Babilon ƒe kpɔɖeŋua ɖee fia ene la, aleke Yehowa ƒe amenuveve dze le ale si wòɖoa to gbedodoɖawoe me?

¹⁰ Le míaƒe ŋkekea me la, Mawu yi edzi le amenuveve ɖem fia le mɔ siwo ɖea vi na esubɔlawo tẽe nu. Wò ya de ŋugble tso gbedodoɖa ŋu kpɔ. Togbɔ be Yehowa sea gbe siwo katã amewo dona ɖa nɛ le anukwareɖiɖi me hã la, eɖoa to esubɔla ɖeadzɔgbewo ƒe gbedodoɖawo etɔxɛe. Ne míedoa gbe ɖa nɛ tso kuxi ɖeka aɖe ŋu atraɖii hã la, medoa dziku ɖe mía ŋu o, eye míaƒe gbedodoɖawo sese metinɛ hã o. Ɣeaɖeɣi la, Yehowa de gbe asi na Yeremiya wòɖo ɖe Yudatɔ siwo nɔ aboyo me le Babilon. Aboyome siawo nɔ adzɔge tso gbedoxɔa gbɔ kilometa 800 kple edzivɔ sɔŋ, si fia be wo gbɔ didi tso woƒe ƒometɔ kple xɔlɔ̃ siwo le Yuda gbɔ ŋutɔ. Gake woƒe adzɔgenɔnɔ tso gbedoxɔa gbɔ mewɔe be Yehowa do kpo gbe siwo wodo ɖa nɛ tsɔ bia eƒe amenuveve kple esiwo wotsɔ kafui la sese o. Esi wò susu le gbe siwo wò ŋutɔ nèdona ɖa tso dzi me ŋu la, kpɔ akɔfafa si gbegbe Yudatɔ mawo akpɔ esi wose Mawu ƒe nya siwo le Yeremiya 29:10-12 la ɖa!—Xlẽe.

11, 12. (a) Ŋugbe kae Yehowa do na Yerusalem tɔwo? (b) Kpekpeɖeŋu kae li na ame siwo wohe to na ɖe nu gbegblẽ si wowɔ ta?

¹¹ Míegakpɔ Yehowa ƒe amenuveve ŋuti kpeɖodzi bubu le ale si susu nyui nɔa esi ɖe amewo ŋui me. Esi Yerusalem tsrɔ̃ɣi nɔ gogom evɔ dua me tɔwo yi woƒe aglãdzedzea dzi—si nye aglãdzedze ɖe Mawu ŋu—ɖe, nu kae nɔ wo lalam? Dɔ awu wo woaku loo alo woatsi Babilontɔwo ƒe yi nu. Ne wo gbɔ nyo la, ke woazu aboyomewo le dzronyigba dzi ƒe geɖe ahaku atsi afi ma. Gake “nya nyui” aɖe le Yehowa si na wo dometɔ siwo atrɔ dzi me ahaɖɔ woƒe agbenɔnɔ ɖo. Edo ŋugbe be ‘yeatrɔ susu ɖe wo ŋu’ ahakplɔ wo agbɔe tso aboyo me le Babilon ava “teƒe sia,” si nye wo denyigbaa dzi. (Yer. 27:22) Eya ta woatso aseye agblɔ be: “Mikafu Yehowa Zebaot, elabena Yehowa ƒe dɔme nyo eye eƒe amenuveve li tegbee.”—Yer. 33:10, 11.

¹² Le Yehowa ƒe amenuveve ta la, enyea dzideƒotsoƒe na ame siwo le nɔnɔme siwo dzena abe womate ŋu awɔ naneke le eŋu o ene gɔ̃ hã me tom. Egbea, ame aɖewo li siwo nɔ Kristo hamea me kpɔ, gake wohe to si sɔ na wo ɖe nu gbegblẽ aɖe si wowɔ ta. Ðewohĩ woƒe dzitsinya le fɔ bum wo eye wòle sesẽm na wo be woagade ha kple Mawu ƒe amewo. Woanya tsi dzi be ɖe Yehowa atsɔ nu vɔ̃ si yewowɔ la ake yewo eye wòagakpɔ ŋudzedze ɖe yewo ŋu ake hã. “Nya nyui” aɖe le Mawu Ŋusẽkatãtɔ la si na ame siawo katã. Ne woawo ŋutɔ wonya lɔ̃ ko la, Yehowa ate ŋu akpe ɖe wo ŋu lɔlɔ̃tɔe woaɖɔ woƒe susu kple agbenɔnɔ ɖo. Eye nya si míegblɔ le memama si va yi me ate ŋu ava eme na woawo hã—be Yehowa ‘agakplɔ wo agbɔe va wo nɔƒe’ eye woagakpɔ dzidzɔ le eƒe amewo dome.—Yer. 31:18-20.

