Ta Enyilia
Woɖee Tso Dzatawo Ƒe Nu Me!
1, 2. (a) Aleke Mediatɔ Dario wɔ ɖoɖo ɖe eƒe fiaɖuƒe si keke ɖe enu la ŋui? (b) Ƒo nu tso dɔ siwo amegãawo wɔna kple woƒe ŋusẽ ŋu.
BABILON mu! Woɖe xexemefiaɖuƒe ƒe atsyɔ̃ si nɔ eŋu ƒe alafa ɖeka la ɖa le gaƒoƒo ʋee aɖewo ko me. Azã yeye aɖe nɔ egɔme dzem—si nye Media kple Persia tɔwo tɔ. Dɔ si dze ŋgɔ Mediatɔ Dario si va xɔ Belsazar ƒe fiazikpuia enye be wòawɔ ɖoɖo ɖe eƒe fiaɖuƒe si keke ɖe enu la ŋu.
2 Dɔ gbãtɔ siwo Dario wɔ dometɔ aɖee nye be eɖo amegã 120. Woxɔe se be wotiaa amesiwo nɔa ɖoƒe siawo tsoa fia ƒe ƒometɔwo dome ɣeaɖewoɣi. Aleke ke wòɖanɔ o, amegã ɖesiaɖe nɔ fiaɖuƒea ƒe nuto gã alo nuto sue aɖe nu. (Daniel 6:2) Eƒe dɔ ƒe akpa aɖee nye be wòaxɔ adzɔwo eye wòaɖo ga la ɖe fia ƒe akametiwo. Togbɔ be fia ƒe amedɔdɔ va toa amegã la ƒe dɔwɔwɔ me ɣeaɖewoɣi hã la, ŋusẽ geɖe nɔ esi. Dzesideŋkɔ si wotsɔ nɛ gɔmee nye “Fiaɖuƒea takpɔla.” Wobua amegã la fiateƒenɔlae le eƒe nutoa me, eye eƒe ŋusẽ de fia tɔ nu kloe.
3, 4. Nukata Dario ve Daniel nu, eye ɖoƒe kae fia la tsɔ nɛ?
3 Akpa kae Daniel nɔ le ɖoɖo yeye sia me? Ðe Mediatɔ Dario ana Yudatɔ nyagblɔɖila tsitsi si xɔ ƒe blaasieke kple edzivɔ nadzudzɔ dɔwɔwɔa? Kura o! Ðikeke mele eme o be Dario kpɔe be Daniel gblɔ Babilon ƒe anyidzedze ɖi wòva eme pɛpɛpɛ eye be nya sia gbɔgblɔ ɖi bia nunya si de ŋgɔ wu amegbetɔ tɔ. Tsɔ kpe ɖe eŋu la, ƒe bla nanewo ƒe nuteƒekpɔkpɔ su Daniel si le aboyomewo ƒe nɔƒe vovovo siwo le Babilon la dzi kpɔkpɔ me. Dario ɖoe be yeana ŋutifafa nanɔ ye kple ye tevi yeye siwo dzi yeɖu la dome. Eyata adi godoo be ame aɖe si si nunya kple nuteƒekpɔkpɔ le abe Daniel ene nanɔ fiaŋumewo dome. Ðoƒe kae wòanɔ?
4 Awɔ mo yaa ŋutɔ ne Dario ɖo Yudatɔ aboyome Daniel be wòanye amegã. Gake kpɔ alesi zi atɔe ɖa esime Dario ɖe gbeƒãe be yetia Daniel be wòanɔ tatɔ etɔ̃ siwo akpɔ amegãawo dzi dome! Mese ɖe afima ko o ke Daniel ‘ƒe nuwɔna toa vovo ɣesiaɣi’ hã, eye eɖee fia be yeƒo ye hati tatɔ bubuawo ta. Le nyateƒe me la, wokpɔe be “gbɔgbɔ triakɔ” aɖe nɔ eme. Dario ɖoe gɔ̃ hã be yeatsɔe aɖo fiaɖuƒea dzikpɔlae.—Daniel 6:3, 4.
