Ta Asiekelia

Amekae Aɖu Xexeame Dzi?

 1-3. Ƒo nu tso drɔ̃e si Daniel ku kple ŋutega siwo wòkpɔ le Belsazar ƒe dziɖuɖu ƒe ƒe gbãtɔ me ŋu.

FIFIA Daniel ƒe nyagblɔɖi si hea ame ƒe susu la gakplɔ mí yi megbemegbe va ɖo Babilon Fia Belsazar ƒe ƒe gbãtɔ me. Ɣeyiɣi didi aɖee nye sia si Daniel nye aboyome le Babilon, gake megbɔdzɔ le eƒe nuteƒewɔwɔ na Yehowa me gbeɖe o. Fifia si nyagblɔɖila nuteƒewɔla la xɔ ƒe 70 kple edzivɔ la, “[eku] drɔ̃e, eye wòkpɔ ŋutega le eƒe aba dzi.” Eye aleke gbegbe ŋutega mawo do ŋɔdzi nɛ enye si!—Daniel 7:1, 15.

² Daniel gblɔ be: “Mekpɔ . . . dziƒo ƒe ya eneawo lɔ atsiaƒu gã la ɖe nu. Lã gã ene do tso atsiaƒu la me, eye woto vovo tso wo nɔewo gbɔ.” Lã ɖedzesi kawo gbegbee nye si wonye! Gbãtɔ nye dzata si to aʋala, eye evelia ɖi sisiblisi. Lãkle si to aʋala ene kple ta ene kplɔ wo ɖo! Lã enelia si sesẽ ŋutɔ la to gaɖu gãwo kple dzo ewo. Dzo “sue” aɖe si “to ŋku abe amegbetɔ ƒe ŋku ene” eye “nu, si gblɔa nya gãwo” li nɛ la to ɖe eƒe dzo ewoawo dome.—Daniel 7:2-8.

³ Daniel ƒe ŋutega la va trɔ ɖe dziƒo ŋu. Amegã Ðeɖi la bɔbɔ nɔ fiazikpui dzi le ŋutikɔkɔe me hezu Ʋɔnudrɔ̃la le Ʋɔnu si woɖi le dziƒo la me. “Ame akpe teƒe akpe le esubɔm, eye ame akpe ewo teƒe akpe ewo tsi tre ɖe egbɔ.” Edrɔ̃ fɔbuʋɔnu lãawo hexɔ dziɖulanyenye le wo si eye wòtsrɔ̃ lã enelia. Wotsɔ “dukɔwo katã, anyigba dzi dukɔwo kple gbegbɔgblɔwo” dzi ɖuɖu de asi na ‘ame aɖe si le abe amegbetɔvi ene.’—Daniel 7:9-14.

 4. (a) Ameka ŋue Daniel trɔ ɖo be yease nyaa me nyuie? (b) Nukata nusi Daniel kpɔ hese le zã ma me le vevie na mí?

⁴ Daniel gblɔ be: “Nye gbɔgbɔ tsi dzi le menye, eye ŋutega, si mekpɔ la, do ŋɔdzi nam.” Eyata ‘ebia nya’ mawudɔla aɖe “le nusiawo katã ŋu tsitotsito.” Mawudɔla la hã ‘ɖe nya siawo gɔme nɛ.’ (Daniel 7:15-28) Nusi Daniel kpɔ hese le zã ma me ka mí vevie, elabena eƒo nu tso etsɔme xexemenudzɔdzɔ siwo aɖo míaƒe ɣeyiɣia me, esime woatsɔ “dukɔwo katã, anyigba dzi dukɔwo kple gbegbɔgblɔwo” dzi ɖuɖu ade asi na ‘ame aɖe si le abe amegbetɔvi ene’ la ŋu. Mawu ƒe Nya kple eƒe gbɔgbɔ akpe ɖe míawo hã ŋu be míase nyagblɔɖi ƒe ŋutega siawo gɔme.a

LÃ ENE DO TSO ATSIAƑU ME

 5. Nukae atsiaƒu si ya lɔ ɖe enu la nye kpɔɖeŋu na?

⁵ Daniel gblɔ be: “Lã gã ene do tso atsiaƒu la me, eye woto vovo tso wo nɔewo gbɔ.” (Daniel 7:3) Nuka ƒe kpɔɖeŋue wotsɔ atsiaƒu si ya lɔ ɖe enu la wɔ? Le ƒe geɖe megbe la, apostolo Yohanes kpɔ lã wɔadã aɖe si ta adre li na wòdo tso “atsiaƒu” me. Atsiaƒu ma tsi tre ɖi na “dukɔwo kple amehawo kple xexemedukɔwo kpakple gbegbɔgblɔwo”—si nye ameƒomea me tɔ gbogbo aɖewo siwo te wo ɖokui ɖa tso Mawu gbɔ. Eyata atsiaƒua nye ameƒomea me tɔ geɖe siwo tra tso Mawu gbɔ ƒe kpɔɖeŋu si sɔ.—Nyaɖeɖefia 13:1, 2; 17:15; Yesaya 57:20.

 6. Nuka ƒe kpɔɖeŋue lã eneawo nye?

⁶ Mawudɔla la gblɔ be: “Lã gã eneawo nye fia ene, siwo le anyigba dzi va ge.” (Daniel 7:17) Mawudɔla la gblɔe wòdze ƒã be lã ene siwo Daniel kpɔ la nye “fia ene.” Eyata lã siawo tsi tre ɖi na xexemefiaɖuƒewo. Gake fiaɖuƒe kawoe?

 7. (a) Nya kae Biblia ŋuti numeɖela aɖewo gblɔ le Daniel ƒe drɔ̃e kple ŋutega le lã eneawo ŋu kpakple Fia Nebukadnezar ƒe drɔ̃e si ku ɖe legba gã aɖe ŋu la ŋuti? (b) Nukae legba la ƒe akpa ene siwo nye ga dometɔ ɖesiaɖe tsi tre ɖi na?

⁷ Biblia ŋuti numeɖela geɖe ƒoa nu tso Daniel ƒe drɔ̃e me ŋutega si ku ɖe lã ene ŋu la ŋuti tsɔ tɔa Nebukadnezar ƒe drɔ̃e si ku ɖe legba gã aɖe ŋu. Le kpɔɖeŋu me, The Expositor’s Bible Commentary gblɔ be: “[Daniel] ta 7 lia me nyawo sɔ kple ta 2 lia me nyawo.” The Wycliffe Bible Commentary gblɔ be: “Ame geɖe lɔ̃ ɖe edzi be Dukɔwo ƒe dziɖuɖu ene siwo kplɔ wo nɔewo ɖo . . . le afisia [le Daniel ta 7 lia me] la ke mee wodzro le [Daniel] ta 2 lia me.” Xexemefiaɖuƒe ene siwo wotsɔ ga ƒomevi ene wɔ kpɔɖeŋu na le Nebukadnezar ƒe drɔ̃ea me woe nye Babilon Fiaɖuƒe (ta si nye sika ta), Medo-Persia (akɔta kple abɔwo siwo nye klosalo), Hela (ƒodo kple ali siwo nye akɔbli), kple Roma Fiaɖuƒe (ata siwo nye gayibɔ).b (Daniel 2:32, 33) Mina míakpɔ alesi fiaɖuƒe siawo sɔ ɖe lã gã ene siwo Daniel kpɔ nui ɖa.

EWƆA ADÃ ABE DZATA ENE EYE WÒÐEA ABLA ABE HƆ̃ ENE

 8. (a) Aleke Daniel ɖɔ lã gbãtɔ lae? (b) Fiaɖuƒe kae lã gbãtɔa tsi tre ɖi na, eye aleke wòwɔ nu abe dzata ene?

⁸ Lã dziŋɔ kawoe nye si Daniel kpɔ! Eƒo nu tso ɖeka ŋu be: “Gbãtɔ ɖi dzata, eye wòto aʋala abe hɔ̃ ene; meɖe ŋku ɖee, vaseɖe esime wotu aʋala le eŋu, eye wokɔe dzi tso anyigba hetsɔe ɖo afɔ dzi abe amegbetɔ ene, eye wona ame ƒe dzii.” (Daniel 7:4) Lã sia tsi tre ɖi na dziɖuɖu ma ke si legba gã la ƒe ta si nye sika tsi tre ɖi na, si nye Babilonia Xexemefiaɖuƒe (ƒe 607-539 D.M.Ŋ.). Babilon si le abe “dzata” lénu ene la vuvu dukɔwo kple Mawu ƒe amewo adãtɔe. (Yeremya 4:5-7; 50:17) “Dzata” sia ɖe abla abe ɖe hɔ̃ ƒe aʋalawoe le esi ene hetsɔ akpasesẽ xɔ anyigbawoe.—Konyifahawo 4:19; Xabakuk 1:6-8.

 9. Aleke lã si le abe dzata ene ƒe nɔnɔme va trɔe, eye aleke esiawo wɔ dɔ ɖe edzii?

⁹ Le ɣeyiɣi aɖe megbe la, ‘wotu’ dzata ɖedzesi si to aʋala la ƒe ‘aʋalawo.’ Esi Fia Belsazar ƒe dziɖuɖu nɔ enu wum la, Babilon megate ŋu ɖua aʋa dzi le ablaɖeɖe me o eye ŋusẽ si wòkpɔ ɖe dukɔwo dzi abe dzata ene la hã bu. Eƒe ablaɖeɖe va nɔ abe amegbetɔ si zɔna le afɔ eve dzi tɔ ko ene. Esi wotsɔ ‘ame ƒe dzi’ nɛ ta la, eva gbɔdzɔ. Esi “dzata ƒe dzi” meganɔ Babilon si o ta la, megate ŋu wɔa nu abe fia si “le gbemelãwo dome” ene o. (Tsɔe sɔ kple Samuel II, 17:10; Mixa 5:7.) Lã gã bubu aɖe va ɖu edzi.

EÐUA NU NYAMANYAMA ABE SISIBLISI ENE

10. Fia kawoe “sisiblisi” la nye kpɔɖeŋu na?

¹⁰ Daniel gblɔ be: “Lã evelia ɖi sisiblisi, eye wotsɔe ɖo go ɖeka me; agbaƒuti etɔ̃ le nu me nɛ le eƒe aɖuwo dome, eye wogblɔ nɛ bena: Tso naɖu lã geɖe!” (Daniel 7:5) Fia si “sisiblisi” la nye kpɔɖeŋu na la kee legba gã la ƒe akɔta kple abɔ siwo nye klosalo la tsi tre ɖi na—si nye Medo-Persia fiawo (ƒe 539-331 D.M.Ŋ.) si dze egɔme tso Mediatɔ Dario kple Kores Gãtɔ dzi heva wu enu ɖe Dario III dzi.

