Ta Evelia

Daniel—Agbalẽ Si Ŋu Wotsɔ Nya Ðo

 1, 2. Gɔmesese ka nue wotsɔ nya ɖe Daniel ƒe agbalẽa ŋu le, eye nukata nèsusu be ele vevie be nàdzro nya siwo woatsɔ aʋli etae me?

TSƆE be ʋɔnudrɔ̃ƒee nèle hele nya vevi aɖe dɔdrɔ̃ teƒe kpɔm. Wotso ame aɖe nu be etafa ame. Nyadrɔ̃la si le nyaa dzi te tɔ ɖe edzi be amea dze agɔ. Evɔ amewo nya amesi nu wotso la be ewɔa nuteƒe ɣesiaɣi. Ðe màdi be yease amesi ŋu wotsɔ nyaa ɖo ƒe ɖokuitaʋlinyawo oa?

² Nɔnɔme ma tɔgbe mee nèle le Biblia-gbalẽ si nye Daniel gome. Wonya eŋlɔla ƒe nuteƒewɔwɔ nyuie. Wode bubu gã agbalẽ si ŋu eƒe ŋkɔ le ŋu ƒe akpe geɖe. Enye ŋutinya akuaku si Hebri-vi nyagblɔɖila Daniel, amesi nɔ agbe le ƒe alafa adrelia kple adelia D.M.Ŋ. me ŋlɔ. Biblia ƒe akɔntabubu si de pɛpɛpɛ ɖee fia be eƒe agbalẽa ƒo nu tso ƒe 618 lɔƒo vaseɖe 536 D.M.Ŋ. me nudzɔdzɔwo ŋu eye ƒe mamlɛ sia mee wòwu eŋɔŋlɔ nu. Gake wotsɔ nya ɖe agbalẽa ŋu. Numekugbalẽ kple nyameɖegbalẽ bubu aɖewo me nyawo le fiafiam be enye amefuflu alo wogblɔe nenema tẽ.

 3. Nya kae The New Encyclopædia Britannica gblɔ le Daniel ƒe agbalẽa ƒe nyateƒenyenye ŋu?

³ Le kpɔɖeŋu me, The New Encyclopædia Britannica gblɔ be “ame geɖe bua” Daniel ƒe agbalẽa tsã “be enye ŋutinya si nye nyateƒe, si me nyagblɔɖi vavãwo le.” Gake Britannica la gblɔ be le nyateƒe me la, “emegbe ɣeyiɣi aɖe si me nɔnɔmewo sẽ le dukɔa me—esime wonɔ Yudatɔwo yome tim vevie le [Siria Fia] Antiochus IV Epiphanes ƒe dziɖuɖu tee woŋlɔ” Daniel ƒe agbalẽa. Numekugbalẽa fia be ƒe 167 kple ƒe 164 D.M.Ŋ. domee woŋlɔ agbalẽa. Agbalẽ sia ke gblɔ be menye etsɔmee Daniel ƒe agbalẽa ŋlɔla gblɔ ɖi o ke boŋ “nudzɔdzɔ siwo zu blemaŋutinya nɛ” la koe wògblɔ “wòdze abe nusiwo ava dzɔ le etsɔme ŋuti nyagblɔɖiwo ene.”

 4. Ɣekaɣie wote ɖikeke Daniel ƒe agbalẽa, eye nukae na wova ke ɖii nenema le ƒe alafa siwo va yi nyitsɔ laa me?

⁴ Afikae nukpɔsusu siawo tso? Menye egbee wole ɖi kem Daniel ƒe agbalẽa o. Xexemenunyala si ŋkɔe nye Porphyry ye dze egɔme le ƒe alafa etɔ̃lia M.Ŋ. me. Abe alesi ame geɖe susui le Roma Fiaɖuƒea me ene la, ebu be Kristotɔnyenye ƒe ŋusẽkpɔɖeamedzi ava gblẽ nu le ye ŋu. Eŋlɔ agbalẽ 15 tsɔ tsi tre ɖe subɔsubɔha “yeye” sia ŋu. Daniel ƒe agbalẽa koŋue 12 lia tɔ ŋkui. Porphyry gblɔ be nyakpakpae agbalẽa me nyawo nye, eye Yudatɔ aɖee ŋlɔe le ƒe alafa evelia D.M.Ŋ. me. Wogblɔ nya mawo tɔgbe ɖe eŋu le ƒe alafa 18 lia kple 19 lia me. Le Biblia ŋuti ɖikelagãwo kple mawusubɔsubɔ me nususugblɔlawo ƒe nukpɔsusu nu la, nyagbɔgblɔɖi—nusiwo ava dzɔ le etsɔme gbɔgblɔ do ŋgɔ—manya wɔ o. Daniel koŋue wotɔ ŋkui. Ne míagblɔe la, wotsɔ nya ɖe eya kple eƒe agbalẽa ŋu le ʋɔnu. Ðikelawo gblɔ be kpeɖodzi geɖe le yewo si be menye Daniel ye ŋlɔ agbalẽa le Yudatɔwo ƒe aboyomenɔɣi le Babilon o, ke ame bubu aɖee ŋlɔe le ƒe alafa geɖe megbe.a Nya siwo wotsɔ ɖe eŋu va sɔ gbɔ ale gbegbe be nuŋlɔla aɖe ŋlɔ agbalẽ aɖe si wòtsɔ ŋkɔ na be Daniel in the Critics’ Den (Daniel le Ðikelawo ƒe Do Me) tsɔ ʋli etae.

 5. Nukata nya si ku ɖe Daniel ƒe agbalẽa ƒe nyateƒenyenye ŋu le vevie?

⁵ Ðe kpeɖodzi le nya siwo gblɔm ɖikelaawo le kple kakaɖedzi la ŋua? Alo ɖe kpeɖodziwo fia be amesi ŋu wotsɔ nya ɖo tɔ boŋue dzɔa? Nya vevi aɖee esia nye. Menye ŋkɔ nyui si le agbalẽa ŋu ko ŋue nya la ku ɖo o ke eku ɖe míaƒe etsɔme hã ŋu. Ne ameflunyawoe le Daniel ƒe agbalẽa me la, ke nya gbɔlowo koe eƒe ŋugbedodo siwo ku ɖe ameƒomea ƒe etsɔme ŋu hã nye. Gake ne nyagblɔɖi akuakuwoe le eme la, ke ɖikeke mele eme o be àdi vevie be yeanya nusi wofia na mí egbea. Esia nenɔ susu me na mí míatsɔ adzro nya siwo wotsɔ ɖe Daniel ƒe agbalẽa ŋu dometɔ aɖewo me.