5. Aleke tatɔ bubuawo kple amegãawo anya wɔ nu ɖe Daniel ƒe ɖoƒea ŋui, eye nukatae?
5 Dzi anya ku tatɔ bubuawo kple amegãawo ŋutɔ. Eme mekɔ na wo kura be wona ŋusẽ Daniel—amesi menye Mediatɔ alo Persiatɔ o eye metso fiaƒomea me hã o—ɖe yewo dzi o! Aleke Dario atsɔ bubunɔƒegã sia na dukɔ bubu me tɔ, agblẽ eya ŋutɔ dedukɔ me tɔwo kple eya ŋutɔ ƒe ƒometɔwo gɔ̃ hã ɖi? Adze na wo be afɔɖeɖe sia mesɔ kura o. Tsɔ kpe ɖe eŋu la, edze ƒã be amegãawo bu Daniel ƒe nuteƒewɔwɔ be enye mɔxenu na woa ŋutɔwo ƒe viɖe ƒoɖi didi kple nufitifitiwɔwɔ. Ke hã atse meble tatɔawo kple amegãawo be woatsɔ nya sia ayi Dario ŋkumee o. Elabena Dario bua Daniel ame vevii.
6. Aleke tatɔawo kple amegãawo dze agbagba be yewoagblẽ Daniel ŋui, eye nukata wodo kpo nu?
6 Eyata dunyahela ŋuʋãla siawo ɖo nugbe le wo nɔewo dome. Wote kpɔ be “[yewoadi] nya le Daniel ŋu le dziɖunya gome.” Ðe vodada aɖe ate ŋu anɔ alesi wòwɔa eƒe dɔwoe mea? Ðe wònye anukwaremaɖilaa? Tatɔawo kple amegãawo mete ŋu kpɔ fɔmalémalé ɖe dɔ ŋu alo nufitifitiwɔwɔ aɖeke le alesi Daniel wɔa eƒe dɔwoe me o. Wogblɔ be: “Míele nya aɖeke kpɔ ge le Daniel sia ŋu o, negbe ɖe eƒe mawusubɔsubɔ ŋu ko.” Eye aleae wòdzɔe be ŋutsu ayetɔ siawo ɖo nugbe ɖe eŋu. Wobui be awɔe be yewoabu mo na Daniel keŋkeŋ.—Daniel 6:5, 6.
NUGBEÐOÐO VƆ̃ÐI AÐE DZE EGƆME
7. Nya kae tatɔawo kple amegãawo tsɔ yi fia gbɔe, eye nɔnɔme ka mee woyi le?
7 Tatɔwo kple amegãwo va Dario gbɔ “bibibi.” Aramgbe me nyagbɔgblɔ si wozã le afisia fia hoowɔwɔ gã. Anɔ eme be ŋutsu siawo na wòdze abe nya vevi aɖe si hiã kpatae yewotsɔ va Dario gbɔe ene. Ðewohĩ wobui be asesẽ be wòagbe nya si yewotsɔ vɛ la ne yewogblɔe kple kakaɖedzi hewɔe wònye nya si ŋu wòhiã be woatso ɖo kpata. Eyata wogblɔ nya la tẽ be: “Fiaɖuƒe la ƒe tatɔwo katã, anyigbanunɔlawo, amegãwo, adaŋudelawo kple dzikpɔlawo de adaŋu be, fia la naɖo ɖoɖo, eye wòade se sesẽ aɖe be, amesiame, si abia nu mawu alo amegbetɔ bubu aɖe le ŋkeke blaetɔ̃ me, eye menye tso wò fia si ko o la, woatsɔe aƒu gbe ɖe dzatawo ƒe do me.”a—Daniel 6:7, 8.
8. (a) Nukata se si wodo ɖa be woade la anya dze Dario ŋu? (b) Nuka tututue nɔ susu me na tatɔawo kple amegãawo?
