Yehowa Ƒe Yayra Ðe Mi̇́aƒe “Anyigba” Dzi

“Nusianu, si gbɔ tɔ la de la, agbɔ agbe.”—XEZEKIEL 47:9.

1, 2. (a) Aleke gbegbee tsi nye nu vevii? (b) Nukae tsi si le Xezekiel ƒe ŋutegaa me tɔsisia me tsi tre ɖi na?

TSI nye nu nyui aɖe ŋutɔ. Nugbagbe ɖesiaɖe ƒe agbe nɔ te ɖe edzi. Eya manɔmee la, mía dometɔ aɖeke mate ŋu anɔ agbe eteƒe nadidi o. Esi tsi te ŋu bɔbɔa nuwo eye wòklɔa ɖinuwo ɖa ta la, míetsɔnɛ klɔa nuwoe hã. Míelenɛ, míetsɔnɛ nyãa míaƒe nuwoe, eye míetsɔnɛ klɔa míaƒe nuɖuɖu gɔ̃ hã. Nusiawo wɔwɔ ate ŋu akpɔ míaƒe agbe ta.

² Biblia zãa tsi tsɔ tsia tre ɖi na gbɔgbɔ me nunaɖoɖo siwo Yehowa wɔ ɖe agbekpɔkpɔ ŋu. (Yeremya 2:13; Yohanes 4:7-15) Mawu ŋuti sidzedze si le eƒe Nya la me hã le nunana siawo dome, eye eƒe amewo ŋu kɔkɔ to Kristo ƒe tafevɔsa me hã le eme. (Efesotɔwo 5:25-27) Le Xezekiel ƒe gbedoxɔ ŋuti ŋutegaa me la, tɔsisi wɔnuku si tsa tso gbedoxɔa me tsi tre ɖi na yayra siawo siwo naa agbe. Gake ɣekaɣie tɔsisia atsa, eye nukae wòfia na mí egbea?

Tɔ aɖe le Sisim le Anyigba si Woɖɔ Ðo Dzi

 3. Nuka teƒee Xezekiel kpɔ abe alesi woka eta le Xezekiel 47:2-12 ene?

³ Esi Xezekiel deviwo nye aboyomewo le Babilon ta la, Yehowa ƒe nunanawo hiã wo wu gbɔgblɔ. Eyata aleke gbegbe wòade dzi ƒo na Xezekiel enye si be wòkpɔe be tsi sue aɖe dzi tso kɔkɔeƒea eye wòtsa to ŋutega me gbedoxɔa me! Mawudɔla aɖe dzidze tɔsisia le abɔklugui 1,000 ƒe dometsotso ɖesiaɖe me. Enɔ goglom ɖe edzi tso afɔkɔe va ɖo klo nu va ɖo ali gbɔ kaka wòva ɖo afisi wòzu tɔsisi gã si hiã tsiƒuƒu le. Tɔsisia gbɔ agbe nuwo eye wònyo nuwo. (Xezekiel 47:2-11) Wogblɔ na Xezekiel be: “Ati tseku vovovowo amie ɖe tɔsisi la ƒe goawo kple eve dzi.” (Xezekiel 47:12a) Esi tɔsisia de nu Ƒu Kuku—si nye tsi si me nugbagbe aɖeke mele o—me la, nugbagbewo gaɖo eme! Tɔmelã va sɔ gbɔ ɖe eme. Lãɖeɖedɔ nyɔ.

4, 5. Aleke Yoel ƒe nyagblɔɖi si ƒo nu tso tɔsisi ŋu ɖi Xezekiel tɔe, eye nukatae nusia le vevie?

⁴ Anɔ eme be nyagblɔɖi nyui sia na Yudatɔ aboyomeawo ɖo ŋku nyagblɔɖi bubu si woŋlɔ ɖi ƒe alafa eve kple edzivɔ do ŋgɔ la dzi, si gblɔ be: “Tsi adzɔ tso Yehowa ƒe aƒe la me ahade tsi xetiwo ƒe bali la me.”a (Yoel 4:18) Yoel ƒe nyagblɔɖia gblɔe ɖi abe Xezekiel tɔ ene be tsi atsa tso Mawu ƒe aƒe si nye gbedoxɔa me, eye wòana agbe nagaɖo anyigba mawɔnu ŋu.