 6. Nya kae wotsɔna ɖe ŋutinya si le Daniel ƒe agbalẽa me ŋu ɣeaɖewoɣi?

⁶ Le kpɔɖeŋu me, bu nutsotso si The Encyclopedia Americana na ŋu kpɔ, si nye be: “Wotɔ tsi blemaɣeyiɣiwo me ŋutinya [si ƒe ɖee nye esi ku ɖe aboyomenɔnɔ le Babilon ŋu la] vevie ale gbegbe” le Daniel ƒe agbalẽa me. Ðe nya sia le eme ŋutɔŋutɔa? Mina míatsɔ vodada etɔ̃ siwo wogblɔ be ele eme la ɖekaɖeka adzro eme kpɔ.

FIA SI ŊU WOMEƑO NU TSOE O

 7. (a) Nukata Belsazar ƒe ŋkɔ si Daniel yɔ dzɔa dzi na Biblia ŋuti ɖikelawo tso gbaɖegbe ke? (b) Nukae dzɔ ɖe nukpɔsusu si nye be Belsazar nye amesi ƒe ŋkɔ wokpa dzro la dzi?

⁷ Daniel ŋlɔ be Nebukadnezar ƒe ‘vi’ Belsazar ye nɔ fia ɖum le Babilon-dugã la me esime woxɔe. (Daniel 5:1, 11, 18, 22, 30) Ɣeyiɣi didi aɖee nye sia si ɖikelawo tso ɖe nya sia ŋu elabena le Biblia megbe la, Belsazar ƒe ŋkɔ megadze le teƒe bubu aɖeke o. Blema ŋutinyaŋlɔlawo gblɔ be Nabonido si va xɔ ɖe Nebukadnezar teƒe boŋue nye Babilon-fia mamlɛtɔ. Eyata le ƒe 1850 me la, Ferdinand Hitzig gblɔ be edze ƒã be Belsazar nye ame aɖe si agbalẽa ŋlɔla bu le susu me ko. Gake ɖe mèkpɔe be Hitzig tsi klokloklo ƒo nya ta kaba akpa oa? Ne míebu eŋu kpɔ la, ɖe fia sia ƒe ŋkɔ mayɔmayɔ—vevietɔ le ɣeyiɣi si me wonya be ŋutinya me nuŋlɔɖiwo mebɔ o—nye kpeɖodzi ŋutɔŋutɔ be menɔ anyi kpɔ oa? Aleke ke nya la le o, woke ɖe nuŋlɔɖikpe aɖewo ŋu le tome le ƒe 1854 me le blema Babilon-dugã si nye Ur si nye anyiehe Iraq fifia la me. Nya siwo le blemanuŋlɔɖikpe siawo siwo nye Fia Nabonido tɔ la dzi ƒe ɖee nye gbedodoɖa ɖe “vinye ŋutsu tsitsitɔ Bel-sar-ussur” ta. Ele be ɖikelawo gɔ̃ hã nalɔ̃ ɖe edzi be: Belsazar sia ŋue Daniel ƒe agbalẽa ƒo nu tsoe.

 8. Aleke woɖo kpe alesi Daniel gblɔ le Belsazar ŋu be enye fia si nɔ dzi ɖum la dzii?

⁸ Gake esia mesu na ɖikelawo o. Wo dometɔ ɖeka si ŋkɔe nye H. F. Talbot ŋlɔ bena: “Esia meɖo kpe naneke dzi o.” Egblɔ be ɖewohĩ ɖevie viŋutsu si woyɔ le nuŋɔŋlɔa me nye hafi Daniel ya be enye fia si le dzi ɖum. Gake esi wota Talbot ƒe nyawo ƒe ɖeka megbe ko la, wogake ɖe blemanuŋlɔɖikpe bubu ŋu le tome si gblɔ be agbalẽŋlɔlawo kple aƒemedɔwɔlawo nɔ Belsazar si. Menye ɖevie amesia nye o! Mlɔeba la, nuŋlɔkpe bubuwo va kɔ nya bliboa me esi woka nya ta be Nabonido dzo le Babilon va nɔ teƒe bubu ƒe geɖe le ɣeyiɣi aɖe me. Nuŋlɔkpe siawo ɖee fia hã be le ɣeyiɣi mawo me la, etsɔ Babilon “dzi ɖuɖu ƒe dɔa de asi” na viaŋutsu tsitsitɔ (Belsazar). Efia be Belsazar nye fia le ɣeyiɣi mawo me—woa kple fofoa woɖu fia le ɣeyiɣi ɖeka me.b

 9. (a) Anye gɔmesese ka nue Daniel gblɔ le be Belsazar nye Nebukadnezar ƒe vi? (b) Nukata ɖikelawo da ƒu esi wogblɔ be Daniel megblɔ nya ɖeka hɔ̃ hã le Nabonido ƒe anyinɔnɔ ŋu o?

⁹ Esia hã mesu na ɖikela aɖewo o eye wogblɔna be Biblia meyɔ Belsazar be enye Nabonido vi o, ke boŋ eyɔe be Nebukadnezar ƒe vi. Wo dometɔ aɖewo tea tɔ ɖe edzi be Daniel megblɔ nya ɖeka hɔ̃ hã si fia be Nabonido nɔ anyi kpɔ o. Gake emedzodzro na míekpɔe be tsitretsiɖeŋunya eveawo siaa mesɔ o. Edze abe Nabonido ɖe Nebukadnezar vinyɔnu wòzu srɔ̃a ene. Ema wɔe be Belsazar va zu Nebukadnezar tɔgbuiyɔvi. Nya aɖeke mele Hebri alo Aram tɔwo si wozãna na “tɔgbui” alo “tɔgbuiyɔvi” o; “vi” ate ŋu afia “tɔgbuiyɔvi” alo “dzidzimevi” gɔ̃ hã. (Tsɔe sɔ kple Mateo 1:1.) Tsɔ kpe ɖe eŋu la, Biblia me nuŋlɔɖi fia be woate ŋu ayɔ Belsazar be enye Nabonido ƒe vi. Esi asinuŋɔŋlɔ dovoɖinamea na dzidzi ƒo Belsazar la, etsɔ dzitsitsi gblɔ be amesi ate ŋu aɖe nyaawo gɔme anye etɔ̃lia aɖu dzi le fiaɖuƒea me. (Daniel 5:7) Nukata wòanye etɔ̃lia ke menye evelia o? Nya sia si wògblɔ fia be ame aɖewo xɔ ɖoƒe gbãtɔ kple evelia xoxo. Ame aɖewo nɔ ɖoƒe mawo nyateƒe—woawoe nye Nabonido kple via Belsazar.

