Yehowa Ƒe Ŋkeke La Tu Aƒe
“Mi amegã ɖeɖiwo, mise nya sia, eye mi anyigbadzitɔwo katã, miƒu to anyi!”—YOEL 1:2.
1, 2. Aleke nɔnɔmea nɔ le Yuda si ta Yehowa ʋã Yoel be wòagblɔ eƒe nyagblɔɖi sẽŋu ma?
‘ALELE, ŋkeke la! Elabena Yehowa ƒe ŋkeke la tu aƒe, eye gbegblẽ wònye tso Ŋusẽkatãtɔ la gbɔ gbɔna.’ Gbeƒãɖeɖe wɔdɔɖeamedzi ka gbegbee nye si! Mawu ƒe gbedasi na eƒe amewoe wònye eƒe nyagblɔɖila Yoel gblɔ.
2 Anɔ ƒe 820 D.M.Ŋ. mee woŋlɔ Yoel 1:15 me nya mawo le Yuda. Togbɛ damawo ɖo atsyɔ̃ na anyigba la ɣemaɣi. Atikutsetse kple nukuwo bɔ. Gbeɖuƒewo lolo eye wode ama. Gake, nane gblẽ ŋutɔ. Wonɔ Baal subɔm ale gbegbe le Yerusalem kple le Yuda-nyigba dzi. Ameawo mua aha nɔa aglo tum le alakpamawu sia ŋgɔ. (Tsɔe sɔ kple Kronika II, 21:4-6, 11.) Ðe Yehowa aɖe mɔ nusiawo katã nanɔ edzi yima?
3. Nuka ŋue Yehowa na nuxlɔ̃me le, eye ele be dukɔwo nadzra ɖo ɖe nuka ŋu?
3 Biblia-gbalẽ si nye Yoel gblɔ nya sia nya na mí kɔte. Yehowa Mawu aʋli eƒe dziɖulanyenye ta eye wòakɔ eƒe ŋkɔ kɔkɔea ŋu. Yehowa ƒe ŋkeke gã la tu aƒe. Mawu adrɔ̃ toheʋɔnu dukɔwo katã le “Yosafat ƒe bali la me.” (Yoel 4:12) Mina woadzra ɖo awɔ aʋa kple Yehowa, Ŋusẽkatãtɔ la. Míawo hã míedze ŋgɔ Yehowa ƒe ŋkeke gã la. Eyata mina míadzro Yoel ƒe nyagblɔɖinyawo na míaƒe ŋkekea kple na ɣeyiɣi siwo va yi me akpɔ.
Nudzodzoewo Va Gblẽ Nu
4. Aleke gbegbee nyadzɔdzɔ si ŋu Yoel xlɔ̃ nu le la atri akɔe?
4 Yehowa gblɔ to eƒe nyagblɔɖila la dzi be: “Mi amegã ɖeɖiwo, mise nya sia, eye mi anyigbadzitɔwo katã, miƒu to anyi! Ðe esia tɔgbe dzɔ le mia ŋɔli alo le mia fofowo ŋɔli kpɔa? Mixlẽe fia mia viwo, mia viwo naxlẽe afia wo viwo, eye wo viwo naxlẽe afia wo megbeviwo!” (Yoel 1:2, 3) Amegã ɖeɖiawo kple ameawo akpɔ mɔ na nusi medzɔ le woƒe agbe me alo wo fofowo ŋɔli kpɔ o. Awɔ nuku ale gbegbe be woagbugbɔ atoe na dzidzime etɔ̃lia ke hã! Nyadzɔdzɔ kae wɔ nuku nenema gbegbe? Be míanya la, mina míatsɔe be Yoel ƒe ŋkekea mee míele.
5, 6. (a) Ƒo nu tso nuwo gbegblẽ si Yoel gblɔ ɖi ŋu. (b) Amekae na wova gblẽ nu nenema?