8 Ŋutinyamenuŋlɔɖiwo ɖo kpe edzi be enye nusi bɔ be wobua Mesopotamia-fiawo abe mawuwo ene eye wodea ta agu na wo. Eyata ɖikeke mele eme o be nya si wodo ɖa vivi Dario nu. Ðewohĩ eya ŋutɔ hã kpɔe be ade ye dzi. Ðo ŋku edzi be Babilon-nɔlawo abu Dario be enye dukɔ bubu me tɔ kple ame yeye. Se yeye sia ana ŋusẽ naɖo eƒe fianyenye ŋu, eye ade dzi ƒo na ame gbogbo siwo le Babilon be woaɖe woƒe nuteƒewɔwɔ na dziɖuɖu yeyea agblɔ ahanɔ eƒe akpa dzi. Gake menye fia ƒe nyonyo tae tatɔawo kple amegãawo doe ɖa be woade sea kura o. Woƒe susu koŋue nye be yewoatre mɔ̃ na Daniel, elabena wonya be edoa gbe ɖa na Mawu gbeɖeka zi etɔ̃ le eƒe xɔta ƒe fesre si nɔa ʋuʋu ɖi la nu.
9. Nukata se yeyea manye kuxi aɖeke na amesiwo menye Yudatɔwo o?
9 Ðe mɔxexe ɖe gbedodoɖa nu alea anye kuxi na mawusubɔla siwo katã nɔ Babilon la? Ao, manye kuxi o vevietɔ esi wogblɔ be ɣleti ɖeka koe mɔxeɖenua axɔ ta. Tsɔ kpe ɖe eŋu la, amesiwo menye Yudatɔwo o dometɔ ʋee aɖewo koe abu tadedeagu na amegbetɔ ɣeyiɣi kpui aɖe be enye nuteƒemawɔmawɔ. Biblia ŋuti nunyala aɖe gblɔ be: “Tadedeagu na fia menye nu tovo aɖeke na dukɔ si subɔa trɔ̃ wu ɖesiaɖe la me tɔwo o; eye le ema ta esime wobia tso Babiloniatɔwo si be woatsɔ bubu si wòle be woatsɔ na mawu ana wo dzi ɖula—Mediatɔ Dario—la, wowɔe faa. Yudatɔwo koe nudidi sia medzɔ dzi na o.”
10. Aleke Media kple Persia tɔwo bua se si te fia de asii?
10 Aleke ke wòdzɔe o, amesiwo va Dario gbɔ ƒoe ɖe enu be “[wòaɖo] kpe se la dzi, eye [wòade] ŋkɔ ete be, tɔtrɔ maganɔ eŋu o ɖe Mediatɔwo kple Persiatɔwo ƒe se, si metrɔna o la nu.” (Daniel 6:9) Le blema Ɣedzeƒenyigbawo dzi la, zi geɖe wobua fia ƒe didi be ede blibo. Esia na amewo bunɛ ɣesiaɣi be medaa vo o. Ne ede se si ate ŋu ana ame maɖifɔ nabu eƒe agbe gɔ̃ hã la, mele be woatrɔe o!
11. Aleke Dario ƒe sededea agblẽ nu le Daniel ŋui?
11 Dario mebu Daniel ŋu hafi de asi sea te o. (Daniel 6:10) Esia wɔwɔ na wòde asi agbalẽ si ɖe mɔ be woawu eƒe dziɖuɖumegã si nye eƒe ame vevi la te le manyamanya me. Ẽ, Daniel adze se sia me godoo.
WOZI DARIO DZI WÒDRƆ̃ FƆBUƲƆNU
12. (a) Nukae Daniel wɔ esi wòse nu tso se yeye si wode ŋu megbe teti? (b) Amekawoe nɔ ŋku lém ɖe Daniel ŋu, eye nukatae?
