Ðe Gbeƒã Le Gaglãgbe Hena Ðeɖekpɔkpɔ
“Amesiame si ayɔ Yehowa ƒe ŋkɔa la, woaɖee.”—ROMATƆWO 10:13, NW.
1. Nuxlɔ̃ame kae wona le ŋutinya katã me?
WOƑO nu tso ‘Yehowa ƒe ŋkeke’ geɖe ŋu le ŋutinya me. Noa ƒe ŋkekea me tsiɖɔɖɔa, Sodom kple Gomora tsɔtsrɔ̃, kple Yerusalem tsɔtsrɔ̃ le ƒe 607 D.M.Ŋ. kple ƒe 70 M.Ŋ. me nye Yehowa ƒe ŋkeke dziŋɔwo. Wonye ŋkeke siwo dzi wodrɔ̃ ʋɔnu amesiwo dze aglã ɖe Yehowa ŋu. (Maleaxi 3:23; Luka 21:22) Le ŋkeke mawo me la, ame geɖe tsrɔ̃ le woƒe vɔ̃ɖivɔ̃ɖi ta. Gake ame aɖewo tsi agbe. Yehowa na woxlɔ̃ nu amewo tsɔ na nyanya ame vɔ̃ɖiwo le afɔku si nɔ ŋgɔ ŋu eye wòna mɔnukpɔkpɔ dzinyuitɔwo be woakpɔ ɖeɖe.
2, 3. (a) Nuxlɔ̃amenya si nye nyagblɔɖi kae wogblɔ le Pentekoste-ŋkekea dzi? (b) Nukae va hiã le Yehowa ƒe ŋkɔa yɔyɔ me tso Pentekoste 33 M.Ŋ. me dzi?
2 Yerusalem ƒe tsɔtsrɔ̃ le ƒe 70 M.Ŋ. me nye esia ƒe kpɔɖeŋu ɖedzesi aɖe. Nyagblɔɖila Yoel gblɔ nudzɔdzɔ ma ɖi ƒe 900 kloe do ŋgɔ esime wòŋlɔ bena: “Mana nukunuwo nado ɖe dziƒo ŋu kple anyigba dzi: Ʋu, dzo kple dzudzɔbabla kɔtɔɔ. Ɣe ado viviti, eye ɣleti azu ʋu, hafi Yehowa ƒe ŋkeke gã dziŋɔ la nava ɖo.” Aleke ame aɖe awɔ atsi agbe le ŋɔdzi ƒe ɣeyiɣi sia me? Gbɔgbɔ ʋã Yoel wòŋlɔ bena: “[Ava] me be, woaɖe amesiame, si ayɔ Yehowa ŋkɔ la; elabena xɔname anɔ Zion-to la dzi kple Yerusalem kpakple ame mamlea, siwo Yehowa ayɔ la dome, abe alesi Yehowa do eŋugbee ene.”—Yoel 3:3-5.
3 Le Pentekoste 33 M.Ŋ. me la, apostolo Petro ƒo nu na ameha siwo nye Yudatɔwo kple trɔ̃subɔla zu Yudatɔwo le Yerusalem eye wòyɔ Yoel ƒe nyagblɔɖia tsɔ fia eƒe nyaselawo be woate ŋu akpɔ mɔ be ava eme le woƒe ŋkekea me: “Mana nukunuwo nado ɖe dziƒo ŋu, eye dzesiwo nado ɖe anyigba dzi, ʋu kple dzo kple dzudzɔbabla kɔtɔɔ. Ɣe latrɔ zu viviti, eye ɣleti latrɔ zu ʋu, hafi Aƒetɔ ƒe ŋkeke gã, si nye atsyɔ̃ŋkeke la nava ɖo. Eye wòava me bena, amesiame, si ke ayɔ Aƒetɔ la ƒe ŋkɔa la, woaɖee.” (Dɔwɔwɔwo 2:16-21) Ameha siwo nɔ to ɖom Petro la katã nɔ Mose ƒe Sea te, eyata wonya Yehowa ƒe ŋkɔa. Petro ɖe eme be tso ɣemaɣi la, Yehowa ƒe ŋkɔa yɔyɔ abia nu bubu aɖewo. Esi ɖe dzesi wu le wo mee nye be woaxɔ nyɔnyrɔ le Yesu, amesi wowu eye wofɔ ɖe tsitre yi makumakugbenɔnɔ me le dziƒo la ƒe ŋkɔ me.—Dɔwɔwɔwo 2:37, 38.