⁵ Gbetakpɔxɔ le egblɔm ɣeyiɣi didi aɖee nye esia be Yoel ƒe nyagblɔɖia le eme vam le míaƒe ɣeyiɣia me.b Ekema kakaɖedzi li be Xezekiel ƒe ŋutega si ɖii hã le eme vam nenema ke. Abe alesi wònɔ le blema Israel ene la, Yehowa ƒe yayrawo tsa va Mawu ƒe amewo ƒe anyigba si wogbugbɔ dzra ɖo egbea hã dzi vavã.

Yayra Dudu Kɔ Ði Bababa

 6. Nuka dzie ʋuhehlẽ ɖe ŋutega me vɔsamlekpuia ŋu anya ɖo ŋkui na Yudatɔwo?

⁶ Afikae yayraawo tso va na Mawu ƒe ame siwo wogbugbɔ ɖo te la? Enyo, de dzesii be tsia tsa tso Mawu ƒe gbedoxɔ me. Nenema ke egbea hã yayraawo tso Yehowa gbɔ to eƒe gbɔgbɔmegbedoxɔa me—si nye ɖoɖo si wòwɔ hena tadedeagu dzadzɛ. Xezekiel ƒe ŋutegaa gagblɔ nya vevi aɖe kpee. Tɔsisia tsa to vɔsamlekpuia xa le eƒe anyiehe gome tututu le xɔxɔnu emetɔ me. (Xezekiel 47:1) Vɔsamlekpuia le ŋutega me gbedoxɔa titina tututu. Yehowa ɖɔe na Xezekiel pɛpɛpɛ eye wògblɔ nɛ be wòahlẽ vɔsalã ƒe ʋu ɖe edzi. (Xezekiel 43:13-18, 20) Gɔmesese vevi aɖe le vɔsamlekpui ma ŋu na Israel-viwo katã. Ɣeyiɣi didi aɖe va yi le Sinai Toa gɔme la, Mose hlẽ ʋu ɖe vɔsamlekpui dzi tsɔ ɖo kpe nubabla si le woawo kple Yehowa dome dzi. (Mose II, 24:4-8) Ʋuhehlẽ ɖe ŋutega me vɔsamlekpuia dzi ana woaɖo ŋku edzi be ne wotrɔ va ɖo anyigba si gazu wo tɔ dzi la, Yehowa ƒe yayrawo adudu ɖe wo dzi ne wowɔ nu si wòbla kple wo dzi ko.—Mose V, 28:1-14.

 7. Gɔmesese kae le kpɔɖeŋuvɔsamlekpuia ŋu na Kristotɔwo egbea?

⁷ Nenema ke wole Mawu ƒe amewo yram to nubabla aɖe dzii egbea—enye nubabla yeye, si nyo wu. (Yeremya 31:31-34) Wotsɔ Yesu Kristo ƒe ʋu ɖo kpe eya hã dzi ɣeyiɣi didi aɖee nye sia. (Hebritɔwo 9:15-20) Egbea eɖanye amesiamina siwo nye nubabla ma me tɔwoe míenye loo alo ‘alẽ bubu’ siwo wòɖea vi na domee míele o, gɔmesese vevi aɖe le kpɔɖeŋuvɔsamlekpui ma ŋu na mí. Etsi tre ɖi na Mawu ƒe lɔlɔ̃nu si do ƒome kple Kristo ƒe vɔsa. (Yohanes 10:16; Hebritɔwo 10:10) Abe alesi kpɔɖeŋuvɔsamlekpuia le gbɔgbɔmegbedoxɔa titina ene la, nenema ke Kristo ƒe tafevɔsa la nye nu vevi si dzi tadedeagu dzadzɛtɔ nɔ te ɖo. Eya dzie wonɔa te ɖo tsɔa míaƒe nuvɔ̃wo kea mí eye eyatae etsɔmemɔkpɔkpɔ ɖesiaɖe le mía si. (Yohanes I, 2:2) Eyata míekua kutri be míanɔ agbe ɖe se si do ƒome kple nubabla yeyea, si nye “Kristo ƒe se la” nu. (Galatiatɔwo 6:2) Zi alesi míeyi edzi le agbe nɔm ɖe enu ko la, nunaɖoɖo siwo Yehowa wɔ hena agbekpɔkpɔ la aɖe vi na mí.

