‘Gbɔgbɔ La Dzroa Mawu Ƒe Nu Goglowo Me Kpɔ’
“Gbɔgbɔ la dzroa nuwo katã me kpɔ, Mawu ƒe nu goglowo kura gɔ̃ hã.”—1 KOR. 2:10.
1. Gbɔgbɔ kɔkɔe la ƒe dɔwɔna ka dzie Paulo te gbe ɖo le 1 Korintotɔwo 2:10, eye nyabiabia kawoe fɔ ɖe te?
ALEKE gbegbee wòle be míada akpe ɖe dɔ siwo Yehowa ƒe gbɔgbɔ kɔkɔea wɔna la tae nye esi! Ŋɔŋlɔawo gblɔ tso gbɔgbɔ kɔkɔea ŋu be enye kpeɖeŋutɔ, nunana, ɖaseɖila, kple míaƒe nyaxɔɖeakɔla. (Yoh. 14:16; Dɔw. 2:38; Rom. 8:16, 26, 27) Apostolo Paulo te gbe ɖe dɔ vevi bubu si gbɔgbɔ kɔkɔea wɔna la dzi be: “Gbɔgbɔ la dzroa nuwo katã me kpɔ, Mawu ƒe nu goglowo kura gɔ̃ hã.” (1 Kor. 2:10) Nyateƒee, Yehowa toa eƒe gbɔgbɔ kɔkɔea dzi ɖea gbɔgbɔmenyateƒe goglowo ɖe go. Kpekpeɖeŋu sia manɔmee la, nu ka gɔmee míate ŋu ase ku ɖe Yehowa ƒe tameɖoɖowo ŋu? (Mixlẽ 1 Korintotɔwo 2:9-12.) Ke hã, nyabiabia geɖewo fɔ ɖe te: Alekee ‘gbɔgbɔ la dzroa Mawu ƒe nu goglowo me kpɔnae’? Ame kawo dzie Yehowa to ɖe nu siawo ɖe go le ƒe alafa gbãtɔ M.Ŋ. me? Ame kawo dzie gbɔgbɔ la tona dzroa nu goglo siawo me le míaƒe ŋkekea me, eye alekee wòwɔnɛ?
2. Mɔ eve kawo nue Yesu ɖee fia be gbɔgbɔa awɔ dɔ le?
2 Yesu ƒe nyawo ɖee fia be gbɔgbɔ la awɔ dɔ le mɔ eve aɖewo nu. Ɣeyiɣi kpui aɖe do ŋgɔ na eƒe ku la, egblɔ na eƒe apostolowo be: “Kpeɖeŋutɔ la, si nye gbɔgbɔ kɔkɔe la, si Fofo la aɖo ɖa le nye ŋkɔ me la, eya afia nuwo katã mi, eye wòaɖo ŋku nu siwo katã megblɔ na mi la dzi na mi.” (Yoh. 14:26) Gbɔgbɔ kɔkɔe la afia nu Kristotɔwo eye wòaɖo ŋku nu dzi na wo. Afia nu wo le mɔ sia nu be, ana Kristotɔwo nase nu siwo gɔme womese tsã o la gɔme. Eye aɖo ŋku nu dzi na wo le mɔ sia nu be, akpe ɖe wo ŋu woaɖo ŋku nu siwo me woɖe na wo la dzi bene woazɔ ɖe wo dzi pɛpɛpɛ.
Le Ƒe Alafa Gbãtɔ Me
3. Yesu ƒe nya kawoe ɖee fia be woaɖe “Mawu ƒe nu goglowo” ɖe go vivivi?
3 Yesu ŋutɔ fia nyateƒenya geɖe siwo eƒe nusrɔ̃lawo mese kpɔ o la wo. Ke hã, nu geɖe ganɔ anyi woasrɔ̃. Yesu gblɔ na apostoloawo be: “Nya geɖewo gale asinye magblɔ na mi hafi, gake miate ŋu atsɔ wo fifia o. Gake ne eya, si nye nyateƒegbɔgbɔ la va ɖo la, afia mɔ mi le nyateƒe blibo la katã me.” (Yoh. 16:12, 13) Eya ta Yesu ƒe nyawo ɖee fia be woato gbɔgbɔ kɔkɔea dzi aɖe gbɔgbɔmenu goglowo ɖe go vivivi.