12 Eteƒe medidi o Daniel va nya nu tso se si xe mɔ ɖe gbedodoɖa nu la ŋu. Eyi ɖe eƒe aƒeme enumake eye wòge ɖe eƒe xɔtaxɔ, si ƒe fesrewo ʋu ɖo ta Yerusalem la me.b Daniel dze gbedodoɖa na Mawu gɔme le afima “abe alesi wòwɔna tsã ene.” Ðewohĩ Daniel bui be ye ɖeka koe li, gake nugbeɖolawo nɔ ekpɔm. ‘Woge ɖe eme’ zi ɖeka eye ɖikeke mele eme o be dzitsitsi si wotsɔ yi Dario gbɔ la tɔgbe ke wotsɔ ge ɖe eme. Fifia woa ŋutɔwo ƒe ŋkuwo kpɔe—Daniel nɔ “gbe dom ɖa hele koko ƒom le eƒe Mawu ŋku me.” (Daniel 6:11, 12) Kpeɖodzi siwo katã dim tatɔawo kple amegãawo nɔ be woatsɔ atso Daniel nu le fia ƒe ŋkume la su wo si.
13. Nutsotso kae Daniel ƒe futɔwo tsɔ yi fia gbɔe?
13 Daniel ƒe futɔwo bia Dario ayetɔe be: “Ðe mèŋlɔ ŋkɔ ɖe sea te be, amesiame, si abia nu mawu alo amegbetɔ bubu aɖe le ŋkeke blaetɔ̃ me, eye menye tso wò fia si ko o la, woatsɔe aƒu gbe ɖe dzatawo ƒe do me oa?” Dario ɖo eŋu be: “Nya la le eme ɖe Mediatɔwo kple Persiatɔwo ƒe se, si metrɔna o la nu.” Azɔ nugbeɖolaawo yi nyaa gbɔ tẽ enumake. “Daniel, amesi nye Yuda ƒe aboyoviawo dometɔ ɖeka la, meléa [fɔ] ɖe fia la kple se, si te wòŋlɔ ŋkɔ ɖo la ŋu o, eye wòdoa gbe ɖa gbe ɖeka zi etɔ̃.”—Daniel 6:13, 14.
14. Anɔ eme be nukatae tatɔawo kple amegãawo gblɔ be Daniel tso “Yuda ƒe aboyoviawo” dome?
14 Eɖe dzesi be tatɔawo kple amegãawo gblɔ be Daniel tso “Yuda ƒe aboyoviawo” dome. Anɔ eme be wodi be yewoate gbe ɖe edzi be Yudatɔ kluvi koe Daniel sia si Dario tsɔ ɖo nɔƒe kɔkɔ la nye. Woxɔe se be esi wòle alea ta la, ele be wòawɔ ɖe sea dzi kokoko—eɖanye aleke ke fia la bunɛ o!
15. (a) Aleke Dario wɔ nu ɖe nya si tatɔawo kple amegãawo tsɔ va egbɔe ŋu? (b) Aleke tatɔawo kple amegãawo gaɖe alesi womebua Daniel o fiae?
15 Ðewohĩ tatɔawo kple amegãawo nɔ mɔ kpɔm be fia la aɖo yewoƒe numekuku ayetɔe la teƒe na yewo. Ne nenemae la, ke woda ƒu. Nya si wotsɔ vɛ la ɖe fu na Dario vevie. Le esi teƒe be Dario nado dɔmedzoe ɖe Daniel ŋu alo wòaɖe gbe enumake be woatsɔe aƒu gbe ɖe dzatawo ƒe do me la, enɔ agbagba dzem ŋkeke bliboa katã be yeaɖee. Gake naneke medo tso eƒe agbagbadzedzeawo me o. Eteƒe medidi o nugbeɖolawo trɔ va, eye ŋu menɔ wo kpem o wobia be woawu Daniel.—Daniel 6:15, 16.
16. (a) Nukata Dario de bubu Daniel ƒe Mawu ŋu? (b) Mɔkpɔkpɔ kae nɔ Dario si ɖe Daniel ŋu?
