Amesiwo ƒe ‘Seselelãmewo Sɔ Kple Mía Tɔ’

FIA kple nyagblɔɖilae wònye ganye vifofo lɔ̃ame hã. Viaŋutsuwo dometɔ ɖeka tsi va zu yakame kple dadala. Esi viaŋutsua dze agbagba be yeaxɔ fiazikpuia sesẽe la, eho aʋa ɖe fofoa ŋu heɖoe kplikpaa be yeawui. Gake le aʋa si wowɔ me la, viaŋutsua boŋue ku. Esi vifofoa se via ƒe ku la, eya ɖeka yi xɔtaxɔ aɖe me fa avi be: “Vinye Absalom, vinye! Vinye Absalom, ɖe meku ɖe tewòƒe la, ne enyo wu! Vinye Absalom, vinye!” (Samuel II, 19:1) Vifofoa enye Fia Dawid. Abe alesi wònɔ le Yehowa ƒe nyagblɔɖila bubuwo gome ene la, “nu venɛ abe míawo ene.”—Yakobo 5:17.

Le Biblia ƒe ɣeyiɣiwo me la, ŋutsu kple nyɔnu siwo gblɔ Yehowa ƒe gbedasiwo nye dɔ vovovo wɔlawo eye woƒe gbesiagbegbenɔnɔ le abe ame bubuwo tɔ ke ene. Kuxiwo nɔ wo ŋu eye blibomademade wɔ fu wo abe míawo ke ene. Nyagblɔɖila siawo dometɔ aɖewo ɖe, eye aleke woƒe seselelãmewo nɔ abe mía tɔ ene?

Mose Ka Ðe Eɖokui Dzi Akpa Gake Va Bɔbɔ Eɖokui

Mose nye nyagblɔɖila xɔŋkɔ aɖe si nɔ anyi do ŋgɔ na Kristotɔwo ƒe ɣeyiɣia. Gake esi wòxɔ ƒe 40 gɔ̃ hã la, mesu te be wòanye Yehowa ƒe nyanuɖela o. Nukata? Wonyi Mose le Farao ƒe aƒeme eye “wòsẽ ŋu le eƒe nyawo kple dɔwɔwɔwo me,” evɔ Egipte-fia Farao nɔ nɔviawo tem ɖe anyi. Nuŋlɔɖia gblɔ na mí be: “[Ebu] xa bena, nɔviawo ase egɔme bena, Mawu ato yeƒe asi dzi ana ɖeɖe wo.” Esi wòka ɖe eɖokui dzi akpa ta la, ewɔ nu adãtɔe tsɔ xɔ na Hebritɔ kluvi aɖe, hewu Egiptetɔ aɖe.—Dɔwɔwɔwo 7:22-25; Mose II, 2:11-14.

Fifia eva hiã be Mose nasi, eye ezu alẽkplɔla le ƒe 40 si kplɔe ɖo me le keke Midian-nyigba dzi ke. (Mose II, 2:15) Esi ɣeyiɣi ma wu enu la, Yehowa de dɔ asi na Mose si xɔ ƒe 80 fifia la wòzu nyagblɔɖila. Gake Mose megakana ɖe eɖokui dzi akpa azɔ o. Ebui be yemedze kura o ale gbegbe be ebia nyawo Yehowa le nyagblɔɖila ƒe dɔ si wòbe ye newɔ ŋu, eye wòzã nya siawo tɔgbe be, “Ameka menye, be mayi Farao gbɔ?” kple, ‘Nya kae magblɔ?’ (Mose II, 3:11, 13) Le Yehowa ƒe kakaɖedziname kple kpekpeɖeŋu lɔlɔ̃tɔe me la, Mose yi ɖawɔ eƒe dɔdasia eye wòkpɔ dzidzedze geɖe.

Ðe nèɖe mɔ kakaɖeameɖokuidzi akpa na nèwɔ nanewo alo gblɔ nya aɖewo kpɔ siwo me nunya menɔ o abe Mose enea? Ne nenema la, ke xɔ hehe geɖe le ɖokuibɔbɔ me. Alo ɖe nèbui kpɔ be yemedze atsɔ Kristotɔwo ƒe agbanɔamedzi aɖewo oa? Le esi teƒe be nàɖe ta le ete la, xɔ kpekpeɖeŋu si Yehowa kple eƒe habɔbɔa nana boŋ. Amesi kpe ɖe Mose ŋu la ate ŋu akpe ɖe wò hã ŋuwò.