4. Le ƒe 33 M.Ŋ. ƒe Pentekosteŋkekea dzi la, alekee gbɔgbɔ kɔkɔea wɔ nu abe nufiala ene, eye alekee wòɖo ŋku nu dzi na Petro?
4 Le ƒe 33 M.Ŋ. ƒe Pentekosteŋkekea dzi la, “nyateƒegbɔgbɔ la” va ɖo, esime wokɔe ɖe Kristotɔ siwo ade ame 120, siwo ƒo ƒu ɖe Yerusalem, la dzi. Esia ŋuti kpeɖodziwo dze ƒãa le nu siwo amewo kpɔ kple nu siwo wose la me. (Dɔw. 1:4, 5, 15; 2:1-4) Nusrɔ̃laawo ƒo nu “tso Mawu ƒe nu dzɔtsuwo ŋu” le gbe vovovowo me. (Dɔw. 2:5-11) Ɣeyiɣia de azɔ be woaɖe nu yeye aɖe ɖe go. Nyagblɔɖila Yoel gblɔ gbɔgbɔ kɔkɔea kɔkɔ ɖi sia ŋu nya ɖi xoxoxo. (Yoel 3:1-5) Ame siwo nɔ nyagblɔɖi sia me vava teƒe kpɔm la dometɔ aɖeke menɔ mɔ kpɔm be aleae wòava eme o, eye apostolo Petro xɔ ŋgɔ heɖe nu si nɔ dzɔdzɔm la me. (Mixlẽ Dɔwɔwɔwo 2:14-18.) Eya ta gbɔgbɔ kɔkɔe la wɔ nu abe nufiala ene esime wòna eme kɔ na Petro be nu si dzɔ ɖe nusrɔ̃lawo dzi la nye nya si wogblɔ ɖi tso blema ke la me vava. Gbɔgbɔ la gawɔ nu bubu hã si nye be eɖo ŋku nu dzi na Petro, elabena menye Yoel ƒe agbalẽa me koe Petro yɔ nya tso o, ke eyɔ nya tso David ƒe psalmo eve hã me. (Ps. 16:8-11; 110:1; Dɔw. 2:25-28, 34, 35) Nu siwo ame siwo katã va ƒo ƒu la kpɔ hese la nye Mawu ƒe nu goglowo vavã.
5, 6. (a) Biabia vevi kawoe fɔ ɖe te le ƒe 33 M.Ŋ. ƒe Pentekosteŋkekea megbe ku ɖe nubabla yeyea ŋu, siwo ŋu wòhiã be woaɖo? (b) Ame kawoe fɔ nya siawo ɖe te, eye aleke wowɔ tso nya me le wo ŋu?
5 Egahiã kokoko be woakɔ nu geɖe me na ƒe alafa gbãtɔ me Kristotɔwo. Le kpɔɖeŋu me, nyabiasewo fɔ ɖe te ku ɖe nubabla yeye si te dɔwɔwɔ tso Pentekoste ƒe ŋkeke ma dzi la ŋu. Yudatɔwo kple ame siwo trɔ dzi me zu Yudatɔwo koe nubabla yeyea lɔ ɖe emea? Ðe woaxɔ ame siwo menye Yudatɔwo o ɖe nubabla sia me eye woatsɔ gbɔgbɔ kɔkɔe la asi ami na woa? (Dɔw. 10:45) Ðe wòahiã be woatso aʋa na ŋutsu siwo menye Yudatɔwo o eye woabɔbɔ ɖe Mose ƒe Sea te hafi woanye nubabla yeyea me tɔwoa? (Dɔw. 15:1, 5) Biabia siawo nɔ vevie ŋutɔ. Ehiã be Yehowa ƒe gbɔgbɔ la nana numekɔkɔ ku ɖe nu goglo siawo ŋu. Gake ame kawo dzie wòato awɔ esia?