16 Dario kpɔe be wɔna aɖeke megale ye ŋu le nyaa me o. Womate ŋu atrɔ se la o, eye womate ŋu atsɔ Daniel ƒe “dzidada” hã akee o. Nya si katã Dario te ŋu gblɔ na Daniel koe nye be “wò Mawu, si nèsubɔna atraɖi la neɖe wò!” Edze abe Dario dea bubu Daniel ƒe Mawu ŋu ene. Yehowae na Daniel te ŋu gblɔ Babilon ƒe anyidzedze ɖi. Mawu tsɔ “gbɔgbɔ triakɔ” aɖe hã na Daniel si na wòto vovo tso tatɔ bubuawo gbɔ. Ðewohĩ Dario nya be Mawu sia ke ɖe sɔhɛ Hebri-vi etɔ̃ tso kpodzo bibi me. Anɔ eme be Dario kpɔ mɔ be fifia Yehowa aɖe Daniel, elabena fia la mete ŋu trɔ se si te wòde asii la o. Eyata wotsɔ Daniel ƒu gbe ɖe dzatawo ƒe do me.c Emegbe “womli kpe va ɖo do la nu, eye fia la tsɔ eƒe ŋkɔsigɛ kple eƒe amegãwo ƒe ŋkɔsigɛ tre enu, be nya bubu aɖeke magadzɔ ɖe Daniel dzi o.”—Daniel 6:17, 18.
NUWO VA TRƆ BUBUI NUKUTƆE
17, 18. (a) Nukae ɖee fia be Daniel ƒe nya te ɖe Dario dzi? (b) Nukae dzɔ esime fia la trɔ yi dzatawo ƒe doa gbɔ le ŋufɔke?
17 Dario si lé blanui la trɔ yi eƒe fiasã me. Womekplɔ haƒola aɖeke vɛ nɛ o, elabena modzakaɖeɖe medzroe kura o. Ke boŋ Dario nɔ ŋu zã bliboa katã hetsi nu dɔ. ‘Etsi zãdomadɔlɔ̃e.’ Le fɔŋli me la, Dario ɖe abla yi dzatawo ƒe doa gbɔ. Etsɔ avisimegbe do ɣli be: “Daniel, wò Mawu gbagbe la subɔla, ɖe wò Mawu, si nèsubɔna atraɖi la, te ŋu ɖe wò tso dzatawo si mea?” (Daniel 6:19-21) Ewɔ nuku nɛ—eye eƒe dzi dze eme ŋutɔ—esime wòɖo eŋu nɛ!
18 “Fia nenɔ agbe tegbee!” Daniel do gbe nɛ alea tsɔ ɖee fia be yemelé fia la ɖe fu me o. Ekpɔe dze sii be menye Dario gbɔe yeƒe yometitia tso o ke tatɔ kple amegã ŋuʋãlaawo gbɔe wòtso. (Tsɔe sɔ kple Mateo 5:44; Dɔwɔwɔwo 7:59.) Daniel yi edzi be: “Nye Mawu dɔ eƒe dɔla ɖa wòde ga nu na dzatawo, be womewɔ nanekem o, elabena nyemeɖi fɔ le eŋku me o, eye nyemeɖi fɔ le wò fia ŋku me hã o.”—Daniel 6:22, 23.
19. Aleke tatɔawo kple amegãawo ble Dario wòwɔ woƒe ɖoɖo dzi na woe?
19 Aleke gbegbe nya mawo anya tɔ Dario ƒe dzitsinyae nye si! Enya xoxo be Daniel mewɔ naneke si ta woatsɔe aƒu gbe ɖe dzatawo ƒe do me ɖo o. Dario nya nyuie be ɖe tatɔawo kple amegãawo ɖo nugbe ɖe Daniel ŋu be yewoawui eye be woto fia dzi be yewoaɖo yewoƒe ɖokuitɔdidi ƒe taɖodzinua gbɔ. Esi wote tɔ ɖe edzi be “fiaɖuƒe la ƒe tatɔwo katã” ye doe ɖa be woade sea ta la, wona wòdze abe ɖe yewotsɔ nya la ɖo Daniel hã ŋkume ene. Dario atu nu kple ŋutsu ayemenuwɔla siawo emegbe. Gake gbã la, eɖe gbe be woaɖe Daniel le dzatawo ƒe do la me. Nukutɔe la, abi ɖeka pɛ hã menɔ Daniel ŋu o!—Daniel 6:24.