4. Gbedasi kae Kristotɔwo ɖe gbeƒãe na amewo?
4 Tso Pentekoste-ŋkekea dzi heyina la, Kristotɔwo kaka Yesu ƒe tsitretsitsi ŋuti nya la. (Korintotɔwo I, 1:23) Wogblɔe be Yehowa Mawu ate ŋu axɔ amegbetɔwo woava zu eƒe gbɔgbɔmeviwo kple “Mawu ƒe Israel” yeye, si nye gbɔgbɔmedukɔ si ‘aɖe gbeƒã Yehowa ƒe nutsuwɔwɔwo afia’ la me tɔwo. (Galatiatɔwo 6:16; Petro I, 2:9) Amesiwo wɔ nuteƒe vaseɖe ku me anyi makumakugbenɔnɔ dome le dziƒo ava zu hatidomenyilawo kple Yesu le eƒe Dziƒofiaɖuƒea me. (Mateo 24:13; Romatɔwo 8:15, 16; Korintotɔwo I, 15:50-54) Tsɔ kpe ɖe eŋu la, ele be Kristotɔ siawo naɖe gbeƒã Yehowa ƒe ŋkeke gã dziŋɔ si nɔ ŋgɔ. Ele be woaxlɔ̃ nu Yudatɔwo be xaxa si lolo wu ɖesiaɖe si dzɔ ɖe Yerusalem kple amesiwo be Mawu ƒe dukɔe yewonye dzi kpɔ vaseɖe ɣemaɣi la ava wo dzi. Gake ame aɖewo atsi agbe. Amekawoe? Amesiwo ayɔ Yehowa ƒe ŋkɔa.
“Le Ŋkeke Mamleawo Me”
5. Nyagblɔɖi kawoe va eme egbea?
5 Nɔnɔme siwo do mo ɖa ɣemaɣi la nye vɔvɔli na nusiwo kpɔm míele egbea le mɔ geɖe nu. Tso ƒe 1914 me ke la, ameƒomea le ɣeyiɣi tɔxɛ aɖe si Biblia yɔ be “nuwuɣi,” ‘nuɖoanyiawo ƒe nuwuwu,’ kple “ŋkeke mamleawo” la me. (Daniel 12:1, 4; Mateo 24:3-8; Timoteo II, 3:1-5, 13) Le míaƒe ƒe alafa sia me la, aʋawɔwɔ vɔ̃ɖiwo, ʋunyaʋunyawɔwɔ si nu womete ŋu léna o, kpakple hadomegbenɔnɔ kple yamenutome ƒe gbegblẽ na Biblia ƒe nyagblɔɖi va eme wòɖe dzesi. Esiawo katã nye dzesi siwo Yesu gblɔ ɖi ƒe akpa aɖe, si fia be esusɔ vie Yehowa ƒe ŋkeke dziŋɔ mamlɛ si atso nya sia nya me la nava ameƒomea dzi. Esia awu enu ɖe Harmagedon-ʋa si nye “xaxa gã [si] meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o” la ƒe taƒoƒo me.—Mateo 24:21; Nyaɖeɖefia 16:16.
6. (a) Aleke Yehowa le nu wɔm be yeatsɔ aɖe ame fafawoe? (b) Afikae míakpɔ aɖaŋu si Paulo ɖo le alesi míawɔ atsi agbe ŋu la le?
6 Esi tsɔtsrɔ̃ŋkekea le aƒe tum ɖe edzi ta la, Yehowa le dɔ wɔm tso ame fafawo ƒe ɖeɖekpɔkpɔ ŋu. Le “nuwuɣi” sia me la, eƒo Mawu ƒe gbɔgbɔ me Israel la ƒe ame susɔeawo nu ƒu eye tso ƒe 1930 ƒe ƒeawo me la, etrɔ esubɔla siwo le anyigba dzi ƒe susu ɖe “ameha gã, si ame aɖeke mete ŋu xlẽ o la, tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me” la nu ƒoƒo ƒu ŋu. Amesiawo ƒe ƒuƒoƒoa atsi agbe “[atso] xaxa gã” la. (Nyaɖeɖefia 7:9, 14) Gake aleke ame ɖesiaɖe ate ŋu ana kakaɖedzi nanɔ eƒe agbetsitsi ŋui? Apostolo Paulo ɖo biabia ma ŋu. Eɖo aɖaŋu nyui aɖe le agbetsitsi ŋu le Romatɔwo ta 10—aɖaŋuɖoɖo si sɔ le eƒe ŋkekea me eye wògasɔ na mía tɔ hã.
