Zɔzɔ Kple Mawu—Kple Susu Be Míazɔ Kplii Tegbee
“Míazɔ le Yehowa, mía Mawu la ƒe ŋkɔ me ɖaa tegbee.”—MIXA 4:5.
1. Nukatae míate ŋu ayɔ Yehowa be ‘Fia mavɔmavɔtɔ’?
GƆMEDZEDZE mele Yehowa Mawu si o. Esɔ be woyɔe be “Amegã Ðeɖi,” elabena eli tso gbaɖegbe ʋĩ ke si ƒe didime míate ŋu anya o. (Daniel 7:9, 13) Yehowa anɔ anyi ayi ɖe mavɔmavɔ me hã. Eya ɖeɖekoe nye ‘Fia mavɔmavɔtɔ.’ (Nyaɖeɖefia 10:6; 15:3) Eye le egbɔ la, ƒe akpe ɖeka le “abe etsɔ ŋkeke, si nu va yi, kple ŋudzɔɣi le zã me ene.”—Psalmo 90:4.
2. (a) Tameɖoɖo kae le Mawu si na amegbetɔ siwo nye toɖolawo? (b) Nuka dzie wòle be míada míaƒe mɔkpɔkpɔ kple ɖoɖo siwo míewɔna ɖo?
2 Esi Agbenala la nye mavɔmavɔtɔ ta la, ete ŋu tsɔ agbe si nuwuwu meli na o nɔnɔ le Paradiso me ƒe mɔnukpɔkpɔ ɖo atsu kple asi gbãtɔ Adam kple Xawa ŋkume. Gake le tomaɖomaɖo ta la, Adam bu agbe mavɔ nɔnɔ ƒe gome la eye wògblẽ nuvɔ̃ kple ku ƒe domenyinu ɖi na eƒe dzidzimeviwo. (Romatɔwo 5:12) Ke hã Adam ƒe aglãdzedzea megblẽ Mawu ƒe tameɖoɖo gbãtɔa me o. Yehowa ƒe lɔlɔ̃nue wònye be amegbetɔ siwo nye toɖolawo nanɔ agbe tegbee, eye awɔ ɖe eƒe tameɖoɖo dzi godoo. (Yesaya 55:11) Eyata aleke gbegbe wòsɔe nye si be míana Yehowa subɔsubɔ tsɔ yi ɖe mavɔmavɔ me nanɔ susu me na mí ne míele mɔ kpɔm na etsɔme hele ɖoɖo wɔm ɖe eŋu. Togbɔ be míedi be ‘Yehowa ƒe ŋkeke la’ nanɔ susu me na mí vevie ɣesiaɣi hã la, ele vevie be míaɖo ŋku edzi be míaƒe taɖodzinue nye be míazɔ kple Mawu tegbee.—Petro II, 3:12.
Yehowa Wɔa Nu le Ɣeyiɣi si Wòɖo Ði Dzi
3. Aleke míewɔ nya be ‘ɣeyiɣi ɖoɖi’ le Yehowa si na eƒe tameɖoɖowo dzi wɔwɔ?
3 Le míaƒe zɔzɔ kple Mawu me la, enye míaƒe didi vevie be míakpɔ nusi wòdi la nava eme. Míenya be Yehowa ye nye Gamedzinɔla Gãtɔ, eye kakaɖedzi le mía si be medoa kpo eƒe tameɖoɖowo dzi wɔwɔ le eƒe ɣeyiɣi ɖoɖi dzi o. Le kpɔɖeŋu me, “esi azãgbe ɖo vɔ la, Mawu dɔ . . . Via ɖo ɖa.” (Galatiatɔwo 4:4) Wogblɔ na apostolo Yohanes be ‘ɣeyiɣi ɖoɖi’ li na nyagblɔɖi me nudzɔdzɔ siwo woɖe fiae le dzesiwo me la ƒe emevava. (Nyaɖeɖefia 1:1-3) ‘Ɣeyiɣi ɖoɖi si me woadrɔ̃ ʋɔnu ame kukuwo’ li. (Nyaɖeɖefia 11:18) Gbɔgbɔ ʋã apostolo Paulo ƒe 1,900 kple edzivɔe nye sia wògblɔ be Mawu “[ɖo] ŋkeke, si dzi wòle ʋɔnu drɔ̃ ge xexeame godoo le dzɔdzɔenyenye nu.”—Dɔwɔwɔwo 17:31.
