“Matsi Wò Gbolowɔwɔ Nu”

1, 2. Gbolowɔwɔ ka ƒomevie ate ŋu ana ame si le ewɔm la ƒe nu nanyɔ ŋu na ame?

ETENA ɖe mía dzi ne míekpɔ be ame aɖe va zu gbolo. Ðewohĩ míanɔ mía ɖokuiwo biam be nu kae na wòva ƒo eɖokui ɖe nɔnɔme ɖigbɔ sia me? Ðe wòanye be wosẽ ŋuta alo wɔ ŋlɔmi le eŋu le ɖevime tae wòva tsi ablɔ dzia? Alo ɖewohĩ ahedada kolikoli ye wɔe be wòva zu kluvia? Alo ɖe wòsi le srɔ̃a si nɔ ŋuta sẽm le eŋu la nua? Nɔnɔme wɔnublanui sia bɔ ɖe xexe vɔ̃ɖi sia me ŋutɔ. Mewɔ nuku o be Yesu Kristo wɔ nu ɖe gbolo aɖewo ŋu nyuie. Ete gbe ɖe edzi be ame siwo trɔ dzime eye wotrɔ agbenɔnɔ la ate ŋu akpɔ mɔ be yewoava nɔ agbe si me dzidzeme le.—Mat. 21:28-32; Luka 7:36-50.

² Ke hã, na míade ŋugble le gbolowɔwɔ bubu ƒomevi aɖe ŋu kpɔ. Tsɔe ko be nyɔnu aɖe ŋutɔe ɖoe be yeawɔ gbolo. Abui be naneke megblẽ le eŋu o, enye nu si nu yeanɔ agbe ɖo! Ga si wòakpɔ kple nu siwo wòakpɔ tso eme koŋue le vevie nɛ. Esi vɔ̃ɖi wue nye be ne srɔ̃ŋutsu nyui si wɔa nuteƒe le nyɔnu sia si gake wòɖoe koŋ to egɔme be yeawɔ gbolo ɖe? Asesẽ be woase veve ɖe nyɔnu sia tɔgbi nu, le ŋunyɔnu si me wòƒo eɖokui ɖo ta. Ale si míesena le mía ɖokui me tso nuwɔna ma ŋu na míekpɔ susu vevi si tae zi geɖe la, Yehowa Mawu zã nya gbolo tsɔ ɖe ale si gbegbe wòsena le eɖokui me tso alakpasubɔsubɔ ŋu la fia.

3. Nuŋlɔɖi kawo mee míadzro le ta sia me?

³ Le Ezekiel ƒe agbalẽa me la, nuŋlɔɖi vovovo eve ƒo nu tso Israel kple Yuda siwo nye Mawu ƒe amewo ƒe nuteƒemawɔmawɔ si gbɔ eme, si wotsɔ sɔ kple gbolowɔwɔ la ŋu. (Eze., ta 16 kple ta 23) Gake hafi míaƒo nu tso nuŋlɔɖi mawo ŋu tsitotsito la, anyo be míalé ŋku ɖe gbolo bubu aɖe ƒe gbolowɔwɔ si nye kpɔɖeŋu la ŋu. Gbolo sia nɔ anyi xoxoxo do ŋgɔ na Ezekiel ŋɔli, hafi Israel va zu dukɔ gɔ̃ hã, eye wògale gbolo wɔm va se ɖe egbe. Woƒo nu tso gbolo sia ŋu le Biblia-gbalẽ mamlɛtɔ, si nye Nyaɖeɖefia la me.

4, 5. Nu kae nye “Babilon Gã la,” eye aleke míewɔ nya? (Kpɔ foto si le nyati sia ƒe gɔmedzedze.)

⁴ Le ŋutega si Yesu ɖe fia apostolo Yohanes le ƒe alafa gbãtɔ Kristotɔwo Ŋɔli ƒe nuwuwu me la, ekpɔ gbolo aɖe. Eŋkɔe nye “gbolo gã” kple “Babilon Gã la, gbolowo . . . dada.” (Nyaɖ. 17:1, 5) Subɔsubɔhakplɔlawo kple Biblia nyalawo mete ŋu kpɔ ame si tututu wònye dze sii o hena ƒe alafa geɖe. Wo dometɔ aɖewo be ele tsitre ɖi na Babilon, Roma alo Roma Katolikoha la. Ke hã, ƒe geɖee nye esia Yehowa Ðasefowo de dzesi nu si tututu “gbolo gã” sia le tsitre ɖi na. Eyae nye alakpasubɔsubɔhawo katã ƒe ƒuƒoƒo. Aleke míewɔ nya?