Gbedodoɖa Hena Ðeɖekpɔkpɔ
7. (a) Mɔkpɔkpɔ ka ŋue woƒo nu tsoe le Romatɔwo 10:1, 2? (b) Nukata wòle be Yehowa nana woaɖe gbeƒã ‘nyanyuia’ wòaɖo didiƒe wu?
7 Esime Paulo ŋlɔ Romatɔwo ƒe agbalẽa la, Yehowa gbe Israel xoxo be meganye yeƒe dukɔ o. Ke hã apostoloa gblɔ be: “Nye dzimedidi kple nye kukuɖeɖe, si meɖena na Mawu ɖe Israel ta la, enye si bena woakpɔ xɔxɔ.” Eƒe mɔkpɔkpɔe nye be Mawu ƒe lɔlɔ̃nu ŋuti sidzedze vavãtɔ nasu Yudatɔ ɖekaɖekawo si, si awɔe be woaɖe wo. (Romatɔwo 10:1, 2) Tsɔ kpe ɖe eŋu la, Yehowa adi be ameƒomea ƒe xexeme bliboa katã me tɔ siwo ɖea xɔse fiana la nakpɔ ɖeɖe, abe alesi Yohanes 3:16 gblɔ ene be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.” Yesu ƒe tafevɔsa la ʋu ɖeɖekpɔkpɔ wɔnuku ma ƒe mɔ ɖi. Abe alesi wònɔ le Noa ƒe ŋkekea kple ʋɔnudrɔ̃ŋkeke bubu siwo kplɔe ɖo me ene la, Yehowa na woɖe gbeƒã “nyanyui” tsɔ fia ɖeɖekpɔkpɔ ƒe mɔ amewo.—Marko 13:10, 19, 20.
8. Amekawoe Kristotɔwo dia nyui na egbea le Paulo sɔsrɔ̃ me, eye to mɔ ka dzi?
8 Paulo ɖe gbeƒã le mɔnukpɔkpɔ ɖesiaɖe me tsɔ ɖe eya ŋutɔ ƒe ɖetsɔleme na Yudatɔwo kple Trɔ̃subɔlawo siaa fia. ‘Eƒoe ɖe Yudatɔwo kple Helatɔwo nu woxɔe se.’ Egblɔ na Efeso-hamemegãwo be: “Nyemegbe naneke, si nyo na mi la, takaka na mi o; eye mefia nu mi le gaglãgbe kple tso aƒe me yi aƒe me, hele dzimetɔtrɔ yi Mawu gbɔ kple mía Aƒetɔ Yesu Kristo dzixɔxɔse ŋuti ɖase ɖim na Yudatɔwo kple Helatɔwo siaa.” (Dɔwɔwɔwo 18:4; 20:20, 21) Nenema ke egbea Yehowa Ðasefowo dzea agbagba le gbeƒãɖeɖe me, menye na amesiwo yɔa wo ɖokui Kristotɔwo la ɖeɖeko o ke na amewo katã, vaseɖe “anyigba ƒe seƒe ke” gɔ̃ hã.—Dɔwɔwɔwo 1:8; 18:5.
Gbeƒãɖeɖe ‘Xɔse ƒe “Nya” La’
9. (a) Xɔse ka tɔgbe ƒe dzie Romatɔwo 10:8, 9 de ƒo? (b) Ɣekaɣie wòle be míaʋu míaƒe xɔse me eye aleke míawɔe?