5 Se ɖa! Yoel se hoowɔwɔ aɖe ɖaa. Yame do blukɔ, eye hoowɔwɔ dovoɖinamea nu gale sesẽm ɖe edzi esi blukɔa va do ɖe mía dzi. Tete blukɔ si ɖi dzudzɔbabla la ɖiɖi gbɔna. Nudzodzoe siwo sɔ gbɔ de miliɔn geɖe ye. Eye woƒe nugblẽƒe teƒe mekɔ o! Fifia bu Yoel 1:4 me nyawo ŋu kpɔ. Nudzodzoe gblẽnu siawo menye ʋetsuvi toaʋala siwo dzona ɖeɖeko o. Mevɔ hã o hee! Ʋetsuvi matoaʋala gbogbo aɖewo siwo dɔ le wuwum hã ta gbɔna kplɔ wo ɖo. Ya kplɔ ʋetsuviawo wova ɖo enumake, eye woƒe hoowɔwɔ le abe tasiaɖamwo tɔ ene. (Yoel 2:5) Le alesi wote ŋu ɖua nu kpatakpata ta la, woate ŋu atrɔ afisi ɖi paradiso la wòazu dzogbe enumake.
6 Ŋɔviwo—esiwo tsina va zua agbagblaʋui kple kpakpaluʋui—hã ta gbɔna. Ŋɔviwo ƒe ha gã si dɔ le wuwum la ate ŋu aɖu gbemumu vivivi, aɖu aŋgbawo ɖekaɖeka, vaseɖe esime aŋgba mumuwo katã kloe navɔ le atiwo dzi. Eye ʋetsuviawo va ɖua nusiwo wokpɔtɔ ɖi la ƒe akpa gã aɖe. Azɔ gbagbladza ɖablɛwo hã kplɔa wo ɖo va ɖua nusianu si wosusɔ ɖi la wovɔna ƒiaƒiaƒia. Gake de dzesi nusia: Mawu yɔ ʋetsuviʋakɔawo le Yoel ta 2, kpukpui 11 be wonye “[yeƒe] aʋakɔ.” Ẽ, eya Gbɔe ʋetsuvi gbogbo siwo agblẽ anyigba la eye woana dɔ nato vevie la tso. Ɣekaɣi? Do ŋgɔ teti na “Yehowa ƒe ŋkeke la.”
“Mi Ahamulawo, Minyɔ”!
7. (a) Nɔnɔme ka mee Yuda ƒe subɔsubɔhakplɔlawo nɔ? (b) Aleke nɔnɔme si me Kristodukɔa ƒe kplɔlawo le egbea ɖi Yuda ƒe subɔsubɔhakplɔlawo tɔe?
7 Wotɔ asi ameha ŋkɔgbegblẽxɔla aɖe si nye Yuda ƒe subɔsubɔhakplɔlawo dzi le gbe si woɖe me be: “Mi ahamulawo, minyɔ, eye mifa avi! Mi weintsunolawo katã, mixa nu ɖe aha yeye ŋu, elabena woɖee le nu me na mi.” (Yoel 1:5) Ẽ, wogblɔ na Yuda ƒe gbɔgbɔmehamulawo be ‘woanyɔ,’ woƒe ŋkume nakɔ. Gake mègasusu be blemanya koe nya sia nye o. Fifi laa, hafi Yehowa ƒe ŋkeke gã la nava la, Kristodukɔa ƒe subɔsubɔhakplɔlawo mu aha yeye le kpɔɖeŋunyagbɔgblɔ nu ale gbegbe be womele Dziƒoʋĩtɔ la ƒe yɔyɔ sia sem kura koŋ o. Aleke gbegbe woƒe nu aku ne Yehowa ƒe ŋkeke gã dziŋɔ la nyɔ wo tso aha si womu vlevlevle hele alɔ̃ dɔm la mee nye si!
8, 9. (a) Aleke Yoel ɖɔ ʋetsuviawo kple woƒe fuwɔamee? (b) Amekawoe ʋetsuviawo tsi tre ɖi na egbea?
