Ame Kawoe Nye “Nu Gbagbe Siawo Siwo Mo Ene Li Na” La?

1, 2. Nu ka tae Yehowa zãa nu siwo wokpɔna ɣeaɖewoɣi ne edi be ye subɔla siwo le anyigba dzi la nase nyateƒenya aɖewo gɔme?

BU NƆNƆME sia ŋu kpɔ, ƒome aɖe si me ɖevi suewo le la nɔ anyi ɖe nuɖukplɔ̃ ŋu le Biblia srɔ̃m. Esi vifofoa di be yeakpe ɖe ɖeviawo ŋu woase Ŋɔŋlɔawo me nyateƒe aɖe gɔme la, etsɔ nutata aɖewo fia wo. Ale si ɖeviawo le nu kom kple nya siwo gblɔm wole la fia be wole nu si fiam wo fofo le la gɔme sem. Esi vifofoa zã nutatawo kpe ɖe eƒe numeɖeɖeawo ŋu la, ena ɖeviawo se nu si fiam wòle wo tso Yehowa ŋu gɔme, anye ne womase egɔme bɔbɔe hafi o.

² Nenema kee Yehowa zãa nu siwo wokpɔna tsɔ kpena ɖe amegbetɔ siwo nye viawo ŋu be woase nu ŋutɔŋutɔ siwo womekpɔna o la gɔme. Le kpɔɖeŋu me, esi Yehowa di be yeaɖe nyateƒenya vevi aɖewo tso ye ɖokui ŋu afia Ezekiel la, ena wòkpɔ ŋutega siwo me nu ŋutɔŋutɔ wɔdɔɖeamedziwo dze le. Le agbalẽ sia ƒe ta si do ŋgɔ me la, míeƒo nu tso nu mawo dometɔ ɖeka ŋu. Azɔ na míatrɔ susu ɖe ŋutega wɔdɔɖeamedzi ma ƒe akpa ɖeka koŋ ŋu ne míakpɔ ale si ŋutega ma gɔme sese akpe ɖe mía ŋu míagate ɖe Yehowa ŋu geɖe wu.

3. (a) Le Ezekiel 1:4, 5 ƒe nya nu la, nu kae Ezekiel kpɔ le ŋutega me? (Kpɔ nɔnɔmetata si le nyati sia ƒe gɔmedzedze.) (b) Nu kae nède dzesii le ale si Ezekiel ɖɔ nu siwo wòkpɔ lae?

³ Xlẽ Ezekiel 1:4, 5. Ezekiel ɖɔ ‘nanewo, siwo ɖi nu gbagbe ene’ siwo wòkpɔ la be woƒe nɔnɔme ɖi mawudɔla, amegbetɔ kple lã tɔ. De dzesi ale si tututu Ezekiel ɖɔ nu siwo wòkpɔ, esi wògblɔ be yekpɔ ‘nanewo, siwo ɖi’ nu gbagbe ene. Ne èxlẽ Ezekiel ta gbã bliboa la, àkpɔe be nyagblɔɖilaa zã nyawo abe “nane si le abe,” “enɔ abe” kple nane si “ɖi” zi geɖe. (Eze. 1:13, 24, 26) Edze ƒãa be Ezekiel de dzesii be nu siwo yekpɔ la nye nu siwo ɖi nu ŋutɔŋutɔ siwo le dziƒo alo nuawo ƒe nɔnɔme ko.

4. (a) Dɔ kae ŋutegaa wɔ ɖe Ezekiel dzi? (b) Nu kae Ezekiel anya nya tso kerubiwo ŋu?

⁴ Ðewohĩ nu siwo Ezekiel kpɔ le ŋutega me kple gbeɖiɖi siwo wòse na eƒe nu ku. Nu gbagbe eneawo ƒe dzedzeme le abe “akakati bibi” ene. Ale si woɖea ablae la ɖi “dzikedzowo.” Woƒe aʋalawo ƒe ɖiɖi le abe “tsi geɖewo ƒe hoowɔwɔ” ene, eye woƒe zɔɖeɖe ‘ɖi aʋakɔ aɖe ƒe hoowɔwɔ.’ (Eze. 1:13, 14, 24-28; kpɔ aɖaka si nye “Menɔ Nu Gbagbeawo Kpɔm.”) Le ŋutega bubu me la, Ezekiel gblɔ tso nu gbagbe ene siawo ŋu be wonye ‘kerubiwo’ alo mawudɔla triakɔwo. (Eze. 10:2) Esi nunɔlawo ƒe mee Ezekiel nɔ tsi ta la, ɖikeke mele eme o be enya be kerubiwo nɔa Mawu ŋkume eye wosubɔnɛ.—1 Kron. 28:18; Ps. 18:10.