13. Nu ka tae wòle be ale si Yehowa lé Yeremiya ɖe tee nado ŋusẽ wò?

¹³ Esi Yehowa nye Mawu amenuvela ta la, eléa esubɔla wɔnuteƒewo ɖe te hã. Le Satana ƒe xexea ƒe ŋkeke mamlɛ siawo me la, susu geɖe li siwo ta míaka ɖe edzi be Yehowa alé ame siwo katã tsɔ Fiaɖuƒea ɖo nɔƒe gbãtɔ la ɖe te ahakpɔ wo ta. Ðo ŋku edzi be le Yerusalem ƒe ŋkeke mamlɛawo me la, Yehowa ŋue Yeremiya ɖo ŋu ɖo be wòana nuɖuɖu ye ahakpɔ ye ta. Mawu mena eƒe nyagblɔɖilaa ƒe ŋuɖoɖo ɖe eŋu zu dzodzro o. (Yer. 15:15; xlẽ Konyifahawo 3:55-57.) Ne nya sesẽ aɖe ɖi kpe wò la, kakaɖedzi nenɔ asiwò be Yehowa ɖoa ŋku wò nuteƒewɔwɔ dzi. Le eƒe amenuveve ta la, edi vevie be yealé wò ɖe te be nàte ŋu ado dzi le nɔnɔme sesẽ ɖe sia ɖe me.—Kony. 3:22.

14. Nu madzɔmadzɔ wɔwɔ ka teƒee wò ŋutɔ nèkpɔ nyitsɔ laa?

¹⁴ Woléa ame aɖewo dea gaxɔ me ƒe geɖe egbea ɖe nu vɔ̃ si menye woawoe wɔe hafi o ta. Edzɔna kura gɔ̃ hã be ʋɔnudrɔ̃ƒe tsoa kufia na ame aɖewo eye le wo wuwu vɔ megbe hafi wova kena ɖe ɖaseɖiɖiwo ŋu be menye woawoe dze agɔa hafi o. Dzila aɖewo léa woawo ŋutɔ wo viwo dzrana kluviwoe be ƒomea nate ŋu akpɔ ga aƒle nu aɖu. Ne èse nu madzɔmadzɔ wɔwɔ siawo tɔgbi ŋu nya ɖe, aleke nèsena le ɖokuiwò me? Aleke nèsusu be Yehowa sena le eɖokui me tso nu siawo ŋu? Biblia na eme kɔ ƒãa be Yehowa di be yeaɖe nu siwo katã doa nuxaxa na ame la ɖa. Eya koe ate ŋu awɔ esia. Eya ta ame dahewo kple ame siwo katã le fu kpem madzemadzee ate ŋu alé dzi ɖe ƒo. Yehowa, dzɔdzɔenyenye ƒe Mawu la, le afɔ siwo hiã la ɖem fifia be yeaɖe wo tso nɔnɔme sia me.—Yer. 23:5, 6.

15, 16. (a) Yehowa ƒe nɔnɔme vevi ka dzie Yeremiya he susu yii? (b) Nu ka tae nàte ŋu aka ɖe Mawu ƒe sewo kple ŋugbedodowo dzi?

¹⁵ Yeremiya ŋɔlimetɔ aɖewo nya be Mawu ƒe nɔnɔme vevi aɖee nye dzɔdzɔenyenye. Le kpɔɖeŋu me, nyagblɔɖilaa gblɔ be ate ŋu adzɔ be Israel viwo natrɔ dzi me tso woƒe nu vɔ̃wo me ahaɖo kpe woƒe dzimetɔtrɔa dzi kple atamkanya sia be: “Zi ale si Yehowa le agbe le nyateƒe me, eye wòdrɔ̃a ʋɔnu dzɔdzɔe hewɔa nu dzɔdzɔe!” (Yer. 4:1, 2, NW) Esia le eteƒe, elabena Yehowa mate ŋu awɔ nu madzɔmadzɔ gbeɖe o. Kpeɖodzi bubuwo hã li, si fia be Yehowa lɔ̃ dzɔdzɔenyenye.