⁵ Wobu fɔ gbolo sia elabena enɔ gbɔdɔdɔ ƒe agbe gbegblẽ kple “anyigbadzifiawo,” alo dunyahedziɖuɖuwo. Eya ta eme kɔ be menye dunyahedziɖuɖu ye wònye o. Azɔ hã, Nyaɖeɖefia ƒe agbalẽa ɖee gblɔ be “anyigbadzisitsalawo,” alo xexea ƒe asitsahawo kple adzɔhawo, xa nu le Babilon Gã la ƒe ku ta. Eya ta menye Babilon Gã lae nye asitsaha gãwo o. Ke nu kae nyɔnu sia le tsitre ɖi na? Nyɔnu sia ɖi “gbɔgbɔyɔnuwɔnawo,” trɔ̃subɔsubɔ kple alakpadada ƒe fɔ. Ðe nɔnɔme siawo meɖɔ alakpasubɔsubɔha siwo le xexea me la oa? De dzesii hã be, woɖɔ gbolo sia be ebɔbɔ nɔ xexe sia me dunyahehawo dzi alo kpɔ ŋusẽ ɖe wo dzi va se ɖe afi aɖe. Azɔ hã, etia Yehowa Mawu subɔla vavãwo yome. (Nyaɖ. 17:2, 3; 18:11, 23, 24) Ðe menye nu ma tututu wɔm alakpasubɔsubɔhawo le va se ɖe egbea oa?

 6. Nu ka tae míate ŋu agblɔ be Babilon Gã la nye “gbolowo . . . dada”?

⁶ Nu ka tae menye ɖeko woyɔ Babilon Gã la be “gbolo gã” la ko o, ke boŋ wogayɔe be “gbolowo . . . dada”? Elabe alakpasubɔsubɔhawo ma ɖe ha vovovowo me. Woma ɖe kɔmamawo kple ha suesue gbogbo aɖewo me. Tso esime wotɔtɔ gbewo le blema Babel alo Babilon la, alakpasubɔsubɔ ƒe nufiafia gbogbo aɖewo kaka ɖe xexea katã me si wɔe be subɔsubɔha geɖe va do. Esɔ ŋutɔ be Babilon du si nɔ anyi le blema, afi si alakpasubɔsubɔhawo dzɔ tso ƒe ŋkɔ mee wokpɔ ŋkɔ “Babilon Gã” tsoe! (1 Mose 11:1-9) Eya ta woate ŋu agblɔ be ha siawo katã nye habɔbɔ ɖeka, gbolo gã aɖe ƒe “viwo.” Zi geɖe la, Satana zãa subɔsubɔha siawo tɔgbi tsɔ blea amewo nu dea gbɔgbɔyɔyɔ, trɔ̃subɔsubɔ kple dzixɔse kpakple kɔnu bubu siwo medea bubu Mawu ŋu o la me. Mewɔ nuku o be woxlɔ̃ nu Mawu ƒe amewo tso xexea ƒe habɔbɔ sia si wɔa alakpanu la ŋu be: “Nye dukɔ, mido go le eme, ne miedi be yewoakpɔ gome kplii le eƒe nu vɔ̃wo me o”!—Xlẽ Nyaɖeɖefia 18:4, 5.

7. Nu ka tae wòle be míawɔ ɖe nuxlɔ̃ame si nye “mido go” le Babilon Gã la me la dzi?

⁷ Èwɔ ɖe nuxlɔ̃ame ma dzia? Ðo ŋku edzi be Yehowa ŋutɔe wɔ amegbetɔ be wòatsi dzi ɖe “gbɔgbɔmenuwo” ŋu. (Mat. 5:3) Yehowa ƒe tadedeagu dzadzɛa dzi koe ame ate ŋu ato akpɔ nuhiahiã ma gbɔ nyuie. Yehowa subɔlawo adi be yewoate yewo ɖokui ɖa tso gbɔgbɔmehasiwɔwɔ gbɔ kura! Gake susu bubu kurae le Satana Abosam ya si. Edzɔa dzi nɛ be yeable Mawu ƒe amewo ade gbɔgbɔmehasiwɔwɔ ma ƒomevi me. Zi geɖe la, ekpɔa dzidzedze le esia me. Kaka Ezekiel ƒe ŋkekeawo naɖo la, Mawu ƒe amewo nɔ gbɔgbɔmehasi wɔm xoxoxo. Anyo be míadzro woƒe ŋutinya ma me, elabena ana míasrɔ̃ nu geɖe tso Yehowa ƒe dzidzenuwo, eƒe dzɔdzɔenyenye kple eƒe nublanuikpɔkpɔ ŋu.