5. (a) Aleke kerubiawo kple woƒe mo eneawo ɖe Yehowa ƒe ŋusẽ triakɔ kple eƒe ŋutikɔkɔe gã la fiae? (b) Nu ka tae ŋutegaa ƒe akpa sia nana míeɖoa ŋku gɔmesese si le Mawu ƒe ŋkɔa ŋu la dzi? (Kpɔ etenuŋɔŋlɔ.)

⁵ Xlẽ Ezekiel 1:6, 10. Ezekiel de dzesii hã be mo ene siwo nye amegbetɔ ƒe mo, dzata ƒe mo, nyitsu ƒe mo kple hɔ̃ ƒe mo le kerubiawo dometɔ ɖe sia ɖe si. Mo ene siawo siwo Ezekiel kpɔ la ana wòaɖo ŋku Yehowa ƒe ŋusẽ triakɔ la kple eƒe ŋutikɔkɔe gã la dzi geɖe wu. Nu ka tae? Edze ƒãa be mo eneawo dometɔ ɖe sia ɖe le tsitre ɖi na gãnyenye, ŋusẽ kple ŋutete. Dzata nye gã le gbemelãwo dome, ŋusẽ le nyitsu ŋu le aƒemelãwo dome, ŋutete le hɔ̃ ŋu eye amegbetɔe ƒo nu siwo Mawu wɔ ɖe anyigba dzi la ta, eye wòɖua nuwɔwɔ bubuwo katã dzi le anyigba dzi. (Ps. 8:4-6) Ke hã le ŋutega sia me la, Ezekiel kpɔ be nu gbagbe triakɔ ene siwo le tsitre ɖi na nuwɔwɔwo abe ale si kerubiawo ƒe mo eneawo ɖee fia ene la, le anyime na Yehowa, ame si nye Dziɖulagã ɖe nu sia nu dzi la ƒe fiazikpui la. Nuwo ɖɔɖɔ alea na míekpɔ ale si Yehowa ate ŋu ato eƒe nuwɔwɔwo dzi ana eƒe tameɖoɖo nava eme.a Nyateƒee, nya si hakpalaa gblɔ tso Yehowa ŋu be “Eƒe gãnyenye gbɔ anyigba kple dziƒo ŋu” la le eteƒe.—Ps. 148:13.

6. Nu kae anya kpe ɖe Ezekiel ŋu wògase nu si mo eneawo tsi tre ɖi na la gɔme geɖe wu?

⁶ Le ɣeyiɣi aɖe megbe esi Ezekiel de ŋugble tso nu siwo wòkpɔ ŋu la, anya ɖo ŋku ale si Mawu subɔla siwo nɔ anyi do ŋgɔ nɛ la tsɔ lãwo sɔ kple nanewo la dzi. Le kpɔɖeŋu me, blemafofo Yakob tsɔ via Yuda sɔ kple dzata eye wòtsɔ Benyamin sɔ kple amegãxi. (1 Mose 49:9, 27) Nu ka tae? Elabena ŋutsu siawo kple woƒe dzidzimeviwo aɖe nɔnɔme siwo ɖi dzata kple amegãxi ƒe nuwɔnawo afia. Eya ta lãwo zazã alea le Mose ƒe nuŋlɔɖi siwo tso gbɔgbɔ me me la ana Ezekiel naƒo nya ta be kerubiawo ƒe mo hã le tsitre ɖi na nɔnɔme ɖedzesi aɖewo. Gake nɔnɔme kawoe?

7, 8. Nɔnɔme kawoe kerubiawo ƒe mo eneawo tsia tsitre ɖi na zi geɖe?