¹⁶ Mawu wɔa eƒe nya dzi ɣesiaɣi eye mewɔa alakpanu gbeɖe o. Amegbetɔwo doa kpo woƒe ŋugbedodowo dzi wɔwɔ zi geɖe, gake Yehowa ya mele nenema o. Dzɔdzɔmese siwo wòɖo ɖi be woaɖe vi na mí kura gɔ̃ hã medoa kpo dɔwɔwɔ o. (Yer. 31:35, 36) Eya ta míate ŋu aɖo ŋu ɖe eƒe ŋugbedodowo kple afiatsotsowo ŋu ɣesiaɣi, elabena kpɔtsɔtsɔ aɖeke mele wo ŋu o.—Xlẽ Konyifahawo 3:37, 38.

17. (a) Nu kae Yehowa wɔna ne ele ʋɔnu drɔ̃m? (b) Nu ka tae nàte ŋu aka ɖe ale si hamemetsitsiwo kpɔa nyawo gbɔ le hamea mee la dzi? (Kpɔ aɖaka si nye, “Wodrɔ̃a Ʋɔnu Ðe Yehowa Teƒe,” le axa 148.)

¹⁷ Ne Yehowa le ʋɔnu drɔ̃m la, menɔa te ɖe nu si kpɔm amegbetɔwo le ɖeɖe ko dzi o. Ekpɔa nu yia ŋgɔ wu nu si ŋku kpɔna, eye wònyaa nyateƒe si le nya bliboa me. Eléa ŋku ɖe nu si ʋãa amewo hafi wowɔa nu hã ŋu. Egbea, ɖɔktawo te ŋu zãa mɔ̃ kple mɔnu deŋgɔ aɖewo tsɔ léa ŋku ɖe ame ƒe dzi ƒe dɔwɔwɔ ŋu hetoa esia dzi nyaa nɔnɔme si tututu me dzia le. Wote ŋu doa ame ƒe ayikuwo, siwo tsraa ʋua heɖea ɖinuwo le eme la hã kpɔ. Yehowa wɔa nu si de ŋgɔ wu ema. Edoa ame ƒe kpɔɖeŋudzia kpɔ be yeanya susu si le amea si, eye wòdzroa míaƒe kpɔɖeŋu ayikuwo me henyaa míaƒe seselelãme ememetɔwo. Eya ta ate ŋu akpɔ nu si ʋã ame wòwɔ nane kple ale si amea se le eɖokui me tso nu si wòwɔ ŋu. Nu gbogbo siwo ŋu wòkena ɖo ne elé ŋku ɖe mía ŋu tsitotsito alea menana wòtɔtɔna abe ale si wòate ŋu adzɔ ɖe amegbetɔwo ƒe ʋɔnudrɔ̃la bibitɔ kekeake kura gɔ̃ hã dzi ene o. Ke boŋ ezãa nu siwo katã ŋu wòkena ɖo ne elé ŋku ɖe mía ŋu la le mɔ si da sɔ nu ne ele ʋɔnu drɔ̃m mí.—Xlẽ Yeremiya 12:1a; 20:12.

18, 19. Ne míenya nu tso Mawu ƒe dzɔdzɔenyenye ŋu nyuie la, nu kae wòaʋã mí míawɔ?

¹⁸ Eya ta ne vo siwo nèda va yi nana wò dzitsinya ɖea fu na wò ɣeaɖewoɣi gɔ̃ hã la, àte ŋu aka ɖe Yehowa dzi bliboe. Nenɔ susu me na wò be Yehowa menye amenutsola si ƒe nya me sẽ eye wòadia vodada le ame ŋu o, ke boŋ enye Ʋɔnudrɔ̃la si sea veve ɖe ame nu hele klalo be yeakpe ɖe ame ŋu. Ne ède vovo ge do kpoe le nu gbegblẽ aɖe si nèwɔ va yi alo nane si ame aɖe wɔ ɖe ŋuwò ta la, ‘gblẽ nyaa ɖe Yehowa si me’ ne wòakpe ɖe ŋuwò nàɖu wò seselelãmea dzi ahaɖe susu ɖa le nyaa ŋu.c Mawu ate ŋu akpe ɖe ŋuwò nàkpɔ asixɔxɔ si gbegbe wòdena subɔsubɔdɔ kɔkɔe si wɔm nèle nɛ ŋu la adze sii.—Xlẽ Konyifahawo 3:58, 59.

