Ta Adrelia

Nya Ene Siwo Trɔ Xexeame

 1. Aleke nya ene aɖewo siwo woŋlɔ ɖe gli ŋu ɣeyiɣi didi aɖee nye sia la keke tae?

WOŊLƆ nya ene ko ɖe gli zɔzrɔ̃e aɖe ŋu. Gake nya ene mawo na ŋɔdzi lé fia ŋusẽtɔ aɖe ale gbegbe be wòdze aɖaʋa kloe. Nya la ku ɖe fia eve ɖeɖe le zi dzi, wo dometɔ ɖeka ƒe ku, kple xexemefiaɖuƒe sẽŋu aɖe ƒe nuwuwu ŋu. Nusiwo do tso nya mawo me ɖi gbɔ mawusubɔsubɔ nuɖoanyi aɖe si ŋu wodea bubui. Vevietɔ wu la, wodo Yehowa ƒe tadedeagu dzadzɛ ɖe dzi eye wògaɖo kpe eƒe dziɖulanyenye dzi le ɣeyiɣi si me ame akpa gãtɔ metsɔ ɖeke le nu eve siawo ƒe ɖeke me o me. Nya mawo kɔ egbe xexemenudzɔdzɔwo gɔ̃ hã me! Aleke wòanya wɔ be nya ene nawɔ nusiawo katã? Mina míakpɔe ɖa.

 2. (a) Nukae dzɔ le Babilon le Nebukadnezar ƒe ku megbe? (b) Dziɖula kae va nɔ zia dzi?

² Ƒe bla nanewo va yi tso esime nusiwo ŋu woƒo nu tsoe le Daniel ta 4 lia me la dzɔ. Fia dadala Nebukadnezar ƒe fiaɖuɖu ƒe 43 le Babilon la wu enu esi wòku le ƒe 582 D.M.Ŋ. me. Ame bubu geɖe va ɖu fia ɖe eyome, gake woƒe kuku kaba alo wo wuwu he woƒe dziɖuɖuwo va nuwuwui. Mlɔeba la, ŋutsu aɖe si ŋkɔe nye Nabonido to aglãdzedze me va xɔ fiazikpuia. Esi Nabonido nye dzinumawu Sin ƒe nyɔnu nunɔlagã ƒe vi ta la, edze ƒã be metso Babilon-fiaƒomea me o. Eŋutinunyala aɖewo gblɔ be eɖe Nebukadnezar vinyɔnu ale be wòna eya ŋutɔ va dze na fiaɖuɖu, ewɔ wo viŋutsu Belsazar ehatidziɖulae, eye wògblẽ Babilon dzi ɖuɖu ɖe esi me ƒe geɖe le ɣeyiɣi aɖewo me. Ne ele nenema la, ke Nebukadnezar ƒe tɔgbuiyɔvie Belsazar nye. Ðe wòsrɔ̃ nu tso nusiwo dzɔ ɖe tɔgbuia dzi me be Yehowae nye Mawu si ƒo ɖesiaɖe ta si te ŋu ɖia gbɔ fia ɖesiaɖea? Ao, mesrɔ̃e o!—Daniel 4:34.

WOWƆ NU WÒGBƆ EME LE AGLOTUƑE AÐE

 3. Aleke Belsazar ƒe kplɔ̃ɖoɖoa nɔ?

³ Daniel ta 5 lia dze egɔme kple aglo aɖe si wotu ŋu nya. “Fia Belsazar tu aglo gã aɖe na eƒe amegã akpewo, eye wòno wein le ame akpeawo ŋku me.” (Daniel 5:1) Abe alesi nàte ŋu akpɔe le susu me ene la, anye akpata gã aɖe mee wonɔ ale be amesiawo katã kple fiasrɔ̃wo kple eƒe ahiãviwo nakpɔ nɔƒe. Agbalẽnyala aɖe gblɔ be: “Babilontɔwo ƒe aglotutuwo nyea atsyɔ̃, gake zi geɖe la, ahamumue wotsɔ wua enui. Wein si wodɔ tso duta, kple dzidzɔdonamenu ɖesiaɖe ƒomevi nɔa kplɔ̃a dzi. Akpataa me nɔa ʋeʋẽm lilili; hadzilawo kple ʋuƒolawo doa dzidzɔ na amesiwo va kpe ta.” Belsazar nɔ afisi amesiame ate ŋu akpɔe wònɔ eƒe wein nom—enono dzi ko wònɔ.

 4. (a) Nukata wòwɔ mo yaa be Babilontɔwo nɔ azã ɖum le October 5/6, 539 D.M.Ŋ. ƒe zã me? (b) Edze ƒã be anye nukae na kakaɖedzi nɔ Babilontɔwo si togbɔ be aʋakɔwo ɖe to ɖe wo hã?