Eliya ƒe Seselelãmewo Ði Mía Tɔ le Toheɣi

“Eliya nye ame, eye nu venɛ abe míawo ke ene, eye wòdo gbe aɖe ɖa, bena tsi nagadza o, eye tsi megadza ɖe anyigba dzi o ƒe etɔ̃ kple ɣleti ade sɔŋ.” (Yakobo 5:17) Gbe si Eliya do ɖa la sɔ ɖe Yehowa ƒe didi be yeahe to na dukɔ si trɔ megbe de Eyama la nu. Ke hã Eliya nya be kuɖiɖi si yedo gbe ɖa bia la ana amewo nakpe fu. Agble koŋue wodena le Israel; zãmu kple tsidzadza ye léa ameawo ƒe agbe ɖe te. Kuɖiɖi si anɔ anyi didi ana woakpe fu vevie. Numiemiewo ayrɔ; agblemenuwo agblẽ. Aƒemelã siwo wozãna na dɔwɔwɔ kple esiwo woɖuna la aku, eye dɔ awu ƒome aɖewo. Amekawoe akpe fu wu? Ame tsɛwoe. Emegbe ahosi aɖe gblɔ na Eliya be wɔ asiʋlo ɖeka kple ami vi aɖe koe susɔ ɖe ye si. Nyɔnua ka ɖe edzi be dɔ awu ye kple ye viŋutsu yewoaku kpuie. (Fiawo I, 17:12) Hafi Eliya nado gbe ma ɖa la, ele be xɔse sẽŋu nanɔ esi be Yehowa alé be na Eƒe subɔla—woɖanye kesinɔtɔ alo ame dahewo o—siwo lé tadedeagu vavãtɔ me ɖe asi. Nuŋlɔɖia ɖee fia be womedo ŋukpe Eliya o.—Fiawo I, 17:13-16; 18:3-5.

Ƒe etɔ̃ megbe esi Yehowa ɖee fia be eteƒe madidi o yeana tsi nadza la, alesi Eliya di vevie be yeakpɔ be kuɖiɖia nu va yi la dze le eƒe gbedodoɖa vevie enuenu esime “wònɔ klotinu ɖe anyigba hetsɔ mo de ata me” la me. (Fiawo I, 18:42) Eƒoe ɖe esubɔvia nu enuenu be: “Lia to la, eye nakpɔ ƒu gome ɖa” kple susu be akpɔ nane si fia be Yehowa se eƒe gbedodoɖawo hã. (Fiawo I, 18:43) Dzidzɔ ka gbegbee nye si wòakpɔ esime wose eƒe gbedodoɖawo mlɔeba eye “dziƒo na tsi dza, eye anyigba gatse eƒe kutsetse”!—Yakobo 5:18.

Ne dzila alo hamemegã nènye le Kristo-hamea me la, ɖewohĩ màvo le ɖokuiwò me kura o ne èle ame ɖɔm ɖo. Gake ele be woana amegbetɔ ƒe seselelãme siawo nu nafa ale woakpɔ kakaɖedzi be ehiã be woahe to na ame ɣeaɖewoɣi eye be ne wonae le lɔlɔ̃ me la, “[etsea] dzɔdzɔenyenye ƒe ŋutifafakutsetse.” (Hebritɔwo 12:11) Nu nyuiwo dona tsoa Yehowa ƒe sewo dzi wɔwɔ me ɣesiaɣi. Míedoa gbe ɖa abe Eliya ene be woatsɔ wo akplɔ mí.