9 Ðeɖekpɔkpɔ bia be xɔse nanɔ ame si ɖaa. Paulo yɔ nya tso Mose V, 30:14 hegblɔ be: “ ‘Nya la tsɔ ɖe gbɔwò kpuie, ele nuwò me kple dziwò me hã;’ esiae nye xɔse, si ƒe gbeƒã ɖem míele la.” (Romatɔwo 10:8) Esi míele gbeƒã ɖem ‘xɔse ƒe “nya” ’ ma la, exɔa aƒe ɖe míaƒe dzime geɖe wu. Nenemae wònɔ le Paulo gome, eye nya siwo wògagblɔ ate ŋu ado ŋusẽ tame si míeɖo kplikpaa be míanɔ abe eyama ene le nuƒoƒo tso xɔse ma ŋu na ame bubuwo me: “Ne èʋua eme kple wò nu bena, Yesu ye nye Aƒetɔ la, eye nèxɔna sena le wò dzi me bena, Mawu fɔ eyama ɖe tsitre tso ame kukuwo dome la, àkpɔ xɔxɔ.” (Romatɔwo 10:9) Menye nyɔnyrɔxɔɣi koe wowɔa nyameʋuʋu sia le amewo ŋkume o ke ele be wòanye nyameʋuʋu si yia edzi, si nye ɖaseɖiɖi tso nyateƒea ƒe akpa veviawo katã ŋu veviedodotɔe le gaglãgbe. Nyateƒe sia ku ɖe Fiagã Aƒetɔ Yehowa ƒe ŋkɔ xɔasia; míaƒe Mesia Fia kple Tafexela, Aƒetɔ Yesu Kristo; kple Fiaɖuƒea ŋuti ŋugbedodo nyuiawo ŋu.
10. Le ɖekawɔwɔ me kple Romatɔwo 10:10, 11 la, nukae wòle be míawɔ le ‘xɔse ƒe “nya” ’ sia ŋu?
10 Amesiame si mexɔa ‘xɔse ƒe “nya” ’ sia hewɔna ɖe edzi o makpɔ ɖeɖe o, abe alesi apostoloa yi edzi gblɔ ene be: “Wotsɔa dzi xɔna sena hena dzɔdzɔenyenye, eye wotsɔa nu ʋua eme hena agbexɔxɔ la. Elabena ŋɔŋlɔ la gblɔ be: ‘Amesiame, si xɔa edzi sena la, womado ŋukpee o.’ ” (Romatɔwo 10:10, 11) Ele be ‘xɔse ƒe “nya” ’ sia ŋuti sidzedze vavãtɔ nasu mía si eye míayi edzi atui ɖo le míaƒe dzime ale be wòaʋã mí míagblɔe na ame bubuwo. Yesu ŋutɔ ɖo ŋku edzi na mí be: “Amesi ke kpe ŋu nye kple nye nyawo le dzidzime wɔahasi kple dzidzime wɔnuvɔ̃ sia dome la, Amegbetɔvi la hã akpe ŋui, ne ava le Fofoa ƒe ŋutikɔkɔe me kple mawudɔla kɔkɔeawo.”—Marko 8:38.
11. Afikae wòle be woaɖe gbeƒã nyanyuia ase ɖo, eye nukatae?
11 Abe alesi nyagblɔɖila Daniel gblɔe ɖi ene la, “nunyalawo” le keklẽm “abe dziŋgɔli ƒe keklẽ ene” le nuwuɣi sia me, esi Fiaɖuƒe ŋuti ɖaseɖiɖia keke ta ɖo anyigba ƒe seƒewo ke. Wole “dzɔdzɔenyenye ƒe mɔ nu [fiam] ame geɖewo,” eye sidzedze akuakua va xɔ aƒe ɖi nyateƒe, elabena Yehowa le kekeli geɖe wu klẽm ɖe nyagblɔɖi siwo ku ɖe nuwuɣi sia ŋu la dzi. (Daniel 12:3, 4) Enye xɔxɔgbedasi si hiã vevie le amesiwo katã lɔ̃ nyateƒe kple dzɔdzɔenyenye la ƒe agbetsitsi me.