11. Nukae kpɔɖeŋusisiblisi la tsɔtsɔ ɖo go ɖeka me kple agbaƒuti etɔ̃ siwo le eƒe nu me la fia?

¹¹ Wotsɔ kpɔɖeŋu sisiblisi la ‘ɖo go ɖeka me,’ ɖewohĩ be wòadzra ɖo adze dukɔwo dzi ahaɖu wo dzi ale be wòazu xexemefiaɖuƒe. Alo ate ŋu anye be woɖoe be ɖoƒe sia nafia be fia siwo anye Persiatɔwo akpɔ ŋusẽ ɖe Dario si ɖeka koe nye fia si nye Mediatɔ la dzi. Agbaƒuti etɔ̃ siwo le sisiblisi la ƒe aɖuwo dome ate ŋu afia nuto etɔ̃ siwo me wòɖo tae heɖu aʋa dzi le. Medo-Persia ƒe “sisiblisi” la yi dziehe hexɔ Babilon le ƒe 539 D.M.Ŋ. me. Emegbe eyi ɣetoɖoƒe gome va to Asia Sue hetɔ dzi yi Thrace. Mlɔeba la, “sisiblisi” la ɖo ta anyiehe va ɖu Egipte dzi. Esi xexlẽme etɔ̃ tsia tre ɖi na nusi de to ɣeaɖewoɣi ta la, ɖewohĩ agbaƒuti etɔ̃awo te gbe ɖe kpɔɖeŋu sisiblisia ƒe ŋukeklẽ ɖe aʋadziɖuɖu ŋu hã dzi.

12. Nukae va dzɔ esi kpɔɖeŋusisiblisi la wɔ ɖe sedede sia dzi be: “Tso naɖu lã geɖe”?

¹² “Sisiblisi” la dze dukɔwo dzi tsɔ wɔ ɖe nya siawo dzi be: “Tso naɖu lã geɖe!” Esi Medo-Persia ɖu Babilon dzi abe alesi Mawu dii ene la, mɔnukpɔkpɔ su esi be wòawɔ dɔ vevi aɖe na Yehowa ƒe amewo. Eye ewɔe hã! (Kpɔ “Fiagã si ƒe Nya me Mesẽ O,” le axa 149.) Medo-Persia na ablɔɖe Yudatɔ aboyomewo tso Babilon to Kores Gãtɔ, Dario I, (Dario Gãtɔ), kple Artaxsasta I dzi eye wòkpe ɖe wo ŋu wogbugbɔ Yehowa ƒe gbedoxɔa tu eye wodzra Yerusalem ƒe gliwo ɖo. Le ɣeyiɣi aɖe megbe la, Medo-Persia va ɖu nuto 127 dzi, eye Fianyɔnu Ester srɔ̃ Axasweros (Xerxes I) nye “fia tso India vaseɖe [Etiopia, NW ].” (Ester 1:1) Gake lã bubu ava ɖe eyome.

EÐEA ABLA ABE LÃKLE SI TO AƲALA ENE!

13. (a) Nukae lã etɔ̃lia nye kpɔɖeŋu na? (b) Nya kae míate ŋu agblɔ le lã etɔ̃lia ƒe ablaɖeɖe kple anyigba siwo wòxɔ ŋu?

¹³ Lã etɔ̃lia “[ɖi] lãkle, eye wòto aʋala ene ɖe mẽdome abe xevi ene; lã la to ta ene, eye wona ŋusẽe.” (Daniel 7:6) Lãkle sia si to aʋala ene kple ta ene—si sɔ kple Nebukadnezar ƒe drɔ̃e me legba la ƒe ƒodo kple ali siwo nye akɔbli—la tsi tre ɖi na Makedonia, alo Hela, fiawo tso Alexander Gãtɔ dzi. Alexander tsɔ zazã kple ablaɖeɖe si ɖi lãkle tɔ ho aʋa to Asia Sue, eɖo Egipte le anyiehe gome, eye wòtɔ edzi yi India le ɣetoɖoƒe gome. (Tsɔe sɔ kple Xabakuk 1:8.) Eƒe dziɖuƒe keke ta wu “sisiblisi” la tɔ, elabena exɔ Makedonia, Hela, kple Persia Fiaɖuƒea.—Kpɔ “Fia Ðekakpui aɖe Ðu Xexeame Dzi,” le axa 153.

14. Aleke wòdzɔe be “lãkle” la va to ta ene?

¹⁴ “Lãkle” la va to ta ene le Alexander ƒe ku le ƒe 323 D.M.Ŋ. megbe. Eƒe aʋafia ene va xɔ ɖe eteƒe mlɔeba le eƒe dziɖuƒea ƒe akpa vovovowo. Seleucus xɔ Mesopotamia kple Siria. Ptolemy ɖu Egipte kple Palestina dzi. Lysimachus ɖu fia ɖe Asia Sue kple Thrace dzi, eye Makedonia kple Hela va zu Cassander tɔ. (Kpɔ “Womã Fiaɖuƒe Gã aɖe Me,” le axa 162.) Emegbe afɔku bubu aɖe gadzɔ.

LÃ ÐIVƆVƆ̃ AÐE SI TO VOVO

15. (a) Ƒo nu tso lã enelia ŋu. (b) Nukae lã enelia tsi tre ɖi na, eye aleke wògbã nu hefanya nusianu le eƒe mɔ mee?

¹⁵ Daniel ɖɔ lã enelia be “ŋɔdzi kple vɔvɔ̃ le eŋu, eye wòsesẽ ŋutɔ.” Eyi edzi be: “Eto gaɖu kakowo, eɖu nu gbã nu, eye wòfanya mamlea kple afɔ, eto vovo tso lã, siwo katã do ŋgɔ nɛ la gbɔ, eye wòto dzo ewo.” (Daniel 7:7) Lã dziŋɔ sia nye Roma ƒe dunyahehe kple asrafo ŋusẽ le eƒe gɔmedzedze. Vivivi la, exɔ Hela Fiaɖuƒe si womã ɖe akpa ene me la eye kaka ƒe 30 D.M.Ŋ. naɖo la, Roma va zu xexemefiaɖuƒe si kplɔe ɖo le Biblia ƒe nyagblɔɖi me. Roma Fiaɖuƒea zã asrafoŋusẽ ɖu nusianu si wòdo goe dzi eye mlɔeba eva keke ta hexɔ tso Britain Ƒukpowo dzi va to Europa ƒe akpa geɖe, Mediterranea-nutoa katã, kple Babilon godo ɖo keke Persia Ƒukɔme ke.

16. Nya kae mawudɔla la gblɔ le lã enelia ŋu?

¹⁶ Esi Daniel di be yeanya nu tso lã sia si ŋu “ŋɔdzi kple vɔvɔ̃” le ŋu tsitotsito ta la, eke to nyuie esi mawudɔla nɔ eme ɖem be: “[Eƒe] dzo ewoawo gɔme enye si: Fia ewo adzɔ le fiaɖuƒe ma me, eye bubu adzɔ ɖe wo yome ato vovo atso gbãtɔwo gbɔ, eye wòabɔbɔ fia etɔ̃ ɖe anyi.” (Daniel 7:19, 20, 24) Nukae “dzo ewo,” alo “fia ewo” siawo nye?

17. Nukae lã enelia la ƒe ‘dzo ewoawo’ tsi tre ɖi na?

¹⁷ Esi kesinɔnuwo va bɔ ɖe Roma eye agbenɔnɔ nɔ gbegblẽm ɖe edzi le dziɖuɖumegãwo ƒe agbe bliba nɔnɔ ta la, eƒe asrafoŋusẽ dzi ɖe kpɔtɔ. Le ɣeyiɣi aɖe megbe la, alesi asrafoŋusẽ meganɔ Roma ŋu o va dze ƒã. Mlɔeba la, fiaɖuƒe sesẽ ma me mã zu fiaɖuƒe geɖe. Esi Biblia zãa xexlẽme ewo tsɔ fiaa blibonyenye ta la, lã enelia la ƒe “dzo ewoawo” tsi tre ɖi na fiaɖuƒe siwo katã do tso Roma si gbã la me.—Tsɔe sɔ kple Mose V, 4:13; Luka 15:8; 19:13, 16, 17.

18. Aleke Roma yi edzi ɖu Europa dzii ƒe alafa geɖe le eƒe fiagã mamlɛtɔ ɖeɖe le zi dzi megbe?

¹⁸ Gake Roma Xexemefiaɖuƒea mewu enu ɖe eƒe fiagã mamlɛ si wòɖe le zi dzi le Roma le ƒe 476 M.Ŋ. me dzi o. Roma si dzi papa kpɔ ŋusẽ ɖo yi edzi ɖu Europa dzi le dunyahehe kple vevietɔ, mawusubɔsubɔ gome. Ewɔ esia to dziɖuɖoɖo si me aƒetɔ si le fia te ɖu Europanɔlawo ƒe akpa gãtɔ dzi le la dzi. Eye fiawo katã bɔbɔ ɖe papa la ƒe ŋusẽ te. Alea wòdzɔe be Roma Fiaɖuƒe Kɔkɔe si ƒe du vevitɔe nye Roma si nye papanɔƒe la kpɔ ŋusẽ ɖe xexemenyawo dzii le ŋutinya me ɣeyiɣi didi si woyɔ be Blukɔɣeyiɣi la me.

19. Le ŋutinyaŋlɔla aɖe ƒe nya nu la, aleke woatsɔ Roma asɔ kple fiaɖuƒe siwo do ŋgɔ nɛ?

¹⁹ Amekae malɔ̃ ɖe edzi be lã enelia la “to vovo tso bubuawo katã gbɔ” o? (Daniel 7:7, 19, 23) Ŋutinyaŋlɔla H. G. Wells ŋlɔ le esia ŋu be: “Roma-fiaɖuƒe yeye sia . . . to vovo kura tso fiaɖuƒe gã siwo nɔ anyi kpɔ le xexeame ƒe ŋkuʋuɣi vaseɖe ɣemaɣi la dometɔ ɖesiaɖe gbɔ le go geɖe me. . . . Helatɔ siwo le xexeame katã kloe nɔ ete, eye Moslem kple Yuda dukɔwo me tɔwo mesɔ gbɔ ɖe eme abe fiaɖuƒe siwo do ŋgɔ nɛ ene o . . . Enye nu yeye aɖe le ŋutinya me vaseɖe fifia . . . Roma Fiaɖuƒea keke ta ɖe edzi, wònye takeke yeye si ŋu womewɔ ɖoɖo ɖo o; Romatɔwo va nɔ fiaɖuƒe gã aɖe dzi kpɔm le manyamanya me.” Ke hã wogblɔ be nu bubu agado tso lã enelia la me.