6 Nɔviŋutsu siwo nɔ ŋgɔ xɔm lae fɔ nya siawo dometɔ ɖe sia ɖe ɖe te be woadzro wo me. Petro, Paulo, kple Barnaba nɔ kpekpe si dziɖuhaa wɔ me, eye wogblɔ ale si Yehowa trɔ eƒe susu ɖe ame siwo menye Yudatɔwo o, siwo nye aʋamatsomatsotɔwo, ŋu la ŋuti nya. (Dɔw. 15:7-12) Esi gbɔgbɔ kɔkɔea kpe ɖe wo ŋu wolé ŋku ɖe kpeɖodzi siawo ŋu le ɖekawɔwɔ me kple nya siwo Hebri Ŋɔŋlɔawo gblɔ vɔ la, dziɖuhaa tso nya me. Emegbe woŋlɔ agbalẽ ɖo ɖe hameawo tsɔ na wonya nyametsotso si wowɔ.—Mixlẽ Dɔwɔwɔwo 15:25-30; 16:4, 5; Ef. 3:5, 6.
7. Mɔ kawo dzie woto ɖe nyateƒenya goglowo ɖe go?
7 Wokɔ nya bubu geɖewo hã me to agbalẽ siwo gbɔgbɔ ʋã Yohanes, Petro, Yakobo, kple Paulo woŋlɔ la dzi. Gake ɣeaɖeɣi le Kristotɔwo ƒe Ŋɔŋlɔawo nuwuwu vɔ megbe la, nyagbɔgblɔɖi kple sidzedze ɖeɖe fia amewo nukutɔe ƒe nunanawo nu va yi. (1 Kor. 13:8) Ðe gbɔgbɔ la ayi edzi anɔ nu fiam Kristotɔwo ahanɔ ŋku ɖom nu dzi na woa? Ðe wòayi edzi anɔ kpekpem ɖe Kristotɔwo ŋu be woadzro Mawu ƒe nu goglowo mea? Nyagblɔɖiwo ɖee fia be awɔe nenema.
Le Nuwuɣia Me
8, 9. Ame kawo sie gbɔgbɔmenugɔmesese asu eye ‘woaklẽ’ le nuwuɣia me?
8 Esi mawudɔla aɖe nɔ nu ƒom tso nuwuɣia ŋu la, egblɔ ɖi be: ‘Nunyalawo aklẽ abe dziŋgɔli ƒe keklẽ ene, eye ame siwo fia dzɔdzɔenyenye mɔ nu ame geɖewo la, abe dzinuviwo ene ɖaa tegbee. Eye sidzedze adzi ɖe edzi.’ (Dan. 12:3, 4) Ame kawoe anye nunyalaawo, eye ame kawoe aklẽ? Yesu gblɔ nya aɖe le lu kple gbe wuwluiwo ŋuti kpɔɖeŋua me si akpe ɖe mía ŋu míakpɔ ŋuɖoɖoa. Esi wònɔ nu ƒom tso “nuɖoanyi aɖe ƒe nuwuɣi” ŋu la, egblɔ be: “Ɣemaɣi la, ame dzɔdzɔewo aklẽ nyuie abe ɣe ene le wo Fofo ƒe fiaɖuƒe la me.” (Mat. 13:39, 43) Esi Yesu nɔ kpɔɖeŋua me ɖem la, egblɔ be ‘ame dzɔdzɔeawoe’ nye “fiaɖuƒe la ƒe viwo,” alo Kristotɔ amesiaminawo.—Mat. 13:38.
9 Kristotɔ amesiaminawo katãe ‘aklẽa’? Ɛ̃, le mɔ aɖe nu la, wo katãe aklẽ, elabena Kristotɔwo katãe akpɔ gome le gbeƒãɖeɖedɔa, nusrɔ̃lawɔwɔdɔa, kple wo nɔewo tutuɖo le kpekpewo me me. Amesiaminawoe axɔ ŋgɔ le esiawo katã me. (Zax. 8:23) Gake tsɔ kpe ɖe eŋu la, woagaɖe nu goglo aɖewo ɖe go le nuwuɣia me. “Wotre” nyagblɔɖi si Daniel ŋlɔ ɖi la gɔ̃ hã “nu” va de asi na nuwuɣia. (Dan. 12:9) Ame kawo dzie gbɔgbɔ la ato adzro nu goglowo siawo me, eye alekee wòawɔe?