4. Aleke míewɔ nya be Yehowa di be yeahe nuɖoanyi vɔ̃ɖi sia ava nuwuwu?
4 Yehowa ahe nuɖoanyi vɔ̃ɖi sia ƒe nuwuwu vɛ, elabena wole vlo dom eƒe ŋkɔ le xexeame egbea. Ame vɔ̃ɖiwo ƒo se. (Psalmo 92:8) Woto woƒe nyagbɔgblɔ kple nuwɔna dzi le vlo dom Mawu, eye evenɛ ne ekpɔ wole nya vɔ̃ gblɔm ɖe esubɔlawo ŋu alo wole wo yome tim. (Zaxarya 2:8) Eyata mewɔ nuku o be Yehowa ɖoe be eteƒe magadidi o yeatsrɔ̃ Satana ƒe nuɖoanyi bliboa katã! Mawu ɖo ɣeyiɣi si dzi tututu nusia adzɔ, eye Biblia ƒe nyagblɔɖiwo ƒe emevava na wòdze kɔte be fifia míele “nuwuɣi” la me. (Daniel 12:4) Madidi o, awɔ nusi anye yayra na amesiwo katã lɔ̃nɛ.
5. Aleke Lot kple Xabakuk bu nɔnɔme siwo ƒo xlã wo lae?
5 Yehowa subɔla siwo nɔ anyi le blema di vevie be yewoakpɔ vɔ̃ɖinyenye ƒe nuwuwu. ‘Ame gblẽkuwo ƒe hadzegbenɔnɔ ɖe fu’ na ame dzɔdzɔe Lot ‘vevie.’ (Petro II, 2:7) Esi nusiwo nɔ edzi yim ƒo xlã nyagblɔɖila Xabakuk ɖu dzi nɛ la, eƒo koko be: “Yehowa, ɣekaɣi manɔ yɔwòm sesĩe, eye nagbe esese ase ɖo? Mado ɣli na wò le ŋutasesẽ ta, ke màxɔ na ame o? Nukaŋuti nèna mele nu vlo wɔwɔ teƒe kpɔm, eye nèle hiãkame kpɔm kple ŋku, gbegblẽ kple ŋutasesẽ le ŋkunye me, avuwɔwɔ li, eye dzre dzɔ?”—Xabakuk 1:2, 3.
6. Nukae Yehowa gblɔ tsɔ ɖo gbe si Xabakuk do ɖa ŋui, eye nukae míate ŋu asrɔ̃ tso eme?
6 Nya si ŋu Yehowa ɖo na Xabakuk ƒe akpa aɖe gblɔ be: “Azãgbe li na ŋutega la, eƒe nuwuwu le aƒe tum, eye maflu ame o; ke ne etsi megbe la, kpɔ esinu; elabena ele vava ge kokoko, eye mahe ɖe megbe o.” (Xabakuk 2:3) Mawu gblɔ nya siawo tsɔ na wònya be yeatso ɖe nuwɔwɔ ŋu le ‘azãgbe si yeɖo ɖi’ dzi. Togbɔ be awɔ abe ɖe wòle megbe tsim ene hã la, Yehowa awɔ eƒe tameɖoɖo dzi—ele ewɔ ge godoo!—Petro II, 3:9.