DZO SUE AÐE VA KPƆ ŊUSẼ

20. Nya kae mawudɔla la gblɔ le dzo sue si lã enelia ato ɖe ta la ƒe dodo ŋu?

²⁰ Daniel gblɔ be: “Meɖe ŋku ɖe dzoawo, eye kpɔ ɖa, dzo sue aɖe to ɖe wo domee, dzo sia to ŋku abe amegbetɔ ƒe ŋku ene, eye nu, si gblɔa nya gãwo la, li nɛ; eye wotu eƒe dzo gbãtɔwo dometɔ etɔ̃.” (Daniel 7:8) Mawudɔla la gblɔ na Daniel le dzo sia si to ŋu be: “Bubu adzɔ ɖe wo [fia ewoawo] yome ato vovo atso gbãtɔwo gbɔ, eye wòabɔbɔ fia etɔ̃ ɖe anyi.” (Daniel 7:24) Amekae fia sia nye, ɣekaɣie wòkpɔ ŋusẽ, eye fia etɔ̃ kawoe wòbɔbɔ ɖe anyi?

21. Aleke Britain wɔ va zu lã enelia ƒe kpɔɖeŋudzo sue la?

²¹ Bu nudzɔdzɔ siawo ŋu kpɔ. Le ƒe 55 D.M.Ŋ. me la, Romatɔ Aʋafia Julius Caesar va dze Britannia dzi gake mete ŋu ɖo dziɖuɖunɔƒe ɖe afima o. Le ƒe 43 M.Ŋ. me la, Fiagã Klaudio va nɔ ŋusẽ kpɔm ɖe Britain ƒe anyiehe dzi bliboe. Emegbe le ƒe 122 M.Ŋ. me la, Fiagã Hadrian dze gli aɖe ɖoɖo gɔme tso Tyne Tɔsisia gbɔ vaseɖe Solway Tsikpeƒea, wònye Roma Fiaɖuƒea ƒe dziehe liƒo dzi. Le ƒe alafa atɔ̃lia ƒe gɔmedzedze la, Roma-ʋakɔwo dzo le ƒukpoa dzi. Ŋutinyaŋlɔla aɖe gblɔ be: “Le ƒe alafa wuiadelia me la, England va zu fiaɖuƒe tsɛ aɖe. Eƒe kesinɔnuwo nɔ sue ne wotsɔe sɔ kple Netherlands tɔ. Dukɔa me tɔwo mesɔ gbɔ de France nɔlawo nu o. Eƒe asrafowo (kple ƒudzisrafowo) ƒe ŋusẽ mede Spain tɔ nu o.” Edze ƒã be fiaɖuƒe sue aɖe ko Britain nye ɣemaɣi, si nye lã enelia ƒe kpɔɖeŋudzo sue la. Gake esia ava trɔ.

22. (a) Lã enelia la ƒe dzo etɔ̃ bubu kawo dzie dzo “sue” la ɖu? (b) Nukae Britain va zu ɣemaɣi?

²² Le ƒe 1588 me la, Spain-fia Philip II tsɔ Spain Meli Gbogbo aɖewo ho aʋa ɖe Britain ŋu. Aʋawɔmeli 130 siawo siwo tsɔ ame 24,000 kple edzivɔ to England Ƒudzimɔ Xaxɛ la, gake Britain-ƒudzisrawo ɖu wo dzi eye ya sesẽwo kple ahom sesẽ si tu le Atlantik-ƒua dzi hã gblẽ nu le wo ŋu. Ŋutinyaŋlɔla aɖe gblɔ be nudzɔdzɔ sia “mee England xɔ ƒudziʋawɔwɔ ƒe ŋusẽ le Spain si le keŋkeŋ.” Le ƒe alafa 17 lia me la, ƒudzisitsaʋu gbogbo aɖewo va nɔ Netherlandstɔwo si wu dukɔ ɖesiaɖe le xexeame. Gake esi Britain va nɔ dukɔ geɖe xɔm le ƒugodo ta la, eva kpe fiaɖuƒe ma dzi. Le ƒe alafa 18 lia me la, Britain kple France kpe aʋa le Dziehe Amerika kple India, si na wova wɔ Paris Nubabla la le ƒe 1763 me. Nuŋlɔla William B. Willcox gblɔ be nubabla sia “ɖe Britain ƒe ɖoƒe yeye fia be enye Europa-dukɔ ƒe fiaɖuƒe si keke ta gbɔ Europa-nyigba ŋu.” Britain ɖo kpe eƒe gãnyenye dzi esi wòɖu Napoléon si tso France dzi gbidii le ƒe 1815 M.Ŋ. me. Eyata “fia etɔ̃” siwo Britain ‘bɔbɔ ɖe anyi’ la nye Spain, Netherlands, kple France. (Daniel 7:24) Esia na Britain va zu dutadziɖuɖu kple asitsadukɔ si kpɔ ŋusẽ wu ɖesiaɖe le xexeame. Ẽ, dzo “sue” la tsi ɖe edzi va zu xexemefiaɖuƒe!

23. Mɔ ka nue kpɔɖeŋudzo sue la ‘ɖu anyigba bliboa’ le?

²³ Mawudɔla la gblɔ na Daniel be lã enelia, alo fiaɖuƒe enelia la “aɖu anyigba blibo la.” (Daniel 7:23) Esia va eme nyateƒe le Roma-nuto si woyɔ tsã be Britannia la gome. Eva zu Britain Fiaɖuƒea mlɔeba eye ‘wòɖu anyigba blibo la.’ Ɣeaɖeɣi la, fiaɖuƒe sia xɔ anyigba katã me mamã ene ƒe akpa ɖeka eye wòkpɔ ŋusẽ ɖe edzinɔlawo ƒe akpa enelia hã dzi.

24. Nya kae ŋutinyaŋlɔla aɖe gblɔ le alesi Britain Fiaɖuƒea to vovoe ŋu?

²⁴ Abe alesi Roma Fiaɖuƒea to vovo tso xexemefiaɖuƒe siwo do ŋgɔ gbɔe ene la, nenema ke fia si wotsɔ dzo “sue” la wɔ kpɔɖeŋu na hã ‘ato vovo tso gbãtɔawo gbɔe.’ (Daniel 7:24) Ŋutinyaŋlɔla H. G. Wells gblɔ le Britain Fiaɖuƒea ŋu be: “Etɔgbe aɖeke menɔ anyi kpɔ o. Fiaɖuƒe bliboa ƒe nu gbãtɔ kple vevitɔe nye Britain Fiaɖuƒe Wɔɖekawo ƒe ‘fiagã ƒe dukɔa’ . . . Dɔdzikpɔƒe ɖeka alo ame ɖeka aɖeke meli si te ŋu se Britain Fiaɖuƒe bliboa ƒe mɔwo me kpɔ o. Enye nu vovovowo ƒe takeke kple dzidziɖedzi si to vovo sasasã tso fiaɖuƒe ɖesiaɖe si do ŋgɔ nɛ gbɔ.”

25. (a) Nukae va zu kpɔɖeŋudzo sue la le nusiwo va dzɔ emegbe me? (b) Gɔmesese ka nue dzo “sue” la to “ŋku abe amegbetɔ ƒe ŋku ene” kple “nu, si gblɔa nya gãwo” le?

²⁵ Menye Britain Fiaɖuƒea koe dzo “sue” la nye kpɔɖeŋu na o. Le ƒe 1783 me la, Britain lɔ̃ ɖe Amerika-dutadukɔ 13 siwo nɔ eƒe dziɖuɖu te ƒe ɖokuisinɔnɔ xɔxɔ dzi. Mlɔeba kadodo va nɔ United States of America kple Britain dome, eye eva zu dukɔ sesẽtɔ kekeake le anyigba dzi le Xexemeʋa II megbe. Kadodo sesẽwo kpɔtɔ le wo kple Britain dome. Anglo-Amerika fiaɖuƒe eve ƒokpli si do tso eme lae nye ‘dzo si to ŋkuwo.’ Le nyateƒe me la, xexemefiaɖuƒe sia léa ŋku ɖe nu ŋu heɖɔa ŋu ɖo! ‘Egblɔa nya gãwo,’ si fia be eɖoa nu na xexeame ƒe akpa gã aɖe eye wònye woƒe nyanuɖela, alo “aʋatsonyagblɔɖila.”—Daniel 7:8, 11, 20; Nyaɖeɖefia 16:13; 19:20.

DZO SUE LA TSI TRE ÐE MAWU KPLE EƑE AME KƆKƆEWO ŊU

26. Nya kae mawudɔla la gblɔ ɖi le kpɔɖeŋudzoa ƒe nyagbɔgblɔ kple nuwɔna ɖe Yehowa kple esubɔlawo ŋu la ŋuti?

²⁶ Daniel yi edzi gblɔ ŋutega si wòkpɔ la be: “Meɖo ŋku anyi kpɔ be, dzo kemɛ [wɔ] aʋa kple ame kɔkɔewo, eye wòɖu wo dzi.” (Daniel 7:21) Mawudɔla la gblɔ ɖi le “dzo,” alo fia, sia ŋu be: “Agblɔ nya tovowo ɖe dziƒoʋĩtɔ la ŋu, eye wòatsrɔ̃ dziƒoʋĩtɔ la ƒe ame kɔkɔewo; aɖo ɖe ta me be, yeatrɔ ɣeyiɣiwo kple sewo, eye woatsɔ wo ade asi nɛ ɣeyiɣi ɖeka kple ɣeyiɣi eve kpakple ɣeyiɣi afã.” (Daniel 7:25) Aleke nyagblɔɖia ƒe akpa sia va emee eye ɣekaɣie wòva eme?

27. (a) Amekawoe nye ‘ame kɔkɔe’ siwo yome dzo “sue” la ti? (b) Aleke kpɔɖeŋudzo la ɖoe be “yeatrɔ ɣeyiɣiwo kple sewo”?