8-10. Tadedeagu dzadzɛa ƒe nudidi vevi kae akpe ɖe mía ŋu míase ale si Yehowa sena le eɖokui me ne ame aɖe le alakpasubɔsubɔ me ŋu? Gblɔ eƒe kpɔɖeŋu.

⁸ Le Ezekiel ƒe agbalẽa me la, Yehowa zã kpɔɖeŋu si ku ɖe gbolowɔwɔa ŋu be ye ŋue wowɔe ɖo. Gbɔgbɔ ʋã Ezekiel wòƒo nu tso ale si Yehowa se veve ɖe eƒe dukɔa ƒe nuteƒemawɔmawɔ kple woƒe ahasiwɔwɔa ta le nuŋlɔɖi ɖedzesi eve aɖewo me. Nu ka tae wòtsɔ wo sɔ kple gbolo?

⁹ Be míakpɔ ŋuɖoɖoa la, ele be míaɖo ŋku tadedeagu dzadzɛa ƒe nudidi vevi aɖe si ŋu míeƒo nu tsoe le agbalẽ sia ƒe Ta 5 lia me la dzi. Yehowa gblɔ le Se si wòtsɔ na Israel-viwo me be: “Mawu bubu aɖeke meganɔ asiwò kpe ɖe ŋunye o. . . . Nye Yehowa wò Mawu la, Mawu si biaa ɖokuitsɔtsɔna blibo ye menye.” (2 Mose 20:3, 5) Emegbe egate gbe ɖe nyateƒenya ma dzi ale: “Mègade ta agu na mawu bubu aɖeke o, elabena Yehowa nye ame si biaa ɖokuitsɔtsɔna blibo. Ɛ̃, enye Mawu si biaa ɖokuitsɔtsɔna blibo.” (2 Mose 34:14) Mɔ bubu aɖeke megali si dzi Yehowa ato ana nya sia me nakɔ wu esia o. Hafi míasubɔ Yehowa wòadze eŋu la, ele be míasubɔ eya ɖeka ko.

¹⁰ Míadi be míazã srɔ̃ɖeɖe atsɔ awɔ kpɔɖeŋui. Srɔ̃ŋutsu kple srɔ̃nyɔnu siaa kpɔa mɔ be yewoaku ɖe yewo nɔewo ŋu. Ne wòanye be wo dometɔ ɖeka va le ahiãmo ɖom na ame bubu alo dɔ kple ame bubu la, ame kemɛa aʋã ŋu eye wòase le eɖokui me be yesrɔ̃a mewɔ nuteƒe na ye o, eye esɔ nenema hã. (Xlẽ Hebritɔwo 13:4.) Nenema kee le subɔsubɔnyawo me la, ne ame siwo ɖe adzɔgbe be yewoasubɔ Yehowa ɖeka ko, trɔ ɖe alakpamawuwo ŋu la, esɔ be wòase le eɖokui me be womewɔ nuteƒe na ye o. Ete gbe ɖe ale si womewɔ nuteƒe nɛ o la dzi vevie kple ŋkubiã le Ezekiel ta 16 lia me.