8 Kpɔ ʋetsuviʋakɔ gã ma ɖa! “Dukɔ aɖe ho va nye anyigba dzi, ŋusẽ le eŋu, eye wòsɔ gbɔ kpaŋ, eƒe aɖuwo le abe dzatatsu ƒe aɖu ene, eye eƒe tsyo le abe dzatanɔ tɔ ene. Egblẽ nye weinkawo, eye wòŋe nye gbotiwo, eflo tsro le wo ŋu hetsɔ wo ƒu anyi, eye woƒe kawo fu ɣie. Xa nu abe ɖetugbi, si ta akpanya ɖe eƒe ɖetugbimesrɔ̃ ŋu la ene!”—Yoel 1:6-8.
9 Ʋetsuviwo ƒe “dukɔ,” ʋetsuvi gbogbo aɖe si va dze Yuda dzi ŋuti nyagblɔɖi koe esia nyea? Ao, eku ɖe nu geɖe ŋu wu ema. Wotsɔ ʋetsuviwo tsi tre ɖi na Mawu ƒe dukɔ le Yoel 1:6 kple Nyaɖeɖefia 9:7 siaa. Yehowa ƒe ʋetsuvi amesiaminawoe egbegbe ʋetsuviwo ƒe aʋakɔ la nye, amesiwo ŋu zɔhɛ siwo nye Yesu ƒe ‘alẽ bubuawo’ siwo ade 5,600,000 la kpe ɖo. (Yohanes 10:16) Ðe dzi mele dzɔwòm be nèle Yehowa subɔlawo ƒe ha gã sia dome oa?
10. Nukae ʋetsuviawo ƒe fuwɔame gblẽ le Yuda ŋu?
10 Yoel 1:9-12 gblɔ nusiwo ʋetsuvi gbogboawo gblẽ la na mí. Woƒe ha gã vovovo siwo kplɔ wo nɔewo ɖo na anyigba la ɖi gbɔlo keŋkeŋ. Esi nuku, wein, kple ami, megale nunɔla nuteƒemawɔlaawo si o ta la, womegate ŋu wɔ woƒe dɔwo o. Anyigba la gɔ̃ hã fa konyi, elabena ʋetsuviawo ɖu nukuwo katã le edzi, eye tsetse aɖeke megasusɔ ɖe kutsetseti aɖeke dzi o. Esi weintiawo tsrɔ̃ ta la, wein aɖeke meganɔe na Baal-subɔla weintsunola mawo siwo nye gbɔgbɔmehamulawo hã o.
‘Mi Nunɔlawo, Mifa Konyi’
11, 12. (a) Amekawoe ƒua asi akɔ be yewonye Mawu ƒe nunɔlawo egbea? (b) Nukae egbegbe ʋetsuviawo ƒe fuwɔame gblẽ le Kristodukɔa ƒe subɔsubɔhakplɔlawo ŋu?
11 Se gbedasi si le Mawu si na nunɔla godzela mawo ɖa: “Mi nunɔlawo, mibla ali dzi, ne miafa konyi! Mi vɔsamlekpui la subɔlawo, mifa avi.” (Yoel 1:13) Lewi-nunɔlawo nɔ subɔsubɔm le vɔsamlekpui ŋu le Yoel ƒe nyagblɔɖia ƒe emevava gbãtɔ me. Ke emevava mamlɛtɔ ya ɖe? Egbea la, Kristodukɔa ƒe subɔsubɔhakplɔlawo tso be yewoasubɔ le Mawu ƒe vɔsamlekpui ŋu, eye wole asi ƒum akɔ be yewonye eƒe dɔlawo, eƒe “nunɔlawo.” Gake nukae le dzɔdzɔm fifia esi Mawu ƒe egbegbe ʋetsuviwo le du dzi yina?