 8. (a) Nukae menɔ xɔxɔnu emetɔ me le ŋutega me gbedoxɔa me o? (b) Nukae nunɔla siwo le ŋutega me gbedoxɔa me atsɔ aklɔ wo ɖokui ŋui?

⁸ Viɖe siawo dometɔ ɖekae nye tenɔnɔ dzadzɛ ƒe amesinɔnɔ le Yehowa ŋkume. Le ŋutega me gbedoxɔa me la, nu vevi aɖe si nɔ xɔxɔnu emetɔ me le avɔgbadɔa kple Salomo ƒe gbedoxɔa me la mele eme o—eyae nye tsileze gã si wova yɔ emegbe be gazɔ si me tsi nunɔlawo tsɔ klɔa wo ɖokui ŋui. (Mose II, 30:18-21; Kronika II, 4:2-6) Ke nukae nunɔla siwo le Xezekiel ƒe ŋutega me gbedoxɔa me atsɔ aklɔ wo ɖokui ŋui? Nukutɔsisi ma si le tsatsam to xɔxɔnu emetɔa me li ɖe! Ẽ, Yehowa ayra wo ana nusi awɔe be tenɔnɔ dzadzɛ, alo tenɔnɔ kɔkɔe nanɔ wo si le eŋkume la wo.

 9. Aleke amesiaminawo kple ameha gã la me tɔwo awɔ hafi anɔ dzadzɛ egbeae?

⁹ Nenema ke egbea hã woyra amesiaminawo be tenɔnɔ dzadzɛ le wo si le Yehowa ŋkume. Yehowa bu wo be wole kɔkɔe, eye wòbu dzɔdzɔenyenye na wo. (Romatɔwo 5:1, 2) Ke ‘ameha gã la,’ amesiwo ƒe kpɔɖeŋu to siwo menye nunɔlawo o nye hã ɖe? Wosubɔna le xɔxɔnu xexetɔ me, eye tɔsisi ma kee tsa to ŋutega me gbedoxɔa ƒe akpa ma. Eyata aleke gbegbe wòsɔe nye esi be Yohanes kpɔ ameha gã la wodo awu ʋlaya ɣi dzadzɛwo hele subɔsubɔm le gbɔgbɔmegbedoxɔa ƒe xɔxɔnu! (Nyaɖeɖefia 7:9-14) Aleke gɔ̃e woɖatu nu kple wo le xexe ɖigbɔ sia mee o, kakaɖedzi ate ŋu anɔ wo si be zi alesi woyi edzi ɖe Kristo ƒe tafevɔsa dzixɔxɔse fia ko la, Yehowa abu wo be wole dzadzɛ hele kɔkɔe. Aleke woɖea xɔse fianae? To Yesu ƒe afɔtoƒewo toto, kple ŋuɖoɖo ɖe tafevɔsa la ŋu bliboe me.—Petro I, 2:21.

10, 11. Nu vevi ɖeka kae le kpɔɖeŋutsia si, eye aleke nusia do ƒome kple tɔsisia ƒe kekeɖenui?

¹⁰ Abe alesi míegblɔe va yii ene la, nu vevi bubu aɖe gale kpɔɖeŋutsi sia si—si nye sidzedze. Le Israel si wogagbugbɔ ɖo te me la, Yehowa to nunɔlaawo dzi tsɔ Ŋɔŋlɔawo me nufiafia yra eƒe amewoe. (Xezekiel 44:23) Nenema ke egbea hã Yehowa to ‘fia nunɔlaawo’ dzi tsɔ nufiame gbogbo aɖewo siwo ku ɖe eƒe nyateƒe Nya la ŋu yra eƒe amewoe. (Petro I, 2:9) Yehowa Mawu, eƒe tameɖoɖowo na ameƒomea, kpakple vevietɔ Yesu Kristo kple Mesia Fiaɖuƒea ŋuti sidzedze le dudum ɖi bababa le ŋkeke mamlɛ siawo me. Dzidzɔnya ka gbegbee nye si wònye be míele gbɔgbɔmetsi fakɔname sia si le go gbãm ɖe edzi xɔm!—Daniel 12:4.