11. Nya kae Yehowa gblɔ tso ale si Yerusalem dze egɔmee ŋu?

¹¹ Le Ezekiel ƒe agbalẽa me la, ta 16 lia mee Yehowa ƒo nu le wòdidi wu eye esiae nye nyagblɔɖinya si didi wu le Hebri Ŋɔŋlɔawo katã me la dometɔ ɖeka. Yehowa he susu yi Yerusalem dua dzi wòtsi tre ɖi na Yuda si mewɔ nuteƒe o. Eƒo nu tso ale si eƒe nu wɔ nublanui eye wòwɔ moyaa tso gɔmedzedzea kple eƒe nuteƒemawɔmawɔ ŋu. Yuda nye vidzĩ kokoe si wotsɔ ƒu gbe, si womele tsi na alo lé be na o. Edzilawoe nye Kanaantɔ trɔ̃subɔla siwo nɔ anyigba la dzi. Le nyateƒe me la, Kanaantɔwo ƒe to aɖe si nye Yebusitɔwo tee Yerusalem nɔ va se ɖe esime David xɔ dua. Yehowa kpɔ nublanui na vidzĩ ma si wotsɔ ƒu gbe la, ele tsi nɛ eye wòlé be nɛ. Emegbe eva zu srɔ̃a. Le nyateƒe me la, Israel-vi siwo va nɔ dua me mlɔeba la bla nu kple Yehowa, enye nu, si woawo ŋutɔ lɔ̃ faa bla kplii le keke Mose ƒe ŋkekeawo me ke. (2 Mose 24:7, 8) Esi Yerusalem va zu fiadu le Yuda la, Yehowa yrae, ena kesinɔnuwoe eye wòɖo atsyɔ̃ nɛ wònya kpɔ abe ale si srɔ̃ŋutsu kesinɔtɔ ŋusẽtɔ aɖe ave srɔ̃a nu ana atsyɔ̃ɖonuwoe ene.—Eze. 16:1-14.

12. Nu kae na Yerusalem megava wɔ nuteƒe o?

¹² De dzesi nu si va dzɔ emegbe. Yehowa gblɔ be: “Èɖo dzi ɖe wò tugbedzedze ŋu, eye nèzu gbolo le wò ŋkɔxɔxɔ ta. Èwɔ gbolo atraɖii kple ame sia ame si tso eme va yina, eye wò tugbedzedze zu etɔ.” (Eze. 16:15) Le Salomo ƒe ŋkekeawo me la, Yehowa yra eƒe amewo eye wòna wokpɔ kesinɔnuwo ale gbegbe be Yerusalem va zu du si nya kpɔ wu le blema. (1 Fia. 10:23, 27) Gake womegava nɔ nuteƒe wɔm o. Esi Salomo di be yeadze yesrɔ̃ siwo tso duta ŋu ta la, etsɔ alakpamawuwo subɔsubɔ gblẽ nu le Yerusalem ŋu. (1 Fia. 11:1-8) Ame siwo ɖu fia ɖe eyome la dometɔ aɖewo tɔ nyra wu, elabe wotsɔ alakpasubɔsubɔ ƒo ɖi anyigba bliboa. Aleke Yehowa se le eɖokui me tso gbolowɔwɔ kple nuteƒemawɔmawɔ sia ƒomevi ŋu? Egblɔ be: “Mele be nu siawo tɔgbi nadzɔ alo nava eme hafi o.” (Eze. 16:16) Gake eƒe ame siwo tra mɔ la gawɔ nu siwo vɔ̃ ɖi wu kura!

13. Nu vɔ̃ɖi kawo ƒe fɔe Mawu ƒe ame siwo nɔ Yerusalem la ɖi?

¹³ Bu ale si Yehowa ase veve kple ale si woƒe nu anyɔ ŋu nɛ esi wòklo nu le eƒe ame tiatiawo ƒe vɔɖivɔ̃ɖi dzi ŋu kpɔ. Egblɔ be: “Èkplɔ viwòŋutsu kple viwònyɔnu siwo nèdzi nam la, eye nètsɔ wo sa vɔ na legbawo ne woaɖu. Ðe wò gbolowɔwɔwo mesɔ gbɔ oa? Èwu vinyeŋutsuwo, eye nèna wotɔ dzo wo tsɔ sa vɔe.” (Eze. 16:20, 21) Nu dziŋɔ siwo wowɔ la ɖe ale si gbegbe Satana vɔ̃ɖii la fia. Edzɔa dzi nɛ be yeable Yehowa ƒe amewo nu woaƒo wo ɖokuiwo ɖe aglãdzenuwɔna mawo me! Gake Yehowa le nu sia nu kpɔm. Mawu ate ŋu aɖe Satana ƒe tagbɔsesẽnuwɔna vɔ̃ɖitɔ kekeake gɔ̃ hã ɖa, eye wòadrɔ̃ ʋɔnu dzɔdzɔe.—Xlẽ Hiob 34:24.