²⁷ ‘Ame kɔkɔe’ siwo yome dzo “sue”—Anglo-Amerika Xexemefiaɖuƒea—ti lae nye Yesu yomedzela siwo wotsɔ gbɔgbɔ si ami na siwo le anyigba dzi. (Romatɔwo 1:7; Petro I, 2:9) Ƒe geɖe do ŋgɔ na Xexemeʋa I la, amesiamina siawo ƒe ame susɔeawo xlɔ̃ nu le gaglãgbe be ‘dukɔwo ƒe ɣeyiɣi ɖoɖiwo’ awu enu le ƒe 1914 me. (Luka 21:24) Esi aʋa dzɔ le ƒe ma me la, edze ƒã be dzo “sue” la ŋe aɖaba ƒu nuxlɔ̃ame sia dzi, elabena eyi edzi nɔ fu ɖem na amesiamina ‘kɔkɔeawo.’ Anglo-Amerika Xexemefiaɖuƒe la tsi tre ɖe agbagba si wodze be yewoawɔ Yehowa ƒe nudidi (alo ‘se’) si nye be yeƒe ɖasefowo naɖe gbeƒã Fiaɖuƒe ŋuti nyanyuia le xexeame katã dzi la gɔ̃ hã ŋu. (Mateo 24:14) Dzo “sue” la to esia me te kpɔ be “yeatrɔ ɣeyiɣiwo kple sewo.”

28. Alekee nye “ɣeyiɣi ɖeka kple ɣeyiɣi eve kpakple ɣeyiɣi afã” la ƒe didime?

²⁸ Yehowa ƒe dɔla la ƒo nu tso nyagblɔɖi ƒe ɣeyiɣi si nye “ɣeyiɣi ɖeka kple ɣeyiɣi eve kpakple ɣeyiɣi afã” ŋu. Ɣeyiɣi ƒe didime kae nye ma? Biblia ŋuti numeɖela geɖe lɔ̃ ɖe edzi be nyagbɔgblɔ sia fia ɣeyiɣi etɔ̃ kple afã—si nye ɣeyiɣi ɖeka, ɣeyiɣi eve, kple ɣeyiɣi afã tsɔtsɔ ƒo ƒui. Esi Nebukadnezar ƒe tsukuku “azã adre” la nye ƒe adre ta la, ɣeyiɣi etɔ̃ kple afã la hã nye ƒe etɔ̃ kple afã.c (Daniel 4:13, 22) An American Translation xlẽ be: “Woatsɔ wo ade asi nɛ ƒe ɖeka, ƒe eve, kple ƒe afã.” James Moffatt ƒe gɔmeɖeɖea gblɔ be: “Ƒe etɔ̃ kple afã.” Woƒo nu tso ɣeyiɣi ma ke ŋu le Nyaɖeɖefia 11:2-7, si gblɔ be Mawu ƒe ɖasefowo anɔ akpanya me aɖe gbeƒã ɣleti 42, alo ŋkeke 1,260, eye woawu wo. Ɣekaɣie ɣeyiɣi sia dze egɔme eye ɣekaɣie wòwu enu?

29. Ɣekaɣie ƒe etɔ̃ kple afã si nye nyagblɔɖi la dze egɔme eye aleke wòdze egɔmee?

²⁹ Xexemeʋa I wɔɣi zu dodokpɔɣi na Kristotɔ amesiaminawo. Kaka ƒe 1914 ƒe nuwuwu naɖo la, wonɔ mɔ kpɔm be woati yewo yome. Le nyateƒe me la, ƒea ƒe mawunyakpukpui si wotia na ƒe 1915 la nye nya si Yesu bia eƒe nusrɔ̃lawo be, “Miate ŋu ano kplu, si no ge malaa?” Mateo 20:22 dzie wotui ɖo. Eyata tso December 1914 me la, ɖasefowo ƒe ƒuƒoƒo sue ma ‘nɔ akpanya me’ ɖe gbeƒã.

30. Aleke Anglo-Amerika Xexemefiaɖuƒea tɔ ŋku Kristotɔ amesiaminawo le Xexemeʋa I wɔɣii?

³⁰ Esi aʋawɔgbɔgbɔ ɖo dukɔwo me la, Kristotɔ amesiaminawo do go tsitretsiɖeŋu geɖe. Wode wo dometɔ aɖewo gaxɔ me. Dziɖuɖu sẽŋutawo wɔ funyafunya ame ɖekaɖeka siwo dometɔ aɖewoe nye Frank Platt le England kple Robert Clegg le Canada. Le February 12, 1918, dzi la, woɖo asi agbalẽ si nye Studies in the Scriptures ƒe babla adrelia si ƒe ŋkɔe nye The Finished Mystery si woɖe ɖe go eteƒe medidi o kple trakt siwo ƒe tanyae nye The Bible Students Monthly dzi le Canada si nye Britain Dziɖuƒe. Le ɣleti si kplɔe ɖo me la, U.S. Ʋɔnudrɔ̃nyadzikpɔƒea ɖe gbeƒãe be se meɖe mɔ be woamã agbalẽa ƒe babla adrelia la o. Nukae va dzɔ? Wotsa Yehowa ƒe tadeagulawo ƒe aƒewo me, woxɔ woƒe agbalẽwo, eye wolé wo de game!

31. Ɣekaɣie “ɣeyiɣi ɖeka kple ɣeyiɣi eve kpakple ɣeyiɣi afã” la wu enu eye aleke wòwu nui?

³¹ Mawu ƒe amesiaminawo yometitia ɖo eƒe sesẽaƒe le June 21, 1918, dzi esime wotso zimenɔla J. F. Rutherford kple Gbetakpɔxɔ Habɔbɔa ƒe ŋgɔnɔlawo nu alakpatɔe heka ɣeyiɣi didi aɖewo na wo be woatsɔ anɔ mɔe. Esi dzo “sue” la ɖo tame be “yeatrɔ ɣeyiɣiwo kple sewo” la, ete ŋu tsi gbeƒãɖeɖedɔ si ŋu wowɔ ɖoɖo ɖo la nu dzidzedzetɔe. (Nyaɖeɖefia 11:7) Eyata “ɣeyiɣi ɖeka kple ɣeyiɣi eve kpakple ɣeyiɣi afã” si wogblɔ ɖi la wu enu le June 1918 me.

32. Nukata nàgblɔ be dzo “sue” la metsrɔ̃ ‘ame kɔkɔeawo’ ɖa o?

³² Gake dzo “sue” la ƒe yometiti mewɔe be ‘ame kɔkɔeawo’ tsrɔ̃ o. Abe alesi wogblɔe ɖi le Nyaɖeɖefia ƒe agbalẽa me ene la, Kristotɔ amesiaminawo gagbɔ agbe hetso ɖe dɔ ŋu ake le dɔmawɔmawɔ ƒe ɣeyiɣi kpui aɖe megbe. (Nyaɖeɖefia 11:11-13) Le March 26, 1919, dzi la, woɖe asi le Gbetakpɔxɔ Habɔbɔa ƒe zimenɔla kple ehatiwo ŋu tso gaxɔ me, eye emegbe wokɔ wo ŋu tso alakpanya siwo wotsɔ ɖe wo ŋu la me. Le esia megbe teti la, amesiamina susɔeawo dze egɔme gbugbɔ ɖoɖo wɔ ɖe dɔa dzi yiyi ŋu. Gake nukae nɔ dzo “sue” la lalam?

AMEGÃ ÐEÐI LA ÐI ƲƆNU

33. (a) Amekae nye Amegã Ðeɖi la? (b) Nukae ‘agbalẽ siwo woke’ le Dziƒoʋɔnua nye?

³³ Esi woƒo nu tso lã eneawo ŋu na Daniel vɔ la, eɖe ŋku ɖa le lã enelia ŋu hetrɔ ɖe wɔna aɖe si nɔ edzi yim le dziƒo ŋu. Ekpɔ Amegã Ðeɖi la wònye Ʋɔnudrɔ̃la si bɔbɔ nɔ eƒe fiazikpui dadzo dzi. Amegã Ðeɖi la menye ame bubu aɖeke wu Yehowa Mawu o. (Psalmo 90:2) Esi woɖi Ʋɔnu le dziƒo la, Daniel kpɔe be “woke agbalẽwo.” (Daniel 7:9, 10) Esi Yehowa li tso tititi ke ta la, enya amegbetɔ ƒe ŋutinya katã abe agbalẽ mee woŋlɔe ɖo ene. Elé ŋku ɖe kpɔɖeŋulã eneawo katã ŋu eye ate ŋu anɔ te ɖe nusi eya ŋutɔ kpɔ dzi adrɔ̃ ʋɔnu wo.

34, 35. Nukae adzɔ ɖe dzo “sue” la kple lã bubuawo ƒe fiaɖuƒewo dzi?

³⁴ Daniel yi edzi be: “Meɖo ŋku anyi le nu kpɔm le nya gãgã, siwo gblɔm lãdzoa le la ta; meɖe ŋku ɖee, vaseɖe esime wowu lã la, wogblẽ eƒe kukua, eye wotɔ dzoe. Woxɔ ŋusẽ le lã mamlɛawo hã si, eye woɖo agbenɔɣi na wo vaseɖe ɣeyiɣi kple gaƒoƒo dzi.” (Daniel 7:11, 12) Mawudɔla la gblɔ na Daniel be: “Woaɖi ʋɔnu axɔ dziɖuɖu la le esi, eye woagblẽe ahatsrɔ̃e gbidigbidi.”—Daniel 7:26.

³⁵ Le Ʋɔnudrɔ̃la Gãtɔ, Yehowa Mawu, ƒe sedede nu la, nusi dzɔ ɖe Roma Fiaɖuƒe si ti Kristotɔ gbãtɔwo yome dzi la ke adzɔ ɖe dzo ma si gblɔ busunya ɖe Mawu ŋu heti eƒe “ame kɔkɔewo” yome la dzi. Woaxɔ dziɖulanyenye le esi. Nenema ke wòanɔ na ‘fia’ tsɛ siwo le abe lãdzo ene siwo do tso Roma Fiaɖuƒea me hã. Ke dziɖuɖu siwo do tso lã siwo do ŋgɔ ƒe fiaɖuƒewo me ya ɖe? Abe alesi wogblɔe ɖi ene la, woaɖe mɔ woaganɔ anyi “vaseɖe ɣeyiɣi kple gaƒoƒo dzi.” Amewo kpɔtɔ le woƒe dziɖuƒewo vaseɖe míaƒe ŋkekea me. Le kpɔɖeŋu me, blema Babilon ƒe dziɖuƒee Iraq le. Persia (Iran) kple Greece kpɔtɔ li. Xexemefiaɖuƒe siawo ƒe akpa susɔeawo hã le Dukɔ Ƒoƒuawo me. Fiaɖuƒe siawo hã atsrɔ̃ akpe ɖe xexemefiaɖuƒe mamlɛtɔ ŋu le etsrɔ̃ɣi. Woaɖe amegbetɔdziɖuɖuwo katã ɖa le “Mawu, ŋusẽkatãtɔ la, ƒe ŋkeke gã la ƒe aʋawɔwɔ” la me. (Nyaɖeɖefia 16:14, 16) Ke amekae ava ɖu xexeame dzi?