⁴ Ewɔ mo yaa be Babilontɔwo nɔ azã ɖum alea le zã sia me—si nye October 5/6, 539 D.M.Ŋ. dzi. Woƒe dukɔa nɔ aʋa wɔm, eye womenɔ ta kpɔm nɛ o. Medo-Persia ʋakɔ siwo va dze wo dzi la ɖu Nabonido dzi eteƒe medidi o wòsi yi Borsippa, si le Babilon ƒe anyieheɣetoɖoƒe. Eye fifia Kores ƒe aʋakɔwo ƒu asaɖa anyi ɖe Babilon-glia godo tututu. Ke hã Belsazar kple amegãwo mewɔ naneke si fia be wotsi dzi o. Wotsɔe be Babilon-dugã si dzi womate ŋu aɖu o mee yewole! Eƒe gli nyadriwo nɔ ʋe globo siwo me Frat Tɔsisi gã si tsa to dua me le la to. Ƒe akpe ɖeka kple edzivɔ sɔŋ enye ma si futɔ aɖeke mete ŋu va dze Babilon dzi xɔe kpata kpɔ o. Eyata nukata woatsi dzi? Ðewohĩ Belsazar bu be yewoƒe dzidzɔɣlidodo aɖe yewoƒe kakaɖedzi afia futɔ siwo le dua godo ahaɖe dzi le wo ƒo.

 5, 6. Nukae Belsazar wɔ esi wòmu aha, eye nukata esia nye vlododo Yehowa si gbɔ eme?

⁵ Eteƒe medidi o, aha si Belsazar no fũ la kpe edzi. Lododowo 20:1 gblɔ be “fewuɖula enye wein.” Le esia gome la, wein na fia la wɔ bometsinu ŋutɔŋutɔ si vɔ̃ɖi wu. Edɔ be woaɖatsɔ Yehowa ƒe gbedoxɔa me nu kɔkɔeawo ava azãa ɖuƒee. Tadedeagu dzadzɛ ŋu koe wozãa nusiawo siwo wolɔ aboyonuwoe esime Nebukadnezar ɖu Yerusalem dzi la ɖo. Woxlɔ̃ nu Yudatɔ nunɔla siwo woɖe mɔ na be woazãe le Yerusalem-gbedoxɔa me tsã la gɔ̃ hã be woanɔ kɔkɔe.—Daniel 5:2; tsɔe sɔ kple Yesaya 52:11.

⁶ Gake amemabumabunu bubu aɖe gale Belsazar ƒe susu me wòle wɔwɔ ge. “Fia la kple eƒe amegãwo, srɔ̃awo kple eƒe ahiãwo no . . . wein, eye wokafu mawu, siwo nye sika, klosalo, akɔbli, gayibɔ, ati kple kpe.” (Daniel 5:3, 4) Eyata Belsazar ɖoe be yeado yeƒe alakpamawuwo ɖe dzi wu Yehowa! Edze abe nɔnɔme sia bɔ ɖe Babilontɔwo dome ene. Wodo vlo Yudatɔ siwo woɖe aboyoe heɖua fewu le woƒe tadedeagu ŋu eye wona wòdzena be womagatrɔ ayi wo denyigba dzi akpɔ gbeɖe o. (Psalmo 137:1-3; Yesaya 14:16, 17) Ðewohĩ fia sia si mu aha la bu be gbɔɖiɖi aboyome siawo kple vlododo woƒe Mawu awɔ dɔ ɖe nyɔnuawo kple yeƒe amegãwo dzi, eye wòana yeadze ame sesẽ le wo gbɔ.a Gake ne Belsazar kpɔ dzidzɔ ɖe ŋusẽ ɖeɖefia ŋu hã la, dzidzɔ ma menɔ anyi didi o.

ASINUŊƆŊLƆ LE GLI ŊU

 7, 8. Nukae gblẽ Belsazar ƒe azãɖuɖua me, eye dɔ kae esia wɔ ɖe fia la dzi?

⁷ Nuŋlɔɖi si tso gbɔgbɔ me la gblɔ be: “Enumake kasia amegbetɔ ƒe asibide va ŋlɔ nu ɖe fiasã la ƒe gli, si wosi akalo na la ŋu le akaɖitia ŋgɔdze. Eye . . . fia la kpɔ asi, si ŋlɔ nua la.” (Daniel 5:5) Nukunu kae nye si! Asi aɖe si womenya etsoƒe o nɔ yame le glia ƒe akpa si akaɖi klẽ ɖo nyuie. Kpɔ ɖoɖoezizi gã si anɔ afima ɖa le susu me esi vavalawo ke nu ɖe te nɔ ekpɔm. Asia te nya ɣaɣla aɖe ŋɔŋlɔ ɖe gli zɔzrɔ̃e la ŋu.b Nusia dzi ŋɔ ŋutɔ eye etsi susu me na amewo ale gbegbe be vaseɖe egbea la, amewo zãa nyagbɔgblɔ si nye “asinuŋɔŋlɔ le gli ŋu” wònyea nuxlɔ̃ame be afɔku aɖe gbɔna.