¹¹ Abe alesi tɔsisi si mawudɔla la dzidze me nɔ goglom ɖe edzi vivivi ene la, nenema ke yayra siwo naa agbe la le dzidzim ɖe edzi tso Yehowa gbɔ bene wòate ŋu asu na ameha gbogbo siwo le zi nyẽm va míaƒe gbɔgbɔmenyigba la dzii. Gbugbɔɖoanyi nyagblɔɖi bubu aɖe gblɔe ɖi be: “Ame suewo azu akpe, eye ame ʋeewo azu dukɔ sesẽ. Nye Yehowa, nye asi matsɔ awɔe le ewɔɣi.” (Yesaya 60:22) Nya siawo va eme—ame miliɔn geɖe va kpe mí le tadedeagu dzadzɛtɔa me! Yehowa na “tsi” gbogbo aɖe li na amesiwo katã vaa egbɔ. (Nyaɖeɖefia 22:17) Ekpɔa egbɔ be eƒe anyigba dzi habɔbɔa mãa Biblia kple Biblia-srɔ̃gbalẽ le xexeame godoo le gbegbɔgblɔ alafa geɖe me. Nenema ke wowɔ ɖoɖo ɖe Kristotɔwo ƒe kpekpewo kple takpekpewo ŋu le xexeame godoo be woana nyateƒea ƒe tsi si me kɔ nyuie la amewo katã. Dɔ kae nunana siawo wɔ ɖe amewo dzi?

Tsia Naa Agbe!

12. (a) Nukata ati siwo le Xezekiel ƒe ŋutegaa me tsea ku nenema gbegbe? (b) Nukae ati tseku siawo tsi tre ɖi na le ŋkeke mamlɛawo me?

¹² Tɔsisi si le Xezekiel ƒe ŋutegaa me na agbe kple lãmesẽ. Esi wona Xezekiel nya be atiwo amie ɖe tɔsisia ƒe gowo ŋu la, wogblɔ nɛ be: “Woƒe aŋgbawo mayrɔ o, eye woƒe tsetsewo nu matso o . . . ; woƒe tsetse anye nuɖuɖu, eye woƒe aŋgbawo anye dɔyɔgbe.” Nukata ati siawo tsea ku nenema gbegbe? “Elabena kɔkɔeƒe la woƒe tsi dzɔ tso.” (Xezekiel 47:12b) Kpɔɖeŋuti siawo tsi tre ɖi na nunaɖoɖo siwo katã Mawu wɔ bene ameƒomea nato Yesu ƒe tafevɔsa dzi agaɖo blibodede gbɔ. Le anyigba dzi fifia la, amesiamina susɔeawoe xɔa ŋgɔ le gbɔgbɔ me nunyiame nana kple dɔyɔyɔ me. Ne ame 144,000 la xɔ woƒe dziƒofetua vɔ la, nunɔladɔ si woawɔ akpe ɖe Kristo ŋu abe hatidziɖulawo ene aɖe vi vaseɖe keke etsɔme ke esime woava ɖu ku si Adam he vɛ dzi keŋkeŋ mlɔeba.—Nyaɖeɖefia 5:9, 10; 21:2-4.

13. Dɔyɔyɔ kae yi edzi le míaƒe ɣeyiɣia me?

¹³ Ŋutegaa me tɔsisia va de nu Ƒu Kukua me eye wòyɔ dɔ nusianu si gbɔ wòɖo. Atsiaƒu sia tsi tre ɖi na nuto si ku le gbɔgbɔ me. Gake agbe gaɖo nusianu me le “afisiafi, si tɔ la de.” (Xezekiel 47:9) Nenema ke le ŋkeke mamlɛawo me la, amewo le agbe gbɔm le gbɔgbɔ me le afisiafi si agbetsia ɖo. Amesiamina susɔeawoe nye ame gbãtɔ siwo me agbe gaɖo le ƒe 1919 me. Wofɔ tso nɔnɔme si ɖi ku alo dɔmawɔmawɔ me va agbe me le gbɔgbɔ me. (Xezekiel 37:1-14; Nyaɖeɖefia 11:3, 7-12) Tsi vevi mawo ɖo ame bubu siwo hã ku le gbɔgbɔ me gbɔ xoxo, eye amesiawo gbɔ agbe va zu alẽ bubuawo ƒe ameha gã aɖe si le dzidzim ɖe edzi, eye wolɔ̃ Yehowa hesubɔnɛ. Eteƒe madidi o nunana sia aɖo ameha hoo siwo woafɔ ɖe tsitre gbɔ.

