⁹ Xabakuk ɖo to nya bubu siwo Mawu gagblɔ la vevie, si woŋlɔ ɖe Xabakuk 1:6-11. Yehowa ƒe gbedasi—si alakpamawu alo legba aɖeke si me agbe mele o mate ŋu ana wòagbe emevava o—lae nye si: “Kpɔ ɖa, manyɔ Kaldeatɔwo, dukɔ nyanyrã, si ƒe afɔ tsɔna; woato anyigba ƒe kekeme, ne woaxɔ nɔƒe, siwo menye wo tɔ o la. Ŋɔdzi kple vɔvɔ̃ anɔ eŋu, ade se, eye wòaɖu gã ɖe eya ŋutɔ ƒe akɔta. Eƒe sɔwo [ƒua] du wu lãkle, eye woƒe afɔwo tsɔ wu amegãxi le zã me, eƒe sɔdolawo le zi nyẽm, didiƒe ke eƒe sɔdolawo tso, eye wole dzodzom abe hɔ̃, si le abla ɖem ɖe nuɖuɖu ŋu la ene. Wo katã wova ɖe ŋutasesẽ ŋu, wotsɔ woƒe ŋku me tu ŋgɔ tẽ, eye woƒo aboyomewo nu ƒu abe ke ene. Woaɖe alɔme le fiawo ŋu, eye woako amegãwo, mɔ̃ sesẽwo anye fefenu na wo, eye woatsɔ anyi aƒu kpoe ahaxɔ wo. Emegbe aho adzo abe ahom ene, eye enu ayi; ke amesi tsɔ eƒe ŋusẽ wɔ mawui la, to vo ɖe eya ŋutɔ ɖokui ŋu.”

11. Aleke nàɖɔ Babilon-ʋakɔ siwo ava dze Yuda dzi lae?

¹¹ Babilontɔwo ƒe sɔwo ɖea abla wu lãkle siwo ƒua du sesĩe. Woƒe sɔdolawo wɔa adã wu amegãxi dɔwuitɔ siwo le ade dam le zã me. ‘Eƒe sɔwo le afɔ tum anyi’ le didim vevie be yewoaho. Wotso keke Babilon ke ɖo ta Yuda. Kaldeatɔwo le dzodzom abe hɔ̃e le du dzi ɖe nuɖuɖu ŋu ene eye woadze nusi minyãm wole la dzi kpuie. Gake ɖe esia anye ɣeyiɣi kpui aɖe ƒe amedzidzedze si asrafo ʋɛ aɖewo ko awɔa? Gbeɖe! “Wo katã wova ɖe ŋutasesẽ ŋu,” eye wonye aʋakɔ gã aɖe si lɔ hoo yina nu gblẽ ge. Woɖo mo vevi, woɖo ta ɣedzeƒe gome yina Yuda kple Yerusalem, eye woƒe afɔ le tsɔtsɔm abe ɣedzeƒe ya ene. Babilon-ʋakɔwo ɖe ame gbogbo aɖewo ɖe nu wozu gamemewo ale gbegbe be “woƒo aboyomewo nu ƒu abe ke ene.”