Ŋutega Siwo Ðe Ame Siwo Le Dziƒonutowo Me Fia

“Fiazikpui aɖe le dziƒo, eye ame aɖe bɔbɔ nɔ fiazikpui la dzi. Ame si bɔbɔ nɔ edzi la ƒe dzedzeme le abe yaspis-kpe kple sardis-kpe ene, eye anyieʋɔ si le abe emerald-kpe ene la ƒo xlã fiazikpui la.”—Nyaɖeɖefia 4:2, 3.

“Keklẽ ƒo xlãe godoo va kpe abe anyieʋɔ si dona ɖe alilikpo dodo me le tsidzagbe ene. Aleae keklẽ si ƒo xlãe la ƒe dzedzeme le. Ele abe Yehowa ƒe ŋutikɔkɔe ƒe dzedzeme ene.”—Ezekiel 1:27, 28.

Wotsɔ kpe xɔasi siwo le keklẽm ŋeŋeŋe, anyieʋɔ kple fiazikpui dzeani aɖe siwo nye nu siwo míate ŋu akpɔ le susu me la ɖɔ Yehowa Mawu Ŋusẽkatãtɔ la ƒe atsyɔ̃ le ŋutega siwo apostolo Yohanes kple nyagblɔɖila Ezekiel kpɔ la me. Ŋutega siawo na míekpɔe be atsyɔ̃ɖoɖo si me Yehowa le la nya kpɔ, ewɔ nuku eye wòdze ani ŋutɔ.

Ale si woɖɔ Mawu la wɔ ɖeka kple nya si hakpalaa gblɔ. Egblɔ be: “Yehowa lolo, eye wòdze kafukafu ŋutɔ. Vɔvɔ̃ le eŋu wu mawu bubuwo katã. Dukɔwo ƒe mawuwo katã nye mawu maɖinuwo, ke Yehowae nye ame si wɔ dziƒowo. Gãnyenye kple atsyɔ̃ɖoɖo le eŋkume; ŋusẽ kple nyonyo le eƒe kɔkɔeƒe la.”—Psalmo 96:4-6.

Togbɔ be Yehowae nye Ŋusẽkatãtɔ hã la, ekpe mí be míado gbe ɖa na ye eye wòka ɖe edzi na mí be yeaɖo to mí. (Psalmo 65:2) Mawu lɔ̃ mí eye eléa be na mí ale gbegbe be apostolo Yohanes gblɔe wòsɔ be: “Mawu nye lɔlɔ̃.”—1 Yohanes 4:8.

“Esi gbɔgbɔ kɔkɔe [yɔ nusrɔ̃la Stefano] fũu la, ekpɔ dziƒo gãa, eye wòkpɔ Mawu ƒe ŋutikɔkɔe kple Yesu wòle tsitre ɖe Mawu ƒe ɖusime, eye wògblɔ be: ‘Kpɔ ɖa! Mekpɔ dziƒo nu ʋu, eye mekpɔ Amegbetɔvi la wòle tsitre ɖe Mawu ƒe ɖusime.’”—Dɔwɔwɔwo 7:55, 56.

Do ŋgɔ na Stefano ƒe ŋutega sia kpɔkpɔ la, Yudatɔwo ƒe kplɔla siwo tututu Stefano nɔ nua ƒom na la na wowu Yesu. Ŋutegaa ɖee fia be wofɔ Yesu ɖe tsitre, ele agbe eye wodoe ɖe dzi. Apostolo Paulo gblɔ tso nudzɔdzɔ sia ŋu be: “[Yehowa fɔ Yesu] ɖe tsitre tso ame kukuwo dome, eye wòna wòbɔbɔ nɔ eƒe ɖusime le dziƒonutowo me, wòƒo dziɖuɖuwo kple gãnyenye kple ŋusẽ kple aƒetɔnyenye katã kpakple ŋkɔ sia ŋkɔ si woyɔna la ta sãsãsã, menye le nuɖoanyi sia ɖeɖe ko me o, ke le esi ava va la hã me.”—Efesotɔwo 1:20, 21.