20. Nukae dzɔ ɖe Daniel ƒe futɔ vɔ̃edinamelaawo dzi?
20 Fifia si Daniel le dedie la, Dario trɔ ɖe dɔ bubu aɖe wɔwɔ ŋu. “Fia la de se be, woatsɔ ŋutsu, siwo tso Daniel nu, wo viwo kple wo srɔ̃wo aƒu gbe ɖe dzatawo ƒe do la me; ke womekpɔ ɖo do la gɔme hafi dzatawo tso wo xɔ, eye wogbã woƒe ƒuwo katã o.”d—Daniel 6:25.
21. Vovototo kae nɔ Mose ƒe Sea kple blemadukɔ aɖewo ƒe sewo dome le nuwɔwɔ kple nuvɔ̃wɔlawo ƒe ƒometɔwo me?
21 Ðewohĩ nugbeɖolawo wuwu kpe ɖe wo srɔ̃wo kple wo viwo ŋu adze tohehe si sesẽ akpa. Se si Mawu tsɔ na to nyagblɔɖila Mose dzi ya gblɔ be: “Megawu fofowo kpe ɖe viwo ŋu o, eye megawu viwo kpe ɖe fofowo ŋu o, ke boŋ amesiame naku ɖe eƒe nuvɔ̃ ta.” (Mose V, 24:16) Gake le blemadukɔ aɖewo me la, enye nusi bɔ be woawu ƒomea me tɔwo akpe ɖe nuvɔ̃wɔla la ŋu, ne hlɔ̃ gãe wòdo. Ðewohĩ wowɔa esia kple susu be ƒome ma me tɔwo magate ŋu abia hlɔ̃ emegbe o. Gake Daniel ƒe asi menɔ afɔ sia si woɖe ɖe tatɔawo kple amegãawo ŋu la me o. Anɔ eme be exa nu ɖe dzɔgbevɔ̃e si ŋutsu vlo siawo he va woƒe ƒomewo dzii la ta.
22. Se yeye kae Dario ɖe gbeƒãe?
22 Tatɔ kple amegã tamevɔ̃ɖolaawo megali o. Dario ɖe gbeƒã nya aɖe si gblɔ be: “Nyee de se be, Daniel ƒe Mawu nadzi ŋɔ, eye woavɔ̃e le nye dziɖuɖu ƒe fiaɖuƒe blibo la me, elabena Mawu gbagbe wònye, eye wòli tegbee, eƒe fiaɖuƒe nu meyina o, eye eƒe dziɖuɖu li vaseɖe nuwuwu. Eɖea ame, eye wòxɔna na ame, ewɔa dzesiwo kple nukunuwo le dziƒo kple anyigba dzi, eyae nye amesi ɖe Daniel tso dzatawo si me.”—Daniel 6:26-28.
SUBƆ MAWU ƔESIAƔI
23. Kpɔɖeŋu kae Daniel ɖo le eƒe ŋutilãmedɔ wɔwɔ me, eye aleke míanɔ abe eyama ene?
23 Daniel ɖo kpɔɖeŋu nyui aɖe ɖi na Mawu subɔla siwo katã li le egbeŋkekea me. Fɔɖiɖi menɔ eƒe agbenɔnɔ ŋu ɣeaɖekeɣi o. Le Daniel ƒe ŋutilãmedɔ wɔwɔ me la, “eɖi anukware, eye womekpɔ vototo alo nu gbegblẽ wɔwɔ le eŋu o.” (Daniel 6:5) Nenema ke wòle be Kristotɔ nawɔ dɔ sesĩe le eƒe dɔwɔƒe. Esia mefia be wòanye dɔwɔla sẽŋuta si tia ŋutilãmekesinɔnuwo yome vevie alo amesi ŋea aɖaba ƒua ame bubuwo ƒe nyonyo dzi be yeakpɔ ŋgɔyiyi le dɔwɔƒe o. (Timoteo I, 6:10) Ŋɔŋlɔawo bia be Kristotɔ nawɔ eƒe ŋutilãmedɔwo le anukwareɖiɖi me eye wòawɔe tso dzi blibo me ‘abe Yehowa ye wòle ewɔm na ene.’—Kolosetɔwo 3:22, 23; Tito 2:7, 8; Hebritɔwo 13:18.