¹⁹ Esɔ be Mawu si drɔ̃a ʋɔnu dzɔdzɔe nadi tso ame siwo di be wòakpɔ ŋudzedze ɖe yewo ŋu la si be woawo hã nalé dzɔdzɔenyenye me ɖe asi. (Yer. 7:5-7; 22:3) Mɔ vevitɔ si dzi míato aɖe Mawu ƒe dzɔdzɔenyenye afiae nye be míaɖe gbeƒã na ame sia ame nazãbubu manɔmee. Ne èdoa vevie nu le tɔtrɔyiwo kple Biblia nusɔsrɔ̃wo wɔwɔ me la, ekema èle Mawu ƒe dzɔdzɔenyenye deŋgɔ la ɖem fia le mɔ si ɖea vi ŋutɔŋutɔ nu. Nu ka ta míegblɔe nenema? Mawu di be ame ƒomeviwo katã nasrɔ̃ nu tso ye ŋu ne woakpɔ ɖeɖe. (Kony. 3:25, 26) Mɔnukpɔkpɔ gã ka gbegbee nye esi wònye be nànye Mawu ƒe hadɔwɔla ahaɖe eƒe dzɔdzɔenyenye afia le agbeɖeɖedɔ sia wɔwɔ me!

20. (a) Mawu ƒe nɔnɔme bubu ka dzie Yeremiya te gbe ɖo? (b) Ƒomedodo kae le ale si ‘nu vea’ Yehowae kple eƒe tsɔtsɔke dome? (Kpɔ aɖaka si nye “Gɔmesese Ka Nue Nu Si Yehowa Ðo Be Yeawɔ ‘Venɛ’ Le?”)

²⁰ Ame geɖe buna be fɔbuamenya sesẽwo sɔŋ koe le Yeremiya kple Konyifahawo ƒe agbalẽawo me. Ame siawo ŋea aɖaba ƒu tsɔtsɔke ŋu nya lédziname siwo Yehowa gblɔ na eƒe dukɔa woŋlɔ ɖe agbalẽ mawo me dzi. Yehowa xlɔ̃ nu Yudatɔawo be: “Mia dome ame sia ame netrɔ tso eƒe mɔ vɔ̃wo dzi, eye miɖɔ miaƒe zɔzɔme kple miaƒe nuwɔnawo ɖo.” Yeremiya de dzi ƒo na wo ɣebubuɣi be: “Miɖɔ miaƒe zɔzɔme kple nuwɔnawo ɖo, eye mise Yehowa, mia Mawu ƒe gbe; ekema vɔ̃, si Yehowa gblɔ ɖe mia ŋu la, avee.” (Yer. 18:11; 26:13) Egbea, Yehowa tsɔna kea ame siwo ɖea dzimetɔtrɔ vavãtɔ fiana hedzudzɔa nu gbegblẽ wɔwɔ.

21. Nu kae Yehowa wɔna ne etsɔ ame aɖe ƒe nu vɔ̃ kee?

²¹ Azɔ hã, menye ɖeko Yehowa gblɔna be yetsɔ ke ko evɔ o. Ewɔa nu si de ŋgɔ wu ema. Yehowa to Yeremiya dzi xlɔ̃ nu be: “Israel dzeaglã . . . Gatrɔ, nyemaɖo adã ɖe mia ŋu o, . . . eye nyemalé nya ɖe dɔ me tegbee o.” (Yer. 3:12) Ne Mawu nya tsɔ esubɔla aɖe ƒe nu vɔ̃ kee ko la, meyia edzi léa dziku ɖe dɔ me alo gbea asiɖeɖe le nyaa ŋu o. Togbɔ be ame si wɔ nu vɔ̃ la dze agɔ le Yehowa dzi hã la, Yehowa ƒe didie nye be yeadzra ye kplii dome ɖo. Ne amea trɔ dzi me nyateƒe hedi Mawu ƒe tsɔtsɔke la, ‘akplɔe ava’ eɖokui gbɔ, eye wòagakpɔ ŋudzedze ɖe eŋu ahayrae. (Yer. 15:19) Ele be dzideƒonya sia nana ame sia ame si woa kple Mawu vavã la dome gblẽ la natrɔ ava egbɔ. Ðe màlɔ̃ ɖe edzi be ale si Yehowa tsɔa nu vɔ̃ kena faa la na míedina be mía kplii dome nanɔ kplikplikpli oa?—Xlẽ Konyifahawo 5:21.