12 Ne Kristodukɔa ƒe “nunɔlawo” kpɔ Yehowa ƒe amewo le dɔ dzi eye wose nuxlɔ̃me si gblɔm wole tso Mawu ƒe ʋɔnudɔdrɔ̃ ŋu la, woxaa nu. Wotsɔa dzibibi kple dziku xaa nu ɖe nusiwo gblẽm Fiaɖuƒe gbedasia le le wo ŋu ta. Eye wofaa avi hehehe esi woƒe lãhawo le dzodzom le wo gbɔ. Esi woƒe gbeɖuƒewo le gbɔlo ɖim la, mina woata akpanya zã blibo katã, anɔ avi dzi ɖe woƒe fetu ƒe vɔvɔ ta. Eteƒe madidi kura o woƒe dɔ hã age le wo si! Le nyateƒe me la, Mawu gblɔ na wo be woafa konyi zã blibo katã elabena woƒe nuwuwu tu aƒe.
13. Ðe Kristodukɔ bliboa awɔ ɖe Yehowa ƒe nuxlɔ̃mea dzia?
13 Yoel 1:14 gblɔ be afisi ko mɔkpɔkpɔ le na woe nye be woatrɔ dzime eye woado ɣli ‘abia Yehowa ƒe kpekpeɖeŋu.’ Ðe míakpɔ mɔ be Kristodukɔa ƒe subɔsubɔhakplɔlawo katã natrɔ va Yehowa gbɔa? Gbeɖe! Ðewohĩ wo dometɔ ɖekaɖeka aɖewo awɔ ɖe Yehowa ƒe nuxlɔ̃mea dzi. Gake gbɔgbɔmedɔ si le subɔsubɔhakplɔla siawo kple woƒe hameviwo wum la ayi edzi. Nyagblɔɖila Amos gblɔ ɖi be: “Ale Aƒetɔ Yehowa gblɔ esi: Kpɔ ɖa, ŋkekewo li gbɔna, eye maɖo dɔwuame ɖe anyigba dzi, ke menye abolodɔ alo tsikɔwuame ɖe tsi ŋu o, ke boŋ ɖe Yehowa ƒe nyawo sese ŋu.” (Amos 8:11) Gake aleke míedaa akpe ɖe gbɔgbɔmenuɖuɖu dami ƒe kplɔ̃ si Mawu ɖona na mí lɔlɔ̃tɔe to “dɔla nuteƒewɔla kple aɖaŋudzela la” dzi tae nye si!—Mateo 24:45-47.
14. Nukae ʋetsuviawo ƒe fuwɔame nye dzesi na?
14 Ʋetsuviawo ƒe fuwɔame nye dzesi na nane si dzɔ va yi eye wòganye dzesi na esi gbɔna. Nuka ƒe dzesie? Yoel gblɔ nusi wònye na mí kɔte be: “[Alele], ŋkeke la! Elabena Yehowa ƒe ŋkeke la tu aƒe, eye gbegblẽ wònye tso [Ŋusẽkatãtɔ] la gbɔ gbɔna.” (Yoel 1:15) Mawu ƒe ʋetsuviʋakɔ la ƒe amedzidzedze egbea fia kɔte be Yehowa ƒe ŋkeke gã dziŋɔ la tu aƒe. Nyateƒee, dzianukwaretɔwo katã le mɔ kpɔm vevie na akɔntabiagbe tɔxɛ ma si dzi Mawu adrɔ̃ toheʋɔnu ame vɔ̃ɖiwo eye Yehowa aɖu aʋa dzi anye Xexeame Katã ƒe Fiagã.
15. Aleke amesiwo wɔna ɖe Mawu ƒe nuxlɔ̃mewo dzi wɔ nui esime dzɔgbevɔ̃e va anyigba la dzi?
15 Abe alesi Yoel 1:16-20 ɖee fia ene la, nuɖuɖu va vɔ le blema Yuda. Nenema ke aseyetsotso hã nu tsoe. Nuɖuɖudzraɖoƒewo ɖi gbɔlo, eye wòhiã be woamu avawo aƒu anyi. Esi ʋetsuviawo ɖu gbe damawo katã vɔ le anyigba la dzi ale be gbeɖuƒe meganɔ anyi o ta la, nyihawo nɔ tsatsam tramatrama eye alẽhawo tsrɔ̃. Dzɔgbevɔ̃e ka gbegbee nye si! Nukae dzɔ ɖe Yoel ya dzi le nɔnɔme mawo me? Egblɔ le kpukpui 19 be: “Yehowa, wò yɔm mele.” Egbea hã la, ame geɖe wɔ ɖe Mawu ƒe nuxlɔ̃mewo dzi eye wodo ɣli yɔ Yehowa Mawu le xɔse me.