10. (a) Ame kawo dzie gbɔgbɔ la tona ɖea nyateƒenya goglowo ɖe go le ŋkeke mamlɛawo me? (b) Ƒo nu tso ale si woɖe nyateƒe siwo ku ɖe Yehowa ƒe gbɔgbɔmegbedoxɔ gãa ŋu me la ŋu.
10 Ne ɣeyiɣia de be woakɔ gbɔgbɔmenya aɖe me le míaƒe ŋkekea me la, gbɔgbɔ kɔkɔea kpena ɖe “kluvi nyateƒetɔ kple aɖaŋudzela” ƒe teƒenɔla siwo le habɔbɔa ƒe dɔwɔƒegã la ŋu wosea nyateƒe goglo siwo gɔme womese tsã o la gɔme. (Mat. 24:45; 1 Kor. 2:13) Dziɖuha bliboa kpea ta dzroa numekɔkɔ yeyeawo me. (Dɔw. 15:6) Emegbe wotaa gɔmesese si su wo si la ɖe agbalẽ me be wòaɖe vi na ame sia ame. (Mat. 10:27) Ne ɣeyiɣiawo va le yiyim la, agate ŋu ava hiã be woana numekɔkɔ geɖe wu, eye woɖea esiawo hã me anukwaretɔe.—Kpɔ aɖaka si ƒe tanyae nye “Ale Si Gbɔgbɔ La Ðe Nu Si Gbɔgbɔmegbedoxɔa Fia La Me.”
Ale Si Míana Gbɔgbɔa Ƒe Dɔwɔwɔ Naɖe Vi Na Mí
11. Alekee akpa si gbɔgbɔ kɔkɔea wɔna le Mawu ƒe nu gogloawo ɖeɖe ɖe go me la ɖea vi na Kristotɔwo katã egbea?
11 Akpa si gbɔgbɔ kɔkɔea wɔna le Mawu ƒe nu gogloawo ɖeɖe ɖe go me la ɖea vi na Kristotɔ wɔnuteƒewo katã. Abe ale si wònɔ le ƒe alafa gbãtɔ me Kristotɔwo gome ene la, egbea míawo hã míesrɔ̃a nu geɖewo eye emegbe míeɖoa ŋku nu siwo gɔme gbɔgbɔ kɔkɔea kpe ɖe mía ŋu míese la dzi hewɔa wo dzi. (Luka 12:11, 12) Mehiã be míade suku ayi ŋgɔ hafi míate ŋu ase gbɔgbɔmenyateƒe goglo siwo wotana ɖe míaƒe agbalẽwo me la gɔme o. (Dɔw. 4:13) Nu kawoe míate ŋu awɔ be Mawu ƒe nu gogloawo ŋuti gɔmesese geɖe wu nasu mía si? Bu aɖaŋuɖoɖo ʋɛ siwo gbɔna ŋu kpɔ.
12. Ɣekaɣiwoe wòle be míado gbe ɖa abia gbɔgbɔ kɔkɔea?
12 Do gbe ɖa nàbia gbɔgbɔ kɔkɔea. Hafi míadzro nu sia nu si wotu ɖe Ŋɔŋlɔawo dzi me la, ele be míado gbe ɖa abia gbɔgbɔ kɔkɔea ƒe mɔfiafia gbã. Ne míawo ɖeɖee le nua srɔ̃ ge alo ɣeyiɣi kpui aɖe koe wòaxɔ gɔ̃ hã la, ele be míado gbe ɖa. Gbedodoɖa ɖokuibɔbɔtɔe alea ado dzidzɔ na mía Fofo si le dziƒo la godoo. Abe ale si Yesu ɖee fia ene la, ne míebia Yehowa le anukware me be wòana eƒe gbɔgbɔ kɔkɔea mí la, ana mí faa.—Luka 11:13.
13, 14. Akpa kae dzadzraɖo ɖe kpekpewo ŋu wɔna be Mawu ƒe nu gogloawo ŋuti gɔmesese deto nasu mía si?