⁸ Dɔ kae wòwɔ ɖe fia dadala sia si te kpɔ be yeado ye ɖokui kple yeƒe mawu ɖe dzi wu Yehowa la dzi? “Fia la ƒe mo fu tititi, eye eƒe tamesusuwo do ŋɔdzi nɛ, eƒe ali me ka tso, eye eƒe klowo le wo nɔewo ƒom kpakpakpa.” (Daniel 5:6) Belsazar ƒe taɖodzinue nye be ye teviwo nakpɔ yeƒe gãnyenye kple ŋusẽ hafi. Gake eƒe dzedzeme ɖee fia be ŋɔdzi boŋue lée vevie—eƒe mo fu, ali tsoe, eye dzidzi ƒo eya ame bliboa katã ale gbegbe be eƒe klowo nɔ wo nɔewo ƒom kpakpakpa. Nya siwo Dawid tsɔ dzi ha na Yehowa la nye nyateƒe vavã be: “Wò ŋku nɔa dadalawo ŋu, be nabɔbɔ wo ɖe anyi.”—Samuel II, 22:1, 28; tsɔe sɔ kple Lododowo 18:12.

 9. (a) Nukata ŋɔdzi si lé Belsazar menye mawuvɔvɔ̃ o? (b) Nukae fia la gblɔ be yeana Babilon-nunyalawo?

⁹ Ele be míade dzesii be menye mawuvɔvɔ̃, si nye bubu deto dede Yehowa ŋu, si nye nunya ƒe gɔmetoto ye nɔ Belsazar me o. (Lododowo 9:10) Ao, esia nye ŋɔdziléame, eye mefia nunya aɖeke fia si ƒe lãme nɔ ƒoƒom la o.c Le esi teƒe be wòabia tsɔtsɔke Mawu si wòdo vloe va yi la, edo ɣli sesĩe be woayɔ “bokɔnɔwo, Kaldeatɔwo kple dzotɔwo” boŋ na ye. Egblɔ gɔ̃ hã be: “Amesi axlẽ nuŋɔŋlɔ sia, eye wòaɖe egɔme nam la, woata aɖabɛ nɛ, woade sika kɔsɔkɔsɔ kɔ nɛ, eye wòanye etɔ̃lia aɖu dzi le nye fiaɖuƒe la me.” (Daniel 5:7) Ŋusẽ anɔ fiaɖuƒea ƒe dziɖula etɔ̃lia ŋu nyateƒe, eye Nabonido kple Belsazar ŋutɔ siwo nye fia eve siwo nɔ dzi ɖum koe anɔ ŋgɔ nɛ. Anye Belsazar ƒe viŋutsu tsitsitɔe ava nɔ ɖoƒe sia hafi. Fia la tsi dzi vevie be woaɖe nukugbedasi sia me na ye!

10. Aleke wònɔ na nunyalaawoe le asinuŋɔŋlɔ si le glia ŋu gɔmeɖeɖe me?

¹⁰ Nunyalaawo nɔ ɖoɖo nu va akpata gã la me. Wosɔ gbɔ kpaŋkpaŋ, elabena Babilon nye dugã si me alakpasubɔsubɔ xɔ aƒe ɖo vevie eye gbedoxɔwo hã bɔ ɖe afima. Anɔ eme godoo be ŋutsu siwo gblɔ be yewoxlẽa ɖeɖefiawo kple afakanya ɣaɣlawo va ƒo ƒu fũ. Mɔnukpɔkpɔ si ʋu ɖi na nunyala siawo anya do dzidzɔ na wo. Mɔnukpɔkpɔ su wo si be woawɔ woƒe dɔa le ameha aɖe ŋkume, woana fia nakpɔ ŋudzedze ɖe wo ŋu, eye ɖoƒe kɔkɔ aɖe nasu wo si. Gake aleke gbegbe wodo kpo nui enye si! “Womete ŋu xlẽ nuŋɔŋlɔ la, ne woahayi egɔme ɖe ge na fia la o.”d—Daniel 5:8.

11. Anye nukae na Babilon-nunyalawo mete ŋu xlẽ nuŋɔŋlɔ la o?

¹¹ Míate ŋu anya ne nuŋɔŋlɔa ŋutɔ—nyakuiawo ŋutɔ—ye Babilon-nunyalawo mete ŋu xlẽ o. Ne ɖe womete ŋu kpɔ wo dze sii o la, anye ne mɔnukpɔkpɔ asu ŋutsu vɔ̃ɖi siawo si be woadi alakpanya aɖe atsɔ aɖe egɔmee, ɖewohĩ ate ŋu anye numevivinya si woatsɔ able fia la gɔ̃ hã. Azɔ hã ate ŋu anɔ eme be ŋɔŋlɔdzesiawo dze nyuie woate ŋu axlẽ. Gake esi womedea ablɔɖegbeɖiɖi gbe aɖewo abe Aram kple Hebri gbe ene ƒe nuŋɔŋlɔwo me o ta la, gɔmesese vovovo ate ŋu anɔ nya ɖesiaɖe ŋu. Ne edzɔ nenema la, anɔ eme be nunyalawo mate ŋu anya nya siwo wowɔnɛ o. Ne wote ŋu nyae hã la, womete ŋu se nyaawo gɔme ne woayi egɔme ɖe ge o. Nuka ke gbɔe wòtso o, nya ɖeka sia nye nyateƒe be: Babilon-nunyalawo do kpo nu—nublanuitɔe!

