Ta 1

Tadedeagu ƒe Ðekawɔwɔ—Nukae Wòle be Wòafia na Wò?

 1, 2. (a) Nuka dzie tadedeagu ƒe ɖekawɔwɔ vavãtɔ si le vavam le míaƒe ŋkekea me la nɔ te ɖo? (b) Aleke Biblia ƒo nu tso nusi le edzi yim la ŋutie?

LE ANYIGBA katã dzi la amewo le zɔ ɖem dzidzɔtɔe ɖo ta tadedeagu ƒe ɖekawɔwɔ gbɔ. Ele amesiwo tso dukɔwo kple towo kple gbegbɔgblɔwo katã me la tem ƒo ƒu ɖekae. Woƒe ɖekawɔwɔ la metso tanana le nufiafiawo gome gbɔ o. Womele esia wɔm to asiɖeɖe le nuƒoƒo tsi tre ɖe agbenɔnɔ siwo mesɔ kple Mawu ƒe Nya la o ŋu la dzi o. Ekema nuka gbɔe wòtso? Eyae nye nyateƒe si wònye be ameƒomeviwo katã va le si dzem Yehowa be eyae nye Mawu vavã ɖeka kolia la eye wolɔ̃ faa le woƒe agbenɔnɔwo trɔm ɖe eƒe mɔ dzɔdzɔeawo nu.—Tsɔe sɔ kple Nyaɖeɖefia 15:3, 4.

² Esia nye nyagblɔɖi aɖe si nyagblɔɖila Mixa ŋlɔ ɖi ƒe 2,700 enye si la ƒe emevava. Eŋlɔ ku ɖe “ŋkeke mlɔeawo” ŋuti bena: “Dukɔ geɖewo atso agblɔ bena: ‘Mina míayi Yehowa ƒe to la kple Yakob ƒe Mawu ƒe aƒe la gbɔ, ne wòafia eƒe mɔwo mí, eye míazɔ eƒe toƒewo!’” (Mixa 4:1, 2)a Ðe nekpɔe be nu ma le dzɔdzɔma?

 3, 4. (a) Aleke wònye nyateƒe be ‘dukɔwo’ le Yehowa gbɔ vam? (b) Nya kawoe wòle be míabia mía ɖokui?

³ ‘Dukɔ’ blibo aɖeke meva Yehowa ƒe aƒe gbɔgbɔmetɔ la gbɔ hena tadedeagu o. Gake amesiwo tso dukɔ mawo me le esia wɔm. Esi wole nu srɔ̃m ku ɖe Yehowa Mawu ƒe tameɖoɖo si me lɔlɔ̃ le kple eƒe amenyenye si dzroa ame la ŋuti la, woƒe dzi ʋãa wo vevie ŋutɔ. Ðokuibɔbɔtɔe la wodina be yewoanya nusi Mawu di tso yewo si. Woƒe gbedodoɖa le abe xɔsetɔ Dawid tɔ ene, amesi gblɔ be: “Fia wò lɔlɔ̃num mawɔ, elabena nye Mawu nenye.”—Ps. 143:10.

⁴ Ðe nele ɖokuiwò kpɔm le Yehowa ƒe tadeagulawo ƒe ha gã ma mea? Ðe wò nuwɔwɔ ɖe nufiafia si nexɔ la ŋu ɖee fia be edze sii vavã be Yehowa gbɔe wòtsoa? Afikae nele ‘zɔzɔm le eƒe toƒewo’ se ɖo?

Alesi Wokpɔnɛ

 5. (a) Afikae tadedeagu ƒe ɖekawɔwɔ la akeke ta ase ɖo mlɔeba? (b) Nukatae wòhiã kpata be woazu Yehowa ƒe tadeagula fifia, eye aleke míate ŋu akpe ɖe ame bubuwo ŋu be woawɔ esiae?