⁷ Nɔnɔme kawoe Biblia ŋlɔla siwo nɔ anyi do ŋgɔ na Ezekiel gblɔ be wole dzata, hɔ̃ kple nyitsu si? Kpɔ Biblia me nya siawo ɖa: “Kalẽtɔ . . . si ƒe dzi le abe dzata ƒe dzi ene.” (2 Sam. 17:10; Lod. 28:1) “Hɔ̃ dzona yia dzi” eye “eƒe ŋkuwo kpɔa nu le didiƒe ʋĩi ke.” (Hiob 39:27, 29) “Nyitsu ƒe ŋusẽe nana wokpɔa agblemenu geɖe.” (Lod. 14:4) Le ŋɔŋlɔ siawo ta la, dzata ƒe moa fiaa dzɔdzɔenyenye yome nɔnɔ dzideƒotɔe; hɔ̃ ƒe moa fiaa nukpɔkpɔ yi ŋgɔ ʋĩi, eye nyitsu ƒe moa fiaa ŋusẽ triakɔ le míaƒe agbalẽwo me zi geɖe.

⁸ Ke nu kae “amegbetɔ ƒe mo,” fia? (Eze. 10:14, etenuŋɔŋlɔ) Efia nɔnɔme aɖe si mele lã aɖeke si o, si le amegbetɔ, si Mawu wɔ ɖe eƒe nɔnɔme nu la ko si. (1 Mose 1:27) Nɔnɔme ma si le amegbetɔwo si le anyigba dzi la dze le nya si Mawu gblɔ la me be: “Tsɔ wò dzi blibo . . . lɔ̃ Yehowa wò Mawu la” eye “lɔ̃ hawòvi abe wò ŋutɔ ɖokuiwò ene.” (5 Mose 6:5; 3 Mose 19:18) Ne míewɔ ɖe sedede sia dzi eye míelɔ̃ amewo ɖokuitɔmadimaditɔe la, ke míele Yehowa ƒe lɔlɔ̃ la tɔgbi ɖem fia. Apostolo Yohanes gblɔ be: “Míelɔ̃a ame, elabena Mawu tre mí lɔlɔ̃.” (1 Yoh. 4:8, 19) Eya ta “amegbetɔ ƒe mo” la fia lɔlɔ̃.

9. Ame ka ƒe nɔnɔmewoe kerubiawo ƒe moawo tsi tre ɖi na?

⁹ Ame ka ƒe nɔnɔmewoe nye esiawo? Esi wònye be kerubiawo ƒe moe ta la, nɔnɔmeawo le tsitre ɖi na nu siwo katã kerubiawo le tsitre ɖi na le ŋutegaa me, si nye Yehowa ƒe ƒome si le dziƒo si me gbɔgbɔmenuwɔwɔ wɔnuteƒewo le la. (Nyaɖ. 5:11) Azɔ hã, esi wònye be Yehowa gbɔe kerubiawo ƒe agbe dzɔ tso ta la, eƒe nɔnɔmewoe le wo si. (Ps. 36:9) Eya ta kerubiawo ƒe mo fia nɔnɔme siwo le Yehowa ŋutɔ si. (Hiob 37:23; Ps. 99:4; Lod. 2:6; Mika 7:18) Mɔ ʋɛ kawo nue Yehowa ɖe nɔnɔme ɖedzesi siawo fia le?

10, 11. Mɔ kawo nue Yehowa ƒe nɔnɔme vevi eneawo le vi ɖem na mí le?

¹⁰ Dzɔdzɔenyenye. Esi Yehowa Mawu “lɔ̃a nya dzɔdzɔe” ta la, “mekpɔa ame ŋkume o.” (Ps. 37:28; 5 Mose 10:17) Esia tae mɔnukpɔkpɔ si su mía si be míanye esubɔlawo eye míayi edzi asubɔe ale be míava kpɔ yayra mavɔwo la le ʋuʋu ɖi na mí katã, metsɔ le ɖoƒe si míele alo afi si míetso me o. Nunya. Esi Yehowa Mawu sie “dzi nyanu le” ta la, ena agbalẽ si me “nunya vavãtɔ” le la mí. (Hiob 9:4; Lod. 2:7) Ne míewɔ ɖe Biblia ƒe aɖaŋuɖoɖo siwo me nunya le dzi la, ekpena ɖe mía ŋu míenɔa te ɖe kuxi siwo míedoa goe gbe sia gbe la nu, eye míenɔa agbe ɖɔʋu. Ŋusẽ. Esi “ŋusẽ gã” le Yehowa Mawu si ta la, etoa eƒe gbɔgbɔ kɔkɔea dzi naa “ŋusẽ si gbɔ dzɔdzɔmetɔ ŋu” la mí. Esia doa ŋusẽ mí míenɔa te ɖe tetekpɔ sesẽ ɖe sia ɖe nu.—Nah. 1:3; 2 Kor. 4:7; Ps. 46:1.