22, 23. Nu kae wòle be wòanye wò taɖodzinu esi nèle agbagba dzem be yeasrɔ̃ ale si Yehowa tsɔa nu vɔ̃ kenae?

²² Ne ame aɖe gblɔ nya alo wɔ nane wòve wò la, ɖe nàsrɔ̃ Yehowa? Yehowa gblɔ na blema Yudatɔ siwo ƒe vodada wòtsɔ ke la be ‘yeaklɔ’ wo ŋu. (Xlẽ Yeremiya 33:8.) Yehowa klɔa nu vɔ̃ wɔla si trɔ dzi me ƒe nu vɔ̃wo, alo kɔa amea ŋu, le gɔmesesea nu be eŋlɔa eƒe nu vɔ̃wo be, eye wògakpɔa ŋudzedze ɖe eƒe subɔsubɔ ŋu. Ele eme baa be esia mefia be Mawu klɔa domenyinuvɔ̃ le amea ŋu wòzua ame deblibo ya o. Gake nufiame aɖe le nya si Mawu gblɔ be yeakɔ ame si trɔ dzi me ŋu la me na mí. Ele be míadze agbagba aklɔ nukpɔsusu si le mía si ɖe ame si dze agɔ le mía dzi ŋu la ɖa le míaƒe dzi me, si fia be míaŋlɔ eƒe vodadaa be. Le mɔ ka nu?

²³ Tsɔe be ame aɖe ƒle sikatsyɔ̃ɖonu xɔasi aɖe na wò. Ne èzãe wòƒo ɖi la, nu gbãtɔ si ava susu me na wòe anye be yeatsɔe aƒu gbea? Ao. Ðewohĩ àdi be yeadze agbagba aklɔe nyuie aɖe ɖinu sia ɖinu ɖa le eŋu. Èdi be yeagakpɔe wòadze ani, anɔ dzo dam abe tsã ene. Nenema tututue wòle le ame siwo dze agɔ le dziwò hã gome. Àte ŋu adze agbagba vevie aɖe vevesese alo dziku si nèdo ɖe nɔviŋutsu alo nɔvinyɔnu si dze agɔ le dziwò ŋu la ɖa le wò dzi me. Dzudzɔ tamebubu tso eƒe dzikunya alo nu si wòwɔ ɖe ŋuwò wòve wò la ŋu. Ne èɖe asi le nyaa ŋu la, ekema àte ŋu aklɔ nukpɔsusu si le asiwò ɖe nɔvi ma ŋu ɖa le wò dzi me. Ne wò dzi me kɔ ɖe nɔvi ma ŋu azɔ la, ekema mia kplii dome agate ŋu anɔ kplikplikpli abe tsã ene.

24, 25. Vi kawoe wòaɖe na wò ne ènya Yehowa nyuie abe ale si Fia Yosiya nyae ene?

²⁴ Yehowa ƒe nɔnɔme nyuiwo kple ale si wòwɔa nu ɖe ame ŋui dometɔ ʋɛ siwo me míedzro wɔe be míeganyae ɖe edzi. Edze ƒãa be Yehowa nyanya nyuie ƒe viɖewo kpɔkpɔ dze sii ʋãa mí be míasubɔe le mɔ si dzea eŋu nu. Ne míenya Yehowa nyuie abe ale si Fia Yosiya nyae ene la, míaƒe agbe me ayɔ fũu kple dzidzɔ, si hã nye Mawu ƒe amenyenye ƒe akpa bubu.

²⁵ Yehowa nyanya nyuie wɔnɛ hã be mía kple ame bubuwo dome nɔna nyuie. Ne míevea ame nu, wɔa nu dzɔdzɔe, hetsɔa vodada kena abe ale si Yehowa wɔnɛ ene la, mía kple Kristo hamea me tɔwo dome xɔlɔ̃wɔwɔ ganyona ɖe edzi eye wòɖea vi geɖe. Gawu la, esia ana míaƒe nufiafia ŋutete nanyo ɖe edzi ne míetrɔ yi ame siwo míeɖe gbeƒã na le míaƒe anyigbamama me gbɔ alo le Biblia nusɔsrɔ̃ siwo yia ŋgɔ wɔm. Ðetsɔlemetɔwo akpɔ agbe nyui si míenɔna abe Kristotɔwo ene la wòadzro wo. Esia awɔe be míakpe ɖe wo ŋu woava ‘to mɔ nyui la dzi’ ahasubɔ Yehowa wòadze eŋu.—Yer. 6:16.