⁵ Yehowa ƒe tameɖoɖoe nye be nuwɔwɔ nyanuwo katã nawɔ ɖeka le tadedeagu me—aʋatso makplɔ wo dometɔ aɖeke atrae o, eye tameɖoɖo ŋutɔŋutɔ si le agbe ŋu la makpɔmakpɔ mana wo dometɔ aɖeke nanɔ tsatsam kakaɖedzimanɔsitɔe o. Aleke míele mɔ kpɔm enye si na gbesigbe amesiwo katã le agbe la ayra Mawu vavã ɖeka kolia la! (Ps. 103:19-22) Gake hafi ema nate ŋu ava eme la, ele be Yehowa naɖe amesiwo gbea nu le eƒe fianyenye lɔlɔ̃tɔe gbɔ eye wodina kokoko be yewoagblẽ agbenɔnɔ me na ame bubuwo la ɖa le eƒe nuwɔwɔwo dome. Nublanuikpɔkpɔtɔe la egblɔ nusi wòawɔ la do ŋgɔ. Mɔnukpɔkpɔ li be amesiwo le afisiafi natrɔ woƒe agbenɔnɔ. Eyata le mía ŋutɔwo míaƒe ŋkeke sia me la wole koko vevi sia ƒom le xexeame katã be: “Mivɔ̃ Mawu, eye mitsɔ ŋutikɔkɔe nɛ; elabena eƒe ʋɔnudɔdrɔ̃gaƒoƒo la ɖo, eye mide ta agu na amesi wɔ dziƒo kple anyigba kple atsiaƒu kple tsi dzidziwo.” (Nyaɖ. 14:6, 7) Èwɔ ɖe yɔyɔ ma dzia? Ekema enye mɔnukpɔkpɔ na wò fifia be nawɔ dɔ kple Yehowa ƒe habɔbɔa ahakpe ɖe ame bubuwo ŋu be woawɔ ɖe edzi.

 6. Ne míesrɔ̃ Biblia ƒe nufiafia veviwo vɔ la, ŋgɔyiyi bubu kae wòle be míadze agbagba vevie awɔ?

⁶ Menye Mawu ƒe tameɖoɖoe nye be yeakplɔ amesiwo gblɔna ko be yewoxɔ Yehowa dzi se eye yewodi be yewoanɔ agbe le Paradiso me gake le ɣeyiɣi ma ke me la woyia edzi wɔa woa ŋutɔwo ƒe ɖokuitɔdidi ƒe nuwo la ava yeƒe habɔbɔa me o. Edi be yeƒe “lɔlɔ̃nu ƒe sidzedze” vavãtɔ nasu amewo si eye esia nadze le woƒe agbenɔnɔ me. (Kol. 1:9, 10) Ne ŋudzedzekpɔlawo srɔ̃ Biblia ƒe nufiafia veviawo vɔ la, wodina be yewoayi ŋgɔ aɖo Kristotɔwo ƒe tsitsi gbɔ. Woƒe didie nye be yewoanya Yehowa nyuie, eƒe Nya ƒe gɔmesese si le yewo si la nakeke ɖe nu ahade to ɖe edzi, eye yewoawɔ eŋudɔ bliboe wu le yewoƒe agbe me. Wodina be yewoanɔ abe yewoƒe Dziƒofofo la ene ahaɖe eƒe nɔnɔmewo afia eye eƒe nukpɔsusu nanɔ yewo si. Esia ʋãna wo be woadi mɔ siwo dzi woato akpɔ gome le dɔ si wòna wole wɔwɔm le anyigba dzi le míaƒe ŋkekea me la me geɖe alesi woate ŋui. Nusi wɔm nele enye ma?—Ef. 5:1; Heb. 5:12–6:3; Tim. I, 4:15.

 7. Mɔ kawo nue wote ŋu wɔa ɖeka ŋutɔŋutɔ le fifia, eye aleke wowɔ le esia gbɔ ɖom?

⁷ Biblia ɖee fia be ele be amesiwo subɔa Yehowa nanye amesiwo wɔ ɖeka. (Ef. 4:1-3) Ele be ɖekawɔwɔ sia nanɔ anyi fifia togbɔ be míele xexeme si mã me eye míekpɔtɔ le kame tem kple míaƒe blibomademadewo gake. Yesu do gbe ɖa vevie be yeƒe nusrɔ̃lawo katã nawɔ ɖeka eye woase vivi le ɖekawɔwɔ vavãtɔ me. Nukae esia fia? Gbã la efia be ƒomedodo nyui anɔ woa kple Yehowa kpakple Via dome. Azɔ hã woawɔ ɖeka kple wo nɔewo. (Yoh. 17:20, 21) Wole esia wɔm fifia esime wole mɔfiafia siwo xɔm wole le Yehowa ƒe “aƒe” la me la ŋudɔ wɔm.