12. Nuka dzie nunyalaawo ƒe kpododonu ɖo kpee?

¹² Eyata woklo nu le nunyalaawo ŋu be wonye alakpanuwɔlawo eye woƒe mawusubɔsubɔ xɔŋkɔa hã nye ameflunu. Aleke gbegbe woɖu ŋukpee nye si! Esi Belsazar kpɔe be yeƒe ŋuɖoɖo ɖe mawusubɔsubɔnyahela siawo ŋu zu dzodzro la, ŋɔdzi galée ɖe edzi, eƒe mo gafu tititi ɖe edzi, eye “dzidzi ƒo” eƒe amegãwo gɔ̃ hã.e—Daniel 5:9.

WOYƆ DANIEL VA TEƑEA

13. (a) Amekae woyɔ va teƒea, eye susu kae wòdo ɖa? (b) Aleke Daniel ƒe zɔzɔme nɔ ɣemaɣi?

¹³ Le ɣeyiɣi sesẽ sia me la, fia la dada ŋutɔ—ɖewohĩ eyae nye fianyɔnu—yi ɖe aglotuƒea. Ese alesi zi tɔ le azãa ɖuƒea, eye enya ame aɖe si ate ŋu ase asinuŋɔŋlɔ si le glia ŋu gɔme. Ƒe bla nanewo do ŋgɔ la, fofoa Nebukadnezar ɖo Daniel eƒe nunyalawo katã ƒe tatɔe. Fia la dada ɖo ŋku edzi be enye amesi si “gbɔgbɔ triakɔ, sidzedze kple nunya” le. Esi wòdze abe Belsazar medze si Daniel o ene ta la, anɔ eme be dziɖuɖu ƒe ɖoƒe kɔkɔ si nyagblɔɖila la nɔ ge le esi le Nebukadnezar ƒe ku megbe. Gake ɖoƒe kɔkɔ nɔnɔ menɔ vevie na Daniel o. Ðewohĩ exɔ ƒe 90 kple edzivɔ ɣemaɣi eye ekpɔtɔ nɔ Yehowa subɔm nuteƒewɔwɔtɔe. Togbɔ be etsɔ ƒe siwo ade blaenyi nɔ aboyo me le Babilon hã la, woganya eƒe Hebrigbe me ŋkɔa nɛ kokoko. Fia dada gɔ̃ hã yɔe be Daniel, eye metsɔ Babilontɔwo ƒe ŋkɔ si wotsɔ nɛ tsã la yɔe o. Le nyateƒe me la, ede dzi ƒo na fia la be: “[Na] woayɔ Daniel vɛ, ekema aɖe egɔme.”—Daniel 1:7; 5:10-12.

14. Nɔnɔme sesẽ kae dze ŋgɔ Daniel esi wòkpɔ asinuŋɔŋlɔa le glia ŋu?

¹⁴ Wova kplɔ Daniel va Belsazar ŋkumee. Enye ŋukpe be woabia kpekpeɖeŋu tso Yudatɔ sia si ƒe Mawu fia la do vloe eteƒe medidi o la gbɔ. Ke hã Belsazar te kpɔ be yeable Daniel nu, eye egblɔ be yeatsɔ teƒeɖoɖo ma ke nɛ—anye ame etɔ̃lia le fiaɖuƒea me—ne ete ŋu xlẽ nya ɣaɣlaawo heɖe wo gɔme. (Daniel 5:13-16) Daniel fɔ mo dzi kpɔ asinuŋɔŋlɔa le glia ŋu, eye gbɔgbɔ kɔkɔe kpe ɖe eŋu wòte ŋu se egɔme. Enye dzɔgbevɔ̃e ƒe gbedasi si tso Yehowa Mawu gbɔ! Aleke Daniel awɔ agblɔ fia vloe sia ƒe ʋɔnudrɔ̃nya sesẽwo nɛ ŋkume kple ŋkume—le srɔ̃awo kple eƒe amegãwo ŋkume? Bu nɔnɔme si me Daniel nɔ ŋu kpɔ! Ðe fia ƒe amenublenyawo kple kesinɔnu kpakple nɔƒegãnɔnɔ si ƒe ŋugbe wòdo nɛ la fluia? Ðe nyagblɔɖila la atɔ tsi Yehowa ƒe nyawoa?