Dzonɔameme Tsɔtsɔ Subɔ Ðeɖimateameŋutɔe
7. Togbɔ be Yesu menya ŋkeke si tututu dzi Yehowa ƒe ŋkekea ava o hã la, aleke wòwɔ eƒe dɔwoe?
7 Ðe ɣeyiɣi si dzi tututu Yehowa ana nuwo nadzɔ nyanya hiã hafi míazɔ dzonɔamemetɔe kple Mawua? Kura o, mehiã o. Bu kpɔɖeŋu aɖewo ŋu kpɔ. Yesu tsɔ ɖe le ɣeyiɣi si me woawɔ Mawu ƒe lɔlɔ̃nu le anyigba dzi sigbe alesi wowɔnɛ le dziƒo ene me vevie. Le nyateƒe me, Kristo fia eyomedzelawo be woado gbe ɖa be: “Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” (Mateo 6:9, 10) Togbɔ be Yesu nya be aɖo kokoƒoƒo sia ŋu hã la, menya ɣeyiɣi si tututu nusiawo adzɔ o. Le eƒe nyagblɔɖi vevi si ku ɖe nuɖoanyi sia ƒe nuwuwu ŋu me la, egblɔ be: “Le ŋkeke ma kple gaƒoƒo ma ŋuti la, ame aɖeke menyae o, mawudɔla, siwo le dziƒowo, kple Vi la hã menyae o, negbe Fofonye ɖeka ko.” (Mateo 24:36) Esi wònye Yesu Kristo ye nye ame vevitɔ si dzi Mawu ƒe tameɖoɖowo ato ava eme ta la, anye amesi dzi woato atsrɔ̃ Fofoa si le dziƒo ƒe futɔwo. Gake le ɣeyiɣi si me Yesu nɔ anyigba dzi la, eya kura hã menya ɣeyiɣi si me Mawu atso ɖe nuwɔwɔ ŋu o. Ðe ema fa lãme nɛ be megatsɔ dzo ɖe Yehowa subɔsubɔ ŋu oa? Kura o! Esi Yesu ‘ƒe nusrɔ̃lawo’ kpɔ dzo si nɔ eme wòtsɔ nyã amewo le gbedoxɔa me la, “[woɖo] ŋku nya, si woŋlɔ ɖi la dzi bena: ‘Wò aƒe ŋuti ŋuʋaʋã la mim.’ ” (Yohanes 2:17; Psalmo 69:10) Yesu tsɔ eɖokui katã ƒo ɖe dɔ si gbe wodɔe ɖo la wɔwɔ me, eye etsɔ dzonɔameme wɔe ɖeɖimateameŋutɔe. Etsɔ agbe mavɔ ƒe nukpɔsusu hã subɔ Mawui.
8, 9. Esi nusrɔ̃lawo bia nya tso Fiaɖuƒea gbugbɔɖoanyi ŋu la, nya kae wogblɔ na wo, eye aleke wowɔ esi wosee?
8 Alea ke Kristo ƒe nusrɔ̃lawo hã subɔe. Ɣeyiɣi kpui aɖe do ŋgɔ na Yesu ƒe dziƒoyiyi la, ekpe kple wo. Nuŋlɔɖia gblɔ na mí be: “Azɔ amesiwo kpe ta la, biae gblɔ bena: Aƒetɔ, ɖe nègale fiaɖuƒe la ɖɔ ge ɖo na Israel le ɣeyiɣi sia mea?” Abe woƒe Aƒetɔ la ene la, wodi Fiaɖuƒea ƒe vava vevie. Ke hã Yesu ɖo eŋu na wo be: “Miawo la mele na mi be, mianya ɣeyiɣi alo azãgbe, siwo Fofo la ɖo le ye ŋutɔ ƒe ŋusẽ nu o. Hafi boŋ miaxɔ Gbɔgbɔ kɔkɔe, si le mia dzi va ge la, ƒe ŋusẽ, eye mianye nye ɖaseɖilawo le Yerusalem kple Yudea katã kple Samaria, eye vaseɖe anyigba ƒe seƒe ke.”—Dɔwɔwɔwo 1:6-8.
9 Naneke meli si fia be nyaŋuɖoɖo sia ɖe dzi le nusrɔ̃lawo ƒo o. Ðe woƒe ŋku biã ɖe gbeƒãɖeɖedɔa ŋu boŋ. Le kwasiɖa aɖewo ko me la, woƒe nufiafia xɔ Yerusalem katã. (Dɔwɔwɔwo 5:28) Eye le ƒe 30 ko me la, wokeke woƒe gbeƒãɖeɖedɔa ɖe enu ale gbegbe be Paulo te ŋu gblɔ be ‘woɖe gbeƒã nyanyuia le nuwɔwɔ siwo katã le dziƒoa te’ me. (Kolosetɔwo 1:23) Togbɔ be ‘womegaɖo Fiaɖuƒea anyi na Israel’ abe alesi nusrɔ̃lawo susui vodadatɔe ene ‘o’ eye womeɖoe anyi le dziƒo le woƒe agbenɔɣi o hã la, wonɔ Yehowa subɔsubɔ dzi dzonɔamemetɔe ganɔ mɔ kpɔm na esubɔsubɔ yi ɖe mavɔmavɔ me.