10. Nukata Daniel ƒe nuŋlɔɖi ku ɖe Babilon-fiaƒome dziɖuɖua ŋu de ŋgɔ wu blemaŋutinyaŋlɔlawo tɔ?

¹⁰ Eyata Belsazar ƒe ŋkɔ si Daniel yɔ menye ŋutinya si ‘wotɔ tsii vevie ale gbegbe’ ƒe kpeɖodzi o. Ke boŋ Daniel—togbɔ be menye Babilon-ŋutinya ŋlɔm wònɔ o hã—gblɔ alesi nuwo nɔ le Babilon-fiaƒome dziɖuɖua me na mí wòde to wu xexemeŋutinyaŋlɔla siwo dometɔ aɖewoe nye Herodotus, Xenophon, kple Berossus. Nukata Daniel te ŋu ŋlɔ nya siwo woawo mete ŋu kpɔ ŋlɔ o la ɖi? Elabena enɔ eteƒe le Babilon. Eteƒekpɔla ƒe nyawoe eƒe agbalẽa nye, ke menye ameflula si va dzɔ ƒe alafa geɖe megbe tɔe o.

AMEKAE NYE MEDIATƆ DARIO?

11. Amekae Daniel gblɔ be Mediatɔ Dario nye, gake nya kae wogblɔ le eŋu?

¹¹ Daniel gblɔ be esi womu Babilon la, “Mediatɔ Dario” dze fiaɖuɖu gɔme. (Daniel 6:1) Womekpɔ ke ɖe Mediatɔ Dario ƒe ŋkɔ ŋu le xexemenuŋlɔɖiwo alo blematomenukukuwo me haɖe o. Esia na The New Encyclopædia Britannica gblɔ be Dario sia nye “amesi menɔ anyi kpɔ o.”

12. (a) Nukata mele be Biblia ŋuti ɖikelawo nate tɔ ɖe edzi be Mediatɔ Dario menɔ anyi kpɔ hafi o? (b) Nukae ate ŋu anye nyateƒe le amesi Mediatɔ Dario nye ŋu, eye nukae na wòdze nenema?

¹² Agbalẽnyala aɖewo ya ɖɔ ŋu ɖo vevie. Ðikelawo gblɔ le Belsazar hã ŋu tsã be ɖe “wokpa” eƒe ŋutinya. Ðikeke mele eme o be nenemae wòava nɔ le Dario ƒe nya la hã gome. Woke ɖe blemanuŋlɔkpe aɖewo ŋu xoxo siwo fia be Persiatɔ Kores metsɔ ŋkɔ si nye “Babilon Fia” le eƒe aʋadziɖuɖu megbe teti o. Numekula aɖe gblɔ be: “Ameka ke ɖatsɔ dzesideŋkɔ si nye ‘Babilon Fia’ o, amea nye fiateƒenɔla si nɔ Kores te, ke menye Kores ŋutɔe o.” Ðe wòate ŋu anye be Dario nye Media-dziɖuɖumegã sẽŋu aɖe si si wotsɔ Babilon dzi kpɔkpɔ dee ƒe dziɖuɖuŋkɔ alo dzesideŋkɔa? Ame aɖewo gblɔ be anye ŋutsu aɖe si ŋkɔe nye Gubaru ye Dario nye. Kores ɖo Gubaru dziɖulae le Babilon, eye xexemenuŋlɔɖi siwo li ɖo kpe edzi be eɖu dzi kple ŋusẽ gã aɖe. Blemanuŋlɔkpe aɖe gblɔ be eɖo nutodzikpɔlateviwo be woaɖu Babilon dzi. Enyo be míade dzesii be Daniel gblɔ be Dario ɖo nutodzikpɔla 120 be woaɖu Babilon-fiaɖuƒea dzi.—Daniel 6:2.

13. Susu si sɔ ka tae woyɔ Mediatɔ Dario le Daniel ƒe agbalẽa me gake medze le xexemenuŋlɔɖiwo ya me o?

¹³ Ðewohĩ woava ke ɖe amesi tututu fia sia nye ŋuti kpeɖodzi siwo le tẽ wu ŋu emegbe. Aleke ke nya la le o, alesi wòdze abe blematomenukuku megblɔ nya aɖeke le esia ŋu o ene la menye nusita woagblɔ be Dario nye ŋkɔ si “wokpa” o, eye menye nusita woagblɔ be Daniel ƒe agbalẽ bliboa katã nye ameflunyawo hã o. Esɔ wu be míabu Daniel ƒe nuŋlɔɖia be enye eteƒekpɔla ƒe ɖaseɖiɖi si de to wu xexemenuŋlɔɖi bubu siwo li.

YOYAKIM ƑE FIAÐUƔI

14. Nukata vovototo mele Daniel kple Yeremya ƒe nuŋlɔɖiwo dome le Fia Yoyakim ƒe dziɖuɣi ŋu o?

¹⁴ Daniel 1:1 xlẽ be: “Le Yuda-fia Yoyakim ƒe fiaɖuɖu ƒe ƒe etɔ̃lia me la Babel-fia Nebukadnezar ho ɖe Yerusalem ŋu, eye wòɖe to ɖee.” Ðikelawo kpɔ vodada le mawunyakpukpui sia ŋu elabena edze abe mewɔ ɖeka kple Yeremya ƒe nyawo o ene, amesi gblɔ be Yoyakim ƒe fiaɖuɖu ƒe ƒe enelia nye Nebukadnezar ƒe fiaɖuɖu ƒe ƒe gbãtɔ. (Yeremya 25:1; 46:2) Ðe Daniel ƒe nyawo tsi tre ɖe Yeremya tɔ ŋua? Esi nyatakaka geɖe li ta la, nya la me kɔ enumake. Esi Farao Nexo ɖo Yoyakim fia le ƒe 628 D.M.Ŋ. me la, eva zu Egipte-dziɖula ma tevi dzro aɖe ko. Esia anɔ abe ƒe etɔ̃ ene hafi Nebukadnezar va nɔ zi dzi le Babilon ɖe fofoa teƒe le ƒe 624 D.M.Ŋ. me. Ema megbe kpuie (le ƒe 620 D.M.Ŋ. me) la, Nebukadnezar va dze Yuda dzi eye wòɖo Yoyakim fiateƒenɔla si le Babilon te. (Fiawo II, 23:34; 24:1) Le Yudatɔ siwo le Babilon ƒe susu nu la, Yoyakim ƒe fiaɖuɖu ƒe “ƒe etɔ̃lia” anye fiateƒenɔla ma ƒe dɔwɔwɔ na Babilon ƒe ƒe etɔ̃lia. Nukpɔsusu mae Daniel tsɔ ŋlɔ eƒe nya lae. Gake Yeremya ya ŋlɔe ɖe alesi Yudatɔ siwo nɔ Yerusalem bui nu. Eyata ebu Yoyakim ƒe fiaɖuɣi be edze egɔme esime Farao Nexo ɖoe fiae.