Tsɔ kpe ɖe nuƒoƒo tso ɖoƒe kɔkɔ si Yesu le ŋu la, Ŋɔŋlɔawo ɖee fia be Yesu hã tsɔa ɖe le eme na amegbetɔwo abe Yehowa ke ene. Esi Yesu nɔ eƒe subɔsubɔdɔa wɔm le anyigba dzi la, eda dɔ na dɔnɔwo kple lãmetututɔwo, eye wòfɔ ame kukuwo ɖe tsitre. Eto eƒe vɔsakua dzi ɖee fia be yelɔ̃ Mawu kple amegbetɔwo. (Efesotɔwo 2:4, 5) Eteƒe madidi o, Yesu si le tsitre ɖe Mawu ƒe ɖusime awɔ eƒe ŋusẽ ŋu dɔ ahe yayra gbogbo vɛ na amegbetɔwo le afi sia afi.

“[Nye, nyagblɔɖila Daniel] meɖe ŋku ɖee va se ɖe esime wotsɔ fiazikpuiwo va li anyi, eye Ame Si Li Tso Gbe Aɖe Gbe Ʋĩi Ke la [Yehowa] bɔbɔ nɔ anyi. . . . Ame akpe teƒe akpewo le esubɔm, eye ame akpe ewo teƒe akpe ewo le tsitre ɖe eŋkume.”—Daniel 7:9, 10.

Le ŋutega sia si me woɖe dziƒo fia Daniel le me la, menye mawudɔla ɖeka aɖe ko wòkpɔ o, ke boŋ mawudɔla akpeakpewoe. Ŋutega wɔdɔɖeamedzi ka gbegbee nye esi! Mawudɔlawo nye gbɔgbɔmenuwɔwɔ nyanu siwo tri akɔ ŋutɔ. Mawudɔlawo dometɔ aɖewo nye serafiwo eye ɖewo nye kerubiwo. Biblia ƒo nu tso mawudɔlawo ŋu wu zi 250 sɔŋ.

Menye ame siwo ku yi dziƒoe mawudɔlawo nye o. Mawu wɔ mawudɔlawo do ŋgɔ kura na amegbetɔwo wɔwɔ. Esi Mawu ɖo anyigbaa gɔme anyi la, mawudɔlawo kpɔ eteƒe eye wodo dzidzɔɣli.—Hiob 38:4-7.

Mɔ aɖe si dzi mawudɔla wɔnuteƒewo subɔa Mawu lee nye ale si wokpea asi ɖe gbeƒãɖeɖe Mawu Fiaɖuƒe ŋuti nya nyuia, si nye dɔ vevitɔ si wɔm wole le anyigba dzi egbea la ŋu. (Mateo 24:14) Woɖe ale si wokpea asi ɖe dɔ sia ŋu fia apostolo Yohanes le ŋutega me. Egblɔ be: “Mekpɔ mawudɔla bubu aɖe wòle dzodzom le yame, eye nya nyui mavɔ aɖe le esi wòagblɔ na ame siwo le anyigba dzi, kple dukɔ sia dukɔ kple to sia to kple gbegbɔgblɔ sia gbegbɔgblɔ kpakple ame ɖe sia ɖe ƒomevi.” (Nyaɖeɖefia 14:6) Togbɔ be mawudɔlawo megaƒoa nu na amewo egbea abe tsã ene o hã, wofiaa mɔ ame siwo le gbeƒã ɖem nya nyuia yia ame siwo di be yewoasee la gbɔ.

“Aʋa dzɔ le dziƒo: Mikael [Yesu Kristo] kple eƒe dɔlawo wɔ aʋa kple ʋɔ driba la, eye ʋɔ driba la kple eƒe dɔlawo wɔ aʋa kpli wo, gake womeɖu dzi o, eye womegakpɔ teƒe aɖeke hã na wo le dziƒo o. Eya ta wotsɔ ʋɔ driba gã, si nye da xoxo la, si woyɔna be Abosam kple Satana, ame si le anyigbadzinɔlawo katã blem la, ƒu gbe; wotsɔe ƒu gbe ɖe anyigba, eye wotsɔ eƒe dɔlawo hã ƒu gbe kpe ɖe eŋu.”—Nyaɖeɖefia 12:7-9.