Nusi Ʋãa Mí Me Dzodzro
10. Esi míenya ɣeyiɣi si me Mawu atsrɔ̃ Satana ƒe nuɖoanyia o ta la, nuka dzie wòkpe ɖe mía ŋu be míaɖo kpee?
10 Edzroa Yehowa subɔla siwo li le míaƒe ɣeyiɣia me hã vevie be yewoakpɔ nuɖoanyi vɔ̃ɖi sia ƒe nuwuwu. Gake menye míaƒe ɖeɖekpɔkpɔ yi Mawu ƒe xexe yeyea mee nye nu vevitɔ si ŋu míetsi dzi ɖo o. Míedi be míakpɔe woakɔ Yehowa ƒe ŋkɔa ŋu eye woaʋli eƒe dziɖulanyenye ta. Le esia ta, dzi ate ŋu adzɔ mí be Mawu meyɔ ‘ŋkeke kple gaƒoƒo’ si wòɖo na Satana ƒe nuɖoanyia tsɔtsrɔ̃ na mí o. Esia naa mɔnukpɔkpɔ mí be míaɖee afia be míeɖoe be míazɔ kple Mawu tegbee le esi míelɔ̃e ta, menye le ɖokuitɔdidinu aɖe si anɔ anyi sẽ ko ta o.
11, 12. Aleke wotɔ gbe Hiob ƒe nuteƒewɔwɔe, eye aleke gbetɔame ma ka míi?
11 Míaƒe nuteƒewɔwɔ na Mawu ɣeawokatãɣi gaɖoa kpe edzi be aʋatsoe Abosam ka esi wògblɔ be ame dzɔdzɔe Hiob—si fia be amegbetɔ bubuwo hã abe eya ke ene—subɔa Mawu ɖe eya ŋutɔ ƒe viɖe ko ta. Esi Yehowa gblɔ le esubɔla Hiob ŋu be enye ame maɖifɔ, ame dzɔdzɔe kple Mawuvɔ̃la la, Satana gblɔ tagbɔsesẽtɔe be: “Dzodzroe Hiob vɔ̃a Mawua? Ðe menye wòe tɔ kpɔ ɖe eya ŋutɔ kple eƒe nuwo katã ŋu godoo oa? Èyra eƒe aƒe kpakple eƒe asinudɔwɔwɔwo, eye eƒe lãhawo gbagba ɖe anyigba dzi. Ke do asi ɖa, ne nade asi nusiwo katã le esi la ŋu kpɔ, be magbe wò nya ɖe ŋkuwò me keŋ oa?” (Hiob 1:8-11) Esi Hiob wɔ nuteƒe le dodokpɔ me la, eɖo kpe edzi be aʋatsoe nya vɔ̃ sia si wògblɔ ɖe ye ŋu la nye.
12 Ne míawo hã míelé nuteƒewɔwɔ me ɖe asi nenema la, míate ŋu aɖee fia be alakpatɔe Satana nye esi wògblɔ be esi fetua xɔɣi gogo ta koe míele Mawu subɔm ɖo. Esi míenya ɣeyiɣi si tututu dzi Mawu abia hlɔ̃ ame vɔ̃ɖiwo o la, ena mɔnukpɔkpɔ mí be míaɖo kpe edzi be míelɔ̃ Yehowa vavã eye míedi be míazɔ eƒe mɔwo dzi tegbee. Efia be míeku ɖe Mawu ŋu goŋgoŋ eye míeka ɖe alesi wòkpɔa nyawo gbɔe dzi. Tsɔ kpe ɖe eŋu la, ŋkekea kple gaƒoƒoa manyamanya kpena ɖe mía ŋu be míanɔ ŋudzɔ eye míagadɔ gbɔgbɔmelɔ̃ o elabena míenya be nuwuwua ate ŋu ava ɣesiaɣi, abe alesi fiafitɔ vanɛ le zã me ene. (Mateo 24:42-44) Ne míezɔna kple Yehowa gbesiagbe la, míenaa eƒe dzi kpɔa dzidzɔ eye wòganaa wòte ŋu ɖoa nya ŋu na Abosam, amesi le alɔme ɖem le eŋu.—Lododowo 27:11.