15, 16. Nu vevi kae Belsazar mesrɔ̃ tso ŋutinya me o, eye aleke nuwɔna ma tɔgbe bɔe egbea?

¹⁵ Daniel ƒo nu dzinɔameƒotɔe be: “Wò nunanawo nenɔ anyi na wò, eye natsɔ wo na ame bubu! Ke maxlẽ nuŋɔŋlɔ la na fia la, eye maɖe egɔme nɛ.” (Daniel 5:17) Azɔ Daniel ƒo nu tso Nebukadnezar ƒe gãnyenye ŋu be enye fia sẽŋu ale gbegbe be ete ŋu wua ame, dzea ame dzi, doa ame ɖe dzi, alo bɔbɔa amesiame si wòdi ɖe anyi faa. Gake Daniel ɖo ŋku edzi na Belsazar be Yehowa, “dziƒoʋĩtɔ” lae do gã Nebukadnezar. Yehowae ɖi gbɔ fia sẽŋu ma esi wòdo eɖokui ɖe dzi. Ẽ, wozi Nebukadnezar dzi wòkpɔe dze sii be “dziƒoʋĩtɔ la kpɔ ŋusẽ ɖe amegbetɔwo ƒe fiaɖuƒewo dzi, eye amesi dze eŋu la, eyae wòtsɔnɛ na.”—Daniel 5:18-21.

¹⁶ Belsazar ‘nya nusiawo katã hafi.’ Ke hã egbe nusɔsrɔ̃ tso nusi dzɔ va yi me. Le nyateƒe me la, ewɔ nusi vɔ̃ɖi wu Nebukadnezar ƒe nuvɔ̃ si nye dada vɔ̃ɖi la eye wòwɔ nu tsɔ do vlo Yehowa tẽ. Daniel ʋu fia ƒe nuvɔ̃ me nɛ. Tsɔ kpe ɖe eŋu la, dzi nɔ eƒo wògblɔ na Belsazar le trɔ̃subɔla siwo va ƒo ƒu ƒe ŋkume be alakpamawuwo “mekpɔa nu o, womesea nu o, eye womedzea si nu o.” Mawu ƒe nyagblɔɖila si ƒo dzi nɔ la gblɔ kpe ɖe eŋu be Yehowa mele abe mawu maɖinu mawo o, ke boŋ enye Mawu si ‘si me wò agbe le.’ Vaseɖe egbea la, amewo gatsɔa nusiwo me agbe mele o wɔa mawui kokoko, eye wosubɔa ga, dɔwɔɖui, ŋkɔxɔxɔ, kple vivisese gɔ̃ hã. Gake nusiawo ƒe ɖeke mate ŋu ana agbe o. Yehowa ɖeka koe na mí katã míele agbe, eye eya gbɔe ya ɖesiaɖe si míegbɔna tso.—Daniel 5:22, 23; Dɔwɔwɔwo 17:24, 25.

WOÐE NYA ƔAƔLA AÐE GƆME!

17, 18. Nya ene kawoe woŋlɔ ɖe glia ŋu, eye gɔmesese kae nɔ wo ŋu le nyaawo ŋutɔŋutɔ nu?

¹⁷ Azɔ amegãɖeɖi Daniel wɔ nusi Babilon-nunyalawo katã mete ŋu wɔ o. Exlẽ asinuŋɔŋlɔ si le glia ŋu heɖe egɔme. Emenyawoe nye: “Mene, mene, tekel, ufarsin.” (Daniel 5:24, 25) Nukae wofia?

¹⁸ Le nyaa ŋutɔŋutɔ nu la, wofia “mina ɖeka, mina ɖeka, sekel ɖeka, kple sekel afã.” Nya ɖesiaɖe nye ga ƒe kpekpeme aɖe, eye woɖo wo ɖe ɖoɖo nu tso gãtɔ dzi va ɖo suetɔ dzi. Aleke gbegbe wòatɔtɔ amee nye si! Ne ɖe Babilon-nunyalawo te ŋu kpɔ ŋɔŋlɔdzesiawo xlẽ gɔ̃ hã la, mewɔ nuku be womete ŋu ɖe nusi wòfia me o.