13 Dzra ɖo ɖe kpekpeawo ŋu. Míexɔa ‘nuɖuɖu le ɣeyiɣi nyuitɔ dzi’ to kluvi ƒe ha la dzi. “Kluvi” la wɔa eƒe dɔdeasia to agbalẽ kple nu bubu siwo wotu ɖe Ŋɔŋlɔawo dzi nana mí kple ɖoɖowɔwɔ ɖe nusɔsrɔ̃ kple kpekpewo ŋu na mí me. Susu nyui geɖewo tae wobiana tso “nɔviwo ƒe habɔbɔ blibo la katã” si be woadzro nyatakaka aɖewo me ɖo. (1 Pet. 2:17; Kol. 4:16; Yuda 3) Ne míewɔa míaƒe ŋutete ɖe sia ɖe wɔna ɖe aɖaŋu siwo woɖo na mí dzi la, efia be míele nu wɔm le ɖekawɔwɔ me kple gbɔgbɔ kɔkɔea ƒe mɔfiafia.—Nyaɖ. 2:29.
14 Ne míele dzadzram ɖo ɖe Kristotɔwo ƒe kpekpewo ŋu la, anyo be míaxlẽ mawunyakpukpui siwo me nyawo womeŋlɔ ɖe agbalẽa me o la eye míadze agbagba ade dzesi ale si wo dometɔ ɖe sia ɖe do ƒome kple nu si srɔ̃m míele. Esia wɔwɔ akpe ɖe mía ŋu be vivivi la, Biblia me gɔmesese deto ava su mía si. (Dɔw. 17:11, 12) Mawunyakpukpui siawo xexlẽ ana wo me nyawo natsi susu me na mí, eye gbɔgbɔ kɔkɔea ate ŋu akpe ɖe mía ŋu míaɖo ŋku wo dzi. Tsɔ kpe ɖe eŋu la, ne míexlẽ mawunyakpukpui siawo tso Biblia ŋutɔ me la, awɔe be axa si dzi kpukpuiawo dze le la natsi susu me na mí eye míate ŋu ake ɖe wo ŋu bɔbɔe ne míele wo dim.
15. Nu ka tae wòle be míanɔ míaƒe agbalẽwo xlẽm ne wonya do teti ko, eye aleke nèwɔa esiae?
15 Nɔ míaƒe agbalẽawo xlẽm enumake ne wonya do teti ko. Womedzroa míaƒe agbalẽ aɖewo me le kpekpeawo me o, gake míaƒe viɖe tae wota wo ɖo. Míaƒe nuhiahiãwo gbɔ kpɔkpɔ tae wotaa míaƒe magazine siwo míama gɔ̃ hã ɖo. Le xexe manyatalenu sia me la, zi geɖe la, ahiã be míalala ame aɖe alo nane ɣeaɖewoɣi. Eya ta ne míaƒe agbalẽawo dometɔ aɖe si míexlẽ haɖe o alo esi míexlẽ se ɖe afi aɖe ko la nɔa mía ŋu ɣesiaɣi la, míate ŋu awɔ mɔnukpɔkpɔ siawo ŋu dɔ atsɔ axlẽ eƒe akpa aɖe. Nu si ame aɖewo wɔna be woaɖu gbɔgbɔmenu siwo wonaa mí ɖe ɣeyiɣi dzie nye be, woƒoa míaƒe agbalẽ siwo woxlẽ lé ɖe mɔ̃ dzi la sena ne wole azɔli dzi alo ne wole ʋu me yina teƒe aɖe. Agbalẽ siawo katã siwo ŋu wowɔa numekuku geɖe le hafi taa wo be woaɖe vi na nuxlẽla akpa gãtɔ la nana míegakpɔa ŋudzedze ɖe gbɔgbɔmenuwo ŋu geɖe wu.—Xab. 2:2.
16. Aleke biabia siwo vaa susu me na mí la ŋɔŋlɔ ɖi kple numekukuwɔwɔ le wo ŋu emegbe ɖea vii?
16 De ŋugble. Ne èle Biblia alo agbalẽ ɖe sia ɖe si wotu ɖe Biblia dzi xlẽm la, gbɔ dzi ɖi nàde ŋugble le nu si xlẽm nèle la ŋu. Ne ètsɔ wò susu ɖo numeɖeɖeawo ŋu esime nèle nua xlẽm la, biabia aɖewo ava susu me na wò. Anyo be nàŋlɔ wo ɖi eye nàva wɔ numekuku le wo ŋu ɣebubuɣi. Zi geɖe la, ne míele nu siwo gɔmesese do viviti na mí me kum la, ɣemaɣie míesrɔ̃a nu wòdea to wu. Nugɔmesese si va su mía si la tsia míaƒe susu ƒe nudzraɖoƒe eye míetea ŋu ɖoa ŋku edzi wɔa eŋu dɔ ɣesiaɣi si míehiã nɛ.—Mat. 13:52.