15. Nukata nya si wogblɔ tsɔ tsi tre ɖe ɣeyiɣi si woyɔ ɖe Daniel 1:1 ŋu la mesɔ o?

¹⁵ Ekema ne míagblɔe tututu la, ɖeko nusia si wogblɔ be enye vovototo la gaɖo kpe edzi be Daniel ŋlɔ eƒe agbalẽa le Babilon esime wònɔ Yudatɔ aboyomewo dome. Gake nya bubu aɖe gaku ɖe nya sia si wotsɔ ɖe Daniel ƒe agbalẽa ŋu la ŋuti wòdze gaglã. Ðo ŋku edzi be Yeremya ƒe agbalẽa nɔ Daniel ƒe agbalẽa ŋlɔla si eye wòhe susu yi emenyawo dzi gɔ̃ hã. (Daniel 9:2) Ne nyakpala dzeaɖaŋu aɖee Daniel ƒe agbalẽa ŋlɔla nye abe alesi ɖikelawo gblɔ ene la, ɖe wòate kpɔ aŋlɔ nya wòato vovo na Yeremya ƒe agbalẽ si ŋu wodea bubui ŋutɔ laa—eye ne awɔe hã la, eƒe agbalẽa ƒe kpukpui gbãtɔa mee wòava wɔe lea? Ao, mawɔe nenema o!

EGBLƆ NYAWO TSITOTSITO

16, 17. Aleke blematomenukuku ɖo kpe Daniel ƒe nuŋlɔɖi si ku ɖe (a) legba si Nebukadnezar li anyi be eƒe amewo katã nade ta agu nɛ ŋu dzii? (b) Nebukadnezar ƒe dada ɖe xɔtudɔ siwo wòwɔ le Babilon ta ŋu dzii?

¹⁶ Fifia mina míaɖe asi le tsitretsiɖeŋunyaawo ŋu atrɔ ɖe kpeɖodzinyawo ŋu. Bu nya bubu aɖewo siwo le Daniel ƒe agbalẽa me si fia be eŋlɔla la ŋutɔ kpɔ alesi nuwo yi edzi le ɣeyiɣi siwo ŋu wòŋlɔ nu tsoe me la teƒe ŋu kpɔ.

¹⁷ Alesi blema Babilon ŋuti nya vevi siwo medze gaglã o le nyanya na Daniel la ɖo kpe eƒe nuŋlɔɖia ƒe nyateƒenyenye dzi. Le kpɔɖeŋu me, Daniel 3:1-6 gblɔ be Nebukadnezar li sikalegba gã aɖe anyi be dukɔ bliboa katã nade ta agu nɛ. Blematomenukulawo ke ɖe kpeɖodzinu siwo fia be fiagã sia te kpɔ be yeana yeƒe amewo nanyrɔ wo ɖokui ɖe dulɔlɔ̃ kple mawusubɔsubɔ nuwɔnawo me vevie. Nenema ke Daniel ŋlɔ Nebukadnezar ƒe dada ɖe xɔtudɔ geɖe si wòwɔ ta ŋui. (Daniel 4:27) Míaƒe ɣeyiɣiwo mee blematomenukulawo va ɖo kpe edzi le be nyateƒee, Nebukadnezar na wowɔ xɔtudɔ geɖe le Babilon. Ŋutsua ƒe adegbeƒoƒo ya wu gbɔgblɔ—ena wotu eƒe ŋkɔ ɖe xɔtukpeawo ŋutɔ gɔ̃ hã dzi! Amesiwo kea ɖi Daniel ƒe agbalẽa mete ŋu ɖea nusita amesi wogblɔ be enye ameflula si nɔ anyi le Maccabeewo ƒe ɣeyiɣia me (ƒe 167-63 D.M.Ŋ.) wɔ te ŋu nya nu tso xɔtudɔ siawo ŋu la me o—esi nye ƒe siwo ade alafa ene le wo tutu vɔ megbe kple le ɣeyiɣi didi aɖe megbe hafi tomenukulawo va ke ɖe wo ŋu.

18. Aleke Daniel ƒe nuŋlɔɖi le tohehe ƒomevi eve siwo ŋudɔ wowɔ le Babilon-dziɖuɖu kple Persia-dziɖuɖua me fia be eƒe nuŋlɔɖia de pɛpɛpɛ?

¹⁸ Daniel ƒe agbalẽa na vovototo vevi aɖewo siwo le Babilon kple Medo-Persia tɔwo ƒe sewo dome hã dze. Le kpɔɖeŋu me, wotsɔ Daniel ƒe zɔhɛ etɔ̃awo ƒu gbe ɖe kpodzo bibi aɖe me le Babilontɔwo ƒe se nu le esi wogbe toɖoɖo fia ƒe sedede ta. Le ƒe bla nanewo megbe la, wotsɔ Daniel ƒu gbe ɖe dzatawo ƒe do me le esi eƒe dzitsinya meɖe mɔ nɛ be wòawɔ Persiatɔwo ƒe se aɖe dzi o ta. (Daniel 3:6; 6:8-10) Ame aɖewo te kpɔ be yewoagblɔ be glitotoe kpodzo bibi ƒe nya la nye, gake blematomenukulawo ke ɖe lɛta ŋutɔŋutɔ aɖe si tso blema Babilon ŋu si ƒo nu tso tohehe sia tɔgbe ŋu tẽ. Gake Media kple Persia tɔwo ya bua dzo nu kɔkɔe. Eyae na wohea to sesẽ bubuwo na amewo. Eyata dzatawo ƒe do si ŋu woƒo nu tsoe la mewɔ nuku o.

19. Vovototo ka mee Daniel ƒe agbalẽa kɔ le Babilon kple Medo-Persia ƒe sewo ŋu?

¹⁹ Vovototo bubu aɖe gadze. Daniel ɖee fia be Nebukadnezar te ŋu dea sewo gatrɔa wo ne elɔ̃. Gake Dario ya mete ŋu wɔ naneke tsɔ trɔ ‘Mediatɔwo kple Persiatɔwo ƒe sewo’ o—mate ŋu atrɔ esiwo eya ŋutɔ de hã o! (Daniel 2:5, 6, 24, 46-49; 3:10, 11, 29; 6:13-17) Ŋutinyaŋlɔla John C. Whitcomb ŋlɔ bena: “Blemaŋutinya ɖo kpe vovototo sia si nɔ Babilon, afisi fia kpɔa ŋusẽ ɖe se dzi, kple Medo-Persia, afisi se kpɔa ŋusẽ ɖe fia dzi dome la dzi.”