14. Le kpɔɖeŋu si Yehowa wɔ me la, ame kawoe nye Yerusalem nɔvinyɔnu eveawo, eye wo dometɔ kae vɔ̃ɖi wu le wo ame etɔ̃awo dome?

¹⁴ Gake nu vɔ̃ɖi siwo Yerusalem wɔ la menyɔ ŋu na eya ŋutɔ o. Eyi eƒe gbolowɔwɔa dzi. Yehowa gblɔ be enye gbolo si ŋu mekpena o, elabena eya boŋ xea fe na ame bubuwo be woawɔ gbolo kpli ye! (Eze. 16:34) Mawu gblɔ be Yerusalem le abe ‘dadaa’ si nye trɔ̃subɔla si nɔ anyigba la dzi tsã ene. (Eze. 16:44, 45) Esi Yehowa yi kpɔɖeŋua dzi la, egblɔ be Yerusalem nɔvinyɔnu tsitsitɔe nye Samaria, si wɔ gbɔgbɔmehasi gbã. Mawu gaƒo nu tso nɔvianyɔnu bubu si nye Sodom ŋu le afi sia elabena wotsrɔ̃e ɣeyiɣi didi aɖe va yi le eƒe ɖokuidodoɖedzi kple eƒe agbe ƒaƒã nɔnɔ ta. Yehowa ƒe nyawo fia be Yerusalem ƒe vɔɖivɔ̃ɖi gbɔ nɔvianyɔnu siwo nye Samaria kple Sodom tɔwo ŋu! (Eze. 16:46-50) Mawu ƒe amewo do toku nuxlɔ̃ame gbogbo siwo wona wo eye woyi woƒe aglãdzenuwɔnawo dzi.

15. Susu ka tae Yehowa drɔ̃ ʋɔnu Yerusalem, eye mɔkpɔkpɔ kae wòna wo?

¹⁵ Nu kae Yehowa awɔ? Edo ŋugbe na Yerusalem be: “Maƒo wò ahiãvi siwo katã nèdo dzidzɔ na . . . la nu ƒu” eye “matsɔ wò ade asi na wo.” Trɔ̃subɔdukɔ siwo va wɔ ɖeka kple eƒe amewo la, atsrɔ̃e, woaɖe eƒe atsyɔ̃ɖonuwo kple eƒe nu xɔasiwo le eŋu. Egblɔ be: “Woaƒu kpe wò ahawu wò kple woƒe yiwo.” Susu ka tae Yehowa adrɔ̃ ʋɔnu wo alea? Menye ɖe wòdi be yeatsrɔ̃ yeƒe amewo ɖa o. Ke boŋ susuae nye be: ‘Yeatsi woƒe gbolowɔwɔ nu.’ Mawu gblɔ kpee be: “Ne nye dɔmedzoe fla ɖe ŋuwò vɔ la, mana enu nafa eye nye dziku atrɔ ɖa le ŋuwò; manɔ anyi kpoo, eye nyemagado dɔmedzoe azɔ o.” Abe ale si míedzro eme le agbalẽ sia ƒe Ta 9 lia me ene la, Yehowa ɖoe be ne woɖe aboyo yeƒe amewo ɣeyiɣi didi aɖe megbe la, yeagana woatrɔ ava woƒe anyigba dzi. Nu ka tae? Egblɔ be: “Maɖo ŋku nu, si mebla kpli wò le wò ɖevime la dzi.” (Eze. 16:37-42, 60) Yehowa ya awɔ nuteƒe bliboe, mawɔ nu abe eƒe dukɔa ene o!—Xlẽ Nyaɖeɖefia 15:4.

16, 17. (a) Nu ka tae míegagblɔna be Ohola kple Oholiba nye nyagblɔɖi me kpɔɖeŋuwo na Kristodukɔa o? (Kpɔ aɖaka si nye “Nɔvinyɔnu Siwo Nye Gbolowo.”) (b) Nu kawoe míate ŋu asrɔ̃ tso Ezekiel ta 16 kple 23 lia me?