DZIÐUÐU SI ANƆ ANYI ÐAA AVA KPUIE!

36, 37. (a) Amekae nye ‘nane si le abe amegbetɔvi ene,’ eye ɣekaɣie wòdo ɖe Ʋɔnua ŋkume le dziƒo eye le tameɖoɖo ka ta? (b) Nukae woɖo anyi le ƒe 1914 M.Ŋ. me?

³⁶ Daniel gblɔ be: “Meɖo ŋku anyi le ŋutega me le zã, kpɔ ɖa, nane zɔ kple alilikpowo le abe amegbetɔ ene heva ke ɖe amegã ɖeɖi la gbɔ, eye wokplɔe yi egbɔe.” (Daniel 7:13) Esime Yesu Kristo nɔ anyigba dzi la, eyɔ eɖokui be “Amegbetɔvi,” si fia ƒomedodo si le eya kple ameƒomea dome. (Mateo 16:13; 25:31) Yesu gblɔ na Sanhedrin, alo Yudatɔwo ƒe ʋɔnudrɔ̃ƒe kɔkɔ la be: “Miele Amegbetɔvi la kpɔ ge, wòabɔbɔ nɔ anyi ɖe ŋusẽ ƒe nuɖusi me, anɔ dziƒo ƒe alilikpowo dzi gbɔna.” (Mateo 26:64) Eyata le Daniel ƒe ŋutegaa me la, amesi gbɔna si amegbetɔ ƒe ŋku mate ŋu akpɔ o, eye wòkpɔ mɔnu yi Yehowa Mawu gbɔ lae nye Yesu Kristo si wofɔ ɖe tsitre hedo ŋutikɔkɔe na. Ɣekaɣie nusia dzɔ?

³⁷ Mawu bla nu kple Yesu Kristo hena Fiaɖuƒe, abe alesi wòbla nu kple Fia Dawid ene. (Samuel II, 7:11-16; Luka 22:28-30) Esime ‘dukɔwo ƒe ɣeyiɣi ɖoɖiawo’ wu enu le ƒe 1914 M.Ŋ. me la, esɔ be Yesu Kristo si nye Dawid ƒe fiazikpui domenyila la naxɔ Fiaɖuƒedziɖuɖu. Daniel ƒe nuŋlɔɖi si nye nyagblɔɖi la xlẽ be: “Wotsɔ ŋusẽ, bubu kple dziɖuɖu nɛ, eye dukɔwo katã, anyigba dzi dukɔwo kple gbegbɔgblɔwo subɔe; eƒe dziɖuɖu li tegbee, eye enu mayi o, eye eƒe fiaɖuƒe magbã o.” (Daniel 7:14) Ale woɖo Mesia Fiaɖuƒea anyii le dziƒo le ƒe 1914 me. Gake wotsɔ dziɖuɖua na ame bubuwo hã.

38, 39. Amekae axɔ dziɖuɖu mavɔ ɖe xexeame dzi?

³⁸ Mawudɔla la gblɔ be: “Fiaɖuƒe la asu dziƒoʋĩtɔ la ƒe ame kɔkɔewo si.” (Daniel 7:18, 22, 27) Yesu Kristoe nye ame kɔkɔeawo ƒe tatɔ. (Dɔwɔwɔwo 3:14; 4:27, 30) ‘Ame kɔkɔe’ bubu siwo akpɔ gome le dziɖulanyenye mee nye Kristotɔ 144,000 siwo wotsɔ gbɔgbɔ si ami na, amesiwo nye Fiaɖuƒedomenyilawo kple Kristo. (Romatɔwo 1:7; 8:17; Tesalonikatɔwo II, 1:5; Petro I, 2:9) Wofɔa wo ɖe tsitre tso ku me wozua gbɔgbɔmenuwɔwɔ makumakuwo be woaɖu fia kple Kristo le dziƒo Zion To la dzi. (Nyaɖeɖefia 2:10; 14:1; 20:6) Eyata Kristo Yesu kple Kristotɔ amesiamina siwo wofɔ ɖe tsitre aɖu ameƒomea ƒe xexeame dzi.

³⁹ Mawudɔla la gblɔ le Amegbetɔvi la kple ‘ame kɔkɔe’ bubu siwo wofɔ ɖe tsitre ƒe dziɖuɖua ŋu be: “Woatsɔ fiaɖuƒe la, dziɖuɖu kple fiaɖuƒewo ƒe ŋusẽ le dziƒo blibo la te ana dziƒoʋĩtɔ la ƒe ame kɔkɔewo ƒe dukɔ; eƒe fiaɖuƒe anye fiaɖuƒe mavɔ, eye dziɖulawo katã asubɔe ahaɖo toe.” (Daniel 7:27) Yayra ka gbegbee nye si ameƒomea me tɔ toɖolawo akpɔ le Fiaɖuƒe ma te!

40. Vi kae toléle ɖe Daniel ƒe drɔ̃e kple ŋutegawo ŋu ate ŋu aɖe na mí?

⁴⁰ Daniel menya alesi ŋutega siwo Mawu na wòkpɔ la katã ava eme nukutɔe o. Egblɔ be: “Nyaawo seƒe enye si. Ke nye Daniel, nye tamesusuwo do ŋɔdzi nam, eye nye mo fu tititi; eye medzra nyaawo ɖo ɖe nye dzi me.” (Daniel 7:28) Gake míawo ya míele ɣeyiɣi si me míate ŋu ase nusiwo Daniel kpɔ la me vava gɔme. Toléle ɖe Daniel ƒe nyagblɔɖia ŋu ado ŋusẽ míaƒe xɔse eye wòana míaka ɖe edzi wu be Yehowa ƒe Mesia Fia la aɖu xexeame dzi.

[Etenuŋɔŋlɔwo]

NUKAWO GƆMEE NÈVA SE?

• Nukae ‘lã gã ene siwo do tso atsiaƒu me’ la dometɔ ɖesiaɖe tsi tre ɖi na?

• Nukae dzo “sue” la nye kpɔɖeŋu na?

• Aleke kpɔɖeŋudzo sue la tɔ ŋku ‘ame kɔkɔeawoe’ le Xexemeʋa I wɔɣi?

• Nukae adzɔ ɖe kpɔɖeŋudzo sue la kple lã bubuawo ƒe fiaɖuƒewo dzi?

• Vi kae toléle ɖe Daniel ƒe drɔ̃e kple ŋutega siwo ku ɖe “lã gã ene” ŋu ɖe na wò?

[Aɖaka/Nɔnɔmetata siwo le axa 149-152]

FIAGÃ SI ƑE NYA ME MESẼ O

HELATƆ nuŋlɔla aɖe si nɔ anyi le ƒe alafa atɔ̃lia D.M.Ŋ. me ƒo nu tso eŋu be enye fiagã nyui si ƒe nya me mesẽ o. Woyɔe le Biblia me be Mawu ƒe “amesiamina” kple “hɔ̃” si “tso ɣedzeƒe.” (Yesaya 45:1; 46:11) Fiagã si ŋu wogblɔ nya siawo le ye nye Persiatɔ Kores Gãtɔ.

Kores ƒe ŋkɔxɔxɔ dze egɔme anye ƒe 560/559 D.M.Ŋ. me lɔƒo esime wòva xɔ ɖe fofoa Cambyses I teƒe va nɔ fiazikpui dzi le Anshan si nye dugã alo nuto le blema Persia. Anshan nɔ Mediatɔ Fia Astyages ƒe dziɖuɖu te ɣemaɣi. Kores dze aglã ɖe Media-dziɖuɖua ŋu heɖu aʋa dzi enumake le esi Astyages ƒe aʋakɔ gbugbɔ le eyome va wɔ ɖeka kplii ta. Esia na Mediatɔwo va nɔ Kores ƒe akpa dzi. Emegbe Media kple Persia tɔwo wɔ aʋa ɖekae le eƒe kpɔkplɔ te. Aleae Medo-Persia dziɖuɖu si va keke eƒe dziɖuƒe ɖe enu tso Aegean Ƒua gbɔ va ɖo Indus Tɔsisia gbɔ wɔ va dzɔe.​—⁠Kpɔ anyigbatata.

Gbã, Kores ho kple eƒe Media kple Persia srafo wɔɖekawo yi be yeaɖu afisi kuxi nɔ dzi​—⁠si nye Media ƒe ɣetoɖoƒe gome afisi Lydia Fia Croesus keke eƒe dziɖuƒe ɖe enu wòge ɖe Mediatɔwo ƒe anyigba me le. Esi Kores ho yi Lydia Fiaɖuƒea ƒe dea dzi le Asia Sue ƒe ɣedzeƒe gome la, eɖu Croesus dzi eye wòxɔ Sardis si nye eƒe fiadu. Emegbe Kores ɖu Ionia-duwo dzi eye wòna Asia Sue bliboa katã va nɔ Medo-Persia Fiaɖuƒea ƒe dziɖuɖu te. Eto esia me va zu ame vevitɔ si ʋlia ho kple Babilon kple eƒe fia, Nabonido.

Azɔ Kores dzra ɖo be yeakpe ŋgo kple Babilon sesẽ la. Eye tso esime wòwɔ afɔɖeɖe sia la, ena Biblia ƒe nyagblɔɖi nɔ eme vam. Yehowa to nyagblɔɖila Yesaya dzi yɔ Kores ƒe ŋkɔ ƒe alafa eve kloe do ŋgɔ be eyae anye fia si amu Babilon ahana ablɔɖe Yudatɔwo tso aboyo me. Dɔ sia si wotsɔ de Kores si do ŋgɔ tae Ŋɔŋlɔawo gblɔ be enye Yehowa ƒe “amesiamina.”​—⁠Yesaya 44:​26-28.