Dzi Nɔ Yeremya Ƒo Togbɔ Be Woɖe Dzi le Eƒo Hã

Le Biblia-ŋlɔlawo katã dome la, ɖewohĩ Yeremya ye ŋlɔ nu geɖe tso eya ŋutɔ ƒe seselelãmewo ŋu wu. Esi wònye ɖekakpui ta la, menɔ lɔlɔ̃m be yeaxɔ yeƒe dɔdasia o. (Yeremya 1:6) Ke hã etsɔ dzideƒo gã aɖe gblɔ Mawu ƒe nya, eye edo go tsitretsiɖeŋu sẽŋu tso etɔ Israel-viwo gbɔ—tso fia dzi vaseɖe ame tsɛ dzi. Tsitretsiɖeŋu ma na dzi kunɛ eye wòfaa avi ɣeaɖewoɣi. (Yeremya 9:4; 18:20-23; 20:7-18) Le ɣeyiɣi vovovowo dzi la, nuvlowɔha dze edzi, woƒoe, wodee kunyowu me, wotsɔ ku do ŋɔdzi nɛ, eye wogblẽe ɖe ba me le vudo aɖe si me tsi menɔ o me be wòaku. Yehowa ƒe gbedasi wɔ fui ɣeaɖewoɣi gɔ̃ hã, abe alesi wòdze le eƒe nya siawo me be: “Nye dɔkaviwo, nye dɔkaviwo! Mele togotogoe ƒom le vevesese [le nye dzime] ta.”—Yeremya 4:19.

Gake egalɔ̃ Yehowa ƒe nya la, eye egblɔ be: “Wò nyawo nye vivisese kple dzidzɔ na nye dzi.” (Yeremya 15:16) Le ɣeyiɣi ma ke me la, dziɖeleameƒo na wòfa avi na Yehowa be: “Ezu nam abe tɔʋu, si blea ame, kple tsi, si metɔna ɖi o la ene,” abe tɔsisi sue si miena bɔbɔe ene. (Yeremya 15:18) Gake Yehowa se eƒe seselelãme vovovoawo gɔme eye wòyi edzi kpe ɖe eŋu ale be wòte ŋu wɔ eƒe dɔdasia.—Yeremya 15:20; kpɔ 20:7-9 hã.

Ðe dzi ɖena le ƒowò alo nèdoa go tsitretsiɖeŋu le wò subɔsubɔdɔa wɔwɔ me abe Yeremya enea? Kpɔ Yehowa sinu. Yi edzi nàwɔ ɖe eƒe mɔfiafiawo dzi, eye Yehowa aɖo wò hã wò agbagbadzedzewo teƒe na wò.

Yesu ƒe Seselelãmewo Ði Mía Tɔ

Mawu ŋutɔ ƒe Vi Yesu Kristoe nye nyagblɔɖila gãtɔ kekeake. Togbɔ be ame debliboe wònye hã, mezi eƒe seselelãmewo dzi o. Míexlẽa nu tso eƒe ememe seselelãmewo ŋu zi geɖe, si anya dze le eƒe mo kple le eƒe nuwɔwɔ ɖe ame bubuwo ŋu me. Yesu ƒe ‘dɔme trɔna ɖe ame ŋu’ zi geɖe, eye ezã nɔnɔme ma tsɔ ɖɔ amewoe le eƒe kpɔɖeŋuwo me.—Marko 1:41; 6:34; Luka 10:33.

Anya kɔ eƒe gbe dzi esime wògblɔ nya siawo tsɔ nyã nudzralawo kple lãwo do goe le gbedoxɔa me be: “Mitsɔ nusiawo dzoe le afisia.” (Yohanes 2:14-16) Esi Petro ɖo aɖaŋu nɛ be, “Aƒetɔ; esia nagava dziwò gbeɖe o” la, eɖo ŋu nɛ kple gbe sesẽ be, “Te ɖa yi megbenye, Satana!”—Mateo 16:22, 23.

Lɔlɔ̃ tɔxɛ nɔ Yesu si na ame aɖewo siwo nɔa eŋu kplikplikpli ŋutɔ. Wogblɔ le apostolo Yohanes ŋu be enye “nusrɔ̃la, si Yesu lɔ̃na.” (Yohanes 21:7, 20) Eye míexlẽ bena: “Yesu lɔ̃a Marta kple nɔvianyɔnua kpakple Lazaro.”—Yohanes 11:5.