Nukawoe Hea Ðekawɔwɔ Vɛ?

 8. (a) Nukae míetuna ɖo ne mía ŋutɔwo míewɔ Biblia ŋudɔ tsɔ de ŋugble le biabia siwo lɔ mí ɖe eme la ƒe ŋuɖoɖowo ŋu? (b) To nyabiabia siwo le etame la ŋu ɖoɖo dzi la, dzro nusiwo hea Kristotɔwo ƒe ɖekawɔwɔ vɛ la me.

⁸ Woŋlɔ nu vevi siwo hea ɖekawɔwɔ sia vɛ la dometɔ aɖewo ɖe ete. Esi nele nyabiabia siwo le esiawo yome la ŋu ɖom la, bu alesi wo dometɔ ɖesiaɖe lɔ wò ŋutɔ wò ƒomedodo kple Yehowa kpakple hati Kristotɔwo ɖe emee la ŋu. Ŋugble dede le nya siawo ŋu le ŋɔŋlɔ siwo me nyawo womeŋlɔ ɖi o ƒe gɔmesese nu la ana natu tamebubu ƒe ŋutete kple nugɔmesese si trɔ ɖe Mawu ŋu la ɖo, esiwo nye nɔnɔme siwo mí katã míehiã. (Lod. 5:1, 2; Fil. 1:9-11) Eyata de ŋugble le nya siawo ŋu ɖekaɖeka:

(1) Mí katã míedea ta agu na Yehowa eye míelɔ̃ ɖe eƒe gomekpɔkpɔ be wòaɖo nyui kple vɔ̃ ƒe dzidzenu ɖi la dzi.

Ne míeɖo koŋ ŋe aɖaba ƒu Yehowa ƒe aɖaŋuɖoɖo dzi le nya aɖe si dze abe nya sue aɖe ene na mí me la, aleke Yehowa abui? (Luka 16:10; tsɔe sɔ kple Maleaxi 1:6-8.)

Ne míewɔna ɖe Yehowa ƒe sededewo dzi ɣesiaɣi o la, ɖe wòlɔa ame bubuwo ɖe emea? (Tsɔe sɔ kple Romatɔwo 5:12; Yosua 7:20-26; Fiawo I, 14:16.)

(2) Afisiafi si míele le xexeame la, Mawu ƒe Nya le mía si be wòafia mɔ mí.

Ne míele nyametsotsowo wɔm la, afɔku kae le nusi “míesusu” dzro ko be eyae sɔ la wɔwɔ me? (Yer. 17:9; Lod. 14:12)

Ne míenya aɖaŋu si Biblia ɖo ku ɖe nya aɖe ŋu o la, nukae wòle be míawɔ? (Lod. 2:3-5)

(3) Mí katã míekpɔa viɖe tso gbɔgbɔ me nuɖuɖunana ƒe ɖoɖo ɖeka ma ke me.

Nɔnɔme kawoe nɔa amesiwo mekpɔa ŋudzedze ɖe Yehowa ƒe ɖoɖowo hena gbɔgbɔ me nuɖuɖunana ŋu o la dome? (Tsɔe sɔ kple Yesaya 1:3; 9:15; 65:14.)

(4) Yesu Kristoe nye míaƒe Kplɔla, ke menye amegbetɔ aɖeke o, eye eya dzie mí katã míetona tena ɖe Yehowa ŋu le tadedeagu me.

Ðe gɔmesese vavã aɖe le mía dometɔ aɖe si esi ta wòaxɔe se be ye amea yede ŋgɔ wu ame bubuwoa? (Rom. 3:23, 24; 12:3; Mat. 23:8-10)

(5) Eɖanye afikae míele o, míeɖoa ŋu ɖe Mawu ƒe Fiaɖuƒea ŋu be eyae nye amegbetɔƒomea ƒe mɔkpɔkpɔ ɖeka kolia.