¹¹ Lɔlɔ̃. Esi Yehowa Mawu ƒe “lɔlɔ̃ nu metsina gbeɖe o” ta la, megblẽa esubɔla wɔnuteƒewo ɖi gbeɖe o. (Ps. 103:8; 2 Sam. 22:26) Eya ta ne dɔléle alo tsitsi wɔe be míegate ŋu le geɖe wɔm le Yehowa subɔsubɔ me abe tsã ene o hã la, enyanya be Yehowa ɖoa ŋku dɔ siwo lɔlɔ̃ ʋã mí míewɔ va yi dzi la, faa akɔ na mí. (Heb. 6:10) Edze ƒãa be Yehowa ƒe nɔnɔme siwo nye dzɔdzɔenyenye, nunya, ŋusẽ kple lɔlɔ̃ le vi ɖem na mí xoxo eye nɔnɔme vevi ene siawo ayi edzi aɖe vi na mí le etsɔme.

12. Nu kae wòle be wòanɔ susu me na mí tso nu si míate ŋu anya tso Yehowa ƒe nɔnɔmewo ŋu la ŋu?

¹² Nenɔ susu me na mí be nu si gɔme mí amegbetɔwo míate ŋu ase tso Yehowa ƒe nɔnɔmewo ŋu la le abe “eƒe mɔwo ƒe nugbɔ ko” ene. (Hiob 26:14) “Ŋusẽkatãtɔ la gɔme sese gbɔ míaƒe ŋutete ŋu,” elabena “eƒe gãnyenye me dzodzro meli o.” (Hiob 37:23; Ps. 145:3) Eya ta míekpɔe be xexlẽme meli na Yehowa ƒe nɔnɔmewo loo alo aɖo wo ɖe hatsotsowo me o. (Xlẽ Romatɔwo 11:33, 34.) Le nyateƒe me la, Ezekiel ƒe ŋutegaa ŋutɔ ɖee fia be seɖoƒe alo xexlẽme meli na Mawu ƒe nɔnɔmewo o. (Ps. 139:17, 18) Ŋutegaa ƒe akpa kae te gbe ɖe nyateƒenya vevi sia dzi?

13, 14. Nu kae kerubiawo ƒe mo eneawo katã le tsitre ɖi na, eye nu ka tae míate ŋu aƒo nya ta alea?

¹³ Ezekiel kpɔ le ŋutegaa me be menye mo ɖeka ye le kerubiawo dometɔ ɖe sia ɖe si o, ke boŋ mo ene. Nu kae esia fia? Ðo ŋku edzi be le Mawu ƒe Nyaa me la, ne wozã xexlẽdzesi ene zi geɖe la, efiaa blibonyenye, si fia be ame alo naneke meto le eme o. (Yes. 11:12; Mat. 24:31; Nyaɖ. 7:1) Eɖe dzesi be le ŋutega sia ɖeɖe dzaa me la, Ezekiel yɔ xexlẽdzesi ene abe zi 11 sɔŋ ene. (Eze. 1:5-18) Ke aleke míaƒo nya tae? Ale si ko kerubi eneawo tsi tre ɖi na Yehowa ƒe gbɔgbɔmevi wɔnuteƒewo katã la, nenema kee ne míelé ŋku ɖe kerubiawo ƒe mo eneawo ŋu ɖe du la, wotsia tre ɖi na nɔnɔme siwo katã le Yehowa si.b

¹⁴ Be míawɔ ale si kerubiawo ƒe mo eneawo tsi tre ɖi na nu si yi ŋgɔ wu nɔnɔme ene pɛ ko ƒe kpɔɖeŋu la, na míatsɔe asɔ kple tasiaɖamfɔ ene siwo dze le ŋutegaa me. Tasiaɖamfɔawo dometɔ ɖe sia ɖe lolo, gake ne míelé ŋku ɖe wo ame eneawo katã ŋu la, womeganyea afɔti gãgãwo dzro ko o, ke boŋ wova zua nu si dzi tasiaɖam bliboa le. Nenema kee ne míelé ŋku ɖe mo eneawo katã ŋu la, womegatsia tre ɖi na nɔnɔme ɖekaɖekawo ko o, ke boŋ wova zua nu si dzi Yehowa ƒe amenyenye bliboa nɔ te ɖo.