20. Belsazar ƒe kplɔ̃ɖoɖo ŋuti nyatakaka kae ɖee fia be Daniel nya nu tso Babilontɔwo ƒe kɔnuwo ŋu nyuie?

²⁰ Belsazar ƒe aglotutu ŋuti nuŋlɔɖi wɔdɔɖeamedzi si le Daniel ta 5 lia la gblɔ nyawo tsitotsito. Edze ƒã be edze egɔme kple nuɖuɖu dziɖeɖitɔe kple aha geɖe nono, elabena woƒo nu tso aha ŋu zi geɖe. (Daniel 5:1, 2, 4) Le nyateƒe me la, wowɔ aglotutu mawo tɔgbe ƒe nukpakpa siwo me wole aha ɖeɖeko nom le. Ekema efia be aha nɔ vevie ŋutɔ le azã mawo ɖuɖu me. Daniel gblɔ hã be nyɔnuwo nɔ aglo sia tuƒe—fia srɔ̃wo kple eƒe ahiãviwo. (Daniel 5:3, 23) Blematomenukuku ɖo kpe Babilontɔwo ƒe nɔnɔme sia si ŋu woƒo nu tsoe dzi. Nyɔnuwo ƒe ŋutsuwo domenɔnɔ le kplɔ̃ɖoƒewo medzea Yudatɔwo kple Helatɔwo ŋu kura le Maccabeewo ƒe ɣeyiɣia me o. Ðewohĩ eyatae womeƒo nu tso nyɔnu siawo ŋu le Daniel ƒe agbalẽa me le Helagbe me Septuagint ƒe gɔmeɖeɖe gbãtɔwo me o.c Ke hã anye ne amesiwo dzi Helatɔwo ƒe kɔnuwo kpɔ ŋusẽ ɖo domee amesi wogblɔ be ekpa Daniel ƒe agbalẽa me nyawo la anɔ, eye ɖewohĩ anɔ anyi le ɣeyiɣi ma tututu si me woŋlɔ Septuagint la me!

21. Nukae na eme kɔ wu be Daniel nya nu tso aboyomenɔɣi le Babilon kple kɔnu siwo nɔ anyi ɣemaɣi ŋu nyuie?

²¹ Esi wogblɔ nyawo tsitotsito alea ta la, ewɔ nuku be Britannica te ŋu gblɔ le Daniel ƒe agbalẽa ŋlɔla ŋu be “nu sue aɖewo siwo mede o” koe wònya tso aboyomenɔɣia ŋu. Aleke nyakpala si va nɔ agbe le ƒe alafa geɖe megbe wɔ nya nu tso Babilon kple Persia tɔwo ƒe kɔnuwo ŋu nyuie nenema? Ðo ŋku edzi hã be fiaɖuƒe eveawo siaa mu xoxoxo do ŋgɔ na ƒe alafa evelia D.M.Ŋ. Edze ƒã be blematomenukulawo menɔ anyi ɣemaɣi o; eye Yudatɔ siwo nɔ anyi ɣemaɣi mebua dukɔ bubuwo ƒe agbenɔnɔ kple ŋutinya nyanya nu xɔasi aɖekee o. Nyagblɔɖila Daniel si nɔ agbe le ɣeyiɣi mawo me hekpɔ nudzɔdzɔ siwo ŋu wòƒo nu tsoe teƒe la koe ate ŋu aŋlɔ Biblia-gbalẽ si ŋu eƒe ŋkɔ le la.

ÐE NYA BUBUWO ÐO KPE EDZI BE NYAKPAKPAE DANIEL ƑE AGBALẼA NYEA?

22. Nya kae ɖikelawo gblɔna le akpa si Daniel ƒe agbalẽa le le Hebri Ŋɔŋlɔawo ƒe agbalẽwo dome ŋu?

²² Nya siwo wolɔ̃a tsɔtsɔ ɖe Daniel ƒe agbalẽa ŋu wu dometɔ ɖeka ku ɖe akpa si wòle le Hebri Ŋɔŋlɔawo me gbalẽwo dome ŋu. Blema rabiwo mã agbalẽ siwo le Hebri Ŋɔŋlɔawo me ɖe hatsotso etɔ̃ me: Se la, Nyagblɔɖilawo, kple Ŋutinyawo. Wometsɔ Daniel ƒe agbalẽa kpe ɖe Nyagblɔɖilawo ŋu o, ke wodee Ŋutinyawo dome. Ðikelaawo gblɔ be esia fia be womenya nu tso agbalẽa ŋu le ɣeyiɣi si me wonɔ nyagblɔɖila bubuwo ƒe agbalẽwo nu ƒom ƒu o. Wogblɔ be wotsɔe kpe ɖe Ŋutinyawo ŋu elabena emegbe hafi wova ƒo woawo nu ƒu.

23. Aleke blema Yudatɔwo bu Daniel ƒe agbalẽae, eye aleke míewɔ nya?

²³ Gake menye Biblia ŋuti numekulawo katãe lɔ̃ ɖe edzi be blema rabiwo mã Ŋɔŋlɔ siwo dzi woda asi ɖo me ɖe ɖoɖo kpaɖii sia nu alo be womede Daniel ƒe agbalẽa Nyagblɔɖilawo me o. Gake ne Ŋutinyawo mee rabiwo bu Daniel ƒe agbalẽa ɖo nyateƒe hã la, ɖe wòfia be ɣeyiɣi aɖe si do megbe ye woŋlɔea? Ao. Agbalẽnyala siwo ŋu wodea bubui gblɔ susu geɖe si ta ɖewohĩ rabiwo metsɔ Daniel ƒe agbalẽa kpe ɖe Nyagblɔɖilawo ŋu o. Le kpɔɖeŋu me, woate ŋu awɔe nenema le esi agbalẽa me nyawo mede wo dzi o ta alo le esi wobu Daniel ŋutɔ be eto vovo le nyagblɔɖila bubuwo dome le esi wòxɔ dziɖuɖudɔ wɔ le dutanyigba dzi ta. Aleke ke wòle o, nu vevitɔe nye si: Blema Yudatɔwo de bubu Daniel ƒe agbalẽa ŋu vevie eye wobui ɖe Ŋɔŋlɔ siwo dzi woda asi ɖo dome. Tsɔ kpe ɖe eŋu la, kpeɖodziwo li be wowu Hebri Ŋɔŋlɔawo me gbalẽ siwo dzi woda asi ɖo nuƒoƒoƒu nu xoxoxo do ŋgɔ na ƒe alafa evelia D.M.Ŋ. me. Womeɖe mɔ wotsɔ agbalẽ bubu siwo ƒe ɖewoe nye esiwo woŋlɔ le ƒe alafa evelia D.M.Ŋ. me kpe ɖe eŋu o.

