Eʋã Wo Wotso Kpla Ðe Dɔ Ŋu!

 4. Yoel ƒe nyagblɔɖinya kae va eme le ƒe 33 M.Ŋ. ƒe Pentekoste-ŋkekea dzi?

⁴ Esi nusrɔ̃la siwo nɔ Yerusalem nya xɔ gbɔgbɔ kɔkɔea ko la, womegblẽ ɣeyiɣi kura le xɔxɔ nyanyuia gbɔgblɔ na ame bubuwo me o, wodze egɔme tso ameha siwo kpe ta le Pentekoste-ŋkekea dzi ŋdi ma la dzi. Woƒe gbeƒãɖeɖea na nyagblɔɖi ɖedzesi aɖe si Yoel, Petuel vi, ŋlɔ ƒe alafa enyi do ŋgɔ la va eme: “Matrɔ nye gbɔgbɔ la akɔ ɖe ŋutilãwo katã dzi, eye miaƒe ŋutsuviwo kple miaƒe nyɔnuviwo agblɔ nya ɖi, miaƒe amegã ɖeɖiwo aku drɔ̃ewo, eye miaƒe ɖekakpuiwo akpɔ ŋutegawo. Matrɔ nye gbɔgbɔ la akɔ ɖe kluviwo kple kosiviwo hã dzi ɣemaɣi. . . . Hafi Yehowa ƒe ŋkeke gã dziŋɔ la nava ɖo.”—Yoel 1:1; 3:1, 2, 4; Dɔwɔwɔwo 2:17, 18, 20.

 5. Susu ka nue ƒe alafa gbãtɔ me Kristotɔwo gblɔ nya ɖi le? (Kpɔ etenuŋɔŋlɔa.)

⁵ Ðe esia fia be Mawu aɖo nyagblɔɖilawo ƒe dzidzime aɖe, woanye ŋutsuwo kple nyɔnuwo siaa abe Dawid, Yoel, kple Debora ene, ahazã wo woagblɔ etsɔme ɖia? Ao. ‘Ŋutsuvi kple nyɔnuvi, kluvi kple kosivi’ Kristotɔwo agblɔ nya ɖi le susua nu be Yehowa ƒe gbɔgbɔ aʋã wo woaɖe gbeƒã ‘nu dzɔtsu’ siwo Yehowa wɔ va yi kple esiwo wòagawɔ la. Eyata woanye Dziƒoʋĩtɔ la ƒe nyanuɖelawo.a Gake aleke ameha la wɔ nui?—Hebritɔwo 1:1, 2.