12. Aleke Romatɔwo 10:12 wɔ ɖeka kple mawudɔla la ƒe dɔ si ŋu woƒo nu tsoe le Nyaɖeɖefia 14:6?
12 Apostolo Paulo yi edzi be: “Vovototo aɖeke mele Yudatɔ kple Helatɔ dome o, elabena Aƒetɔ ma kee nye wo katã tɔ, eyae nye kesinɔtɔ na amesiwo katã yɔnɛ la.” (Romatɔwo 10:12) Ele be woaɖe gbeƒã ‘nyanyuia’ egbea le xexeame katã wu tsã—na amewo katã le keke anyigba ƒe seƒewo ke. Mawudɔla si ŋu woƒo nu tsoe le Nyaɖeɖefia 14:6 la yi edzi le dzodzom le dziƒo titina, eye etsɔ “nyanyui mavɔ” le mía nam be “[míagblɔe] afia anyigbadzinɔlawo kple trɔ̃subɔlawo katã kple to sia to kple gbegbɔgblɔ sia gbegbɔgblɔ kpakple dukɔ sia dukɔ.” Vi kae wòaɖe na amesiwo wɔa nu ɖe enu?
Yehowa ƒe Ŋkɔa Yɔyɔ
13. (a) Nukae nye míaƒe ƒe 1998 ƒea ƒe mawunyakpukpui? (b) Nukata ƒea ƒe mawunyakpukpui sia sɔ ŋutɔ egbea?
13 Paulo yɔ nya tso Yoel 3:5 hegblɔ bena: “Amesiame si ayɔ Yehowa ƒe ŋkɔa la, woaɖee.” (Romatɔwo 10:13, NW) Aleke gbegbe wòsɔe nye si be wotia nya mawo wònye ƒea ƒe mawunyakpukpui na Yehowa Ðasefowo le ƒe 1998 me! Meva hiã vevie le ɣeyiɣi aɖeke me kpɔ be míatsɔ ŋuɖoɖo ɖe Yehowa ŋu ayi ŋgɔe, eye míana amewo nanya eƒe ŋkɔa kple tameɖoɖo wɔnuku siwo le eŋu wu fifia o! Gbedasia gale ɖiɖim le fifi nuɖoanyi gbegblẽ sia ƒe ŋkeke mamlɛawo me abe alesi wònɔ le ƒe alafa gbãtɔ me ene be: “Mina woaɖe mi tso dzidzime gɔglɔ̃ sia me!” (Dɔwɔwɔwo 2:40) Enye amekpekpe si le abe kpẽkuku ene na mawuvɔ̃la siwo le xexeame godoo be woayɔ Yehowa be wòaɖe wo kple amesiwo ɖoa to nyanyui si woɖea gbeƒãe le dutoƒo la hã.—Timoteo I, 4:16.
14. Agakpe kae wòle be míayɔ hena ɖeɖekpɔkpɔ?
14 Nukae adzɔ ne Yehowa ƒe ŋkeke gã la ɖo edzi le anyigba sia dzi? Ame akpa gãtɔ makpɔ Yehowa sinu hena ɖeɖekpɔkpɔ o. Ameƒomea ƒe akpa gãtɔ “[agblɔ] na towo kple agawo bena: Mimu dze mía dzi, eye miɣla mí tso amesi bɔbɔ nɔ fiazikpui dzi la ƒe ŋku me, eye tso alẽvi la ƒe dziku la nu.” (Nyaɖeɖefia 6:15, 16) Woatsɔ woƒe mɔkpɔkpɔwo ada ɖe nuɖoanyi sia me habɔbɔ kple ɖoɖo siwo le abe towo ene la dzi. Gake aleke wòade wo dzie nye si ne ɖe woaɖo ŋu ɖe Yehowa Mawu, Agakpe gãtɔ kekeake la ŋu! (Mose V, 32:3, 4) Fia Dawid gblɔ le eŋu be: “Yehowa, nye agakpe, nye mɔ̃ kple nye xɔnametɔ.” Yehowae nye “míaƒe xɔname ƒe agakpe.” (Psalmo 18:3; 95:1) Eƒe ŋkɔa nye “mɔ̃ sesẽ,” si nye “mɔ̃” ɖeka kolia si sesẽ akpɔ mía ta le afɔku siwo gbɔna me. (Lododowo 18:10) Eyata ele vevie be míafia amegbetɔ siwo de biliɔn ade kloe siwo li egbea la dometɔ geɖe alesi míate ŋui be woayɔ Yehowa ƒe ŋkɔa le nuteƒewɔwɔ kple anukwareɖiɖi me.