“Yehowa ƒe Ŋkeke la Gbɔna”
16. Nukata wòle be “anyigbadzitɔwo katã” nadzo nyanyanya?
16 Se gbeɖeɖe si tso Mawu gbɔ ɖa: “Miku kpẽ le Zion, mido aƒa le nye to kɔkɔe la dzi! Anyigbadzitɔwo katã nedzo nyanyanya.” (Yoel 2:1) Nukata wòle be woawɔ nu nenema? Nyagblɔɖia ɖo eŋu be: “Elabena Yehowa ƒe ŋkeke la gbɔna, etu aƒe! Viviti kple blukɔdogbe, alilikpo kple tsizidogbe wònye! [Abe] alesi agudzedze gbagbana ɖe towo dzi [ene].” (Yoel 2:1, 2) Yehowa ƒe ŋkeke gã la bia nuwɔwɔ kpata ŋutɔŋutɔ.
17. Nukae ʋetsuviawo ƒe fuwɔame gblẽ le Yuda-nyigba kple edzinɔlawo ŋu?
17 Kpɔ dɔ si nyagblɔɖila la ƒe ŋutega la awɔ ɖe ame dzii ɖa le susu me esime ʋetsuvi gblẽnuawo trɔ afisi ɖi Eden-bɔ ŋutɔŋutɔ wòzu aƒedoe. Se alesi woɖɔ ʋetsuviʋakɔawoe ɖa: “Woƒe mo le abe sɔwo ƒe mo ene, eye wole du dzi abe sɔdolawo ene. Wole kpo tim le towo ta me abe tasiaɖamwo ƒe hoowɔwɔ ene; wole zi nyẽm, abe alesi dzo fiãa gbe ƒuƒui ene, eye wodze aʋa abe aʋakɔ gã aɖe ene. Dukɔwo dzo nyanyanya le eŋgɔ, eye mowo katã fu tititi.” (Yoel 2:4-6) Le ʋetsuviawo ƒe nugblẽɣi le Yoel ƒe ŋkekea me la, Baal-subɔlawo nɔ nu xam edziedzi, eye àkpɔe be nuxaxa na woƒe ŋkume wɔ sũu.
18, 19. Aleke Mawu ƒe amewo ƒe dɔwɔna egbea ɖi ʋetsuviawo ƒe fuwɔamee?
18 Naneke mexe mɔ na ʋetsuvi siwo le ɖoɖo nyui me eye ɖeɖi metea wo ŋu o la o. Wole du dzi “abe kalẽtɔwo ene” eye wolia gliwo hã. ‘Ne aŋutrɔ lɔ wo dometɔ aɖewo hã la, bubuawo kpɔa ŋgɔ tẽ.’ (Yoel 2:7, 8) Aleke woɖɔ Mawu ƒe egbegbe kpɔɖeŋu ʋetsuviʋakɔ la nyuie le nyagblɔɖi mee nye si! Egbea hã la, Yehowa ƒe ʋetsuviʋakɔa le ŋgɔ kpɔm tẽ. Tsitretsiɖeŋu aɖeke si le abe “gli” ene meɖea dzi le wo ƒo o. Womegbea nuteƒewɔwɔ na Mawu o, ke boŋ wole klalo be yewoaku gɔ̃ hã, abe alesi Ðasefo akpe geɖe ‘tsi aŋutrɔwo nu’ esime wogbe be yewomado gbe na Hitler, Nazi Germanytɔ la o ene.