Esime Kores ho ɖe Babilon ŋu le ƒe 539 D.M.Ŋ. me la, dɔ gã aɖe dze ŋgɔe. Esi gli nyadriwo kple ʋe ga globo si me Frat-tɔsisia to ƒo xlã dua ta la, edze abe ɖe womate ŋu aɖu edzi o ene. Le afisi Frat-tɔsisia to Babilon-dua me le la, woɖo gli si kɔkɔ abe to ene ɖe tɔsisia ƒe go eveawo dzi eye wode akɔbligbo gãwo wo nu. Aleke Kores awɔ axɔ Babilon?

Ƒe alafa ɖeka kple edzivɔ do ŋgɔ la, Yehowa gblɔe ɖi be “kuɖiɖi [ava] na woƒe tsiwo” eye egblɔ be “woamie!” (Yeremya 50:38) Nyagblɔɖia va eme esime Kores trɔ Frat Tɔsisia ƒe tsiwo to teƒe bubu le afisi didi tso Babilon kilometa ʋee aɖewo le dziehe gome. Azɔ eƒe aʋakɔ la zɔ yi tɔa me, wolia kpo si ɖo ta glia gbɔ, eye woge ɖe dugã la me bɔbɔe elabena akɔbligboa nɔ ʋuʋu ɖi. Fia sia si “tso ɣedzeƒe”​—⁠afisi ɣe dzena le⁠—​la xɔ Babilon le zã ɖeka me abe alesi “hɔ̃” ɖea abla ƒoa nui ene!

Yudatɔ siwo nɔ Babilon bu Kores ƒe aʋadziɖuɖua be enye yewoƒe ablɔɖekpɔkpɔ tso aboyo me si yewokpɔ mɔ na ɣeyiɣi didi aɖe la ƒe vava kple yewo denyigba ƒe aƒedozuzu ƒe 70 la ƒe nuwuwu. Dzidzɔ ka gbegbee nye si woanya kpɔ esi Kores ɖe gbeƒãe hena mɔ wo be woatrɔ ayi Yerusalem aɖagbugbɔ gbedoxɔa atu! Kores gbugbɔ gbedoxɔ me nuzazã xɔasi siwo Nebukadnezar lɔ yi Babilon la na wo, eɖe mɔ be woadɔ ati tso Libanon, eye wòde se be woatsɔ fiaƒeme ga akpɔ xɔtutua ŋuti gazazãwo gbɔe.​—⁠Ezra 1:​1-11; 6:​3-5.

Zi geɖe la, Kores kpɔa nublanui na amesiwo dzi wòɖu eye eƒe nya me mesẽna na wo le nuwɔwɔ kpli wo me o. Anye be eƒe mawusubɔsubɔ hã tae wòwɔ nu alea. Anɔ eme be Kores lé Persia-nyagblɔɖila Zoroaster ƒe nufiafiawo me ɖe asi eye wòde ta agu na Ahura Maz­da​—⁠mawu si wobu be eyae wɔ nu nyui ɖesiaɖe. Farhang Mehr ŋlɔ le eƒe agbalẽ si nye The Zoroastrian Tradition me be: “Zoroaster fia nu tso Mawu ŋu be ede blibo le agbenyuinɔnɔ me. Egblɔ na amewo be Ahura Mazda mewɔa wɔɖenui o ke ɖe wòwɔa nu dzɔdzɔe boŋ, eye le ema ta mele be woavɔ̃e o ke woalɔ̃e boŋ.” Ðewohĩ mawu si nɔa agbe nyui hewɔa nu dzɔdzɔe dzixɔxɔse kpɔ ŋusẽ ɖe Kores ƒe agbenɔnɔ dzi eye wòna wònyo dɔme hewɔ nu ɖe amewo ŋu nyuie.

Gake fia la mete ŋu nɔ te ɖe Babilon ƒe yame ƒe nɔnɔmewo nu o. Alesi yame xɔa dzo le afima ƒe dzomeŋɔliwo me la wu tsɔtsɔ nɛ. Eyata togbɔ be Babilon kpɔtɔ nye fiaɖuƒea ƒe fiadu, kple mawusubɔsubɔ kple dekɔnuwo nɔƒe vevi hã la, vuvɔŋɔli me koe wòlɔ̃a dugã ma me nɔnɔ. Le nyateƒe me esi Kores ɖu Babilon dzi megbe teti la, etrɔ yi dugã si me wònɔna le dzomeŋɔli me si nye Axmeta, si kɔkɔ wu atsiaƒu ade meta 1,900 le Alwand Toa ƒe agunu. Alesi vuvɔŋɔli sɔna ɖe dzomeŋɔli nyuiawo nu le afisia la doa dzidzɔ nɛ ŋutɔ. Kores tu fiasã dzeani aɖe hã ɖe eƒe fiadu gbãtɔ me le Pasargadae (si gogo Persepolis), si gbɔ didi tso Axmeta anɔ kilometa 650 le anyiehe gome. Eƒe nɔƒe si le afima la zu dzudzɔxɔƒe nɛ.

Ale wova nya Kores be enye aʋadziɖula kalẽtɔ kple fiagã si ƒe nya me mesẽ o. Eƒe fiaɖuɖu ƒe 30 la wu enu esi wòku le ƒe 530 D.M.Ŋ. le aʋa aɖe wɔwɔ me. Viaŋutsu Cambyses II va xɔ ɖe eteƒe nɔ Persia-fiazikpuia dzi.

NUKAWO GƆMEE NÈVA SE?

• Aleke Persiatɔ Kores va zu Yehowa ƒe ‘amesiaminae’?

• Dɔ vevi kae Kores wɔ na Yehowa ƒe amewo?

• Aleke Kores wɔ nu ɖe amesiwo dzi wòɖu ŋui?

[Anyigbatata si le axa 149]

(Edze nyuie le agbalẽa ŋutɔ me)

MEDO-PERSIA FIAÐUƑE

Yerusalem

Babilon

Memphis

Axmeta

Susa

Persepolis

MAKEDONIA

EGIPTE

ETIOPIA

INDIA

[Nɔnɔmetata si le axa 150]

Kores ƒe yɔdo le Pasargadae

[Nɔnɔmetata si le axa 151]

Kores si wota ɖe kpe dzi le Pasargadae

[Aɖaka/Nɔnɔmetata siwo le axa 153]

FIA ÐEKAKPUI AÐE ÐU XEXEAME DZI

ANƆ ƒe 2,300 enye si va yi la, aʋafia aɖe si xɔ ƒe 20 kple edzivɔ si ƒe taɖa nye aŋutiɖiɖi ƒe amadede la va ɖo Mediterranea Ƒuta. Eƒe ŋku nɔ dugã aɖe si nye ƒukpo si gbɔ medidi de kilometa ɖeka o la dzi. Esi womena mɔ aʋafia la wòge ɖe eme o ta la, etsɔ dɔmedzoe ɖoe kplikpaa be yeaɖu dugã ma dzi. Ðoɖo kae wòwɔ be yeadze dua dzi? Eyae nye be yeado mɔ aɖo ƒukpoa gbɔ ahadzra yeƒe asrafowo ɖo axɔ dua. Wodze mɔa dodo gɔme xoxo.

Gake gbedasi aɖe si tso Persia Fiaɖuƒea ƒe fiagã gbɔ tɔtɔ aʋafia ɖekakpui la vie. Persia-fia la gblɔ be yeatsɔ nunana gã aɖe nɛ le esi wòdi vevie be yeawɔ ŋutifafa kplii ta: Sika talento 10,000 (dɔlar biliɔn eve le egbegbe ƒe asixɔxɔ nu), fia atsɔ vianyɔnu ɖeka nɛ wòaɖe, eye wòana wòaɖu Persia Fiaɖuƒea ƒe ɣetoɖoƒenyigba bliboa dzi. Woatsɔ nusiawo katã nɛ ale be wòaɖe asi le fia la ƒe ƒome si aʋafia la lé ŋu.

Aʋakplɔla si dze ŋgɔ nyametsotso si nye be yeaxɔ nunanaa loo alo yeagbe lae nye Makedoniatɔ Alexander III. Ðe wòaxɔ nunana laa? Ŋutinyaŋlɔla Ulrich Wilcken gblɔ be: “Enye ɣeyiɣi vevi aɖe le blemaxexeame. Le nyateƒe me la, nusi eƒe nyametsotsoa ahe vɛ la, yi ŋgɔ to Titinaɣeyiɣiawo me va ɖo mía ŋutɔwo míaƒe ŋkekea me, le Ɣedzeƒe kple Ɣetoɖoƒe siaa.” Hafi míadzro Alexander ƒe nyametsotsoa me la, mina míakpɔ nusiwo dzɔ do ŋgɔ na ɣeyiɣi vevi sia ɖa.

AƲADZIÐULA ZUZU

Wodzi Alexander le Pella, Makedonia, le ƒe 356 D.M.Ŋ. me. Fofoae nye Fia Philip II, eye dadaa enye Olympias. Nyɔnu sia fia Alexander be Hela-mawu Zeus viŋutsu Hercules mee Makedonia-fiawo dzɔ tso. Le Olympias ƒe nya nu la, Alexander tɔgbuitɔgbuie nye Achilles, si nye ame xɔŋkɔ le Homer ƒe hakpanya Iliad me. Esi Alexander sue la dzilawo trɔ eƒe susu ɖe aʋadziɖuɖu kple fiaɖuɖu ƒe atsyɔ̃ ŋu alea ta la, megatsi dzi ɖe nu bubuwo yometiti ŋu o. Esi wobia Alexander be adi be yeaƒu du le Olympic Fefewo me hã la, egblɔ be yeaƒu dua ne fiawoe yeaƒui kpli. Eƒe didi vevie enye be yeawɔ nu gãwo wu ye fofo tɔ eye nusiwo yeawɔ nana yeƒe ŋkɔ nade du.

Esi Alexander xɔ ƒe 13 la, Helatɔ xexemenunyala Aristotle fia nui, eye wòkpe ɖe eŋu wòva do vivi ɖe xexemenunya, atikewɔwɔ, kple dzɔdzɔmeŋutinunya sɔsrɔ̃ ŋu. Amewo hea glãka le afisi Aristotle ƒe xexemenunyafiafiawo kpɔ ŋusẽ ɖe Alexander ƒe tamebubu dzi se ɖo ŋu. Bertrand Russell si nye ƒe alafa 20 lia me xexemenunyala la gblɔ be: “Míate ŋu agblɔe wòasɔ be nu geɖe li siwo ŋu ame eveawo ƒe susu to vovo le. Helatɔwo ƒe du ɖeka dziɖuɖu si ƒe ŋusẽ nɔ vɔvɔm dzie Aristotle tu eƒe dunyahehe nukpɔsusuwo ɖo.” Anɔ eme be du ɖeka dziɖuɖu sue ƒe susua medze fiavi si di be yeaɖo fiaɖuƒe gã si me fiadu anɔ la ŋu o. Anɔ eme hã be Alexander ke ɖi Aristotle ƒe gɔmeɖose si nye be woabu amesiwo menye Helatɔ o kluviwoe, elabena nusi nɔ susu me nɛ ye nye fiaɖuƒe si me ƒomedodo nyui anɔ aʋadziɖulawo kple amesiwo dzi woɖu dome.