19. Aleke woɖe nya “mene” gɔmee?

¹⁹ Daniel ɖe egɔme le Mawu ƒe gbɔgbɔ kɔkɔe ƒe mɔfiafia te be: “Nya la gɔme enye si: Mene: Mawu xlẽ wò fiaɖuƒe, eye wòɖo nuwuwu na wò.” (Daniel 5:26) Xaxagbeɖiɖi siwo wotsɔ ŋlɔ nya gbãtɔa wɔe be ate ŋu afia “mina” eye agate ŋu afia Aramgbe me nya aɖe si wozãna na “woxlẽe,” alo “woɖo xexlẽme nɛ” hã, eye ablɔɖegbeɖiɖi si exlẽla atsɔ de wo me ye afia alesi wòayɔe. Daniel nya nyuie be Yudatɔwo ƒe aboyomenɔnɔa ƒe nuwuwu gogo. Ƒe 68 va yi le ƒe 70 si wogblɔ ɖi la me xoxo. (Yeremya 29:10) Yehowa si nye Gamedziwɔla Gãtɔ xlẽ Babilon xexemefiaɖuƒea ƒe dziɖuɣi, eye eƒe nuwuwu tu aƒe wu alesi amesiame si le Belsazar ƒe fiasãa me susui. Le nyateƒe me la, ɣeyiɣia de—menye na Belsazar ɖeɖeko o, ke na fofoa Nabonido hã. Ðewohĩ ema tae woŋlɔ nya “mene” zi eve ɖo—be woatsɔ aɖe gbeƒã fia eveawo siaa ƒe nuwuwu.

20. Aleke woɖe nya “tekel” gɔmee, eye aleke wòku ɖe Belsazar ŋui?

²⁰ Gake zi ɖeka koe woŋlɔ “tekel” ya eye woŋlɔe wòfia nu ɖeka. Esia ate ŋu afia be Belsazar koŋue wole egblɔm na. Eye asɔ nenema, elabena eya ŋutɔ ɖe bubumademade Yehowa ŋu fia wògbɔ eme. Nya la ŋutɔ gɔmee nye “sekel,” gake xaxagbeɖiɖi si wotsɔ ŋlɔe ana wòate ŋu afia hã be “wodae le nudanu me.” Eyata Daniel gblɔ na Belsazar be: “Tekel: Woda wò le nudanu me, ke èle hodzoe akpa.” (Daniel 5:27) Dukɔwo katã le wodzoe abe ʋuʋudedi sue le nudanu ŋu ene le Yehowa ŋkume. (Yesaya 40:15) Ŋusẽ mele wo ŋu ne woagblẽ eƒe tameɖoɖowo me o. Ekema nuka fia dadala ɖeka pɛ aɖi le egbɔ? Belsazar te kpɔ be yeado ye ɖokui ɖe dzi agbɔ xexeame katã ƒe Dziɖulagã la ŋu. Amegbetɔ tsɛ sia do dzi do vlo Yehowa heɖu fewu le tadedeagu dzadzɛ ŋu gake wokpɔe be ele ‘wodzoe akpa.’ Ẽ, Belsazar dze na ʋɔnudɔdrɔ̃ si nɔ du dzi gbɔna la nyuie!

21. Aleke nya “ufarsin” ate ŋu afia nu etɔ̃e, eye nukae nya sia ɖe fia le Babilon si nye xexemefiaɖuƒe la ƒe etsɔme ŋu?

²¹ Nya mamlɛtɔ si nɔ glia ŋue nye “ufarsin.” Daniel xlẽe be “Peres,” si fia nu ɖeka, ɖewohĩ le esi wònɔ nu ƒom na fia ɖeka eye evelia menɔ eteƒe o ta. Gɔmesese etɔ̃ ƒokplie le nya sia si ƒo Yehowa ƒe nya ɣaɣla gã la ta ŋu. “Ufarsin” fia “sekel afã” le nyaa ŋutɔ nu. Gake ŋɔŋlɔdzesiawo agate ŋu afia nu eve bubuwo—“memamãwo” kple “Persiatɔwo.” Eyata Daniel gblɔ ɖi be: “Peres: Woamã wò fiaɖuƒe la atsɔ na Mediatɔwo kple Persiatɔwo.”—Daniel 5:28.

22. Nukae Belsazar wɔ esi woɖe nya ɣaɣla la me, eye ɖewohĩ nukae wònɔ mɔ kpɔm na?

²² Aleae woɖe nya ɣaɣla la gɔmee. Eteƒe madidi o Babilon si nye du sesẽ la adze Medo-Persia ʋakɔwo si me. Togbɔ be Belsazar tsi yaa le dzɔgbevɔ̃e si wogblɔ be egbɔna ta hã la, ewɔ eƒe nya dzi. Ena eƒe dɔlawo ta aɖabɛ na Daniel, wotsɔ sika kɔsɔkɔsɔ de kɔ nɛ, eye wodo kpo le eŋgɔ be eyae nye dziɖula etɔ̃lia le fiaɖuƒe la me. (Daniel 5:29) Daniel megbe bubudeameŋu siawo o, elabena ekpɔe be wonye bubu si dze dede Yehowa ŋu. Le nyateƒe me la, anye be ɖe Belsazar di be yeafa Yehowa ƒe ʋɔnudɔdrɔ̃a nu to bubudede Eƒe nyagblɔɖila ŋu me. Ne nenemae la, ke etsi megbe akpa.