15. Nukae Romatɔwo 10:14 ɖe fia le xɔse ŋu?
15 Esɔ be apostolo Paulo bia tsɔ yi edzi be: “Azɔ aleke woayɔ amesi dzi womexɔ se o la mahã?” (Romatɔwo 10:14) Ðewohĩ ame gbogbo aɖewo li siwo ŋu míakpe ɖo be woawɔ ‘xɔse ƒe “nya” la’ wo tɔe, ale be woayɔ Yehowa hena ɖeɖekpɔkpɔ. Xɔse le vevie ŋutɔ. Paulo gblɔ le lɛta bubu me be: “Ne xɔse mele mía si o la, míate ŋu adze Mawu ŋu o; elabena ele be, amesi ke tena va Mawu gbɔ la, naxɔ ase be, Mawu li, eye [wònye] teƒeɖola na amesiwo dinɛ vevie.” (Hebritɔwo 11:6) Gake aleke ame miliɔn geɖe bubuwo awɔ ava xɔ Mawu dzi ase? Paulo bia le lɛta si wòŋlɔ na Romatɔwo me be: “Aleke woaxɔ amesi ŋutinya womese kpɔ o la dzi ase mahã?” (Romatɔwo 10:14) Ðe Yehowa wɔ ɖoɖo be woate ŋu aseea? Ẽ, ewɔ ɖoɖo! Se nya si Paulo bia yi edzii ɖa: “Aleke woase nya, ne nyanyui gbeƒãɖela aɖeke mele wo si o mahã?”
16. Nukata gbeƒãɖelawo hiã vevie le Mawu ƒe ɖoɖoa me?
16 Edze le Paulo ƒe nyaawo me kɔte be gbeƒãɖelawo hiã. Yesu ɖee fia be nenemae wòanɔ va ɖo ‘nuɖoanyiawo ƒe nuwuwu.’ (Mateo 24:14; 28:18-20) Gbeƒãɖeɖe nye ɖoɖo si Mawu wɔ be woakpe ɖe amewo ŋu woayɔ Yehowa ƒe ŋkɔ be woakpɔ ɖeɖe la ƒe akpa vevi aɖe. Le Kristodukɔa dome gɔ̃ hã la, ame akpa gãtɔ mewɔa naneke tsɔ dea bubu Mawu ƒe ŋkɔ xɔasia ŋu o. Ame geɖe tsɔ Yehowa tɔtɔ kple nu eve bubuwo dziɖeleameƒotɔe le Mawuɖekaetɔ̃nufiafia si ŋu gɔmesese mele o la me. Azɔ hã ame geɖe le amesiwo ŋu woƒo nu tsoe le Psalmo 14:1 kple 53:2 la dome, si gblɔ be: “Abunetɔwo gblɔna le woƒe dzi me be: Mawu aɖeke meli o.” Ele be woanya be Yehowae nye Mawu gbagbe la, eye ele be woase nusiwo katã eƒe ŋkɔa tsi tre ɖi na la gɔme hafi woakpɔ ɖeɖe le xaxa gã si gbɔna me.
Gbeƒãɖelawo ƒe ‘Afɔ Dzeaniawo’
17. (a) Nukata wòsɔ be Paulo nayɔ gbugbɔɖoanyi ŋuti nyagblɔɖi me nyawo? (b) Nukae wòfia be ‘afɔ dzeani’ nanɔ ame si?
17 Biabia vevi bubu aɖe gale apostolo Paulo si: “Aleke woaɖe gbeƒã ne womedɔ wo ɖa hafi o mahã? Abe alesi woŋlɔ ɖi ene bena: ‘Nyagblɔla, siwo gblɔa ŋutifafanya kple nyanyui la ƒe afɔwo nyo loo!’ ” (Romatɔwo 10:15) Nya siwo le Yesaya 52:7 si nye gbugbɔɖoanyi ŋuti nyagblɔɖi si le eme vam tso ƒe 1919 me lae Paulo yɔ le afisia. Egbea Yehowa gadɔ “du nyui xɔla . . . , amesi ɖea gbeƒã ŋutifafa, eye wòtoa gbe nyui, [amesi ɖea] gbeƒã xɔname.” Mawu ƒe ‘dzɔla’ amesiaminawo kple woƒe zɔhɛwo tsɔ toɖoɖo yi edzi le gbeƒã ɖem dzidzɔtɔe. (Yesaya 52:7, 8) Ðeɖi ate amesiwo le gbeƒã ɖem xɔxɔgbedasia ƒe afɔwo ŋu, eye aƒo ɖi gɔ̃ hã esi wozɔna tso aƒeme yia aƒeme ta, gake dzidzɔ sɔŋ ye dzena le mo na wo! Wonya be Yehowae de dɔ asi na yewo be yewoaɖe gbeƒã ŋutifafa nyanyuia ahafa akɔ na amesiwo le nu xam, eye yewoakpe ɖe amesiawo ŋu be woayɔ Yehowa ƒe ŋkɔ kple susu be woakpɔ ɖeɖe.