¹⁶ Yehowa to eƒe nuƒo si didi wu eye emenyawo nu sẽ si woŋlɔ ɖe Ezekiel ta 16 lia dzi fia nu vevi aɖewo mí tso eƒe dzidzenu dzɔdzɔewo, eƒe dzɔdzɔenyenye kple eƒe nublanuikpɔkpɔ ɖedzesi la ŋu. Nenema kee wòle le Ezekiel ta 23 lia hã gome. Egbea, Kristotɔ vavãwo hã wɔna ɖe nuxlɔ̃ame si me kɔ, si Yehowa na eƒe amewo tso gbolowɔwɔ ŋu la dzi. Míadi gbeɖe be míawɔ nu wòave Yehowa abe ale si Yuda kple Yerusalem wɔe ene o! Eya ta míadi be míate mía ɖokui ɖa tso trɔ̃subɔsubɔ ƒomevi ɖe sia ɖe gbɔ. Esia ƒe ɖewoe nye ŋukeklẽ kple ŋutilãmenudidi vivivo, siwo ate ŋu anye trɔ̃subɔsubɔ. (Mat. 6:24; Kol. 3:5) Ele be míanɔ akpe dam na Yehowa be ekpɔ nublanui na mí eye wògbugbɔ tadedeagu dzadzɛa ɖo anyi le ŋkeke mamlɛa siawo me eye magaɖe mɔ gbeɖe be woagblẽ edome o! Ebla “nu mavɔ” kple gbɔgbɔ me Israel eye womagatsɔ nuteƒemawɔmawɔ alo gbolowɔwɔ agblẽ eme o. (Eze. 16:60) Eya ta mina míakpɔ ŋudzedze ɖe mɔnukpɔkpɔ si su mía si be míele ha dem kple Yehowa ƒe ame siwo ŋu wokɔ egbea ŋu.

¹⁷ Gake nu kae ale si Yehowa ƒo nu tsi tsitre ɖe gbolo siwo ŋu woƒo nu tsoe le Ezekiel ƒe agbalẽa me ŋu la fia mí ku ɖe “gbolo gã” si nye Babilon Gã la ŋu? Na míakpɔe ɖa.

18, 19. Nu siwo ɖi wo nɔewo kawoe míede dzesii le gbolo si ŋu woƒo nu tsoe le Ezekiel ƒe agbalẽa me kple esi ŋu woƒo nu tsoe le Nyaɖeɖefia ƒe agbalẽa me ŋu?

¹⁸ Yehowa metrɔna o. (Yak. 1:17) Ale si wòsena le eɖokui me tso alakpasubɔsubɔ ŋu la gale nenema le gbolo gã la ƒe ɣeyiɣi sia katã hã me. Eya ta ale si wòdrɔ̃ ʋɔnu gbolo si le Ezekiel ƒe agbalẽa me la, nenema kee wòadrɔ̃ ʋɔnu “gbolo gã” si ŋu woƒo nu tsoe le Nyaɖeɖefia ƒe agbalẽa me la hã, eye esia mewɔ nuku na mí o.

¹⁹ Le kpɔɖeŋu me, de dzesii be menye Yehowa ŋutɔe he to na gbolo si ŋu woƒo nu tsoe le Ezekiel ƒe nyagblɔɖiawo me tẽe o, ke boŋ dukɔ siwo Mawu ƒe amewo wɔ gbɔgbɔmehasi kplii lae he to na wo. Le mɔ ma ke nu la, wobu fɔ alakpasubɔsubɔhawo katã ƒe ƒuƒoƒoa be wowɔ ahasi kple “anyigbadzifiawo.” Eye ame kae ahe to nɛ? Míexlẽ le Biblia me be dunyahehawo “alé fu gbolo la, woagblẽe aɖe amae, aɖu eƒe ŋutilã, eye woatɔ dzoe wòafiã keŋkeŋ.” Nu ka tae xexe sia me dziɖuɖuwo aɖe afɔ ma? Elabena Mawu atsɔe ade “woƒe dzi me be woawɔ nu si yeɖo ɖe tame la dzi.”—Nyaɖ. 17:1-3, 15-17.