BABILON ƑE MUMU

23. Blemanyagblɔɖi kae nɔ eme vam esime Belsazar ƒe azãɖuɖua nɔ edzi yim gɔ̃ hã?

²³ Esime Belsazar kple eƒe dziɖuɖumegãwo nɔ aha nom nɔ woƒe mawuwo kafum eye wonɔ fewu ɖum le Yehowa ŋu gɔ̃ hã la, nya gã aɖe nɔ dzɔdzɔm le vivitia me le fiasã la godo. Nya siwo wogblɔ ɖi to Yesaya dzi ƒe alafa eve kloe do ŋgɔ la nɔ eme vam. Yehowa gblɔ ɖi le Babilon ŋu be: “Matsi eƒe hũɖeɖewo katã nu.” Ẽ, alesi dugã vɔ̃ɖi ma nɔ Mawu ƒe dukɔ tiatia tem ɖe anyi la katã ava nuwuwu. Le mɔ ka nu? Nyagblɔɖi ma ke gblɔ be: “Elam, ho va; Media, ɖe to ɖe ŋu!” Elam va zu Persia ƒe akpa aɖe le nyagblɔɖila Yesaya ƒe ŋkekeawo megbe. Le Belsazar ƒe aglotuɣi, si hã wogblɔ ɖi le Yesaya ƒe nyagblɔɖi ma ke me la, Persia kple Media ƒe aʋakɔwo wɔ ɖeka ŋutɔŋutɔ be ‘yewoaho aɖaɖe to ɖe’ Babilon.—Yesaya 21:1, 2, 5, 6.

24. Babilon ƒe anyidzedze ŋuti nya kae dze le Yesaya ƒe nyagblɔɖia me?

²⁴ Le nyateƒe me la, wogblɔ ŋkɔ si woayɔ na aʋakɔ mawo kplɔla la ɖi, eye nenema ke nye aʋawɔɖaŋu si ŋudɔ wòawɔ hã. Yesaya gblɔe ɖi ƒe siwo ade 200 do ŋgɔ be Yehowa asi ami na ame aɖe si ŋkɔe nye Kores be wòaho ɖe Babilon ŋu. Le eƒe amedzidzedzea me la, woabɔbɔ mɔxenu ɖesiaɖe ɖe anyi le eŋgɔ. Babilon ƒe tsiwo ‘amie,’ eye eƒe agbo gãwo anɔ ʋuʋu ɖi. (Yesaya 44:27–45:3) Eye nenema wòva dzɔe hã. Kores ƒe aʋakɔwo trɔ mɔ na Frat Tɔsisia eye ena tsia mie ale be wote ŋu zɔ to tsiʋea me. Dzɔla ŋudzɔmanɔlawo gblẽ Babilon ƒe agbowo ɖi wonɔ ʋuʋu ɖi. Xexemeŋutinyaŋlɔlawo lɔ̃ ɖe edzi be wodze dugã la dzi esime emetɔwo nɔ azã ɖum. Woxɔ Babilon aʋamawɔmawɔe. (Yeremya 51:30) Gake ame ɖeka ya teti ku wòɖe dzesi. Daniel ka nya ta be: “Zã ma me ke wowu Kaldeatɔwo ƒe fia Belsazar. Mediatɔ Dario xɔ fiaɖuƒe la, esime wòtsi xɔ ƒe blaade vɔ eve.”—Daniel 5:30; 6:1.

NUSƆSRƆ̃ TSO ASINUŊƆŊLƆ SI NƆ GLIA ŊU ME

25. (a) Nukata blema Babilon nye xexeame katã ƒe alakpasubɔsubɔ nuɖoanyi si li egbea ƒe kpɔɖeŋu si sɔ? (b) Gɔmesese ka nue woɖe aboyo egbeŋkekea me Mawu subɔlawo yi Babilon?

²⁵ Nusɔsrɔ̃ geɖe le nuŋlɔɖi si tso gbɔgbɔ me si le Daniel ta 5 lia me na mí. Esi alakpasubɔsubɔ nuwɔnawo xɔ aƒe ɖe blema Babilon ta la, esɔ be wòanye kpɔɖeŋu na xexeame alakpasubɔsubɔ ƒe fiaɖuƒe. Woyɔ ameblelawo ƒe xexeame katã ƒe ƒuƒoƒo sia si wotsɔ gbolo ʋukɔɖila tsi tre ɖi na le Nyaɖeɖefia ƒe Agbalẽa me la be “Babilon Gã.” (Nyaɖeɖefia 17:5) Esi wògbe toɖoɖo nuxlɔ̃ame siwo katã wonae le eƒe alakpanufiafia kple nuwɔna siwo medea bubu Mawu ŋu o ŋuti la, eti amesiwo ɖea gbeƒã Mawu ƒe Nya la me nyateƒea yome. Abe alesi wònɔ le amesiwo nɔ blema Yerusalem kple Yuda gome ene la, Kristotɔ amesiaminawo ƒe ame susɔeawo nɔ aboyo me le “Babilon Gã” la me esime yometiti siwo osɔfowo nɔ megbe na la tɔ te Fiaɖuƒegbeƒãɖeɖedɔa keŋkeŋ kloe le ƒe 1918 me.