Nu vea Yesu hã. “Yesu fa avi,” esi Lazaro ƒe ku vee vevie ta. (Yohanes 11:32-36) Esi Yesu nɔ alesi wòve dzi nɛ be Yuda Iskariot afia eyome mɔ ɖem fia la, eyɔ dzigbanya sia tso Psalmowo me be: “Amesi le abolo ɖum kplim la, kɔ eƒe afɔkpodzi dzi ɖe ŋunye.”—Yohanes 13:18; Psalmo 41:10.

Esime Yesu nɔ veve sem vevie le atia ŋu gɔ̃ hã la, eɖe eƒe seselelãme deto fia. Etsɔ dadaa de asi na “nusrɔ̃la, si wòlɔ̃na” la lɔlɔ̃tɔe. (Yohanes 19:26, 27) Esi wòkpɔ be nuvɔ̃wɔla siwo hã woklã ɖe ati ŋu le exa la dometɔ ɖeka trɔ dzime la, Yesu gblɔ nɛ nublanuikpɔkpɔtɔe be: “[Ànɔ] Paradiso la me kplim.” (Luka 23:43) Míate ŋu akpɔ alesi gbegbe eƒe seselelãme dzee le ɣli sia si wòdo me be: “Nye Mawu, nye Mawu, nukaŋuti nègblẽm ɖi mahã?” (Mateo 27:46) Eye nya siwo wògblɔ le kudo nu ɖe lɔlɔ̃ kple ŋuɖoɖeameŋu fia be: “Fofo, asiwò me metsɔ nye gbɔgbɔ la de.”—Luka 23:46.

Kakaɖedzi ka gbegbee nye esiawo katã na mí! “Elabena menye nunɔlagã, si mate ŋu anya míaƒe gbɔdzɔgbɔdzɔwo na mí o lae le mía si o, ke boŋ enye [Yesu] amesi wote kpɔ le nuwo katã me, abe míawo ke ene, negbe nuvɔ̃ koe mele eŋu o.”—Hebritɔwo 4:15.

Yehowa ƒe Kakaɖedzi

Yehowa metia nyanuɖelawo woƒe nu va vee emegbe kpɔ o. Enya woƒe nuteƒewɔwɔ nɛ, eye eŋea aɖaba ƒua esiwo mede blibo o ƒe gbɔdzɔgbɔdzɔwo dzi nublanuikpɔkpɔtɔe. Ke hã ekpɔ mɔ be woawɔ dɔ si wòde wo si. Ekpe ɖe wo ŋu wote ŋu wɔe nenema.

Mina míaka ɖe mía nɔvi ŋutsuwo kple nɔvinyɔnuwo dzi dzigbɔɖitɔe. Woanye blibomadelawo ɣesiaɣi le nuɖoanyi sia me abe míawo ke ene. Gake mele be míadrɔ̃ ʋɔnu mía nɔviwo be womedze na míaƒe lɔlɔ̃ kple hadede o. Paulo ŋlɔ bena: “Ke ele na mí, amesiwo ŋu ŋusẽ le la bena, míatsɔ amesiwo ŋu ŋusẽ mele o la ƒe gbɔdzɔgbɔdzɔwo, eye míagadze mía ɖokui ŋu o.”—Romatɔwo 15:1; Kolosetɔwo 3:13, 14.

Seselelãme siwo katã nɔa mía me la nɔ Yehowa ƒe nyagblɔɖilawo hã me. Gake woɖo ŋu ɖe Yehowa ŋu, eye Yehowa lé wo ɖe te. Gawu la, Yehowa na nusiwo ta wòle be dzi nadzɔ wo la wo—dzitsinya nyui, eƒe amenuveve kpɔkpɔ dze sii, zɔhɛ nuteƒewɔla siwo do ŋusẽ wo, kple etsɔme si me dzidzɔ le ƒe kakaɖedzi. (Hebritɔwo 12:1-3) Mina míawo hã míatsɔ kakaɖedzi blibo anɔ Yehowa ŋu esi míele blema nyagblɔɖilawo ƒe xɔse srɔ̃m, amesiwo ƒe ‘seselelãmewo sɔ kple mía tɔ.’