Ɣeaɖeɣi va yi la, ŋutifafa menɔ dziƒo o. Le amegbetɔwo ƒe ŋutinya ƒe gɔmedzedze la, mawudɔlawo dometɔ ɖeka si di vevie be woasubɔ ye la dze aglã ɖe Yehowa ŋu, eye wòva zu Satana si gɔmee nye “Tsitretsiɖeŋula.” Mawudɔla bubuwo hã dze aglã kpe ɖe eŋu eye wova yɔ wo be gbɔgbɔ vɔ̃wo. Wovɔ̃ɖi ale gbegbe be wotso ɖe Yehowa ŋu eye wona ame akpa gãtɔ tra ɖa tso Yehowa ƒe mɔfiame vavãwo ŋu.

Satana kple eƒe gbɔgbɔ vɔ̃wo ƒe tagbɔ sẽ eye wovɔ̃ɖi. Wonye amegbetɔwo ƒe futɔwo eye woawo gbɔe anyigbadzifukpekpe geɖewo tso. Le kpɔɖeŋu me, Satana wu nuteƒewɔla Hiob ƒe lãhawo kple eƒe subɔviwo. Emegbe ewu Hiob vi ewoawo katã, esi wòna “ya sesẽ aɖe” ƒo va lɔ xɔ si me wole la wòmu dze wo dzi. Eyome Satana na “ƒoƒoe vɔ̃ɖi aɖe te Hiob tso eƒe afɔƒome va se ɖe eƒe dzodome.”—Hiob 1:7-19; 2:7.

Madidi o woaɖe Satana ɖa. Enya nyuie be esi wonya ye ɖo ɖe anyigba dzi ta la, “ɣeyiɣi vi aɖe koe susɔ na ye.” (Nyaɖeɖefia 12:12) Woatsrɔ̃ Satana godoo, eye esia nye dzidzɔnya gã aɖe na mí!

“[Yesu tsɔ eƒe] ʋu ƒle amewo tso to sia to kple gbegbɔgblɔ sia gbegbɔgblɔ kple ame ƒomevi ɖe sia ɖe kple dukɔ sia dukɔ me na Mawu, eye nèwɔ wo wonye fiaɖuƒe kple nunɔlawo na mía Mawu la, eye woaɖu fia ɖe anyigba la dzi.”—Nyaɖeɖefia 5:9, 10.

Woafɔ ame aɖewo ɖe tsitre abe ale si ko wofɔ Yesu ɖe tsitre tso anyigba dzi yi dziƒoe ene. Yesu gblɔ na eƒe apostolo wɔnuteƒeawo be: “Meyina be madzra teƒe ɖo ɖi na mi. Eye . . . magava, eye maxɔ mi ɖe nye ŋutɔ gbɔnye, ale be afi si mele la, miawo hã mianɔ afi ma.”—Yohanes 14:2, 3.

Susu aɖe tae ame aɖewo ayi dziƒo ɖo. Woawɔ ɖeka kple Yesu anye Fiaɖuƒe si ava ɖu amegbetɔwo dzi la me tɔwo eye woahe yayrawo vɛ na anyigbadzinɔlawo katã. Fiaɖuƒe siae Yesu fia eyomedzelawo le aƒetɔ ƒe gbedodoɖa me be woabia be: “Mía Fofo si le dziƒowo, wò ŋkɔ ŋuti nakɔ. Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.”—Mateo 6:9, 10.

“[Nye, apostolo Yohanes] mese gbe gã aɖe tso fiazikpui la gbɔ wògblɔ be: ‘Kpɔ ɖa! Mawu ƒe agbadɔ la le amegbetɔwo gbɔ, . . . eye atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o. Nu siwo nɔ anyi tsã la nu va yi.’”—Nyaɖeɖefia 21:3, 4.

Ŋutega sia si nye nyagblɔɖi la he míaƒe susu yi ɣeyiɣi si Mawu Fiaɖuƒea me tɔwo, siwo nye Yesu kple ame siwo wofɔ ɖe tsitre tso anyigba dzi yi dziƒo la, aɖe Satana ƒe dziɖuɖu ɖa eye woatrɔ anyigbaa wòazu paradiso la dzi. Nu siwo he vevesese kple nuxaxa vɛ na amegbetɔwo la nu ayi. Ku gɔ̃ hã maganɔ anyi o.

Ke ame akpeakpe siwo ku evɔ womafɔ wo ɖe tsitre be woayi dziƒo o ya ɖe? Woava fɔ wo ɖe tsitre be woanɔ agbe tegbee le Paradiso ma me le anyigba dzi.—Luka 23:43.