18. Nya kae Romatɔwo 10:16-18 gblɔ le nusi ado tso nyanyuia gbɔgblɔ me mlɔeba ŋu?
18 Amewo ‘ɖaxɔ nya si wose dzi se’ alo wotiae be yewomaɖo toe o, Paulo ƒe nyawo vaa eme kokoko be: “Alo ɖe womesee o mahã? Ẽ, vavãe! Woƒe numegbe ɖi hoo le anyigba blibo la katã dzi, eye woƒe nyawo de xexeme ƒe seƒewo ke.” (Romatɔwo 10:16-18) Abe alesi “dziƒowo le Mawu ƒe bubu xlẽm fia,” wòdze le eƒe asinudɔwɔwɔwo me ene la, nenemae wòle be eƒe Ðasefo siwo le anyigba dzi hã naɖe gbeƒã “Yehowa ƒe amenuveƒe kple mía Mawu ƒe hlɔ̃biaŋkeke la, ne [woafa] akɔ na konyifalawo katã.”—Psalmo 19:2-5; Yesaya 61:2.
19. Nukae amesiwo ‘yɔa Yehowa ƒe ŋkɔ’ egbea la akpɔ?
19 Yehowa ƒe ŋkeke gã dziŋɔ la le aƒe tum geɖe wu. “[Alele], ŋkeke la! Elabena Yehowa ƒe ŋkeke la tu aƒe, eye gbegblẽ wònye tso ŋusẽkatãtɔ la gbɔ gbɔna.” (Yoel 1:15; 3:4) Míele gbe dom ɖa be ame geɖe bubuwo natso ɖe nyanyuia ŋu kpata, eye woanyẽ zi ava Yehowa ƒe habɔbɔa me. (Yesaya 60:8; Xabakuk 2:3) Ðo ŋku edzi be Yehowa ƒe ŋkeke aɖewo he tsɔtsrɔ̃ vɛ na ame vɔ̃ɖiwo—le Noa ƒe ŋkekea me, le Lot ƒe ŋkekea me, kple Israel kple Yuda siwo gbe xɔse ƒe ŋkekeawo me. Fifia míele xaxa gãtɔ kekeake ƒe agbo nu, esime Yehowa ƒe ahom akplɔ vɔ̃ɖinyenye ɖa keŋkeŋ tso anyigba ŋkume, eye wòaʋu mɔ ɖi na paradiso si me ŋutifafa mavɔ anɔ. Ðe nànye amesi ‘yɔa Yehowa ƒe ŋkɔa’ le nuteƒewɔwɔ mea? Ne nenemae la, ke dzi nedzɔ wò! Mawu ŋutɔ do ŋugbe be àkpɔ ɖeɖe.—Romatɔwo 10:13.
Aleke Nàɖo Wo Ŋui?
◻ Nu yeye kawoe woɖe gbeƒãe le Pentekoste 33 M.Ŋ. megbe?
◻ Aleke wòle be Kristotɔwo nawɔ ɖe ‘xɔse ƒe “nya” la’ dzii?
◻ Nukae ‘Yehowa ƒe ŋkɔa yɔyɔ’ fia?
◻ Gɔmesese ka nue Fiaɖuƒea ƒe dɔlawo ƒe ‘afɔwo nyo’ le?
[Nɔnɔmetata siwo le axa 18]
Mawu ƒe amewo le gbeƒã ɖem eƒe nutsuwɔwɔwo le Puerto Rico, Senegal, Peru, Papua New Guinea—ẽ, le xexeame godoo