24. Aleke wozã Ecclesiasticus si mele Biblia-gbalẽwo dome o tsɔ tsi tre ɖe Daniel ƒe agbalẽa ŋui, eye nukae ɖee fia be nuŋububu alea mesɔ o?

²⁴ Ewɔ mo yaa ŋutɔ be wozã agbalẽ siawo siwo wova ŋlɔ emegbe siwo dzi womeda asi ɖo o la dometɔ ɖeka tsɔ he nya ɖe Daniel ƒe agbalẽa ŋu. Kpeɖodzi siwo li fia be ƒe 180 D.M.Ŋ. me lɔƒoe Jesus Ben Sirach ŋlɔ agbalẽ si nye Ecclesiasticus si womexɔ de Biblia-gbalẽwo dome o la. Ðikelawo lɔ̃a gbɔgblɔ be womeyɔ Daniel ɖe ame dzɔdzɔe geɖe siwo ƒe ŋkɔ agbalẽa yɔ me o. Wogblɔna be anye be womenya nu tso Daniel ŋu ɣemaɣi o. Agbalẽnyala geɖe lɔ̃ ɖe nya ma dzi. Gake bu nya sia ŋu kpɔ: Womeyɔ Ezra kple Mardoxai (ame eve siwo katã Yudatɔ siwo nɔ anyi le aboyomenɔɣia megbe bu ame veviwoe), Fia Yosafat si nye ame nyui, kple ame dzɔdzɔe Hiob de ŋkɔ mawo ke dome o; Samuel ƒe ŋkɔ ko wòyɔ le ʋɔnudrɔ̃lawo katã dome.d Ðe wòle be míabu ŋutsu siawo katã be wonye amesiwo ƒe ŋkɔ wokpa le esi womeyɔ wo de ŋkɔŋɔŋlɔ si me womeyɔ amesiame ƒe ŋkɔ ɖo o, si le agbalẽ aɖe si menye Ŋɔŋlɔawo ƒe akpa aɖe o me ta? Nya sia mesɔ le go aɖeke me o.

AME BUBUWO ƑE NYA SIWO ÐO KPE DANIEL ƑE AGBALẼA DZI

25. (a) Aleke Josephus ɖo kpe Daniel ƒe nuŋlɔɖia ƒe nyateƒenyenye dzii? (b) Mɔ ka nue Josephus ƒe nuŋlɔɖi le Alexander Gãtɔ kple Daniel ƒe agbalẽa ŋu sɔ ɖe ŋutinya me nuŋlɔɖi si wonya nu le? (Kpɔ etenuŋɔŋlɔ evelia.) (d) Aleke gbe si me woŋlɔ Daniel ƒe agbalẽa ɖo ɖo kpe eƒe nyateƒenyenye dzii? (Kpɔ axa 26.)

²⁵ Mina míagatrɔ ɖe kpeɖodzinyawo ŋu ake. Wogblɔ be womeɖi ɖase le Hebri Ŋɔŋlɔawo ƒe agbalẽ bubu aɖeke ŋu de Daniel ƒe agbalẽa nu o. Le kpɔɖeŋu me: Yudatɔ ŋutinyaŋlɔla xɔŋkɔ Josephus ɖo kpe eƒe nyateƒenyenye dzi. Egblɔ be esime Alexander Gãtɔ nɔ aʋa wɔm kple Persia le ƒe alafa enelia D.M.Ŋ. me la, eva Yerusalem, afisi nunɔlawo tsɔ Daniel ƒe agbalẽa fiae le. Alexander ŋutɔ gblɔ be Daniel ƒe nyagblɔɖia me nya siwo wotsɔ fia ye la ku ɖe aʋa si yeho ɖe Persia ŋu la ŋuti.e Esia anye ƒe alafa ɖeka blaatɔ̃ hafi woŋlɔ “nyakpakpa” la le ɖikelawo ƒe nya nu. Le nyateƒe me la, ɖikelawo tso ɖe Josephus ŋu ɖe nya sia ta. Wotsi tre ɖe eŋu hã le esi wògblɔ be Daniel ƒe agbalẽa me nyagblɔɖi aɖewo va eme ta. Ke hã ŋutinyaŋlɔla Joseph D. Wilson gblɔ be, “ɖewohĩ [Josephus] nya nu tso nyaa ŋu wu ɖikela siwo katã le xexeame.”

26. Aleke Ƒukukua me Agbalẽxatsaxatsawo ɖo kpe Daniel ƒe agbalẽa ƒe nyateƒenyenye dzii?

²⁶ Wogaɖo kpe Daniel ƒe agbalẽa ƒe nyateƒenyenye dzi esime wofɔ Ƒukukua me Agbalẽxatsaxatsawo le Qumran agadowo me le Israel. Nukutɔe la, nusiwo wokpɔ le ƒe 1952 me la dometɔ geɖe nye agbalẽxatsaxatsawo kple agbalẽ kakɛ siwo dzi Daniel ƒe agbalẽa me nyawo nɔ. Wogblɔ be anye ƒe alafa evelia D.M.Ŋ. mee woŋlɔ xoxotɔ kekeake si le eme. Eyata ame geɖe nya nu tso Daniel ƒe agbalẽa ŋu hedea bubu eŋu le keke ɣeyiɣi ma me ke. The Zondervan Pictorial Encyclopedia of the Bible de dzesii be: “Fifia mele be woagagblɔ be Maccabeewo ƒe ɣeyiɣi mee woŋlɔ Daniel ƒe agbalẽa o, elabena manya wɔ be woakpɔ ɣeyiɣi ƒe didime si sɔ na dometsoɣi si tso esime woŋlɔ Daniel ƒe agbalẽa wu enu vaseɖe ɣeyiɣi si me esiwo wogbugbɔŋlɔ la va do ɖe Maccabeewo ƒe mawusubɔsubɔ ƒe kɔmamã ƒe agbalẽdzraɖoƒe la o.”