Aleke esia kpɔa mía ta ɖe nusiwo hea mamã vɛ ŋutie? (Mat. 6:9, 10; Mixa 4:3)

(6) Gbɔgbɔ kɔkɔea nana nɔnɔme siwo le vevie hena Kristotɔwo ƒe ɖekawɔwɔ la nɔa Yehowa ƒe tadeagulawo me.

Aleke míeʋua mɔ na Mawu ƒe gbɔgbɔ be wòatse eƒe kuwo le mía mee? (Ps. 1:2; Lod. 22:4; Nyaɖ. 3:6; Dɔw. 5:32)

Aleke gbɔgbɔa ƒe ku siwo míatse la kpɔa ŋusẽ ɖe mía kple Yehowa dome ƒomedodoa dzie? Kple mía kple mía nɔviwo dome tɔ dzie? (Gal. 5:22, 23)

(7) Enye mí katã míaƒe agbanɔamedzi be míaɖe gbe ƒã Mawu ƒe Fiaɖuƒe ŋuti nyanyuiea.

Aleke vevi si míado nu anɔ gome kpɔm le gbeƒãɖeɖedɔ sia me kple hati Kristotɔwo la akpɔ ŋusẽ ɖe míaƒe seselelãme ɖe wo ŋu la dzie? (Tsɔe sɔ kple Kolosetɔwo 4:7, 11.)

 9. Ne míewɔ nyateƒe siawo ŋudɔ ŋutɔŋutɔ le míaƒe agbenɔnɔ me la, dɔ kae wòwɔna?

⁹ Lɔlɔ̃ ɖe nyateƒe siawo dzi la nye nu ɖeka. Agbe nɔnɔ ɖe wo nu bia nu geɖe wu. Gake ne míewɔ esia la, míetena ɖe Yehowa ŋu kplikplikpli. Míaƒe hadede kple haxɔsetɔwo hã va nyea tutuɖokpɔƒe. Abe alesi Psalmo 133:1 gblɔe ene la: “Kpɔ ɖa, aleke mehenyo, eye wòvivinae, ne nɔviwo le afi ɖeka!” Ðe wò ŋutɔ mekpɔ alesi wòte ŋu tua ame ɖoe ne èdzo le xexeame kple eƒe ɖokuitɔdidi la katã gbɔ eye neyi ɖakpe ta kple ame bubu siwo lɔ̃ Yehowa vavã la oa?

Ƒo Asa Na Nusiwo Hea Mamã Vɛ

10. Nukatae wòhiã be míakpɔ nyuie be míaƒo asa na ɖokuiŋudzedze ƒe gbɔgbɔ?

¹⁰ Be míagagblẽ ɖekawɔwɔ xɔasi ma me o la, ele be míaƒo asa na nusiwo hea mamã vɛ. Gbãtɔawo dometɔ ɖekae nye ɖokuiŋudzedze ƒe gbɔgbɔa. Yehowa kpena ɖe mía ŋu be míaƒo asa nɛ to nu si wòklo le Satana Abosam si nye amesi gbɔ wòtso dzi la dzi. Eyae nye amesi ble Xawa wòsusu be ne yeŋe aɖaba ƒu nusi Mawu gblɔ la dzi hewɔ nyametsotso na ye ɖokui la aɖe vi na ye. Adam wɔ ɖeka kplii le aglãdzedze ƒe zɔzɔme ma me. Nusi do tso emee nye dzɔgbevɔ̃e na woawo kple míawo. (Mose I, 2:16, 17; 3:1-6, 17-19) Míele xexe si me ɖokuiŋudzedze ƒe gbɔgbɔ ma xɔ aƒe ɖo la me, eyata mele be wòawɔ nuku na mí o ne ehiã be míaxe mɔ ɖe gbɔgbɔ ma nu le mía ɖokui me. Lɔlɔ̃tɔe la Yehowa kpena ɖe mía ŋu be míawɔ esia to aɖaŋuɖoɖo si tsoa eƒe habɔbɔa gbɔ dzi.