17. Ðoɖo ka dzie nèzɔna ɖo le ƒomenusɔsrɔ̃ alo ɖokuisinusɔsrɔ̃ wɔwɔ me?
17 Ðo ɣeyiɣi ɖi na ƒometadedeagu. Dziɖuha la de dzi ƒo na mí katã be míaɖo fiẽ aɖe ɖi alo atia ɣeyiɣi bubu aɖe si me míanɔ ɖokuisinusɔsrɔ̃ alo ƒomenusɔsrɔ̃ wɔm kwasiɖa sia kwasiɖa. Asitɔtrɔ si wowɔ le míaƒe kpekpewo ŋu la na mɔnukpɔkpɔ mí be míate ŋu awɔ ɖe aɖaŋuɖoɖo sia dzi. Nu kae nèsrɔ̃na le Ƒometadedeagu fiẽsiwo me? Ame aɖewo xlẽa Biblia alo wɔa numekuku tso biabia siwo va susu me na wo ku ɖe mawunyakpukpui aɖewo ŋu la ŋu eye woŋlɔa wo ŋuti numeɖeɖe kpui aɖe ɖe woƒe Biblia me. Ƒome geɖewo gbɔa dzi ɖi dea ŋugble tso ale si ƒomea ate ŋu atsɔ nu si wosrɔ̃ la ade dɔwɔwɔ mee ŋu. Ƒome ƒe ta aɖewo tiaa agbalẽ si wokpɔ be aɖe vi na woƒe ƒomea, alo nyati siwo dzro nya alo biabia siwo me ƒomea me tɔwo di be yewoadzro la me. Ne ɣeyiɣiawo va le yiyim la, àgakpɔ nyati bubu siwo me wòahiã be nàdzro la godoo.a
18. Nu ka tae mele be míahe ɖe megbe le Mawu ƒe Nyaa me nyateƒenya gogloawo sɔsrɔ̃ ŋu o?
18 Yesu gblɔ be gbɔgbɔ la awɔ dɔ abe kpeɖeŋutɔ ene. Eya ta mele be míahe ɖe megbe le Mawu ƒe Nyaa me nyateƒenya gogloawo sɔsrɔ̃ ŋu o. Nyateƒe siawo nye ‘Mawu ŋuti sidzedze’ xɔasi la ƒe akpa aɖe, eye wode dzi ƒo na mí be míaku wo me. (Mixlẽ Lododowo 2:1-5.) Nyateƒe siawo nana míegasea nu geɖe gɔme ku ɖe “nu siwo Mawu dzra ɖo ɖi na ame siwo lɔ̃nɛ la” ŋu. Ne míele agbagba dzem be míasrɔ̃ nu geɖe tso Yehowa ƒe Nyaa ŋu la, gbɔgbɔ kɔkɔea akpe ɖe mía ŋu, elabena “gbɔgbɔ la dzroa nuwo katã me kpɔ, Mawu ƒe nu goglowo kura gɔ̃ hã.”—1 Kor. 2:9, 10.
[Etenuŋɔŋlɔ]
Aleke Nàɖo Wo Ŋui?
• Mɔ eve kawo nue gbɔgbɔ la kpena ɖe mía ŋu be míadzro ‘Mawu ƒe nu gogloawo’ me le?
• Ame kawo dzie gbɔgbɔ kɔkɔe la to ɖe nyateƒenya goglowo ɖe go le ƒe alafa gbãtɔ me?
• Alekee gbɔgbɔ kɔkɔea le dɔ wɔm egbea be wòana numekɔkɔ yeyewo mí?
• Nu kawoe nàte ŋu awɔ be akpa si wɔm gbɔgbɔa le la naɖe vi na wò?