24. Aleke Daniel gbe tanana le tadedeagu ƒe nya la mee?
24 Daniel mena ta le eƒe tadedeagu me o. Amewo nya be edoa gbe ɖa ɣesiaɣi. Tsɔ kpe ɖe eŋu la, tatɔawo kple amegãawo nya nyuie be Daniel mefena le eƒe tadedeagu ŋu o. Le nyateƒe me la, woka ɖe edzi be ayi edzi alé ɖoɖo ma me ɖe asi ne wode se ɖe enu hã. Kpɔɖeŋu nyui kae nye si wònye na egbeŋkekea me Kristotɔwo! Wonya woawo hã be wotsɔa Mawu ƒe tadedeagu ɖoa nɔƒe gbãtɔ. (Mateo 6:33) Ele be eteƒekpɔlawo nate ŋu ade dzesi esia bɔbɔe, elabena Yesu de se na eyomedzelawo be: “Mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.”—Mateo 5:16.
25, 26. (a) Nya kae ɖewohĩ ame aɖewo agblɔ le alesi Daniel wɔ nui ŋu? (b) Nukata Daniel bu tɔtrɔ si wòawɔ le ɖoɖo si dzi wòzɔna ɖo ŋu be enye tanana?
25 Ðewohĩ ame aɖe agblɔ be ne Daniel ɖe wòdo gbe ɖa na Yehowa le bebeme ŋkeke 30 mawo la, anye ne womati eyome hafi o. Elabena menye ɖe wobia be ame nanɔ nɔnɔme tɔxɛ aɖe me alo anɔ teƒe aɖe kokoko hafi Mawu nase eƒe gbedodoɖa o. Ete ŋu kpɔa ame ƒe dzimesusuwo gɔ̃ hã. (Psalmo 19:15) Gake Daniel bu tɔtrɔ ɖesiaɖe si wòawɔ le nusi wòwɔna ɖaa me be enye tanana. Nukatae?
26 Esi ame geɖe nya be Daniel doa gbe ɖa gbesiagbe la, aleke woabu ne wòva dzudzɔ kpata? Eteƒekpɔlawo ate ŋu agblɔ be vɔvɔ̃nɔtɔe Daniel nye eye be fia ƒe sededea kpe Yehowa ƒe se dzi. (Psalmo 118:6) Gake Daniel to eƒe nuwɔnawo dzi ɖee fia be Yehowa ɖeɖekoe yetsɔ ye ɖokui na. (Mose V, 6:14, 15; Yesaya 42:8) Gake Daniel medo vlo fia ƒe sededea amemabumabutɔe le esia wɔwɔ me o. Ke hã mena ta le vɔvɔ̃ ta o. Ðeko Daniel yi edzi do gbe ɖa le eƒe xɔtaxɔ me “abe alesi wòwɔna tsã ene” hafi fia va de sea.
27. Aleke Mawu subɔla siwo li egbea ate ŋu anɔ abe Daniel ene le (a) ɖokuibɔbɔ na dziɖuɖuwo me? (b) toɖoɖo Mawu si nye dziɖula wu amewo me? (d) agbagbadzedze be woanɔ anyi kple amewo katã le ŋutifafa me la me?
27 Mawu subɔla siwo li egbea ate ŋu asrɔ̃ nu tso Daniel ƒe kpɔɖeŋua me. Woyia edzi ‘bɔbɔa wo ɖokui na dziɖuɖu siwo ŋusẽ li na,’ hewɔa dukɔ si me wole ƒe sewo dzi. (Romatɔwo 13:1) Gake ne amegbetɔ ƒe sewo tsi tre ɖe Mawu tɔ ŋu la, Yehowa ƒe amewo wɔa nu abe alesi Yesu ƒe apostolowo wɔe ene, amesiwo gblɔ dzinɔameƒotɔe be: “Ele be, woabu Mawu awu amewo.” (Dɔwɔwɔwo 5:29) Kristotɔwo mewɔa esia tsɔ dea tsitretsiɖeŋu alo aglãdzedze ƒe dzi ƒo o. Woƒe taɖodzinu boŋue nye be ŋutifafa nanɔ yewo kple amewo katã dome bene “[yewoanɔ] anyi kpoo le ŋutifafa me le mawuvɔvɔ̃ . . . me.”—Timoteo I, 2:1, 2; Romatɔwo 12:18.