27. Nukae nye kpeɖodzi xoxotɔ kekeake be Daniel nye ame ŋutɔŋutɔ si wonya nyuie le aboyomenɔɣia me le Babilon?

²⁷ Gake Daniel ƒe agbalẽa ƒe kpeɖodzinu si do xoxo wu sã eye kakaɖedzi le eŋu wu la li. Xezekiel nye amesiwo nɔ anyi le Daniel ƒe ɣeyiɣia me dometɔ ɖeka. Eya hã nye nyagblɔɖila le Babilon aboyomenɔɣia. Xezekiel ƒe agbalẽa yɔ Daniel ƒe ŋkɔ zi geɖe. (Xezekiel 14:14, 20; 28:3) Nya siawo fia be le Daniel ŋutɔ ƒe agbenɔɣi le ƒe alafa adelia D.M.Ŋ. me gɔ̃ hã la, ame geɖe dze sii xoxo be enye ame dzɔdzɔe kple nunyala, amesi woate ŋu ayɔ akpe ɖe mawuvɔ̃la siwo nye Noa kple Hiob ŋu.

ÐASEFO GÃTƆ KEKEAKE

28, 29. (a) Nukae nye kpeɖodzi vevitɔ kekeake be Daniel ƒe agbalẽa me nyawo nye nyateƒe? (b) Nukata wòle be míaxɔ Yesu ƒe ɖaseɖiɖia?

²⁸ Gake mlɔeba la, mina míalé ŋku ɖe Daniel ƒe agbalẽa ƒe nyateƒenyenye ŋuti ɖaseɖila gãtɔ kekeake ŋu—menye ame bubu aɖeke wu Yesu Kristo o. Esi Yesu nɔ nu ƒom tso ŋkeke mamlɛawo ŋu la, eyɔ “nyagblɔɖila Daniel” eye wòhe susu yi Daniel ƒe nyagblɔɖiwo dometɔ ɖeka dzi.—Mateo 24:15; Daniel 11:31; 12:11.

²⁹ Azɔ ne nya si ɖikelawo gblɔ le Maccabeewo ƒe ɣeyiɣi ŋu la nye nyateƒe la, ke ele be nu eve aɖewo dometɔ ɖeka nanye nyateƒe. Woawoe nye be ɖe wotsɔ nyakpakpa sia flu Yesu loo alo be nya si Mateo ŋlɔ be egblɔ la medo le enu kpɔ gbeɖe o. Nya siawo ƒe ɖeke mele eme o. Ne míate ŋu aka ɖe Mateo ƒe Nyanyuigbalẽ me nuŋlɔɖia dzi o la, aleke míate ŋu aka ɖe Biblia ƒe akpa bubuwo ya dzi? Ne míeɖe nyagbe mawo ɖa le Ŋɔŋlɔa Kɔkɔeawo me la, nya kawo hãe míagaɖe le eme ɖe eyome? Apostolo Paulo ŋlɔ bena: ‘Ŋɔŋlɔ sia ŋɔŋlɔ tso Mawu ƒe gbɔgbɔ me eye enyo na nufiafia kple ɖɔɖɔɖo.’ (Timoteo II, 3:16) Eyata ne ameflula aɖee Daniel nye la, ke ameflula bubue Paulo hã nye! Ðe wòanɔ eme be woflu Yesua? Kura o. Enɔ agbe le dziƒo esime woŋlɔ Daniel ƒe agbalẽa. Yesu gblɔ gɔ̃ hã be: “Hafi Abraham nava dzɔ la, nyeama meli xoxo.” (Yohanes 8:58) Le amegbetɔ siwo katã nɔ agbe kpɔ dome la, Yesue anye amesi dze wu si míabia gbee le Daniel ƒe agbalẽa ƒe nyateƒenyenye ŋu hafi. Gake mehiã be míabia o. Abe alesi míekpɔe ene la, eƒe ɖaseɖiɖia me kɔ nyuie xoxo.

30. Aleke Yesu gaɖo kpe Daniel ƒe agbalẽa ƒe nyateƒenyenye dzii?

³⁰ Yesu gaɖo kpe Daniel ƒe agbalẽa dzi le eƒe nyɔnyrɔxɔɣi tututu. Ɣemaɣie wòva zu Mesia, eye wòna Daniel ƒe nyagblɔɖi si ku ɖe ƒewo ƒe kwasiɖa 69 ŋu la va eme. (Daniel 9:25, 26; kpɔ agbalẽ sia ƒe Ta 11 lia.) Ne nyateƒe wònye be ɣeyiɣi aɖe megbee woŋlɔ agbalẽa gɔ̃ hã la, ke egafia kokoko be Daniel ƒe agbalẽa ŋlɔla nya etsɔme ƒe siwo ade 200 do ŋgɔ. Gake Mawu matsɔ eƒe gbɔgbɔ aʋã ameflula si kpa ŋkɔ tsɔ wòagblɔ nyateƒenyawo ɖi o. Ao, amesiwo wɔa nuteƒe na Mawu tso dzi blibo mee xɔa Yesu ƒe ɖaseɖiɖi la. Ne ɖe eŋutinunyalawo katã kple ɖikela siwo katã le xexeame abla ɖekae be yewoaƒo nu atsi tre ɖe Daniel ƒe agbalẽa ŋu hã la, Yesu ƒe ɖaseɖiɖia aɖee fia be woƒe nya mele eme o, elabena “ɖaseɖila nuteƒewɔla kple nyateƒetɔ” wònye.—Nyaɖeɖefia 3:14.

31. Nukata Biblia ŋuti ɖikela geɖe meka ɖe Daniel ƒe agbalẽa ƒe nyateƒenyenye dzi kokoko o?

³¹ Ðaseɖiɖi siawo gɔ̃ hã mesɔ gbɔ na Biblia ŋuti ɖikela geɖe o. Ne ame aɖe dzro nya sia me nyuie la, abu eŋu kpɔ ne kpeɖodzinya agbɔsɔsɔme aɖe li si ana woalɔ̃ ɖe edzi. Oxford Yunivɛsiti nufialagã aɖe ŋlɔ bena: “Tsitretsiɖeŋunyawo ŋuɖoɖo meɖea vi aɖeke o, zi alesi woyia edzi bua nazã be ‘manya wɔ be woagblɔ nya ɖi o.’ ” Eyata woƒe nazãbubu gbã ŋku na wo. Gake woa ŋutɔwoe dii nenema—eye ena nu to wo ŋu.