26. (a) Aleke “Babilon Gã” la mu le ƒe 1919 mee? (b) Nuxlɔ̃ame ka dzie wòle be mía ŋutɔwo míawɔ ɖo ahagblɔe na ame bubuwo?

²⁶ Gake “Babilon Gã” la va mu kpata! Ẽ, ɖeko wòmu kpoo—abe alesi blema Babilon mu le ɖoɖoezizi me kloe le ƒe 539 D.M.Ŋ. me ene. Gake togbɔ be ele nenema hã la, kpɔɖeŋu ƒe anyidzedze sia gblẽ nu le eŋu. Edzɔ le ƒe 1919 M.Ŋ. me, esime woɖe Yehowa ƒe amewo tso Babilon ƒe aboyo me eye Mawu tsɔ ŋudzedzekpɔkpɔ ɖe wo ŋu yra woe. Esia he “Babilon Gã” la ƒe ŋusẽkpɔkpɔ ɖe Mawu ƒe amewo dzi va nuwuwui eye wodze egɔme klo nu le eŋu be enye ameflula si ŋu womate ŋu aɖo ŋu ɖo o. Megate ŋu fɔ le eƒe anyidzedze ma megbe o, eye eƒe tsɔtsrɔ̃ ɖikaa tu aƒe. Eyata Yehowa subɔlawo le nuxlɔ̃amenya sia gblɔm be: “Mi amesiwo nye nye dukɔ la, mido go tso me, bene miagade ha kplii le eƒe nuvɔ̃wo me o, eye bena miagaxɔ eƒe fuwɔame ƒe ɖeke o.” (Nyaɖeɖefia 18:4) Èwɔ ɖe nuxlɔ̃ame ma dzia? Ègblɔnɛ na ame bubuwoa?f

27, 28. (a) Nyateƒe vevi kae Daniel meŋlɔ be gbeɖe o? (b) Kpeɖodzi kae li be Yehowa atso ɖe egbe xexe vɔ̃ɖia ŋu kpuie?

²⁷ Eyata asinuŋɔŋlɔa le glia ŋu egbea—gake menye na “Babilon Gã” la ɖeɖeko o. Ðo ŋku nyateƒe vevi si dzi Daniel ƒe agbalẽa te gbe ɖo la dzi be: Yehowae nye Xexeame Katã ƒe Dziɖulagã. Eya ɖeɖekoe kpɔ mɔ aɖo dziɖula ɖe ameƒomea dzi. (Daniel 4:14, 22; 5:21) Woaɖe nusianu si tsi tre ɖe Yehowa ƒe tameɖoɖowo ŋu ɖa. Ne ɣeyiɣia nya de ko la, Yehowa atso ɖe eŋu. (Xabakuk 2:3) Le Daniel gome la, ɣeyiɣia va de mlɔeba esime wòsusɔ vie wòaxɔ ƒe 100. Ekpɔ alesi Yehowa ɖe xexemefiaɖuƒe aɖe ɖae ɣemaɣi—fiaɖuƒe si te Mawu ƒe amewo ɖe anyi tso keke eƒe ɖevimenɔɣi ke.

²⁸ Kpeɖodzi geɖe li be Yehowa Mawu tsɔ Dziɖula aɖe ɖo zi dzi le dziƒo be wòaɖu ameƒomea dzi. Alesi xexeame gbe Fia sia eye wòtsi tre ɖe eƒe dziɖuɖu ŋu nye kpeɖodzi sẽŋu aɖe be eteƒe madidi o, Yehowa aɖe Fiaɖuƒedziɖuɖua ƒe futɔwo katã ɖa. (Psalmo 2:1-11; Petro II, 3:3-7) Ðe nètso ɖe alesi nuwɔwɔ kpata hiã le míaƒe ɣeyiɣia me ŋu heka ɖe Mawu ƒe Fiaɖuƒea dzia? Ne nenemae la, ke èsrɔ̃ nu tso asinuŋɔŋlɔ si le glia ŋu la me nyateƒe!

[Etenuŋɔŋlɔwo]

NUKAWO GƆMEE NÈVA SE?

• Aleke wogblẽ Belsazar ƒe azãɖuɖua mee le October 5/6, 539 D.M.Ŋ. dzi?

• Aleke woɖe asinuŋɔŋlɔ si nɔ gli ŋu la gɔmee?

• Babilon ƒe anyidzedze ŋuti nyagblɔɖi kae nɔ eme vam esime Belsazar ƒe azãɖuɖua nɔ edzi yim?

• Gɔmesese kae le asinuŋɔŋlɔ si le gli ŋu ŋuti nuŋlɔɖia ŋu na míaƒe ŋkekea?

[Nɔnɔmetata si xɔ axa 98]

[Nɔnɔmetata si xɔ axa 103]