28. Aleke Daniel subɔ Yehowa ‘atraɖii’?
28 Dario gblɔ zi eve be Daniel subɔa Mawu “atraɖi.” (Daniel 6:17, 21) Aramgbe me nya si me nya si gɔme woɖe be “atraɖi” tso la fia be “nu nanɔ xlã ƒom.” Efia nusi yia edzi ɖe ɖoɖo nu matɔmatɔe, alo nusi yia edzi ɖaa. Nenemae Daniel ƒe nuteƒewɔwɔ nɔ. Ewɔe wòto mɔ ɖeka. Ne Daniel dze ŋgɔ dodokpɔwo, eɖanye gãwo alo suewo o la, ɖikeke menɔa nusi wòawɔ ŋu o. Eléa nusi gɔme wòɖo anyi xoxo ƒe bla nanewo va yi la me ɖe asi—si nye nuteƒewɔwɔ kple anukwareɖiɖi na Yehowa.
29. Vi kae Daniel ƒe agbenɔnɔ nuteƒewɔwɔtɔe ate ŋu aɖe na Yehowa subɔla siwo li egbea?
29 Mawu subɔla siwo li le egbeŋkekea me hã di be yewoawɔ nu abe Daniel ene. Le nyateƒe me la, apostolo Paulo xlɔ̃ nu Kristotɔwo katã be woalé ŋku ɖe mawuvɔ̃la siwo nɔ anyi le blema ƒe kpɔɖeŋu ŋu. To xɔse me la, “wowɔ dzɔdzɔenyenyedɔwo, woxɔ ŋugbedodowo,” eye—edze ƒã be Daniel ye wòwɔnɛ esi wògblɔ be—“womiã nu na dzatawo.” Mina mí Yehowa subɔla siwo li egbea míaɖe xɔse afia ahawɔ nu wòato mɔ ɖeka abe Daniel ene eye “míatsɔ dzidodo anɔ dudimekeke, si woɖo na mí la dzi.”—Hebritɔwo 11:32, 33; 12:1.
[Etenuŋɔŋlɔwo]
a Blemanuŋlɔɖi siwo ɖee fia be lã wɔadãwo nɔƒe nɔ Ɣedzeƒetɔwo ƒe fia geɖe si la ɖo kpe edzi be “dzatawo ƒe do” nɔ Babilon.
b Xɔtaxɔ nye ame ŋutɔ ƒe xɔ si me wònɔna ne medi be ame aɖeke naɖe fu na ye o.
c Dzatawo ƒe do la ate ŋu anye teƒe aɖe si le to me si ƒe nugbɔ le etame. Ate ŋu anɔ eme hã be ʋɔtruwo alo kpɔtɔtɔ nɔ eŋu si woate ŋu akɔ ɖe dzi be lãawo nate ŋu age ɖe eme.
d Nya ‘tso ame nu’ nye Aramgbe me nyagbɔgblɔ aɖe gɔmeɖeɖe si ate ŋu afia hã be “wozɔ ame ŋu.” Esia ɖe alesi gbegbe Daniel ƒe futɔwo ɖo tame vɔ̃e fia.
NUKAWO GƆMEE NÈVA SE?
• Nukata Mediatɔ Dario ɖoe be yeana ɖoƒe kɔkɔ Daniel?
• Nugbe vɔ̃ɖi kae tatɔawo kple amegãawo ɖo? Aleke Yehowa ɖe Daniel tso emee?
• Nukae nèsrɔ̃ tso ŋkuléle ɖe kpɔɖeŋu si Daniel ɖo le nuteƒewɔwɔ me ŋu?
[Nɔnɔmetata si xɔ axa 114]
[Nɔnɔmetata si xɔ axa 121]
[Nɔnɔmetata si le axa 127]
Daniel subɔ Yehowa “atraɖi.” Èsubɔnɛ nenemaa?