19 Mawu ƒe egbegbe ʋetsuviʋakɔ la ɖi ɖase tsitotsito le ‘du’ si nye Kristodukɔa me. (Yoel 2:9) Wowɔ nusia le xexeame godoo. Wogale kpo tim to mɔxenu ɖesiaɖe ta kokoko, wogena ɖe aƒe miliɔn geɖe me, wotena ɖe amewo ŋu le ablɔdzi, woɖoa dze kpli wo le telefon dzi, eye wotoa mɔ ɖesiaɖe si woate ŋui dzi gblɔa Yehowa ƒe gbedasi fiaa amewo. Le nyateƒe me la, womã Biblia-srɔ̃gbalẽ biliɔn geɖe eye woagamã geɖe akpee le subɔsubɔdɔ si wɔm wole madzudzɔmadzudzɔe me—le gaglãgbe kple tso aƒeme yi aƒeme siaa.—Dɔwɔwɔwo 20:20, 21.
20. Amekawoe le kpekpem ɖe egbegbe ʋetsuviawo ŋu, eye nukae do tso eme?
20 Yoel 2:10 fia be ʋetsuviwo ƒe ha gã aɖe le abe alilikpo si ate ŋu axe ɣe, ɣleti, kple ɣletiviwo ŋgɔ ene. (Tsɔe sɔ kple Yesaya 60:8.) Ðe mènya amesi dɔ aʋakɔ sia oa? Míese Yoel 2:11 me nyawo le ʋetsuviawo ƒe hoowɔwɔ ŋgɔ be: “Yehowa le gbe ɖem le eƒe aʋakɔ ŋgɔ, eƒe aʋakɔ lolo ŋutɔ, eye ame sesẽe nye eƒe gbe dzi wɔla; elabena Yehowa ƒe ŋkeke la tri akɔ, eye ŋɔdzi le eŋu ŋutɔ, amekae ate ŋu anɔ te ɖe enu?” Ẽ, Yehowa Mawu le eƒe ʋetsuviʋakɔa dɔm ɖa fifia—do ŋgɔ na eƒe ŋkeke gã la.
‘Yehowa Mele Wɔwɔm Blewu O’
21. Nukae adzɔ ne ‘Yehowa ƒe ŋkekea va abe fiafitɔ ene’?
21 Apostolo Petro ƒo nu tso Yehowa ƒe ŋkeke gã la ŋu abe Yoel ene. Eŋlɔ be: “Aƒetɔ la ƒe ŋkeke le vava ge abe fiafitɔ ene, le esime dziƒowo ava yi kple gbeɖeɖe; ke gɔmedzenuwo labi, eye woalólo le dzo me, eye anyigba kple eme dɔwɔwɔwo lafiã keŋ.” (Petro II, 3:10) Dziɖuɖu vɔ̃ɖi si nye “dziƒowo” le “anyigba,” si nye ameƒome si te eɖokui ɖa tso Mawu ŋu la dzi ɖum le Satana Abosam ƒe ŋusẽ te. (Efesotɔwo 6:12; Yohanes I, 5:19) Kpɔɖeŋu dziƒowo kple anyigba la atsrɔ̃ ne Mawu ƒe dziku helĩhelĩ va wo dzi le Yehowa ƒe ŋkeke gã la dzi. Gake ‘dziƒo yeye kple anyigba yeye, siwo me dzɔdzɔenyenye anɔ, siwo lalam míele le eƒe ŋugbedodo la nu’ la ava xɔ ɖe wo teƒe.—Petro II, 3:13.
22, 23. (a) Esi nublanuikpɔkpɔ wɔe be Yehowa gbɔ dzi ɖi ta la, aleke wòle be míawɔ nui? (b) Esi Yehowa ƒe ŋkekea gogo ta la, aleke wòle be míawɔ nui?
22 Susuhenu kple xɔse ƒe dodokpɔ siwo me tom míele egbea ate ŋu awɔe be míaɖe ŋu ɖi le alesi nuwɔwɔ kpata hiãe le míaƒe ŋkekea me ŋu. Gake esi kpɔɖeŋu ʋetsuviawo lé woƒe mɔ tsɔ le ŋgɔ yim la, ame geɖe va le Fiaɖuƒegbedasia xɔm. Togbɔ be Mawu na ɣeyiɣi ɖe nusia wɔwɔ ŋu hã la, mele be míabu eƒe dzigbɔgbɔɖi be ele nu wɔm blewu o. “Menye ɖe Aƒetɔ la le wɔwɔm blewu le eƒe ŋugbedodowo dziwɔwɔ me, abe alesi ame aɖewo bunɛ blewuwɔwɔ la ene o; hafi egbɔ dzi ɖi blewu na mi, esi melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ la ŋuti.”—Petro II, 3:9.