Gake ɖikeke boo aɖeke mele eme o be Aristotle na Alex­ander va lɔ̃ nuxexlẽ kple nusɔsrɔ̃. Alexander nye amesi xlẽa nu ŋutɔ le eƒe agbe me katã, eye Homer ƒe agbalẽwo xexlẽ koŋue dzɔa dzi nɛ. Wogblɔ be elé Iliad​—⁠hakpanya si nye fli 15,693 la katã⁠—me nyawo ɖe tame.

Fiavi si xɔ ƒe 16 la ƒe nusɔsrɔ̃ le Aristotle gbɔ wu enu kpata le ƒe 340 D.M.Ŋ. me esime wòtrɔ yi Pella be yeava ɖu fia ɖe Makedonia dzi esi fofoa menɔ anyi o. Eye fiavi si ava zu fia la ɖee fia enumake be aʋawɔɖaŋu ɖedzesi le ye si. Eɖu Thrace-to si nye Maeditɔ siwo dze aglã la dzi kaba wòdzɔ dzi na Phil­ip, exɔ woƒe du vevitɔ le ablaɖeɖe gã aɖe me, eye wòtsɔ eya ŋutɔ ƒe ŋkɔ na teƒea be Alexandroúpolis.

EYI EƑE AƲADZIÐUÐU DZI

Esi woɖo nugbe ɖe Philip ŋu wui le ƒe 336 D.M.Ŋ. me la, Alexander si xɔ ƒe 20 la va nyi Makedonia-fiazikpuia dome. Esi Alexander ɖo Asia le Hellespont (si nye Dardanelles fifia) le ƒe 334 D.M.Ŋ. ƒe adame la, edze aʋadziɖudɔ aɖe gɔme kple aʋakɔ sue bibi aɖe si me asrafo afɔzɔla 30,000 kple sɔdola 5,000 le. Amesiwo wòkplɔ kpe ɖe eƒe aʋakɔ ŋue nye dɔnyala bibiwo, anyigbatalawo, xɔtuɖaŋunyalawo dzɔdzɔmeŋutinunyalawo, kple ŋutinyaŋlɔlawo.

Alexander ɖu aʋa gbãtɔ si wòwɔ kple Persiatɔwo dzi le Granicus Tɔsisi gbɔ le Asia Sue (si nye Turkey fifia) ƒe dzieheɣetoɖoƒe ƒe dzogoe dzi. Exɔ Asia Sue ƒe ɣetoɖoƒe gome le vuvɔŋɔli ma me. Le kele si kplɔe ɖo me la, eɖu aʋa gã evelia si wòwɔ kple Persiatɔwo dzi le Issus, si le Asia Sue ƒe anyieheɣedzeƒe ƒe dzogoe dzi. Persia Fiagã Dario III kple eƒe aʋakɔ si me tɔwo ade ame miliɔn afã la va kpe Alexander le afima. Esi Dario ka ɖe eɖokui dzi akpa ta la, ekplɔ dadaa, srɔ̃a, kple eƒe ƒomea me tɔ bubuwo hã vɛ ale be woava kpɔ nusi wòbu be anye yeƒe aʋadziɖuɖu ɖedzesi la teƒe. Gake Persiatɔwo medzra ɖo ɖe Makedoniatɔwo ƒe amedzidzedze kpata ŋkubiãtɔe alea ŋu o. Alexander ƒe asrafowo ɖu Persia-srafowo dzi gbidii eye Dario si dzo gblẽ eƒe ƒomea ɖe Alexander si me.

Le esi teƒe be Alexander nati Persiatɔ siwo nɔ sisim yome la, eɖo ta anyiehe gome boŋ to Mediterranea Ƒuta, eye wòxɔ ʋudzeƒe siwo Persiatɔwo ƒe aʋawɔtɔdziʋu sẽŋuwo zãna la. Gake Tiro si nye dugã le ƒukpo dzi la me nɔlawo meɖe mɔ be woage ɖe yewo dzi o. Esi Alexander ɖoe kplikpaa be yeaɖu edzi ta la, edze toɖeɖe ɖee si xɔ ɣleti adre la gɔme. Toɖeɣia mee Dario tsɔ nunana si ŋu míeƒo nu tsoe vɛ be wòawɔ ŋutifafa kplii. Nunana la lolo ale gbegbe be wobe Alexander ƒe aɖaŋuɖola Parmenio gblɔ be: ‘Ne nyee nye Alexander la, ne maxɔe.’ Gake ɖekakpui aʋafia la ɖo ŋu nɛ be: ‘Nye hã maxɔe, ne nyee nye Parmenio.’ Alexander gbe ɖoɖo sia dzi wɔwɔ heyi toɖeɖea dzi eye wògbã du ma si nye ƒudzifianyɔnu la le July 332 D.M.Ŋ. me.

Alexander gblẽ Yerusalem si na tae la ɖi heyi anyiehe gome va ɖu Gaza dzi. Esi Persia-dziɖuɖu ti kɔ na Egiptetɔwo ta la, woxɔe alɔevee be enye yewo ɖela. Etsɔ nyitsu sa vɔ na Apis le Memphis, eye wòto esia me dze Egipte-mawununɔlawo ŋu. Etso Alexandria-dugã si va sɔ ta kple Athens hezu nusrɔ̃ƒegã la hã eye eƒe ŋkɔe gale eŋu vaseɖe fifia.

Emegbe Alexander trɔ ta ɖe dzieheɣedzeƒe va to Palestina heɖo ta Tigris Tɔsisi gbɔ. Le ƒe 331 D.M.Ŋ. me la, ekpe aʋa gã etɔ̃lia kple Persiatɔwo le Gaugamela, si gbɔ medidi tso Niniwe ƒe dudo la gbɔ o. Alex­ander ƒe asrafo 47,000 la ɖu Persia-ʋakɔ siwo wogbugbɔ ɖo eye woade ame 250,000 ya teti la dzi le afisia! Dario si eye eya ŋutɔ ƒe amewo wui emegbe.

Esi aʋadziɖuɖua vivi Alexander nu la, etrɔ yi anyiehe gome va xɔ Babilon si nye Persiatɔwo ƒe dugã si me fia nɔna le vuvɔŋɔli me. Exɔ fiadu siwo nye Susa kple Persepolis hã, eye wòxɔ Persiatɔwo ƒe kesinɔnudzraɖoƒegã la hetɔ dzo Xerxes ƒe fiasã gã la. Emegbe exɔ Axmeta si nye fiadu la. Azɔ aʋadziɖula zazɛ̃ sia ɖu Persia-dziɖuƒe mamlɛa dzi, eye wòyi keke ɣedzeƒe gome va ɖo keke Indus Tɔsisi si le egbegbe Pakistan la gbɔ ke.

Esi Alexander tso Indus-tɔsisia ge ɖe nuto si ɖe liƒo kple Persia-nuto si nye Taxila me la, edo go ame sesẽ aɖe si nye India-fiagã Porus. Alexander wɔ eƒe aʋa enelia kple gãtɔ si nye mamlɛtɔ kplii le June 326 D.M.Ŋ. me. Porus ƒe aʋakɔa nye asrafo 35,000 kple atiglinyi 200 siwo do vɔvɔ̃ na Makedoniatɔwo ƒe sɔwo. Aʋaa nu sẽ eye ame geɖe tsi eme, gake Alexander ƒe asrafowo ɖu dzi. Porus na ta hewɔ ɖeka kplii.

Ƒe enyi kple edzivɔ va yi tso esime Makedonia-srafoawo yi Asia, eye ɖeɖi te asrafoawo ŋu eye aƒe hã nɔ wo dzrom. Esi aʋa sesẽ si wowɔ kple Porus na ŋusẽ vɔ le wo ŋu ta la, wodi be yewoatrɔ yi aƒe. Togbɔ be Alexander menɔ lɔlɔ̃m gbã o hã la, eva lɔ̃ ɖe woƒe didia dzi. Hela va zu xexemefiaɖuƒe nyateƒe. Esi woɖo Hela-dziɖuɖuwo ɖe anyigba siwo woxɔ dzi ta la, Helatɔwo ƒe gbe kple kɔnu kaka ɖe dziɖuƒe bliboa katã.

ŊUTSU SI NA WOÐU AƲA DZI

Nusi lé Makedonia-ʋakɔa ƒo ƒu ɖekae le ƒe siwo wotsɔ ɖu aʋa dzi me lae nye Alexander ƒe amenyenye. Ne wowɔ aʋa aɖe vɔ la, nusi Alexander wɔnae nye be eyina ɖasrãa amesiwo xɔ abi kpɔna, eléa ŋku ɖe abi si woxɔ ŋu, ekafua eƒe asrafowo ɖe woƒe kalẽwɔwɔ ta, eye wònaa ga wo ɖe nusi wote ŋu wɔ nu tsɔ dea bubu wo ŋui. Le amesiwo tsi aʋa gome la, Alexander wɔa ɖoɖo ɖe wo ɖiɖi bubutɔe ŋu. Woɖea ŋutsu tsiaʋawo dzilawo kple wo viwo le adzɔxexe kple dɔ ƒomevi ɖesiaɖe wɔwɔ me. Alexander na wowɔa fefe kple kametetewo tsɔ ɖea modzaka le aʋawɔwɔwo megbe. Ɣeaɖeɣi la, ewɔ ɖoɖo be ŋutsu siwo ɖe srɔ̃ yeyee naxɔ dzudzɔ vie, ale be woate ŋu anɔ wo srɔ̃wo gbɔ le Makedonia le vuvɔŋɔlia. Nuwɔna siawo na eƒe amewo lɔ̃e hekpɔa dzidzɔ ɖe eŋu.