11. Nukae aɖee afia be míele dzadzram ɖo hena agbe nɔnɔ le Mawu ƒe dzɔdzɔenyenye ƒe Nuɖoanyi Yeyea me vavã?

¹¹ To habɔbɔ ma dzi la míesrɔ̃ nu tso Yehowa ƒe ŋugbedodo gã be yeatsɔ dziƒo yeye kple anyigba yeye si me “dzɔdzɔenyenye anɔ” aɖo nusiwo li fifia teƒe la ŋuti. (Petro II, 3:13) Mɔkpɔkpɔ si nye be eteƒe madidi o la xexeme vɔ̃ɖi sia maganɔ anyi o eye woatrɔ anyigba wòazu Paradiso la doa dzidzɔ na mí. Gake ɖe mía ŋutɔwo míaƒe agbenɔnɔ ɖee fia be míele dzadzram ɖo vevie hena agbe nɔnɔ le xexe si me dzɔdzɔenyenye ye anye nusi axɔ aƒe ɖi la mea? Biblia gblɔ na mí eme kɔ ƒã be: “Migalɔ̃ xexeame kple nusiwo le eme o. Ne ame aɖe lɔ̃ xexeame la, Fofoa ƒe lɔlɔ̃ mele eme o.” (Yoh. I, 2:15) Enye nyateƒe be nu geɖe le xexeame ŋu si mía dometɔ aɖeke melɔ̃ o. Gake xexeame ƒe nuwɔna siwo doa kplamatse mía ŋutɔwo ƒe vivisese le agbe me fifia la koŋ ye míelɔ̃ oa? Alo ɖe míetsri eƒe gbɔgbɔ—eƒe ɖokuiŋudzedze ƒe nɔnɔmea, eƒe ɖokuitɔdidi si gbɔ eme—la hã? Ðe míena wòle nu mãme zum na mí nyateƒetɔe be míaɖo to Yehowa ahawɔ ɖe eƒe nya dzi tso míaƒe dzi me togbɔ be míaƒe ŋutilã adi nu bubua? Ele be míaƒe agbenɔnɔ blibo katã—eɖanye afikae míele alo nuka wɔm míele o—naɖi ɖase be míaƒe tamesusu kple míaƒe tameɖoɖowo trɔ ɖe Mawu ŋu.—Lod. 3:5, 6.

12. (a) Nukata wòle vevie be míawɔ mɔnukpɔkpɔa ŋudɔ fifia be míasrɔ̃ Yehowa ƒe mɔwo ahazɔ wo dzi le míaƒe agbenɔnɔ me? (b) Gɔmesese kae le ŋɔŋlɔ siwo woyɔ ɖe memamãa me la ŋu na mía ŋutɔwo?

¹² Ne Yehowa ƒe ɣeyiɣi ɖoɖia de be wòatsrɔ̃ nuɖoanyi vɔ̃ɖi sia kple amesiwo katã lɔ̃ eƒe mɔwo la, mahe ɖe megbe o. Matutu ɣeyiɣi ma ado ɖe ŋgɔ alo atrɔ eƒe dzidzenuwo be wòana mɔ amesiwo gale agbagba dzem be yewoavu ɖe xexeame ŋu eye wotsɔ dzi afã le Mawu ƒe lɔlɔ̃nu srɔ̃m hele ewɔm ɖe kple ɖe la o. Fifiae nye nuwɔɣi! (Luka 13:23, 24; 17:32; 21:34-36) Eyata enye nusi ʋãa dzi ale gbegbe be woakpɔ “ameha gã” la be wole mɔnukpɔkpɔ xɔasi sia ŋudɔ wɔm hele nufiafia si Yehowa nana to eƒe habɔbɔ lɔlɔ̃a dzi la dim vevie eye azɔ wole zɔzɔm le eƒe toƒewo ɖekawɔwɔtɔe!

[Etenuŋɔŋlɔwo]

Numetoto

● Nukae nye Yehowa ƒe tameɖoɖo ku ɖe tadedeagu ŋu?

● Ne míesrɔ̃ Biblia ƒe nufiafia veviwo vɔ la, ŋgɔyiyi bubu kae wòle be míadi vevie be míawɔ?

● Nukae mía dometɔ ɖesiaɖe ate ŋu awɔ ale be nusiwo hea ɖekawɔwɔ vɛ siwo me míedzro la nakpɔ ŋusẽ ɖe míaƒe agbe dzi alesi dze?

[Nɔnɔmetata si xɔ axa 4]