Wɔ Ðoɖo ɖe Etsɔme Mavɔ Ŋu!
13. Nukae Biblia fia ku ɖe ɖoɖowɔwɔ ɖe etsɔme ŋu?
13 Amesiwo zɔna kple Mawu nya be nunya le eme be yewoawɔ ɖoɖo siwo sɔ ɖe etsɔme ŋu. Ame geɖe dzea agbagba wɔa woƒe ɖekakpuimenɔɣi kple woƒe ŋusẽ ŋudɔ nyuie ale be ne wova zu ame tsitsiwo la, ganyawo mava ɖe fu na wo o. Ke míaƒe gbɔgbɔmetaɖodzinu siwo le vevie wu ya ɖe? Lododowo 21:5 gblɔ be: “Veviedola ƒe tameɖoɖo hea viɖe vɛ; ke amesi tsi klokloklo la, dea hiã aƒe.” Ðoɖowɔwɔ ɖe etsɔme mavɔ ŋu nye viɖenu vavã. Esi míenya ɣekaɣi tututue nuɖoanyi sia ƒe nuwuwu ava o ta la, ele be míabu míaƒe etsɔme nuhiahiãwo ŋu vaseɖe afi aɖe. Gake mina míada asɔ eye míada nusiwo nye Mawu tɔ ɖe nɔƒe gbãtɔ le míaƒe agbenɔnɔ me. Xɔsemanɔsitɔwo agblɔ be nana be Mawu ƒe lɔlɔ̃nu wɔwɔ naxɔ nɔƒe vevitɔ le ame ƒe agbe me nye bometsitsi. Gake bometsitsiea?
14, 15. (a) Kpɔɖeŋu kae Yesu wɔ ku ɖe ɖoɖowɔwɔ ɖe etsɔme ŋu ŋuti? (b) Nukatae kesinɔtɔ si nɔ Yesu ƒe kpɔɖeŋua me mekpɔ nu de didiƒe o?
14 Yesu wɔ kpɔɖeŋu aɖe si akɔ nya sia me. Egblɔ be: “Ŋutsu kesinɔtɔ aɖe ƒe anyigba wɔ nu geɖe; eye wòbu le eɖokui me bena: Nuka wɔ ge mala? Elabena nyemekpɔ afisi maƒo nye kutsetsewo nu ƒu ɖo o. Eye wògblɔ bena: Esia mawɔ: Mamu nye avawo, eye matu gãtɔwo, eye afima maƒo nye nukuwo kple nye nu nyuiwo nu ƒu ɖo. Eye magblɔ na nye luʋɔ bena: Luʋɔ, èkpɔ nu nyui geɖe, siwo nèdzra ɖo hena ƒe geɖewo; gbɔ ɖe me, ɖu nu, no nu, na dzi nadzɔ wò. Ke Mawu gblɔ nɛ bena: Ame tsibome, zã sia me ke woabia wò agbe le asiwò me, ke nusiwo nedzra ɖo la, ameka tɔ woazu mahã? Ale amesi le nu nyuiwo dzram ɖo na eɖokui, eye kesinɔnuwo mele esi le Mawu gome o la, le enye si.”—Luka 12:16-21.
15 Ðe Yesu di be yeagblɔ be mele be kesinɔtɔa nawɔ dɔ be nuwo nanɔ bɔbɔe nɛ le etsɔme oa? Ao, elabena Ŋɔŋlɔawo de dɔsesẽwɔwɔ ƒe dzi ƒo. (Tesalonikatɔwo II, 3:10) Vodada si kesinɔtɔ ma wɔe nye be mewɔ nusiwo hiã be wòanye ‘kesinɔtɔ le Mawu gome’ o. Ne ɖe wòte ŋu tsɔ ƒe geɖe zã eƒe ŋutilãmenukpɔkpɔwoe hã la, kokoko ava ku gbeɖeka koe. Mete ŋu kpɔ nu yi ŋgɔe o, mebu etsɔme mavɔ ŋu o.