[Aɖaka si le axa 22]
Ale Si Gbɔgbɔ La Ðe Nu Si Gbɔgbɔmegbedoxɔa Fia La Me
‘Mawu ƒe nu goglo’ siwo woɖe ɖe go le ƒe alafa gbãtɔ me dometɔ ɖekae nye be avɔgbadɔa kple gbedoxɔ siwo wova tu ɖe eyome la nye vɔvɔli na gbɔgbɔmeɖoɖo aɖe si de ŋgɔ wu sãsãsã. Paulo yɔ ɖoɖo sia be “agbadɔ vavã si Yehowa tu, eye menye amee tui o.” (Heb. 8:2) Esia nye gbɔgbɔmegbedoxɔ gã aɖe, si nye ɖoɖo si Mawu wɔ to Yesu Kristo ƒe vɔsaa kple eƒe nunɔlanyenye dzi be amegbetɔwo nate ŋu ate ɖe ye ŋu.
“Agbadɔ vavã” la va li tso ƒe 29 M.Ŋ. me esime wonyrɔ Yesu eye Yehowa xɔe abe ame si ava nye vɔsa deblibo ene. (Heb. 10:5-10) Le Yesu ƒe ku kple tsitretsitsi megbe la, ege ɖe gbɔgbɔmegbedoxɔa ƒe Kɔkɔeƒe ƒe Kɔkɔeƒea eye wòtsɔ eƒe vɔsaa ƒe asixɔxɔ “[do] ɖe Mawu ŋutɔ ŋkume.”—Heb. 9:11, 12, 24.
Apostolo Paulo ŋlɔ tso Kristotɔ amesiaminawo ŋu le eƒe agbalẽ bubu aɖe me be wole “tsitsim . . . le gbedoxɔ kɔkɔe zum na Yehowa.” (Ef. 2:20-22) “Agbadɔ vavã” si ŋu wòƒo nu tso le agbalẽ si wòŋlɔ na Hebritɔwo emegbe me la kee wòwɔnɛ le afi sia? Ƒe blananewo va yi la, Yehowa subɔlawo susui be eya kee. Ewɔ na wo be ɖe wodzraa Kristotɔ amesiaminawo ɖo le anyigba dzi afi sia be woava zu ‘xɔtukpewo’ le Yehowa ƒe dziƒogbedoxɔa me.—1 Pet. 2:5.
Gake le ƒe 1971 me lɔƒo la, kluvi ƒe ha la me tɔ siwo nɔ ŋgɔ xɔm la va nɔ dzesi demee be gbedoxɔ si ŋu Paulo ƒo nu tsoe le Efesotɔwo ƒe agbalẽa me la mate ŋu anye Yehowa ƒe gbɔgbɔmegbedoxɔ gã la o. Ne ɖe Kristotɔ amesiamina siwo wofɔ ɖe tsitre lae nye ‘agbadɔ vavãa’ la, ke afia be ɣeyiɣi si me wote wo fɔfɔ ɖe tsitre megbe, le “Aƒetɔ la ƒe anyinɔɣi la” mee woaɖo agbadɔ sia anyi. (1 Tes. 4:15-17) Gake esi Paulo nɔ nu ƒom tso agbadɔ sia ŋu la, eŋlɔ bena: “Agbadɔ sia tututu nye kpɔɖeŋu na ɣeyiɣi ɖoɖi si me míele azɔ.”—Heb. 9:9.
Esi wotsɔ mawunyakpukpui siawo kple bubuwo sɔ kple wo nɔewo la, eme va kɔ nyuie be menye fifiae wole gbɔgbɔmegbedoxɔa tum o eye be Kristotɔ amesiaminawo menye “kpe” siwo wole dzadzram ɖo le anyigba dzi be woava nye xɔ sia ƒe akpa aɖe o. Ke boŋ Kristotɔ amesiaminawo le subɔsubɔm le gbɔgbɔmegbedoxɔ la ƒe xɔxɔnu kple eƒe Kɔkɔeƒe la hele ‘kafukafuvɔ’ sam na Mawu gbe sia gbe.—Heb. 13:15.
[Nɔnɔmetata si le axa 23]
Nu kawoe míate ŋu awɔ be ‘Mawu ƒe nu gogloawo’ ŋuti gɔmesese geɖe wu nasu mía si?