15. Nyateƒe vevi dodzidzɔname kae Ezekiel va de dzesii le ŋutega gbãtɔ si wòkpɔ la me?

¹⁵ Le ŋutega gbãtɔ sia me la, Ezekiel srɔ̃ nyateƒenya vevi dodzidzɔname aɖe ku ɖe ƒomedodo si le eya kple Yehowa dome ŋu. Nu kae wòsrɔ̃? Nyateƒenya sia dze le nya gbãtɔ siwo nyagblɔɖilaa gblɔ le eƒe agbalẽa me la me. Esi Ezekiel gblɔ be “Kaldea-nyigba” dzie yenɔ vɔ megbe, eye wònɔ nu ƒom tso nu siwo teƒe wòkpɔ ŋu la, egblɔ kpee be: “Yehowa ƒe asi va dzinye le afi ma.” (Eze. 1:3) De dzesii be Ezekiel megblɔ be Yerusalem yee yekpɔ ŋutegaa le o, ke boŋ le afi ma, si nye Babilon.c Eya ta nu kae nya sia na Ezekiel de dzesii? Eyae nye be: Togbɔ be woɖe aboyo ye tso Yerusalem kple eƒe gbedoxɔa gbɔ eye yetsi asi hã, womeɖe ye ɖa le Yehowa ŋu o, eye yeate ŋu asubɔe. Esi Yehowa ɖe eɖokui fia Ezekiel le Babilon la, ena wòkpɔe be woate ŋu asubɔ Mawu wòadze eŋu metsɔ le teƒe si ame le alo nɔnɔme si me wòle me o. Ke boŋ dzi si le Ezekiel si kple ale si wòadi vevie be yeasubɔ Yehowa ye le vevie.

16. (a) Kakaɖedzi fakɔname kae míekpɔna tso ŋutega si Ezekiel kpɔ la me? (b) Nu kae ʋãa wò nètsɔa wò dzi blibo subɔa Yehowa?

¹⁶ Nu ka tae nyateƒenya sia si Ezekiel va nya la faa akɔ na mí egbea? Enana míekana ɖe edzi be ne míesubɔ Yehowa tso dzi blibo me la, afi ka kee míeɖale o, aleke kee nu te ɖe mía dzii o, alo nɔnɔme ka ke me tom míele le agbe me o, Mawu menɔa adzɔge tso mía gbɔ o. (Ps. 25:14; Dɔw. 17:27) Esi lɔlɔ̃ si le Yehowa si na esubɔlawo dometɔ ɖe sia ɖe nu metsina o ta la, meyɔna be yeagbe nu le mía gbɔ o. (2 Mose 34:6) Eya ta Yehowa ƒe lɔlɔ̃ si nu metsina o la, ate ŋu aɖe vi na mí. (Ps. 100:5; Rom. 8:35-39) Tsɔ kpe ɖe eŋu la, ŋutega wɔdɔɖeamedzi sia si ɖe Yehowa ƒe kɔkɔenyenye kple eƒe ŋusẽ si ɖeke mesɔ kplii o fia la, ɖoa ŋku edzi na mí be Yehowa koe dze míasubɔ. (Nyaɖ. 4:9-11) Nyateƒee, ɖe medzɔa dzi na mí be Yehowa to ŋutega mawo dzi kpe ɖe mía ŋu be míase nyateƒenya vevi aɖewo siwo ku ɖe eya amea kple eƒe nɔnɔmewo ŋu gɔme oa? Ne míeva le Yehowa ƒe nɔnɔme lédzinamewo gɔme sem geɖe wu la, enana míegatena ɖe eŋu wu, eye wòʋãa mí be mía kafui eye míatsɔ míaƒe dzi kple ŋusẽ blibo asubɔe.—Luka 10:27.

17. Biabia kawo mee míadzro le ta siwo kplɔ esia ɖo me?

¹⁷ Gake ewɔ nublanui be le Ezekiel ƒe ŋkekea me la, tadedeagu dzadzɛa dome gblẽ. Nu ka gbɔe esia tso? Afɔ kae Yehowa ɖe? Eye nu vevi kawoe míate ŋu asrɔ̃ tso blemanudzɔdzɔ mawo me egbea? Woaɖo nya siawo ŋu le ta siwo kplɔ esia ɖo la me.