16. Nukatae míate ŋu atsɔ kakaɖedzi aɖo ŋu ɖe Yehowa ŋu be ana míaƒe etsɔme nanɔ dedie?
16 Zɔzɔ kple Yehowa kple susu be míazɔ kplii tegbee nye nusi dea ame dzi eye wòganye nukpɔkpɔ yi ŋgɔe hã. Eyae nye mɔ nyuitɔ kekeake si nu nàwɔ wò ɖoɖowo ɖo. Togbɔ be nunya le eme eye wòɖea vi be míawɔ ɖoɖo ɖe sukudede, dɔwɔwɔ, kple ƒomegbanɔamedziwo ŋu hã la, ele be míaɖo ŋku edzi ɣesiaɣi be Yehowa megblẽa esubɔla nuteƒewɔlawo ɖi gbeɖe o. Fia Dawid dzi ha be: “Menɔ ɖevime tsã, eye azɔ metsi, ke nyemekpɔ be, wogblẽ ame dzɔdzɔe ɖi, eye viawo ɖo abologbe kpɔ o.” (Psalmo 37:25) Yesu hã ka ɖe edzi na mí nenema ke be Mawu ana amesiwo katã dia Fiaɖuƒea gbãgbiagbã eye wozɔa Yehowa ƒe mɔ dzɔdzɔewo dzi la ƒe nuhiahiãwo wo.—Mateo 6:33.
17. Aleke míewɔ nya be nuwuwua tu aƒe?
17 Togbɔ be míetsɔ subɔsubɔ yi ɖe mavɔmavɔ me ƒe susu subɔa Mawui hã la, Yehowa ƒe ŋkekea ƒe vava ganɔa susu me na mí vevie. Biblia ƒe nyagblɔɖiwo ƒe emevava na wòdze kɔte be ŋkeke ma tu aƒe. Aʋawɔwɔwo, dɔvɔ̃wo, anyigbaʋuʋuwo, kple nuɖuɖuveve, tsɔ kpe ɖe Kristotɔ vavãtɔwo yometiti ŋu kpakple gbeƒãɖeɖe Mawu ƒe Fiaɖuƒe ŋuti nyanyuia le xexeame katã nye nudzɔdzɔ siwo ɖe dzesi le ƒe alafa sia me. Nusiawo katã nye nuɖoanyi vɔ̃ɖi sia ƒe nuwuwuɣia ƒe dzesi ƒe akpa vovovowo. (Mateo 24:7-14; Luka 21:11) Ebɔ ɖe xexeame ŋutɔ be amewo nye “ɖokuilɔ̃lawo, galɔ̃lawo, adegbe ƒuƒlu ƒolawo, dadalawo, busunyagblɔlawo, ame maɖoto dzilawo, ame madakpewo kple ame makɔmakɔwo; amesiwo melɔ̃a ame ƒe nya o, amesiwo gbea avuléle, ameŋuzɔlawo, amesiwo mete ŋu ɖua wo ɖokui dzi o, ame wɔadãwo, amesiwo melɔ̃a nu nyui o, yomemɔfialawo, ame mabunuwo, amesiwo doa wo ɖokui ɖe dzi glodzo, amesiwo lɔ̃a hadzedze wu esi woalɔ̃ Mawu.” (Timoteo II, 3:1-5) Le ŋkeke mamlɛ sesẽ siawo me la, agbea mele bɔbɔe na mí Yehowa subɔlawo o. Aleke gbegbe wònye míaƒe didi vevie nye si be Yehowa ƒe Fiaɖuƒea nava ɖe vɔ̃ɖivɔ̃ɖinyenye ɖesiaɖe ɖa! Gake hafi ɣemaɣi naɖo la, mina míaɖoe kplikpaa be wòanye míaƒe susu be míazɔ kple Mawu tegbee.