20. Nu kae ɖee fia be ʋɔnu si woadrɔ̃ Babilon la anye ʋɔnu mamlɛa?

²⁰ Eya ta Yehowa azã xexemedukɔwo atsɔ adrɔ̃ ʋɔnu alakpasubɔsubɔha siwo dome Kristodukɔa ƒe sɔlemeha gbogboawo hã le. Anye ʋɔnu mamlɛa si woadrɔ̃; womatsɔe ake wo o, eye womagana mɔnukpɔkpɔ aɖeke subɔsubɔhawo be woatrɔ le woƒe mɔ vɔ̃wo dzi o. Nyaɖeɖefia ƒe agbalẽa gblɔ be ‘womagakpɔ Babilon gbeɖegbeɖe o.’ (Nyaɖ. 18:21) Mawudɔlawo akpɔ dzidzɔ ne wotsrɔ̃e. Woagblɔ be: “Mikafu Yah! Eye gbolo la ƒe dzudzɔ le tutum le dziƒo yim tegbetegbe.” (Nyaɖ. 19:3) Ʋɔnudɔdrɔ̃ sia anɔ anyi tegbee. Magadzɔ gbeɖe be alakpasubɔsubɔ nado mo ɖa eye wòagblẽ tadedeagu dzadzɛa dome o. Ʋɔnu dziŋɔ si wodrɔ̃ Babilon kple ale si wotsrɔ̃e le kpɔɖeŋumɔ nu ƒe dzudzɔ babla kɔtɔɔ anɔ dzi yim tegbee.

21. Ne wotsrɔ̃ alakpasubɔsubɔhawo la, nu ka ƒe gɔmedze- dzee wòanye, eye aleke wòawu enui?

²¹ Ne xexe sia me dziɖuɖuwo tso ɖe Babilon Gã la ŋu la, efia be wole Mawu teƒe le ʋɔnu drɔ̃m, eye esia anye nudzɔdzɔ gã aɖe si ana Yehowa ƒe tameɖoɖo nava eme. Esia anye xaxa gã la ƒe gɔmedzedze eye esia anye tɔtɔ ƒe ɣeyiɣi si tɔgbi meva kpɔ o. (Mat. 24:21) Xaxa sia awu enu ɖe Armagedon-ʋaa me, aʋa siae Yehowa aho ɖe xexe vɔ̃ɖi sia ŋu. (Nyaɖ. 16:14, 16) Abe ale si agbalẽ sia ƒe ta siwo akplɔe ɖo aɖee afia ene la, Ezekiel ƒe agbalẽa agaƒo nu tso ale si nuwo ayi edzi le xaxa gã la me ŋu na mí. Va se ɖe fifia la, nufiame vevi kawo dzie míeɖo ŋkui le Ezekiel ta 16 kple 23 lia me, siwo dzi míadi be míawɔ ɖo?

22, 23. Ne míede ŋugble le gbolo si ŋu woƒo nu tsoe le Ezekiel kple Nyaɖeɖefia ƒe agbalẽawo me ŋu la, aleke wòle be esia nakpɔ ŋusẽ ɖe míaƒe tadedeagu dzadzɛa dzi?

²² Satana ƒe dzidzɔe wònye be yeagblẽ ame siwo le tadedeagu dzadzɛa me la dome. Nu ɖeka si ado dzidzɔ nɛ ye nye be yeana míaɖe asi le tadedeagu dzadzɛa ŋu eye míava wɔ nu abe gbolo si ŋu woƒo nu tsoe le Ezekiel ƒe agbalẽa me la ene. Ele be míaɖo ŋku edzi be Yehowa medi be míasubɔ ame bubu aɖeke kpe ɖe ye ŋu o, medi nuteƒemawɔmawɔ aɖeke o! (4 Mose 25:11) Míadi be míate mía ɖokuiwo ɖa kura tso alakpasubɔsubɔ gbɔ eye be ‘míagaka asi nu makɔmakɔ aɖeke ŋu’ le Mawu ŋkume o. (Yes. 52:11) Le susu ma ke ta la, míedea nu dunyahenyawo kple xexe sia me nyaʋiʋli siwo dea mama amewo me la me o. (Yoh. 15:19) Míebua dulɔlɔ̃ be enye alakpasubɔsubɔ ƒomevi bubu si Satana dona ɖe ŋgɔ eye míetea mía ɖokui ɖa tso egbɔ.

²³ Ƒo wo katã ta la, mina míaɖo ŋku mɔnukpɔkpɔ si su mía si be míasubɔ Yehowa le eƒe gbɔgbɔmegbedoxɔ dzadzɛ si ŋu kɔ me la dzi. Esi míeyi edzi le ŋudzedze kpɔm ɖe ɖoɖo nyui sia ŋu la, mina míaɖoe kplikpaa wu tsã be míaɖe mía ɖokuiwo ɖa tso alakpasubɔsubɔ kple eƒe gbolowɔwɔ gbɔ!