23 Esi míele Yehowa ƒe ŋkeke gã la lalam la, mina Petro ƒe nya siwo le Petro II, 3:11, 12 nakpɔ ŋusẽ ɖe mía dzi vevie: “Azɔ esi woalólo nusiawo katã la, ameka ƒomeviwo wòle na mi be, mianye le anyinɔnɔ kɔkɔe kple mawusosroɖa me, eye mialala, eye miadi Mawu ƒe ŋkeke la ƒe vava vevie, le esime woalólo dziƒo le dzo me, eye gɔmedzenuwo hã lalólo le dzoxɔxɔ gã me mahã?” Agbenɔnɔ kple nuwɔna siawo dometɔ aɖewoe nye be míazɔ le akasanu kple Yehowa ƒe ʋetsuviʋakɔ la, anɔ gbeƒã ɖem Fiaɖuƒe nyanyuia enuenu eye míawɔe alesi dze hafi nuwuwua nava.—Marko 13:10.
24, 25. (a) Aleke nèwɔa nu ɖe mɔnukpɔkpɔ si su asiwò be nàwɔ dɔ kple Yehowa ƒe ʋetsuviʋakɔ la ŋui? (b) Nya si sɔ kae Yoel bia?
24 Dɔ si wɔm Mawu ƒe ʋetsuviʋakɔa le la anɔ edzi kakaka vaseɖe Yehowa ƒe ŋkeke gã dziŋɔa dzi ke. Ʋetsuviʋakɔ sia si naneke mexea mɔ na o ƒe anyinɔnɔ ɖeɖe dzaa hã nye kpeɖodzi ɖedzesi be Yehowa ƒe ŋkekea tu aƒe. Ðe medzɔa dzi na wò be nèle dɔ wɔm kple Mawu ƒe ʋetsuvi amesiaminawo kple woƒe zɔhɛwo le aʋakpekpe mamlɛa me hafi Yehowa ƒe ŋkeke gã dziŋɔ la nava oa?
25 Aleke gbegbe Yehowa ƒe ŋkekea atri akɔe nye si! Mewɔ nuku na mí be wobia nya sia o, be: “Amekae ate ŋu anɔ te ɖe enu?” (Yoel 2:11) Míadzro biabia sia kple bubu geɖe me le nyati eve siwo kplɔe ɖo me.
Àte Ŋu Aɖe Wo Mea?
◻ Nukatae Yehowa xlɔ̃ nu be nudzodzoewo ava gblẽ nu le Yuda?
◻ Amekawoe nye Yehowa ƒe ʋetsuviwo le Yoel ƒe nyagblɔɖia me vava me egbea?
◻ Aleke Kristodukɔa ƒe kplɔlawo wɔa nu ɖe ʋetsuviawo ƒe fuwɔame ŋui, eye aleke wo dometɔ aɖewo awɔ asi le eƒe fuwɔamea nu?
◻ Aleke gbegbee ʋetsuviawo ƒe fuwɔame keke tae le ƒe alafa 20 lia sia me, eye ɣekaɣie woagblẽ nu ase ɖo?
[Nɔnɔmetata si le axa 9]
Nudzodzoeawo ƒe fuwɔame nye dzesi na nusi agavloe wu
[Afi Si Miìexɔ Mɔɖeɖe Tso]
Ati lũxe: FAO photo/G. Singh
[Nɔnɔmetata si le axa 10]
Yehowa Mawue le megbe na egbegbe ʋetsuviwo ƒe fuwɔame
[Nɔnɔmetata Tsoƒe si le axa 8]
Ʋetsuviwo: FAO photo/G. Tortoli; ʋetsuviha: FAO photo/Desert Locust Survey