Agbe Mavɔ ƒe Susu Tsɔtsɔ Subɔe
18, 19. Nukae fia be enɔ susu me na xɔsetɔ siwo nɔ anyi le blema be yewoasubɔ Mawu yi ɖaseɖe mavɔmavɔ me?
18 Le míaƒe zɔzɔ kple Yehowa me la, mina Habel, Henox, Noa, Abraham, kple Sara ƒe xɔse nanɔ susu me na mí. Esi Paulo yɔ wo vɔ la, eŋlɔ be: “Le xɔse me amesiawo katã woku, eye woƒe asi mesu ŋugbedodo la dzi o, ke wokpɔe, eye wodo ɖoaƒe nɛ le adzɔge, eye woʋu me be, yewonye amedzrowo kple mɔzɔlawo le anyigba la dzi.” (Hebritɔwo 11:13) ‘Denyigba si nyo wu, si nye dziƒo tɔ’ dzro xɔsetɔ mawo. (Hebritɔwo 11:16) Le xɔse me, wokpɔ mɔ na teƒe si nyo wu le Mawu ƒe Mesia Fiaɖuƒea ƒe dziɖuɖu te. Míate ŋu aka ɖe edzi be Mawu atsɔ agbe mavɔ aɖo eteƒee na wo le teƒe ma si nyo wu—anyigba dzi Paradiso si anɔ Fiaɖuƒe dziɖuɖua te.—Hebritɔwo 11:39, 40.
19 Nyagblɔɖila Mixa gblɔ alesi Yehowa ƒe amewo ɖoe be yewoasubɔ Mawu tegbetegbee. Eŋlɔe be: “Ne dukɔwo katã dometɔ ɖesiaɖe le zɔzɔm le eƒe mawu ƒe ŋkɔ me hã la, míawo ya míazɔ le Yehowa, mía Mawu la ƒe ŋkɔ me ɖaa tegbee.” (Mixa 4:5) Mixa subɔ Yehowa nuteƒewɔwɔtɔe vaseɖe eƒe ku me. Ne wofɔ nyagblɔɖila ma ɖe tsitre le xexe yeyea me la, ɖikekemanɔmee la, ayi edzi azɔ kple Mawu ɖaa tegbee. Kpɔɖeŋu nyui kae nye si wònye na mí amesiwo le nuwuɣia ƒe yɔyrɔenu!
20. Nukae wòle be wòanye míaƒe tameɖoɖo kplikpaa?
20 Lɔlɔ̃ si míeɖena fiana ɖe Yehowa ƒe ŋkɔa ŋu la dzea eŋu. (Hebritɔwo 6:10) Enya be mele bɔbɔe na mí be míalé nuteƒewɔwɔ me ɖe asi na ye le xexe sia si dzi Abosam le ɖuɖum me o. “Xexeame va yina” ya, gake “amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” (Yohanes I, 2:17; 5:19) Eyata le Yehowa ƒe kpekpeɖeŋu me la, mina míaɖoe kplikpaa be míado dzi le dodokpɔ siwo míedoa goe gbesiagbe me. Mina míaƒe tamebubu kple míaƒe agbenɔnɔ katã naku ɖe yayra wɔnuku siwo ƒe ŋugbe míaƒe Dziƒofofo si lɔ̃a mí la do ŋu. Woate ŋu aka mía si nenye be míeɖoe be míayi edzi aɖoe be míazɔ kple Mawu tegbee.—Yuda 20, 21.
Aleke Nàɖo Wo Ŋui?
◻ Tameɖoɖo kae le Mawu si na amegbetɔ siwo nye toɖolawo?
◻ Nukatae Yehowa metso haɖe ɖe xexeme mavɔ̃mawu sia ƒe nuwuwu hehe vɛ ŋu o?
◻ Nukatae mele be ɣeyiɣi si tututu dzi Mawu atso ɖe nuwɔwɔ ŋu manyamanya nafa lãme na mí o?
◻ Vi siwo eɖoɖo be míazɔ kple Mawu tegbee ɖena na mí dometɔ aɖewo ɖe?
[Nɔnɔmetata si le axa 17]
Zɔzɔ kple Mawu bia be míasubɔe dzonɔamemetɔe abe alesi Kristo ƒe nusrɔ̃la gbãtɔwo subɔe ene