14. Nuka ƒe kpɔɖeŋu nyui aɖee lãɖeɖedɔ kpɔdzidzedze si nyɔ le Ƒu Kukua to ƒe akpa aɖe nye egbea?

¹⁴ Ðe wotsea ku ne wole agbe le gbɔgbɔ me. Esia ƒe kpɔɖeŋue nye alesi lãɖeɖedɔ kpɔdzidzedze aɖe nyɔ le ƒu si ku tsã la ƒe gowo dzi. Yesu gblɔ na eyomedzelawo be: “Mawɔ mi mianye ameɖelawo.” (Mateo 4:19) Le ŋkeke mamlɛawo me la, amesiamina susɔeawo nu ƒoƒoƒue wotsɔ dze lãɖeɖedɔa gɔme, gake metɔ ɖe afima o. Agbetsi si tsa tso Yehowa ƒe gbɔgbɔmegbedoxɔa me, kpakple yayra si nye sidzedze vavãtɔ la ɖo dukɔwo katã me tɔwo gbɔ. Afisiafi si tɔsisia ɖo la, ena amewo gbɔ agbe le gbɔgbɔ me.

15. Nukae fia be menye amesiamee axɔ nunana siwo Mawu wɔ hena agbekpɔkpɔ la o, eye nukae ava do tso eme na amesiawo ƒomevi mlɔeba?

¹⁵ Gake menye amesiamee xɔa agbenyaa nyuie fifia o; eye menye amesiame si woafɔ ɖe tsitre le Kristo ƒe Ƒe Akpe Ðeka Dziɖuɖua mee axɔe o. (Yesaya 65:20; Nyaɖeɖefia 21:8) Mawudɔla la gblɔ be atsiaƒua ƒe akpa aɖewo mekpɔ dɔyɔyɔ o. ‘Dze le’ bateƒe kuku siawo me. (Xezekiel 47:11) Le míaƒe egbeŋkekea me tɔwo gome la, menye amesiwo katã gbɔ wotsɔ Yehowa ƒe agbetsia yii ye xɔnɛ o. (Yesaya 6:10) Le Harmagedon la, ‘dze ave le’ amesiwo katã ku le gbɔgbɔ me eye wokpɔtɔ nye gbɔgbɔmedɔlélawo la ‘me,’ si fia be woatsrɔ̃ wo tegbee. (Nyaɖeɖefia 19:11-21) Gake mɔkpɔkpɔ anɔ amesiwo le tsi siawo nom nuteƒewɔwɔtɔe la si be yewoatsi agbe ahakpɔ nyagblɔɖi sia ƒe akpa mamlɛa me vava teƒe.

Tɔa Anɔ Sisim le Paradiso Me

16. Ɣekaɣie Xezekiel ƒe gbedoxɔ ŋuti ŋutega la ava eme zi mamlɛtɔ eye aleke wòava emee?

¹⁶ Abe alesi wòle le gbugbɔɖoanyi ƒe nyagblɔɖi bubuwo mee ene la, Xezekiel ƒe gbedoxɔ ŋuti ŋutega la ava eme zi mamlɛtɔ le Ƒe Akpe Ðeka la me. Nunɔlawo ƒe hatsotsoa maganɔ anyigba dzi afisia ɣemaɣi o. “Woanye Mawu kple Kristo ƒe nunɔlawo, eye woaɖu fia kplii [le dziƒo] ƒe akpe ɖeka.” (Nyaɖeɖefia 20:6) Dziƒonunɔla siawo akpe ɖe Kristo ŋu ana Kristo ƒe tafevɔsaa ƒe viɖewo naɖo amewo gbɔ bliboe. Aleae woaxɔ ameƒomea ɖe agbe woaɖo blibodede gbɔe!—Yohanes 3:17.