Helatɔ agbeŋutinyaŋlɔla Plutarch ŋlɔ le Alexander ƒe Bactriatɔ Fiavinyɔnu Roxana ɖeɖe ŋu be: “Le nyateƒe me la, lɔlɔ̃e ʋãe, gake le ɣeyiɣi ma ke me la, edze abe ede eƒe taɖodzinu hã dzi ene. Elabena edze amesiwo dzi wòɖu la ŋu be woakpɔe be etia nyɔnu tso yewoƒe amewo dome, eye esi wokpɔe be medɔ kple nyɔnu si ƒe lɔlɔ̃ ɖu eya amesi ɖɔa ŋu ɖo vevie dzi la gbɔ o vaseɖe esime wòte ŋu ɖee le se kple bubumɔ nu hafi la, ena wova lɔ̃e vevie ŋutɔ.”

Alexander de bubu ame bubuwo ƒe srɔ̃ɖeɖewo hã ŋu. Togbɔ be Fia Dario srɔ̃ nye aboyome hã la, ekpɔ egbɔ be wowɔ nu ɖe eŋu le bubu me. Nenema ke esi wòse be Makedonia-srafo eve wɔ ŋlɔmi le amedzro aɖewo srɔ̃wo ŋu la, eɖe gbe be woawu wo nenye be wodze agɔ.

Alexander lɔ̃a mawusubɔsubɔ ŋutɔ abe dadaa Olympias ene. Esaa vɔ do ŋgɔ na aʋawo wɔwɔ kple le wo wɔwɔ vɔ megbe, eye eyia afakalawo gbɔ ɖabiaa dzesi aɖewo gɔme. Ede Ammon-trɔ̃nua hã gbɔ le Libia. Eye esi wòɖo Babilon la, ewɔ ɖe Kaldeatɔwo ƒe vɔsasa ŋuti mɔfiamewo dzi, vevietɔ na Babilon-mawu Bel (Marduk).

Togbɔ be Alexander ɖɔa ŋu ɖo le nuɖuɖu me hã la, mlɔeba eva nɔ aha nom fũ. Hafi wòano wein kplu ɖesiaɖe la, eƒoa nu legbee heƒoa adegbe le nusiwo wòte ŋu wɔ ŋu. Nu vɔ̃ɖitɔ kekeake siwo Alexander wɔ dometɔ ɖekae nye xɔ̃a Clitus si wòwu, esi wòmu aha hedo dɔmedzoe helĩhelĩ. Gake Alexander bu fɔ eɖokui ale gbegbe be enɔ aba dzi ŋkeke etɔ̃ numaɖumaɖu kple numanomano. Mlɔeba la, exɔlɔ̃wo te ŋu ble enu wòɖu nu.

Esi ɣeyiɣia va nɔ yiyim la, alesi Alexander tsi klokloklo ɖe ŋkɔxɔxɔ ŋu na nɔnɔme gbegblẽ bubu aɖewo va ɖo eme. Eva nɔ aʋatsonutsotso dzi xɔm nɔ sesem kabakaba eye wòte tohehe sesẽtɔwo nana amewo. Le kpɔɖeŋu me, esi wogblẽ to na Alexander be Philotas hã nɔ eme wowɔ ɖoɖo ɖe ewuwu ŋu la, ena wowu eya kple fofoa Parmenio, si nye eƒe aɖaŋuɖola si dzi wòka ɖo tsã la.

WOÐU ALEXANDER DZI

Esi Alexander trɔ yi Babilon megbe kpuie la, asrã sesẽ aɖe lée, eye mete ŋu haya o. Le June 13, 323 D.M.Ŋ. me, esi Alex­ander nɔ agbe ƒe 32 kple ɣleti 8 pɛ ko la, ena ta futɔ dziŋɔtɔ kekeake si nye ku.

Ðeko wònɔ abe alesi India-nunyala aɖewo gblɔe ene be: “O Fia Alexander, anyigba ƒe lolome si dzi míetɔ ɖo koe nye amesiame tɔ; eye wò si nye amegbetɔ abe ŋutsu bubuwo ke ene, negbe ɖeko mèvona o eye nènɔa klokloklo dzi la, èle tsatsam le anyigba blibo sia si gbɔ didi tso mia de la katã dzi, le fu ɖem na ɖokuiwò, hele fu ɖem na ame bubuwo hã. Gake eteƒe madidi o àku, eye anyigba ƒe lolome si dzi woaɖi wò ɖo koe anye tɔwò.”

NUKAWO GƆMEE NÈVA SE?

• Nɔnɔme kawo mee Alexander Gãtɔ nɔ tsi?

• Dɔ ka gɔmee Alexander dze esi wòva nyi Makedonia-fiazikpuia dome megbe teti?

• Ƒo nu tso Alexander ƒe aʋadziɖuɖu aɖewo ŋu.

• Nya kae míate ŋu agblɔ le Alexander ƒe amenyenye ŋu?

[Anyigbatata si le axa 161]

(Edze nyuie le agbalẽa ŋutɔ me)

ALEXANDER ƑE AƲADZIÐUÐUWO

Alexander

Aristotle kple eƒe nusrɔ̃vi Alexander

MAKEDONIA

Babilon

EGIPTE

Indus Tɔsisi

[Nɔnɔmetata si le axa 156]

Wobe Alexander Gãtɔ ƒe nɔnɔmetatae le sikagaku sia dzi

[Aɖaka/Nɔnɔmetata si le axa 162, 163]

WOMÃ FIAÐUƑE GÃ AÐE ME

BIBLIA gblɔ ɖi le Alexander Gãtɔ ƒe fiaɖuƒea ŋu be agbã eye eme amã gake “menye na eƒe dzidzimeviwo o.” (Daniel 11:​3, 4) Nenemae wòdzɔe be le Alexander ƒe ku kpata le ƒe 323 D.M.Ŋ. me ƒe ƒe 14 megbe la, woɖo nugbe ɖe viaŋutsu Alexander IV kple eƒe ahiãvi viŋutsu Heracles ŋu hewu wo.

Kaka ƒe 301 D.M.Ŋ. naɖo la, Alexander ƒe aʋafiawo dometɔ ene va kpɔ ŋusẽ ɖe fiaɖuƒe gã si woƒe aʋakplɔla ɖo anyi la dzi. Aʋafia Cassander ɖu fia ɖe Makedonia kple Hela dzi. Aʋafia Lysimachus xɔ Asia Sue kple Thrace. Mesopotamia kple Siria zu Seleucus I Nicator tɔ. Eye Ptolemy Lagus, alo Ptolemy I, ɖu fia ɖe Egipte kple Palestina dzi. Alea wòdzɔe be Hela, alo Greece, fiaɖuƒe ene do tso Alexander ƒe fiaɖuƒe gã ɖeka la mee.

Le Hela-fiaɖuƒe eneawo dome la, Cassander ƒe dziɖuɖue menɔ anyi didi kura o. Esi Cassander va nɔ dzi ɖum ƒe ʋee aɖewo megbe la, ŋutsu siwo ate ŋu ava nyi eƒe dome la katã ku, eye le ƒe 285 D.M.Ŋ. me la, Lysimachus xɔ Hela Fiaɖuƒea ƒe akpa si le Europa. Ƒe ene megbe la, wowu Lysima­chus le aʋa si Seleucus I Nicator wɔ kplii me, ale be wòva kpɔ ŋusẽ ɖe Asia-nutowo ƒe akpa gãtɔ dzi. Seleucus va zu fia siwo tso Seleucus fiaƒomea me la ƒe gbãtɔ le Siria. Eyae tso du si nye Antioxia si le Siria eye wòwɔ afima eƒe fiadu yeyee. Wowu Seleucus le ƒe 281 D.M.Ŋ. me, gake fiaƒome si gɔme wòdze la yi edzi ɖu fia vaseɖe ƒe 64 D.M.Ŋ. me esime Roma Ʋafia Pompey na Siria va nɔ Roma-dziɖuɖua te.

Ptolemy fiaƒomea ƒe dziɖuɖue nɔ anyi didi wu le Alexander ƒe fiaɖuƒea ƒe mamã eneawo dome. Ptolemy I va zu fia le ƒe 305 D.M.Ŋ. me eye wòva zu Makedonia-fiawo, alo Egipte Faraowo, ƒe gbãtɔ. Esi wòwɔ Alexandria wòzu eƒe fiadu la, edze afima wɔwɔ dugãe gɔme enumake. Eƒe xɔtudɔ gãtɔwo dometɔ ɖekae nye Alexandria Agbalẽdzraɖoƒe xɔŋkɔ la. Ptolemy kplɔ Atenetɔ agbalẽnyala si ŋkɔe nye Demetrius Phalereus tso Hela be wòava kpɔ dɔ gã sia dzi. Wogblɔ be kaka ƒe alafa gbãtɔ M.Ŋ. me naɖo la, agbalẽxatsaxatsa miliɔn ɖeka nɔ agbalẽdzraɖoƒea. Ptolemy fiaƒomea yi edzi ɖu fia le Egipte vaseɖe esime wòmu dze Roma si me le ƒe 30 D.M.Ŋ. me. Roma va xɔ ɖe Hela teƒe ɣemaɣi hezu xexemefiaɖuƒe si le dzi ɖum.

NUKAWO GƆMEE NÈVA SE?

• Aleke womã Alexander ƒe fiaɖuƒe gã la mee?

• Ɣekaɣie Seleucid fiaƒomea yi edzi ɖu fia le Siria se ɖo?

• Ɣekaɣie Ptolemy fiaɖuƒea ƒe dziɖuɖu le Egipte wu enu?

[Anyigbatata si le axa 163]

(Edze nyuie le agbalẽa ŋutɔ me)

ALEXANDER ƑE FIAÐUƑEA ƑE MAMÃ

Ptolemy I

Seleucus I

Ptolemy I

Cassander

Lysimachus

Seleucus I

[Diagram/Picture on page 139]

(Edze nyuie le agbalẽa ŋutɔ me)

DANIEL ƑE NYAGBLƆÐIA ME XEXEMEFIAÐUƑEWO

Legba gã la (Daniel 2:31-45)

Lã ene siwo do tso atsiaƒu me (Daniel 7:3-8, 17, 25)

BABILONIA tso ƒe 607 D.M.Ŋ.

MEDO-PERSIA tso ƒe 539 D.M.Ŋ.

HELA tso ƒe 331 D.M.Ŋ.

ROMA tso ƒe 30 D.M.Ŋ.

ANGLO-AMERIKA XEXEMEFIAÐUƑE tso ƒe 1763 M.Ŋ.

XEXE SI ME MÃ LE DUNYAHEHE GOME le nuwuɣia me

[Nɔnɔmetata si xɔ axa 128]

[Nɔnɔmetata si xɔ axa 147]