32. Nukae míava kpɔ le Daniel ƒe agbalẽa sɔsrɔ̃ me?

³² Ke wò ya ɖe? Ne àte ŋu akpɔe be susu gobi aɖeke meli si ta nàke ɖi Daniel ƒe agbalẽa ƒe nyateƒenyenye o la, ke efia be èdzra ɖo ɖe nu dodzidzɔname aɖewo nyanya ŋu. Àkpɔe be Daniel ƒe agbalẽa me ŋutinyawo wɔa dɔ ɖe ame dzi eye nyagblɔɖiawo hã doa dzidzɔ na ame. Vevietɔ wu la, àkpɔe be ta ɖesiaɖe me dzodzro agado ŋusẽ wò xɔse ɖe edzi. Mave wò gbeɖe be yedzro Daniel ƒe nyagblɔɖia me tsitotsito o!

[Etenuŋɔŋlɔwo]

NUKAWO GƆMEE NÈVA SE?

• Nya kae wotsɔ ɖe Daniel ƒe agbalẽa ŋu?

• Nukata kpeɖodzi mele nya siwo ɖikelawo tsɔ ɖe Daniel ƒe agbalẽa ŋu la ŋuti o?

• Nukae ɖo kpe Daniel ƒe nuŋlɔɖia ƒe nyateƒenyenye dzi?

• Nukae nye kpeɖodzi vevitɔ kekeake be Daniel ƒe agbalẽa nye nyateƒe?

[Aɖaka si le axa 26]

Gbegbɔgblɔ ƒe Nya La

WOWU Daniel ƒe agbalẽa ŋɔŋlɔ nu le ƒe 536 D.M.Ŋ. me lɔƒo. Woŋlɔe ɖe Hebrigbe kple Aramgbe me, eye Helagbe kple Persiagbe me nya ʋee aɖewo hã nɔ eme. Gbegbɔgblɔwo tsakatsaka alea mebɔ o gake menye agbalẽ ma koe woŋlɔ alea le Ŋɔŋlɔawo me o. Woŋlɔ Biblia-gbalẽ si nye Ezra hã ɖe Hebrigbe kple Aramgbe me. Ke hã ɖikela aɖewo te tɔ ɖe edzi be Daniel ƒe agbalẽa ŋlɔla zã gbegbɔgblɔ siawo le mɔ aɖe nu si fia be ƒe 536 D.M.Ŋ. megbee wòŋlɔe. Ame geɖe yɔ ɖikela aɖe ƒe nya si gblɔ be Helagbe me nyawo zazã le Daniel ƒe agbalẽa me fia kokoko be ɣeyiɣi aɖe megbee woŋlɔe. Egblɔ be Hebrigbe si wòzã ɖo kpe eŋɔŋlɔ le ɣeyiɣi aɖe megbe dzi eye ne mede ɖeke o hã la Aramgbe si wòzã hã fia nenema​—⁠ate ŋu anye nyitsɔ laa le ƒe alafa evelia D.M.Ŋ. me gɔ̃ hã.

Gake menye gbenyalawo katãe lɔ̃ ɖe nya sia dzi o. Gbenyala aɖewo gblɔ be Hebrigbe si Daniel ŋlɔ la ɖi Xezekiel kple Ezra tɔ eye mele abe esiwo dze le agbalẽ siwo womexɔ de Ŋɔŋlɔawo me o siwo wova ŋlɔ emegbe si ƒe ɖee nye Ecclesiasticus la ene o. Le Aramgbe si Daniel zã gome la, bu nuŋlɔɖi eve siwo wokpɔ le Ƒukukua ƒe Agbalẽxatsaxatsawo dome ŋu kpɔ. Aramgbe mee woŋlɔ woawo hã ɖo eye ƒe alafa gbãtɔ kple evelia D.M.Ŋ. mee woŋlɔ wo​—⁠si nye ɣeyiɣi si wobe woŋlɔ Daniel ƒe nyakpakpawo megbe kpuie. Gake agbalẽnyalawo kpɔe be vovototo gã aɖe le Aramgbe si wozã le nuŋlɔɖi siawo me kple esi wozã le Daniel ƒe agbalẽa me dome. Esia na ame aɖewo gblɔ be woaŋlɔ Daniel ƒe agbalẽa ƒe alafa geɖe do ŋgɔ na ɣeyiɣi si eŋuti ɖikelawo ɖona nɛ.

Ke Helagbe me nya “siwo ŋu nya ku ɖo” le Daniel ƒe agbalẽa me ya ɖe? Wokpɔe be Persiagbe ye esia dometɔ aɖewo nye, ke menye Helagbe kura o! Nya siwo ko wogabuna kokoko be wonye Helagbe la nye haƒonu etɔ̃ ƒe ŋkɔwo. Ðe nya etɔ̃ siawo siwo le eme fia kokoko be ɣeyiɣi aɖe megbee woŋlɔ Daniel ƒe agbalẽa? Ao. Blematomenukulawo kpɔe be Helatɔwo ƒe agbenɔnɔ kpɔ ŋusẽ ɖe amewo dzi ƒe alafa geɖe hafi Hela va zu xexemefiaɖuƒe. Tsɔ kpe ɖe eŋu la, ne ƒe alafa evelia D.M.Ŋ., si me Helatɔwo ƒe agbenɔnɔ kple gbegbɔgblɔ xɔ teƒe geɖe mee woŋlɔ Daniel ƒe agbalẽa la, anye ne Helagbe me nya etɔ̃ koe anɔ emea? Kura o. Anye ne geɖe anɔ eme. Eyata gbe siwo wozã tsɔ ŋlɔ Daniel ƒe agbalẽa ɖo kpe eƒe nyateƒenyenye dzi ŋutɔŋutɔ.

[Nɔnɔmetata si xɔ axa 12]

[Nɔnɔmetata siwo le axa 20]

(Ete) Fia Nabonido kple via Belsazar ƒe ŋkɔ dze le Babilon-gbedoxɔ me nuŋlɔɖikpe dzi

(Etame) Nebukadnezar ƒe adegbeƒoƒo le eƒe xɔtudɔwo ŋu dze le nuŋɔŋlɔ sia me

[Nɔnɔmetata si le axa 21]

Nabonido Ŋutinyagbalẽ gblɔ be Kores ƒe aʋakɔ ge ɖe Babilon-dugã la me aʋamawɔmawɔe

[Nɔnɔmetata siwo le axa 22]

(Ðusime) “Nabonido Ŋutinya si Woɖo ɖe Ðoɖo Nu” ka nya ta be Nabonido tsɔ fiaɖuɖua de asi na eƒe ŋgɔgbevi

(Miame) Babilontɔwo ƒe nuŋlɔɖi le Nebukadnezar ƒe Yuda dzi dzedze ŋu