17, 18. (a) Aleke woɖɔ agbetsi le Nyaɖeɖefia 22:1, 2, eye ɣekaɣie nye ɣeyiɣi vevitɔ si me ŋutega ma ava eme? (b) Le Paradiso me la, nukata agbetsitɔsisia akeke ɖe enu geɖe ŋutɔ?

¹⁷ Efia be tsi si naa agbe wu ɖesiaɖe atsa le tɔsisi si Xezekiel kpɔ me. Ɣeyiɣi siae nye vevitɔ si me nyagblɔɖi si woŋlɔ ɖe Nyaɖeɖefia 22:1, 2 ava eme be: “[Efia] agbetsitɔsisi aɖe, si le dzo sim abe kristalo ene, hele dodom tso Mawu kple Alẽvi la ƒe fiazikpui me le eƒe ablɔ la titina lam. Eye le tɔsisi la ƒe goawo kple eve dzi la agbeti li, si tsea ku wuieve, eye wòtsena le ɣleti sia ɣleti, eye atiawo ƒe aŋgbawo nye dɔyɔgbe na dukɔwo.”

¹⁸ Le Ƒe Akpe Ðekaa me la, woada dɔ ɖesiaɖe—le ŋutilã me, susu me, kple le seselelãme gome. Esɔ nyuie be wotsɔ kpɔɖeŋutiawo ƒe ‘dɔyɔgbenyenye na dukɔwo’ wɔ eƒe kpɔɖeŋui. Le nusiwo Kristo kple ame 144,000 la ana ta la, “duametɔ aɖeke magblɔ be, yele dɔ lém o.” (Yesaya 33:24) Eye tɔsisia aɖo ɣeyiɣi si me wòakeke ɖe enu wu ɖesiaɖe la me. Ahiã be wòakeke ɖe enu ahagoglo ɖe edzi bene wòasu na ame miliɔn, alo ɖewohĩ biliɔn geɖe siwo woafɔ ɖe tsitre be woano agbetsi dzadzɛ siawo. Ŋutegaa me tɔsisia yɔ dɔ Ƒu Kukua, eye wòna agbe gaɖo afisiafi si eƒe tsiwo tsa ɖo. Nenema ke ne ŋutsu kple nyɔnu siwo anɔ Paradisoa me ɖe tafea ƒe viɖe siwo wona wole wo gbɔ ɖom dzixɔxɔse fia la, woayɔ dɔ wo tso ku si dome wonyi tso Adam gbɔ me bene woagbɔ agbe le gɔmesese blibo nu. Nyaɖeɖefia 20:12 gblɔe ɖi be woaʋu “agbalẽwo” le ŋkeke mawo me, eye woagana gbɔgbɔmenumekɔkɔ bubu si aɖe vi na ame kuku siwo wofɔ ɖe tsitre hã. Nublanuitɔe la, ame aɖewo agbe dɔyɔyɔ le Paradiso me gɔ̃ hã. Aglãdzela siawo mee tsɔtsrɔ̃ mavɔ ƒe ‘dze ave le.’—Nyaɖeɖefia 20:15.

19. (a) Aleke anyigbaa mamã ava eme le Paradiso mee? (b) Nukae dua tsi tre ɖi na le Paradiso me? (d) Nukae wòfia esi dua le adzɔge tso gbedoxɔa gbɔ?

¹⁹ Azɔ le ɣemaɣi la, alesi womã anyigba le Xezekiel ƒe ŋutegaa me hã ava eme zi mamlɛtɔ. Xezekiel kpɔe be womã anyigba la pɛpɛpɛ; nenema ke kakaɖedzi ate ŋu anɔ Kristotɔ nuteƒewɔla ɖesiaɖe si be nɔƒe si nye domenyinu asu ye si le Paradiso me. Anɔ eme be alesi amewo dina be aƒe nanɔ yewo ŋutɔ si yewoanɔ eme alé be nɛ la ava eme le ɖoɖo nyui nu. (Yesaya 65:21; Korintotɔwo I, 14:33) Esɔ nyuie be du si Xezekiel kpɔ la tsi tre ɖi na dukplɔɖoɖo si Yehowa ɖo be yeawɔ na anyigba yeyea. Nunɔla amesiaminawo ƒe ha la maganɔ ameƒomea dome le ŋutilã me o. Ŋutegaa ɖe esia fia esi dua dze le teƒe “makɔmakɔ” aɖe si le adzɔge boo tso gbedoxɔa gbɔ. (Xezekiel 48:15, NW) Ne ame 144,000 la le dzi ɖum kple Kristo le dziƒo la, teƒenɔlawo anɔ Fia la si le anyigba dzi. Amegã hatsotsoa ƒe mɔfiafia kple kpɔkplɔ si me lɔlɔ̃ le la aɖe vi na etevi amegbetɔwo. Gake menye anyigba dzie dziɖuɖua ƒe zi ŋutɔŋutɔ anɔ o, ke dziƒoe wòanɔ. Amesiame si anɔ anyigba dzi la, amegã hatsotsoa hã le eme, abɔbɔ ɖe Mesia Fiaɖuƒea te.—Daniel 2:44; 7:14, 18, 22.

20, 21. (a) Nukatae dua ƒe ŋkɔ sɔ nɛ? (b) Nya kawoe wòle be míabia mía ɖokui esi míese Xezekiel ƒe ŋutegaa gɔme?

²⁰ Se Xezekiel ƒe nyagblɔɖia ƒe nya mamlɛtɔwo ɖa: “Woayɔ dua tso gbemagbe dzi be ‘Yehowa le afima.’ ” (Xezekiel 48:35) Menye ɖe wotso du sia be amewo nakpɔ dziɖuŋusẽ alo akpɔ ŋusẽ ɖe amewo dzi o; eye menye ɖe wotsoe be woawɔ amegbetɔ aɖeke ƒe lɔlɔ̃nu o. Yehowa ƒe du ye, eye eƒe nukpɔsusu kple alesi wòwɔa nu le nugɔmesese me lɔlɔ̃tɔe ye woaɖe afia le afima. (Yakobo 3:17) Esia na kakaɖedzi dodzidzɔname le mía si be Yehowa ayra eƒe ameƒomea ƒe “anyigba yeye” habɔbɔ si le ɖoɖo nu la tegbetegbe.—Petro II, 3:13.

²¹ Ðe nusi le mía ŋgɔ mena dzi le mía dzɔm oa? Eyata esɔ be mía dometɔ ɖesiaɖe nabia eɖokui se be: ‘Aleke mewɔa nui ɖe yayra nyui siwo woɖe fia le Xezekiel ƒe ŋutegaa me ŋu? Ðe metsɔ nuteƒewɔwɔ kpea asi ɖe dɔ si wɔm dzikpɔla lɔ̃ame siwo dometɔ aɖewo nye amesiamina susɔeawo kple amesiwo ava nye amegã hatsotsoa me tɔwo le la ŋua? Ðe mena tadedeagu dzadzɛ nye nu vevitɔ le nye agbe mea? Ðe mewɔa mɔnukpɔkpɔa ŋudɔ bliboe noa agbetsi si le tsatsam bababa egbea?’ Neva eme be mía dometɔ ɖesiaɖe míayi edzi awɔe nenema eye míado vivi ɖe Yehowa ƒe nunanawo ŋu yi ɖaseɖe mavɔmavɔ me!

[Etenuŋɔŋlɔwo]

Aleke Nàɖo Wo Ŋui?

◻ Nukae tsi si tsa tso gbedoxɔa me tsi tre ɖi na?

◻ Dɔyɔyɔ kae Yehowa wɔ to kpɔɖeŋutɔsisia dzi, eye nukatae tɔsisia me tsiwo sɔ gbɔ ɖe edzi?

◻ Nukae ati siwo le tɔsisia to tsi tre ɖi na?

◻ Nukae dua atsi tre ɖi na le Ƒe Akpa Ðeka Dziɖuɖua me, eye nukatae dua ƒe ŋkɔ sɔ nɛ?

[Nɔnɔmetata siwo le axa 23]

Agbetɔsisia tsi tre ɖi na nunana siwo Mawu wɔ hena agbekpɔkpɔ